Monday, February 18, 2008

الولاء + الاعتصام

تحديث
انتوا اشفيكم ؟؟؟؟؟ ترى الموضوع ما يستاهل كل الي صار نهائيا ؟؟؟؟؟
والاخ العزيز مخلد المخلد امس دزلي ايميل وكان الانسان متفهم للوضع انا الغلطان الي ما حطيت عمر المراه يا جماعه الريال كان يكلمها وانا دشيت عرض والمرأه كبيره كبر امي اشفيكم انتوا ماخذينها بحساسيه ؟؟؟؟ وليش هالتفكير ؟؟؟؟؟ شهالسوالف ؟؟؟
ادين بالاعتذار الى الاخ العزيز مخلد المخلد على ما حدث من سوء فهم للموضوع
مع ان الرجل لم يتحامل علي ويكون بعلمكم ان الريال قالي ماله داعي اعتذار لان مو قصدك شي وبصراحه احرجني لما اعتذر انه ما رد علي صج احرجني وانا اشكره من هنا على سعه قلبه واخلاقه العاليه
ولما اتوقع ان يصلني منه هذا الايميل الذي بصراحه كان اروع من رائع وان دل انما يدل على خلقه الكريم ... وايضا لي لقاء قريب معه لاعتذر له عما حصل هنا
ولن يهزك يا المخلد ما حصل لانك اكبر من الكلام
واسمحولي لقد مسحت كل الكومنتس المتعلقه به واجد نفسي مجبور على مراقبة الكومنت قبل عرضها
والله ما توقعت كل هذا بيصير ولا كان قصدي شي وارجو من الاخ العزيز المعذره
ودمتم
وللاسف ان لي الحين في عقليات متخلفه بالديره
.
تعديل بالموضوع الثاني .... واورد ان اقول اني لم اقصد شيء بنقلي للموضوع واذا كنت اخطات بوصفي فانا اعتذر
1



يتحامل علي البعض حينما اتحدث عن الولاء او الوطنيه وهما بالنسبه لي سيان .. وهناك من كان يقول انني ابالغ بطرحي المتشائم للموضوع سواء هنا او بالحياة العاديه .. لا اخفيكم سرا بان الوطنيه هم يؤرقني دائما .. فانا اعتقد ان الوطنيه هي الحل لجميع المشاكل فمتى وجدت فستكون الكويت بافضل حال


فبعد عضو طالبان الذي اعلنها بتبجح للملأ وبعد نواب مصر وموقفهم من الغزو ظهروا لنا نواب ايران و حزب الله وهذا ما كنت اخشاه وهؤلاء من كنت ارمي اليهم في هذا الموضوع

لله الحمد لم اكن مخطأ بنظرتي لهم واحمد الله اني لم اظلم اي شخص وانا اناقش هذا الزميل واتهم بعض نواب الشيعه بالولاء لغير الكويت


الطائفيون وطيور الظلام قد ظهروا الى العلن منذ التسعينيات والان قد نصبوا انفسهم مدافعين عن الذين يتهجمون على دولتنا الغاليه الكويت ... ظهروا وظهرت معهم العنصريه والطائفيه البغطاء ومع هذا وبكل عين قويه يريدون استجواب وزيرالداخليه لانه صرح بانه سيتخذ الاجراءات لمن أبن المقبور مغنيه


اي استجواب يا حضرات ؟!؟ انتم من يجب ان يستجوب ... واي بكاء ودموع تنهمر على من هدد استقرار الكويت بعملية اغتيال اميرنا الراحل رحمه الله وقتل ابناء الوطن بالطائره وقذفهم منها كالجيف ؟؟ ماذا ستقول لامهاتهم ! وماهو ردك على من شاهد المقبور بام عينه ؟! فهل نكذبهم ونصدق كلامك ؟؟؟؟؟!؟


الخطأ خطأنا بالاساس لاننا لم نحاسب من وضع صورة نصرالله بديوانه ونسى امير البلاد ولم نحاسب من اجتمع بالسفاره الايرانيه وتركنا ولم نحاسب من اعلن انه عضو طالبان بالكويت ولم نحاسب مواقف الاخونجيه بالغزو الحبل على الغارب ..وايضا وبكل وقاحه يصفنا هذا النائب بالصداميون والصهاينه وبالمتأمركين وبكل وقاحه يقول الانتماء الى حزب الله يقرب الى الله ؟؟؟؟ طلعها من جيبه الفتوى


اعلم يا ايها النائب وللاسف انك نائب ان الكويتيين ولاءهم للكويت ولا يمجدون او يكون ولاءهم لاشخاص الا امير البلاد وولي العهد حفظهما الله ورعاه فالولاء والوطنيه الصحيحه تحتم علينا وبكل فخر ولاءنا للامير وولي العهد فقط .. نعم فشعارنا هو الله الوطن الامير ... واعتقادنا هو الكويت اولا وقبل الجميع وهذا ما لم ولن تستطيع فهمه لان ولاءك ليس للكويت


هذا الكلام ينبطق على محبين مغنيه وعلى محبين الاخوان وعلى حبايب طالبان وعلى من يتشدق بالوطنيه وهي مفارقته وهؤلاء ليس بقلوبهم الا مصالحهم الشخصيه ومصالح احزابهم البغطاء


اقسم ان قلبي يبكي قهرا وانا اشاهد من يتبع من خان الوطن سواء الآن او بالسابق وهم الان يتبوؤون المناصب ويدعون الوطنيه ؟!؟


يا اهل الكويت الى متى وانتم تقفون مع هؤلاء الذين يتلاعبون بكم وقلبهم ليس على الكويت ... الكويت تحتاج الى وقفه من ابناءها الاوفياء الشيعه السنه الحضر البدو الكل يجب ان يقف بوجه المتأسلمين ووجه من يتشدق بالوطنيه وهم ما يعرفون علم الكويت اي لون ... يا من ابناء الكويت يامن ولاءكم للكويت لقد انكشفت الاقنعه .. اصحوا قبل ان تضيع الكويت ويستحوذ عليها طيور الظلام الله يرحملي والديكم اصحوووووووا



-------------------------------------------
2


لا اريد ان يؤخذ علي بهذا الموضوع فالذي ستقرؤونه الان ليس سوى نقد بناء واعتقد ان من واجبي ان اقول الحق ولا يسعني الا ان اشكر كل من حضر بالامس وكل من دعى الى هذا الاعتصام الذي به كنا نريد ان نحفظ كرامتنا امام الاخونجيه


وصلت الروضه قبل الساعه ست بشوي وما شفت الا تقريبا 10 اشخاص ... سالت واحد ...اخوي شنو انلغى الاعتصام وماكو قضيه ؟؟ قالي امبلا بس لي الحين محد وصل ... وبما اني ماادري منو الي بيرفع القضيه وماادري شنو بيكون نص الشكوى ولا ادري منو الي رايح سالته قالي ماادري انا من وسط الاداريه وقالولي تعال ...قلتله ماشي .... رحت سالت علي خاجه ... السلام عليكم عليكم السلام ... يعطيكم العافيه شباب ماادري منو مسوي الاعتصام ومنو بيقدم الشكوى جان يقول ماادري روح اسال الريال الي اهناك ... منو؟ .. قالي مخلد المخلد ... قلت مااااشي ؟؟؟؟؟؟


رحت حق مخلد المخلد ... السلام عليكم عليكم السلام ... يعطيك العافيه ... الله يعافيك .... لو سمحت بغيت اسال الحين منو مسوي الاعتصام ترى انا ياي على ويهي ماادري شالسالفه بالضبط ... قالي مجموعه جمعيات نفع عام ... قلتله انزين ومنو بيقدم الشكوى ... جان يقول ماادري كلنا ؟؟؟؟؟ شنو كلنا وشنو ماادري ... مشيتها ... جان اقوله وشنو بتكون الشكوى .. وهم ما يدري .... جان يعطيني ظهره و رد سولف مع امراه كبيره بالسن يا ناس كبيره لاني انا دشيت عليهم بعرض السااااالفه جذي زين ؟؟؟؟ ماادري ليش ماخذين الموضو بحساسيه ؟؟؟ يبا مو قصدي شي !!؟


طبعا انا شرار طلع من عيني ... بس قلت يالله مو مشكله ننطر وانشوف شالسالفه ... انا اساسا حاضرعشان اسجل موقف واوقف مع الحق لان هالموضوع ما ينسكت عنه .... المهم والا واحد من الربع صارلي اكثر من سنتين مو شايفه .... سلمنا على بعض جان يقولي شعندك ... قلتله والله دريت ان في اعتصام وشكوى وييت ... وانت ؟ ... قالي نفس الكلام ووقفنا وماندري شالسالفه .... لين قالوا يبون 3 شباب عشان يدشون ودشوا ... وطبعا زاد عدد الحضور بس انصدمت بالجرايد مكتوب 250 شخص ؟؟؟؟؟؟؟؟؟؟؟؟ واساسا الي واقفين ما طقوا ال100 ؟؟؟


المهم شوي والا العموم دخل داخل وحط اسمه ووقع ؟؟؟؟ وبس !!!!؟ هذا باختصار الي صار ومن الصدمه الزقاره ما طاحت من حلجي ؟؟؟

الله يرحملي والديكم شنو هالتنظيم ؟؟؟؟ يعني الحين سويتوا اعتصام وبتقدمون شكوى ... ليش ما اجتمعتوا يا جمعيات ويا اشخاص وخليتوا واحد يتكلم باسمكم ؟؟؟؟؟ ليش ناطرين محامي ؟؟؟؟؟ المفروض يكون هناك تنظييييييم يا ناس نظموا ترى السالفه مو من طق طبله قال انا قبله


انا الي اعرفه ان واحد يقدم الشكوى مو 100 ؟!؟ انا ماراح ابخس حق من سعى للموضوع ويعطيه الف الف عافيه ولكن لو منظمين السالفه واتقولون حق خلق الله الي يايين اشلهم وشعليهم ومزهبين شغلكم جان صارت السالفه احسن وااااايد ..... للاسف ماادري ليش التنظيمات الوطنيه مافيها نظام ... تعلموا من الاخونجيه يا جماعه

والتفاصيل وبدون ما اجيك لاني ادري بتحطه صحفيتنا العزيزه وطن النهار



اكثر شي ونسني امس غير شباب وشابات الكويت الي حضروا ... اهو مره عوده ولابسه عبايتها على الراس يتني جان اتقول وين انوقع ... ضحكت قلتلها شتوقعين ؟؟ جان اتقولي على القضيه شنو على كيفهم يتهمون عيالها ... قلت لها دشي داخل ... جان اتقول لا وي ما ادش ... ضحكت وقلتها بعد لازم ادشين الله يطول عمرج اشلون اتوقعين ... جان اتقولي من اهني .... قلتها الله يهداج ترى عادي دشي ووقعي وبعدين ترى وايد وقعوا وانا مو شايف ان في داعي لان تقديم الشكوى ما تطلب كل هالاسامي ورفيجي كان معاي بالحجي الي قلته .... قالت يعطيكم العافيه وماادري وين راحت


صج لما شفتها يايه ومشتطه استانست ... لان للاسف قمنا نفقد اولياء الامور الواعين والفاهمين ... عسى الله يطول بعمرها ويتمم عليها عقلها ويخليها حق عيالها

عموما رغم الحضور الخجول كانت وقفه جميل بوجه من يتهم ابناء الكويت بابشع الاتهامات وانشالله ماتصير القضيه بالادراج .... هي وقفه لاثبات ان هناك من هم يقفون بوجههم واعتقد ان الرساله وصلت لهم للاخوجيه

اخيرا يعطيكم العافيه واتمنى ان ياتي اليوم الذي يكون فيه هناك من يجمع هذه القوى بتنظيم واحد


بس ماادري وين علي الراشد وماادري ووين التحالف امس ؟؟؟؟
-----------------------------------------
3
كلمة حق اقولها للشيخ فهد الاحمد على استعجاله لتحويل القضيه الى محكمة الوزراء .... كفو يا بو فهد صج عجبتني بهالسالفه ... فالحق لابد ان يظهروكلنا نثق بالقضاء الكويتي واريدك ان تعلم اننا اذا انتقدناك فانتقادنا لك لانك شخصيه عامه ولمصلحة الكويت واعلم انه ليس هناك من يحاربك ... وكلمة الحق تقال الان ... جذي نبيك يا بو فهد
وايضا رغم عدائي الشديد لجريدة الوطن ولكن عدد امس هم عجبني بس راح يظل عدائي لهم ولن ينتهي
وكلمة الحق يجب ان تقال فنحن لا ننتقد لمجرد الانتقاد ولا نبخس من يفعل شيء لاجل الكويت والي يبي يعلق تعليق على هالسالفه خل يفكر قبل لا يكتب وخل يكون حقاني








اللهم لا اعتـــــــــــــــــراض




66 comments:

5roofa said...

يعطييييك العافية
و يعطيهم العافيه و ربي ياعدكم و ينصركم طول ما انه الشي بصالح ديرتي حبيبتي الكويت

بعد كلها جم يوم و نحتفل فيها

بس تصدق خايفه من هالاحتفالات الله يستر و انشالله تعدي على خير

salamz dear friend...

5roofa said...

احم انا اول تعليق لوول يا بختييييي

;p

salaamz...

Eng_Q8 said...

خروفه

الله يعافيج

اتعدي انشالله

فتى الجبل said...

اللي وقعوا على الشكوى 250 شخص

Aldenya said...

صح اللسانك يا انج واحييك واهنييك على كل كلمة سطرها قلمك

والله افتخر فيك وفي كل الشباب الكويتيين اللى تهمهم مصلحة الكويت

بارك الله فيك


:>

Eng_Q8 said...

فتى الجبل

بصراحه يا نهاش ما شفت بعيني 250 ؟؟

يجوز وصلوا عقب ما مشيت الله واعلم

-----------------------------------

الدنيا

صح بدنج شكرا

وفيج :)

-----------------------------------

هذيان said...

يا مهندسنا

حل المعادلة هذي حقي
مسؤول حادث اغتيال اميرك الراحل قال عنه عدنان شهيد يقولون اسكت هذة فتنة
قاتل عيالك يعزون فيه في دارهم يقولون اسكت هذة وحدة وطنية
عدنان ضري وطنية كل الشعب اسكت المنطقة في ظروف صعبة
صارت الكويت وحكومتها وشعبها كذابين جدام العالم الخارجي بلسان عضو مجلس امتها .... اسكت هذة تلاحم وطن
شهدائكم حرام جذي الأجهزة الأمنية تتصرف؟
طيب مانبي شئ وعدنان خوش مواطن واحسن منا ودم مغنية اشرف من دم عيالنا
بس ردوا شهدائنا حيين
ولا تعلمونا روحنا فدى الوطن اذا دمنا رخيص عندكم

Eng_Q8 said...

هذيان

كلماتج بالصميم

وهم الحين شكلنا بنسكت

والله يرحم شهدائنا

Anonymous said...

مبالغة 250 الي مقدمين الشكوى

وصح كلامك واحد يكفي


بالنسبة لشابين شياطين000 ماعليك منهم اعتقد يدرون عن كل شي000 بس خايفين منك تكون من الاخونجية.

Eng_Q8 said...

اني موس

ماادري والله

ويهي امبين اني ليبرالي خالص واضح وضوح الشمس في كبد السماء
وغير هذا يبين اني مو مدزوز من احد

بس الواحد شيقول

حمد said...

عزيزي مهندس كويتي

ما الذي توحي اليه في ما قلته ؟:

جان يعطيني ظهره وسولف مع وحده

مع التحية

cheb_ali said...

1

ولو انه لي راي مخالف لما تفضلت به لكن ساحتفظ به لعدم نشوب معارك صغيرة في مدونتك الموقرة وسيتم تخصيص موضوع له في مدونتي المتواضعة.

2
يستهالون الشباب وعفيه عليهم والف تحية , اشوى انه الدنيا للحين بخير


3
يطلع منه بو الفهود :)
وهمن عفيه عليه

marshmallows said...

m7d gali chan 9aro 251 =\

انا مستغربه ليش محده بالجامعه تحرك و سوا شي وين ايام قبل الي بس يقولون حرف عن الجامعين نطولهم

عموما انا خل اداوم و استوعب الوضع ماراح اسكت حتى لو بس ايمع تواقيع نبين لهم ان محد راضي هذا ابسط شي انسويه وحتى لو بروحي محد بيساعدني عادي

Anonymous said...

علي خاجه ومخلد المخلد من خيرة أبناء الوطن،وقلوبهم على الكويت

الله يوفق شبابنا

SaRoOoNa said...

laaaa 7raaam 3aleeek :((

mekhlid almekhlid ma yestahaaal
5oooosh walaad oo oboooh rayaal
wa6any weln3eeem feeh.:(

Eng_Q8 said...

حمد

الي اوحي اليه ان هذا الي صار



-----------------------------------

علي


1 اوكي

2 الحمدلله انها بخير

3 مع ملاحظاتي عليه بس حركته اعجبتني

-----------------------------------

مارشميلو

الكل قاعد يكتب انتي ليش ما تقرين ؟

استغراب في محله

كفو

-----------------------------------

انيموس

الله يوفقهم

-----------------------------------

سارونه

وانا شقلت ؟؟؟؟؟؟

ما قلت شي عنه انا قلت الي صار

تبوني اجذب يعني ؟؟؟ هذا الي صار بالضبط
اصلا اول مره اشوف هالانسان يعني مابيني وبينه شي !!!!!؟
-----------------------------------

حمد said...

مهندس

ما كتبته ممكن يوحي بأن الريال هدك عشان يتكلم مع البنية لغرض ما في نفسه , وربما يكون الريال مسكين كان يتكلم وقاطعته ورد كمل حديثه !

مع انك ذكرت اسمه ما ذكرت اسمك فهل تشوف ان من العدل يصير هالشي ؟؟

مع التحية

أجمل وطـن Q8 said...

بالنسبه للموضوع الاول فـاسهبت الحديث فيه بـ مدونتي


ــــــــــــــــــ

موضوع الاختلاط فـاول ناس ضحوا بالموضوع هم الليبراليه انفسهم لـ تسجيل موقف انتخابي !


كان بالامكان أفضل بكثير مما كان !


واانا ملاحظه بندواتهم يبالغون بالارقام مادري ليش !



احمد الفهد:
تـحسبله هالحركه وننطر ونشوف شيصير على القضيه





حمد :
سوري على المداخله بس ليش متحسس من كلمة الاخ لفظ ظهره وكلم وحده !!

البوست نقل الوضع كما حصل
حتى طول هالوقت الزقاره بحلجه :P

Selezya said...

:) شخباارهم ؟

1- انا مع الوزير واذا يبون يستجوبونه خلهم يستجوبوني معاه
2- لو ادري جان رحت وخليتهم 101 مو بس 100 وبعدين ترا كل شي يبيله تنظيم بالديره ماكو شي مرتب حتى غرفتي يبيلها تنظيم بس عاد عالخفيف :p
3- لوول ترا انا دايم انسى اخر شي تكتبه
4- كاتبلي بالبوست في شي ناسيته .. شنو اهو ؟

Anonymous said...
This comment has been removed by a blog administrator.
Eng_Q8 said...

حمد

انا نقلت الي صاير

ويعلم الله ان مو قصدي شي وانت عارفني عدل

واهو صح كان يكلمها وانا قاطعتهم
-----------------------------------

اجمل وطن

قريته

صحيح

ننطر

اي والله قوله ماادري اشفيه علي الله يهداه والدليل الزقاره

-----------------------------------

bo rashed said...

مهدسنا عرفتك جريء في كلمة الحق

ابي ليش احنا نتكلم عن ربعنا الاسلاميين ونختلف معاهم والجماعه ابد عمرهم ماتكلموا عن جماعتهم بس دايما الاحظهم طايحيين بربعنا

والظاهر المره العوده اللي طحتله سوالف معاها بنيتها تنطرها بالسياره وشكلها حليوه قلت خل اضرب عصفورين بحجر ادري فيك نزغه
منشار طالع واكل نازل واكل
:P
انا وياك الوطن اعجبوني اليومين اللي طافو وكلمة الحق تنقال

Eng_Q8 said...

سليزيا

هلا وغلا

1 وانا بعد وياكم

2 صحيح صحيح :p

3 ماراح اقول

Eng_Q8 said...

انيموس


والله مو قصدي اتحلطم عليه ولا اقول عنه شي

بس انا نقلت الي صار


بقولكم شي ترى مو انا الي اقط نغزات انا اقطها بالويه

بس انا نقلت شصار

والنعم فيه وابوه ولا كان قصدي اجرح بالريال

Eng_Q8 said...

بو راشد

لو طاق على الموضوع جان شفت شقايل

وهم سؤالك ي محله ليش بس احنا ؟؟؟


حرام عليك انا وين وهالسوالف وين :)


صحيح وكلمة الحق لابد ان تقال

حياتي هدف مو عبث said...

إييي إييي نجوم السما أقرب لهم ;)

وخلهم يرفعون ألف قضيه مو قضيه وحده

:)

Eng_Q8 said...
This comment has been removed by the author.
Anonymous said...

الروس نامت والعصاعص قامت !!!

Eng_Q8 said...

حياتي هدف


ما بقى الا الاخونجيه بعد

استريحوا بس

Eng_Q8 said...

انيموس

اي والله ما بقى الا هذيل

حمد said...

عزيزي مهندس

ادري اعرفك عدل

عشان جذي حبيت اتاكد

لان احيانا يكون في سوء تفاهم

و عشان جذي بعد انا كلمت الريال بالموضوع وبينلي انه ما انتبه لان كان يتكلم بموضوع مع الاخت اللي وياه

عشان جذي حبيت استوضح اكثر

تحية لك

wa6an-alnhar said...

(1)

الحمدلله ان ربي كشف هالخاينين على حقيقتهم و خلا الاقنعة تطيح و تبين بدلة الحرس الثوري الايراني اللي ساترينها بالدشداشه والغتره والعقال
هالانسان ماله مكان بينا ... لانه ماصان دم شهدائنا و قدس دم هالنجس المجرم
عسى الله يحفظ ديرتنا من هالاشكال و يخلي سنتها وشيعتها و حضرها و بدوها على قلب واحد


(2)

انا معاك تماماً .. ردة فعل جيدة لكنها بحاجه لتنظيم اكبر

يحلوها المرا العوده شفتها :) بالبدايه حسبتها امضيعه بس اطلعت من ربعنا :)

Eng_Q8 said...

حمد

ماادري ليش خذيت الموضوع بحساسيه

يبا مو قصدي شي والله خذيتني بشراع وميداف الله يهداك

وترى اذا مااعرف الريال ترى اعرف ابوه واهو خيرة رجال الكويت

وطول عمري يا حمد ما اقط نغزه على احد ولا عمري اطعن باحد وانا ماادري شالسالفه

وقوله يبا انا اعتذر له اذا اسات نقل الموضوع ومستعد اروح لي عنده لو انه ماخذ بخاطره

وتمنى التعديل اعجبك

وجيك على ايميلك

-----------------------------------

وطن النهار

انشالله

كل شي المفروض يكون منظم خاصة بهالمواضيع

اي حتى انا حسبالي مضيعه يا حليلها :)

-----------------------------------

Anonymous said...

leesh '3ayart el maw'6o3? mala da3y et'3ayra enta ma '3ala6t !!

هـــدب said...

يا هلا بالناس الطيبه
اقدر فيك حماسك الجميل يا انج
واحساسك العالي في الولاء والوطنيه الصحيحه للامير وولي العهد حفظهم الله ورعاهم نعم فشعارنا هو الله الوطن الامير
اسال الله لك الصحه والعافيه

Eng_Q8 said...

انيموس


غيرته لتوضيح الموضوع ومو غلط اني اعدل شي الناس فهمته غلط
شكرا
-----------------------------------

هدب

شكرا على الكلام الطيب هذا واجب كل ابناء الكويت

-----------------------------------

حمد said...

مهندسنا الحبيب

صديقك من صدقك لا من صدًقك

وهذه حواراتنا وتبقى المودة بالقلب .

على كل

اي ايميل فيهم

لان اثنين والمدونة كلهم امباقو

:)

ماعليه روحي رياضية

ومر علي المدونة اليديدة في موضوع يعجبك

Eng_Q8 said...

حمد

لا مبيوقين حسافه

ماعليه :)

طول عمرنا هدفنا واحد يا حمد

ومهما صار الموده موجوده

ومارك الحين :)

Snowq8 said...

مخلد المخلد والنعم فيه انسان وطني وغيور على مصلحة البلد

عسى الله يوفقكم

Eng_Q8 said...

سنو كويت

وثلاث انعام والله

يعطيهم العافيه

صبا said...

اهنيك علي روحك الوطنيه

ويعطيك العافيه وعسي الله يوفقك

تحياتي يا دكتور مهندس

Anonymous said...

السلام عليكم
اخوي
من بقاع 14ح احييك
ومن مكتب ابو النيف ابعثلك باقت ورد
وكرت مكتوب فيه
( جمعتكم(عند بواحمد) ما تنمل بس الضروف ماتسمح )

وبالنسبه
لمواضيعك
يا خوي شفيكم على الاخونجيه

انا وياك كلام اكبر غلط
وما في احد يرضى على نفسه الكلام
بس

طالبوهم بالاعتذار
وكلنا كويتيين
والاخو اذا اخوه غلط عليه
لازم يعتذر

وانا اطالبهم بالاعتذار


وبالنسبه
للمغنيه
ما يسوى تكتب عنه
وتاخذ موضوع موته
بجديه وتتناقش فيه

مات واصبح في مزبلة التاريخ ويا صدام وربعه


اكيد هذوله ال صباح
الله يحفضهم لنا
قوله امين
امـــــــــــــــــين

Zain said...
This comment has been removed by the author.
Zain said...
This comment has been removed by a blog administrator.
Anonymous said...

المهندس

شلة التحالف الوطني مسوين فوضى
اهني

الله يعينك على الدماء الزرقاء

طنش يا خوك الحزبي اعمى

lady_in_canada said...
This comment has been removed by a blog administrator.
حياتي هدف مو عبث said...

مستريحيين يا أخووي :)

Anonymous said...
This comment has been removed by a blog administrator.
Anonymous said...
This comment has been removed by a blog administrator.
`~MnO YeNSa! ~` said...

احيي فيــــــــك هالوطنية ..
وكلامك عدل
..

Anonymous said...

أنا ضد قانون منع الإختلاط بس أبي أعرف النائب المغوار علي الراشد والشله اللي معاه وينهم يوم طبقوا قانون منع الإختلاط قبل جم سنه ما تكلموا شمعنا الحين مسوين زيطه وزمبليطه !!!

Anonymous said...
This comment has been removed by a blog administrator.
Anonymous said...

الصراحة الصراحة هالوطنية اللي عندك مو موجودة هالوقت وهالايام .. صج صج انا افتخر ان فيــــــه مثلك بهالديـــــره .. من صج ..كل واحد يسوي اللي يقدر عليه لان الكويت منو اي ديرة ..ولو احنا با امناوابونا والله مو كافي ..

و شدعــــــــوه شدعـــــــــوه انت ما قلت شى عن ولد المخلد ,,, سووا دعايه عليـــــــــك انا اسوف انك ما سويت شي .. وليس الانسان لما يقول الصج كل من يحاربه .. ترى اهم شى انك قلت اللي بخاطرك .. و ما قلت شى غلط وما غلطت على الولد بشى ..

( بيض الخنفق )

Anonymous said...

*ليش
*اشوف

يمكن اشتطــــــيت وايد

شفرتنا -- بيض الخنفق

فتى الجبل said...

أفا عليك
انت دوم صاج
بس التوقيع وتقديم الشكوى مو بالضرورة يتمون بنفس الوقت
خاصة انها شكاوي مو شكوى وحدة

Eng_Q8 said...

فتى الجبل


ممكن :)

Kuwait said...

يعطيك العافيه اخوي على البوست الرائع ..
ظهر أصحاب الولاءات المزدوجه على حقيقتهم ..
والنائبين هذولا وكل من يمجد مغنيه مالهم مكان بينا ..
الاعتذار لا يكفي لرد الاعتبار ..
والكويت للكويتيين وليست للمُــتكوتيين ..
قواك الله
بس جنك عصبي شوي لووول
لا ترفع ضغطك عشان ناس ماتستاهل

wa6an-alnhar said...

مهندس

واي
لا تعصب
:)

انا من الاول قلت لك ليش عدلت الموضوع انت ماقلت شي غلط اهما اللي شاكين ويروح تفكيرهم بعيد

يمه طلعت عصبي :)

على فكره يقولون ان المهرجان الخطابي اليوم انتقل من التحالف الى جمعية الخريجين بسبب سوء الاحوال الجويه و الحاضر يبلغ الغايب

Eng_Q8 said...

صبا

الحمدلله على السلامه

الله يعافيج مشكوره

-----------------------------------

انيموس

عليكم السلام

عادي الايام يايه

الاعتذار ما ينفع ياخوي لابد من وقفه لمن يشوه سمعه ابناء الوطن

اهو راح لمزبلة التاريخ لكن الي يدافعون عنه شتقول عنهم ؟؟

امين

-----------------------------------

انيموس

ماكو دماء زرقا بالكويت وان سمى البعض نفسهم بهالاسم

فاحنا دمنا ازرق قبل لا يصبغون دمهم

-----------------------------------

حياتي هدف

ماراح اطولون انشالله

-----------------------------------

منو ينسى

شكرا

-----------------------------------

انيموس

علمي علمك

-----------------------------------

انيموس

شكرا

ماصار شي

-----------------------------------

وطن النهار

اكتشفتي هالشي متأخر :)

من زمان عصبي

ماعليه صار الي صار وانتهى الموضوع

ماراح ايي :p

-----------------------------------

Anonymous said...

بالعكس انت ما قلت شي غلط فليش مكبرين الموضوع!!

بس أبي أتأكد وين ندوة التحالف بتكون؟

الجو كلش ما يساعد اندفنا :)

Anonymous said...

إذا عبدالصمد ولاري مو عاجبتهم الديره خل يروحون لبنان باب المطار مفتوح

والله حسافه على الكويت اللي هالنماين قامت تتحدى الحكومه!

بس شقول خبز خبزتيه يالرفله اكليه هاذي نتيجة تجنيس عوير وزوير

Eng_Q8 said...

انيموس

جمعية الخريجين

-----------------------------------

انيموس

الله يستر على الديره

-----------------------------------

Selfridges Girl said...

السلام عليكم ورحمة الله وبركاته
اتمنى عندما تتكلمون عن لاري او عبد الصمد قتنعتونهم باسمائهم وليس بطوائفهم
وارجوا ان لا تخلط الامور عندما يخطا شخص فهو خطا فردي وليس على الطائفة تحمل ما جنته يداه
عندما يخطا محمد فانني سادين محمد وليست العائلة باكملها وهذا على وجه المثال
عدنان ولاري اخطؤوا خطا لا يغتفر ولا يستحقون الكرسي لان الشخص اللي ماله خير في ديرته مالة خير لشعبه ولا لاي احد
وهذه الغلطة لا تغتفر للاشخاص العاديين فما بالك برجال من السياسة يمثلون الوطن
لكنني اتمنى عدم تبهير الأمور وتمثيل بان الشيعة هم سبب كل ماساة تحصل في بلدنا
عندما ذكرت بعض الأعمال الأرهابية للشيعة لما لم تذكر بعض الواقف المخزية للاشخاص من الطائفة الاسلامية والسلف الذين شجعوا بن لادن وشااركوا باعمال ارهابية
ومساجين كونتاناموا اكبر دليل على وجود نفوس ضعيفة من كلا الطائفتين
لكننا بالنهاية دولة واحدة لا احد فينا يجرح الاخر ويمسك علي الثاني غلطة بل نتحد لمكافحة الخطا من غير ذكر طائفة المخطا
سامحوني على الاطالة وشكرا

Eng_Q8 said...

Selfridges Girl

وعليكم السلام والرحمه


بس هل قريتي الموضوع عدل ؟؟؟

مع ان الوضع مشحون جدا والسالفه على كل لسان ولكني ذكرت ما فعله السلف والاخوان من افعال لا تمد للوطنيه بصله

ولست انا يا اختي العزيزه من يحكم على مجموعه لان بعض الشواذ اقترفوا الاخطاء

وانا ااكدعلى ما قلتيه بان الكويت تحتاجنا جميعا

ادعو الله ان نكون ي واحده في مواجهة طور الظلام

وحياج الله

Selfridges Girl said...

اشكرك بجزيل الشكر والامتنان على مدوناتك الأكثر من رائعة
واشكرك لاحترام جميع الاراء
ولردودك المهذبة والتي ان دلت تدل على الديموقراطية
المتجسدة في شخصيتك واتمنى ان رايي لا يفسد بالود قضية
اتنبالك منصب سياسي لما تمتلكه من حنكة سياسيا لا توجد في السياسين 
اذا كلامي صح مو تنسى تذكر اسمي بالبرامج والمقالات لووووول

Eng_Q8 said...

Selfridges Girl

وانا اشكرج على كلامج الرائع

ومااعتقد راح امسك موقع سياسي لاني مااعرف انافق ولا اجذب :)

دمتي بخير :)