Monday, March 24, 2008

حلـــــم

اعتذر عن هذا الانقطاع اللاارادي ... وها نحن نعود من جديد ... والشكر الجزيل لكل من سال ولكل من لم يسال
لقد طرأت الكثير من التطورات بداية باستقاله الحكومه و حل المجلس والان الانتخابات .. ولكن رب ضارة نافعه وممكن ان اربط هذه التطورات مع بعضها البعض
مالذي يحدث بالكويت ؟؟ هذا السؤال الذي يطرأ على اي مراقب لشؤون الدوله فلقد كانت الكويت على صفيح ساخن بفتره ليست بقصيره وها قد بدأنا نجني ثمار ما جنته ايدينا
قد يتساءل البعض اشلون حكومه اتقدم استقالتها عشان 50 دينار وعشان ازالة دواوين ؟؟ ان الامر قد يتعدى هذه الاسباب وقد تكون هناك ايدي خفيه لكل ما يحدث ولكن لن استبق الاحداث وساتكلم عن الاسباب الواضحه
ان السبب يرجع اولا واخيرا الى الشعب الكويتي ككل ... فاذا افترضنا ان هذه هي اسباب استقالة الحكومه فان مجلس الامه هو المسئول الاول والاخير فاعضاء المجلس هم من يريدون كسر القوانين بالرغم انهم مشرعين ويجب ان يدافعوا عن القانون ... فماذا ننتظر من مجلس استغل اعضاءه مكانهم لكسر القوانين من مخالفة مروريه الى وضع قوانين تشرع التعديات على املاك الدوله ؟؟؟
لم يكن مستغربا ولا مفاجأ ما حصل بالايام السابقه فالوزراء يخشون النواب والنواب يتلاعبون بالقانون وبمشاعر النواب
ماذا بعد الحل ؟؟
بعد متابعة ما يحصل الان فانا ارى ان التغيير سيكون بسيط ولن يكون هناك تغيير ممكن اي ينهض بالبلاد .. فتقسيم الدوائر يوضح معالم اغلب الاعضاء الذين سينالون ثقة الناس .. فهناك القبائل والطوائف الذين سيحصدون الاغلبيه من المقاعد وهناك العوائل والتكتلات التي تسمى الوطنيه و مشترين الاصوات هم من سيحصلون على الباقي
لن اخوض كثيرا بهذا الموضوع لانه سيطول كثيرا ولكني استغرب افعالكم يا كويتيين ... واحد يسالني اشلون انا اقولكم اشلون
ناس يقول يبي يبيع صوتي لان ماراح يفيده النائب ولا في احد محسوب عليه
وناس يبون يصوتون حق ابناء قبيلتهم ... تخيلوا ان واحد من هذيل يقو مايطاوعني قلبي اقرى اسمه وما اصوتله خوش منطق يالحبيب
وواحد ما يبي يصوت خير شر
وواحد يبي يصوت حق فلان لانه ملتزم ؟؟؟ او مشاله معامله او وظف ولده او بناله رصيف يم بيتهم او سلم عليه واهو طالع من المسجد
وواحد يبي يصوت حق فلان عناد على الطائفه الاخرى
وغيرهم وغيرهم وغيرهم
هم قله من وضعوا الكويت امام اعينهم قبل التصويت وتدرون شنو المشكله ؟؟؟
كـــل هذيــــل يتحلطمون على الاوضاع الي صايره ومو عاجبهم شي
انزين يالحبيب بدال ما تتحلطم ليش مصوت حق هالناس بالاساااااس ؟؟؟ ليش تنتقد وانت اساسا مشارك بالي يصير ليش تتحلطم وانت من اوصل شخص ما يستاهل الجلوس على الكرسي الاخضر .... تدرون شنو ردهم ماكو احد يستاهل او كلهم حراميه او كلهم مصلحجيه ؟؟
سؤال انتوا اشدراكم الالوسي يصير لكم وانا ماادري ؟؟ شي غريب ومنطق فاشل ... يمكن في احد زين نازل انت سالت عنه رحت حق ندواته ؟ قعدت وياه ؟ شفت منطقه ؟ شفت ماضيه ؟ اشدراك كلهم نفس الشي ؟؟؟؟
للاسف ان النظره التشاؤميه هي السائده وعدم الثقه بالطرف الاخر هي المنتشره الان ... ومن جعل هذه النظره سائده هم المتأسلمين المتلاعبين بالدين لكي يصلون الى المجلس .. الوطنيين الي يسمونهم ليبراليين الي هادين كل شي وقاعدين يتكلمون عن منع الاختلاط الديره معفوسه والحبايب منع اختلاط ... بياعين الحجي الي يقول بسوي وبسوي واخر شي لا ارى ا اسمع لا اتكلم ... مرشحين بعض القبائل الي لا يعرف يقرا ولا يكتب والمجلس انحل والحبيب يبي يدعم الاعلاف تكفون هذول اعضاء ؟؟؟؟ لا وطالعين لكم طلعه هذا ينتمي حق حزب بره الكويت والثاني حق مصر والثالث افغانستان والي حاط صورة نصر الله بدوانيته يعني الحياة كسيفه
نعم مالاكثريه ما يستاهلون نعم صار عندنا قناعة اقضب مينونك لا اييك الاين منه ونخاف التغيير ... لابد انغير لابد ان تظهر وجوه جديده على الساحه لابد ان نثق بابناء وطننا الشرفاء فهم كثر لله الحمد ولكن ليس هناك من يقف معهم ويجب ان تكون للاغلبيه الصامته الغلبه هذه المره وتكون الاصوات لاجل الكويت وللمصلحة العااااامه
الحلم ببلاش وانا بحلم بمجلس مافيه ولا عضو من الاعضاء الحاليين ومافي ولا واحد يحط حزبه او ربعه او جماعته او نفسه امام الكويت ... بحلم بوزراء عينوا مو عشان حزبهم ولا طائفتهم ولا قبيلتهم انما لانهم اكفاء وشرفاء ويستطيعون تحمل المسئوليه ... بحلم بشعب يحب الكويت ولا ينتخب شخص به ذرة عنصريه او طائفيه او نفس دنيئه تريد المصالح الشخصيه .... بحلم بالكويت واهي عروس الخليج فيها الوزارات تشتغل عدل فيها المباني والمشاريع الحيويه فيها القااااانووووون يطبق فيها الناس سواسيه امام القانون فيها الحقوق والواجبات وحده من اصغر واحد لين اكبر واحد فيها التقدير لمن يعمل والفصل لمن لا يعمل فيها الناس عايشين بسعاده وهدوء فيها المستثمرين الي يتراكضون عشان يستثمون فيها فيها الشعب الي ينتج ويتعب وعايش مرتاح فيها المشاكل الي لا تذكر فيها الناس الي يحبون بعض ..... خوش حلم لكن الواقع يقول
اللــــــــــــــــهم لا اعـــــــــــــــــــــــــــــــتراض
ماكو فيديو اليوم

22 comments:

wa6an-alnhar said...

للحين معصب ؟ :)

شقولك يا مهندس الوضع صحيح ما يبشر لكن دام الامل موجود و الناس الطيبين ما انتهوا راح نبقى نتفاءل

الكويت راح تظل الدافع الاول و الاخير اللي يخلينا نظل نتفاءل

واللهم لا اعتراض على قرار مهندسنا بإعتزال الانتخابات البرلمانيه
:)

حسافتج يا كويت said...

مهندسنا شلونك

من زمان عنك

ماتمرنا

موضوعك وكلامك حلو لكن أشوية اختلف معاك بان الخطاء منا نحن الشعب

الشعب يبي يتوظف واللي ماسك الوظايف الحكومة لو الحكومة ماشية بما يرضي الله في هذا الموضوع جان ماشفت أحد يصوت حق فلان عشان يوظف ولدة

قوانين الحكومة في بعض الأمور مشوهة ومعيبة + الحكومة غير جادة بتطبيق القانون على الجميع

يعني لما الواحد يشوف جذي شقول
يقول بنتخب فلان عشان يضبطني واكسر القانون ومحد يكلمني مثل فلنتان

وهكذا
انا ما اقولك المجلس ملاك
لكن هي دائرة حكومة ضعيفة شعب يبي مصلحتة ومالقى عين حمرة ينتخب نواب خمّة عشان يضبطونة
نواب خمة يغلبون الحكومة
حكومة تستقيل ومجلس ينحل وسلملي عالكويت!!


وأتمنى تنورني بالمدونة تقرى الموضوع انا قاط اللوم على الشعب بعد لكن مايمنع إن الحكومة لها دور كبير

وشكرا

kila ma6goog said...

شمذكرك بالألوسي؟

الخيلاء said...

مهندسنا ولكم باك :)

نبي التغير .. بس مو لاقين البديل

اصحاب الفكر و العقول كلهم اعتزلوا و اصبحوا متفرجين

و هلوا علينا المترديه و النطيحه و الي نص نص ..

يعني حتى البدائل التوفره ماترقى للمستوى المطلوب

و الله يكتب لنا الخير بالمجلس القادم

5roofa said...

حمدالله على السلامه

تدرين مهندسنا مادري ليش من كلامك طرا على الي الكلمة

ياك الموووووووووت يا تارك الصلاة لول

احس جذي قاعدين تقولون من قالو في انتخابات

منور خيوو

salamz dear...

Eng_Q8 said...

وطن النهار

اي :)

انشالله

شنسوي بعد :)

----------------------------------

حسافتج

تمام الله يسلمك

والله مشغول

امر والله بس ما يمدي احط كومنت سامحنا ياخوك

وانا دايما اقول لابد القانون يطبق ولازم ما تكون هالسوالف عذر لابد ان تطغى مصلحة البل على المصلحه الشخصيه يجب ان ياتي الينا نواب لا يكسرون القانون ويحرصون على تطبيقه هذا ما ندعوا اليه

انشالله من عيوني

----------------------------------

مطقوق

طرى على بالي :p
وانا مندمج :)
----------------------------------

الخيلاء

ثانكس :)

الناس الشريفه والعقول النظيفه موجودين وانا اخوج بسمافي احد يدعمهم ولا يوقف معاهم وانشالله ايي اليوم الي يقدرون يطلعون فيه للساحه السياسيه

الله يكتب الي فيه الخير انشالله

----------------------------------

خروفه

الله يسلمج

شكوووو :)

والله تقدرين اتقولين جذي :)

-----------------------------------

bass said...

مهندسنا

حمدالله على السلامة


حط الكويت بين عيونك و صوت ؟


دمت بخير

Eng_Q8 said...

بس

الله يسلمج

الله يكتب الي فيه الخير

cheb_ali said...

عودة موفقة عزيزي

الحمدالله على السلامة

ياخوك الشعب بيده خراب وبنيان الديره باختياره للنواب الصالحين
ولا عشان لحية فلان ولا عشان عايلة فلان جذي بيضيع الديره وبالاخير يقولك الديره صايره ماتنبقى والنواب صايرين كلش :)

Shaima'a Alkandari said...

الله كريم

وحلم جميل ويارب يتحقق

وجان زين كل واحد قبل مايفكر بمصلحته الشخصيه يفكر بانه يخطي خطوه تهم وتنفع الكويت قبل كل شي

وياليت كل واحد يعرف منو يرشج وحق منو يصوت لان الصوت امانه ومو اى احد يستاهل يكون بالمجلس

Eng_Q8 said...

شاب علي

شكرا

الله يسلمك

صاج

-----------------------------------

شيماء الكندري

اتمنى :)

----------------------------------

هـــدب said...

انج ولكم باك

كلامك صح ميه بالمية
السالفة كلها تحلطم بتحلطم

ليش تتحلطم وانت اللي مشارك بالي يصير

عساك علي القوه

Kuwait said...

welcome back ,,,
احلم واحلم واحلم .. وماردك بتقوم من النوم على واقع مـــر في زمــن أقشــر ..
تقبل مروري ..
kuwait

فريج سعود said...

يلا يبا هذا وقت تحقيق الاحلام شد الحيل وانا وغيري المفروض نحاول التغيير للافضل

Eng_Q8 said...

هدب

كل واحد المفروض يسوي الي يقدر عليه

----------------------------------

الكويت

ثانكس

ومالحياة الى احلام نسعى لتحقيقها وانشالله تتحقق ليش لأ

----------------------------------

فريج سعود

انشالله خير

كل واحد يسوي الي يقدر عليه

ومانشستر خسرانين انشالله

----------------------------------

فتى الجبل said...

ماذا بعد الحل؟
المفروض ان الشعب يقول كلمته
ونتمنى ان الكلمة هالمرة تكون صح
حتى لو بنسبة 60% من عدد النواب على الاقل الصح يكون اهوا الاكثرية

Eng_Q8 said...

فتى الجبل

انشالله الله يسمع منك

حمد said...

عودا حميدا

وبما ان الجميع مو شي ماكو الا نفلها ونقعدهم ببيوتهم :)

والا شرايك ؟؟

تحية لك

Eng_Q8 said...

حمد

شكرا

منو تقصد بالجميع ؟

سدرة العشـــاق said...

قول آميــــن

عسى الله يوفق كل واحد ووحدة يحطون حب و مصلحة الكويت فوق " اي اعتبار " آمين من قلب


حمدلله على السلامة
: )

darkness said...

الحمد لله على السلامه

:)

و ليش فيديو قاعدين نشوف مسرحية بالحياة كل يوم من كثر ما اهي محزنه نضحك

و بعدين الا بسالك انت ليش غبت ليكون برشدونك انت بعد؟؟

Eng_Q8 said...

سدره

آمين

الله يسلمج

----------------------------------

داركنس

الله يسلمج

اي والله صاجه

لووووووووووووووووووووووول تخيليني مرشد :p

اي انا امشي مع نظام الترشيد :)


ماكو ياخوج اشوي الدوام ذابحني عندنا شغل وايد وبس :)

----------------------------------