خسران يا امل

انا الخسران لاني اقف مع الضعيف ولا اقف مع القوي

انا الخسران لاني ما امسح جوخ المسؤولين علشان اوصل

انا الخسران لاني ما اجامل العضو والا الوزير علشان امشي شغلي

انا الخسران لاني ما دشيت لا مع حدس ولا التحالف ولا المنبر ولا حتى السلف .. وشوفوا اشلون مضبطين ربعهم

انا الخسران لاني ما استملق احمد الفهد والا جان انا الحين مدير ادارة وبعد سنة وكيل مساعد

انا الخسران لاني ما آكل مال الحرام .. وفي ناس استغنوا ويعتبرونها شطاره

انا الخسران لاني اقطها بالويه .. والي يتحيلق خوش ريال

انا الخسران لاني مااشغل مخي بالتجاره بس قاعد وافكر بهم مو همي واخر شي محد درى عن هوا داري

انا الخسران لاني ما اشتغل مفتاح انتخابي علشان يضبطني العضو ... يعني صايد الحركه اوصي للافضل .. ودميثير والخرافي و سعدون و الخنفور واصلين واصلين

انا الخسران لاني ما اجامل تيار واسكت اذا غلط واصفق حق اخر اذا سوا شي صح بالنهايه يقولولك ما عرفنالك يعني يا اصير مغمض ورا هذا وذاك يا ما يعرفولي .. ونسوا ان في شي اسمه مصلحة الديره

انا الخسران لاني فاتح بلوق وقاعد اتحلطم فيه .. وغيري يكتب بجريده ويلمع ويقبض

انا الخسران لاني احرق بروحي على الي يصير بالديره .. زقاير .. ضغط .. ويمكن الياي سكر .. وغيري يسافر و و لا همه

انا الخسران لاني ما استغليت جم فرصه يتني .. لانها غير قانونيه وراح يمنون علي فيها

انا الخسران لاني مو مع بابا جاسم ولا بابا مرزوق .. وكل واحد معاهم عنده رنج سبورت ومبلغ وقدره واهو حده كولت

انا الخسران لاني متفائل .. وغيري مكبر المخده وما يحاتي الا المباريات

انا الخسران بالنهايه بكل شي ولكني على أمـــــل اني اربح وطـــــن يعوض ما خسرته

اللهــــــــــم لا اعتــــــــــــــــــــــــــــــــــــــراض