بو يحيى

والله ماادري اضحك والا ابجي عشان بو يحيى .. مااقدر اشوف ريال يبجي بس الي يبجي عليه ما يسوى هالكثر مشكله الحلال والله شوفوه وهابي ويك اند

حسن و مرقص ... يزيد و عباس !؟!؟

تحديث

العرزاله كتب خبر بانهم لقوا حسين الفضاله قرت عين اهله والحمدلله على سلامته وناطرين الاخبار

بما ان الاخت العزيزه الزين صبحت بمدونتي اليوم وطلبت اني اصور الصوره الي ما صورتها .. وبما ان اختنا العزيزه الزين تستاهل صورنا الصوره بس حسافه الاعلام مو راضين يتحركون نفخت عليهم هم ما نفع المهم العلم الي يم علم الكويت اهو علم السويد وهذي اهي الصوره صورتها اليوم

اولا احب اشكر الاخت اليوفي على وضعها للبوست والتنويه على الفلم الجميل بمدونتها واهي الي خلتني اسحب على بات مان واروح حسن ومرقص الي ما كنت ادري انه نازل بالاساس

الفلم من اجمل الافلام الي شاهدتها من حيث الهدف .. والي يبي يروح عشان بس يضحك لا يروح .. الفلم باختصار يتحدث عن المسيحيين والمسلمين بمصر المحروسه والاحداث تهدف الى ان الدين لله والوطن للجميع وايضا الانتماء للوطن لا تحدده اديان وغير هذا العلاقات البشريه يجب ان لا تتأثر باختلاف الديان والمذاهب وايضا نبه بان الاسلام دين سهل الفهم وبين من يغالي بتمجيد الاشخاص وغيرها من النغزات الرائعه

بصراحه ابدع عادل امام و عمر الشريف باختيار القصه من زمان مو شايف شي له هدف سامي مثل هالفلم .. وهذا يخليني افكر وين مسرحياتنا السياسيه القديمه وين المسرحيات الهادفه ؟؟ صفينا على شوف ويهك وشوف راسك وريحتك خايسه ؟!؟ لا هدف من المسرحيات والمسلسلات طراقات وبجي ولازم غني وفقير وما عندهم سالفه الا ما رحم ربي

وانا اطالع الفلم طرت على بالي شغله .. لو عادل امام يبي يسوي هالفلم بالكويت شراح يسميه ؟؟ راح يتعب والله .. شنو بيختار يزيد وعباس والا شليويح و هاني والا مصعب وسامي والا عايشه و زهراء والا فهد و خضير والا علي وعبدالرضا والا البراء و احمد والا عيمانوين وعبدالرحمن والا منو والا منو والا منوو عندنا خلافات واسامي ما اتخلص بهالموضوع واللبيب بالاسماء يفهم

ما اخبي عليكم اني مستانس على تفاعل الكل مع قضية حسين الفضاله وهذا المطلوب منا ولكن اذا رد لنا سالم انشالله راح انرد حق خلافاتنا وبلاوينا الي ما اتخلص

واحد كان رايح معانا الفلم سألناه ها شرايك بالفلم قال بايخ وبعدين هالفلم حطوه لان في مشاكل بمصر يعني الاخ اكتشف الذره الحين لا وعقب قال شباب حرام مسيحي يتزوج مسلمه يعني الحين مسكت تالي رفيجي الثاني قاله والشيعي اذا اتزوج سنيه قاله فيلسوف زمانه حرام ؟؟؟ على طول افتى الحبيب وقطها براس ماادري منو واذا توهق قالك اسال ماادري بسال بن تيميه الحين ... تخلف تخلف تخلف .. انتوا شوفوا على شنو ركز هد كل اهداف الفلم ووقف على هذي يبا من قالك زوج لا تزوج اساسا في سنه ما يزوجون سنه وهذا شي متوارث لعادات اجتماعيه قديمه كيفهم يا حبيبي ركز على الاهداف الاساسيه طبعا ما ناقشته لاني لو مناقشه جان صار مالا يحمد عقباه

وطبعا في ناس وايد مثل صاحبي مفتي العصر والمكان والزمان و مثل الي حاط هالصوره ومعلق عليها .. هد الفلم ويقول ليش لبس صليب ... تمثيل يا بني ادم والفن المفروض انه رسااااله الريال ما كفر .. عيل جذي ثلاث ارباع المسلمين كفار لان فنايل النوادي الاوروبيه او المنتخبات فيها صليب مثل برشلونه والانتر و و و و

اخير ابيت اني انام قبل لا اكتب البوست .. لا وبعد وانا طالع لقيت علم السويد يرفرف يم علم الكويت صوب ايكيا الافنيوز بغيت اصوره بس افتشلت ناس ولويه وانا حالتي حاله غتره وعقال ما سوى علي الضغاط الي بييني وانا اصور زين ما يقاطعون الافنيوز بعد من هالعلم .. يا ناس حبوا بعضكم وخلوا الكويت هي الرابط بينكم ترى بدونها احنا ما نسوى شي والكل يحترم ديانة الاخر الي يخطي نحاسبه لو كان منو والي يسوي شي ينفع البلد نوقف معاه وشوفوا الفلم وركزوا على الاهداف جزاكم الله خير

اللـــــــــــــــــــــــهم لا اعتـــــــــــــــــــــــــــــــــــــــــــراض

حتى الحداق لا تحدقون

شاب كويتي قرر يروح الحداق شي عادي الكل يروح الحداق .. جك بم ياهم الطراد الايراني وتل الولد التفاصيل عند الاستاد حمام

يعني حتى الحداق اتخاف اتحدق يا طالعين من الشمال والا الجنوب والا الشرق على الاقل لو من الجنوب نقدر انتفاهم وياهم هالايراني اشلون تتفاهم وياه بالله اشلون اقوله ياي احدق بالايراني ؟؟؟ نتمنى من وزارة الخارجيه بذل اقصى ما يستطيعون لاخراج حسين الفضاله واعادته الينا سالما غانما وتقر عين الكويت برجوع ولدها ... ردوا لنا الفضاااله

--------------------------------

من قاريء الى مدون موفق يا ويلسيرفس بالمدونه اليديده

-------------------------------

اللهــــــــــــــــــــم لا اعترااااااااااااااااااااااااااااااااااااااض

شيلوا قشكم .. نبييييكم

اتحفتني القوانين الي حاطينهم اليوم بالقبس المخصصه لاستخدام الانترنت .. طبعا في قوانين ما يختلف عليها اثنين واساسا ملتزمين فيها وخالصين ولكن في بنود بهذه القوانين ما تدري يعني شنو اهي وهل هي تنطبق عليك والا لأ

.

طبعا ليس غريبا علينا ما يحدث وما يريدونه من اسكات المدونات وتقنين استخدام الانترنت للمشاركات الرياضيه ومتابعة انتقالات اللاعبين .. عندما ياتي الينا هذا القانون بعد كلام المسئولين عن المراقبه و غيرها وضيق صدرهم لما يكتب بالانترنت نعرف بانه قانون وضع لكي يتخلصوا من من لا يريدونهم .. يعني اذا ما يبونك تلوك وقالولك انت مخالف القانون وافتكوا منك .. لان القوانين غير واضحه وفيها الكثير من علامات الاستفهام

.

بصراحه لا اعلم لماذا هذا التضييق ولماذا لا يريدون بان يكتب الشباب الكويتي بالمدونات اراءهم وافكارهم السياسيه والاقتصاديه ويعلمون بان هناك من ابناء الكويت الذين تهمهم مصلحة الكويت .. ما هي المصلحة من التضييق والارهاب الفكري الذي يحدث ... دعونا نكون واقعيين مدونات الالحاد والجنوس والصبيك لا اعتقد بان لهم هذا القدر من المتابعين والمتأثرين بهم فهذه المدونات اعتقد بانها ستكون موجوده لفتره وستختفي مع الزمن ارجوا ان لا يكون هذا عذرهم وبان هذا القانون وضع لاجل هؤلاء فقط

.

اما اذا كان المقصود هم المدونون ويريدون ان يقضوا على هذه الظاهره المؤرقه لهم من الممكن ان يصيبوا لان ما ان يتم هذا القرار اعتقد بأني سوف اغلق المدونه لاني اولا لست محسوب على الاخوان او السلف عشان يطلعوني ولا التحالف او المنبر عشان يسوون مظاهرات حقي .. طبعا هو ليس خوفا ولا جبنا ولكن باب اييك منه الريح سده واستريح ما تبونا نكتب محنا كاتبين ولا امرمط العالم وياي عشان يطلعوني لي كتبت شي .. طبعا واحد اييني يسال الحين انت ما كتبت شي غلط .. مو خوفك من الصح واذا كتبت شي ما عجبهم تلوك وعطوك من هالقوانين الي ما فهمتها ونق ماادري جم الف دينار او انسجن ... محد قالك تكتب

.

على العموم ان لم يتكلم الناس هنا فسيتكلمون بالدواوين واذا مو بالدواوين بالبيوت واذا مو بالبيوت بالشاليهات واذا مو بالشاليهات بالمزارع واذا مو بالمزارع بالجواخير واذا مو بالجواخير بنص البحر بالطراد واذا مو بالطراد بره واهم مسافرين تعالوا صيدوهم عاد عاد المفروض نختار دول غريبه

.

اذا كنا نريد ان تكون الكويت علم من اعلام الازدهار يجب ان لا تكون هناك قيود على حريات الافكار وخاصة بالانترنت هناك الكثير من الطرق التي من الممكن ان تستخدم ولن يستطيع احد ان يمسك بك وهناك الكثير من البرامج التي تفتح المواقع المحظوره يعني بحر ما تقدر اتسيطر عليه ... اتمنى ان يعوا بان كل ممنوع مرغوب وان كلما كان هناك كبت وقيود فان النتيجه ستأتي عكسيه ولن تكون نتيجه ايجابيه على الاطلاق بعدها فعلا سيتوجه الناس الى السلبيات ويتركون الايجابيات لان كل ممنوع مرغوب اللهم اني بلغت اللهم فاشهد

.

على العموم ننطر وانشوف شيصير واذا فعلا هالقانون تطبق مااقول الا كاسك يا وطن

.

.

.

اللـــــــــــــــــــــهم لا اعتـــــــــــــــــــــــــــــــــــــراض

It is not a puzzle !!!

لو اتعدون الرقم الي بالصوره راح يطلع 26 وبالسادس والعشرون من هذا الشهر اتممنا السادسة والعشرون ربيعا وامنيتي ان عمري يرد حق 19 سنه ... مو قلنالكم نوت بازل :) في ناس صادوها

ابراج الكويت

لكل بلد رمز او بالمعنى الصحيح صرح تعرف به ... مثلا برج العرب يدل على دبي والاهرامات تدل على مصر وبرج ايفل يدل على فرنسا وبرج بيزا يدل على الحب ايطاليا .. وعندما تذكر ابراج الكويت فانك ستقول تدل على الكويت طبعا لست اقارن الابراج ببرج ايفل او الاهرامات انما هي حقيقه تدل على الكويت وهذا ماكنت اقصده

شيدت ابراج الكويت لكي تدل على التطور الكويتي والنماء الاقتصادي وانتقال الدوله من مرحلة لاخرى ولكي تكون رمز للكويت الحديثه التي اتت بعد طفرة النفط .. وكم كنا فخورين بهذا الصرح وكم كنا نتباها وكم كنا نفرح حينما يزورنا الاقارب من الخليج والاصدقاء من الدول العربيه وهم يتمنون رؤية ابراج الكويت

الاسبوع الي طاف كنت طالع مع رفيجي وعقب ما خلصنا شغلنا قلتله وين بتتغدى وكل ما طرينا مطعم قلنا ملينا منه واحنا نتمشى بالسياره وصلنا صوب الابراج في مطعم مفتوح يم الابراج قلنا خل انشوف شسمه والا فيش ماركت وماادري شنو مطعم ياباني .. جان اقوله اشرايك اندش الابراج جان يقولي اتصدق شخباري الابراج لي الحين فيها مطعم قلتله اتصدق ماادري انا خبري فيه عقب الغزو اول ما تبطل ييت جم مره وعقب ما ييت قالي يبا توكل على الله خلنا انشوف شسالفة ابراجنا

ولما وصلنا المطعم والا الديكور اهو اهو من سنة الطفحه السقف الي على نجوم والطاولات اهي اهي وكل شي على ماهو عليه .. قلت حق الويتر ابي سموك ايريا يعني مكان للتدخين قالتلي كل الطاولات فيها تدخين ؟!؟ اي شي شخباااري كل الطاولات فيها تدخين قلتلها اوكي وقعدنا ... وياليتنا ما قعدنا

قمت اطالع حوالي والا مدرس درسني اسلاميه قبل عشر سنين قاعد مع واحد واذكر هالمدرس بالذات لانه كان وااايد متطرف كل شي عنده حرام تلفزيون حرام لعب جنجفه حرام خاااصه الحريم كان يقول لا تسلم على بنيه ولا تشوف بنات عمك ولا بنات خالك ولا تسلم عليهم وحرااام وعيب وما يجوز ومن هالحجي ... قلت بقوم اسلم عليه جود يذكري والا شوي والا داش واحد معاه ذيج المره الي قاصه بوي بس كبيره بالسن وتتمخطر والا يروحون عند طاولته .. يه شالسالفه جان يقوم ويسلم عليهم ويسلم عليها ايييد بايييد ؟؟؟؟ وين الحرام ووين العيب .. على فكره اهو بالطاوله الي وراي ولا تشوفونه اشلون يتغشمر ويسولف لا ويعني يسوي مثل المسلسلات يعني يقول يالله انقوم ناكل انا جوعان هاهاهاهاها والا اشرايكم انحلي هاهاهاها ... شكو تظحك ؟؟؟؟؟؟؟ يعني عايش الدور انه رجل اعمال وطبعا صوته بط اذني ذبحنا بكمل ماستر اقتصاد اسلامي بمصر وساقط ومستانس مدرس اسلاميه وينك ووين الاقتصاد

انا قلت بالطقاق ماني مسلم عليه قبل ذبحنا بالحرام الحين يسلم على هذي ويتميلح يعني بيصير تاجر عاد شكلهم نصابين الي وياه ... المراد طالعت الطاوله الي جدامي والا معيديه والله العظيم معيديه والدليل دق التلفون والا الحبيب يصرخ واهو يتكلم .. ولك حط السطحه وخلك باللوري ؟؟؟؟ يا سلاااام تاجر سطحه ولوري بالابراااج والي معاه امبطل الزرارات ماادري ليش لابس دشداشه والي يمه لابسلكم ذيج الغتره المعلجه ودشداشه مخصره ومقصمله يعني الحاله كسيفه

طبعا انا ميت من الضحك لما قال سطحه ولوري .. وقاعد اتحلطم على مدرس الاسلاميه الي وراي ذبحنا سعوديه وقطر والكراتين اهناك ارخص وماادري شنو ... تحجوا اشوي اشوي درينا تاجر والله درينا ودرينا عندك تبعيه سعوديه وجنسيه قطريه خلاص اسكت .. قمت وقلت باكل سلطه والا عائله من الاخوان البدون جنهم اول مره يروحون مطعم يتناقزون جدام بعض حسبالهم كول الله يلوع جبدهم .. طبعا السؤال اشلون عرفت انهم بدون اولا من الشكل ثانيا من اللبس ثالثا البدليات الي مالها اول ولا تالي

ورفيجي يطالعني ويضحك وانا واصل حدي قعدنا وقمت اتحلطم عليه اقوله احنا يايين الابراج والا وين بالضبط شنو هذا شهالناس .. شوي والا عائله كويتيه يايين اشزينهم .. طبعا الي كسر خاطري اماراتيين يايين بيشوفون الابراج بغيت اقولهم لو يايين بالثمانينات ميخالف الحين شيايبكم بويا سيروا لبرج العرب هاي مو مكانكم

ابراج الكويت قاموا ايوله سواقين السطحه واللوري .. والاكل الله يزيد النعمه ويقولون شتبون بالقطاع الخاص .. يعني بالله عليكم هذا شكل ابراج وصرح معماري للديره مطعم عادي جدا يذكرني ببوفيه الدوام والقعده هم عاديه جدا ليش ما يغيرون طبعا الحين بيقولي واحد انت ليش مستحقر الناس يعني ما يروحون ؟؟

انا مو مستحقر الناس ولكن هل اتشوف هذيل ببرج العرب ؟؟ مستحيل .. يا اخي اذا ما عندك غيره على صرح ديرتك انا عندي .. يعني بذمتكم لو انغير المطعم وانحط مطاعم عالميه وعلى مستوى وانغير الديكور وانخليه من اروع ما يكون وانحورف بالابراج من بره شوي وانزين ليتات والوان واتصير دشة الابراج بالملابس الرسميه يا غتره وعقال او بدله رسميه ماراح يكون هيبه اكثر ما تكون الابراج من الاماكن الي تفتخر اتعزم فيها رؤساء الدول الي يزورونا او مدراء الشركات العالميه او اخوانا الخليجيين والعرب الزائرين ؟

لما اتحطلك شوية اشياء ثمينه داخل ..حركات.. ذهب .. مطاعم عالميه فرش عالمي اشياء جميله وغريبه ماراح يسوون لنا برنامج عن الابراج مثل ماسووا حق برج العرب والناس تتمنى اتزورنا عشان اتشوف الابراج .. يا جماعه تبون الكويت اتصير مركز مالي وابراج الكويت جذي صايره اشلون ؟؟ على فكره توه حاطين الابراج شعار البلديه

لم يكن قصدي ان استحقر الناس او ماشابه والعياذ بالله ولكن غيرتي على صرح ديرتي خلاني اتحجى والي بيقول عنصري بقول اي عنصري كيفي كويتي ... انا اقول سنعوا هالابراج وعطوها حق قطاع خاص اذا ما تقدرون اتسنعون شي على الاقل خل يرقع الموقف يمكن يسوي شي حلو حقها

اخر شي طلع الحساب 22 دينار ماادري ليش وانا انصدمت اشلون بو لوري دفع طلع مو هين بس اذكيا مو شاربين لا ماي ولا بيبسي ...ومع كل هذا استمتعت بالقعده مو عشان المكان ولا عشان الاماكن الخلاابه الي بره نص الكويت براحات وبحر فاضي ومطاعم .. لكني استمتعت لاني تذكرت الذكريات الجميله والطفوله البريئه ومع هذا الكويت لازالت جميله

اللــــــــــــــــــــــــــــــهم لا اعتــــــــــــــــــــــــــــــــــــــــــراض

اجازه 3 ايام وراد انشالله .. ثلاثه على يال البحر تضوي من بعيد

حتى امريكا تشتكي

وصلني ايميل من احد الاصدقاء المتواجدين ببلاد العم سام .. وكان يشتكي من التخبط بالملحق الثقافي وتأخير نزول المكافئات الاجتماعيه وغيرها وسأضع الايميل بنهاية هذا البوست بدون تعديل

.

ما يحز بالنفس هو ماقاله لي من مواقف حدثت لبعض من ابناءنا هناك بعد ان تحدثت معه ... بصراحه هو شيء يبط الجبد ومحزن في بعض الحالات ... هناك من ياتي للدراسه ولكنه بعد سنه يسحب اوراقه ويعرفون بعدها بانه اتي للسياحه فقط ... وهناك من يغير الجامعات على راحته ولا احد يحاسبه .. وهناك من يتبهذل بالاف بي اي او غيره فقط لاشتباه ولا يقف معه الا السفاره السعوديه ؟!!؟ ماادري وين سفارتنا ... ومكافئات التفوق تنزل لمن لا يستحقها ؟!؟ .. والادهى من هذا ان الطلبه المبتعثين على حساباتهم الخاصه بضعون شيك بالتعليم العالي لكي ينزل المعاش حقهم .. ولكن اذا سجل الطالب اقل من 12 وحده ما ينزله معاش ؟؟ يعني حتى على فلوسه متجيعصين .. هذا غير الطلبه المبتعثين على حساب الحكومه ومعدلاتهم اقل من المعدل المطلوب للابتعاث ؟!؟!

.

هذا باختصار ما اوجزه لي الصديق بعد الحديث معه .. وهنا يأتي السؤال من هو المسؤول عن هذا التخبط ومن هو المسؤول عن هذه التعديات .. وماهو ذنب الطالب المستحق للبعثه واخذها غيره وذنب من يدرس بكد ولا يحصل على تشجيع وما ذنب الكويت لكي نبعث من لا يكون اهلا للدراسه

.

الموضوع متشابك جدا وله ما له من تبعات ولكن الا يستحق النظر له ؟ ..اليسوا ابناء البلد اليسوا شباب المستقبل ؟ انهم في بلاد الغربه وهذا ما يحدث لهم .. وعندما سألت عن اتحاد الطلبه وما يفعلون لهم بحل المواضيع يأتيني الرد قالي انه يعتمد على المندوب اذا كان المندوب شقردي والا لا في مناديب ممتازين ومناديب تسمع عنهم وما تشوفهم هذا غير اذا كنت بتكلم احد جنك بتكلم وزير وارد واقول مو كلهم ... من ينصف ابناءنا هناك ومن يساعدهم اذا وقعوا بمشكله لا قدر الله ومن يستمع الى مشاكلهم .. لقد هالني ما سمعت منه .. يمكن ولايته والي يدرسون فيها من غير الرضي عليهم او من عيال فلان وفلنتان ممكن .. على الاقل لا تتخبطون بالقرارات واتضيعون وقتهم على الفاضي ترى عندهم دراسه واغلبهم صغار لا تمرمطونهم ... اذا موقع الملحق الثقافي صارله اسبوعين خربان والطلبه المبعوثين على حساباتهم ما يقدرون يجيكون على رصيدهم اشلون بالله يدرون ؟؟؟؟؟ ترى شغلوه توه وانا قاعد اكتب البوست .... على الاقل على الاقل يا بشر لما ايي اعصار عندهم سالوا عنهم دقوا عليهم شوفوا اشفيهم ..اهم بخير والا لا

.

اليكم الايميل بدون تغيير بعد ان شلت السلام والختام وهالايميل طبعا قبل لا اكلمه واسمع منه السوالف الي فوق

.

الموضوع يالزميل عن وزارة التعليم العالي والملحق الثقافي الكويتي بواشنطن.. ماكو ولا طالب كويتي شريف ينكر المساوء والمآسي اللي يعانون منها طلبتنا في امريكا بسبب هذه الوزاره وهذا الملحق الثقافي... فالكل يدري ويشوف التحبط والفوضى الشديده في وزارة التعليم العالي.. وخصوصا في اماكن تقديم الطلبات والمراجعين.. بحيث ان القاعه لا تكفي حتى ل 25 شخص في وقت واحد.. ومع هذا يفتحون باب القبول والتسجيل في هذه القاعات.. والفوضى تعم المكان لمن يجيلهم اكثر من 50 مراجع في نفس الوقت بإعتقاد كل واحد منهم بأنه اذا راح امبجر راح يكون المكان فاضي ويخلص شغله.. وهكذا الفوضى كل يوم.. الشي الثاني اللي ماينسكت عنه ياخوك.. هو الملحق الثقافي والتخبط اللي موجود فيه... مع انه الملحق الثقافي هو اكثر مكان المفروض يكون فيه التزام و انضباط خصوصا بأنه الطلبه في الغربه يعتمدون اعتماد كلي على الله ومن ثم الملحق الثقافي.. ولكن الحاصل واما عيون كل طالب كويتي وتجربته مع الملحق الثقافي تفشل للأسف..فمثلا يقع طالب في مشكله في احدى الولايات في امريكا.. ويقعد من الصبح لين المغرب يتصل على الملحق الثقافي ولكن لا حياة لمن تنادي.. واخيرا لمن يردون عليه... ويقدم الطالب أسئلته ويقولهم شنو تبوني أسوي بحيث اني اقدر اتفادى هالشي.. يأتي الجواب اللي محد كان يتوقعه... الموظف او الموظفه تقوله بالضبط.. آسف أو آسفه اخوي.. انا ماعندي علم بهذا الموضوع.. ياريت تقدر تشوف احد يعرف بهالموضوع.... يايبين فراشين اموظفينهم في أكثر قسم أهميه في الملحقيه الكويتيه؟؟؟؟؟؟ ومايعرفون راسهم من ريولهم؟؟؟؟ والمفاجآت اكثر واكثر... فمثلا سالفة ال100 دينار الاعانه حق الطلبه الدارسين على حسابهم الخاص... اتصلنه في المرشدين في الملحق الثقافي الكويتي في واشنطن.. وسألناهم.. قالولنه ماعندنه أي معلومه عن هالقرار ومتى ينزل وكيف... قلنه مو مشكله رحنه التعليم العالي في الكويت.. واطبلوا اوراق رسميه وغير هذا من أولياء الأمور.. ولمن قدموا أولياء الأمور كل الاوراق المطلوبه.. قالولهم الاعانه راح تنزل بأثر رجعي ابتداءا من آخر شهر سته.. يعني بعد انتهاء المهله المقرره لتقديم الطلبات.. ولي يومك ماشفنا شي.. ولمن سألنا مره ثانيه الملحق الثقافي.. اطلبوا منه نفس الاوراق اللي طالبينها منه التعليم العالي.. مع العلم انه احنه في أمريكا.. يعني من وين أجيبلهم اوراق رسميه وانا في امريكا.. وثاني شي اطلبوا منه انجيبلهم اثبات بأنه احنه ندرس!!!!! وهذي هي الصدمه الكبرى!! يعني انا طالب صارلي كم شهر اهني.. والملحقيه اتشكك في اني طالب أو اني ياي العب؟؟؟آمنا بالله ورحنه جبنالهم الاوراق ودزيناها.. عقب كم يوم.. نجيك البريد ولا الملحق الثقافي دازلنه الاوراق اللي دزيناها لهم.. ندق عليهم نقولهم ليش دازينها له مره ثانيه؟؟؟ يقولولنه عشان احنه صدقاناا لكم وانتوا الحين لازم تدزونها حق اهاليكم يودونها التعليم العالي؟؟؟؟؟؟؟؟؟ وانتوا شفايدتكم يا الملحق الثقافي؟؟ ومو المفروض الملحقيه تكون على اتصال حتى ولو كان بالانترنت مع التعليم العالي؟؟؟؟ أم ان كل جهه تشتغل بروحها ومالها اي دخل بالجهه الثانيه؟؟؟راح الوالد وسأل التعليم العالي وقاله الملحق الثقافي قالنه لازم اندز اوراق ومادري شنو... جان يقولون للوالد لا ما يحتاي احنه اولريدي ماخذين معلومتاهم واوراقهم ليش طالبين منهم اوراق؟؟؟ أكثر من جذي تخبط وفوضى ماشفنه؟؟ وللأسف انه هالادارات الفاشله هي اللي تمسك وتتحكم في مستقبل الطلاب اللي مبعوثين للخارج؟؟؟؟؟؟ وحتى اليوم وانا اكتبلك هالايميل... واحنه موعارفين وين الله قاطنه.. نتصل اهني يقولون شي.. انجيك مع التعليم العالي نسمع شي ثاني نهائيا.. اللللللهممممم لا اعتراضضضضضض

.

.

.

ومني اليكم والى من يعرف من يهمه الامر

.

.

اللهــــــــــــــــــم لا اعتــــــــــــــــــــــــــــــــــراض

كويتي لايعه جبده طلع عميل يا رجاااله

يالله صباح خير .. كل يوم الصبح لازم تطلعلي سالفه يا بالجرايد والا بالدوام .. اليوم الله يسلمكم طلعتلي سالفة ماادري شقول عنها .. عقب ما قريت الجرايد وشربت قهوتي وزقايري .. قلت بجيك على الايميل واطقلي فره على المدونات قبل لا اطلع واستانس بهالجو البديع والا تن تاراا راااااااااان

دشيت مدونة اي كويت والا تحصل المفاجأه بس طقيت على مدونته والا تفتح ثلاث صفحات وكلهم مدونته ... يه شالسالفه قلت بطلع من الباجي وكلما اطق اكس تفتحلي صفحتين ؟؟؟؟؟ لين وصل الوضع على ماهو عليه

ووصلت الصفحات الى 21 صفحه وكلهم مدونة كويتي لايعه جبده

انا قمت افكر قلت لي هالدرجه لابتوبي يحب صفحته ... قلت لا مو معقوله السالفه فيها ان لابد من البحث والتحري

مااطولها عليكم واقعد اسكر صفحه وتطلعلي صفحه الله وكيلكم جني قاعد العب لعبه .. تالي شمرت وطقيت زقاره وقلت لازم احل المسأله ... اطق الت وكنترول ودليت ماادري شيطلعلي لان الوندوز الي عندي فيستا وتوني يديد على الفيستا واقعد اضغط على الاكسات لين ما انمحت كل الصفحات ... فجاه ومن غير سابق انذار ارجعت الصفحات تتبطل ؟؟؟؟ يبا خلاص هونت ماابي ادش عنده ... واتبطل الصفحات مره ثانيه وماادري ليش جهازي متنح على 21 صفحه

طبعا لما تتوهق مالك الا حركه وحده شيل بطاريه اللاب توب ... شلتها ورديت ووجدت ان الجهاز قد اصبح مخرف وانا ماصارلي شهر من شريته

لذا اثبتت التحريات ان المدون كويتي لايعه جبده عميل مزدوج حيث انه يستغل منصبه كمدون لايعه جبده ويعمل لمصلحة الطابور الخمستعش

وهو يريد الفتك باجهزة المدونين لكي لا يضعون البوستات المعاديه للطابور الثامن الموالي للطابور الخمستعش

وقد بدأ بهذه المؤامرة صبيحة هذا اليوم بعد ان وضع مجلة تدوينيه اثبت بانه يريد ان ينشأ مجلته الخاصه التي تهمش المدونين بالتعاون مع جريدة القبس

طبعا ومثل ما اتعرفون بان الصكه الاولى يت براسي لاني مقرود والقراده شي متأصل فيني

وايضا يريد التملص من مطالباتي له من سكرتيرات وسياره لمجلته ووضعي مدير تحرير صفحة الابراج التي تعتبر من اكثر الصفحات حساسيه بالمجله حيث استطيع التلاعب بمشاعر الناس وخاصة النساء لانهم يؤمنون بهذه الخزعبلات وعلم باني ضد الطابور العاشر الي اهو نفسه الطابور الخمستعش بس متنكر

اما سبب فتح 21 صفحه هو انه اخطأ لانه لا توجد جريمه كامله ... حيث ان كلمة السر بالطابور الخمستعش هي 21 كما اثبتت مصادر فؤاد الهاشم لما دق عليه رئيس المخابرات المركزيه الجزر قمريه كما افصح بمقال سابق .. ومن كثر ولع كويتي بهذا الطابور اختار 21 صفحه لكي تدمر اجهزتنا

لذا قررنا الاتي

اما انه يشتريلي لابتوب ثاني... لاني رشيت هالابتوب وقص علي الغانم طلع في شكل يديد حق اللابتوب وعطاني الدقيم ف زلقه بطيحه .. ويحصر جميع الخسائر الماديه والمعنويه ويحجزلي تذاكر مع سكن لاي دوله اوروبيه غربيه وليست شرقيه او جزر فيجي او المالديف او اليابان ... ومو الحين لان ماعندي رصيد اجازات... لكي يعوض عسارتي من صباح الله خير حيث اني دخنت مالا يقل عن 5 سيجارات وعليه فاني زدت مخاطر التدخين ويجب ان يعالجني ويمولنلي بكل اسبوع كرزين بوكس ابيض مع قوطي جبريت بو ثلاث نجوم

هذا لكي يبدي حسن النيه وانه ليس عميل لاي من الطوابير السابقه الذكر ولا طوابير الجمعيه والتموين والمقصف واذا لم يلتزم فعليه ان يتحمل المسئوليه كامله والقرارات التي من الممكن ان تزج به بمشاكل ليس لها اول ولا تالي ومحد راح يتوسطله لانه ما يحب الخرافي وما يشجع منتخب الكويت ولا القادسيه وعليه ستثبت التهمه عليه

هذا ونحن بانتظار بدفاع المتهم واحاله القضيه للمحكمة الدستوريه وديوان المحاسبه ومحكمة الوزراء والتمييز واشهار افلاس مدونته وحصر وراثه

و اللهـــــــــــــم لا اعتــــــــــــــــــــــــــــــــراض

الفرنسيه والغانم وشرين

تحـــــــــــــــديث

استغفر الله العلي العظيم والله ماادري شقول لي هالدرجه ؟؟؟ وصلت فينا المواصيل ان كويتي يشتغل غسال سيارات لا ومحد يبي يخليه يغسل سيارته لاحول ولا قوة الا بالله يالله صباح خير على هالخبر الي يكدر .. يعني هالجمعيات الخيريه الي مقزرينها بره ما يشوفون شصاير بعيال ديرتهم ؟؟؟؟ والا بس يبون يقعدون بره ويقزرونها على الاندونيسيات والبوسنيات والشيشانيات على بن جمعيات اسلاميه .... واحياء التراث الي على قولتهم سمعتها واصله المريخ بالاعمال الخيريه والي دافعوا عنها زين ما ماتوا واهم يدافعون ما يشوفون هالحالات ؟؟؟؟ ولجنة زكاة بس شاطره اتزوج اوكرانيات وبوسنيات ؟؟ وثانيه حق انتخابات .... ما تستحون على وييهكم وين اسلامكم ... حسبي الله عليكم جانكم اتقطون هالفلوس بره وتاركين اهلكم يتمرمطون .. وهذاك طالعلي بالجريده يقولي جهاد اقول طييير بس ذبجتووونا .. ماراح اتكلم عن الحكومه لاني زهقت بتكلم عنكم انتوا ... يعني لازم تطلع هالحالات بالجريده ؟؟؟ ترى الكويتي عزيز نفس حتى لو ما عنده يقول عندي لييييش ما اتروحون تساعدووونهم لييييييييييييييييييش ؟؟؟؟؟؟ مو كويتيييييييييييييين ؟؟؟؟ لعنبوكم كويييييتييييي يطر ماعنده يوكل عياااااله .... حتى صلاة اليمعه نسيتها من كثر ما انبطت جبدي ... حسوا على دمكم ... والي يقولي شوف البدون وشوف ماادري منو والكويتي على راسه ريشه .... اقول اي الكويتي على راسه ريشه غصبا على الي ما يرضى والي مو عاجبه خل يطق راااسه بالطووووووفه ... ااااااه يا كويت يالي صاروا عيالج يطرون من الي يسوى والي ما يسوى والي توه ماخذها بااايق بوووووق اللهم لا اعترااااااااااااااااااااااااااااااااااااااااااااااااض

--------

بما ان اليوم ويك اند وبعض الناس الي يعرفون روحهم راح ياكلوني اذا كتبت شي يضيق الخلق بكتب هالبوست الي ماله داعي

ذاك اليوم ماكو شغل قعدت احوس بالمدونات الاجنبيه منها والعربيه والا اطيح على مدونه ماادري شمكتوب فيها الظاهر فرنسيه المهم من الاصور فهمت مره تظغط ومره منصدمه ومره رايحه البر ومره ريلها لابس غتره شوفوا البلوق بس ماادري اهي تطنز علينا والا اشلون يعني مااعرف فرنسي للاسف

ثبتت الرؤيه وطلعت هولنديه شكرا سدره و انيموس ودكتور اكاديمي لتوضيح الرؤيه

---------------------------

يا سلام يالغانم ... افظل ها .. قول احنا لي حطينا حرف الظاد بدال الضاد يعني نتكلم كويتي كل شي ضايع اما اعلان

وصلني ايميل يقول انهم مطبقين مخالفات على الملابس والحجابات لو يطبقونه اهني الحجاب بو نفخه جم مخالفته اتوقع لجنة الظواهر السلبيه راح اتعجبهم السالفه شوفوا الاصور

ايااااااااااام شرين توني ادري انه لي الحين موجود

تم القبض على عصابه تبيع المواد المحرمه بالجمعيات الاسلاميه من سجائر وكاكاو وخلافه من بلاد الفرنجه وقد قبض عليهم نسور الهيئه وقطاوة ماادري منو

يالله يبا هابي ويك اند

إلا سياييرنا

-1-

.

الا سياييرنا او سياراتنا او أور كارز مايفرق المهم جمع سياره ... شلتوا الدواوين قلنا صح تعدي .. شلتوا حدايق قلنا عدل بعضها تحجب الرؤيه ... تيون الحين واتقولون بنشيل المظلات ؟؟؟ لا عاد لي اهني وانقولكم ستوب .. طبعا مالا داعي اقولكم عن الجو الي ياكل السياره بكبرها مو بس الصبغه .. وهم اتعرفون ان اغلب البيوت قاموا يبنون البيت وبدون ما يحطون حوش لانكم اتوزعون بيوت على 400 متر .. وايضا هناك الكثير من العوائل الي فيها اكثر من 5 اشخاص اي حوش يكفيهم يعني ؟؟ والي شاري سيارته ب 20 الف وحتى الدوام ما يروح فيها علشان لا تلعن خيرها الشمس وعنده سياره ثانيه حق الدوام والثانيه سافطها تحت المظله ... انزين والمظلات الي فيها بس عواميد اول شي يعني مو الكيربي اشلون بتشيلونهم اذا كان حاط العواميد داخل البيت والمظله طالعه لي بره اشلون اتصير تعدي واهي ما لامست ارض الدوله

.

انا ماادري يعني مجلس الوزراء ما يحسون بالحر ؟؟ والا شنو ... مظلات محنا شايلين دافعين فلوس مو طعام شنو انوقف سياييرنا بالحر اي شي ... على العموم انا لقيت الحل بعد جهد جهيد من التفكير المتواصل ..يا ان مثل ما قلتلكم انحط المظلات اليديده الي فيها بس عواميد ببدايتهم وانحط العواميد داخل البيت وبجذي المظله ما تحوش ارض الدوله وبهالطريقه مايصير في تعدي ... مادري عاد شنو قانونية هالموضوع ... والا راح انرد مجبووورين حق الطربال وتعال حط الطربال وشيل الطربال واخذ تحلطم من السايق او الخدامه والي ما عنده قبل لا يسبح يروح يشيل الطربال ويطلع .... اول مره اشوف بحياتي مجلس وزرا يقول شيلوا مظلات السيارات ... باجر يقولون لنا لا توقفون بالسكه حدكم عتبة باب بيتكم والا ازاااااله

.

--------------------------------------

.

-2-

.

طبعا الكهربا كل يوم تطفي على جم منطقه بالديره ومجلس الوزرا يقول مظلات ... وين الاعضاء عن الوزير طبعا حدس و المطران ما يتكلمون يعني خلونا انقول 9 اعضاء .. انزين والباجي .. كل صيف يطلع لنا الوزير مستااااااااااانس بترشيد الي مالها دااااااعي ويقول هالسنه مافي انقطاع ... شنو لاقينا انت ؟؟؟ ترى حر والله العظيم حررررر وترى احنا من اكبر الدول المنتجه للنفط بالعااالم .. هل كيف تنقطع الكهربا .. تبونا انخيس والا انهج من الديره انزين والي ما يقدر يهج من الديره لان مرتبط باشياء حق شغله شنو يسوي ؟؟ يهد بيتهم ويروح ينام بفندق ؟؟ والا كل شوي داق على اهله او ربعه بالمناطق الثانيه يسال اذا انقطعت الكهربا عندهم والا لا وياخذله ربعه بالصاله او الدوانيه وينام .. ماني متحجي عن الحلول والا عن التخطيط الدايخ الي ما حسب حساب هاليوم لاني متكلم عنهم ببوست سابق .. لحظه تذكرت شغله احنا ما عليه نستحمل مواطن لازم نحس بالحر وانموت حر مثل ما قال جعفر رجب الى جهنم..انزين الفقاره المساكين الي بالمستشفيات والي طايح بالعنايه المركزه والي حاطيله اجهزة تنفس والي والي والي... يروح من جيس اهله على بن انقطاع كهربا ؟؟؟ مستشفى الجهرا احترق معصومه استقالت .. وواحد اغتصبوه بمدرسه واستجوبوا نوريه .. انزين ناس راح اتموت ... وينكم يا حامين حمى الوطن من اعضاء ... شوفوا حق منو صوتوا كلهم راح يسافرون وانتوا خلكم بهالقيض ... مسلم البراك مالك حس ... محمد هايف بو ظواهر سلبيه وينك .. بو رميه يا ابو القروض شسالفتك بديت اشك ان عندك قرض متوهق فيه .. الوعلان الي كل يوم مصرح وواصلني مسج من برلماني منك ما تنطق ... والا لان الوزير مطيري ساكتين ولعيون حمران النواظر تخيس وتحترق بالقيض الف عين ؟؟؟؟؟ تدرون شنو الي يظحكني بالسالفه ان الوزير الي مكيف على ترشيد ويقول ترشيد نجحت انقطعت الكهرا عن بيته ... الله ما يطق بعصى اكلها

.

------------------------------------------

.

-3-

.

اقروا هالموضوع .... راح انطر المستجدات

.

وهالموضوع اهدااااااااااااااااااااااااااااااء حق كل واحد يقول عن هذيل انهم يبون مصلحة الشعب وسلملي على البيتنجان شوفوا حق منو صوتوا ... التعليق لكم يا ساده يا كرام

..

------------------------------------------

بس خلاص

.

الـلــــــــــــــهم لا اعتـــــــــــــــــــــــــــــــــــــــراض

هم توارد خواطر ؟؟؟

سكت وايد بس لي متى اسكت ؟؟ يعني لي هالدرجه في توارد خوطر ؟؟ لي هالدرجه الافكار تتوارد .. انتوا شوفوا وانتوا حكموا

.

جريدة اليوم حاطين هالموضوع اليوم .... وهذا بوستي

.

جريدة القبس حاطين هالموضوع بس مو راضي يطلع الملف كامل اهني و اهني .. وهذا واحد وهذا اثنين

.

اذا انا كتبتهم باختصار واهم اكتبوا باسهاب او حطلي نائب مصرح ما تفرق ... يعني هل في لي هالدرجه توارد خواطر ؟؟؟؟؟؟؟؟؟؟ المواضيع والكتابه تأتي من فكره لي هالدرجه تتوارد الافكار ؟؟؟

؟

جم مره اقول توارد خواطر واطوف بس لي متى ..... اترك لكم الحكم ... صج مقهور والله مقهور ما تنبلع والله

.

منو الي ينصف البلوقرز ؟؟؟؟؟؟؟؟؟؟؟ انصفوني يا اخواني واخواتي

.

انزين انا بقول شغله ممكن الافكار تتوارد اذا كان في موضوع الكل يتكلم عنه نعطي مثال الظواهر السلبيه نقدر انسميها مواضيع وقتيه وفي مواضيع عايمه .... خلونا انقول ان الموضوع الي بجريدة اليوم موضوع وقتي والريال مو قصده خلاص انا اسكت عنه... اما سالفة الغبار ؟؟ وخاصة ان الحبيب بلوقر انا لي الحين مو داشه مخي

.

والشيء بالشيء يذكر شوفوا شصار بجريدة القبس اهني و اهني و اهني و اهني وعلى فكره الي يتكلمون عنه الاخوان اهو نفسه الي كاتب الموضوع بالقبس

ز

م

م

اللهم لا اعترااااااااااااااااااااااااااااااااااااااااااااااااض ... حتى هذي زين مايكتبها واحد وهم توارد خواطر

شريطي

-1-

رئيس مجلس الامه جاسم الخرافي دعم الحاجز الامني عند بوابة وزارة الاعلام ... ما تشوف شر يا بو عبدالمحسن عين عين ما صلت على النبي ويعطيك طولت العمر ويخليك ذخر حق كويتي لايعه جبده انشالله وهالحاجز الامني دخيل لكي يسبب الاذى لمعاليك ومو بعيده ربع السعدون سوو جذي محترين يقولون اشمعنى السعدون بالمستشفى وانت لا ..

ما يهزك ريح والحمدلله ماصارفيك شي ولا بالبنتلي

عقب هالحجي الحلو بياع البنتلي 2150 على خرابها اذا ما راح اتبيعني بسحب كلامي وانت بكيفك واذا البنتلي مالت الحكومه اطالب بشراءها بالمزاد العلني على ان لايزيد السعر عن 2150 دينار والا راح اتقدم بصحيفة استجواب لا لها اول ولا تالي لانهم يفسفسون بالحلال وما يخلون الشعب يشتري سياراتهم

:p

------------------------------------

-2-

العرفج زهرة الكويت القوميه ؟!؟!؟ الفراوله اشفيها ؟؟ اشحلاتها وطحيح بالوفره يالله من فضلك ... ما تبون فراوله عندكم النوير اشفيه النوير اشحلاته ولونه اصفر قدساوي وكفايه عبدالكريم عبدالقادر قال واشمك ريحة النوير ... اطالب بتغيير العرفج ليش عرفج ؟؟ لا وزهره قوميه بعد

------------------------------------

-3-

الظاهر شيبت وانا توني طفل بريء ... ذاك اليوم دقوا علي الربع وقالوا يبون يحجزون سينما عاد انا قلتلهم عندكم هالوقت بس لان وراي عرس والوالد مسافر ولازم اروح بداله ... واحد من الربع دق يبي شغله قلتله مو وقته بروح السينما تالي عندي عرس... اطلع من البيت واروح السينما وانا قاعد احاتي الوقت واقول حق ربعي متى يخلص الفلم وراي عرس .... شهالعرس هذا ؟؟؟... المراد طلعت من السينما وزين ما ركضت لي السياره والشباب يقولولي انطر اشوي قلتلهم لا اتأخر عن العرس ... وصلنا العرس ... دشيت والا لا المعرس مو اهو المعرس والا ابو المعرس مو ابو المعرس ؟؟؟ ها شالسالفه ... الحين انا دشيت الصاله والا اسلم على ابو المعرس وابوس المعرس اتقولون اعرفه من 20 سنه .. وزين ما صورت وياه بعد الشباب راح يفهونها هذي .... طبعا انا ويهي يقط الوان الطيف السبعتعش قعدت شوي وطلعت .. وانا طالع جان ادق على ابوي ... يبا عرس ولد بو فلان الي انت موصيني اروحله باي صاله ؟؟ قالي اسم نفس الصاله الي انا فيها ؟؟؟ جان اقوله يبا هذا مو اهو ... مااشوف الا الوالد ميت ظحك ... لو مو ابوي جان صار كلام ثاني ... والا يقولي يبا هذاك عرسه الاسبوع الياي مو اليوم ... وكمل ضحكته ؟؟ جان يقولي جان دشيت وسلمت على المعرس دام انك نزلت ... قلتله نزلت وزين ما لميته وصورت وياه من الفشله

السؤال ليش كنت مختب على العرس ... لاني لو نسيت او ما رحت جان صارتلي سالفه واستجواب ويمكن يطرح فيني الثقه من الوالد ... المهم ما رحت عرسه الاسبوع الي عقبه كيفه عاد

------------------------------------------

اجازة نهاية اسبوع سعيده .... لا تقولون بعد غثيتكم بهالويك اند .... وشكرا القبس والاخت اسيل على المتابعه

عمر الزمن والله ما يغير اصيل

من امس وانا بس قاعد اغني هالاغنيه ... ما اقدر اكتب ولا اقدر اعبر ... اكتب وامسح اكتب وامسح .. ماادري جم مره حطيت هالاغنيه ببوست وهم راح احطها مره ثانيه ... كلمات تذبح ... ويا ارض لا تبجين

اللهم لا اعتراض ومثل ما قال بو سلمى يمهل ولا يهمل

:(((((((((((((((

شكتب ؟؟ ما اقول الا اللهم لا اعتراااااااااااااااااااااااااااااااااااض

.

اقروا الجرايد واتعرفون