Wednesday, November 28, 2007

الحمدلله انا بالكويت

تحديث بالاسفل
.
.
.
يمكن تستغربون من التايتل ... لكن صج الحمدلله اني بالكويت ... الحمدلله اني كويتي ... ها شصار فيك سؤال يساله واحد الحين بينه وبين نفسه .... راح اقولكم شصار



انا لي فصلات وايد... والايام الي طافت كنت متظايق المهم قاعد بروحي افكر ... لين طرت بفكري الفكره السحريه


بهاجر..... اي بهاجر واخلي الديره بالي فيه .... جان اسال روحي وين بتهاجر ... جان اقول دام اني لازم اكون


دام اني لازم اكون متواجد يم الديره (لان الوالد والوالده ماعندهم غيري) قلت اروح الديار الي يمنا .. يا قطر يا


الامارات على الاقل جم سنه وارجع وطبعا بكون اهني كل اسبوعين او ثلاث حق اهلي ....


قبل صلاة المغرب نزلت من شقتي ورحت حق الوالده عشان اقيس النبض والا الوالد عندها .. توهقت جان اقطها


يبا بسافر


ابوي : اي يبا روح استانس واذا بتروح لندن قولي عشان اوصيك عل جم شغله


انا: يبا اي لندن اي مانشستر تدري اني مااحب لندن .. يبا بشتغل بره يعني مطري الوضع انا الحين


ابوي: وين بتشتغل ؟ مع نظره خلتني اهون :)))هذي اسميها النظره الساحقه


انا :يبا في شركه بقطر طالبه مهندسين .. وهم بعد الامارات .. تدري يبا قلت ابي مكان قريب عشان كل جم يوم امر عليكم تدري يبا مااقدر على فراقكم


عطاني النظره الساحقه ومشى جني ابجوره .. قلت حبيبي ماكو اليوم انا قانعه قانعه .. انا اقنعت ناس وايد وماني قادر اقنعه الا اقنعه ... جان امشي وراه واحن


مليت من اللون الاخضر انا: ها يبا شقلت اروح اقدم صح يا بعد جبدي يا يبا


ابوي: ليش بتسافر .. قاصرك شي قولي


انا : لا يبا مو قاصرني شي الحمدلله .. بس الواحد يسعى للافضل منها خيره ومنها فلوس زياده زيادة الخير خيرين


ابوي : جم تبي ؟؟


انا: يبا تبي الصراحه السالفه مو سالفت فلوس السالفه اني انا زهقااان من هالديره يبا ماكو شي فيها يفتح النفس الناس


تغيروا .. مشكل .. بلاوي .. ماكو مكان تروحله .. ظيقت خلق ..يا يبا والمشكله الاكبر اقرى الجرايد وشوف ظيقت


الخلق على اصولها ... يبا لا مجلس مثل الاوادم لا وزرا لا بطيخ .. يبا الكتب صارت علينا بالحسره الا اسافر عشان


اقرى كتاب ... الحريه قيدوها ... البوق على عينك يا تاجر ...حتى منتخب ماكو .. شهالديره الي حتى جوها مزاج..


يبا هالمطاوعه مسكوا كل شي ماخلوا لنا مكان كل شي حرام حرام .. يبا الكل صار يقوول يالله نفسي .. ماكو احد قلبه


على الديره... قاطعني


ابوي: ادري شبتقول لا تكمل.. انت الحين بتسافر بره عشان هالسوالف بتهد امك وخواتك وتدري ان ماعندهم غيرك ...


انا ادري انك بتهاجر ولدي واعرفك مو رايح تشتغل بس صادني بس تعال قولي منو الي كان يبجي ايام الغزو وما ينام


منو الي كل ما صار شي بالديره يضيق خلقه ويقول جان زين بايدي شي مو انت... نسيت فلان الي استشهد .. نسيت


فلانه الي استشهدت .. ليش استشهدوا مو عشان الديره مو عشان اتعيش فيها انت وغيرك وما تتشردون .. وبعدين تعال


قولي شنو الامارات وقطر .. انت مستانس بالزياده مالتهم وبعمايرهم .. يا يبا لا نسيت بو عبدالله شكان يقول بو عبدالله


واحد اماراتي نعرفه من زمان نسيت .. تذكر يوم قال حمدوا ربكم انتوا كويتيين ... تذكر يوم قال الامارات ما فيها


اماراتيين .. تذكر يوم قال والله لو الامارات تنغزي محد يردها لان الاماراتيين الاصليين شوي مو مثلكم انتوا يالكويتيين


الي وقفتوا كلكم صف واحد .. تذكر لما قال الناس مو لاقيه تاكل كل شي صاير غالي عليهم وقاموا يهدون دبي .. تذكر


راعي المطعم الي صكر نص محلاته لان الاجار صار دبلين .. تذكر لما عطيتك كتب لا وكتب اسلاميه يعني مافيها شي


اشكثر وقفوك على الحدود مو وقفت 6 ساعات ودقوا على الاولي والتالي لين وافقوا .. يا يبا اهناك لو تتكلم كلمه


تلوك .. ما تقدر تقول شي تسكت وان تكلمت كلمه انت ورا الشمس .. يا يبا ترى الي اتشوفه من بنيان وعمار مو نافع


اهل الديره كلهم يتشكون وزادوا المعاشات لان الناس وصلوا حدها ما عاد يستحملون


يا يبا احمد ربك بدال السياره عندك سيارتين ولسانك هالطول ومحد يكلمك قاعد تنتقد الي تبي ولا احد تجرا بفتح حلجه


احمد ربك يا يبا ... غيرك مو لاقي ياكل او يتكلم .. انت عندك مجلس امه صج مو كفو بس عندك اداة قانونيه تحاسب


فيها اما هناك عندهم رب العالمين .. لا تقولي يبا هذي خمه وماادري شنو هذيل اهم الي الناس وصلوهم هذي


الديمقراطيه ... توني ببطل حلجي عشان ارد ادري شبتقول بتقول عن الدوائر وعن المتجنسين .. يا يبا الدوائر


صاروا خمس والمتجنسين شر لابد منه كل الديار فيها متجنسين لازم تتعايش مع الموقف .. لا يبي يروحلي سعوديه


شفت عيال عمك الي اهناك .. مو محمد هد الديره وراح لندن لانه امسكوه واهو يتكلم والباجي بس همهم ايمعون


بالفلوس عايشين


قاطعته يبا ماكو شغل اروح السعوديه قطر قطر


ابوي: ما اردى من المربوط الا المفتلت نفس الشي ادري انك مستانس على نواديهم .. لا يغرك يا يبا ترى كلهم نفس


الشي .. يا يبا ترى الديره لي الحين بخير دام في شباب مثلك يخافون عليها .. انا ماني خابرك تتراجع بسهوله


انا خابر ان حقك تاخذه تاخذه واذا تبي تسوي شي تسويه اشفيك .. يا يبا انا بقولك شي ترى الديره فيها خير ادري ان


فيها اغلاط وايد واهني اهو دورنا دوركم انتوا يالشباب انكم توقفون بصف واحد ضد الي يبي يخربها سواء شيخ او


طائفه او حراميه انتوا سند هالديره .. لا تقولي شسوي .. انا سويت الي اقدر عليه وسويت شي اتمنا ان الكل يسويه


انا : شنو هالشي ؟


ابوي: اني ربيت ولدي وبناتي على حب الديره هذا احسن انجاز لي بالدنيا اني ربيت شخص يخاف على الديره ويحبها


عشان يبني البلد ويدافع عنها ... هذا الي نحتاجه بالكويت


انا ولا تشوفوني اشلون نفخت ريشي :) : يبا بس انا وين اروح وين اتكلم مايصير انا ميت قهر جذي شسوي ادش حزب


انا مااحب الاحزاب تدري فيني ... وحتى لو بختار تدري فيني مااحب الاسلاميين ومالك امل اصف وياهم ..


والليبراليين اتشوفهم مو مثل اول


ابوي: اصابع ايدك مو سوا لابد يجي يوم الي راح يتجمعون فيه الوطنييين وكلهم يهمهم مصلحة الديره واهني دوركم


انتوا يالشباب .. ترى هتلر مسك الميكروفون ببار وتكلم وقلب الديره ماكو شي مستحيل


انا: انزين متى انا منبطه جبدي


ابوي: انطر من صبر ظفر


انا: الله يكتب الي فيه الخير


طبعا تكلمنا بعدين عن مشاكل الديره وعن احداث الساعه .. بس بصراحه الوالد ذكرني بسوالف كنت ناسيها .. ماادري


وين كانت غايبه عني .. صج غيرت رايي 180 درجه .. مشكلتي اني احب الديره اللله يخليها لنا


عقب ما خلصنا الحجي


انا: يبا تدري اشلون خل نهاجر امريكا والا اوروبا


ابوي : انا اقول روح هاجر حق الدوانيه وطالع المباراة دام النفس عليك طيبه


ملاحظه : الوالده كانت قاعده بينا مثل الاطرش بالزفه بس خانقتها العبره عشان اسمعت اني بهاجر ..ماادري شلون


عطوها حق التصويت الله يطول بعمرها :))) وترى هالسالفه صارت امس
.
.
.
.
-----------------------------------------------------------------------------------------------
خارج النص
انا بعرف الطبطبائي شايفنا يهال ؟؟؟؟؟ شنو يقول يولي ناس من العارضيه؟؟ وين كيفان وين العارضيه يالحبيب
وقالولي لا تستقيل وتخلي المسدين بالا رض ؟؟؟؟؟؟؟؟؟؟؟ هوووووب يالطيب هووووووووووووووووووووب
احنا يهال والا شنو قول توهقت بالسالفه ؟؟؟ وبعدين بتستجوب الوزير على شنو تكفه قولي على شنو الريال ماصارله
شهر ماسك الوزاره ما مداااه يغلط والا الخليفه قاعد على جبدك ... زين يسوي فيك يا غريق كانكون .... اقول
استجوب نفسك قبل لا تستجوب غيرك يا غضو طالبان
------------------------------------------------------------------------------------------------
خارج النص
شيبون من نوريه يا جماعه حتى جريدو عالم اليوم حاطه عليها .... يعني بذمتكم وكيل وزاره طق فوق الستين شنو
بيسوي حق الوزاره ؟؟؟ يعني اهو لو فيه خير جان سوى من زمان ... هذا راحت عليه من زمان ... نوريه الصبيح
ذات نظره مستقبليه ممتازه يا جماعه تبي اطور التعليم الفاشل خلوها ما صدقنا يوصلنا وزير تربيه مثل الاوادم
لا وقاظبينها ليش ترقين واحد ساقط بالامتحان .. اي احنا قاعدين بمدرسه اقول ما يستريحون ويخلون المره بحالها
والله الشرهه مو عليكم على الي وصلكم المجلس انتوا لو دارسين مثل خلق الله جان مارحتوا شريتوا شهايدكم من بره
خلوها تسنع التعليم الي ما يتسنع
-----------------------------------------------------------------------------------------------
خارج النص
يا جماعه اكتشفنا الذره صادوا كتب اباحيه بمعرض الكتب الي بالمعهد التجاري ... خوش صيده على الوزيره
سؤال بريء مو يقولون لا حياء بالدين ... انزين هالكتب اتعلم المرأه اشلون تتعامل مع زوجها .. خلوها تتثقف
شبيصير يعني ؟؟؟ ترى في كتب اسلاميه ومنها كتاب ابن القيم الجوزيه شارح بالتفصيل اشلون لازم تعامل مرتك
لا حاط الرسول عليه الصلاة والسلام كمثال واشلون كان يقبل نساءه قبل المعاشره ... ترى مافيها شي ترى دينا
يسر مو عسر ولا حياااء بالدييين وفي احاديث للرسول الكريم كثيره بهذا الشان ... لا تحبكونها
همسه باذنهم ترى الحين في انترنت يعني البنيه الي بتشوف سوالف خرابيط بكبسة زر اتشوف بلاوي فى تحرمون
عيالنا من التثقف البريء
-----------------------------------------------------------------------------------------------
ادري طولت اليوم وايد بس سوري على الاطاله واتمنى انكم فهمتوني يا اخواني واعزائي اشوفكم على خير
.
.
,
.
.
,
.
.
,
اللهم لا اعتـــــــراض
.
.
.
.
.
.
.
تحديث......
يا جماعه امس كنت رايح اشتري ملابس اشتا فقلت بفتر على المجمعات لحد يروح ماكو شي حلو لي الحين ... المهم ارفيجي صفط سيارته بالمارينا صوب البحر وطلعنا بسيارتي
المهم انا العاده مااطلع بالويك اند بالليل لان ادري هلاقه ويهال وعوار راس ... الساعه 11 يالليل وانا راد بقط رفيجي
والا امة لا اله الاالله وكلهم شباب على 15 16 17 يعني صغار لا وفي اصغر ... والله يا جماعه المنظر ماادري شلون صاير واقفين تقريبا حول ال150 الى 200 يمكن اكثر عند باب لونه ابيض ... وين لما اول ما ادش مسافط البحر اتشوفه على يسارك... المهم قاعدين يرفسون الباب ويصرخون ... يعني الحاله صعبه .. طبعا انا كلش مو ملقوف والشارع واقف جان اسال واحد منهم .... قلتله حبيبي شالسالفه ... رد علي بصوت يدل على انه توه بالغ ... توه صار تحسس وتلمس طبعا مو تحسس وتلمس كلمتين اقوى منهم بس حرصا على الاداب العامه ماني قايلهم المهم جان اطالع رفيجي وارد اقول حق الاخ الي توه بالغ ... ليش عاد شالسالفه .. جان يقولي بنات لابسين قصير وطالعين على البحر شتبي يصير غيفيهم يعني ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
لحظه لحظه يعني الي تلبس قصير لازم يصير فيها جذي؟؟؟؟؟ من متى ماادري ؟؟؟؟ خلونا انقول البنيه غلطانه ... انزين شباب المستقبل الي واقفين ماعندهم شغل... ماكو اهل .. العن ابو داركم الساعه 11 اذا انا الريال قاعد اقول تأخرنا شمقعدكم انتوا بره .... الله يرحم ايام الدواوين نقعد فيها لين تصير ويوهنا طفايات ... بس لا مو جذي والله شنو هذا شصار بالديره .. هذيل ماعندهم اهل ..كل واحد حتى ما بلغ قاعد يتحرش ببنات خلق الله ....
اناشد نوريه الصبيح بوضع قانون على ان كل اسبوع 3 امتحانات وتصعب الدراسه عليهم لان هذيل مو كفو حشيمه لازم في شي يقظبهم اذا ماعندهم اهل يقظبونهم وخلهم يسقطون عشان يشتغلون شواصي او حماميل لانهم مو كفو النعمه .. واناشدها انها ترد زمن الطق والتقريع لان بصراحه التربيه الحديثه ماتنفع لنا اهني ... وروحوا المرينا بالليل وبتشوفونهم ........ انا غلطت ورحت فلحد يغلط الي بيروح خل يروح الصبح او العصر
بس امانه قولولي اشلون بنتطور وهذيل شباب المستقبل ؟؟؟..... الله يستر على الديره من هالاشكال
اللهم لا اعتراض




63 comments:

esTeKaNa said...

انا اقول الحمدلله انته بالكويت
والحمدلله على الوالد صاحب النظرة الساحقه والكلمة الثاقبه
مرات الواحد يحتاج احد يمسكنا من جتوفنا
يهزنا حيييل
يقولنا ويذكرنا باشيا كثيرة نغفل عنها مرات
:)
الله يحفظ ديرتنا ويصلح حالنا

Eng_Q8 said...

مشكوره على التعليق الحلو
وعدل كلامج مرات الواحد مايشوف اشياء جدامه ويبيله من يوعيه

آآآآآآآمين

فتى الجبل said...

أولا الله يخليلك الوالد والوالدة والأهل كلهم
ثانيا عمري ما فكرت بالهجرة ولاني من النوع اللي ينهاش من مشاكله
ثالثا لما تقارن الكويت قارنها باللي أحسن منها مو تقارنها بقطر والامارات
رابعا أكيد ألف الحمدلله اني كويتي ولما أنتقد الأوضاع بالكويت قصدي الارتقاء والوصول للأفضل وما أقصد الانتقاد لمجرد الانتقاد

AnGlOpHiL said...

الله يطول بعمر الوالد


اذا تبي تهاجر علشان تشتغل..فيها غلط خصوصا انك كويتي و عندك خير و الوظيفه تحد الطموح...اما اذا هجرتك علشان الاستثمار و التجاره هني الهجره تستاهل لأنه في وايد انواع للاستثمار تفيد فيها بلدك

ديرتنا صايره بقره حلوب للعالم كله...احنه هم لازم نحلبهم

اما من ناحية السياسه بالبلد...استمتع بحياتك احسن :)

Eng_Q8 said...

فتى الجبل

الله يسلمك ويخليك

كلامك كله عدل بس اخوك فصل ماادري شفيني قمت اخورها هالايام والا انا ضد الهجره بس فيوزاتي ظربت وصلحتهم قاعد على قلوبهم ماني طالع

واكيد كلنا ودنا ارتقاء البلد

-----------------------------------

AnGlOpHiL


وعمرك يا بعد قلبي

والله الفكره كانت لا شغل ولا تجاره الفكره يتني لما زهقت من البلاوي الي فيها لكن الله هداني والحين بقعد هونت

والله مااقدر استمتع بحياتي وهذي سياستنا وانا متعتي السياسه صعب اهدها


===================================
شكرا على التعليفات

Eng_Q8 said...

فتى الجبل


قارنت بينهم لانهم اقرب الدول لنا فقط لا غير لذى اقتضى التنويه

Sn3a said...

الحوار جدا ممتاز
مشكلتنا نتأثر بالاخبار المطبوعه او المسموعه للدوله المجاوره

اما لما تسمع الخبر من اهل الديره نفسهم يتغير الموضوع

الله يخليك حق اهلك انشالله
وحق الديره اللي تستاهل منا وقفتنا

Eng_Q8 said...

Sn3a

مشكوره

عدل كلامج لان التعتيم الاعلامي الي عندهم معيشهم بمثاليه واهم اخس منا


والله يسلمج ويعافيج ويطولي بعمرج

Fahad Al Askr said...

أنا لو منك أهاجر

ومرد للديرة

bass said...

يعني الحين هونت خلاص
مبروك علينا قعدتك

الكويت على كثر خرابها في الوقت الحالي صدقني افضل من قطر و الامارات

الطبطبائي أنسان متخلف ومالي خلق يا خذ حسناتي

نورية و نعم الوزيرة بس السلف و الاخوان ما يبون الديرة تتسنع

على نفسها جنت براقش said...

اللى يطلع من داره يقل مقداره

حمد said...

بصراحة كلام الوالد مقنع ومهم جدا وبه نبرة اصرار على مواجهة المفسدين بدلا من تركها لهم يسرحون بها ويمرحون وهي ارضنا .

ولو ان كان بودي ان اسمع رأي الوالد بخصوص اوربا واميركا لكن ماعليه :) .

شكرا لك على اثارة هالموضوع المهم والقيم والرأي السديد والحكيم الذي اوردته نقلا عن الوالد اطال الله بعمره .

someone_q8 said...

السلام عليكم

انا اقولك روح هاجر وايد احسن لك
تدري ليش عشان اتشوف الفرق بينا وبينهم , واتشيل الغمامة اللي جدامك :))))
الحياة تجارب , واخذ الحكمة من والدك الله يخليه لك
اقعد بمكانك ابرك وقول الحمدالله تره النعمة زوالة والايام دول يوم لك ويوم عليك يا حلو :)))))

Aldenya said...

بوستك صج طويل
بس يشد الواحد
وخصوصا إنك تطرقت لموضوع الهجرة والكويت
والمواقف اللى عززت الفكرة
الله يطول بعمر الوالد
كلامه عدل وفعلا نحمد الله على كونا كويتيين
وبالنسبة للطبطبائي
منصجك تتابع أخباره
أصلا أخباره سوالفه كلها فشنك
ماعنده كلمه
بس فالح يصيد على الاوادم
ويكون سوبر استار الجرايد

الله كريم

Anonymous said...

الله يالدنيا - صرنا نقارن نفسنا بالامارات وقطر !

مشاكل الديره الحاليه صج مو بمستواها - المفروض نكون أكبر من جذي

المشاكل الحاليه المفروض تكون مشاكل دولة فقيره !

والديره للحينها بخير دام فيها ناس نفس اشكالك

وشوف الاهداء :)


http://www.q8world.net/file/fun/w6ne/allah_y5leha_lna.wmv

Eng_Q8 said...

Fahad Al Askr

لوووووووووووووووووووووووووووووووووووووووووووووووووووووووووووووووووووول

والله كنت متوقع اتقول جذي


-----------------------------------

bass


الله يبارك فيج يا معوده اشتبون فيني موذي ولساني طول
:)))

اي والله احسن

اي صح لا ياخذ حسنات

صااااجه بس اشلون نفتك منهم

-----------------------------------

على نفسها جنت براقش


عدل

-----------------------------------
حمد

مشكور على التعليق الحلو والله يسلمك ويطولي عمرك

بصراحه ودي اعرف شيبي يقول بس شسوي زفني .... انطر علي جم يوم واساله :)))

-----------------------------------

someone_q8

الله يسلمك يا بعد قلبي

لا ماني مجرب :)))

وانشالله ما تصير علينا

-----------------------------------


Aldenya

مشكوره على التعليق ويطول بعمرج انشالله

شسوي بعد انا على امل انه يستقيل ويفكنا

-----------------------------------

Anonymous

شفت الزمن ماعليه شتسوي بعد

واشكالك حبيبي :)))

شكرا لى الاهداء مع اني ماشقته لي الحين

===================================

شكرا للجميع

حلم جميل بوطن أفضل said...

و أنا أقول إستمتع بحياتك لأن هالديرة مو للناس اللي تفكر مثلك. هي مرتع خصب للحرامية و الفداوية

و راح تعبش مهموم طول حياتك فيها

ليمتى بنقص على روحنا. الديرة رايحة وطي

و إذا كان لك أحلام إسعى لا تحقيقها

خلك من الوطنية و من هالحكي الفاضي و لا تشارك بجريمة نحر هذا الوطن التي نعيش ماسأتها الآن. لا تلطخ يدك بدماء هذه الأرض الطيبة

صبا said...

الحمدلله ان احنا كويتيين
لو نشوف اوضاع غيرنا ينغمت قلبنا
لاتفكر بالهجره لانه الكويت غالية
لا تفكر انك تخليها بيوم من الايام
الله يحفظ ديرتنا ويصلح حابنا

Eng_Q8 said...

حلم جميل بوطن أفضل


استمتاعي بالحياة اهو المساعده برفعة هذا الوطن


واذا الوطنيه هم فانا راضي بالهم
واذا الوطنيه دم فالكويت يرخص لها الدم

Eng_Q8 said...
This comment has been removed by the author.
Eng_Q8 said...

صبا

ماني مفكر انشالله

عسى الله يحفظها لنا

ومشكوره على التعليق

فتى الجبل said...

ما راح يطور الديرة ويعدلها الا اعادة الهيبة المفقودة للقانون
والله أذكر وآنا صغير الشرطة حتى بالفريج يدورون والياهل اللي يشوفونه لي آخر الليل يقز بفريجه يردونه حق أهله خوفا عليه وعلى الناس
هذا غير شرطة الأسواق
بعدين الألمان الرحل اللي يوا عندنا ما يمسكهم الا القانون

Eng_Q8 said...

اي والله صاج وين ايام عمي الشرطي

الحين ماكو احترام للشرطي لان بصراحه الشرطه اليدد مو محترمين بصراحه محسسني ان اهو وزير الداخليه

وحلوه الالمان منك اساسا هذيل لو بتركض وراهم كل الكويت راح يصيرون شرطه لانهم انتشروا مثل الطاعون والشرهه على الي يايبهم

bass said...

أشلون نفتك منهم

أنيمعهم كلهم من الاخوان و السلف و أي واحد محسوب عليهم و نحطهم بطاريات و نوديهم افغانستان و نوصي عليهم أمريكا ايحذفونهم بقنبلة نوووية

ولي أيسلمك ليه تلوم اليهال وين أهلهم يا اخي التربية و ما ادراك ما تربية الام بصوب و الابو بصوب و اليهال بالشارع

White Wings said...

الله يخليك للوالد والوالدة ولا يحرمهم منك أبد، وخل عنك سوالف الهجرة ترى أييب ربعي البنات وننضم للوالد في حملة طق منظمة لك
:)
الطبطبائي يعتقد أنه ولي أمرنا جميعاً، واذا ما وقفناه عند حده سريعاً، راح يسويلنا هيئة للأمر بالمعروف تمشينا على مزاجه
ثورة، لابد من الثورة
:)

Someday said...

I’m totally against el hegrrah!! If you haggart, o ana haggaart, o all those people who give a dman about this country haddoha, mino yobgah??!??! God created us in this country and we grow from this country, ya3ney shino?? Ma enredlaha shay min elye 3a6atna??? Leave it all to them???? Zieen eysawey fyk your dady!!!
El tarbeyyeeah???? Sallemley 3l tarbeyyeah!! I think ina ehya engar’9at!!! Who eyrabeey hal days??? Allah ey’7alley el osra el kuwaitiah el 7adeytheaah, mama mary o baba rajo!!!! Yaheil ma yo9al fe’7they eygooly ga99eyt wayhych!!! Hatha what do you do to him b3d??? even though they gave them exams, a’7af bs byadresoon!!!

wa6an-alnhar said...

يا وطن ... لك من يحبك

اهداء لكم :)

http://variety.salmiya.net/songs/kuwait/ram/kuwait79.ram

Mishari said...

الله يخليلك اهلك

وصدقنى فكرة الهجرة خاطئة بكل المقاييس
لان الهروب من الواقع دليل عدم المواجه وانت بعدك شاب فلا تختار هالطريج

Selezya said...

ههههههه والله انا اقول اللهم لا اعتراض على بوستك
كل شوي اقرا تحديث تحديث لي متى لوول قلبك مترووووس
عسا الله يخليلك الوالد والوالده والاهل كلهم ..
وحتى انا بعد الحمدلله اني كويتيه .. بس عادي ماعندي مانع اهاجر لو حاصلي :p
الله يحفظ الكويت اناشاللله
مواضيعك السياسيه قريتها عالخفيف جبرني اسلوبك بالكلام اني اقرا ولو اني قايله بعتزل السياسه اسبوع ماقرا ولا شي عنها ..
سالفه مطالبتك لنورية بسالفه الامتحانات لوول حدها عجبتني اي والله يبيله
وترا جد ماكو رقابه على العيال هالوقت ابدا
--
يعطييك العافيه مهندسنا وهد بالك وريح اعصابك
واحمد ربك انك كويتي

AnGlOpHiL said...

قلناها مافي احلى من يوم الاحد الصبح حق التسوق...لاوهم شعب بوحقب يزرقون من الدوام بعد و يرتزون بالمجمعات حق التخزز

و عدل كلامك لا رقابة ولا تربية....يقولك متطمن على الولد ليش معاه تلفون لووول

Eng_Q8 said...

bass

والله كنت مفكر بهالسالفه بس المشكله كيفية التطبيق :))

مو انا دايما يا بس اقول الاهل الاهل الاهل التربيه الصالحه والتشاه اهي الي تخلق الجتمع لكن عندنا الله خير ماكو مسئوليه للاسف تجاه اطفالهم

Eng_Q8 said...

White Wings

الله يطولي بعمرج

لا خلاص تبت :))) بعد بتيمعين ربعج علي لا يبا ماتسوه رايح الدوام مفلوع :))


اي والله لابد من ثوره وانا مستعد ابديها بس اشلون

مالج شغل لي لقاء قريب مع د احمد لبغدادي وبقوله عمي بو انور ابي اسوي ثوره على المتاسلمين اشلون وراح ايي اقولج

Eng_Q8 said...

Someday

اولا سكرا لمرورج الاول وانشالله مايكون الاخير يا اختي في احد الايام يعني مترجم اسمج بالانجليزي :))


صح كلامج بالنسبه للهجره وهذا كان كلامي بالاول بس والله يا اختي اني مافكرت بهالفكره الا وانا حاس اني فقدت الامل ... خل اقولج شي ترى سبب كتابتي بالبلوقز اهو اني تعبت من السكوت والناس الي حوالي هم زهقوا من الحجي فقلت اطلع الفيني اعني ويمكن اكون سبب في فهم شي كان طايف على احد على الاقل سويت شي ينفع المجتمع ... لان الشباب مظلومين بهالديره

وبالنسبه للتربيه للاسف هذا الي حاصل وسبب اثارتي لهذا الموضوع هو تذكير الناس سواء كان ابو ام اخو اخت
على ان لا يهدون عيالهم هدد لانهم اولا راح يظرون نفسهم وبلدهم وراح يظسع عليهم مستقبلهم

وسالفة الامتحانات انا قلتها لاني قلت يمكن الوالدين يخافون على مستقبل الولد اذا شافوه ساقط ويشدون عليه يعني هذا حل من حلول كثيره

وشكرا للمرور

Eng_Q8 said...

wa6an-alnhar

شكرا على الاهداء بس على فكره احب نكك لان هالاغنيه تاثر فيني وايد

وشكرا على المرور

Eng_Q8 said...

Mishari

هلا والله مشاري ترى فاقدينك ياخوك

كلامك عين الصواب يالمشري

Eng_Q8 said...

Selezya

يا بعد قلبي والله اخجلتي تواضعي يالغاليه

اصلا لو مو قاريه موضوع جان زعلت عاد انا زعول حتى سالي فتى الجبل :))


سوري على الاطاله بس المواد كامن دسمه جدامي وماابي اجزءها

وبعدين حرام عليج كله تحديث واحد


اظبطج بالحلول :))) يمكن يحسون على دمهم ويربون واذا مالهم خلق خل يقطونهم على الشؤون يمكن يولدون لنا كوادر وطنيه تنفع المجتمع

ميرسي للمرور

Eng_Q8 said...

AnGlOpHiL

المشكله دوااام مااقدر اطلع :))
ذكرتني بالايام الخوالي والله اسحب على المحاضره وروح السوق


والله مو مخرب الدنيا الا هالتلغون

خلف الله علينا واحنا صغار لعب كرة بالبراحه واذا طلعه كشخه رحنا شوبيز
والحين تلفونات وقز

على نفسها جنت براقش said...

مو قلت لك التربيه يبيلها تعديل
اشوف اوروبا يمشون مفاصيخ و محد درا عنهم

بس عندنا الهلاقه

ما اشوف لا دستور نافع و لا دين نافع

من الجهل

يصير عمر الواحد فيهم 20 و عمره ما قرأ كتاب

حتى دروس المدرسه يدرسون للامتحانات مو حب بالتعليم

انا اقول بدل مدينة الحرير يسوون مدارس داخلية
ما يطلع الواحد فيهم الا يالعيد
و احسن بعدلو اهله يدزون له العيدية بمكانه

حمودي said...

بالكويت يبيلنا مراكز تربي الاهل شلون يربون عيالهم
الخمه زايدين بشكل رهيييييب

----------
اف ذبحني ال
Word Verification
كل مره اكتبه يطلع غلط لازم ابقق عيوني يعني

Selezya said...

نحديث واحد والباجي كله من خارج النص زين عيل شنو اللي داخله :)

5roofa said...

سلاااام

انا اول شي داشه اتاسف و بشدددددددده شديييده

لوول الله يهديك صارلك فتره تعلق عندي و اكلمك على انك بنت ولا صححت معلوماتي

امبي والله سوووووووري ماكنت ادري الا لمه دشيت اليوم و لا حربت اربع كرات قلت يمكن غلطانه

سوووري


على الهجره والله انا قاعده افكر اكمل بس عشان اغير جو بس اني اروح و مارد ماقدر
احنا لي سافرنا كله تشوفنا حاطين على الكويت شكو مادري من زود البرامج لووول

بس يعني الوطنيه مقطعه بعضها بره الديره
و داخل الديره ولا ندري عن قناة الكويت
للحين في صح؟
;p
لوووول

الله يخلي الواد و يطول بعمر الوالده

و على الشباب الصغار انت لو تسمع وسالفهم بالمدراس تخترع

تخيل توه قبل جم يوم طاحين على بنات برابعه ابتدائي يدخنون بالحمامات

عندنا بالمدرسه شباب ايون من المتوسط يتحرشون في بنات رابعه و خامسه

الجيل الياي يخرع الله يستر على عيالنا باجر لوول اتخيل لي تزوجت و يبت ولد
اول ما بولده بيطلعلي بسبايكي و زقاره بيده

سوري على القرقه و السموحه على الخلطبيطه الي صارت

salamz ....

على نفسها جنت براقش said...

ياش مهندز
لووووول
مو بس انا غلطت و كلمتك على انك بنت
حتى خورفه

ما يصير احنا الثنتين غلط

:)

Eng_Q8 said...

على نفسها جنت براقش

اهي يبيلها تعليم من زمان

خوش فكره والله بس اتصير حق الطلاب الي يكونون متعثرين دراسيا وعليهم مشاكل شرط الكل يصير متفوق :))


-----------------------------------

حمودي

اي والله صاج يا بو جاسم والهيلق كثرانين بالديره


سلامة عيونك :)))))


-----------------------------------


Selezya

وهم الموسيقى عندها ما تشتغل وهم تظغط فيني بعد :)))
انا اقول سنعي بلوقج وردي الغناوي :p

خارج النص اهي بعض الامور الي تكلمنه فيها وكتبتها باختصار يا طويلة العمر ومحفوظة السلامه :))
===================================

Eng_Q8 said...

5roofa

عليكم السلام الرحمه

لا عادي سوتها قبلج براقش

بس عقدتوني شكو بنيه ؟؟ المشكله ان مو لايق علي كلش :))) لو بنيه جان طحت بجبد اهلي

وحياج الله بالبلوق



اي والله ماادري ليش الناس ما ينزل عليهم وحي الوطنيه الا بره سؤال وجيه
بس يمكن لان ما نحس بالشي الا ليما نفقده ؟؟؟ ممكن

والله يطولي عمرج وبعمر والديج


بنات رابعه ابتدائي يدخنوووون؟؟؟؟
وشسويتوا فيهم ؟؟؟؟؟؟
والله هذيل لا يتحول امهم وابوهم للمحكمه عشان يتحاكمون

بنات يدخنون والمشكله ما طقوا العشر سنيييييييييييييين يا ناس شصاير بالدنيا انا الزقاره ما طبت حلجي الا اخر ايام الثانويه لا وكنت خايف وهذيل بالابتدائيييي

اللللللللللله يستر الله يستر سترك يا ستار

لا صج انصدمت من هالسالفه شكلي بقرا كتب تربيه وبهد السياسه من هالسالفه




لا بالعكس قرقي على راحتج انا استانس من القرقه لاني استفيد منها بعض المرات وشكرا لمرورج الاول واتمنى ما يكون الاخير

وبالنسبه للالتباس ف عادي بس ابي اعرف السبب ليش وشكرا :))

Eng_Q8 said...

على نفسها جنت براقش


يعني اشلون مايصير اثنيناتكم غلط شقصدج يعني ؟؟؟

شتبيني اسوي فيكم انتي تدرين شالمشكله المشكله ان نكي مو نك بنات شكو تقولون بنيه ؟؟؟؟

يمكن من جمالي الاخاذ :p

Smile said...

تصدق اكثر من شخص اعرفهم .. راحوا يشتغلون بره الكويت
حلوه ان الواحد يكتسب خبره .. بس محد يعو الاهل وخاصة الام والاب
خليك يم اهلك .. والله يخليهم لك
ثاني شي الشرهه مو على هاليهال .. الشرهه على الاهل اللي هادين اعيالهم لي هالساعه
وما يدرون شنو يسون ووين يروحون

Eng_Q8 said...

Smile

اولا منوره البلوق

ثانيا اي صح وايد يشتغلون بره بس اهم شي عندي انا رضا الوالدين

وبالنسبه لليهال اي والله الاهل وما ادراك ما الاهل الكل قاعد يتكلم بس الام لاهيه برفيجاتها وطلعاتها والابو بالمخيمات والدواوين
والضحيه اهي الاولاد والكويت الي راح تنتهي اذا صارت بايد شباب المستقبل

وشكرا على المرور اختي

Selezya said...

لوووووووول لالا انا غيرر انا عين حاشتني
زين زين :p
خلاص جعمتني
:x

Selezya said...

بكملهم 50 كومنتس لعانه :p

Selezya said...

يلا سلام
تمت المهمه

a7La eNG said...

عادي عادي انا بالضبط كل 3 ايام
حزة جااي العصاري اعزف على وتر
بروح اشتغل بدبي
:D

بس ام ناصر لسان طويل و انت كمل الباجي


اقول لك شغلة
الكويت صحرا و يال بحر حالها حال نسبة كبيرة من دول الجوار

ليش غير ؟؟

لان العلاقة بينها و بين الكويتين
فيها خصوصية
:D

و انا ضد المقارنة بينها و بين اي ديرة اخرى .. احنا ما نأجر ديرتنا حق احد عشان يعمرها

عيالنا حتى اسوار المدارس صبغوها عقب الغزوووو
@@

فهمت علي صح ؟

اذا احنا الحين في انحدار
فبعد كل نزلة صعدة هذا ابسط منطق
:)

فيني كلام لي اهني
!
بس كلنا متفقين انه ما راح ترجع الا فينا و انا متفاءلة بجيلنا و اللي بعدنا وايد مو شوية الله يطرح في الجميع البركة
:)

الله يخلي لك اهلك و يتم بينهم باااش مهندس أد الدنيا و ما تدخن
:P

شـقـــــران said...

السلام عليكم ورحمة الله وبركاته
بداية أتمنى من الله أن يمدّ والديك بوافر الصحة والعافية ويديمهما ذخرا لك ولأخواتك

والحمدلله ان الوالد اقنعك وليس عندي كلام ازيده فهو كفّى ووفىّ

ولكن لي تعليق بسيط على رد الأخ العزيز فتى الجبل وردك عليه

فالأخ العزيز ذكر في رده كلمة (الالمان الرحّل) وانت كنت مؤيدا لكلامه وزدّت عليه

وحسبي من كلامه انه يقصد البدو..وبما أني انتمي لأحدى القبائل بمعنى اني بدوي بالمعنى الاصطلاحي.. وجب علي أن اقول كلمة اتمنى ان تلقى الصدى المنشود

بداية قبل أن نكون بدو او حضر او عجم او سنّة او شيعة فنحن كويتيون متساوون بالحقوق والواجبات وهذا حسب الدستور الذي نتغنّى بالحرص عليه بجميع مواده، وعلّنا نفعل

يعلم الله أنني لم أكن أود أن أعلق على هذه الجزئية ولكني آثرت على نفسي أن اقولها بعد أن كثر ما رأيت من غمز ولمز هنا وهناك على مصطلحات مثل المان رحّل ، لفو ، تجنيس..الخ

صحيح أن هناك عيوب مشينة وخلل كبير فيما يسمى بالمناطق الخارجية ولكن هل يجوز لنا أن نعمّم ونحن ننشد الاصلاح؟؟ هل يجوز لنا ان نعاير بعضنا البعض؟؟ ، الحضري يعاير البدوي والبدوي يعاير الحضري والسني يغمز على الشيعي والشيعي يلمز في السني...الخ ، ابهكذا فكر نرتقي بالكويت ؟ابهذه الطريقة نصلح احوالنا؟انحارب الفساد بهذا السلاح؟

أخي الفاضل إن الوطنية ليس صكّا نهبه لمن وافق هوانا أو كان من جماعتنا أو عائلتنا ، إن مقياس الوطنية هو ما بذلنا تجاه الكويت وماقدمنا لها من غالي الاثمان بعد أن احتضنتنا وربتنا على مكارم الأخلاق وعلّمتنا حسن التعليم وأرفعه ، فابتعدوا عن احاديث لاتغني ولاتسمن من جوع ولكنها تأّصل المشاكل وتزيد من الجراح في جسد حبيبتنا الكويت ،فكفانا التكلم والطعن بالناس على حسب اصولهم او مذاهبهم

نعم هناك مشكلة فيمن يقود البدو والحضر والعجم والسنة والشيعة ولكن مدخل اصلاحها لا يأتي من باب التعميم وباب الغمز واللمز

إن من أحد أسباب أزمتنا أننا نعيش أزمة نُخب ، فأكثر من يقود البدو الآن ليسوا سوى رويبضة في ثياب متعلّمين وبعض من يقود الحضر الآن ليس سوى متمصلحين

وأعلم يا أخي أن هناك تذمر كبير جدا بين أوساط كبار السن والشباب - ممن اسميتهم بالالمان الرحّل - على الافعال السيئة واللتي شوّهت اسماءنا قبل أن تشوّه الغير من بعض الطفيليات القبلية
فارتأينا ان نحاربهم ونشكل التجمعات للقضاء عليها

فإن كنّا نحارب افعال تبدر من بعض البدو كالانتخابات الفرعية والتمترس خلف القبليّة ، فإنتم بكلامكم هذا تحبطون مانفعل وترجعونا الى المربع الأول فلا تكونوا انتم وهم علينا



والله والله والله أني لست من هواة هذه التقسيمات والتسميات ولكنّي جبرت بعد أن رأيت هذا التعميم المجحف من اناس نظنهم -ومازلنا- ينشدون رفعة الكويت

فهل مقياس الولاء للكويت وحبها والعمل على رفعتها أن نقول من اتى قبل من؟؟؟من تجنّس قبل من؟؟؟

أهذا هو المقياس؟؟؟

أين الدستور الذي نتغنّى في مبادئه ليل نهار؟؟؟


سبحان الله ، كل ما حاولت أن اتعمق في بحث أصل المشكلة الحادثة في الكويت يتملّكني اليأس من اصلاحها..ولكنها حرب ضروس ولن نستسلم حتى نرد جزء من جميل الكويت علينا


وفي النهاية لك وللأخ الكريم فتى الجبل رأيكم والذي لكم الحق في قوله ونشره ، لكن لا تتجنّوا وتعممّوا من افعال مهما رأيتم من الحوادث والشواهد الكثيرة الكثيرة

نسأل الله العزة للكويت وأهلها

مع خالص التحية القلبية

أخوك المحـــــب/

شــقـــــران (من الالمان الرحّل

فتى الجبل said...

صار جم يوم مختفي وماكو مواضيع
عسى المانع خير

سدرة العشـــاق said...

اللهم لك الحمدو الشكر على نعمة ديرتنا الكويت على كثر ما فيها سلبيات و اشياء تعور القلب على كثر ما نحبها و نعشقها يوم عن يوم ... اقظب ارضك ان هاجرت بتخليها حق منو و لا منو حق اللي توهم متجنسين و لا البدون ؟

يعطيك العافية و طولت العمر للوالد و الوالدة

:)

Eng_Q8 said...

Selezya

اسم الله عليج من العين يبا عين الحسود فيها عود حسافه ماعندي شبه وحرمل :)))

وماعاش من يجعمج يا يبا :))

اهم شي تمت المهمه

Eng_Q8 said...

احلى مهندسه

والحيل قاصر يالزميله

عدل كلامج لابد من نهضه وانشالله قريبه

وانتي حاطه دوبج دوب الزقاير شلج فيها يا يبا خليني ادخن لين تتعدل الامور

Eng_Q8 said...

أولا شكرا على الرد المهذب والجميل

ثانيا احب ان اوضح اني انتمي الى قبيله من القبائل اللائي ذكرتهم نعم انا افتخر اني الماني كما تدعي فلست انا من يتبرأ من اصله .. نعم حضري نعم لا احمل الاسم ولكن الجميع يعلم انتمائي لهذي القبيله وانا دائم الافتخار بانتمائي لقبيلتي ولا انكر انتمائي لها وانا على علاقه بأبناء عمومتي ولن يأتي يوم وتراني به استهزأ بالبدو لاني اساسا بدوي

ثانيا اعلم يا اخي شقران ان اغلب الكويتيين الحضر هم بدو بالاساس .. فليست الكويت الا بقعه من الارض سكنها البدو بدأ ببني خالد وانتهاءا بآل الصباح وهم جميعا يعتبروا بدوا وهذا وساكنيها ايضا فلا تتوقع ان يتم الهمز واللمز على البدو لانه بالنهايه دمنا واحد

ثالثا بالنسبه للحضر الذين تسميهم حضرا فهم اما بدوا او من الشمال او الغرب فلا تتوقع ان البدوي سيرضى بأن يستهزأ احد باصله واعلم ان هؤلاء ما يسمون بالأصيلين على قولتهم وما الاصيل الا بدوي سابقا واصبح حضريا

رابعا بالنسبه لما قاله اخي فتى الجبل وما قلته له هذا واقع .. وبما انك بدوي سوف تفهم م ارمي اليه ... نحن نقصد الالمان بالذين ليس لهم ولاء لهذا الوطن وانت تعرف ماذا اقصد ... فبعض البدو يأتون الى هنا وياكلون من خير الكويت ولا يدين بالولاء لهذا الوطن ... وايضا هناك ما يمد بالولاء لايران وهلم جرا .. فنحن لا نقص البدو بحد ذاتهم انما نقصد هؤلاء الذين يحملون السوداء وهم لا يدينون للكويت بالولاء ... فلا تقل لي انهم غير موجودون فهم بيننا ... هؤلاء من قصدناهم بالالمان وليس البدو ككل لذا ارجوا ان تصل الرساله اليك يا اخي العزيز
فنحن هنا واولهم الاخ فتى الجبل نريد مصلحة الوطن ونطالب بالعدل والمساواة بين المواطنين فلا تقول باب النجار مخلع لاننا اول من ينبذ التفرقه والعنصريه وهذه هي شيم اهل الكويت ونحن ابنائها ونتبع عاداتنا القديمه ولا نتبع الشياء الجديده كالتفرقه العنصريه او المذهبيه فكلنا للكويت والكويت لنا

وانا اسف على سوء الفهم الذي حصل وارجوا مره اخرى ان تصل الرساله يا اخي العزيز فبالنهايه كلنا المان

وشكرا على التعليق الاول واتمنى ان لايكون الاخير

اخوك منهدس الماني :))

Eng_Q8 said...

فتى الجبل

خير يا اخوي خير بس شفت الاخوان لي الحين يعلقون قلت انطر شوي اهم شي ان انت الي تكتب يا اخوي

Eng_Q8 said...

سدرة العشاق


تكفه لا تقولين بدون ترى اتازم والله اتازم انا ضد التجنيس العشوائي الي قاعد يصير يبا الي عنده احصاء 67 جنسوه والي ما عنده خل يستريح وخل يفكونا منهم

لا تخافيم قاعد بس اذا ريلج هاجر بهاجر وياه :)))

الله يعافيج ويطول بعمرج انتي وريلج

Ni3Na3aH said...

7ada nice post
wel waled mo hayen shakla;)
allah ykhalekom Lba3ath
wallah el kil laman yshoof majles el oma wela mostashfayat el deerah wela ..wela... y7es inah behajer a7sanlah!
bas 3ala goltek wain betroo7
7ata amrica wela uk.. mo hayna wel 3eesha matnasebna.. aw matnaseb el aghlabeyah 3al aQal...
el wa7ed al7een ga3ed bderta 3ala amal el awtha3 etesana3 lana fe nas al7een tkhaf 3al derah o 9oot'ha badii ye6la3
wetha 3al salfat majles el omah.. fa fe cham 3otho el 9ara7ah.. yabelhom yenga6on bil ba7ar.. kil ele ga3deen ysawoona mashakil o moga3den yfedon el deerah wala ya36on majal inha eteQadam
اناشد نوريه الصبيح بوضع قانون على ان كل اسبوع 3 امتحانات وتصعب الدراسه عليهم لان هذيل مو كفو حشيمه
7al methali wayed..LOL
ya36ek el 3afyah 3ala hal post

Eng_Q8 said...

Ni3Na3aH

هلا وغلا نعناعه

ميرسي على الكلام الحلو
وبالنسبه للوالد اي والله مو هين بس من شابه اباه ما ظلم :)))

والله يطولي بعمرج وبعمر والديج

لا مو جم عضو الا كلهم

انشالله نكون قد المسئوليه ونحافظ على الديره

حاظرين اظبطج بالحلول :p

thanx 4 ur comment

شـقـــــران said...

أخي العزيز مهندس كويتي

أنني أقدم لك اعتذاري عن سوء الفهم الذي حصل ، واني آسف جدا على ذلك

وشكرا على توضيحك الامور وتبيانها

وشرّفني التواصل مع مدونتك والذي لن ينقطع وسيستمر إن شاء الله

اللهم احفظ الكويت وأهلها

وتقبل مني خالص التحايا العطره

أخوك المحــــب/

شــقـــــران

Eng_Q8 said...

شقران


حياك الله اخو عزيز وغالي واتشرف بمعرفتك