Wednesday, July 30, 2008

حسن و مرقص ... يزيد و عباس !؟!؟

تحديث

العرزاله كتب خبر بانهم لقوا حسين الفضاله قرت عين اهله والحمدلله على سلامته وناطرين الاخبار

بما ان الاخت العزيزه الزين صبحت بمدونتي اليوم وطلبت اني اصور الصوره الي ما صورتها .. وبما ان اختنا العزيزه الزين تستاهل صورنا الصوره بس حسافه الاعلام مو راضين يتحركون نفخت عليهم هم ما نفع المهم العلم الي يم علم الكويت اهو علم السويد وهذي اهي الصوره صورتها اليوم







اولا احب اشكر الاخت اليوفي على وضعها للبوست والتنويه على الفلم الجميل بمدونتها واهي الي خلتني اسحب على بات مان واروح حسن ومرقص الي ما كنت ادري انه نازل بالاساس

الفلم من اجمل الافلام الي شاهدتها من حيث الهدف .. والي يبي يروح عشان بس يضحك لا يروح .. الفلم باختصار يتحدث عن المسيحيين والمسلمين بمصر المحروسه والاحداث تهدف الى ان الدين لله والوطن للجميع وايضا الانتماء للوطن لا تحدده اديان وغير هذا العلاقات البشريه يجب ان لا تتأثر باختلاف الديان والمذاهب وايضا نبه بان الاسلام دين سهل الفهم وبين من يغالي بتمجيد الاشخاص وغيرها من النغزات الرائعه

بصراحه ابدع عادل امام و عمر الشريف باختيار القصه من زمان مو شايف شي له هدف سامي مثل هالفلم .. وهذا يخليني افكر وين مسرحياتنا السياسيه القديمه وين المسرحيات الهادفه ؟؟ صفينا على شوف ويهك وشوف راسك وريحتك خايسه ؟!؟ لا هدف من المسرحيات والمسلسلات طراقات وبجي ولازم غني وفقير وما عندهم سالفه الا ما رحم ربي

وانا اطالع الفلم طرت على بالي شغله .. لو عادل امام يبي يسوي هالفلم بالكويت شراح يسميه ؟؟ راح يتعب والله .. شنو بيختار يزيد وعباس والا شليويح و هاني والا مصعب وسامي والا عايشه و زهراء والا فهد و خضير والا علي وعبدالرضا والا البراء و احمد والا عيمانوين وعبدالرحمن والا منو والا منو والا منوو عندنا خلافات واسامي ما اتخلص بهالموضوع واللبيب بالاسماء يفهم

ما اخبي عليكم اني مستانس على تفاعل الكل مع قضية حسين الفضاله وهذا المطلوب منا ولكن اذا رد لنا سالم انشالله راح انرد حق خلافاتنا وبلاوينا الي ما اتخلص

واحد كان رايح معانا الفلم سألناه ها شرايك بالفلم قال بايخ وبعدين هالفلم حطوه لان في مشاكل بمصر يعني الاخ اكتشف الذره الحين لا وعقب قال شباب حرام مسيحي يتزوج مسلمه يعني الحين مسكت تالي رفيجي الثاني قاله والشيعي اذا اتزوج سنيه قاله فيلسوف زمانه حرام ؟؟؟ على طول افتى الحبيب وقطها براس ماادري منو واذا توهق قالك اسال ماادري بسال بن تيميه الحين ... تخلف تخلف تخلف .. انتوا شوفوا على شنو ركز هد كل اهداف الفلم ووقف على هذي يبا من قالك زوج لا تزوج اساسا في سنه ما يزوجون سنه وهذا شي متوارث لعادات اجتماعيه قديمه كيفهم يا حبيبي ركز على الاهداف الاساسيه طبعا ما ناقشته لاني لو مناقشه جان صار مالا يحمد عقباه

وطبعا في ناس وايد مثل صاحبي مفتي العصر والمكان والزمان و مثل الي حاط هالصوره ومعلق عليها .. هد الفلم ويقول ليش لبس صليب ... تمثيل يا بني ادم والفن المفروض انه رسااااله الريال ما كفر .. عيل جذي ثلاث ارباع المسلمين كفار لان فنايل النوادي الاوروبيه او المنتخبات فيها صليب مثل برشلونه والانتر و و و و






اخير ابيت اني انام قبل لا اكتب البوست .. لا وبعد وانا طالع لقيت علم السويد يرفرف يم علم الكويت صوب ايكيا الافنيوز بغيت اصوره بس افتشلت ناس ولويه وانا حالتي حاله غتره وعقال ما سوى علي الضغاط الي بييني وانا اصور زين ما يقاطعون الافنيوز بعد من هالعلم .. يا ناس حبوا بعضكم وخلوا الكويت هي الرابط بينكم ترى بدونها احنا ما نسوى شي والكل يحترم ديانة الاخر الي يخطي نحاسبه لو كان منو والي يسوي شي ينفع البلد نوقف معاه وشوفوا الفلم وركزوا على الاهداف جزاكم الله خير



اللـــــــــــــــــــــــهم لا اعتـــــــــــــــــــــــــــــــــــــــــــراض

33 comments:

Anonymous said...

that's really cute..wish i had one too.

Anonymous said...

Well for me its better to be more realistic.

Anonymous said...

All I can say is nothing because your blog is not interesting to read.

Eng_Q8 said...

اهم شي ؟!!!!!!؟

someone_q8 said...

السلام عليكم
عادي ليش مستغرب من اللي خلوا الفلم وخلوا الهدف منه واقعدوا يتكلمون على الامور الجانبية من الفلم ؟؟

الديرة كلها امخلية التنمية والتخطيط وامجابلة اتفه المشاكل , خلها على الله وبشمهندس

why me said...

اي عادي


عرب



عبالك شي مهم احنا


no comment احسن

Anonymous said...

المهم استانس وغيرت جو
بس ليش رايح السينما مغتر ؟

well_serviceman said...

حيالله مهندسنا... شخباري سينما بالكويت... آخر مره رحت لها السينما كان على فلم اللمبي الأول ومن بعدها حرمت اروح مكان اسمه سينما بالكويت... ياخوك في ناس وايد عقلياتها جذي.. تكلمه بموضوع يروحلك لجانب ماله داعي بالموضوع نهائيا.. والمشكله انه ينعتك بالطائفي!!! وانت حتى كلمه واحده عن طائفه ماجبت؟؟ بس شتسوي يامهندس.. خلها على الله!!! :)

اللهم لا اعتراض!

Q8-MaNaL said...

يعطيك العافية على البوست الحلو و رسالة الفلم واضح انها راقية و فعلا كلنا لازم نصير ايد وحدة عشان مصلحة ديرتنا و مو حرام طبعا الزواج بين الشيعة و السنة لكن انا بنظري الاحسن كل واحد ياخذ منه و فيه و هذا الشي ما راح يأثر على وحدتنا الوطنية،المهم ان احنا ما نتعامل بعنصرية مع المختلف عنا في المذهب و في الدين و في كل شي

و مشكور و تسلم

Anonymous said...

الله يعطيك العافية اخوي على هالبوست الجميل .. فعلا ما نبيه ان الدين لله والوطن للجميع

الزين said...

صباح الخير

استفتحت في مدونتك اليوم

مع مج النسكافيه

وقصة الفيلم

وتحليلك للقصة

بصراحة رغم ان الأفلآم العربية ما تثير اهتمامي كلش

الا انك نجحت بشد انتباهي بهالفيلم بالرفيو اللي كاتبه

بس سينمات الكويت مو حق الأوادم صايره
تدفع فلوس عشان تطلع لا شايف الفيلم زين ولا مندمج

شي يلوع الجبد
انطره ينزل فيديو واشوفه لحالي بالبيت

الشغلة الثانية روح صور العلم
ويعني شنو غترة وعقال

انا ابي الصورة
مالي شغل

:)

هديت البوست كله وابي الصورة اللي ماصورتها

يعني صج فاضية على الصبح

يالله حان وقت العمل

بيس

wa6an-alnhar said...

مهندسنا

منو هذيل اللي قاعدين يرطنون فوق؟؟
:P

انا بعد رحت الفلم وعجبني وايد
:)
بس بالسينما كانت قاعده وراي وحده من طقة صاحبك
لجتنا طول الفلم عسى ما شافت صليب او كنيسه تقول
(استغفر الله استغفر الله)
اشدعوه !! معقوله في ناس بهالعقليه

enter-q8 said...

تهقى بنوصل لمرحلة نردد و نطالب التعايش السلمي بين ابناء الوطن الواحد

يا خوفي يـا خوفي

nanonano said...

أنا رايحه اليوم...شوّقتني

Mohammad Al-Yousifi said...

امس رحت باتمان و حده عجيب و فيه كمية غنية من الافكار الفلسفية

ناوي اروح فلم عادل امام بكرة عشان جذي مابي اقرأ البوست عشان لا احرق الفلم

ثانكس

secret said...

تعجبني طريقتك بشرح المفهوم الوطني لوحدة الصف

تسلم
:)

kuwaitawy said...

راحت ايام المسرحيات الكويتية الهادفه


لو يصير فلم مثل هالنوع بالكويت (سياسي هادف)

بيكثرون اللي مثل صاحبك صدقني


تحياتي

كويــتي لايــعه كبــده said...

كلامك عدل
والفلم ممتاز
ورسالته ممتازه

اما الفن الكويتي الهادف...
الحين صار الفن التجاري المتجنس أعمال جليلة

العرزالــــــه said...

اسمحلي اختلف معاكم

موضوع السنه والشيعه شيء وموضوع المسلمين والمسيحيين شيء آخر

السنه والشيعه كلهم مسلمين ولذلك مافي مشاكل من الاختلاط والصلاة مع بعض وكل شي اخر

اما المسلمين والمسيحيين فوضوع ثاني

نعم هم اقرب الناس مودة للمسلمين من باقي الديانات

نعم هم اقرب الديانات السماوية لنا

نعم اخالطهم واشتغل معاهم

وما ابغضهم لشخصهم

واعاملهم زين

وكل شي

ونعم في مسيحيين افضل من الف مسلم بالاخلاق وبالعمل والانتاج

لكنهم يبقون محرفين لكلام الله

ومشركين له..حطوله صاحبة وولد

المعامله شيء..واني ادخل الكنيسه والبس الصليب واصلي صلاتهم واقيم شعائرهم الباطله المحرفه اللي فيها شرك شيء ثاني ويغضب الله

يمكن احد يقول شمعنه اهم يدخلون عندنا و و ..فأقول وهل يستوي المثلان؟ احد على حق ويعبد الله بالطريقه الصحيحه وواحد يعبد 3 اله..واحد دينه صحيح وواحد دينه محرف..واحد دينه يرضي الرب وواحد يغضبه

اعتقد ان مؤلف الفلم جانبه الصواب في التمييز مابين الدعوه الى التعايش السلمي والمحبه والاخاء وان الدين لله كل على شاكلته وفي صومعته وان الوطن للكل وهذا شيء طيب..وبين ان يتضمن كل ماسبق انه لامشكلة من أن يقدم المسلم على مايغضب الرب بحمل الصليب والصلاة كما يصلون من أجل الوحدة الوطنية وباسم التسامح

وبعدين حتى لو كل كلامي غلط

عادل امام مال افلام طراقات..مال افلام الأفا..مال شاهد ماشافش حاجه..واخر واحد اخذ منه سوالف الجد وان يعلمني الصح من الغلط

:)))))

Dr. Academy said...

يبيله اروحله عالويك اند الياي :)

مهندسنا سو ديليت حق هذول دعايات اللوتوري :)

Eng_Q8 said...

انسان كويتي

وعليكم السلام والرحمه

الله كريم

---------------------------------

واي مي

اي والله عرب

وانتي كل نو كومنت :p

----------------------------------

اني موس

شكرا :)

عيل البس وزار مثلا ؟؟ عادي مغتر كنت رايح دوانيه تالي رحت السينما والا ممنوع الغتره بالسينما ؟

---------------------------------

ويل

يحييك .. انت شايب وينك ووين السينما

تخلف

----------------------------------

منال

الله يعافيج

طبيعي ماراح يأثر بس هم لا ننكر ان عادي وفي وايد ناس ماخذين من بعض مو مشكله وكل واحد وقناعاته وعاداته وعندنا وعندج خير :)

الله يسلمج وشكرا للزياره الاولى

--------------------------------

محسد

الله يعافيك

حلاته يصير هذا شعارنا

----------------------------------

الزين

صباح الانوار

صباحيه مباركه :p

مزاج مزاج فيروز مو بوست :)

الحمدلله اني نجحت

لا يبا روحي في اي بي شغل عدل وبعدين في جم سينما شغل عدل عندج ليلى وبلازا مافيهم احد او في اي بي الافنيوز

افا عليج بس جذي حاضرين يبا جم زين عندنا :)

غتره وعقال يعني بريستيج ووقار يا حلوي وانا مغتر قاعد اصور مو راكبه

---------------------------------

وطن

اشدراني لووووووووووووول اهم شي انهم اول ما حطيت البوست حطوا الكومنت

شكو استغفر الله بروبلم

--------------------------------

بو وليد

بصراحه اتوقع اذا ظل الوضع على ماهو عليه خاصة بوجود عبدالصمد وهايف
ف لازم انلحق

---------------------------------

نانو

مشاهده ممتعه نتمناها لكم :)

---------------------------------

كل مطقوق

انا توني ياي من بات مان

اي وايد افكار فلسفيه اعجبتني

اوكيك ناطر ردك

-------------------------------

سر

شهاده اعتز فيها واعلقها مع شهادتي :)

يسلمك حبيبي

--------------------------------

كويتاوي

الله يرحمك يالنفيسي

----------------------------------

لايعه جبده

صح لسانك اي والله اعمال جليله

---------------------------------

العرزاله

اسمحلك ابوي انت :)

كلامك عدل الوضع مختلف بس اهي تشبيه فقط بين شي وشي اهي فكره عشان اوضح فكره ثانيه :) هذا بالنسبه لي انا

مممممممممم

شوف يا عرزالتنا انا اتوقع ان التمثيل عادي ومااعتقد ان الواحد يكفر اذا دش كنيسه واهو اصلا نيته التواصل الاجتماعي وبريك ذا ايس على قولت اخوانا العنقليز

واذا على عادل امام السالفه تمثيل بتمثيل يعني عادي وبالسنبه لقراءة صلواتهم مااعتقد انك لي قريت كفرت ممكن واحد ملقوف مثلي وده يعرف شنو مكتوب عندهم

وبعدين مافي شي يمنع انك تجمع بين المباديء والقيم الي بين الدينين عشان اتيمع الناس اتوقع هذا شي سامي وجميل بالنهايه حتى لو محرف فهو دين رباني ونحن نؤمن بالمسيحيه واليهوديه

لوووووووووووووووووول

بالعكس يمكن بوجهة نظرك بس ترى عادل امام بمصر شي غير طبيعي والناس تسمع حجيه وياما قط نغزات وبلاوي اهناك انا احبه بصراحه

-------------------------------

دكتورنا

اي لازم

خلهم مدونتي ديمقراطيه :p

الزين said...

:)

احرجتني

لا خلا ولا عدم

am speachless

realy

thanks alot

Eng_Q8 said...

الزين


حاظرين انعرف اشلون نحرج :p

تستاهلين يبا الزين تطلب شي وما نسويه عيب على الرجال

مع انج لي الحين ما يبتيلي الميدم

why me said...

looooooooooool



o b3d no comment


;p

JuVeNTiNa said...

البوست كله اينن .. و كل كلمه قلتها صدقت فيها .. من الفلم الى الاسماء " وايد حبيت التعليق "

الى التخلف و الناس اللي ما تشوف الصورة المطلوبه مثل اللي معاك

و ان شاء الله ترد المسرحيات الهادفه بس خلاص ملينا من التطنز و التنغز الفاضي ..


و ان شاء الله يكون الفضاله صج رجع

mo3ath said...

يبيله حامي الديار 2 :)

Eng_Q8 said...

واي مي

كفايه مرورج يا يبا

------------------------------

اليوفي

شكرا شكرا من ذوقج ومن بوستج الي خلاني اروح الفلم :)

انشالله

--------------------------------

معاذ

اي والله يبيله

فريج سعود said...

خنقتني العبرة من الفقرة الاخيرة
:))

bo rashed said...

لو يسوي بالكويت

يسميه

بوراشد وبنيد الآر
:P
شلونك مهندسنا
المسيحيين اعرفهم عدل خاصه المصريين
وعن قرب يكرهون شي اسمه اسلام
رومات البالتوك اللي تسب الرسول والاسلام
كلهم مسيحيين
مالك شغل بهالكلك الهندي
اللي بالفلم
كلنا اولاد حته وحده
وكولن بيعرف ابن حتتوه
:P

Sara said...

wanasaa :D 5oosh post o 7adek shawagtny eny aroo7 el film washoofa :>

o 9a7 lsanik bkel kelma gelt'haa bl post :>

salemaat yadaaaaaaaaaaaak :>

Eng_Q8 said...

فريج سعود

انا الي اخنقتني العبره لاني مو خابرك تتكدر :)

--------------------------------

بو راشد

اتصدق وتامن بالله

بغيت اكتب بو راشد وعباس بس قلت اخاف تزعل :))))))

يا عمي هالبالتوك منو يدشه غير الفاضين والي ماعندهم شغل

بو راشد ما ننكر ان في ناس تكره بعضها بس عاملوا الناس بالحسنى جود تتغير الامور والا شرايك :)

-------------------------------

ساره

باخذ عموله من عادل امام على كل واحد قرا البوست وراح الفلم :p

صح بدنج

والله يسلمج :)

Anonymous said...

ماشفت الفيلم لكن باسأل سؤال. عادل امام من طبيعته ان افكارة وايد علمانية وضد الدين فاذا فيه فيلم بيصور الاسلام والمسيحية من وجهة نظر عادل امام و عمر الشريف فأظن ان هم ما راح يكون حياديين

nanonano said...

رحت الفيلم...تبي الصج توقّعته أحلى...ما أدري يمكن لأن عادل أمام أبدع في عمارة يعقوبيان فتوقّعته على هالمستوى...بس الفيلم يسوى الواحد يتعنى له...عجبني وايد تمثيل عمر الشريف...و أحلى شي بالفيلم جابانيوووووووت