الرعي الجائر

شكرا وبرافو ل مطقوق والطارق وعبداللطيف الدعيج والتحالف الوطني لمدافعتهم عن المدونين والتدوين .... محمد الوشيحي خلاص رضيت عنك

:p

---------------------------------

مع موجة الغبار الي كل يوم يايتنا ومع موسم السرايات ومع البخاخات والكمامات وحبوب زرتك وكحه الناس بكتب هالموضوع الي انشالله يكون فاتحة خير للبحث والدراسه على كيفية القضاء على الغبار ... ادري صعبه بس لازم انحاول ولازم يكون هناك وقفه جاده من الحكومه للقضاء على الغبار ويا مرشحين سمعوا

من اول ما خذينا مادة الاجتماعيات برابعه ابتدائي ولي اليوم الي كل واحد صار شكبره ويقرا جرايد نقرا هالكلمه سبب التصحر هو الرعي الجائر واذكر كل امتحان حاطين لنا اياها .. عرف الرعي الجائر وتعريفها هو رعي الخرفان بالصحراء بحيث انهم ياكلون الاولي وبالتالي ويقضون على الثروه النباتيه الي ما شفتها بالكويت

انا بسال سؤال وجيه الحين من اول ما اخترعوا مادة الاجتماعيات بالكويت واحنا ناخذ هالتعريف يعني مافي واحد احفظه وصار مسئول بالبلديه والا بالهيئه العامه للزراعه والا وزارة المواصلات والا رئيس قسم الارشيف ... يعني ما في واحد قال والله وقفوا هالرعي الجائر ؟؟؟ وبعدين اصحاب الحلال والحلال لغير الناطقين باللغه البدويه هو الخرفان والبعارين وخلافه .. يعني لازم اتربي خرفان ياخي رب بعارين ونياق على الاقل البعير ما ياكل النبته ويشلع جذورها بس ياكل شوي منها على حسب علمي وبعدين في بعارين ازقرتيه شوفوا الصوره الي حاطها شقران

خل نتكلم جد اشوي ... هل تعتقدون ان هذه النباتات الصحراويه ستساهم بوقف الغبار ؟؟؟ طبعا اي كائن عاقل راح يقول لأ صحيح انها اتثبت التراب بس مو لي درجة انها اتوقف الغبار ... فالان ماذا يجب ان نعمل ؟؟

انا اقولكم اذا في احد يقرا الحين وهو شايب و زار الامارات ايام السبعينات ابيه يشهد على كلامي .. اخوي الشايب لما رحت الامارات وركز على ابو ظبي ودبي هل كنت اتشوف لون اخضر هل كنت اتشوف شوارع هل كان الجو رطوبه مثل الحين ؟؟؟ طبعا هالشايب الي راح يجاوب راح يقول لا

فما هو الحل اذا ... الحل هو بالزراعـــــــه بدال ما نعطي الدول الملايين عشان كوارثهم شوفوا كارثة الغبار عندنا بدال ما نصرف الملايين على شيره (شجره) زينه وليتاتها اتلوع الجبد جنك داش عيد ميلاد هندي ياخي حط نخل حط سدر حط اي شي اخضر ... المصدات الهوائيه الطبيعيه والحزم الخضراء هي الحل وهذا يتم حينما تزرع اشجار على حدود الكويت وبداخلها ايضا .. الصحراء تمثل 90 بالمائه من اراضي الكويت فما المانع من زراعة الاراضي الصحراويه حتى وان كانت تستخدم لاستخراج النفط فالنباتات لا تؤثر على كفاءة الانتاج ... خاصة وان الاراضي النفطيه لا تطأها الاقدام ولا السيارات غير المرخصه لها بخلاف الاراضي الاخرى ...

وانا عندي اقتراح ان كل مخيم ينحط بالاشتا (الشتاء) لازم يزرع صاحب المخيم خمس شجرات ويهتم فيهم داخل المخيم بدال ما ناخذ فلوس على المخيمات انا اقول خل نزرع والدوله تتكفل بتوفير الشتلات للمواطن صدقوني راح انشوف شي نستانس منه

وهذا اقتراح بقانون وبرغبه وبكل شي

اعتقد بان الزراعه سوف تحل الكثير من المشاكل تباعا مثل مشكلة التلوث البيئي والامراض وهذه من اهم المشاكل التي تواجه التنميه البشريه بالكويت وايضا ستساهم بتغيير الارض الصحراويه حيث ستصبح خصبه من المواد العضويه التي ستتحلل بها من جراء الزراعه وهنا نستطيع ان نزرع الخضراوات الضروريه المستخدمه للاكل بدال جم مزرعه موجوده بالكويت اتبيع بس طماط وخيار وفراولة خايسه ... راح اتردون واتقولولي من وين انييب الماي .. وهذا راح يرجعنا للبوست الي قبل الي طاف ... استخدام المياه المكرره ومياه المجاري واستخدام وسائل الري الحديثه مثل وسيلة التقطير وايضا استخدام الاشجار التي تقاول الحراره والجفاف سوف تساهم بشكل كبير بحل هذه المشكله العويصه ... وايضا ليس من العيب ان نستعين بالدول الشقيقه كالامارت لكي نتعلم وناخذ الخبره

تذكرت الحين مركز الكويت للتقدم العلمي ما عرفوا يكتشفون طريقه يديده حق الزراعه ؟؟؟ والا بس شاطرين يروحون مؤتمرات ويحطونلي رجل آلي لابس دشداشه ويرقص ... انا مو متخصص بالزراعه ولا اعرف ازرع الا اللوبا الي انحطها بقوطي الروب مع قطن وتطلع نبته هذا حدي .. ولكن اعتقد ان المساله بسيطه لان هناك الكثير من الدول قد بدات بهذه المشاريع ... وهم بعد نسيت اقول ان السماد متوافر وهو سماد غير عضوي نستطيع استخراجه من الغاز الي قاعدين انحرقه كل يوم

المسأله يبيلها وقفه جاده ودراسه متأنيه صدقوني بتنحل بس وين الي يسعى للموضوع ... والله يكسرن خاطري الكويتيين لما يسافرون ويشوفون خضره يستانسون وودهم ياكلونها من كثر ما احنا مشافيح على اللون الاخضر ... مع اني قدساوي متعصب اتمنى ان تكون الكويت خضراء ... بس ادري هالبوست راح ينقط بمزبلة الانترنت ولا احد راح يدري عنه ... ولكن لنتفائل وانشالله اتصير الكويت خضراء ... حتى الملاعب جلحه ملحه مو خضره ... بس بس خل اسكت لا ادش بموضوع ثاني

طلعت من جو الانتخابات شوي وراح ارد له مره ثانيه انشالله بالبوست القادم ... ونبيها خضرااااااء

اللــــــــــــــــــهم لا اعتـــــــــــــــــــــــــــــــــراض