Friday, November 23, 2007

الله لا يغير علينا ... لي متى؟؟
















االله يرحمك يا ابو الدستور
عندما نشاهد هذه الصور اعلى تتقافز في اذهاننا الصوره الجميله لهذا الوطن وكم نحن محظوظون لانتمائنا للكويت ولكن تذكر
الدينار من اقوى عملات العالم ... روح الجمعيه واشتر كاكاو شوف جم يطلع عليك
النفط وصل سعره 100 دولار ... شوف حسابك وجم بقى منه 5 الشهر
مجلس الامه منبر الديمقراطيه بالوطن العربي ... ماني قايل شصار الحين
منتخب الكويت البعبع سابقا .... جسر حاليا هذا اذا ما فنقرونا الفيفا مره ثانيه
الشيخ عبدالله السالم ابو الدستور والكويت الحديثه... لو شافها الحين شراح يقول؟
.
.
.
.
http://allah-kareeem.blogspot.com/ قريت في بلوق من البلوقات الاخت الزين كله
كاتبه موضوع بموضوع من صجكم ؟
وانا اقولها مشكوره لانج خليتيني افكر بكتابة هالموضوع
كلمه كنا دايما نسمعها "الحمدلله وعسى الله لا يغير علينا" و"احنا احسن من غيرنا" كثيرا
ما كنت اسمع هاتين الجملتين وكنت افكر لماذا هل صحيح اننا افضل دوله بالعالم وبعد 10
سنوات ونيف اصبحت ادرك معنى هذه الجمله.... لللاسف كانت هذي الجمل كالمخدر الذي
يخدر به الشعب... هذه الجمل كالخمره التي تلعب بعقل الرجل وتجعل كل الذي يراه
جميلا ... قد يسال البعض كيف .. والاجابه انظر حولك انظر للصور السابقه هالدينار هو
الدينار .. هل الديمقراطيه هي الديمقراطيه ... هل النفط دائم ولن ياتي مصدر طاقه
بديل؟ ... وهل ..... لن اكتب هذه الجمله
عموما تمر الكويت الان بمنعطف كبير وهذا ما سببته هاتين الجملين ... مثلا
تحولت الكويت الى 25 دائه والان نجني الكوارث
تم تجنيس ماني قايل شنو وانظروا ما يفعلون
سراق المال العام تركوا وانظروا الان لحكم المحكمه(ترى الي يبوق دينار ونسكتله يبوق مليارات)
جاسم يعقوب و فيصل وفتحي والعنبري والطرابلسي ونعيم واديلم كانوا ابطالا ولكن هل
بحث احد عن خليفه لهؤلاء الابطال هل طورنا من مستوانا واصبحنا ننافس في كاس العالم (
كوريا وصلت المركز الرابع على العالم واحنا عقدتنا صارت البحرين)للاسف
الخطيب الغنيم الصقر وغيرهم وغيرهم هل اتى شخص مثل هؤلاء
(حتى الليبراليين الي على قولتهم وطنيين صاروا يركظون ورا الدينار)
دشداشه وغتره وعقال ... منو قام يلبسهم؟؟ طايحيله سبايكي ولو وست ... لا واذا لبسهه
بالعيد يصير جنه من الكومبارس الي يرقصون ورا خالد الشيخ قبل بغنيه الا تسمع بصوت
الكمنجه.. واكشخ واحد فيهم يشبه عبدالحليم حافظ
البنات شصاروا الحين؟؟؟
الحمدلله والشكر متحجبه وبنطلون والقميص داخل البنطلون ليش متحجبه ماادري... قبل
كانوا مو متحجبات واستر من الحين .. قبل المره لي قالها الريال كلمه قالت حاظر الحين
اترد عليه بعشر .. قبل كانت (الوحده منا عن عشر) الحين الوحده عن سلانيه
طبعا الشباب والبنات مو كلهم بس هذيل الي قاعدين انشوفهم بالسوقه والي المفروض
يصيرون واجهه للمجتمع امام السياح (اهم شي السياح) فشلوناااا
يا جماعه من متى واحنا جذي .... من متى وكل شي صار جبنا لنا مطوع وقلناله حرام والا حلال
من متى والكويت تصير موطن للارهاب
من متى والكويتي يفرق بين شيعي وسني
من متى واحنا انسوي اضرابات عشان الزيادات
من متى ويوقف البعض عند مجلس الامه عشان اسقاط القروض
من متى والجنسيه تنداس ( داس الله على راسها) عرفتوا منو؟
من متى عوير وزوير يتحكمون بالديره ولا احد يحاسبهم ؟؟
من متى وعقب ما كانت الدوريه انسميها العقرب .. الحين الشرطي حاط جل وقاعد يقز
والكل يتفل بويهه
من متى صار تكميم الفواه
من متى سمعنا انا واحد تلوه امن الدوله عشان كتب مقال... ومن متى كنا نشوف امن دولة
ومباحث
من متى والشيخ صار ما يتحاسب حتى لو مو ماسك منصب بس شيخ كيفه ... لا والحين
لازم يمسك منصب
من متى الكويتي يطر؟؟؟
من متى نشوف كويتيات .... لا بفلوس
يا جماعه تكفون قوليلي انا غلطان والا حلمان
لي متى بنقول الله لا يغير علينا واحنا مكانك راوح
لي متى بنقول احنا احسن من غيرنا .. وغيرنا اسبقونا 50 سنه جدام
انا ماني قايل كل الاسباب عشان يصير عندي شي اكتبه بعدين ولكن هالجملتين راح
امسحهم من قاموسي
نعم نحب الكويت وافديها بروحي ودمي وعشان جذي لازم نقول كلمة لأ للغلط وكل واحد
يعمل لها
وكلمة الله يرحمه الي وايد حاطينها .. انا ما راح احطها لان احنا من خلقنا هالشي واحنا الي نذبحه و ولا احد يقدر ياخذ منا حريتنا او يساوم على هذا الوطن
وربي احفظ الكويت من كل سوء
اللهم لا اعتراض




























































16 comments:

فتى الجبل said...

اعفسوا الكويت
الله يعفسهم

ezain_kilah said...

يه يه! يا أنا! صاروا يسوون لي دعاية وإعلان لووووووول

تسلم باشمهندس وحياك الله في عالم المدونات, راح إتلاقينا كلنا بإذن الله إخوانك وخواتك وأنا أولهم

عاد إذا في احد رحب فيك قبلي مالي شغل... أنا قلت أنا أولهم يعني أنا أولهم!! لول

أضم صوتي لأخونا العزيز نهاش وأقول آااااااميييييييين

Sara said...

صح لسانك .. لاول مرة ادخل هذا البلوق وقد اعجبتني كلماتك كثيرا وعبرت عن كل شي يدور بذهني .. سلمت يداك وصح لسانك .. أبدعت وأبدعت وأبدعت :)

شكرا لك شكرا جزيلا :)

جد بدعت احلى الكلمات قلت :)

Eng_Q8 said...

فتى الجبل

آمين



الزين كله

الله يسلمج والله يحييج واتشرف فيج اخت وبالاخوان الي تهمهم مصلحة الكويت
لا تخافين محد رحب :)))
وعلى طاري الدعايه اهي مو دعايه اهي كلمة حق تقال لاني فكرت بالموضوع لما قريت موضوعج وحقوق الطبع محفوظه عندج :))
بس بذمتج مو احلى من دعاية زين :))




ساره


صح بدنج وحياج الله والله يسلمج وشكرا شكرا شكرا على هذا الاطراء اخجلتي تواضعي :))
وهذا مو كلامي هذا كلام كل كويتي تهمه مصلحة الديره

والبلوق توه يديد واتمنى يعجبج حياج الله وشكرا مره ثانيه

Fahad Al Askr said...

نهج من الديرة يعني

قاعدين نتطمش جنب الحيطة ونسمع الزيطة

Eng_Q8 said...

فهد العسكر

لا ما نهج من الديره
ياخي كل واحد يحاول يصلح الي حوله ربعه اخوانه اهله جيرانه الي معاه بالدوام
ترى مو مستحيل ان الواحد يغير شي غلط وخاصة اذا كان غلط
لا توقف عند الحيطه وتطمش الواحد يسعى للافضل باي طريقه يقدر عليها
يا اخوي فهد ترى انا دشيت علم المدونات على قولتهم عشان اكتب كلمة حق ومو مهم جم واحد يقراها انا راضي ان واحد بس يقراها ويتعلم منها او يشوف شي يدري عنه بس رايح عن باله وتاثر في
الكل لازم يسعى لمصلحة البلد وباي مكان يكون فيه وهذا واجب علينا
اما مسالة الهجه صدقني اني فكرت فيها بس منو يقدر يهد ديرته وديرة اجداده والله صعبه ومنو يقدر يشوفها تتمزق جدام عينه واهو قاعد الكويت غاليه يالعسكر وفيها رجال بس يبيلهم من يجمعهم ترى في وايد شباب قلوبهم على الديره وقلياتهم ممتازه بس محد يدري عنهم ولا احد يجمعهم وهذا الامل الوحيد للكويت لان الشباب اهم المستقبل


طولت عليك ادري وشكرا لمرورك وسوري على الاطاله

bass said...

ما عدنا أحسن من غيرنا:((
و الله يغير علينا ألي الاحسن و الافضل حق الكويت و حكامها و يهديهم و يصلحهم !!

دمت بخير

Eng_Q8 said...

آمين

على نفسها جنت براقش said...

اختى شلونك
مو تزعل
كانى مريت
لوووووووول

كـــويــــتـــي said...

الحمدلله وعسى الله لا يغير على اخواننا الاماراتيين

someone_q8 said...

السلام عليكم
اخوي , حبيت اقول قول الله تعالى :( ان الله لا يغير بقوم حتى يغيروا منا في انفسهم ) , يعني العيب فينا احنا
ومدام العيب فينا احنا اللي لازم نتغير , اللي اتشوفه كله سببه الاول يكون بالبيت والتربية , اذا صلح البيت صلحت الامم
وباقي الاسباب الكل عارفها لكني ركزت على البيت بالمقام الاول وبعد باقي الاسباب ما راح اذكرها لانها وااااايد وما راح انخلص
ولك مني كل تحية واحترام

Eng_Q8 said...

براقش

لا مو زعلان الله لا يجيب الزعل :))يا اخوي لوووووووول



كويتي

عسى الله يغير علينا انشالله



someone_q8

عدل وهذا ما ندعوا اليه
بس للاسف هم قله قليله من تتبع هذا الشيء





شكرا لمروركم

على نفسها جنت براقش said...

الحين بتكلم جد

كلمة الله يرحمه مو عاجبتنى

و لا السلبيه اللى الكثير يتكلمون فيها
بس تحلطم و اعتراض

مثل وحده اعرفها زعلانه ان ابوها باع شى من حلاله
و تقول بعدين انا شنو اورث

ليش اهى ما تعمل بما لديها و اذا جاها خير بعد عمر طويل زين على زين

مشكلتنا بهالديره ما نحمد الله و لا نمد ريولنا على قد لحافنا

و بالنسبه الى سياسه الدوله ما اظن لو مجموعة من كبار الديرة لو يتجمعون و يكلمون الشيخ صباح و معاهم خطه منطقيه للوضع الحالى و حاجه الشعب بيعترض

بس طيحوا قروض زيدوا معاشات

ادرى من حقنا و هذا خير ديرتنا بس نبى حل واقعى يعدل الامور
ما صارت الحراميه و الفساد زادوا

كم واحد من المتحلطمين وراء ستار المدونات

ليش ما يطلع بالنور و يتكلم بدون سب او تجريح و كلنا بنوقف رواه

اما اللى يتكلمون بدوانيات الاثنين
هذا ماضى و الحين كل واحد منهم جمع على قلبه ملايين و يقصون على الشباب و يستغلون شبابهم
ما اشوف احد سوا شى حق اهل الديره اقلها مبره تعليميه
مو يبون جيل واعى مثقف

و الا يحليه الخطيب بمذكراته كل شئ صار بحياته صدفه
لا و كان عندهم بيوت بعد مأجره و الشيوخ خذاها

ضحكنى

نسى من يبى يناسب و شلون انه يبى ينتمى الى طبقه معينه بالطول و العرض


هذى الديره تحتاج كل عيالها
كل واحد و شنو يقدر يقدم
مو لازم ملايين و الا ما يصير شئ

نعتبر نفسنا كرة ثلج نتجمع لما نكبر

المجالات وايد لخدمة الوطن

كم واحد منكم فكر انه يسوى عمل تطوعى لبلده

ترى قليل دائم خير من كثير منقطع

و سلامتكم

Selezya said...

لا تنسى بعد .. تفائلو بالخير تجدوه ..
وهالتفاؤل احنا اللي نبنيه ..
كل واحد مفروض فينا يسوي اللي يقدر عليه ينصح .. يهتم .. يشتغل بضمير .. يذكر الماضي تحفيزا للمستقبل .. اذا عندنا يهال ولا اخوان صغار نربيهم على الشي السنع .. وعلى الله نلقى اللي نحصده

Eng_Q8 said...

براقش

اولا انا قلت بالبوست انا ضد كلمة الله يرحمه لان احنا اوجدنا الدستور واحنا نقدر نحافظ عليه

ثانيا ديرتنا المفروض لحافها طويل ويكفي ريولنا وريول عيال عيالنا

ثالثا

منو اهم وجهاء البلد ؟؟ تكفه عطيني اسم منو الي يحس بالطبقه الوسطى الودنيا يكون من الوجهاء
سوري اختي الوجهاء الي تتكلمين عنهم موموجودي او بالاحرى اهم لي خربوا البلد... وايضا البلد فيها قانون احنا مو بالباديه عشان نحط وجهاء ويكلمون سمو امير البلاد
وبعدين الشيخ صباح الاحمد قال بما معناه ان نقضي على الفساد
وهذا شغل مجلس الوزراء والمجلس لكن للاسف لا حياة لمن تنادي


رابعا

معروفين منو يبي يسقط القروض وانا من الناس الي يعارض اسقاط القروض لان كل واحد عقله براسه ويعرف خلاصه

وبالنسبه للمعاشات فهناك ظلم بااااائن يعني يا تزيد الكل يا لاتزيد
انا بقولج شي بسيط الا وهو كادر المهندسين يمشي حق الي بالوزارات انزين واحنا مو مهندسين والا شنو والا لان احنا بالقطاع النفطي

تدرين بقولج شي ترى لو الاسعار مو شابه ضو جان محد تكلم عن الزيادات لو الحكومه تشتغل عدل وما تخلي التاجر على كيفه يحدد الاسعار وتكون في جهة محاسبه لهؤلاء جان ماصار الي صار ... ترى في ناس حالتها حاله وساكتين تدرين ليش لان نفسهم عزيزه وهذيل اهل الكويت دوم نفسهم عزيزه يا اختي
لا تشوفون الي يملي بطنه من كل شي شوفوا غالبيه الشعب انا مستعد يقصون من معاشي بس انهم يعيشون حياة كريمه
لا يصير الواحد نظرته بس حق نفسه وبس ويشوف حياته خل يشوف حياة الاخرين
بس الروس نامت والعصاعص قامت

خامسا

الي تقولين يتحلطمون وراء ستار المدونات
يعني وين تبينا انروح؟؟؟ هذا المتنفس الوحيد
للاسف الكويت صارت دولة بوليسيه محد يقدر يتكلم فيها
وبعدين يطلع للعلن اشلون؟؟؟
انا مستعد اطلع واتكلم بس منو الي يدعمني .. السالفه مو هينه يبيلها دعم مادي ومعنوي
ومنو بيخليني اتكلم الله خير هالاحزاب كوشوا على الاولي والتالي
لسنا نحن من نخاف من قول كلمة الحق ولسنا نحن من يظربون البلد من غير برهان ولسنا نحن من يقودنا اشخاص لهم مصالح... ما يحركنا هو حب الوطن ولهذا نحن نتذمر
قوليلي وين اروح والحين اروح واتكلم ترى في وايد ناس فاهمه وساكته

يا اختي براقش لو ان قلوبنا مو على الديره جان ما تكلمنا عنها والله والشاهد الله لو بلوقي يضرها قسما بالله لصكره الحين
بس الواحد وين يفضفض وين يروووح قوليلي
انا الاحزاب مااحبهم ولا احب انتمي لهم لانهم كلهم لهم مصالح وانا ماراح اصير اداة بايد احد
قوليلي وين اروح وين اتكلم ؟؟


وبالنسبه لدواوين الاثنين واستغلال الشباب قلتلج قبل شوي شنو رايي فيهم



سادسا

من متى والكويت طبقات ؟؟؟ هذي الطبقيه الي تتكلمين عنها اهي الي مودرتنا والا كل واحد صار نده بيزتين قال انا طبقتي فوق غيري طبق الله راسه

يكون بعلمج ان الطبقيه الي تتكلمين عنها ماصارت الا من العصاعص الي قامت والا نسوا انهم كانوا صبيان وظفيناهم وبتقلقسهم وصلوا ... عفوا الطبقيه الي تقولين يبيها الدكتور احمد الخطيب مو موجوده بقاموس اهل الكويت
واذا وجدت فهي من صنع العصاعص يبونها طبقيه طبقيه وراح اسميها عصاعص

وبالنسبه لاحمد الخطيب فماقريت كتابه لي الحين وما اتوقع من هذا الرجل الا كل خير لان برايي هذا اخر واحد من الي يسمونهم وطنيين فاترفع عن الحديث عنه وعن حياته الخاصه


وانا معاج بالنقطة الاخيره نم تحتاج كل عيالها بس وين عيالها؟؟؟
ظايعين بين هالدواوين وهالاحزاب

عفوا يا اختي براقش لا تحطين اللوب على الشباب واهم مو لاقين احد يدعمهم ويدعم الفكر الوطني الي فيهم ... نعم نقف صفا واحدا من اجل الكويت لكن للاسف الكل لاهي بالي فيه

الكل لازم يتكلم مثل ما قلت بردي على العسكر


لكن هناك الصفوه ارد واقول وين تروح تحترق يعني ما تبونها

الدنيا دواره واملي ان يجي اليوم الي تطلع فيه هذي القوه الوطنيه من شباب الكويت ليعيدوا امجاد هذا الوطن ولكن متى؟؟؟


والله يسلمج



اللهم لا اعتراض

Eng_Q8 said...

Selezya


كلام حلو ولكن منو الي يطبقه ... ودي الناس تصير جذي بس وينهم