Tuesday, April 14, 2009

مسلم الجينكو


لا اعرف ما سر الهجوم على النائب السابق والقادم انشالله مسلم البراك .. فبعد اسيل العوضي اتانا علي الراشد امس وقال بقناة سكوب كل الناس يقلدون مسلم وهم رد على كلمة صراخ

يا المو حلو .. يالشيطان .. انا مااحبك .. ليش تبوق .. وليش تظلم الناس .. واااي مابي مابي مابي .. لازم نطرح فيه الثقه لازم لانه مو شاطر ... خلاص مااعطيك حلاوة !!!؟

الظاهر الاخوان يبون الاستجواب جذي يصير .. اعتقد اي شخص يتكلم من قلب وحتى واهو خارج المجلس ترتفع نبرة صوته ف على قدر الالم يأتي الصراخ

اختلف مع مسلم ببعض القضايا وايضا اتفق معه خصوصا في مسأله المال العام وان اختلف معه البعض يجب ان لا يكون ماده بيد المرشحين يضربون فيها ويتكلمون ويجعلونها محور حديثهم وينسوون برنامجمهم الانتخابي الي لي الحين ما ندري عنه .. واذا لي الحين ما عنده ماله داعي يرز ويهه بالندوات والمقابلات الا لما يخلص برنامجه

لو كان مسلم البراك بأي من التيارات الاخرى فماذا سيفعلون ؟؟؟ .. اي ونسيت اقول ياما الصقر صرخ وصفقناله خصوصا بقضية الناقلات ... اشمعنى مسلم يعني ؟؟؟ والا الطرح الراقي على قولتهم توهم يكتشفونه

عموما اهو الاول باذن الله تكلم من تكلم وانتقد من انتقد ولو كنت بالرابعه كان سيكون صوتي له بعد احمد الشريعان .. وكفاكم عن مسلم واذا عندكم شي عليه غير سالفة شرار طلعوها او قولوا برنامجكم الانتخابي يزاكم الله خير .. وموفق يا بو حمود والقلب داعيلك


---------------------------------

خالد الطاحوس قضيه اشغلت الرأي العام .. اعتقد انهم لو محولينه النيابه من الاول افضل من دخوله امن الدوله ... فهم صنعوا بطلا من غير قصد او بقصد والله اعلم

ولحد يقولي مسلم يدعم الطاحوس ومن هالحجي .. انشالله يدعم الحفيتي انا ماعلي منهم علي من شخصه


---------------------------------



حسين القلاف قبل شهر يقول مانبي مجلس واليوم يبي يرشح روحه واهو لي الحين بالمستشفى

المهري قبل شهر طرح نفس طرح الحبيب الي فوق الحين يقول لدينا كامل الاستعداد للدفاع عن بلدنا والمكتساب الدستوريه

الاعضاء الي كانوا ساكتين قبل شهر .. كل واحد لسانه شطوله الحين

محمد هايف لي الحين ماعنده سالفه الا سالفة المساجد وكأنما انتهت مشاكل الكويت

وواحد يمشي ويحلف ان ماعنده ازدواجيه .. طبعا لان اسمه هناك غير اسمه بالكويت

قضايا الساحه السياسيه هي .. مساجد الجينكو .. مع او ضد الفريق البدر .. الفرعيات .. ماابي انزل تعالوا ترجوني .. ليش مسلم يصارخ .. ليش هادمين الدواوين وتاركين الشاليهات والشويخ ... والله انا مو ماخذ شيك

هذي هي القضايا وهذا هو محور حديث اغلبهم .. كاسك يا وطن على هالمرشحين .. والأمل على البقيه



اللهــــــــــــــم لا اعتـــــــــــــــــــــــــــــــــــراض

50 comments:

Hashemy said...

لا احد يستطيع ان ينكر من هو مسلم البراك و دوره في المجلس في دفاعه الدائم عن الدستور وحماية المال العام وهذا مو شي يديد على كتلة العمل الشعبي فهي دائما تحارب الفساد

ونرد ونقول اذا كان الصراخ من اجل اظهار الحق

فاهلا بالصراخ

موفقين انشالله يالشعبي والله يكثر منكم بالمجلس القادم

واتفق معاك في موضوع الطاحوس لو محولينه النيابه من الاول افضل من دخوله امن الدوله


يعطيك العافيه

Anonymous said...

مهندسنا

ممكن ست ساعات من وقتك الثمين أتكلمك فيها عن مثالب وإنجازات ورؤى مرشح الدائرة الخامسة نيلسون الطاحوس؟؟

فيفا مانديلا

وتقبل تحياتي

kuwaitawy said...

سلاااام عليكم ياصديقي




انا اعترض على بوستاتك


يا اخي اكتب عن شخصواحد او اثنين عشان نعطي راينا بكل وضوح



هههههههه




---------


لا شك ان هناك من يصارخ للدعايه بحكم ان البعض يصارخ على سبب تافه ومو حساس

لكن مسلم تعودنا عليه بالقضايا المحوريه والحساسه


وهذا ما جعلنا نحبه بشخصه


------------

الطاحوس كتبت رايي فيه


بالبوست عندي


-----------


انا مو ذابحني الا حسين القلاف


وبالنسبة لخحديث الساحه السياسيه

اعتقد ان الكل يبي ياخذ له طريق ويحب يكون مميز فيه

وراح تسمع بعد سوالف


تو الناس


----------



واللــهــــم لا إعتــــراض

Eng_Q8 said...

هاشمي

طبعا لا احد ينكر هذا

اهلا وسهلا فيه

انشالله

الله يعافيك

Eng_Q8 said...

دكتورنا

لووووووووووووووووول لا يبا عندي دورة كوت :p

فيفا كاسترو

Eng_Q8 said...

كويتاوي

عليكم السلام والرحمه

مايصير لازم يصير البوست ماكنتوش والا ماارتاح :p

صحيح

شفته

بعد شراح نسمع يا معود بس لا يزيدون الخواء الفكري الي حاصل

كمشوه مع عايده رياض :p

nanonano said...

مهندسنا..أمس لما سمعت علي الراشد يتكلّم عن بو حمود

والله خطر على بالي نفس الشي

أشفيهم؟؟؟

مالهم سالفه الاّ بو حمود

و صراخ بو حمود...لا وعلي يقول عن بو حمود

أهوه تمشي له المعاملات..لأن الوزراء يخافون من صراخه

يعني هذي الأضافه كلــــــــــش

ما كان لها سالفه

علي الراشد مسوي روحه أن صايد السالفه

Eng_Q8 said...

نانو

علي الراشد سقط بالمحظور بوجهة نظري ومواقفه الي طافت واضحه وضوح الشمس في كبد السماء

وخلينا انكون واقعيين يعني صراخ مسلم اهو الي مسبب الازمه ؟!؟!؟ اصلا ما صرخ الا على قانون الاستقرار الي الحبيب عشان يمشيه عطانا اقتراح بو عشره

انا أجزم ان مسلم لو مع الربع الي خبرج جان سووله تمثال بس ما يطولونه

ولا ترمى الا الشجره المثمره

Blog 3amty said...

عادي مو كل الناس تحب تسمع عبدالكريم وايد أعرفهم يحبون يسمعون فرقة الأخوة والحمدالله أمورهم طيبة ومرتاحين نفسياً

واللي يبي يسمع صراخ مسلم يسمع واللي يبي يسمع "كلام" صراخ مسلم هم يقدر يسمع، المسألة مسألة ذوق وثقافة سمعية !


وعاش بوشريعان حراً شامخاً مرفرفاً على فرعيات الدائرة الرابعة النتنة !

كويــتي لايــعه كبــده said...

اتفق معك بالكامل بالنسبة لمسلم البراك

ترق الموضوع والتركيز على نبرة الصوت شيء غبي وحجة ضعيفة

وانت الصاج مسلم جاب أعلى عدد أصوات بتاريخ الانتخابات الكويتية (على الاطلاق!) هذا وهو خارج الفرعية وبالرغم من دعم أحمد الفهد لنواف ساري ضده


والقلاف ما استحى على وجهه بالانتخابات اللي فاتت يوم نزل وهو حالف ما ينزل ولاعن أهل الرميثية وتوعد بالشكوى ضدهم بيوم القيامة (اي مو هو ما راح يحشر مثل بقية البشرية - واسطة) تبيه يستحي اليوم انه يبي حل غير دستوري ومتلهف على الترشيح للمجلس؟

الشرهه مو عليه
على اللي يصوتون للعمامه لو كان داخلها فاضي مثل دماغ القلاف

Eng_Q8 said...

بلوق العمه

يهدون عبدالكريم ويسمعون الاخوه اكيد عنده كولت وكاتب براذورز وراها

اهم شي الراحه النفسيه

هم صح

والله يستاهل كل الدعم

Eng_Q8 said...

برييه

صحيح

الي اعرفه ان المحيلبي اكثر منه @@

من قالك انه يستحي على دمه ؟

حلهم حال الي يصوت حق اللحبه ما فرقت صبه حقنه لبن

ولاّدة سابقاً ... رانيا السعد ...رانية المنيفي حسب الأوراق الرسمية said...

علي الراشد أمس ممثل كومبارس بمواهب محدودة
أول التمثيلية سالفة أمه اللي تحب سكوب..وأغنية عاش الأمير اللي يهديها أمه
وبعدين الهدوء والتأثر المصطنعين

وأخيراً القرض العادل الذي حاول ان يشرحه فعرّي عدم فهمه لأمور كثيرة في الاقتصاد وفي التعامل مع المال وأبسطها مفهوم القيمة الحالية للنقود

أمس علي الراشد كان ..سلاّااااال

زعم الفرزدق أن سيقتل مربعاً
أبشر بطول سلامة يا مربعُ

ولاّدة سابقاً ... رانيا السعد ...رانية المنيفي حسب الأوراق الرسمية said...

البيت الذي أوردته للبراك رغم كل اختلافي معه

راعي تنكر said...

توافه الخلق تعتقد انها ستشتهر عندما تقذف العمالقة

Kuwait said...

مهندسنـا ..
انت نسيت أهم قضيـة على الساحه الي يتداولونها المرشحين وذبحونا فيها ألا وهي الحكومـه وناصر المحمد ومن هو رئيس الحكومه القادم :)
انا يبط جبدي الي ماعنده برنامج انتخابي وراد ينزل ببرنامجه الي فات يعني برنامجك ما سويت منه نتفـه راد تعيده علينا ليش ؟؟؟
الشغله الثانيه يبطون جبدي الي يزهبون الدوا قبل الفلعـه يعني الاخ داش قوي بأول ما يطلع انا راح استجوب رئيس الحكومه القادم
@@
زين على شنو ؟
يقولك على الي صار بالمجلس الي طاف !!!
اما على سالفة مسلم البراك الظاهر الحين كل من يحاول ان يصعد على حساب نجاح مسلم ويحسبون هجومهم هذا بصالحهم يعني لما يقولون مانبي صراخ ..
علي الراشد بالأول خل يثبت له على موقف تالي يتكلم عن الناس صج مشكله الي بيته من زجاج ويفلع الناس بصخر ;p
هايف ماسك سالفة المسايد عشان يضمن جم صوت من السلف ..
القـلاف معاهم معاهم وعليهم عليهم !
خالد الطاحوس مليت وانا اتكلم عن سالفته اخرتها عند كويتاوي وهذاك اخر كلام لي عنه لاني عطيته اكبر من حجـمه الصراحه ووايد عليه :)

جذي انا تكلمت عن كل كلمه ببوستك وسويت بوست ثاني ;p
وانا قايله ماني متكلمه بالسياسه بس كلا منك ارتفع ضغطي عشان جذي ابي رحلة علاج على حسابك @@
يلا قواك الله ويعطيك العافيه ..

Nikon 8 said...

مهما إختلفنا مع الأخ مسلم البراك سواء بإسلوبه أو بموقفه من بعض القضايا
يظل الواقع هو إن هذا الرجل لديه شعبية كبيرة ومحبوب وخدوم وخفيف ظل
:)

MOODMAANI said...

ماشوف ان الراشد غلط بالعكس امدحه ومدح طرحه الجاد
انتقاد بوفيصل كان على اللي يقلدونه بدون مضمون

الصعب said...

اعتقد انى المسلم تميز بالضجيج والصراخ عمال على بطال وانه الان يؤيد الطاحوس بعدما تنكر التكتل الشعبى له فى بدايه القبض عليه ولكن عندما صنع الاعلام منه بطوله زائفه اصبح الباراك يمدح فى الطاحوس واعتقد ان الكل يمثل من اجل الحصول على اصوات الناخبين ،واما قضيه الجينكو الكل يعلم ان سواء البدر او الخترش يطبق القانون بازاله اى تعدى على املاك الدوله ومن يزيد على هذه القضيه فهو حاقد واحمق يريد اثاره الفتن بين طوائف الشعب .

الدســتور said...

البوست بالتوتال
يبرد الجبد

someone_q8 said...

السلام عليكم

بشمهندسنا
كتبت تعليق طويل جدا لكني مسحته , وبقولك شغله وحده

اللي يدري يدري واللي ما يدري يقول خمطة عدس
احنا لنا الظاهر وما خفي كان اعظم
خلها مستورة واايد احسن

بن شطان said...

انت ومعك الكثيرون معترضين على دعوة السيد القلاف للحل غير الدستوري انا اسجل تحفظي على هذه الدعوة لكن اسمح لي ان اتساءل هل نقبل ان تكون المجالس المتعاقبة بنفس شكل المجلس السابق ونفس نوعية النواب الذين سيدمرون البلد بطائفيتهم البغيضة ، وما هو الحل هل الحل ان ياتي مجلس ولا يقدم اي انجاز يذكر للوطن والمواطنين ثم يحل بسبب ممارسات الطارئون على الديموقراطية وبعد ذلك يحل وياتي غيره وهكذا ايه وبعدين والتالي وين رايحيين

مركبنا said...

اخي

هناك البعض لا يجد في رصيدة ما يرفعه
فياخذ بتكسير الاخرين ،،
قالوا اسيل تهذب الحوار في المجلس وشفناها في اول المشوار لهذه السنة
مع المسلم
=========

الطاحوس اخذ دعاية مجانية وافتتح مقره الانتخابي مبكرا على حساب الدولة ========

المهري لا تعليق

عنصر وطني said...

يستاهل ابو حمود الصوت

well_serviceman said...

مشكله عندما يتعرض "الفارغين" لشخص مسلم البراك وكيفية حديثه.. ولا ينتقدونه نقدا صحيحا سواء بنقطه اخلتفوا فيها مع أم لا..

عتبي على هؤلاء اللي يبون نبرة صوت معينه أو طريقة معينه للكلام.. ولم يتعرضوا للكلمات التي تطرح وتقال. الظاهر بيدشون بلجنة تحكيم ستار اكاديمي!

القلاف والمهري ماعندهم ماعند جدي.. والقلاف فايز بصوت "عن الحسافه" مو فايز لأنه الشعب يبيه..

الطاحوس. المثال الواقعي والحي لبعض نواب "الحجي الفارغ" بدون معنى.. فبعد ماصارت صجيه قام يقول انا ما قصدت وماقلت وماسويت

بالنسبه للدكتوره اسيل.. والله اعلم لم أكن حاضرا.. ولكن القصد منها اتوقع كان عند مقاطعتها..فأنا شخصيا كنت متواجد عندما تعرض تمقاطعات شديده من الصرعاوي.. فبعض النواب يستحي يسمع كلام من إمرأه ويتجه لإسلوب التهجم والصراخ والتقطيع.. والله اعلم

واسمحلنه عالاطاله :)

bo bader said...

مسلم البراك

صوت الحق يعور ، صراخه ما يحبونه بس صراخ محمد الصقر يطربهم !!

بدل ما ندعم مسلم واللي مثله من الاشراف اللي عندهم التزام واضح بالدستور وقاعدين يحفرون بالصخر بدوائرهم القبلية نحاربهم !

منطق عوي فعلا !
أما القلاف والمهري فصعب أني أشره على العقول القاصرة ، شرهتي على اللي يتبعهم ويطيعهم عمياوي ولا يستخدم عقله شوي ويكتشف كذبهم .

الطاحوس بطل جديد من صناعة ثوارة الحكومة وبس .

محمد --- هايف !!

تحياتي على الكوكتيل الحلو بالبوست

enter-q8 said...

باش مهندز

شوف و بعلنها
مالت على الدائرة الثانية تكفى شوف مخرجاتها

بو محمد said...

ضحكتني على سالفة يا الموحلو
لوووووووووول
قاصر بس ويييه و قميظه
لول
عاد لا جذي و لا جذي

يبون يصرخون خل يصرخون، بس الغلط ليش؟؟

و عن بقية البوست، إقول

كل(ن) على ليلاه يغني يا يبه

و الحمران العطران وصلهم سلامك
:-)

دمت و الأهل و الأحبة برعاية الله

Q8Sky said...

الخبر: فوز مرشح الحركة الدستورية فلاح صواغ العازمي بفرعية العوازم

شنو تعليقك؟

أندلسي said...

مشكل اذا دلوعة امه
كبر وصار عضو مجلس امة
يختي على امه


;)

Q8i said...

مبروووك الدوري

نبي بوست نحرق فيه قلوب العذاال

وعاش الاصفر

Eng_Q8 said...

ولاده

وازيدج بعد من الشعر بيت رايح مستقبل سيد القلاف ويقول عنه وطني وماادري شنو

---

واضح :)

والاختلاف لا يجعلنا متعسفين بالآراء وهذا الي مو راضين يفهمونه

Eng_Q8 said...

راعي تنكر

من قايل هالمقوله

Eng_Q8 said...

كويت

الجمهور عاوز كده

اي والله خل يثبت

خلاص مرينا مقرنا الانتخابي بالدائرة الثلاثين وييبي جنسيتج واربع صور ورحلة العلاج بتكون زاهبه

Eng_Q8 said...

نيكون


اشلون خفيف ظل ؟؟؟

Eng_Q8 said...

مودماني

انت ما تشوفه لكن انا اشوفه

وبعدين اذا عنده شي على مسلم خل يطلعه واذا ما عنده لا يدس السم بالعسل اتمنى اتوصله هالحجي

Eng_Q8 said...

الصعب

اولا انا متكلم عن مسلم مو على المسلم

ثانيا الضجيج الي اتقوله عنه لو موجود مع اي تيار ثاني جان سووله تمثال لانه وبكل بساطه صوت مهم

وانشالله مافي حاقد واحمق بالكويت

Eng_Q8 said...

الدستور

ميرسو :)

Eng_Q8 said...

انسان كويتي

وعليكم السلام والرحمه

اتمنى انك ترسلي اليب كتبته بالايميل

Eng_Q8 said...

بن شطان

الحل بوعي الناخبين والتصويت للكويت وليس لشيء اخر

Eng_Q8 said...

مركبنا

واشلون بتهذب الحوار ؟؟ بتصير ابله بالمجلس والا اشلون بفهم

يمكن ماراح يترشح اذا ظل بامن الدوله

Eng_Q8 said...

عنصر

يستاهل

Eng_Q8 said...

ويلي

طبعا مشكله .. لانهم ما يقدرون يجابهونه هذا الواقع

يمكن :p

ليش يصوتوله عيل

الطاحوس يبي يلبس ثوب مو ثوبه

لا يبا ما قاطعها
لا تقارن الصرعاوي بمسلم
وكان الاحرى بها ان تتحدث عن برنامجها النتخابي مو تنتقد الاعضاء

Eng_Q8 said...

بو بدر

اعترف ان صراخ الصقر اطربي في يوم من الايام

لا مسلم مو وطني اشلون يدعمونه :p

اي والله

هني هني عسى الكوكتيل بارد

Eng_Q8 said...

انتر

رئيس مجلس الامه ودميتري

Eng_Q8 said...

بو حمود

عساها دوم هالضحكه يا بو حمود

بالظبط اصرخ وبدون غلط

دام وصلهم بوسهم هالمره :p

Eng_Q8 said...

كويت سكاي

الغايه تبرر الوسيله مو شي يديد على حدس

Eng_Q8 said...

اندلسي

سلم قلبه

Eng_Q8 said...

كويتي

الله يبارك فيك

انا بنطر لين انفوز على الكويت :)

kuwaitya_7saweya said...

كاسك ياباشا
:D