Friday, October 24, 2008

تحديث عاااجل ...نبي نبي نبي نبي نبي صلوا على النبي

تحــــــــــــــــــديث
.
عاجل : المكتب التنفيذي للفيفا يوقف نشاط الكرة الكويتيه الى اشعار آخر والحل هو حل اللجنه الانتقاليه وانتخاب اتحاد كرة جديد لكي يتوقف هذا القرار لان المجلس المؤقت موجود لسنتان وننتظر المستجدات
.
.... استانستوا الحين ؟؟؟؟؟ حسبي الله على من كان السبب .. اتمنى ان يكون لهذا القرار ردة فعل ايجابيه لترجع الكره كما كانت .. بعد شنسوي كل شي صار واستوى والله يستر من الياي
=============================
الى الآن والاخبار تأتي عن البورصه وعن ضحايا البورصه .. الغريب بالأمر هو ما رأيته على شاشة التلفزيون من ظهور مواطنين متجمهرين بالبورصه .. والاغرب هو كلماتهم التي تطلب من الحكومه التدخل وواحد يقول حراام فلسنا راحت فلوسنا وايضا يطلب التدخل .. التدخل التدخل التدخل لان الناس خسروا
.
احد الاصدقاء من المضاربين بالبورصه اخذ يطالب بهذا الأمر ايضا .. والمضحك انه عندما طالب المقترضون اسقاط القروض كان يكابر ويضحك وقال لاحد المقترضين والله محد قالك تقترض الحكومه مو ملزومه فيك .. وسبحان الله المقترض قال للمضارب محد قالك ادش السوق الحكومه مو ملزومه فيك !!!؟ انت قبل اكثر واحد اتعارض ان الحكومه تدفع شي الحين لما فلست ياينا تتبجبج قلعتك اكلها الحين
.
لم اجد مااقوله بعد سماع الحوار السابق الا ان اضرب كفا بكف وقول لا حول ولا قوة الا بالله شصاير بالديره .. للأسف الكبير ان الناس اصبحوا لا يحسون الا بأنفسهم ولا يتمنون الخير لاخوانهم المواطنين فمتى ما سقط احدهم حتى خرج الآخر لقول محد قاله يقترض والا محد قاله يضارب .. الخ
.
موقفي بعدم اسقاط القروض وموقفي بعدم تدخل الحكومه بالبورصه اتى لاني اعتقد بأن هناك حلول اخرى ممكن ان تساعد المتعثر دون اللجوء للحلول النهائيه سواء بضخ الاموال بالسوق او سداد القروض .. فالكل له وجهة نظر بهذه المواضيع ولكن اكثر وجهات النظر تميل الى مصلحة هذا الشخص .. ولكن السؤال ما هو ذنب من لم يقترض وذنب من لم يدخل البورصه ؟؟
.
الكل يطالب بالكادر وعلى حد علمي ان الكادر يعطى الى الوظائف الفنيه .. الحين حتى الكاتب يبي كادر .. والله العظيم واحد يشتغل بوزارة العدل يقول شمعنى الاطباء لهم كادر ؟؟؟؟ هذا شقوله ؟؟؟ طبيب يا حبيبي طبيييب اكيد يعطونه كادر ويستاهل يااخي هذا يسوي شي ينفع المجتمع انت شتسوي غير شرب الشاي والقهوه لا تداوم يومين بالاسبوع !!!؟
.
طالب يبي زياده على الاعانة الاجتماعيه الي ياخذها من الجامعه والا التطبيقي ... انزين حبيبي انت ليش تبي زياده يقول كل شي غالي مكالمات وبانزين ومطاعم ؟؟!؟؟ يعني الحين الحكومه تعطيك الاعانه عشان اتصب بانزين ؟؟ تعطيك المكافئه عشان تشتري ما تحتاجه بالدراسه من كتب وغيرها والكتب تشتريها مره وحده بالكورس هذا اذا ما خذيتهم من رفيجك لا والمشكله اغلى كتاب بيشتريه سعره 3 دنانير .. الله يرحم ايامنا كان في جم كتاب على 40 دينار وما انتشكى لان ندري ان هالكتب مدعومه من الجامعه وبره ينباع بدبل سعره لا وماكانوا يعطونا المكافئه ... تدرون واحد شنو يقول يقول نبي بدل طريق ؟؟؟! بدل طريق عشان يروح الجامعه ؟؟!؟ ما جنه يدرس ببلاش لا ويعطونه فلووووس والتسجيل الحين صار ببلاش .. والمكافئة تنزل على مدار السنه يعني حتى بالعطله ... شقوله هذا
.
واحد يبي زيادة بدل البطاله .. انزين ليش ما تتوظف ؟!؟ يقول والله ناطر مكان ابيه ماابي اتوظف اي مكان .. عاش السيناتور يبي زياده واهو قاعد ببيتهم ؟!؟ والثاني يقول ليش ندفع فواتير الكهربا والماي ؟!؟ وواحد تصير فيه سكته قلبيه اذا يبتله طاري التأمين الصحي ما يبي يدفع الحبيب .. وحق السفر عند ويهك على طوول ركضه على المطار .. وواحد يدفع خمسين وستين على مطعم متعييز يدفع 30 دينار فاتوره الكهربا .. وينق 130 دينار كل شهر حق زين والا الوطنيه وما يدفع الاشتراك السنوي حق خط البيت لاحظوا سنوي وجم 30 دينار ماادري 60
.
شفتوا الامثله الي فوق ترى شباب صغار يعني مستقبل البلد شباب الغد ركاز الايام القادمه .. لست بصدد مناقشة ظروف القروض والا البورصه والا غلاء المعيشه والا غيرها لاني تكلمت عنهم قبل .. مع العلم ترى محد من الي فوق يتشكى من غلاء المعيشه الا المقترض مسيكين .. الي حبيت اوصله من هالموضوع هو الاتكاليه .. كل شي لازم تدخل فيه الحكومه كل شي لا تقولي الحكومه مالها شغل لااا لازم تدخل .. حتى الفواتير لازم اطيحهم حتى المخالفات لازم تطيح احنا شعب بس ياخذ وياليييت يعطون شي حق الديره ... تدرون شنو يعطون ... يعطون اعضاء يخربون البلد يمثلونهم في مجلس الامه
.
والمشكله الاعظم ان هالامثله مخربه على الباجي ... الشر يعم والخير يخص
.
.
اللهــــــــــــــــــــم لا اعتــــــــــــــــــــــــــــــــراض

34 comments:

secret said...

بالنسبة للفقرة الثالثة، تدري من متى صرنا جذي؟؟

و اما سوالف البدلات والله انك ضحكتني يا اخي الله يقطع ابليسك

:)

KQ8 said...

العين ضيجه لاحول ولا قوة الا بالله

Eng_Q8 said...

سر

لا ماادري :)

عساها دوم

------------------------------

كراكوتا

صاج يا عمو بو طارق صاج

Bloggerista said...

شعبك مخملي

لو عليهم ودهم يقعدون بالبيت و الراتب اييهم لي عندهم

Eng_Q8 said...

فاشونيستا

كل شي جايز

صلاح الأنصاري said...
This comment has been removed by the author.
As YoU LiKE said...

زين يسوون
خل يوقفون الكورة

صلاح الأنصاري said...

ثقافة المواطن الكويتي ثقافة عجيبة
ثقافة ان هذا حقي المكتسب يصلني حيث أكون

ثقافة "نبي"

قبل بضع سنوات أتى الى مكتبي في العمل خرّيج جديد يطلب تعيينه لدينا,,, وعندما أخبرته بطبيعة عملنا الميدانية،،احتج وقال: لا..شنو هذا ..عندي ربع راحو اشتغلوا بوزراة "...." وقاعدين في بيوتهم وياخذون معاشات !!
قلت له: أوكي روح حق ربعك..

اذا الوالد يخسر في البورصة -وكلنا خسرانين- ويبي الحكومة تعوضه..وياخذ قرض ويبي الحكومة تسد عنها بالله ماتقولون لي شتبون يطلع الولد ؟

هذا قبل اربع سنوات تقريبا فمابالك الآن أو القادم
شكرا على طرح الموضوع لعل وعسى احد يقرا ويستحي على دمه شوي

فريج سعود said...

الله يبشرك بالخير

enter-q8 said...

خل الناس تاخذ
انت شنو حارك



معليش مهندسنا انت ما تتكلم عن حالات شاذه قاعد تتكلم عن ظاهره و ظاهره كبيرة
لا تطالع النتيجة أسال شنو الاسباب اذا عالجت السبب تشوف نتيجة فقط لا غير

و علاجك او اقتراحاتك مع تقديري لك ماهي منطقيه او عملية بالاصح

يا سيدي الفاضل انت تتكلم عن بنية تحتية متهالكه
من صحة و تعليم و توظيف و هيكله و غلاء الى اخره سببت هالافرازات

الامر يطول و بشوف المطر اللي تقول عنه وينه
تدري خو البدو اذبحنا على المطر

Eng_Q8 said...

از يو لايك

ابي واحد تحسف :)))

-------------------------------

صلاح الانصاري

مو مودرنا الا هالثقافه

اتهقى يصحون

---------------------------------

فريج سعود

لوووووووووول ابي واحد متحسف

------------------------------

انتر

تاخذ بسنع وبعقل مو جذي كل من طق طبله قال انا قبله

معليش بو وليد معالجة الموضوع ما تنكتب ببوست هذا اولا ثانيا انا ما كتبت شي :) عشان اتقول مو منطقيه

ومن قال لأ انا معاك بس هم العقليات ماادري اشلون صايره

على العموم الموضوع ما اناقشه اهني لما اشوفك اقعدلك عدل

يقولون استهلت اليوم والله اعلم

Kuwait said...

مهنــدسنــا ..
انت تقول
"
بس ياخذ وياليييت يعطون شي حق الديره ... تدرون شنو يعطون ... يعطون اعضاء يخربون البلد يمثلونهم في مجلس الامه
"
ترى الأعضاء اهم أحد الأسباب الي خلوا فئه كبيره من المواطنين انهم يكونون اتكاليين ويطلبون دايما تدخل الحكومه :)

Eng_Q8 said...

كويت

لانهم يمشون على عقلية الي مصوتلهم ... يعني الي مصوت يبي جذي فأكيد ان هالعضو راح يسوي جذي

أندلسي said...

لا زين الله يبشرك بالخير انا من الصبح متكدر بسبب فوز طليطلة وقائمته
بس هالخبر فرح قلبي تهانينه لطيطله وبقية الفتينية الي قابلوا بلاتر بسويسرا وزلقوا ديرتهم واير


وازمهاااااااااا


ولا نسيت ؟؟

الدســتور said...

بالعدل ويدام يومين بالاسبوع
أشك في ذلك
:)

Eng_Q8 said...

الاندلسي

عاد هالسالفه سمعت حجي ثاني عنها وان الي زلغ واير واحد ثاني اهو مراسل الفيفا

----------------------------------

ابو الدستور

هذا اذا داوم بعد

nanonano said...

مهندسنا مشكلتنا بهالديره محد عنده رؤيه واضحه

لا حكومه عندها رؤيه

لا قطاع خاص عنده رؤيه

لا مشرع عنده رؤيه

كل قراراتهم مبنيه على حزة حاضر

الحين خل نفترض أن الأداره العليا للبلاد يت و قالت عطوني أسباب
١
٢
٣
ليش صاير جذي بالوضع الأقتصادي؟
ليش في هالكم الهائل من الشركات الورقيه المدرجه؟
وينك يا بنك يا مركزي من بداية انشاء هالشركات ما كنت تراقب نسب أقتراضهم؟

تهقون في أحد عنده أجابه وافيه و عنده بعض الحلول؟
لأ
مشكلتنا محد من المسئولين باذل مجهود و مسوي واجبه
***********

و بالنسبه حق الفيفا
وايد علينا حالنا حال أثيوبيا

Eng_Q8 said...

نانو

من زمان وانا احن اشلون ديره مافيها وزارة تخطيييييط

وبعدين كلامج عدل ماكو رؤيه لان ماكو تخطيط من الاخر


لووووووول اثيوبيا موقفينها بعد ؟

someone_q8 said...

السلام عليكم
وياما حنشوف مدام الشليلة موجودة

Eng_Q8 said...

انسان كويتي

وعليكم السلام والرحمه

الله يستر

Purplecious said...

أنا أبي بدل ستاربكس

:p

قلب طفله said...

اللهم صلي و سلم عليك يا نبي

والله هذا الواقع مع الاسف كلن
يميل مع الظروف على حسب مصلحته
و غيره و الديره بالطقاق
:(

kuwaitawy said...

قريت اول فقرة وضاق خلقي

ماقدرت اقرا الفقرات التالية



حسبي الله ونعم الوكيل


حسبي الله ونعم الوكيل

Environmentalist said...

رجاء زياره مدونتي والاجابه على السؤال المطروح والذي سيستخدم في اعداد دراسه عن البيئة في الكويت
شكرا

Unknown said...

شوف عقب القرار انا صج طفران

الله يلعن كل واحد قاعد يسئ حق الكويت بسبب اهوائه
خرة عليهم

ماني رادها

mo3ath said...

مااقدر اقول غير صح لسانك

بوستك هذا بالضبط بالضبط نفس الي كنت اتناقش فيه مع واحد من الشباب

توارد الخواطر شغال ولأول مره بالطريقه الصح :D

لا جد احس بردت جبدي بكلامك ، اي لي متى هذا حال الناس :\

عاجـل said...

وايد حلو


شربت مروقها

والقرار لازال في جيبي

Hamad Alderbas said...

مالازم تعلق بالازرق

لازم تعلق بالازيرق

Eng_Q8 said...

بنفسجيه

انزين :p

--------------------------------

قلب طفله

لو خليت خربت

--------------------------------

كويتاوي

ضاق خلقك والا مالك خلق :p

--------------------------------

بيئه

ربع دينار

---------------------------------

مشاري

لوووووووووووووووول يالله ميخالف احسن بشعورك

لا تردها

---------------------------------

معاذ

صح بدنك

هذا مو توارد خواطر هذا اسمه محاكاة للواقع :)

لين اييهم طراق يصحيهم

----------------------------------

عاجل

شربت منذ مبطي :)

وهم الرصاصه لازالت في جيبي :p

-------------------------------

حمد

من وين اييب هاللون :)))

Hamad Alderbas said...

بو طللي محتكر اللون

لول

http://kuwait9pm.blogspot.com/

wa6an-alnhar said...

لو يعطون حق كل مواطن مليوووووون
هم ماراح يقتنعون

بيقولون بس مليون !!!! ليش مو مليونين

ناس ما يترس عينها الا التراب

Eng_Q8 said...

حمد

والله مسكين هالبو طلي

اوكيك الحين ادش

-------------------------------

وطن

بس مليونين ليش مو 3 ملايين :p

JiBLa CiTY said...

كلامك يشفي الغليل احسنننننننت

بذكرلك نكتة قالها لي امام مسجدنا الله يذكره بالخير شيخ فاضل من الجنسية المصرية
وهالسالفه من تقريبا 12 سنة
طبعا هالإمام لأنه محترم ويحب الخير لكن بعض الناس تبي تمشيه على كيفها وفق الهوى وكان الرجل يخاف ربه
سفروه وانهوا خدماته بقدرة قادر
المهم
وكان الله يجزيه خير خفيف ظل

يقولي تدري ان الكويت فيها مئة نبي؟

قلتله شلون؟!

قال:

نبي ناكل
نبي نشرب
نبي نسافر
نبي نطلع
نبي نبي نبي نبي

الخ الخ الخ


هيهيهي

Eng_Q8 said...

ولد جبله

ما جذب الريال :)))