Wednesday, March 12, 2008

الشرطه تحتاج الى شرطه

-1-






الشرطه في خدمة الشعب هذا هو الشعار الذي نعرفه منذ الازل .. فهذا الجهاز وجد لخدمة الشعب ولخدمة استقرار الوطن وتطبيق القوانين على من ينتهكها سواء كانت مخالفه مروريه الى القبض على المجرمين والسارقين .. وهنا سوف اتحدث عن وزراة الداخليه لانها تشمل عدة اجهزه حساسه وجدت لتطبيق القوانين التي تخص هذه الوزاره

المتابع العادي للصحف اليوميه يمكنه ان يرى مدى تعسف بعض المنتسبين بهذه الوزاره وايضا التجاوزات والجرائم التي تحصل من البعض الاخر .. ما جعلني اخصص الموضوع اليوم لهذه الوزاره وكنت اريد ان اكتب عنها منذ زمن ولكني كنت ااجل الموضوع واكتفي ببعض من الاخبار عن هذا الجهاز هو الموضوع المنشور بجريدة الشاهد التي بنظري من افضل الصحف الجديده على الساحه بغض النظر عن الكتاب المتواجدين فيها ولكني احيي فيها نشر هذه التجاوزات بالرغم من ان اغلب الصحف توجهها على زيادة الخمسين او تلميع البعض او بث سموم الفرقه بالمجتمع واتمنى منها ان تظل بهذا الخط

الموضوع وكما قرأته باختصار هو تدخل احد القياديين المتقاعدين من وزارة الداخليه وهو بالمناسبه اصبح برتبة مستشار بعمل وزارة الصحه وكيف يتلاعب بهذه الوزاره بدون حسيب ولا رقيب لن اخوض بهذا الموضوع كثيرا ويمكنكم قراءته وايضا هناك موضوع اخر بجريدة الراي اتهم فيها شرطي بخطف فتاة ومواقعتها وهو بالعمل الرسمي هذا غير ما نقرأه يوميا وغير الاشياء التي نراها او نسمع عنها

من هو المسئول وما هي اسباب هذه الظواهر التي جعلت من اشخاص كنا نناديهم عمي الشرطي الى اشخاص ينتهكون حرمة القانون ؟؟؟ طبعا انا هنا لا اتكلم عن كل الجهاز ولكن البعض منهم وهم للاسف كثر .. فعندما تكون رخصة القياده بالواسطه والمخالفه تسقط بالواسطه ورقم اللوحه بالواسطه ودفتر السياره بالواسطه حتى القبض على المتهمين بالواسطه واخذ بعضهم الرشاوي من الوافدين فهذا يدق ناقوس الخطر
للاسف ان وزارة الداخليه تعيش بالزمان الماضي ... كيف؟؟ لاحظوا الشروط المطلوبه للتقدم للكليات العسكريه فالضابط تكفيه الشهادة الثانويه والشرطه المتوسطه هذا غير التفرقه التي تحدث فالرقيب ايضا شهادته ثانويه ولكن ماعنده معدل او ما عنده واسطه
الزمن تغير يا وزارة الداخليه فليست الشهادة الثانويه بشيء يذكر بعد الاعداد الهائله من حملة البكالريوس وليس الرجال كما كانوا بالسابق فلا يمكن ان تقارن من هم اعمارهم 18 سنه بالاشخاص الذين التحقوا بالشرطه قبل 30 سنه هناك فرق شاسع بكل شي سواء بالثقافه او الاحساس بالمسئوليه وعدة عوامل تفرق مابين الجيلين

برأيي المتواضع يجب تغيير الشروط ويجب ان تتغير ثقافة هذا ولد فلان او ولد علان ... الضابط يجب ان يحمل شهادة البكاليريوس بحد ادنى ليس لانه حمل الشهادة فقط انما لانه نضج بتفكيره واصبح رجلا يعتمد وغير هذا ان عمره لن يقل عن ال21 سنه وهو عمر افضل من الاعمار التي تقبلونهم فيها لحداثة سنهم .. وايضا وضع برنامج مكثف على الافراد المقبولين وخاصة الصغار منهم فليس الركض ورش المياه البارده بعز الشتاء هو من يصنع الشرطي المناسب انما الدراسه المناسبه والتثقيف وبث الروح الوطنيه واداء الواجب فيه من خلال دورات يكون المحاضرين فيها مختصين بعلم النفس وايضا بالادارات التي سوف تستقبلهم ... متابعه دوريه لجميع الموظفين وقراءة الملفات بعنايه مع تكثيف الدورات بكل سنه للالمام بمستوى العاملين وايضا عمل الاختبارات اللازمه ومن يرسب فيها يجب ان يؤهل مره اخرى سواء اختبارات ميدانيه او نظريه
وعلى ذمة احدى الصحف ان هناك توجها لوضع الشرطه العسكريه للشرطه .. بصراحه وبهذا الوقت وهذه التجاوزات يجب وضع جهاز كامل يراقب كل اجزاء وزارة الداخليه من امن الدوله الى الشرطه وان تكون متبوعه لوزارة العدل لكي تكون حياديه وايضا جهة للشكوى فانا اعتقد ان قسم الشكاوي الموجود حاليا لا يكفي .. فاذا كانت هناك جهه تحاسب من يتجاوز حدوده ويخطأ بحق اي شخص وسواء كان فريق او شاصي هو ما نحتاجه .. فان بعض ضعفاء النفوس كثر ويجب تقييدهم واسترداد لكل ذي حق حقه ... ولا ننسى الجازاءات يجب ان تكون صارمة جدا تصل للفصل والسجن اذا كانت المخالفه جسيمه .. فيجب ان يعلم هذا الشرطي ان هناك من يراقبه وليس هو بمعزل من المحاسبه .. مع وجود مكافئات للموظفين المتفانين بعملهم ... ولا اعلم ماذا يجب ان نفعل بخصوص القياديين المتقاعدين ... لكن الذي اعلمه جيدا اننا لسنا بدوله بوليسيه او عسكريه

ان هذه بعض الحلول واعتقد ان هناك حلول افضل ولكن يحزنني ما آلت اليه هذه الوزاره ... والله العظيم اني اعرف شخصا تخرج واصبح بامن الدوله تدرون شسوى ؟؟؟.. خزه واحد بالشارع جان يسفطه ويقوله نعم معاك امن دوله ؟؟؟
شكو امن الدوله بالسالفه الريال خزك شنو يعني انت امن دوله على راسك ريشه ؟؟؟

قبل ان اختم اريد من الفريق العثمان الي قال نريد اعادة الهيبه للشرطه ان يعيد النظر فيما قال فان هيبة الشرطه التي تتحدث عنها ليست بالتجبر والتكبر على اناس انما باصلاح ما هو خطأ بوزارتكم واصلاح الشرطه الذين جعلوا الناس نظره مختلفه من افعالهم بداية بالمغازلجيه ونهاية بالمرتشي والي يعامل الناس جنهم يشتغلون عنده ... يجب ان توضح لهم بانهم ليسوا ملوكا لكي يطغوا على الناس انما وجدوا لخدمة الناس ... قبل ان ياتي يوم وتقولون فيه يا ليتنا... اذا فات الفوت ما ينفع الصوت .... وعقب كل هذا يبون يوظفون بدون بالشرطه سنعوا الي عندكم بالاول بعدين قولوا نبي بدون بالشرطه بالنهايه ما اقول الا الله يرحم ايامك يا عمي الشرطي


----------------------------------------

-2-



ماادري ليش طرت على بالي قصة الراعي الي يقول ذيب ذيب ذيب ويقص على الناس لين طلعله الذيب صج وصرخ والعموم عطوه طاف وكلاه الذيب
هالقصه مرت علي وانا اقرى اخبار بلاغات القنابل الكاذبه .. طبعا ترى في بلاغات ما قالوا عنها لا وبمكان حساس ومااقدر اقول عنها لان الصديق الي قالي هالمعلومه طلب مني عدم ذكرها .... عموما من هو المستفيد من هذه الاكاذيب وماذا سيحصل بالايام القادمه هل هم يتبعون قصة الراعي الى ان يصلوا الى مبتغاهم ام هي وسيله الهاء عن ما يفعلون بالحقيقه ام ماذا ؟؟؟ الخبر اليوم بفلوس وباجر يبقى بلاش ... والله يحمي الكويت من كل ضرر


--------------------------------------

-3-


عقب هالخبر مااقول الا الله يرحمك يا فهيدان ووين ايامك يالقبقب






-------------------------------------


الى كل زعلان مني سواء اني ما اتصل عليه او ما زرته او ما حطيت كومنت عنده .. اهديه هذا الفيديو واقوله اسمحلي بس صج هالايام ماني قادر اتواصل مع احد وشوف هالفيديو وانشالله ترضى واذا ما دقيت انت دق واذا ما حطيت كومنت انت حط صير احسن مني ... وسامحوني على القصور بس صج مو فاضي






31 comments:

فتى الجبل said...

شنو تتوقع من شرطي ماعنده شهادة الا المتوسطة
وشنو تتوقع من ضابط ما علموه الا نعم سيدي تحياتي سيدي
شنو تتوقع من جهاز كامل ما علموه الا ان الدولة اسرة واحدة فقط لاغير والباجي خدم لهم

Kuwait said...

أول شي يعطيك العافيه على البوست مهندسنا ..
ثاني شي ببدا تعليقي على سالفة البلاغات ..
أعتقد هي لعبه وإعاده لسناريو الثمانينات ..
زعزعة الأمن .. خلق حاله من التشتت للأجهزه الأمنيه .. استخدامها كحرب نفسيه .. ولكن أكيد تبقى هذه مجرد افتراضات وتبقى الحقيقه مجهوله ..
نرجع حق الداخليه .. حاليا انا ما اشوف للشرطه أي هيبه بالمره ..
أولا لان الغالبيه العظمى يهال ..
وتفكيرهم أقرب إلى ان يكون سطحي والا شنو يعني شرطي يوقفك يقول اسمحلي حاطلي شعار مدريد وانا برشلوني هذي مخالفتك !!!
والا الثاني يصفط له واحد يقوله خوش موتر عندك ماعليه نشوفه !!
هذي الامور وكثير غيرها حدثت حقيقه والله يعني اذا هذا مستوى شرطتنا تبي الكبار والرياييل والحريم الكبار الناس الواعيه توقف لهم والا تعطيهم أدنى اهتمام ؟؟ ما أعتقد مثل هالاشخاص بيحصلون أحد يهابهم غير اليهال الي أيهل منهم ..
أما على سالفة التجاوزات والواسطه فعد وخربط .. الدنيا صارت سبهلله وسايبه .. مشكلتنا الواسطه وعمك وخالك ورفيجك وانت الي رايح ..
متى ما صار القانون فوق كل شي وصاروا الشرطه من الناس الواعيه والشباب الي يملكون عقول ناضجه حزتها بس بتكون الداخليه استعادة هيبتها ..
آخر نقطه اليوم .. ليش زعلان .. ما أظن انها لي لوووول
تقبل مروري ..
kuwait

5roofa said...

الشرطة صارلهم فتره هذي حالتهم

الله يستر على الديره

و امبي على القنابل المره الي فاتت وحده تقول حاطين بالجريده انه لاقين في مدرسه

يماا انزين مدرسه شكو يهال و مدرسين شعليهم اهم؟؟ظ

الله يستر و يخلي لنا الديرة سالمة من كل شر

الفيديوو يشوووووووووووق و اقولك مسمووووووح يالي تعذر لوول

افا عليك انت غالي و زيارتك واصله

salamz dear friend...

وردة حب said...

اي واللللللللللله

طحت عالوتر الحساس

الشرطة مصخرة صايرة

خصوصا المهبل اللي عالبحر هذيل اللي راكبين حصان

صج صج مصخرة

لا وفوق هذا يهاااااالوو وماتمر بنت مايخزها فوق تحت

صج صج كل شي تحول

مو بس الشرطة

الناس ترتقي وتتقدم وانا نرجع وراااا لاايام الجاهلية...

يعطيك العافية

على نفسها جنت براقش said...

مو تزعل

لووووووووول

مو فاضى و كاتب جذى

اذا فاضى اش بتسوى

:)

ezain_kilah said...

لوووووووووووووووول ومنو هذا اللي يقدر يزعل منك بشمهندس؟

عاد شرايك إني خذيت الليسن بالواسطة, ويوم مرة رحت أدفع مخالفاتي الكل واقف بالدور إلا انا مخلصة شغلي أول واحدة على بو بنية

قاعدة اقول لهم أنا بوقف بالدور... ما يصير في ناس قبلي

يردون علي لا عادي طوفي

هذا وانا حجاب وحالتي حاله, الله يعين لو أنا بريدجيت باردو :p

بس عموماً عجبني موديل النحوي ... ييت للعين وبزيتها على قولتهم

ومو تصير "مو فاضي" وايد ... ترى مو قبول

darkness said...

الله يعينك و يعطيك العافيه

:)


شرطه مين يا عم؟

هو فيه شرطه؟؟

وجاااك الذيب و كله كل الخرفان و الراعي نايم بالعسل


و كلمن يتكلم لغته الخاصه فمنهم من يتكلم بالقلم و منهم بحد السيف

:)

حسافتج يا كويت said...

مهندسنا
دعوة لك للحلم الجميل في مدونتك حسافتج يا كويت

حسافتج يا كويت said...

مهندسنا
دعوة لك للحلم الجميل في مدونتك حسافتج يا كويت

Mok said...

يعطيك العافية عزيزي

خوش بوست

قواك الله

:)

kila ma6goog said...

وزارة الداخلية تحتاج الى انقلاب يعفس عاليها بواطيها

هي أفسد وزارة بلا منازع , و هالكلام ليس هجوما على الوزير الحالي فهو مسكين ورثها بخماجيرها من اللي قبله و قبل اللي قبله و اللي قبلهم

باختصار انا بالكويت افضل احل مشاكلي بنفسي على الاحتكاك برجال الامن

wa6an-alnhar said...

الشرطه و ما ادراك ما الشرطه
:S

بالاول نحتمي فيهم و الحين والله نخاف منهم
بس وين مسلسل (الخطر معهم ) عنهم
:p~



عسى الله يحفظ ديرتنا
:(

Eng_Q8 said...

فتى الجبل

ما اتوقع شي يا فتى الجبل وانا فاهم شقصدك بس للاسف محد عارف التاريخ عدل :)

----------------------------------

الكويت

الله يعافيج

والله انا مو مستعيل بس توقعاتي انها مو حرب نفسيه كثر ما اهي اثبات للوجود للخلايا النائمه

انا بحط روما وفي خير يقولي يشجع ريال ماراح تقزر عليه :)

اعجبتني خوش موتر اكيد انتي بنيه ؟ :)

صحيح صحيح

لا مو حقج :p

حياج يا يبا

-----------------------------------

خروفه

الله يستر على الديره

انتي خايفه على اليهال والا خايفه على روحج :p

ثانكس :)

-----------------------------------

وردة حب

للاسف

الله يعافيج

-----------------------------------

براقش

محتره :p

اذا فاضي بألف كتاب عنج :)

-----------------------------------

الزين كله

هلا وغلا باختي الغاليه وايد يزعلون وانا اخيج

ممممممممم بالواسطه احب الصراحه :)

اشدراج اني احب بريجيت بوردو :p
لو انتي بريجيت بوردو يقعدونج بكراسيهم

حاظرين :p ترى يطلع مني

انشالله :)

-----------------------------------

داركنس

الله يعافيج

اي في ناس لابسين لبس شرطه

نوم العوافي :p

بس لي الحين الذيب ما طلع ترى

اهم شي بحد السيف :)

-----------------------------------

حسافتج يا كويت

انشالله

----------------------------------

موك

الله يعافيك

من ذوقك

الله يقويك ويخليك :)

-----------------------------------

مطقوق

اي والله تحتاج انقلاب من زماااااان وافهمني اشكثر من زماااان

صحيح صحيح

وانا مثلك :)

-----------------------------------

وطن النهار

اي والله

اتعيبين على الخطر معهم اصلا من كثر ما المسلسل ناجح قناة فلاش اتعيده من اول ما افتحت لي الحين :p

امين

لا تمدين البرطم ابتسمي :)

-----------------------------------

cheb_ali said...

1
جريدة الشاهد من احسن الصحف صراحة براي الشخصي
وماعندي تعليق بعد هالكلام الكبير الي ذكرته :)

2
انا سمعت انه صج في بعد بس ربعنا خايفين انهم يسون ربكة وقلق لدى الشعب الي عبالهم ليلحين مايدري وين الله قاطه

3
مالي بالكرة :)

وما من قصور طال عمرك بس اشتقنا حق مقالاتك , لا تقاطع

Peace said...

الله يرحم ايام زمان
لما كان للشرطي هيبه

و كان اهلنا يخرعونا بالشرطي

اما الحين اليهال يخرعون الشرطه

Kuwait said...

AM BACK ,,,

"
الكويت

الله يعافيج

والله انا مو مستعيل بس توقعاتي انها مو حرب نفسيه كثر ما اهي اثبات للوجود للخلايا النائمه

انا بحط روما وفي خير يقولي يشجع ريال ماراح تقزر عليه :)

اعجبتني خوش موتر اكيد انتي بنيه ؟ :)

صحيح صحيح

لا مو حقج :p

حياج يا يبا

"

لوووووووول اهم شي خوش موتر ..
انا نقلت الكلام بالضبط لان الشرطي التحفه هذا ريل رفيجتي ..
أشكره بويها أقولها شنو هذا ريلج ريال والا ياهل .. هذي شرطة الديره !!
اما اني بنيه لووووووووول
لا تعليق :P

Shaima'a Alkandari said...

البلاغات الكاذبه ربما تكون تمويه او تظليل للناس لا اكثر ومثل ماقلت مصير المكشوف يبان

وعلى طاري الشرطه يبه مو بس الشهاده اللى تخليهم فاهمين وعارفين ساعات تلاقي شهادته بكالريوس بس ماكو عقل او منطق مايحترمون هذي المهنه اساسا واللى شهادته متوسطه احسن من البكالريوس

المفروض يكون الشرط الاساسي للقبول انه يكون عارف ان هالمهنه مهمه ولازم يكون مقتنع انه بيكون مسؤول عن الشعب وعليه ان يحترم المهنه نفسها لان احنا بنعتمد عليه
يقولك حاميها حراميها

ومسموووووح ياخوى

Barrak said...

س 10 س 10

حوّل

Eng_Q8 said...

علي

صحيح جرده ممتازه بالطرح
شكرا :)

والله ما يندرى عنهم

ادري :)

انشالله :)

-----------------------------------

بيس

ايام

اي والله صاجه

-----------------------------------

الكويت

ولكم ولكم :)

اها شكرا للتوضيح

بنيه وشيخة البنات بعد :)

----------------------------------

شيما الكندري

ممكن

صحيح ولو قريتي عدل ممكن اتلاحظين اني ذكرت موضوع العمر والعقل :)

اي والله

شكرا

-----------------------------------

براك

لحد الحين ما عرفت يعني شنو س 10

وقفففففففففففف وققفففففففففففف اقولك وقف حرامي ينحاش ويقوله وقف صج مسلسل فاشل :)

-----------------------------------

بو محمد said...

مهندسنا الحبيب
الصراحة
استمتعت و أنا اقرا تغطية جدا متقنة
تسلم على مجهودك
تقييم أداء أي شخص أخي العزيز مرتبط بأمرين هما طريقة التأهيل و التميز في التطبيق، هذا رأيي بالنسبة للشرطة

مرة أخرى مجهود تشكر عليه

Eng_Q8 said...

بو محمد

اسعدني استمتاعك :)

الله يسلمك من الشر

رايك صحيح ميه بالميه

شكرا :)

الخيلاء said...

امم بالنسبه حق البلاغات مايخفي على احد مصدرها


اذا صار جهاز الامن الي المفروض الناس تلجأ له بحث عن الامان اهو مصدر للفساد .. فهذا وضع خطير يحتاج

حاميها حراميها ..

يعني حادثه حصلت لي قبل جم شهر . دعمني هندي و دقيت على 777 و حولوني المخفر .. جان يقولي في اصابات .. قلت له لا .. جان ايقولي خلاص اخذي دفتر سياره الحمار عزك الله الهندي و عطيه دفتر سيارتج و تعالي مخفر دوار شهرزاد ..
جان اقوله وين هذا .. اول مره اسمع فيه .. قالي بشويخ الصناعيه .. قلت له وين بالضبط .. جان ايقولي تبيني ادليج بعد و صكه .. بالله هذيل وين وخدمه الشعب وين .. و لا الاسلوب يعني انت رجل امن المفوض اسلوبك يكون ارقى من جذي ..

بس دام هذي شروطهم وين بنشوف الرقي

نطرة اخوي الله يعافيه لما يه اوداني

Selezya said...

لا عاد انا بزعل

عثماني said...

كلمات وضعت على الجرح

خوووش بوست

:)

Eng.S said...

صديقي

انقطع نفسي و انا اقرا :))

مفهوم الشرطة بكبرة لازم يتعدل
وزير الداخلية الحالي اعتقد انه افضل الموجود بدون شك ومن خلال تجربة شخصية اقول لك انه جاد جدا
واتمنى من كل قلبي ان ياخذ و قته بالوزارة و يفتك من الطامعين بكرسيه


موضوع عجبني
;)

هذيان said...

يا مهندسنا الشرطة عندنا تحتاج
قوة خاصة تضبط المسائل

والشرطة في خدمة الشعب سابقآ

Enter-Q8 said...

مهندسنا العزيز

الخمال بكل ديرة

لسنا ملائكه و لا منزهين

لكن ليس بهذا السوء
اذا اردنا النظر الى افراد الشرطه فالننظر الى الواسطات التي تتدخل لنقل فلان الى الادارة الفلانية او تجاوز اختبارات القبول

وايضا لما استمعه من ما يحدث بكلية التدريب لهم
شيئ عجيب
يجعل المتخرج منها يريد الانتقام
غير هذا لننظر الى القياديين
الذين اغلبهم يقول لك لماذا اعمل و باكر اتبهدل و الداخلية ما توقف معاي
اعرف ضباط شباب
تعال شوف مشاكلهم و كل اشوي بالتحقيقات
ماسك واحد مهرب خمر
و لأنه المهرب قاومه
فقاومه بالتالي
اصبحت لديه مشكله استخدام العنف
الضابط هذا و زملائه
متأخره ترقياتهم
كذلك ضباط صف اخرين
حادثه امام عيني
عند كلية البنات التجارية
واحد قاعد يفتر عند البوابه و يقحص على الخفيف
وقفوه اشتبي ما تبي
انا جاي اخذ بنت خالتي
تعال اثباتك اوقف
دز الشرطي
الشرطي دزه و بلغ الدوريات
ثاني يوم بالراي العام
حاطين الشرطه غلطانين و اتهام وبلاوي
عقيد بالداخلية شاف بنغالي قاعد يبوق مغطاة مجاري اعزكم الله طلب هويته و حاول ينحاش
فزع له واحد كويتي ويقول حق البنغالي لا تعطيه هويتك و يصرخ على العقيد
العقيد طلب دوريات و جاءو ومن ثم الراي العام كتبت عنه ان مسوي له سجن خاص و يمارس القانون على كيفه

للأسف ان الاعلام و خصوصا جرايدنا تعال شوف التطبيل او الذم

ملاحظه العثمان مشى من الوزارة من زمان
اللي نحتاجه فعلا هيبة القانون
لخصوصية عملي فأحتكاكي برجال الامن كثير
منهم الزين و منهم الشين
اهم بشر
لكن هل هم يؤدون واجبهم على اكمل وجهه
لا نعم لا لماذا
لأنه اهو اللي راح يتبهدل بالاخير من قياديينه اللي عيطونه الاوامر و من ثم يكسرون فيه

اغلب منتسبين الداخلية
متفائلين هالايام
بدعم الوزير لهم

يالله نتمنى انه يصلح الحال

Ni3Na3aH said...

3ala -3-
3ala Qanat el wa6an ele ma3endaha salfah wala mawathee3.. o momet2akda etha kanat nashrah reyatheyah wela birnamij ma3endah salfah.. kan feeh iti9al hatefy ma3a hal moshaje3 ele nesait esmah 7ata... o s2alooh 3an ele 9ar.. fa gal laa hathy mo sacheenah.. hathy mograthat athafer..!
el 9ara7ah ana mashft mograthah hal 6ool o ma3ana shakilha ma6wa shayelha bal6ajy.. chethe wala chethe..shako e6ale3 shay 7aad o t'haded feeh..!!!!

فتى الجبل said...

شوف آنا ماقول حق احد وينك لأن كل واحد حر يبي يكتب والا مايبي
بس انت امون عليك...كيفي:p
وينك من زمان لا تكتب ولا تمر تزورني؟

strawberry said...

o0lessssssssh za3lan ma y7achena ;ppppp looooool

ama mao`9o3 elshr6a no comment ;/

Aldenya said...

والله مكانك فاضي مهندسنا
وعاذرينك
وللأسف البعض من الشرطة
قاعدين يوصلون هالمهنه الى منحدر كبير
والله يحفظ الكويت من هالبلاغات الجاذبة
وان شاءالله ما تصير قصة الذيب صجية
:/
لانه اكيد في اشياء كثيرة بنخسرها