Saturday, November 15, 2008

الطبطبائي يتآمر مع احمد لفهد ؟!؟

رغم اختلافي مع النائب الدكتور وليد الطبطبائي ورغم اني شديد الانتقاد له سواء بالمدونه او بالحياة العامه منذ ان اصبح نائب لمجلس الامه ولكن ما اراه الان من حمله على هذا النائب تجعلني اقف وانسى الاختلاف بيني وبينه ليس لشيء انما لما يصدر الان من شائعات وكلام بدون دليل يذكر تتهم النائب

فبعد صالح الملا واحمد المليفي ها قد ظهر لنا الآن وليد الطبطبائي واتهامه بالتآمر مع عذبي الفهد شقيق احمد الفهد يعني من الآخر هو ايضا حطبه من حطب احمد الفهد بلعبة الدامه السياسيه
ما لاحظته خلال هذ الايام بان اي نائب يقف ضد سمو رئيس مجلس الوزراء سواء بالمصفاة الرابعه كما صالح الملا او استجواب المليفي او الداعمين للاستجوابات مثل الطبطبائي واخره وقوف الطبطبائي ضد ادخال الفالي الى الكويت وهذا حقه واذا كان هناك من يتكلم عن الطائفيه فلا تنسى ان بو مساعد وقف امام دخول وجدي غنيم الى الكويت يعني مالها شغل بالطائفيه الي تعتبر مثل الوتر المقطوع والي زهقنا منه بصراحه
الى متى وهم يعلقون اي شي بشماعة احمد الفهد الي الكل يعرف من هم الاعضاء الموالين له والكثير يطبلون لهم ؟؟ على العموم هالجريده الي لا لها ايميل ولا تلفون ولا اعرف منو مسويها ولكن اذا كان عندهم الدليل خل يحطونه وبلا حجي زايد .. وهم اذا حطوا التسجيل اشلون سجلوا المكالمه ؟؟ اذا كانت من مكتب لي مكتب انقول واحد حاط آلة تسجيل بس اذا من موبايل لي موبايل فانا عندي علامة استفهام كبر برج التحرير واللبيب بالاشارة يفهم

قبل الختام منو الي يسأل هالسؤال ومن الي يسعى لهذا الشيء مو حكومة الظل الي اتعرفون منو وراها ؟؟




واذا كانت هالجريده تنتهج نهج الفضائح كما في هذا الخبر وللعلم ان هالخبر قاله الاعلامي جاسم الشمري بقناة العداله من قبل جم اسبوع وهم قال بحط الدلائل والاثبتات وهم ما شفنا شي ولا عرفنا منو هالنائب الي اذبحونا فيه قولولنا منو وخلصونا مع اني شايف انها قضيه شخصيه وليست من اهتماماتي .. سؤال هل في علاقه بينهم وبين مالك قناة العداله الجديد ؟؟


نهاية نعم اختلف مع وليد الطبطبائي ولي عليه الكثير من النقاط ولكن وليد الطبطبائي من النواب الذين اعرف توجههم واعرف ماذا سيقول على اي قضيه فخطه واضح جدا على اي متابع للساحه السياسيه .. وسوف انتظر الى ان يضعوا التسجيل الذي لانعرف مصدره ولا حيثياته والى ان نسمع هذا التسجيل فاني اقول يا بو مساعد ما نرضى احد يطعن باي شخص بدون دليل وخصوصا من هم واضحين سياسيا للجميع .. واذا كانت قضية الفالي هي ما جعلتهم يقولون هذا فبئسا للفالي وستظل كويتي وولد ديرتي ولا نرضى لاي احد يجرح فيك ويتهمك بما ليس بك يا بو مساعد والى ان نعرف التفاصيل الي مااتوقع راح تطلع فلن اسكت عن اي اتهام مثل هذا



اللهــــــــــــــــم لا اعتـــــــــــــــــــــــــــــــراض

29 comments:

Kuwait said...

ماشاءالله على كل فضيحه عندهم تسجيل صوتي !!!
بفهم شغله وحده لما يكتبون قريبا يعني شقصدهم ممكن أحد يفهمني ؟؟
اذا عندكم التسجيل وكاتبين الخبر ومعاكم الدليل ليش ماتحطونه بحزتها والا ناطرين الناس تنسى السالفه بعد جم يوم وبلا خبر بلا تسجيل بلا بطيخ :\
شهالجرايد الي صايره فقع كل يومين إطلعت لنا جريده يديده ..
هم بعد هالجريده اشفيها صايره قص ولصق من كل صوب يايبه خبر ومن كل جريده يايبه مقاله وقالت يلا انا حالي حالهم جريده ..
زين وين المصداقيه حتى اسم الي ناقل الأخبار مو محطوط !!
انا اقول خل يستريحوووون أبرك لهم :)

الدســتور said...

بس هذا اللي عندهم
تسجيل صوتي
اذا أحمد الفهد أعلنها مرارا وتكرارا
بأنه ضد حكومة ناصر المحمد
ليش مايكلمونه

اما موضوع الحل الغير دستوري

نقولها وبالفم المليان
مو بكيفكم
ولنا حملة الايام الياية
قاعد أجهز لها
نبي همتكم بس

Eng_Q8 said...

كويت

هي غاية بنفس يعقوب يا اخيتي

Eng_Q8 said...

ابو الدستور

اشدراني عنهم

انا وياك من الحين انت بس أشر :)

واذا تبي اي شي دزلي ايميل من الحين

حياتي هدف مو عبث said...

وانت متآمر مع أحمد الفهد

تذكر

:p

انزين شنو زوووم ؟؟

على بالي برد

Eng_Q8 said...

حياتي هدف

عاد صج هذا اخر شي ممكن يصير :)

لا برنامج

EXzombie said...

اول مرة اسمع عن هالجريدة

و اول مرة اسمع ان الطبطبائي من نواب الاسطبل

و عادي اي واحد ما يمشي على هواهم يخلونه فداوي شيوخ و لا من بقية الجوقة

الحين الشعبي ناوي على الاستجواب و يكملها

هم اهم من الاسطبل و لا لا؟

EXzombie said...

نسيت شي

اذا عندهم تسجيل معناها في مراقبة لتلفونات النواب

JiBLa CiTY said...

في جهاز يديد يسجل صوتك بدون ماتدري حتى اذا ماقلت شي اهو يسجل

:)

يعني قلت ماقلت مسجلينلك مسجلينلك

وكاسك خضر

:)

شقران said...

مهندسنا العزيز


على راسي كل كلمة كتبتها

ولن أزيد لأنني سكتب موضوع مشابه حول هذا الأمر



مع وافر التحايا الجميلة

someone_q8 said...

السلام عليكم
هذا احنا يالعرب نظرية التآمر تدل على تأصلها فينا

مشكلة هالتآمر اتقول قاعدين بالمافيا وعوائلها

Eng_Q8 said...

اكسزومبي

جريد مرتبطه بجريده ثانيه :)

اي هذي يديده

طبعا

اكييييد من الاسطبل ابسولوتلي

Eng_Q8 said...

اكسزومبي

خوش نقطه ممتاااازه

Eng_Q8 said...

جبله

شهالجهاز الدعله

كاسك حمر

Eng_Q8 said...

شقران

يسلملي راسك يا بو راكان

بانتظار موضوعك

Eng_Q8 said...

انسان كويتي

وعليكم السلام والرحمه

اي والله باليرمو مو الكويت

ZooZ "3grbgr" said...

يقول المصطفى محمد
صلى الله عليه وعلى آله الأطهار وأصحابه الأبرار

"البينة على من ادعى
واليمين على من أنكر" ء


ننتظر

أما طفل السفاح
فتردي أوضاع مو طبيعي
يعني من متى فضايح تنشر بالجرايد
كل شي صار سياسي الحين
مو اهو عنده اهل واهي عنها اهل
والكويت بتظل تحجي بالموضوع سنين
كل هذا عشان سياستنا تكسب؟

:\

Eng_Q8 said...

زوز

ماعندهم شي واذا عندهم خل يحطونه هذي كلها تصفيات سياسيه طائفيه واضحه

لكن هم ننطر وانشوف

--

مافيهم حيا

عيب تنشر اسرار الناس خصوصا اذا كانت خاصه ولا تمس الكويت بصله نهائيا

فريج سعود said...

احسن ما في السايت اخبار سوزان تميم

Eng_Q8 said...

فريج سعود


لوووووووووووووووووول

وانت دور هالسوالف

kuwaitawy said...

يدورون المشاكل



واعتقد ان ماعندهم سالفه

enter-q8 said...

تتذكر يا مهندزنا لما قلت لك عن بو مساعد

القضية سهله ابحث عن محمود حيدر
و ابحث عن الاهطل اللي قاعد يركض بالمدونات و يكتب و لا احد ملقي لأمه بال

نفس الحكاية عبالهم المدونات اذناب
ما اعرفوا ان القصه هذي انتهت

و ان المدونات يحكمها الوسطيين و الاغلبية الحقيقية اللي اهي الاغلبية الصامته

ابو الدستور شيك على ايميلك مال اليوم و المهندز راح يقولك شنو بيصير بعدين


لكن خلنا نقول شي واحد

من الذي استدعى الفالي
اهني مربط الفرس

يلعن ام هالفرس صار الدق عليه وايد المسكين اهو و مربطه

nanonano said...

مهندسنا الكويتي..أحنا المدونين بعد محسوبين على أحمد الفهد

esTeKaNa said...

أن نبعد عن اختلافنا مع الاشخاص
وننظر للمواضيع بتجرد وموضوعيه
هي قمة العقل والمنطق
!!
قد نختلف مع الطبطبائي
ولكن يبقى ان له ميزه ان خطة واضح ونتوقع ردود فعله
ليس متقلب على كل جنب



موضوع الفالي نقف مع وقفه قانون واحترام لدولة،واكبر خطأ ان ينظر لها بنزعه طائفيه
خلصنا من تأبين مغنيه
ويانا فالي
ليش نبي نثير الفتنه بمواضيع واشخاص خارج عن ديرتنا
:(

Eng_Q8 said...

كويتاوي

لا عندهم

Eng_Q8 said...

انتر

يس

لا تحرق علي الفقره :))

واذا كان في اذناب فهم معروفين للعيان

متى راح يفتلت

Eng_Q8 said...

نانو

توج تدرين :p

Eng_Q8 said...

استكانه

صحيح صحيح

لغاية بنفس يعقوب معروفه ليش وانا اخوج :)

Spur said...

لووول شفيهم كل شي عندهم تسجيل صوتي
كومار يدز شريط كاست بصوته حق أهله بالهند؟

ماكو شغللللللل