Monday, January 25, 2010

خاص وسري وحصري القوانين الجديده

القوانين الكويتيه الجديده ستساهم بأن تجعل الكويت مركز مالي وتجاري ومجمع بعد اذا مو عاجبكم وكل شي عقب هالقوانين راح يمشي على حسب الاصول ، وهذه القوانين عزيزي المواطن راح يوافق عليها مجلس الامه غصبن على خشمك وخشم الي خلفوك ، والعضو له ان يلعن سلسفيل خلق الله بقاعة عبدالله السالم وانت لابد ان تلتزم بالقوانين ، وكل هذا علشان مصلحتك انت يا مواطن فلا تقعد تتحلطم

قانون رقم واحد : الكلام مسموح لكن الحجي ممنوع ان تكلمت بنصكك بغرامه خمسين الف

قانون رقم اثنين : للجرايد الحق بنشر ما تريد ، من الاخبار المجازه حكوميا ، تدرون احنا دوله ديمقراطيه

قانون رقم ثلاثه : الغوص مسموح وهي رياضه مفيده ولكن على اليال

قانون رقم اربعه : افرح واسمع غناوي بس بالبيت وبالسياره

قانون رقم خمسه : اي مدون طايح حظ يكتب شي بنصك مدونته بلوك واذا مو عاجبك بنصكه بكبره بلوك حتى لو كاتب عن مباراة لا يجوز ان يتشمت لانه راح يمس الدول الاخرى وهذا مخالف قانونيا

قانون رقم سته : الي بيسوي عرس لازم ياخذ موافقه من وزير الاعلام ، تدرون هالايام الواحد ما يضمن يمكن واحد بالعرس يتكلم عن المجلس وهذا مكان علني ويعتبر تجمع

قانون رقم سبعه : كل المحلات راح تسكر الساعه تسع بالليل والي مبطل بس هارديز لان ما نقدر انسكره لذا كل مواطن يجابل اهله ويربي عياله والا يغرم امية الف دينار

قانون رقم ثمانيه : لا يجوز الشتم واللعن والصراخ بالمباريات ، نبي نعلمكم الاتيكيت

قانون رقم تسعه : لا يجوز ان يدخل نيويورك اقصد الكويت اي شخص يمس رموز الكويت وماادري منو رموز الكويت ، المهم اي واحد ما يبي احد يدش يقول انا رمز وهذا لا يدخل ، دوانيه مو دوله

قانون رقم عشره : اذا عضو بمجلس الامه ياكم الدوانيه لا تنتقدونه بس ابتسموا بويهه وقلوله انشالله طال عمرك ، واحد بيقولي ليش وهذا سؤال منطقي لان العضو ذاته مصانه وما يصير تتكلم عنه الا بالطيب او ادفع ميتين الف و انسجن ثلاث سنين او باحدى العقوبتين واذا حلينا المجلس سو الي تبي لانه وقتها مو عضو والقانون يسري ايضا على الاعضاء السابقين المتقلدين منصب مستشار فقط

قانون رقم اثنعش : الي يتكلم عن السيارات القديمه حتى لو كانت بيجو راح انشق حلجه ، لان هذه السيارات ثروة عالميه وكل شهر لازم انسويلهم معرض لكي يكون معرضنا عالمي ونستقطب السياح والمستثمرين ، مو قلنالكم قوانينا ما تخرش الميه

قانون رقم ثلاتعش : يا ويلكم و يا سواد ليلكم ان اشتكيتوا على اي مسؤول بالتلفزيون او بالرادو او بالجريده ، ما عرفتوا ليش ؟ علشان بو عيده يقعد يطبل لنا بدون أي شوشره ، وهذا سيعكس الجانب المشرق من دولتنا الحبيبه بالدول المجاوره ، مما ينتج عنه الاحساس بالطمأنينه للاستثمار

قانون رقم اربعتعش : ممنوع منعا باتا استخدام الكلمات التاليه : استجواب ، مال عام ، فساد ، حيتان ، فتوش لعيون الست رولا ، بلاك بيري لعيون اسوله ، نادي الكويت لعيون بو علي ، جينكو لعيون الي خبرك ، مترديه ، نطيحه ، رويبضه ، رئاسة مجلس الامه ، فحم ، رقم خمسه ، خطة ، زياده ، اسقاط ، بدون ، فتحي كميل ، تسييس السياسه

قانون رقم خمستعش : الحكومه خط احمر ، والي يهوس قصدي يسوي اعتصام او احتفال بالمعنى الصحيح امام المجلس او في اماكن اخرى للاحتفاء والثناء بالحكومه الموقره سيكون له شأن انشالله الله ، واذا مو عاجبك طق راسك بالطوفه واذا ماحولك طوفه سنتكفل ببناء طوفه لكي يضرب المواطن الي مو عاجبه الوضع راسه فيها وستكون صرح عمراني جديد على العالم وفريد من نوعه مكون من طابقين طابق لضرب الرؤوس والطابق الآخر سينما


يسري هذا القانون بعد الموافقه عليه من مجلس الامه الي راح يوافقون ويكسرون عيونكم بعد اذا هالمجلس ما وافق منو راح يوافق ومن الممكن اننا سوف نغير قانون او اثنين او تعديلهم لكي يتذرع بها العضو اذا كان خائف من ردود الافعال بحيث تكون لديه وسيلة لاقناع الناخبين كالعاده ، وهكذا سوف نصل الى الطريق الصحيح نحو التنميه ، طبعا واحد بينقز وراح يقول يعني شنو تنميه ، والجواب سد بوزك انت بدوله ديمقراطيه تنميه يعني تنميه تبي تبي ما تبي لما نبني الطوفه روح طق راسك فيها


ملاحظه هامه جدا : الي يقول هناك رقم ناقص بالقانون سيسجن مدى الحياة لانه سيشكك بمصداقيتنا وهو شخص يدور الزلات على الحكومه ويعتبر من الطابور الخامس ويضرب الوحده الوطنيه ويتعدى على الدستور ويجب حبسه باسرع
وقت ممكن

وبما ان الاسعار زايده فوق ال100 بال 100 واحنا ما نقدر انسوي شي بعد تجار كيفهم لازم يزيدون علشان التنميه ونكون مركز اقتصادي والا تبون تفشلونا مع الاجانب ويقولون ديرتهم رخيصه لذا نحن نفكر مع هالقوانين نوزع لكم هديه مجانيه مع التموين


اللهـــــــــــــــــــــم لا اعتـــــــــــــــــــــــــــــــراض

12 comments:

الراية said...

ابداع ياكاسك

قوانينك ياخيي ماتخرش الميه

وعلى جميع الوزراء تنفيذ مايخصه من القانون الزعبلاوي

Eng_Q8 said...

الرايه

نبي نسعاد حكومتنا الله يسلمك عاد ايي بعينهم

Anonymous said...

أهنيك على السبق العظيم
الصراحة طمنتنا، كنا خايفين
وما راح نسأل عن القانون رقم "احدعش" بس ما قتلنا وين يوزعون
الجت، لأننا فعلا نستاهل ما يحصل لنا
العراقيون ومن يشبه تجربتهم في الدول الشمولية، من العرب والأفريقيين ودكتاتوريات أميركا اللاتينية، سكتوا لما صاروا مثل الغنم
وشكلنا على الدرب سائرون
سقوطا في الهاوية
شكرا على أي حال
محبتي
عبدالله

جبريت said...

قانون طسعطعش

يقول

الي يبوق قولو له ترا الله يقطك بالنار بس احنا مسامحينك

enter-q8 said...

انزين الهدية التمونية
اقدر استخدمها استخدامات اخرى
مو اعتراض ابد كلا و حشى
يعني علشان ما انتقد حكومتنا اذا انقطع الماي مثلا و هذا بعيد اقدر انزل بوست حق اللي يبون يتحلطومن و اقولهم عندكم الهدية التموينة مشوا حالكم فيها لما ترد الماي
الله يعز حكومتنا تفكر بكل شي

bo bader said...

قوانين فعلاً ممتازة وبوقتها المناسب !

سؤال صغير عن قانون ١٤ :

فتحي كميل شكو ذاكرينه مع الكلمات الممنوعة ؟

وتقبلوا فائق الإخترام والتقدير ...

well_serviceman said...

انزين طال عمرك ماي حنفيه او راديتر اللي يطلع وياكم عشان انحدر التموين؟

elzain said...

هاهاهاها حلوة...

قصدك هارديز و كنتاكي

و بالمناسبة السعيده قبل امس داقة اطلب توصيل دونتس قالي "تلتومية و خمسين فلس توصيل يا مدام قلت له هو ليش!كان 150 مادري 200 خبري..قالي دي الرسوم القديدة من النهارده بس" و بسنا بسنا فلوس يا سعد....!؟

الدســتور said...

تشريع مايخرش المية

تشتغل عندي على الراشد انته

:)

EXzombie said...

قانون رقم سبعتعش
لازم يموت سبعة على الاقل و يثبت بالتقرير الشرعي انهم ماتوا بسبب عدم وجود منشأة حتى يتم اقرار انشاء هذه المنشأة
كالمستشفيات و صالات الرياضة و حلبات السباق و غيرها من شاليهات

كوكتيل said...

وايد حلوه هالقوانين على الأقل تحفظنا وتعرفنا شنو الممنوع وشنو المسموح عشان محد يقشنا وإحنا ما ندري ليش الحين الواحد يعرف اللي له واللي عليه بس بغيت أستفسر عن شي النفس كم نفس لنا في اليوم

وايد حلو الموضوع شكرا

الجودي said...

حلوة فكرة السينما في القانون خمستعش استثمار وطني