Sunday, December 30, 2007

شخابيط تالي الليل




كل عام وانتوا بخير ... وعسى الله يجعلها سنة خير لكم ولديرتنا الغاليه



تحديث

حطيت صورة الاعلان بالموضوع رقم 3

حاولت انام تقلبت يمين يسار ماكو ... يا ابن الحلال نام ... لين الله هداني ونمت .. حروة الساعه واقوم من حلم بايخ حلمت اني انا وسكوفيلد بننحاش من طلحه .. ماعلينا الحين نام يا يبا ناام ماكو وراك شغل الصبح وانت دايخ .. مافي مخي تنح ... قاعد افكر بالي شفته ... والظاهر ادمنت على البلوق الله واعلم المهم بكتب الموضوع الي بط جبدي قبل لا انام وخلى النوم يجافيني ... حلوه النوم يجافيني لازم اكثر منها






1







وانا منسدح على الفراش وحدي بردان وقاعد اعابل بالكنابل .. والا التلفون يدق ... الو هلا ... مهندس شوف قناة الوطن بسرعه...لا حول الله قناة الوطن؟؟؟ الله يستر وهذي لاحقتني لاحقتني ... بطلت والا نبيل العوضي قاعد يتحجى

قلت اكيد كالعاده يتكلم عن الرسول عليه الصلاة والسلام او على الانبياء عليهم السلام .. والا الحبيب مشتط .. ما يصير واطالب الداخليه بالحزم وماادري شنو ؟؟؟؟؟؟؟؟؟؟؟؟؟؟؟؟؟؟؟

شداخليته اشفيه هذا؟؟؟ علامه؟؟؟؟ والا قاعد يتكلم عن الحفلات المشبوهه الي تصير بالشقق ... قلت يالله جزاه الله خير الشقق تارسه الديره هالايام ومظيعين بناتنا وشبابنا ......... والا يصدمني وانا كله مصدوم هالايام جان يقول شنو حفلات خلاعيه ؟؟ الحمدلله الكويت مافيها حفلات انا مخي راح على الشرب والترقص وماادري شنو والا لا الحبيب قصده الغناوي؟؟؟؟؟؟ لا وقام يتكلم عن نائب ماادري منو اهو يقول هالنائب ما يستحي لما لغوا الحفلات الغنائيه عصب وهاج وماج ؟؟؟ ويقول عن كاتب انت ما تعرف اتفرق بالوناسه .. الوناسه الا غناوي وخمور ودعاره ؟؟؟؟ اشفيه هذا ؟؟؟؟؟ ولا ويقول بعد اشلون ترضون المغنيات اييون الديره ؟؟ خلاص بعد انييب المسكرات انييب الداعرات انييب الايدز ؟؟؟؟ شكوووووو الايدز .... جان يتصل واحد ويقوله هالقعدات يسوونها ضباط بالداخليه اهني تبلعم اي رد ليش تقول البعض قووول انطق واتصل ثاني قاله نفس الحجي؟؟؟؟ جان تتصل وحده مااااااااا ادري اشتبي بالظبط وتقول اي وفي مطاعم الساعه 12 يسكرون الليتات ويكسرون صحون وانتي اشدراج بالله واذا مو عاجبج ليش تروحين؟؟ المهم قال الشيخ الفضيل شنو يكسرون الصحون على روسهم ؟؟؟ وانت شكو ؟؟؟ وبكل استهزاء واستغراب هذا بالكويت ؟؟؟؟ وقام يناشد وزير الداخليه وحالته حاله .... ونسيت اقولكم معصب على الي يسافرون بره الديره عشان يحتفلون براس السنه وحرام انهنيء الكفار بالعيد








انا بساله سؤال ... شكو حفلات الاغاني بالرقص والتعري والدعاره والايدز .... يعني الواحد اذا سمع اغنيه يصير فيه ايدز ؟؟؟؟؟؟


وبعدين تعال قولي مدام انت وايد اتهمك مصلحة دينك .. يا اخي بطل لا تشتغل بالوطن ذاك اليوم حاطين القس عيمانويل غريب ويباركوله بالكريسماس وهم شوف راس السنه شراح يسوون ... ولا راح يقول شي


لا يسال ويقول هذي الوناسه ؟؟؟؟ قولي شنو الوناسه عيل شنو الوناسه ؟؟؟؟ يا اخي بنسمع غناوي كيييييفنا وانت شكو يااخي نبي نستانس ... والا الوناسه عندك سكر وعربده ؟؟؟؟


كل من يرى الناس بعين طبعه ... ترى يا اخ الناس محترمين وهذا حق مشروع لهم انهم يستانسون والا عائله رايحه حفلة الابو والام والعيال .؟؟ هم هذيل بيصير فيهم ايدز؟؟؟


وهذي الي اتصلت ... واشفيها لي سكروا الليتات وكسروا صحون كيفهم مو عاجبج لا تروحين مو قاعدين يسوون شي غلط


لاااا ومستااانس الحمدلله الكويت مافيها حفلات ويتطنز على الدول الثانيه ويقول روحوا القو القبض على الشقق والمخيمات ..... والله يا فاهم يا عاقل من الكبت الي فيهم راحوا شق ومخيمات والله من الكبت الناس بتستانس وانتوا لألألألألألألألألألألألأ لي متى لأ خربتوا الشباب علينا من كثر الكبت



الواحد وين يروح براس السنه وييييييييييين اطالع التلفزيون يضييييييق خلقك الناس كلها مستانسه وانت تشرب حليب زنجبيل ومتلحف بالبشت وميت قهر ... زين ما يصكرون المطاعم الله يستر


اي لا وشنو يقول يعني يا نصير دولة طالبان واو نصير فاسقين ما يصير بالنص ؟؟؟؟ قول حق نفسك الحجي مو حقنا ااااااخ ابيك تيي معاي الاحتفال بالمطعم عشان اكسر الصحون على راسك بط جبدي




يا ناس يا عاااالم اشفيها لي فرحنا ؟؟؟ يا اخي اشفيها اذا طفوا ليتات الابراج وشغلوها براس السنه ويحطون العاب ناريه وغناوي ووناسه ؟؟؟؟ اشفيها لما تروح العائله مطعم والا حفله يستانسون بهاليوم ؟ ترى ماراح يكفرون ... بس خل يستانسون اشفييييييييييييهااااااااااااااااااااااا ؟؟؟؟؟؟؟؟؟؟؟؟؟؟؟


وشلون انام عقب هالحجي


========================================================




2


يوم الجمعه وانا راد البيت وحدي تعبااااان من الحداق ... شغلت الرادو قدييييييم الرادو ... المهم والا واحد قاعد يهدي شباب المجتمع ... شوي والا دقوا على د.حمد المطر ... يا جماعه الحجي حجي اخونجيه اعرفه عدل انا هالحجي خابزه وطابزه ... اشوف القناة والا لا محطة الغناء العربي ... اسكر الرادو وابطله لا اهو ... اسكر خشمي واتنفس وابلع ريجي قلت يمكن الضغط ارتفع والا لا هذا اهو .... جان يحطولك نشيده ... قطعوا الشك باليقيين الشباب برنامج اخونجي ميه بالميه ماادري اشلون المخرج ولد القلاف .... المهم سؤال وجيه اسمها محطة الغناء العربي رازين ويووهكم اشحقه اشتبوووون لا ومستانس البرنامج وصل اخر حلقه وصارله سنتين ... سنتين وماادري عنه الحمدلله ما دريت والحمدلله خلص


اسم البرنامج نقطة نظام والا نقطة تحول ماادري نقطة سوده ... ويدعي الشباب الى الاصلاح وماادري شنو



سؤاااال يعني ليش الاصلاح ما ايي الا من عندهم جنه اهم شعب الله المختار كل شي يسوونه صح ولازم كل الشباب يسوون نفسهم ؟؟؟؟ لا وحجي فااااضي مثل خلك مع ذاتك فكر بالمستقبل قول انا اقدر .. اقول طير بس طيرانا صرت مهندس ولا سمعت حجيكم الفاضي ... الا احنا الزينيين الا احنا الي نبي الزين حق الجنس البشري


كلهم جذي من اكبرهم لي اصغرهم شاقين الويه بالابتسامه الصفرا ويتلون بالشباب



اقولكم شغله انا اقول سنعوا روحكم وايد احسن ... والله مااقدر اكتب لانه عيب عن بلاوي شبابكم الملائكه ترى نصهم بالليل يقلبون شسمه شيسمونه والله العظيم ورب الكعبه وقسما بالله شفت بعيني ومحد قالي والله يقلبون انا من الصدمه 3 ايام لايعه جبدي لا اكل لا نوم ويييييييييع .....لا وبعد هم هالحجي مو من عندي من عيالكم الملائكه او من الي اتاب الله عليه وهدكم ... والمنشدين انا رايح سمرتين حقهم وماني مكمل ... وخلكم على يعجبني حياؤك احسنلكم وسنعوا اعضائكم وايد ابرك .... حتى محطة الغناء العربي دخلتوووووووووووووووووو اللهم لا اعترااااااااض

====================================================================


3











انا اليوم مطول كيفكم منبطه جبدي ومو نايم... هالمره بهد الاخوان الي فوق وبتكلم عن محمد الوشيحي ... انا اقرى حق الاخ محمد ومرات اعارضه ومرات اتفق معاه بالحجي صج انه مايل حق حشد بس احب كتاباته


ذاك اليوم كاتب عن ناصر عايد المطيري .... طبعا نصكم ما يعرفه ... المهم هذا واحد حاط اعلاناته بطريقه حضاااااريه والله عجبني ... حاطهم بالاماكن المخصصه بالاعلانات ... هذي الي عليها ليتات وتكون بلاستيك والله وانا رايح المخيم شفت جم اعلان وحتى لما رحت القرين هم شفت ... استانست عليه قلت والله ريال محترم مو مثل الباجي الي كان حاطهم العرزاله في بوسته ... وقلت زين في بني آدم بالكويت ما يوصخ الشوارع وحضاري


مااشوف الا الوشيحي مستلمه استلام غير طبيعي وظاغط شعاره وحالته حاله لا ويقول مدعوم ؟؟؟؟؟؟؟؟؟؟؟؟؟؟؟؟؟؟


لحظه لحظه يعني الحين الي يقدم التهاني حق الناس بطريقه حضاريه الا يكون مدعوم ؟؟؟ الا يكون مو زين ؟؟؟؟ المهم رد عليه ناصر وعقب علق عليه الوشيحي بصراحه اسلوب ما عجبني وشرشح الريال تشرشح؟؟؟؟ ليش عاد؟؟؟؟؟



انا مااعرف الاخ ناصر فسألت عنه واحد من الربع قلتله يا فلان اشلون ناصر المطيري قالي والله يا مهندس الريال محترم وكلامه منطقي وطرحه يختلف عن طرح المرشحين الي بالمنطقه العاشره


انزين الوشيحي اشفيه عليه ..... المفروض يقول حق الناس سوو مثل ما اهو سوا حطوا اعلاناتكم بطريقه حضاريه مو يشرشحه ؟؟؟ بس اكيد في قمنده مو مني والطريج شاب عليه شبه






انشالله باجر بروح اصور لكم الاعلان

====================================================================



4


عقب هالحجي بطري الوضع





يوم الجمعه الي المفروض يكون امس بس لي الحين ما شق النور عشان اقول اول امس :)))) رحت الحداق اوكي هذا شيبي يسولف لنا عن الحداق احنا شكو ؟؟؟؟ انا اقولكم





قبل واحنا صغار كانوا يقولون لنا مهنة الصيد اتعلم الصبر ومن هالحجي ... بصراحه توني احس بهالحجي اشلون يا مهندس ؟؟ انا اقولكم



صاير حبابه انا اقولكم وانا اقولكم .... الله يرحمها ..... المهم رحنا الحداق وطلعنا من الساعه 8 الصبح .. اول مره تصير فيني تخيلوا من الساعه 8 لحد الساعه 3 العصر ماكووو ولا شي حتى نابر مافيه انروح اهني انروح اهناك والبرد شلخنااااااا حده سحتنيييي مافي شي ... طبعا انا اقط خيطي وسرحان بهالديره قاعد افكر .... المهم زهقت وبما اني كنت مواصل جان اغفي .... قمت الساعه 4 والا الشباب ما يمديهم يقطون الخيط والا سمجتين ... مو سمجه وحده اسمجتين ماشالله ... جان اقط خيطي والله وخوش صييد احلى نويبي ومشوه شغل طيب



واحنا رادين قعدت اصور مستانس على شكل الديره بالليل :)))) جان تطلعلي صوره غريبه عجيبه ماادري اشلون طلعت والطراد يتحرك ... ووقتها كنت قاعد افكر وضايق خلقي على الديره


شنو الصوره شوفوها عقب هالاصور














هالصوهرحلوه ماشالله طيور صافين صفه وحده وطايرين واختلفنا على اسم هالطيور بس اتوقع اللوه صلحولي اذا غلطان








هذا صيدي :)))) مع اني مو محترف بس خوش صيد 5 نويبيات وماادري جم مشوه .... ونقصت خالتي ام ستروبيري موجوده بالحفظ والصون وليش نقصه الصيد كله تستاهل ام ستروبيري :)))))




























هذي الصوره الي اطلعتي ... الوان علم الكويت جنه هالصورة اتقولي اصبر وراح تظفر ... مثل ما صبروتوا على السمج وياكم الخير اصبر على الديره وانشالله ان الوضع يستعدل ... ماادري ليش حسيت ان هالصوره اتقولي جذي مع ابتسامه خذيتها من امواج البحر وانا قاعد اتخيل الصوره اتكلمني ... وانشالله ان كلام الصوره يصير وترد ديرتنا درة الخليج










.


اسف تطولت عليكم .... ادري البوست شطوله تقول قصيدة عنتر وادري مليتوا من كثر ما تقرون بس استحملوني قلبي متروسه على قولة داوود حسين ولي الحين الامنيه قائمه الي بالبوست الي طاف اخاف بس في احد بيقراه الي بيقرا هالبوست بيزهق ما عليه امون




.




اللهم لا اعتراض

77 comments:

Anonymous said...

الحمدالله والشكر تكلم عمرك وتقول حق نفسك يامهندس؟ مساكين امثالك مو مصدقين دشو هندسة
لوكنت برفسور او جراح استشاري؟

Peace said...

أخ
Eng_Q8

عندي تعليق على رقم 1
ممكن سؤال ؟ هل شفت البرنامج من أوله ؟
لأن نبيل العوضي ما تكلم عن الأغاني و الاحتفالات بس ، لكن تكلم عن اللي يصير في الحفلات و بعد الحفلات و كلامه شمل الشقق و المخيمات و اللي قاعد يصير فيهم و ناشد وزارة الداخليه ووزارة الاعلام و كل المسئولين عن منع هذه الأفعال (اللي أكيد انك ما ترضى انها تصير بديرتك )
و قال انه أكثر الجرايم ( أنواع معينه منها ) تكثر باحتفالات راس السنه
هذي كانت وجهة نظره


و فكرة البرنامج اهي سؤال الجمهور و
أخذ رايه بالمواضيع اللي يبون مناقشتها

يعني الجمهور اللي اختار
الموضوع
و أكثر الاختيارات كانت
عن مشاكل الشباب و البنات


نشكرك
Eng_Q8
نتمنى لك أحلام سعيده

bass said...

صبحك الله بالخير مهندسنا

نبتدي التعليق على البوست الطويل العجيب

1. اي شيء على قناة الوثن اقصد الوطن الي يملكها اكبر حرامي في الكويت ما اشوفة اما عن ديانتهم فديانتهم مصلحتهم و فلوسهم لا غير وانسى اي شيء ثاني

2. دوود في كل مكان و زمان هم شر الله في ارض الله لانهم يفكرون في مصلحت حزبهم و بعديين اي شيء وراه يعني الخنة ما في مانع يبوق لان منهم و بعد علي الخليفة لان يصرف عليهم بس الحرامي الثاني لو تفاحة تقطع يدة ؟

3. اذا ناصر المطيري عضو مجلس البلدي فهو حرامي عود تبع ضمير الامة النائب مسلم البراك ؟

4. خوش صيد :)
ان شاء الله راح نصبر و نشتغل و ترجع الكويت احسن من قبل بعد :))

دمت بالف خير مهندسنا العزيز

فتى الجبل said...

يا يبه
الدين عندهم حلال علي وحرام على غيري
بعدين لا تنساني بجم سمجة يالحبيب

سدرة العشـــاق said...

وين إييك النوم و هذا حالك خنت حيلي
الداد

و إن شاء و بحيل الله ترجع الكويت بهمتك و همة الشباب اللي فيهم الخير و البركة إن شاء الله

و نومة العافية

:)

حمد said...

مساكين ملالوتنا مايدرون من وين يلقونها حاربو الفن والاعلام وطلعتلهم الفضائيات واذاعة سوا , حاولوا يحاربونا وشنو حملة ( القي دشك من فوق سطحك بالجهراء ) وطلعلهم النت الحين .

فوق هذا كله مساكين يعانون من سفر الناس للخارج من اجل الراحة والاستجمام والوناسة .

:)

لو بيدهم جان حكروا الناس بسياج وكل واحد منهم بيده خيزرانه !! .

يوم الجمعة اي في عز الذروة برنامج اسمه نقطه نظام او ضوء او نقطة عالسطر مادري المهم هذا برنامج ديني انشادي على بو شبابي قاصين على روحهم علبالهم الحين في احد يدري عن الغنائية مايدرون ان في مرينا اف ام و سوا اللي يسون الغنائية وموظفيها ووزيرهم .

darkness said...

مساك الله بالخير يا مهندسنا

و تستاهل لقب مهندس

مو درست و تعبت و حصلت على الهندسه

صح اني انا اكثر وحده حاقده على كادركم بحكم ان مجال عملي مثلكم

<<< computer sc

بس اللي درس و تعب يحق له يفتخر

و عقبال ما تكمل و تصير برفسور

:)

بالنسبة للبرنامج ما شفته

فما راح اعلق

بس بقول ترى كل واحد حر بتصرفاته و ربك اهو اللي يحاسب الناس

صحيح ان من الواجب اطاعة اولي الامر لكن منو نصبكم اولي امر؟؟

ثاني شي هم ما سمعت البرنامج بس ويسلم قلبهم قلت لي اخوانجيه و محطة الغناء العربي

مممممم

ما وجة التشابه بين الامرين؟؟

ثالث شي انا ما عرفه المطيري بس انا قبل كنت كله اقول ليش ما يحطون اعلاناتهم بالاماكن المخصصه و ربي تكون اذرب و ما تسبب حوادث و حفاظا على البيئه

رابع شي عليك بالعافيه بس عسى ما دخت؟؟؟

و وين رحتو شيخان ؟؟ و شنو ربيان و الا ميد و الا قباقب و الا خثاق و الا خلطه؟

و عطنا الاحداثيات عشان اعلم اخواني

ادري الحداقه ما يعلمون

:)


الصوره روعه جد جد روعه

لو مو قايل لي انها بالصدفه جان قلت مفبركه

و عسى ربي يحفظ الكويت و اهلها من كل مكروه

:)

تسلم يا المهندس

و المهندسة بيس ادري معارضه لج بس لا تعلمين علي المهندسة اللي معاج لا تزفني

:)

على نفسها جنت براقش said...

اول شئ انا برد على الاخ صاحب اول تعليق

لو انت مهندس و الا بروفسور جان شحاطتك واصله السما السابعه

مساكين امثالك اللى يحسون بنقص

كيفه تعب و اخذ شهادته
ثانيا اسم بلوقه
eng_q8
تبى يكتب الحداد؟؟؟

و يحليلك متعب نفسك من الصبح و مطلع عسارتك عليه
شكو
اشرب قهوه و عدل مزاجك
و اذا فيك قهر لا تطلع اسقاطاتك على من هم افضل


يا باش مهندس
صاج و الله التدوين اصبح ادمان الواحد يكلم الشاشة وايد
:)

مو غلط الواحد يفرح
بس لا ترتبط الوناسه بيوم معين

لازم اكو انشطه عائليه على مدار السنه
وبالنسبه للحفلات
بغض النظر عن احليتها
كل واحد حر ببيته
يرقص
يشرب
ربك يحاسبه

و لو الكبار مو مانعين الشرب بالديره
و مو لسبب اسلامى بل مادى علشان يغلى سعر البطل

جان ما صار كل ممنوع مرغوب

و بالنسبه للحداق مساكين السمك مو كافى يسبحون بالهبرد مفاصيخ
بعد تبىهم يشتهون ياكلون النابر
لوووووول

حطلهم كستنه المرة اليايه و بتسوف الصيد

بعديب انت المفروض تحدق بوقفه المايه و بتتوفق

اسأل مجرب
:)

AnGlOpHiL said...

صج ماتبي تهاجر؟

شلك بالحداق...القنص احلى و بالحالتين محافظ على البيئة :p

و أسمع كلام بوعبيد الفيلجاوي...اقصد براقش

حياتي هدف مو عبث said...

بالنسبه لبرنامج نبيل العوضي
برنامج جداً قيم وصريح لأبعد الحدود وهذه نقطه من لاشيء سوف يقوله ويقولونه المتصلين عن بعض هموم الشعب الكويتي الشعب الذي يحب الكويت بمعنى الكلمه لا قول من غير فعل
ونبيل العوضي تكلم عن الأغاني لكن ماكان هذا موضوع الحلقه بل كان عن الحفلات التي تكون برأس السنه الميلاديه وبها رقص وخمر وعاهرات وفاسقات وديوثين ومخنثين وكلامي لا عيب فيه ولا حياء إلا هذا ماذكر في السنه وثانياً يبدو إنه عليك الإطلاع على سجل المخافر وما تأتيها من مصائب في هذه الليله الماجنه
ويمكن البعض يقول لا الحفله ما فيها شي بس أغاني ووناسه أخاف صج بس
كل شي واضح والمشكله إن الكبار من الدوله هم من يقومون بهذه الحفلات فساد في فساد
للأسف تطلبون الإصلاح وأنتم لا تصلحون عقولك ولا أفكارك
أم تريدون الكويت تصبح دعاره وزنا وخمر حتى تكونوا قريرين القلب والعين
لا حول ولا قوة إلا بالله

Eng_Q8 said...

Anonymous

اي والله مو مصدق .. بس مو دشوا عدلها تخرجوا :))
والماستر وخذيناه وبقى الدكتوراه
الحمدلله

-----------------------------------

Peace

اقرى البوست مره ثانيه وبتشوف اني مع نبيل العوضي بهالموضوع وضده بالموضو الثاني
مااعرف فكره البرنامج ولا شفت الاستفتاء والنقطه الي علقت عليها كانت واضحه وشكرا لمرورك

-----------------------------------
bass

صبحج الله بالنور اختي بس

صحيح

اي والله دود

لا مو اهو

انشالله

وياج يالغاليه

-----------------------------------
فتى الجبل

صاج
مو ناسيك بس سدره مسويه رجيم قلت يمكن ممنوع السمج بالبيت :))

-----------------------------------

سدرة العشاق

اي والله شفتي اشلون اختي سدره

انشالله

تصدقين لي الحين مانمت ... الله يعافيج

-----------------------------------
حمد

لو بيدهم يحطونا مثل ماكنت حاط السمج لا وبدون ثلج عشان نخيس

اي هذا اهو البرنامج

-----------------------------------

darkness

تساهلين الطيب :)

ماعندي كادر للاسف

وعقبالج انشالله

من حقج ما تعلقين لانج ما شفتي البرنامج بس هذا الي صار
ووجه الشبه بين اخوان و محطة الغناء العربي هو البيض

قاعد اقول اذرب بس ماادي اشفيه عليه

الله يعافيج ... مااعرف الاحداثيات والله بس قوليلهم الطبعانه وعند المزارع والدفان والصيد كان اهناك :))) انا مو حداق محترف هوايه فقط لا غير

مشكوره من ذوقج :)

واخر سطر ما فهمته :))

-----------------------------------
براقش

عادي خليه يطلع الي بجبده

اي والله ادمان مثل القهوه

صحيح كلامج

بعد شنسوي .... اي والله المايه كانت حاميه وايد .. طلعتي حداقه من ورانا ... وبعدين اهي وناسه سواء كان حمل والا فساد :))

-----------------------------------
AnGlOpHiL

لوووووووووووووووووووووووووووووووووووووووووووووووووول

ماادري اشرايك فوقه ؟ :)))

انروح قنص شو عليه :))
لا بو عبيد مو هين نوخذه كبير

-----------------------------------

حياتي هدف

اولا انتي اتعرفين تقرين عربي والا لا ؟؟؟

انا قلت مع نبيل العوضي بهالسالفه لكن الحفلات الغنائيه الي تتم تحت عين الدوله المتمثله بوزاره الاعلام شفيها؟؟

وبعدين تعالي احنا نبي الكويت اتصير دعاره ؟؟؟؟؟ ليش شنو شايفتنا ... اقول يا اخواني الملائكه استريحوا واحنا اهلها من قبل لا تيونا وانعرف الي ضرها والي ينفعها
وكفايه طلعنا رجال ونساء عملوا من اجل رفعة هذا البلد
وانتوا شطلعتولنا غير البلاوي والفكر المظلم؟؟؟؟؟؟

وكلامج الي لا فيه عيب ولا حياء موجود عند بعض الناس والي على راسه بطحه يحسس عليها الحمدلله والشكر

اذا انتي شفتي صورة نبيل العوضي وما قريتي عدل فهذي مشكلتج ... لا تحطين كومنت الا لما تقرين البوست عدل لو سمحتي


===================================

الخيلاء said...

بالنسبه لرقم 1 : اتوقع انه هذي حريه شخصيه الي يبي الخراب يدله و كل شخص حر بالدرب الي يسلكه ..

اما ال 2 : فاحركه عدس مابقى مكان مادخلوه يتلونون على حسب مصالحهم وين وراها ..

ال 3 : اول مره اسمع عنه .. بس كلهم بياعين حجي طالما ماصار نائب فا اهو الفارس المغوار الي بيحقق الاحلام و عقبها مانشوف شي

ال 4 : خوش صيد و من صبر ظفر .. و عسى الله يعدل الاوضاع مع بدايه السنه اليديده .. و الصوره واايد حلوه ..

و شكرا على هالبوست الي بشكل معلقه لول

Sn3a said...
This comment has been removed by the author.
Eng_Q8 said...

اخيلاء

1و2 معاج بالي قلتيه

3 بالنسبه لهل الموضوع انا كنت متكلم عن نقطة الاعلان الحضاري فقط لا غير والا اهو اشلون وما لون ماادري

4 مشكوره من ذوقج
:))

عفوا وشكرا لانج قريتيه كله :)

Selezya said...

لوول الحين كل هذا فقلبك قبل لا تنام ؟؟ لوول حلاتهم معصبين


الصورة حدها عجبتني يايه رايت :)))

اهم شي بس شلون النومه بعد هالكلام :D

Sn3a said...

مسا الخير بش (مهندس)
رقم 1
رجل دين مادري شيخ دين وقناة الوطن؟
النتيجه :خل يخلي ديانته لنفسه

وبالنسبه لمحطه الغناء العربي
اهي خطوة من حدس عشان تكون موجوده بكل مكان
لأنهم يدرون ان حطولهم قناة خاصه محد حتى بيسأل عن ترددها غيرهم


الوشيحي انا معاك
وايد اتابعه
وبهالنقطه صراحه ماتسوى عالريال
بس اهو كلمته عن للتاريخ صناعه
بس حلوة اعلانات ناصر المطيري كمكان وتصميم


من الصبح لين العصر مجابل البحر وهذا اللي حصلته:P
ماحب السمج عاد
عليكم بالعافيه

يعطيك العافيه engo

مادري ليش لما يكون الانسان ناجح بشي ومفتخر فيه عبالهم تفلسف مايدرون عقب شغل وكد
ماعليك خيو والفال نناديك المهندس الدكتور
ان شاء الله

cheb_ali said...

اذا كان جراح راح يكتب انا جراح شنو المشكلة ... غريبة عقدة النقص


1
احب نبيل العوضي ويازينه ويازين حجيه اي في حفلات بالكويت شقق ومخيمات وشالهيات وفيها خمر وبنات وجنس ثالث وتصير بالبعض دعارة وزنا وفي بعضها يتعاطون ويبيعون المخدرات
شنو المشكلة فيها يا نبيل
الحفلات يقيمها ناس مسنودة ومن رجالات المجتمع مثل مايقولون
وجه حجيك هذا الى وزارة الداخلية خل اتحرك طول رجالها الحلوين بو بديات وجل وادز المباحث الي لاشغله ولا مشغله ... في حجي وايد جنه يحتاج موضوع :)

2
اتفق معاك بكل ماقلته وعن تجربه


3
جنه الوشيحي قام يخوره :)

4
مالي شغل بالحداق بس شهادة اعجاب لك بتوفيقك بين شغلك وهوياتك
يامعود اذا ماعندك هواية بالديرة راح تستخف :)

اي هذي السوالف الي استانس عليها كثر منها :)


يعطيك العافية

Eng_Q8 said...

Selezya

اي والله
ما نمت لي الحين قاعد ما خلصت البوست الا بالست تقريبا وعليها لي الحين

شفتي اشلون يا محاسن الصدف ماادري اشلون اطلعتلي :))


-----------------------------------

Sn3a

مساء الانوار

اي والله خل يخليه حق روحه

صحيح بس اشلون خلوهم ... سؤالي ماله داعي ادري بس من بطت الجبد

وهذي كانت النقطه اعلاناته راقيه الريال

بعد هذا الي طلعت فيه زين حصلت شي يا معوده ))

والفال لج بعد مشكوره

-----------------------------------
cheb_ali

:)

يحتاج لموضوع اكيد :)

شكرا

ماادري عنه اشفيه ذاك اليوم

اي والله صاج

ادري انك اتحب هالسوالف وكنت ناطر الكومنت الي بتكتبه :))

الله يعافيك

شـقـــــران said...

العزيز مهندس كويتي
تحية طيبة

راح اختزل مشاركتي في الموضوع رقم 3

وذلك لمعرفتي بناصر المطيري

لقد عرفت ناصر المطيري منذ أن كان نائب رئيس الاتحاد الوطني لطلبة الكويت فرع الجامعة الى أن اصبح رئيسا

يعتبر من أهم كوادر حدس والمرشحة للنزول في الانتخابات القادمة

مع العلم بانه من الداخل لايؤمن بافكارهم لأن هدفه الوصول فقط
بأي طريقة

شخص عنصري لقبيلته
يعتبر المثال النموذجي للشخص الوصولي

كان صديق الوزير الحالي عبدالله الهاجري والخارج من رحم فرعيات الهواجر!!؟؟

وعينه مديرا لمكتبه في وزارة التجارة

واستغل هذا المنصب احسن استغلال بعدها تنبه وزير التجارة الى أن ناصر بدأ يسرق منه الاضواء في تخليص المعاملات، خصوصا أنهم سيترشحان في نفس الدائرة الانتخابية بعد قانون الخمس دوائر فازاحه بطريقة او بأخرى

فالاثنان يعتمدان على القبيلة وعلى حدس في الانتخابات القادمة

باختصار شديد ناصر المطيري صورة طبق الأصل من نواب طفيليات القبيلة الحاليين

للعلم:ناصر المطيري اذا رآني في مكان لايجلس بعدها ولا دقيقة وذلك باختصار لأني لا اجامل المنافقين والمتلونين واعطيه من الآخر -اشكره- فلا يحبذ الدخول معي في اي نقاش!!؟؟

مع خالص التحية القلبية

أخوك المحــــب/

شــقـــــران

Eng_Q8 said...

شقران

شكرا جزيلا اخوي شقران على هذه المعلومات القيمه

وكان قصدي من هالموضوع فقط ان اعلاناته حضاريه

وشكرا مره ثانيه على هالكلام الي بصراحه خلان اعرف شنو طينة الرجال

Eng.S said...

صديقي
البش مهندس .. الكبير

يعطيك العافية على المعلقة اللي كاتبها اليوم
;))

اولا : شيل صورة نبيل العوضي .. يابلي الحارج!! على شنو كاشخ فيه ..مادري الساندرا امبروسيو
;)

ثانيا : نبول ما يوز ..يسوي المستحيل .. يخلط سمج ولبن وتمر هندي بس عشان يكون بالسبوت ..
لو كان عنده هدف فعلا يبي يوصله .. فعنده طرق أرقى لطرح موضوعه..
بصراحه شخص قليل ذوق و ما اعتقد حلقة البويات بعيده عنك
____

ناصر المطيري ..
صدمت للمعلومة ..غرتني لوحاته

والفضل للأخ شقران ..شكرا

______


تحياتي

صبا said...

مساء الخير مهندسنا

يحليلهم مطاوعتنا حلال عليهم وحرام علينا

لو بيدهم جان يحطونا بحضيره

في شي ما حرموه الله يهديهم بس

سلامتك من السهر والارق والقلق

ونشوفك دكتور مهندس يالغالي

Anonymous said...

على نفسها جنت براقش:)
شدراك اني مو فعلا اعلى علميا من بكالريوس الهندسة؟
لاني علقت على ملاحظة متكرره صرت انا المريض النفسي؟ انا بوالنقص؟

مهندسنا: ياحبيبي من وين خذيت الماجستير؟ هندسةالكويت؟ وخرابيطها؟ شنو عنوان رسالتك ووين نشرتها وباي مجلة
ولااقولك لاتقول عشان لاتتفشل
زود.
ماقدر اسئل من وين بتاخذ الدكتوراه يابطل؟

ديرة بكبرها لازم تدش الطب النفسي جذي ماشفت

حياتي هدف مو عبث said...

ويبدو إنك لم تقرأ الكومنت عدل يا أخي المحترم .. ويبدو إنك من أهل إن لم تكن معي فأنت ضدي
وأعتقد لو فنان تافهه ولا فنانه تافهه طلع في التلفزيون وقال ما تؤيدونه ربما كان أفضل من رجل يقول كلمة حق في وجة أكبر من على هذه الأرض

شـقـــــران said...

العزيز مهندس كويتي
مساك الله بالخير

بودي اوضح نقطة وأنا امون عليك

بداية يعلم الله أني أكن كل الاحترام لقبيلة الهواجر وقبيلة امطير الكريمتين حتى لا يفسر انتقادي في غير محله

ومع كامل احترامي لشخص الوزير فلاح الهاجري واحترامي لشخص السيد ناصر المطيري

لكن

القصد من انتقادهم هو انتقاد افعالهم واستغلالهم للقبيلة في هدفهم الانتخابي ،والوصول على اكتاف الفزعة الجاهلية وتأجيجهم لهذه الفزعة عبر مشاركتهم وتنظيمهم للانتخابات الفرعية بشكل مباشر

فهم بالنهاية أخوة كويتيون ولكن نحن ننتقد افعالهم وطرقهم واساليبهم علهم يتعظون ويعرفون أن الكويت هي الباقية وأما غير ذلك فراحل

فمن اتعظ كنا له سندا بغض النظر عن فكره اسلامي أو ليبرالي أو حدس أوحشد أو أو ألخ، حتى تنتهي هذه الفزعات والتي تهدم ولا تبني ابدا


لأن رفعة الكويت غايتنا

وفي الختام أأكد احترامي لتلك القبائل

مع خالص التحية القلبية

أخوك المحـــــب/

شــقـــــران

ezain_kilah said...

لا قريت بوستك اللي قبله ... لي الحين إنت ما صكيت علي وعلى طوالة بوستاتي

;P

strawberry said...

loooooooooooooool ya 7loweeeek o0 enta tt7al6m looooooool
ma 3alenah 3o8baaaaaaaaal al dktoraaaaaaaaaaaaaaaaaaah o0 7afltk 3ala 7saby loool <----5arab ;p

elmohem ana kel elly 3endy o0 bagoola ena ana wa7da malet men baramj eldera mako shay mofed fma atab3
nabel el3aowa`9y yt7acha 3an 7aflat eld3ara welshrb bhathy ana m3ah eldera 7adha mo mthel aowal ya3ny ra7 yta3b roo7a welly ysaoon el7aflat mo raden 3ala a7ad...

ama etha 3an al2`3any f27na mo ga3den nakfer n3arf rabna 0 rasoolna 3aleh el9alat weslan mo na6ren a7ad ydarsna men yded kel wa7ed bacher bgool yallah nafsy yam3aowad wallah malena tara kela ma y9er
dena den yesr mo 3ser hatha tashdd

eldeeen mo chthy wallah 9ej allah yahdehom

حمودي said...

يحليله نبيل العوضي ويهه زفر

سوري سفر

Eng_Q8 said...

Eng.S

صديقي الرفيق المهندس

الله يعافيك

لووووووووووووووووووووووووووووووووول اهم شي يابلك الحارج ... خله دام اييبلك الحارج زين عشان تشرب ماي زين حق الكليه :)

كل شي ممكن :))))

--

مي 2
حبيبي حياك
-----------------------------------

صبا

مساء الانوار

اي والله هذا الي ناقص بعد

مشكوره اختي الله يسلمج

-----------------------------------


انيموس

دام انك اعلى علميا اشتبي ياينا كلك ؟؟

وهندسة الكويت صارت خرابيط ؟؟؟

يبيلها رجال يتخرجون منها

وبعدين وانت شكوووو ؟؟؟
لا مو ممكن انشالله اخذها من الهند انت شحارك ؟؟
وانشالله انشرها بمجلة سيدتي مو شغلك ياخي
موعاجبك لا ادش بلوقي مليون بلوق غيري يا بروفيسور

-----------------------------------

حياتي هدف

لا قريته عدل
وانا ماابي اكون مع او ضد احد

اختي العزيزه الحلال بين والحرام بين

واحنا انعرف دينا ولا محتاجين احد يعلمنا

وثاني شي فنان او فنانه ... يعني مافي فنان محترم وفنانه محترمه

خالد النفيسي الله يرحمه كان فنان وكان من افضل الناس اذا تكلموا على السياسه ... خلينا من الي طالعين لنا الحين ماادري من وين يايبينهم

الفنان خالد النفيسي كان يقول كلمة الحق بالكل ولا كان يخاف من شي لانه على حق
ومقابلاته كانت اقوى من الف برنامج يسوونها دعاة الاصلاح الحين

عفوا اختي ترى مو شرط كل واحد حطله لحيه يعني انسان شريف وعفيف وما تهمه ملذات الدنيا ... ممكن يكون فنان مثل بو صالح الله يرحمه يسوى 100 منهم

ونصيحه اخو لا يغرونج بالكلام ترى الكل يقدر يتكلم شوفي الواقع وحسيه واقري التاريخ وراح اتعرفين الصح من الغلط بدون ما يكون اهناك احد يوجه

ولا تسحقرين احد لان هالفنان ممكن يكون من افضل الناس وممكن يكون من الناس المنحطين

وهم ابيج اتعرفين ان الي ندعو له كان موجود بالسابق لما كانت الكويت درة الخليج ولا شفناهاانحدرت الى الاسفل الا لما وضعوا بيدها القيود
وشكرا
-----------------------------------

شقران

تمون يالغالي

اكيد ما يحتاج لتنويه ياخوي

والاخوان شخصيات عامه لابد يتقبلون النقد

وكلامك على العين وعلى الراس

وحياك يالغالي

-----------------------------------

5roofa said...

مبروووك على السمج خيوو بالعافيه عليكم

1

تدري المره ايل فاتت قاعده اسمع قسم الاسلاميه معصبين علينا لانه بنسوي مثل ريوق بمناسبه راس السنه

يعني ريوووق مو رقص مو شي جايد ريووق

و يتلي وحده تقولي خروفه انتي انسانه مؤمنه ليش تخلين زمره الفساد تفسدج
:/

لووووووول طبعا انا اول شي ماعرفت شنويعني زمره بعدين شرحولي اياها

شوف سواء الي نسوي احنا صح او غلط في شي اسمه كييفي
حلوه كيفي
:P

لا بس صج يعني اشوف انا ما احتجيت لمه دافعو عن الي يفجرون بالناس باسم الاسلام
ولا الي يمشون و يكفخون بخلق الله في دول من الدول علبو اصلاح
ولا استغفر الله البوق الي يصير في بعض الاماكن

تصدق مره واحنا قاعدين يتلنا وحده تصرخ و شايله الارض
انتوووووو شلوون حرااااام كفر كفر
انا طلعت عيني اشفها شفيها
ولا تقول عن رفيجتي انه مو متحجبه
هذا كفر ربج يسحبج من شعرج بااجر
ناااااااااار نااااااااار

وي وي وي شدعوه

والله عقبها تخيل عقبها بتفره قصيره يت وحده ثانيه و قعدت تسولف مع رفيجتي بسلوب كله ادب و تيب امثله من بنات الرسول
و اسلوب قمه بالاخلاق تقنع في و مشت

يعني في اسلوب للاحتجاج في اسلوب بالتكلم مو بس اتكلم و امشي

2

لووول مت من الضحك على البرنامج مو سامعته و انا العاده ما احط الرادو بس كل شي يصير عاديي

3

الاعلان والله زين يسوي حاطه جذي يحليله
عيل برميثيه الي الله و اكبر مهرجان اعلانات
و لا مره يقولون طاح اعلان على سيارة ام رايحه تاخذ عيالها

شكرااااا على الموضوع الحلوو
ساحمني قرقت وايد عليك

:D

salamz dear friend...

Eng_Q8 said...

ezain_kilah

ولا راح اصك العين ما تعلى على الحاجب :))

-----------------------------------

strawberry

:)))
كفو والله خلاص اول مااييبها اقولج :)))

صحيح انا معاج :))

بس اشلون السمج
شافته الوالده ترى كاتب ان حقها :)

-----------------------------------

حمودي

لووووووووووووووووووووووووووول

===================================

Eng_Q8 said...

5roofa

لووووووووووول حلوه زمرة الفساد

ابتلشنا فيهم والله العظيم

واهم شكووو ريوووق بعد ريوووق

واشفيها الي مو متحجبه ؟؟؟؟ خل يروحون يشوفون المتحجبات والمنقبات شيسوون وشقاعدين يلبسون

الاخلاق والدين مو بالحجاب ولا باللحيه بس منو يفهم

اهم شي انج ضحكتي على البرنامج زين سوو شي ينفع المجتمع

لا حول الله وهذا الي اقوله

اخذي راحتج ابوي انتي :))

سلامز

bo rashed said...

يا عزيزي احنا شنو نتوقع من ناس يدافعون عن الدكتور وجدي غنيم سب الكويت واستهزء برمزها ومجد صدام
وهم قاعدين يتباكون عليه وغصبن عليهم بنسوي حفلات وبنفرفش واللي مو عاجبه في ترليون طوفه يشوف اي وحده تعجبه ويطق راسه فيها

يعني اسمع اليسا ولا اناشيدهم اللي مع طيران

مشكل

تحياتي والسلام ختام

Eng_Q8 said...

بو راشد

اي والله شنو نتوقع منهم

استانس ابوي انت واسمع اليسا

حياك يا بو راشد

حياتي هدف مو عبث said...

لا يغرني كلام أي أحد مهما كان
لكن الحق حق والحق يقال لو على موتي
وبالنسبه للفنانين .. قليل قليل جداً منهم محترم ونحن نحبهم ولا نكن الضغينه لأحد والله يرحم الأخ النفيسي ويغفر له ولنا أجمعين وبالنسبه لما ذكرت لقول الرسول صلى الله عليه وسلم
الحلال بين والحرام بين ..
أتمنى لو ذكرته كله فالكلام به يكفي
..
(الحلال بين ، والحرام بين ، وبينهما مشبهات لا يعلمها كثير من الناس ، فمن اتقى المشبهات استبرأ لدينه وعرضه ، ومن وقع في الشبهات : كراع يرعى حول الحمى يوشك أن يواقعه ، ألا وإن لكل ملك حمى ، ألا وإن حمى الله في أرضه محارمه ، ألا وإن في الجسد مضغة : إذا صلحت صلح الجسد كله ، وإذا فسدت فسد الجسد كله ، ألا وهي القلب . )

..

فتى الجبل said...

شوف آنا ماعرف منو ناصر المطيري وعشان جذي أمس ما تحجيت عنه
بس اليوم وعقب ما حطيت الاعلان أحب أقول اني أحترم بناصر المطيري انه حط اعلانه بشكل حضاري وبالمكان الصحيح والمرخص من قبل البلدية والمتفق عليه مع الشركة المستثمرة
مو مثل الدبش اللي يحطون اعلاناتهم بكل مكان وزاوية وبشكل غير حضاري وممكن يتسبب بحوادث
وفي الختام أقولك
كل عام وانت والكويت وأهلها بألف خير

strawberry said...

eeeeeee ana ma rakzt 3aleh ams l2ana shadny nabel el3owa`9y o0 3ajabny kalamh :pp

tawa raowetha 3ad `3adana 2day meeeed+hamooour

5ashetlk jder ra7 a6arsh e-mail lek;pppp

tgol lek ma ga9rt mataby kel elsmach no beln9efa :Pp
wallah elwalda 8anooo3a

wetgol lek enshaalh eyyozlk 6ba5ha

mako ella asaowy 7ag omy post o0 a5aleh tashbk loooool:pp hatha a5er 7al

5roofa said...

happy new year 5ayooo

و كل سنه وانت باحلى خير

salamz dear friend...

Selezya said...

happy new year :)

strawberry said...

الحين سؤال
موضوعنا عن العوضي والا عن الشهاداات والتخرج والهندسه؟؟
وفلان ماخذها من برى وعلان ماخذها من
الكويت

O0 ENG-Q8
ما قال شي غلط طرح موضوع واحنا نتناقش فيه

ليش النجره؟؟
كل واحد ياخذ على قد ما عطى وهني بوست نقاش مو هواش والشهاده تفيد الشخص اللي خذاها.. الله يهنيكم بشهايدكم

ومحد اعلى من احد بشيء الا بأعماله

Eng_Q8 said...

حياتي هدف

جميل جدا ... دام جذي اقري تاريخ المتأسلمين وتاريخ الاسلام عموما واخذي من كل الكتاب حتى ولو مو مسلم بعدين كلميني :)))

والله يرحم الاستاذ خالد النفيسي ماادري اشلون صار اخ واهو يمكن كبر يدج على العموم النقطه الي كنت بوصلها انج لا تحتقرين احد من الناس

وبالنسبه للحديث مو حافظه اشلون تبيني اكتبه يعني أألف؟

هابي نيو يير :)

-----------------------------------

فتى الجبل

ولا انا اعرفه وعجبني مثل ما عجبك بهالحركه
وانت بخير وصحه وسلامه
-----------------------------------

strawberry

يحليلها اتهبل :)))

اي والله يا تسويلها بوست يا تسويلها ايميل وانطيحله انا وياها سوالف :))))

تسلم ايدها ويعطيها العافيه خالتي القنوعه :))

-----------------------------------
5roofa

وانتي بخير وصحه وسلامه اختي العزيزه :))

-----------------------------------
Selezya

هابي نيو يير ابوي انتي :)

-----------------------------------
strawberry

صحيح صحيح :))

===================================

العرزاله said...

انا اقول هابي نيو يير لك ولنبيل العوضي وللي اهو ميت يبي يجنسهم وعشانهم قام يقط خيط وخيط

ولا تزعل وحق الامبراطور السلطان استاذ بكالريوس مهندس طبيب محامي بي اج دي مساعد بروفيسور جراح محاسب...الانونيمس طبعا

اللي ماخذ شهادته من كوكب زحل وياي يتطنز على مستوانا العلمي واهو مو عارف حتى يفتح اكاونت ويصير له اسم بدال ما هو مجهول

ايي..كل شي ولا مهندسنا عاد خاصه انه مو ماخذ شهادته من جامعة ابوك

:)

darkness said...

كل عام و انت بخير و صحه و سلامه

happy new year

على الهامش

للاخ اللي يقول من جامعة الكويت للعلم فقط لا غير ترى اكو لجان يت و قيمة كلية الهندسه

ما اتكلم عن عموم جامعة الكويت اتكلم عن كلية الهندسه

تدري ان الطالب من كلية الهندسه يتخرج بمعلومات توازي طلبة الماجستير

و بعدين تعال لا تفلسف و تقول اي مجلة نازل بحثك

يعني طالع فيها؟؟

اكو ماجستير بدون اطروحه

يا المثقف

و الا ما تدري؟؟

و الا تحسب ان الماجستير مثل الدكتوراه؟؟

اسفه مهندس ما يحق لي ارد عليه بس ما احب اللي يحسب انه اهو اللي فاهم بس

Eng_Q8 said...

العرزاله

هابي نيو يير

حبيبي والله :))

-----------------------------------

darkness

هابي نيو يير

لا عادي اخذي راحتج :)

===================================

هذيان said...

العزيز eng-q8
كل عام وانت بخير يا خوي وسنة جديدة تحمل كل ماهو جميل ومفرح لك وللكويت
happy new year

Eng_Q8 said...

هذيان

اختي العزيزه هذيان وانتي بخير وصحه وسلامه وعسى الله يجعلها سنة خير لنا ولديرتنا الغاليه

مشكوره اختي العزيزه

Sn3a said...

happy new year all:)

marshmallows said...

happy new year =)

o inshalla brd 3la elpost cuz glbi mtroosa bs not now


party party =p o 9f elnia lw sm7t :D eb chilis

حمد said...

كل عام وانت بخير

وعساها سنة مليئة بالحيوية والتفاؤل والانجاز

strawberry said...

ana cheny a3lant el7arb looool


ashowa ena fy a7ad msandny couze eyyd wa7da ma t9afg....o0 ba3den ma aby an6ag brooo7y looooool ;ppp


eng-q8

maby a5arb elwalda bsowalef elnet ;p 5alha chthy waid a7san

ysaaaaaalmk ya mohandsna

شـقـــــران said...

أخي العزيز مهندس كويتي
مساك الله بالخير



وكل عام وانت ومن تحب وجميع الأخوة أعلاه بألف خير وصحة وعافية



المحـــــب/

شــقـــــران

Eng_Q8 said...

Sn3a

happy new year sis

-----------------------------------

marshmallows

happy new year

ok

بالعافيه
حتى انا بروح حفله بعد
بس مو شيليز بفرايديز :))

-----------------------------------

حمد

وانت بخير وصحه وسلامه
انشالله يا رب

-----------------------------------

strawberry


الي يمد ايدج انقصها قبل لا يمدها
والي يرشج بماي ارشه بدم افا عليج بس

لاااا حسافه انزين بس انا اسولف وياها :))))

-----------------------------------


شقران

مساك الله بالنور والعافيه

وانت بخير وصحه وسلامه

===================================

بعثرة مشاعر said...

للأخوان
اللي يغتابون و يكذبون في الداعية نبيل العوضي

و يقولون عنه شئ ليس فيه
و ما ادراكم هل متابعين سيرته الشخصيه ..؟

لو محتفظين بكلامكم لنفسكم أفضل من انكم تكتبونه و كل واحد يقراه تاخذون الإثم

:)

نبيل العوضي سخر نفسه للدعوة و اعلاء كلمة الحق سواء كانت بقناة الراي بقناة الوطن بسوق بأي مكان
يدعو اللناس لمصلحتهم و لمنجاتهم من الإثم

و الله يجزاه كل خير

الله ياكثركم يالحاقدين على المتدينين
جنهم أعدائكم و تنطرون منهم الزله

:)

strawberry said...

thaaaanxe :)))) men 6eb a9lek
o0 ba3den t3al 6e7t 3alek @@ shaklek ga3ed tsa7lny 3ashan asaowy e-mail 7ag elwalda ;pppp

Eng_Q8 said...

بعثرة مشاعر

اولا اختي العزيزه الي يقول الحق لابد يقوله حتى ولو فيها قص رقبته

عفوا انتي اتعرفين قناة الوطن صاحبها منو؟؟؟
صاحبها الي باقني وباقج وباق الكويت واهي بحاجه لكل فلس بوقت الغزو الله لا يعيده
فهل من العقول انه يروح يشتغل عند هالانسان ؟؟؟
ثاني شي يقول لا تحتفلون والقناة احتفلت بالكريسماس ولا قال شي؟؟؟؟؟

ليش ما اعلن انسحابه من القناة اذا كان هالشي غلط على قولته؟؟؟؟؟؟

انا مو ضد المطاوعه ولا ضد الاسلام انا ضد المتأسلمين الي يقولون شي ولا يطبقونه على نفسهم وللاسف اهم كثر بالكويت

واذا على الزلات ترى زلاتهم وايد ومااحب اذكرها لاني راح ابذل جهد على الفاضي محد راح يفهم

وبعدين الاخ يدعوا حق شنو ؟؟؟ اعتقد احنا ديره اسلاميه قبل لا يطلعلنا العوضي ... وانعرف دينا عدل ومانبي احد يعلمنا اياه

خل يروح يدعي بالديار الثانيه الي م تعرف الدين ويعلمهم احسنله

واخيرا انا لاني حاقد على احد ولا شي انا اهني اكتب الي اشوفه صح والي اشوفه غلط سواء متدين او ليبرالي او علماني
فالحق حق
وديرتنا للاسف متحطمه من الناس الي تتلاعب فيها والي يبي يتحكم فيها على كيفه

شكرا للكومنت

وهابي نيو يير

Eng_Q8 said...

strawberry

الله يسلمج تستاهلين ابوي


وليييييييين طاحت علي :))))))

اشلون صدتيني :)))))))

شسوي الحين اشلون ارقع السالفه :)))

قوللها هابي نيو يير :))

strawberry said...

la la trage3 elsalfa elktab bayen men 3enowana ;p
happy new year 2 :)))

حياتي هدف مو عبث said...

أحتقر الناس ؟؟
الظاهر إنك تناقض نفسك يا أخي
وبعدين النفيسي أخي في الله
ولا ما يصير ولا يمكن غلط :) بعد يمكن عندك فكر جديد وشريعه جديده
والبوست هذا عطاني فكرة لبوست يجعل الحق واضح وإن شاء الله
أشكرك ياأخي على سعة الصدر ;)

bo rashed said...

كل عام وانت بخير وانشالله تكون سنة خير

Q8i_Blogger said...

مهندسنا؟
اشفيك الله يهداك؟
يعني انت مو شايف البرنامج من اوله وداش عليه قوي جذي ليش؟
انت تقول الحرام بين والحلال بين
صح
بالنسبه لك .. انسان عارف ومهندس أد الدنيا
لكن لغيرك يمكن هذي النصايح تفيد
يعني بالنسبه لي
مايهمني كلامه .. والحمدلله اعرف الحلال من الحرام
بس ماننكر انه في ناس حايشهم الجهل
خل نبيل جزاه الله خير ينبهم
واذا تقول على المره هذي اشلون تدري عن هل سوالف ؟
واهو في شي ينخش بالديره
تعال اعرفك على ضابط مخفر .. يقولك سوالف تشيب راسك

مشكلتك في عرض هذا الموضوع وحده وبسيطه .. انك داش بكل قوه بالريال
يعني احنا نتفق ونختلف .. لكن الاسلوب وايد كان جارح

ولاتنسى الاختلاف بالآراء .. اهو يشوف اشياء انت تشوفها صح .. ليش تستلمه من فوق لي تحت

وعلى راس السنه .. صراحه كان حلووو بسوق المباركيه
انا قضيت السهره اهناك .. ماقعدت بالبيت وجابلت التلفزيون
ولا رحتلي مكان خايس من الي يسولف عنهم صاحبي ضابط المخفر

ودي اقول كلام اكثر
بس اخاف تزعل علي بعد
مو حلوه واحنا بسنه يديده .. ولا اشرايك :)
وان شاء الله انشوفك دكتور بنهاية 2008

تحياتي

Eng_Q8 said...

strawberry

:)))))

-----------------------------------

حياتي هدف

اهم شي اناقض نفسي

اي لما قلتي فنان قلتيها بطريقه احتقار جنه مو بشر

اي اخوج بالاسلام عدل :))

موفقه ببوستج اليديد

وانتي مشكوره بعد :))

حياج الله عزيزه وغاليه
-----------------------------------

بو راشد

وانت بخير وصحه وسلامه

-----------------------------------

Q8i_Blogger

اخوي العزيز بلوقر

اول شي كل عام وانت بخير

يا حبيبي يا بلوقر يبا خل يوعي الناس ما قلنا شي والله ما قلنا شي جزاه الله خييير
لكن يا اخي ما يصير يحرم الناس من الغناوي ... الناس كيفهم بيسمعون غناوي ... يا اخي انا احب رويشد وودي روح حفلته شنو كفرت ؟؟؟؟؟

المقصود من الكلام اهو ان ما يصير يتحكم بالناس كيفهم

انا ما قلت شي عن الشقق والسوالف بالطاليه انا قلت عن الغناوي فقط لا غييير
وهذا الي حرق جبدي ... وهميقول خل يكسرون الصحون على راسهم

يا اخي ناس رايحين المطعم مطعععععععععععم مو ديسكو خل يستانسون شنو يعني خلاص صاروا مسيح؟؟؟؟

اهني النقطه ياخوي بلوقر

وبعدين اذا ضابط المخفر قالك بلاوي وح اسمع البلاوي عيل من المباحث ومن وكلا النيابه اذا ما صار فيك ضغط وسكر عسى الله يبعده عنك

واذا كنت جارح مع الريال يمكن لاني معصب

ولا تزعل يا بلوقر :)))

وبالعكس انا ابيك اتقول صدقني ما نزعل منك :))

بس خوش راس سنه بالمباركيه احسن من فرايديز بوايد :)على الاقل الجو حلو والناس الي اهناك تفتح النفس
باجر بروح المباركيه من زمان مو رايح

===================================

SHISH said...

Happy new year ..

kl 3am w anta ab5air

:)

سدرة العشـــاق said...

كل عام و انت و من تحب بخير و صحة و سلامة إن شاء الله

:)

cheb_ali said...

كل عام وانت بخير

marshmallows said...

lool nseet magltlk inshalla all your dreams come true ;p

Eng_Q8 said...

SHISH

2u2 :)
thanx
-----------------------------------

سدرة العشاق

وانتي بخير وصحه وسلامه

-----------------------------------

cheb_ali

وانت بخير وصحه وسلامه

-----------------------------------

marshmallows

thanx :)))

where is ur comment ? :)

===================================

ezain_kilah said...

العفو... أحرجتني بكلامك الطيب

u r needed!

Eng_Q8 said...

ezain_kilah

حياج

قريته :))

marshmallows said...

1
وي وي شكو الحفلات بالايدز والله مرات هذيلا يقولون شي مايعرفون معناه مثل وحده تطلع بعد بالوطن عيوزه تقول الحين صارت البنت الي ماعندها بوي فريند ولا موبايل بالجامعه معقده !!! نعم نعم اشتبيييين وبعدين اشدراج مداومه بالجامعه الحين شايفه شالسالفه ولا بس جذي افتيتي خو هالايام الكل صاير افتاء على الهواء مابقى الا انا افتي و تكمل السالفه بعد ....
و سالفت الصحون عادي الواحد يطلع حرته فيهم موزين اروح و اشوف الطبطبائي هناك كل صحون المطعم بتصير على راسه ...
و الي قاهرني اشدراكم ماتدرون عن هالاشياء الا و انتو شايفينها و رايحيين ...
لا حفلات و لا اختلاط بالجامعه و المدارس اهما لي وين يبون يوصلون بالضبط !!! يعني يبونا نرد لي زمن ابرها و ابولهب ؟؟
موعاجبكم الوضع ذلفوا جاهدو بأفغانستان ولا القدس واي باطين جبدي صج عادي اغتالهم كلهم

2

وسالفت هذا البرنامج اسمع ازيدك من الشعر بيت شفت الاخ الي يقدم و مسوي نفسه شريف روما هذا الله يسلمك من القائمه الاتلافيه بالجامعه و طبعا تدري انهم دينين على قولتهم و لحيه خفيفه و حالته حاله جك بوم ولا اهوا متزوج وحده معاه بعد بالقائمه و مرات تطلع بالبرنامج و اهيا نوعا عباة و حالتها حاله و لا الاخوان عايشين قصة حب يحليلهم ...
يقولون اسلام بعد على ماما يا بابا !!!

وبرنامجه يغث يعني الواحد مايحط الاف ام الا اذا كان وده يسمع شي يونسه ليش اسمع اناشيد بالله انا ناقصه يعني ؟؟

3
على الاقل هالنائب احسن من واحد نسيت شسمه وانت رايح الشاليه او المخيم تشوف اعلاناته حاطهم بين الشارعين بالهاي وي مسوي حركه الاخ حاط اسمه الكامل و كل اسم بأعلان بروحه ورا بعض

4

اول صوره روعه الصراحه و بالعافيه انا حدي بالسمج اللعبه الي فيها مغناطيس يوم كنا يهال



والله مااعتقد ان في خير بس الله كريم الوضع وايد قاعد يتأزم لي درجه موطبيعيه

Eng_Q8 said...

marshmallows

اهم يعرفون كل شي اشفيج :))))

شي عادي ومتوقع من الاخونجيه

لووووووووووووووول اي عرفته ماادري شنو العجمي :)))

مشكوره على الرد

وانشالله الخير ياي لا تتشائمين

Ni3Na3aH said...

happy new year:)
o khooosh 9eeeeed;)

Eng_Q8 said...

هابي نيو يير :))

مشكوره

marshmallows said...

ambe 76 elwa6an bsr3a shof asame elmjnsenhom =\ leeeesh chthe o tgoli tfa2li

Eng_Q8 said...

marshmallows


حطييييييت ويا ليتني ما حيييييييييييييييت

الللللللللهم لا اعترااااااااااااااااااااااااااااااااااااااااااااااااااااااااااااض

صبا said...

كل عام وانت بخير

عساها سنة محبه وعطاء وامان لكويتنا الحبيبه قول يااارب

تحياتي

Eng_Q8 said...

صبا

وانتي بخير وصحه وسلامه

انشالله

Anonymous said...
This comment has been removed by a blog administrator.