Monday, April 20, 2009

ان لم تستح يا م رشح

الكل يريد ان يزرع في اطفاله حب الوطن واهمية المشاركة السياسيه من خلال الانتخابات وتعليمهم يأتي على مراحل كل على حسب عمره وعلى حسب فهمه
.
ولكن ما يحز بالنفس هو ما عرفته اليوم من تصرف لاحد النواب السابقين وهو تصرف ارعن وغير مسؤول ويجب ان يحاسب عليه
.
من حق اي مرشح ان يجمع اقربائه واصدقائه وغيرهم لكي يساعدوه بالانتخابات وبالمقر الانتخابي وبيوم التصويت وهذا حق مشروع لكل المرشحين
..
ولكن ليس من حق اي مرشح ان يستخدم الاطفال بطرق ملتويه وزرع افكار مغلوطه بعقله
..
السالفه يا طويلين العمر ومحفوظين السلامه .. ان هالنائب السابق موظف عنده جم ابله يشتغلون معاه ويحوسون داخل المدارس وينقون البنات نقوه عشان يشتغلون معاه بالحمله الانتخابيه ويغرونها بالنقود وان ما ستفعله واجب وطني وان هذا العمل كول وحلو والي ما يشتغل ماعنده سالفه وان الابله اختارتها لانها بنيه زينه وتفهم ولها مستقبل باهر ومن هالحجي
.
وطبعا بنيه عمرها 14 سنه شعرفها بهالسوالف راح اتصدق كلام الابله خصوصا المغريات الماليه والحوافز التي راح تعطيها اياها الابله بالمدرسه وبره المدرسه وبس حسبالها ان هالمرشح اهو حامي حمى الوطن و راح تنزرع فيها فكرة انها والله بالمستقبل اذا تبي اتصوت حق مرشح لازم يدفع لها وراح يكون هذا شي عادي هذا اذا ما قدست الي بتشتغل معاه
..
طبعا لا يخفى عليكم معاناة اولياء الامور بتعديل هذه الفكره الخاطئه ومواجهة عناد المراهقات والتمسك بهذه الفكره والا بروح اشتغل مع هالمرشح رفيجاتي وابلتي وياه واشمعنى انا وليش اكيد امي ما تفهم والابله افهم من امي واشلون امهات رفيجاتي راضين وامي مو راضيه
..
هذا المرشح الذي ينادي بالوطنيه سوف تتلطخ يديه بافساد عقول صغيره لا تفقه بالسياسه بشيء .. واعتقد انه ما يهتم لهذه الامور فكم انفق من ملايين لشراء الذمم وما يهمه هو الكرسي فقط وللاسف الكويت هناك الكثيرين يدعمونه ويتراقصون على نغمات الهبان اذا فاز.. و ماادري على شنو
..
الى اولياء الامور .. اتمنى منكم ان تتوجهوا الى الناظره واذا لم ينفع الى المنطقه التعليميه واذا وصل الامر بكم الى طريق مسدود اتجهوا الى الصحف لفضح هؤلاء المدرسات والمرشحين الذين لا يخافون الله بعقول ابنائنا
.
تبي تشتري اصوات بالطقاق كلن عقله براسه ويعرف خلاصه تبي تشتري الناس هم كيفك تبي تشتري الاعضاء الي نفسك بالي ما يحفظك .. اما تلعب بعقول الاطفال وقف عند حدك وفكر انك راح اتحطم جيل قادم هذا اذا عندك ضمير لكي لا نيأس من وطنا
..
لن اذكر اسم النائب لان ليس لدي دليل مادي ولا تفويض من اولياء الامور لكي اكتب اسم المدرسه او المنطقه لذا اتمنى من اولياء الامور ان يتخذوا كل السبل لفضحه حفاظا على ابنائهم وعلى وطننا الغالي
-.
=======================
.
جليعب فاز بالفرعيه زغرتي يا صفيه ماحنا أوووولناا مافيش فاااااايده
.
========================
.
.
اللهــــــــــــــــــــــم لا اعتــــــــــــــــــــــــــــــــــــــــراض

36 comments:

Kuwait said...

يا مهنـدسنـا انت شتقـول
@@
مـاتدري ان ابن الوز عوام ؟
الخـال من قبـله ما قصر ..
اذا بالانتخابات الي طافت الناظره بكبرها مفتاح انتخابي تبينا نلوم المدرسات ونشتكي عند الناظره !!
الشكوى لله :)
وطبعا بما ان الناظره مفتاح انتخابي نص المدرسات شوف عيني باج الخال معلق طول الدوام وطبعا شغالين الصبح مدرسات يلوعون جبد أولياء الأمور بالحنه ومدح الخال والعصر لما بالليل كـل أرقام أولياء الأمور الي بالدائره معاهم ومستلمينا تدقدق لا وفوق شينهم قوات عينهم اذا دقرتها وقلت لها وانتي شكو حق منو أرشح تقولك زين منو اتعرف بعد بهالدائره ممكن تعطينا الأرقام !! :\
هذا غير ان الناظره بعد جبدي اجتهدت وسوت يوم مفتوح كـامل سوت فيه مثل الانتخابات المصغره ويالله ياليهال عيشوا الدووووور شوفوا هالمرشح خوش واحد وطبعا عازمتلك كل أولياء الأمور وكل واحد مر بالشارع قالت له تفضل زلقه بطيحه مع العلم ان هالمهرجان كان مسائي عشان محد يعتذر من أولياء الأمور بحجـة الارتباط بالدوام :)
ضيف على كـل هالأمور ان كـل ما يقرب يوم الاقتراع تزيد حصص الإحتياط لدرجة ان اليهال قاموا يطنقرون انهم يداومون على ولا شي بس على احتياط والسبب طبعا معروف انهم يستعدون ويزهبون حق يوم الاقتراح واجتماعات المدرسات مع المرشح صارت تزيد فالحبيبه الناظره مضطره تخليهم يروحون :)
اشرايك ان يوم الانتخابات الياهل رايح لأبوه يقوله صوت حق فلان خوش واحد وأصر ان يروح مقره الانتخابي تخيل يهال اعمارهم 10 سنين ..
ولا أدري هالشي بعلم الوزاره والا من وراهم ..
ومالت على هيـك نـاس ..

Eng_Q8 said...

كويت

ثلاث ارباع ولد الحلال على خاله :p

الناظره بعد لا حول الله

هالناظره ما اتحكرينها بالخيازرين اشلون تربي اجيال ؟؟؟

والله لو باجر ولدي يقولي صوت حق فلان وسامع الحجي من الناظر لا امصع رقبته ناقص انا يخربون الولد علي

لا حول ولا قوة الا بالله

Q8i said...

كلامك عدل

الاطفال مو مفروض نزج فيهم بانتخابات
بعيدن ياخذ فكره وترسخ بمخه وصعب صعب تتغير اذا كبر

خلوهم بدراستهم واذا كبروا
لاحقيين على الانتخابات


بالنسبه لـ حسين جليعب

بما اني من ابناء الدائره الرابعه
فـ حامض على بوزه يشم الفووز

إنسان كريييييه وللحين مادري شلون فاز بالفرعي

بس هذا حده

ماراح يطقها ان شاء الله

مو ناقصين اعضاء متعنصرين بالمجلس

بو محمد said...

أكيد هالمرشح يبي يطفي الليتات يوم الإفتتاح و يشب شموع و يغني هو و اللي يايينه
وطني حبيبي وطني الغالي


نفوس رخيصة

تم عوار راس نهيهيييه

أقول، وصيتك الأخيرة بخصوص الحمران لم يتم تنفيذها لأن قد يكون من آثارها فنقر بره البيت

:-)

دمت و الاهل و الأحبة برعاية الله

ديرة بطيخ said...

للاسف وصل فينا الزمن ان نستخدم أجيالنا ومستقبلنا لمصالحنا الخاصه


صج صج لابد من اليأس من وطنك

Eng_Q8 said...

كويتي

لازم

من بؤك لي باب السما

Eng_Q8 said...

بو حمود

ممكن ممكن :p

جدا المشكله انه داش بكل مكان ياخي وخر عن المداااارس

افاااااااااا لا تخاااف خلك صنديد سوها وانا أكفلك :p

Eng_Q8 said...

ديرة

للاسف

هالكلمه لازم الي يقولها يطبقها

well_serviceman said...

بكل اختصار... "إن لم تستحي فإفعل ما شئت" والله حرام

أما بالنسبه لجليعب.. مبروك عليك :)

حياتي هدف مو عبث said...

عساه ما يتوفق
ويقلب عليه كل اللي يسويه

nanonano said...

من صجّك؟؟؟؟؟!!!!؟

ما يستحـــــــــــون؟؟؟؟

لها الدرجه وصلت فيهم؟

بتخرّب عيالك و عيال أخوانك و عيال عيال خواك كيفكم

بس لا تتمادى على عيال الآخرين

اللي مساكين أهاليهم ذنبهم الوحيد أنهم حاطين عيالهم بمدرستكم

chandal/danchal!! said...

صج احتريت على هالسالفة

في مدرسات يغسلون مخوخ هالمراهقات

ويقلبونهم على اهلهم حسبي الله عليهم

مو لاقين احد يردهم... شالدبرة معاهم!

Enter-Q8 said...

اشوه ماخذوا مرحلة رياض الاطفال بعد


يقولك جليعب عنده اخو الله لا يطيحك بايده
اسمه مشهور وقال عن مقابلة جليعب مع الصقر ان حسين رجل متعلم و هادي و الا كان شفت علووم

اتعب

عثماني said...

جلعيب باشا فاز ؟؟

يا فرحتي يا فرحتي

:(

هالانسان سبحان الله .. ما ينبلع لله في لله

wa6an-alnhar said...

ما بقا الا يشيشون الخدم علينا بعد ويخلونهم يسوون اضراب عن العمل علشان انصوت لهم
!!

كبرياء انثى said...

عزا كويت متى؟

kuwaitawy said...

والله حاله


فعلا

ان لم تستح فافعل ما شئت

Blog 3amty said...

ولا تعيدها مره ثانية !!


http://www9.0zz0.com/2009/04/21/11/992246440.jpg


:P

Eng_Q8 said...

ويلي

بالزبط

لووووول الله يبارك فيك :p

Eng_Q8 said...

حياتي هدف

اللهم امين

Eng_Q8 said...

نانو

يس يس

لا ما يستحي

اي

احد يقدر يكلمه هذا

Eng_Q8 said...

جندل

اشدراني عنهم

يمكن باجر بنتج بدال ما اتروح مزرعة عمها اتروح مقر هالمرشح :p

Eng_Q8 said...

انتر

يسويها ترى ماعنده مانع

لوووووووووووول الحبيب قاعد بشيكاجو

Eng_Q8 said...

عثماني

مي توو

Eng_Q8 said...

وطن

عاد اذا خدامتج شاشت انا اجزن انج راح اتموتين من اليوع :p

Eng_Q8 said...

انثى

فال الله ولا فالج عسى عمرها طويل

Eng_Q8 said...

كويتاوي

حاله ما تسرش

Eng_Q8 said...

بلوق العمه


شكرررررن :))

لا اتوب اتوب

عاد كنت ناوي عليك ببوست اخليك اتغير الديزاين بكبره بمدونتي بس حسافه صدتني :p

كويــتي لايــعه كبــده said...

اللي ما يطلع بالبوست... تطلعه التعليقات

هذه مو مسؤولية وزارة التربية ان يحاسبون هذه التعديات؟
أين المسؤولية
والا كل(ن) على قد فلوسه يعامل؟

بالماضي نقل اصوات وتزوير بالتسجيل واليوم هذه

اياك واليأس طل

Eng_Q8 said...

برييه

وين وين مكو شي لا تتبلى علينا:p

شكلها وزارة التربيه لاهيه بالكاميرات

فلوس فلوووس واذا ما اصبح الانسان ضعيف امامها ينتهي كل شيء

أبو الدســتور said...

عادي قمنا نشوف كل هالطرق


------

الظفير شوية بالدائرة الرابعه
وعليهم التحالف مع شمر لنجاح جليعب

ZwaiZ said...

jlai3eb? akhhhhhh wainek ya bo3abdallah

المقوع الشرقي said...

الحيا نقطة يا باش مهندز وراحت من زمان
حتى اليهال ما اسلمو
!!
أما لينكلن جليعب
شاوصف فيه شاخلى منة
طيبت قلبه و ضحكت سنه
مالت على ايفري سنقل لينكلى صوتله

Eng_Q8 said...

الدستور

لا مو عادي يهال شدخلهم بالانتخابات

===

هذا اذا فاز يا يسكت طول فترة الانعقاد يا يدخلنا بمتاهات احنا في غنى عنها

Eng_Q8 said...

زويز

اهو تنازل عن الانتخابات عشانه :p

Eng_Q8 said...

المقوع

اي والله

لووول