Thursday, June 11, 2009

خطه ترللي




الغاء جامعة الشداديه ؟!؟

انزين والفلوس الي انصرفت عليها ؟!؟!؟ .. اي صح نسيت ان هذا مو شغلي لان اذا قلت وين الفلوس قالوا هذا مؤزم ويحب نواب الصراخ


دوام المدارس لي 4 العصر ؟!؟

انزين مو مشكله بس لي الساعه 4 شنو راح يسوون ؟؟

هل راح يحلون الواجبات بالمدرسه مع اعطاء دروس تقويه قبل الامتحانات للطلاب الضعفاء بمواد معينه ... والا راح يخلونهم يلعبون لين ايون اهلهم ؟؟

وهل سيتم تقديم وجبة الغداء بالمدرسه على ان تكون صحيه ومطبوخه بوقتها ونظيفه مع اعطاء الخيارات باختيار الاكل وتغيير المينيو كل يوم حالنا حال اوروبا .. والا بقزرونها عيالنا فطاير جبن وزعتر محزر وعصير يلوع الجبد ؟؟

.. وهل راح ينظفون الحمامات .. يكرم القاريء .. علشان اتصير صالحه للاستخدام الآدمي مع وجود مشرف عليهم والتنظيف يكون كل ساعه ... والا بتكون مرتع حق الي ساحبين على الحصص ؟؟

وهل راح يكون الماي البارد متوفر ؟؟ .. والا راح يشربون اليهال ماي صليبي او كل واحد اييب مطارته معاه

وهل راح يضيفون مواد تنمي الفكر وتنمي الروح الوطنيه و تحديث الادوات المدرسيه واضافة وسائل لتعليم الي ما تضيق الخلق ؟؟ والا راح يظلون على نفس الحاله ؟!؟

وهل راح يسوون انشطه طلابيه رياضيه وثقافيه ترفه على الطلبه وتستخدم قدراتهم بشي مفيد ؟؟ والا حصة الرسم بتظل بس سوالف وحصة الالعاب يعطيهم المدرس كره يقولهم روحوا لعبوا ؟؟

اذا كانت الخطه للتمديد فقط وحسبالكم انتوا مكتشفين الذره .. فهناك عدة امور يجب النظر بها اهمها مستوى كفاءة المعلميين خرييجيين التربيه عندنا والوافدين .. يجب ان يكون المعلم على مستوى من الكفاءة ومستوى من توصيل المعلومه للطالب وايضا لا ننسى معلمين الدروس الخصوصيه.. يا تاخذ عندي خصوصي يا ماني شارحلك بالحصه .. والا المناهج الي كل يوم متغيره

التربيه تحتاج الى رؤية تربويه متخصصه .. ويا حبذا لو تكون من الخارج لكي ينتج لنا جيل كفؤ وهذا ما نحتاجه .. اما سالفة زيد وقت الدوام بدون تعديل جذري لكل المساويء فلا طبنا ولا غدا الشر وخلوا خطتكم لكم


وبنفس الموضوع يذكرون انهم يريدون تخصيص التعليم

حلو وجميل .. ولكن هل سيأخذون بعين الاعتبار كفاءة المدرسه والا كلمن عنده جم بييزه سواله مدرسه والشهاده بالمخبه ؟!؟ ويقولون ليش تودون عيالكم مدارس انجليزيه


وبنفس الخبر .. خبر احلى بوايد .. يقولكم يا طويين العمر انهم يبون يخفضون التوظيف بالحكومه بنسبة 60 بالميه

هم كلام جميل وكلام معقول ... ولكن اذا ما توظفوا بالحكومه وين يتوظفون ؟؟

الشركات الحين قاعده اتفنش الموظفين هذا اولا

.. ثانيا الشركات ماراح اتوظف شخص ماتبي تخصصه وانتوا في تخصصات مال امها داعي وفاتحينها بالجامعه
ثالثا الشركات ماراح اتوظف شخص متخرج من جامعة الله يعلم بحالها .. والحين قاعدين يطالبون بالغاء قرار وقف الجامعات الي سوته نوريه حق مصر والاردن والفلبين .. وطبعا الحكومه راح اتوظفهم بالوزارات يعني لوزارات راح اتصير شهايد متعلقه وبدون انتاجيه يعني بالعربي بتصير اردى من الاول

رابعا يجب فتح السوق للمستثمر الاجنبي علشان الشباب يتوظفون واذا بتحكرها جذي وين الشباب راح يتوظفون

خامسا اذا ما تبي اتوظفهم بالحكومه لا توظفهم ولكن عطهم امتيازات ماليه .. وايضا اضمن لهم حقهم واهم شي وجود جهة للتظلم مع امكانيه توفير فرص وظيفيه في حالة ان هالشركه تبي اطفش هالموظف الغلبان


بس مالي خلق اكمل لان الي حاط الخطه الظاهر والله اعلم ماخذها من محمد ابراهيم
ترى هالفيديو معبر



اللهـــــــــــــم لا اعتــــــــــــــــــــــــــــــــــراض

28 comments:

As YoU LiKE said...

للساعة 4 ؟

زين حلو خل يحشرون واحد ببالي عن نومة العصر

تنمي الفكر والوطنية .. والمدرس مصري

خلها على الله

بو حامد said...

نفت الوزيرة خبر الغاء جامعة الشدادية

ولي 4 لأن بكل بساطه الدوام راح يكون من 12 الظهر ;p~

عثماني said...

يا خوي انت ليش تحب التأزيم ؟؟؟

:)

عنيف said...

انت مؤزم يعني في استاقلة حكومه يعني في حل مجلس امه يعني في انتاخبات يعني تتعطل التنميه 5 شهور كمان وكمان ويطلع الناتج عندك سنه ونص واقفه التنميه...


المستجوب والي يسأل عن مصالح البلد اصبح مؤزم واصبح نائب صراخ

مو على الصراخ الي صرخوه العموم من النواب ما نبي الي ساكتين هم الحكومه ما قامت من النوم والسبات العميق الي مو راضي يخلص الظاهر

esTeKaNa said...

اشلون يلغون جامعه الشداديه وقبل فتره حاطين لنا احتفال بوضع حجر الاساس مادري شنو ؟
الحين بنبلع سالفه الفلوس
حجر الاساس وين راح
:Pp~
بوست يعكس قلق الكويت كلها
بس جان اجلته يوم الاحد
انا الخميس ماحب اتعسر
الاحد عادي
مرة ثانيه خل البوستات الحلطوميه الاحد ما عليك امر
:))))
يعطيك العافيه

بو سعد said...

حلو

و هالخطط اللي حطوها اليوم راح يبدا تنفيذها بعد 7 الى 10 سنوات اذا كنت متفائل

و لما يبدا تنفيذها راح يكتشفون انها ما تصلح لان الوضع تغير .. و راح يحطون خطط يديدة .. و انت رايح

عندنا مشاكل جذرية المفروض نبدا فيها ..

بعدين نحط خطط بعييييدة المدى

مو خطة ام اسبوعين وانقز

lawyer said...

جامعه الشداديه توهم قاطين الف دينار بس سوووور فيبرجلاس مدري جينكو !!




من وين لهم معاييييييير للخطط ؟

بو محمد said...

خايرينه الجماعة في القبس
الخبر مو صحيح

صار لي جم يوم أمر عليك و ألاقيك مجبرت
عسى اليوم طخيت
:-)

ما أحب أشوفك معصب يا اخوي

دمت و الأهل و الأحبة برعاية الله

well_serviceman said...

الخطه ترللي

واعتقد انها وضعت فقط عشان يقولون احنه حطينه خطه.. مو عشان تتطبق لأنها شبه مستحيله..

حكومه تنميه طل!

أبو الدســتور said...

بلد عليه خطط ذباحه

someone_q8 said...

السلام عليكم

شوف يالتأزيمي بقولك شغله عاد انت وكيفك :)

في ابوظبي عندهم خطة استراتيجية بالنسبة للتدريس وهي قاعد تطبق حاليا وليست عالورق ونتائجها راح اتكون بعد 15 سنة وهي :
عندهم ثلاث انواع من المدارس
1- مدارس خاصة
2- مدارس حكومية عادية
3- مدارس نموذجية حكومية

ادري ان كلهم عندنا لكن شوف كيفية التطبيق

راح اتكلم عن النوع الثاني والثالث , رواح ابدي بالثالث

بالنسبة للمدارس الحكومية النموذجية فهي مدارس حكومية لكن تدفع لها رسوم تقريبا من 500 الى 750 دينار بالسنة , وبالفصل فيه على الاكثر 15 طالب فقط وبالفصل جميع المستلزمات النظرية والعملية لعملية التدريس من شاشات كبيرة وكمبيوترات و و و الخ

والمدرسين اللي فيها يتخارونهم نقوة من افضل المدرسين سواء من مصر او سوريا او اي دولة بعد اجراء اختبار قاسي لهم وبعد ما ينجح هذا المدرس على طوووووووووووول قبل لا اييي ابوظبي يودوووووونه كندا دورة لمدة 3 اشهر وهذه الدولة فقط يعلومنه كيفية توصيل المعلومة للطالب , وطبعا يكون معاشه لما اييي اوظبي ضعف معاش المدرس في المدارس الحكومية العادية وله امتيازات مثل السكن الخاص والتوصيل من الى , هذا غير ان عياله يدرسون بالمدارس الخاصة اهناك

شفت الفرق ؟
واحنا بس نلغي جامعة ونعطيها حق اللي يسوه واللي ما يسوى عشان يضبطونه
اتقول يلعبون لعبة الكراسي

************************
خارج الموضوع : العرض لحد الآن ساري حق الفش ماركت وعلى فكرة انا مادري عن سالفتك ويه الفيش ماركت :)))
حدد الوقت وشوف اشغالك :)

Sn3a said...

الفاكتس اللي ببوستك تضيق الخلق

Enter-Q8 said...

خل يزيدون ساعاتالدوام
و عالفكرة اهو مقياس عالمي صج
كل الكلام اللي قريته بالخبر حلو
بس على ارض الواقع اهني مربط الفرس

عنيف said...

اتمنى مشاهدة مدونتي وابداء الرأي في المقاله الاخيره على هذا الرابط

http://kuwaitfreevoice.blogspot.com/2009/06/blog-post_12.html

وشكرا على المرور مقدما

Eng_Q8 said...

از

العن خير النحاسه

Eng_Q8 said...

بو حامد

نفت ؟؟ المصيبه اعظم بعدين اقولك ليش

اي يسوونها

Eng_Q8 said...

عثماني

ماادري الظاهر قاطين سري بالصالحيه :p

Eng_Q8 said...

عنيف

وكل استجواب بحل ما صارت

نعم نعم

الكل نايم ويحلم بكوابيس

Eng_Q8 said...

استكانه

اشدراني عنهم

حجر الاساس راح يصير تذكار

خلاص علشانج محنا كاتبين شي بالويك اند الا بحالة الضروره

الله يعافيج

استكانه شاي ولا عليج امر

Eng_Q8 said...

بو سعد

اي عادي عادي

خل يسوون خطط قريبه المدى علشان يسوون خطط بعيده

Eng_Q8 said...

لووووووووووووير

بس الف ؟؟

وال 12 مليون وين راحت !!

الظاهر من صالح زكريا

Eng_Q8 said...

بو حمود

ما يندرى عنهم

يا بعد جبدي

كا تبيني اعصب .. قدملي على وظيفه عندكم شرط ماراح اعصب طول عمري

Eng_Q8 said...

ويلي

مثل الي يلبس فنيلة برشلونه واهو يشجع الساحل

Eng_Q8 said...

الدستور

حاظرين

Eng_Q8 said...

انسان

وعليكم السلام والرحمه

قول قول :p

ايييييييييييييه هذي الخطط الي تبرد الجبد

مالت على خططنا

======

العرض مغري ..حدد المكان والزمان بس مو اهني بالايميل علشان تكون العزيمه سريه

وبعدين لا تعصب اذا شفت الفاتوره ام الربيان غاليه ترى :p

Eng_Q8 said...

سنعه


اعجبتني فاكتس كثري منها

حسستيني متخرجه من هارفرد مو الخالديه مبنى 8 خ :p

Eng_Q8 said...

انتر

مربط الفرس بجبد

Eng_Q8 said...

عنيف

تم قبول النداء