Wednesday, December 5, 2007

لا للطائفيه لا لطيور الظلام 2

تذكير .... لنكن مع مدونة بيت القرين وليقول الجميع لأ باجر وعقبه
.
.
.
بما ان الزميله تسأل عن طيور الظلام و هم بعد امس كنت اتكلم فيها مع اخوي وصديقي راح اخلي حبايبي المتأسلمين حق باجر واكتب عن طيور الظلام
بصراحه امس كنت مع صديقي الصدوق :) وكنا نتحدث عن هذا الموضوع وبكتب اهم شي تكلمنا عنه لانه يثري الموضوع
وللتنويه ان صديقي ينتسب لقبيله من القبائل يعني بدوي واحنا ربع من 15 سنه الله يتمم علينا
انا: ها بو محسن شفت شصاير بالديره ؟
بومحسن: يا عمي اذبحونا .. كلنا عندنا قروض ولا قلنا طيحوها بس الكويتيين صايره نفسهم دنيه .. انت شوف الاعضاء الي يتكلمون عنها .. الحمدلله والشكر
انا: اي والله صاج .. بس لا انطر كل شي راح يتغير انشالله دام في شباب يحبون الديره
بومحسن: وشدراك انه بيتغير انت شتسوي من وراي .. قولي يالخبل عاد انت مو صاحي ليكون دشيت حزب وماقلتلي
انا: لا والله حشا .. بس صاير اكتب بالانترنت حاطلي مدونه .. ومن خلالها شفت ان في شباب كفو بالديره
بومحسن: انت هييي دير بالك لا يشط لسانك مالنا خلق باجر انت مقطوط بامن الدوله ادري فيك مطفوق
انا: لا لا تخاف ماسك لساني لا تحاتي .. المهم ترى شكلها بتصير يعني اذا صارت ما يبيله انت وياي على الخط ترى السالفه تحتاج حق كل واحد خاصه مثلك يالليبرالي
بومحسن: شالي بيصير
انا: والله انا حاس ان الحركه الوطنيه بترد
بو محسن: لا حول الله انت لي الحين عايش الاحلام ... واخر شي تنصدم من ايام الكليه وانت جذي متى بتتعلم انت؟
انا: لا يبا الكليه غير والحين غير
بو محسن: اقول استريح بس .. شوف بقولك شي ترى هذيل ما يهمهم الا مصلحتهم .. وبعدين هالناس لي الحين مستحقرين البدوي ويحطونه بس عشان يكسبون الاصوات .. طول عمرهم ينظرون للبدوي على انه بدوي ولا راح تتغير نظرتهم فانا مالي شغل لا تحطني بنص الموضوع
انا: شكووووو يبا الناس تغيروا
بو محسن: لا ابوي انت...الناس ما تغيروا .. انا بالدوام عندي اول ما توظفت لا تشوف اشلون ينظرون لي .. غير هذا تذكر قبل ايام الكليه شكانوا يقولون؟؟؟ انت الي اهو انت صكت مع جم واحد عشانك ما تقول نجدي تقول اصلك مع ان اصلك من نجد بس هذيل شعرفهم ... هذا وانت داخل السور قبل لا يجون هذيل للديره .. اجل انا شقول
انا : اي عيل اشلون يعيبون واسكت اشق حلجه اهو والي خلفوه كل شي ولا بو محسن ولا اصلي يحصلهم عاد
ابومحسن: ها شفت اشلون.. للاسف الناس ناسيه ان البدو اهم الي حموا الكويت .. حتى كانوا مثل فيالق وكل فيلق باسم قبيله يعني اهم الجيش .. بس الواحد شيقول
انا: اي بس لا تنسى ان الشر يعم والخير يخص
بومحسن: انا مااقولك ان البدو شعب اله المختار انا اول واحد ضد الي يصير منهم بس يا اخي مايصير تحكم عليهم كلهم
انا: ومن قالك ان نحكم عليهم كلهم
بومحسن: انت تعرف فلان صح .. هذا كان اكثر واحد يدافع عن ..... عضو من الاعضاء الليبراليين سابقا وكان يشتغل معاه ويوم من الايام قال العضو الله يفكنا من هالبدو جان يقوله فلان لا مو كلهم جان يقول العضو لا كلهم!!؟
شفت اشلون حبيبي هذيل يكرهونا كره
انا: يبا هذا راحت عليه خلاص .. الحين احنا نبي الجيل الجديد
بومحسن: وهالجيل الجديد منو بيدعمهم؟؟ مثل قبل يقولولك احنا مو مدعومين وفي ناس تحركهم من فوق
شي طبيعي بيدعمهم احد وبيحركهم من فوق .. وهالداعم اهو بكبره يستحقر البدو
انا: لا يبا شهالحجي ... تفائل تفائل
بومحسن:مو يالمطفوق.. انت دايما مطفوق كالعاده انت بتصير بوجه المدفع وانت الله خير كلش مو مجنون .. تروح وتتكلم واهم يطالعونك ... اخر شي رئيسكم فلان
انا: يخسي ما بقى الا هذا .. هذا خل يتكلم كلمتين على بعض بالاول
بومحسن: مو هذا الواقع اهو الي بيدعمهم .. والله انت نسيت ايام الكليه اكثر واحد مشتط انت واكثر واحد يجيب اصوات انت... مو اخرتها تناجرت وياهم وخصوصا على هالموضوع
انا: امبلى بس انت تدري منو ساس البلا
بومحسن: لا ساس بلا بلا بطيخ .. المهم صارت وانا كنت قايلك قبلها .. فانا اقول اصحى بلا احلام ورديه
انا: غربلك الله ذبحتني ... بس كيفك حبيبي انا ماراح اسكت وبتلك وياي بتلك غصب اصابع ايدك مو سوى
بومحسن: انا قاعد انفخ بجربه مقظوظه المطيور مطيور .. المهم اي مطعم انروح
انا: فرايديز
يا جماعه صج انا عايش باحلام؟؟؟ انا بصراحه عشت وعمري ما فرقت بين احد .. بس بصراحه كلامه اقنعني لاني عايشت هالمواقف وشفت انهم يستحقرون البدو.. وللاسف الي يشعل الشراره اهم طيور الظلام ... هذيل الي لفوا علينا ومن ولا شي صاروا شي حسبي الله على ابليسهم ... عاد صج صج هالحجي اذا انا ولد الديره شوف هالاشكال اشلون تتعامل معاي طبعا مو جدامي من وراي ... والمشكله انهم هيلق .. وتاريخيا اهم صبياااان
ياجماعه تدرى طول عمرنا عايشين بدون تفرقه واخوي فتى الجبل تكلم عن الوضع الي كان بالسابق ببوسته اليوم وماني عايده
لي متى هالنظره الدونيه حق بعضنا بعض ... وللحديث بقيه مع طيور الظلام والمتأسلمون
تذكرت سالفه صارت مع طير صغير ... اذكر قاعدين انسولف والا واحد نقز قالي يا فلان انتوا شصلكم طبعا انا حسبالي يفهم بهالسوالف قلتله والله انا جذيه .. جان يقولي يعني اصلك بدوي .. قلتله اي كل النياده بدو.. قالي لا انت بدوي جان اقوله اي كل الاصيلين بدو .. جان يقولي لا بس انتي بدوي ؟؟؟ قلتله اي بدوي شتبي ؟؟؟ جان يقولي اي ليش تقول نياده واصيل وانت بدوي ؟؟ قلتله هذا الصج ؟؟؟ جان يقولي لا مايصير ؟؟
المهم جان اقوله انت شعرفك بهالسوالف
جان يقولي اي انا اعرف هالسوالف احنا عيال بطنها
ظحكت ظحكه مدويه حلوه مدويه .. جان اقوله حبيبي انت يدك صبي بقهوه وياينا سباحه اذا انت ولد الديره ومن عيال بطنها انا اصير بطيخ اقول استريح بس
جان يقولي ها لا تغلط شنو صبي
جان اقوله اسال ابوك منو معزبك وانا قاعد اظحك
طبعا سكت ومشى
للعلم هان هذا يده كان صبي عند يدي وللاسف عايش الدور
هالاشكال هذي وغيرها من الاشكال الي يتلزق واهو ولاءه حق دولة ثانيه سواء كان عيمي او بدوي ماكو فرق اهم طيور الظلام الي قاعدين يسوون تفرق بين الكوييتيين ...هؤلاء هم من يسمون بالالمان واهم الي لفوا هذي اهم ساس البلا والمشكله انهم عايشين الدور ماادري على شنو ؟؟؟ على العموم لنا وقفه اخرى طال البوست باجر انكمل
اللهم لا اعتراض

26 comments:

AnGlOpHiL said...

الواحد قبل لا يفتخر بأصله لازم يفتخر بنفسه !!

و هذول مجموعة من المعقدين..على قولتك طيور الظلام :)


و تسلم ايدك يا صبا نجد

Eng_Q8 said...

الله يسلمك

على نفسها جنت براقش said...

اكو ناس وايدتتكلم بالاصل صح كلامك

هذا مو عيب و لا غلط و لا شئ نقدر ننكره
بس مثل ما قلت
المعاير و الكلام الجارح من صفات الكويتيين
ومثل ينطبق عليهم
براسهم حبه ما انطحنت

اللى يضحك لما تشوف شعورهم بالنقص مع ان محد قال لهم
شى

اعرف وحده اصيله اباً عن جد
و كلام اهلها كله جذى
لا ومن زود الشى ابوها ما يرضى ترافج الا اصيلات مثلها

و ظلت ببيت اهلها و ما تزوجت الا و عمرها 36 و مو اصيل

ليش؟
عيال الديره مو كلهم مو زينين

وين كلام الله
لا يدخل الجنه من كان فى قلبه مثقال ذرة من كبر

و البدو و مو كلهم فئه كبيرةبالكويت و معروفه سوالفهم
و معنى هذا انهم ارجع واقول كلهم ناس مو زينين

لكن بكل فئه طماطه خايسه تخرب السله كلها

وانا من زمان ضد التفرقه لاى سبب ان كانت بشرط يكون الاحترام موجود
و كلمه اخيره اقولها لك
الهرم و ابو الهول
:)

Anonymous said...

تسلم ايدك يا حلو _ كلامك صراحة بالصميم وياليت اللي بالدوام وياك يفهم _ (اعتقد الحين عرفت منو اقصد ) صراحة لك وحشة اليوم ماشفناك. طافك الريوق السنع اليوم بس ماعلية نعوضها بالجايات.

عندي ملاحظه
: و البدو و مو كلهم فئه كبيرةبالكويت و معروفه سوالفهم
و معنى هذا انهم ارجع واقول كلهم ناس مو زينين

يالاخت ترد وتجاوبنا وتفهمنا شلون قدرتحكم عليهم انهم ناس موزينيين؟!

5roofa said...

امبي اليوم نفس الموضوع عن يعني الاصول تحجو في المدرسات و صكت هوشه بينهم لوول

و بغو يتماجعون علبو وحده اصيله و الثانيه مادري شنو قالت
والله انا ولا ادري وين الله قاطني

بس مادري يعني مو كلنا كويتين؟ ولا غلطانه

ييسلمووو على الموضوع و بالعافيه

salamz...

Eng_Q8 said...

براقش

اوكي مو عيب بس ترا المفروض هالاشياء ما تأثر على الديره .. يعني الطائفه او القبليه ما تأثر على الدوله لانها تهدم المجتمع
واقرب مثال امريكا اوكي فيها هالسوالف بس لا تشوفين ولاءهم للوطن

وهذا الي انا ابي اوصله من هالمواضيع

وصاحبتج هذي وايد في مثلها عسى الله يستر عليهم

وكلمه اخيره اقولها لج

كلبس المهندسين :))


-----------------------------------

كرياتيني

الله يسلمك
وبالعافيه وماتشوفش وحش يالغالي
وبالنسبه للمتخلف الي معانا بالدوام هذا من الي لفو او بالاصح من الالمان وقلتله اياه جان تذكر مو لو الله يفكنا من اشكاله احنا بخير اهو وربعه الي مخربين سمعة البدو وسمعة الديره
منشاار طالع ماكل نازل ماكل

وبالنسبه للي قالته اختي براقش

اقولك ان قصدها اذا في بدو مو زينيين مايصير انقول عن الكل انهم مو زينيين بس بدلياتها وايد ماعليه :)))

-----------------------------------

خروفه

شفتي اشلون اهني المشكله اذا مربيات الاجيال القادمه الي المفروض يصيرون قدوه جذي شراح يصير باليهال

عسى الله يستر اذا جذي المدرسين وعلى فكه لي وقفه وياهم بس مو الحين :)))
===================================
شكرا على المرور

Anonymous said...

سلاااام... ويااااسلاام عليك اخ مهندس كويتي.. كلامك ميه ميه عدل.. احنه شنو امأخرنه وامخلينه أمه متخلفه غير هذول الطائفيين؟؟؟ ياخيي شلون مخك يخليك تحكم عالناس قبل لاتعرفهم؟؟؟؟ يعني هذا بحد ذاته غباء وتخلف@! بس الحمدلله للحين فيه رياييل بالديره. وللحين فيه ناس صاحيه واتفكر بعقل واعي ومنفتح ياخوووك



أخوك العنطوط: مساعد مهندس متقاعد

فتى الجبل said...

عدل هذا اللي نقوله
اللي يحبهالديرة شيعي سني حضري بدوي عيمي والله على راسنا من فوق
واللي ما يحب هالديرة وأهلها اهوا اللي ندوسه تحت ريولنا

سدرة العشـــاق said...

الحقران يقطع المصران ... هالمقولة اللي طلعها صراحة حكيم

وايد ناس بتفلسف و تقط حجي تبي تقهرهم احقر يحترقون بمكانهم و خلك دايم مبتسم

:)

يعطيك العافية

Someday said...

3azizy eng,
ehney el koko’s trabow 3la chethy, o 7ata low ma trabow 3la chethey ‘7ale6aw nas who care about these things and act and treat other people based upon it!!! It depends on the person inside, shoof deary, e7na a country and akied each person is different!! We a9lan can’t be identical!!! How can any country develop and prosper, without having such a mix???!!? F it’s important and a must, lkin the thing ehny ‘7ala9 el culture 9arat based 3la salfat el a9el o el gabeylah o el 3aylah mo 3la what the person is, where I work, outside of koko for sure, I work with all kind of nationalities from all over the world what we have is respect to each other work and treat each other with adab o sana3, kil one min different culture and background and religion and we work together to make one thing, individuals in harmony, 7asafah that we in Kuwait speak the same lang, have the same religion have the same culture and so many things in common and we can’t even have half of that, pitiful walla

5roofa said...

والله صج امبي تخيل اليوم حتى تهاوشو ثنتينن بس على موضوع الدين و السياسه
;/

يانين المدرسات هالايام
تصدق المشكله انه قلة الادب توصل انه يطاولون على بعض و على اهاليهم و تسفل قبال البنات
يعني بنات صغار بالغرفه و هالثنتين حييل طايحيله هوشه

و للعلم كلهم من دوله عربيه وحده
يعني مو المفروض بالغربه يتكاتفون و يوقفون ايد وحده؟

;/

سوري على التحلطم
بس حرام تره مو كلنا مو زينين يعني انا خوش ابله والله لووول

salamz.....

Selezya said...

والله الناس اللي تكره وتحط ببالها هالشغلات وتعتبرهها عائق جدامها .. هذيل ناس متخلفين
وبعدين شفيهم البدو؟؟ لوول حدكم عاد ههههه احم احم

الكويت أولا
والكويت ثانيا
والكويت ثالثا
ورابعا عاد كيفكم
:p
هالطيور انشالله تاكل سم بالغلط وتموت
سلام

على نفسها جنت براقش said...

الاخ كرياتينى

مثل ما قال
eng_q8

بدلياتى وايد
:)
و البدو و مو كلهم، فئه كبيرةمنهم بالكويت لهم سوالف التحايل على القانون
و مجالات وايدة
ومو معنى هذا انهم كلهم ناس مو زينين
و اكيد غيرهم وايد ينطبق عليهم
مصطلح الاخ عرزاله الجديد
دبل شوت لفو

Eng_Q8 said...

مساعد مهندس متقاعد

مشكور يا بعد قلبي
والبركه بشباب الديره

-----------------------------------

فتى الجيل

عدل كلامك

-----------------------------------

سدرة العشاق

لاسف مااقدر اسكت :)))
مالج شغل اعرف اشلون ارد عليهم وانا اخوج لا تحاتين

والابتسامه صعبه بهالديره ... شيبنا واحنا تونا شباب

الله يعافيج


-----------------------------------

Someday

لووووووووووووووووووووول اعجبتني الكوكو :))

والله عدل كلامج واصلا كل الدول اهو خلط بين الناس ب تجمعهم محبة الدوله

وبالنسبه حق شغلج .. هذا الي اندوره

انتوا هدفكم الاجتهاد بالعمل
واحنا هدفنا مصلحة الكويت

وعلى قولتج اللغه وحده والدين واحد

بس وين الي يفهم

-----------------------------------

5roofa

يا معوده العرب امه اتفقت ان لا تتفق

بس للاسف ان هذيل يربون اجيالنا القادمه

بالعكس انا ابي هالتحلطم عشان اعرف شنو الي قاعد يصير بالديره وماادري عنه

كثري من التحلطم :))

جان زين كل الابلات مثلج

-----------------------------------

Selezya

اي والله

مافيهم شي يهبلون :)

الله يسمع منج

رابعا غناوي سيليزيا :))

-----------------------------------

براقش

تمام يا افندم :))

===================================

Aldenya said...

المشكلة ان كان الحديث عن الاصل والأنساب
يليه إستهزاء
والغرض الأساسي منه الطنازة

ناس مريضين عقلياً

تسلم إيدك على البوست

Eng.S said...

eng.q8

الاصل كويتي و النسب كويتي و الانتماء كويتي
وغيرة الى لمزبلة
____
اعجبني تحمسك للتغير .. لكن وجود ما يسمون نفسهم قيادات للتيار الوطني هم اكبر مصدر للأحباط الان!

من يدعو للمساواة و العدالة الاجتماعية و لازال يصنف الناس على اسس عرقية طبقية لا فضل للناس فيها ..هو بنظري العقبة الكبرى و لاحل الا بتجاوزها و انشاء تيار شبابي جديد متشرب بحب الوطن و محصن بمبادىء الحرية و العدالة و المساواة ضد كل الميكروبات "الظلامية"
______

تحياتي
سالم

Eng_Q8 said...

Aldenya

المشكله يالدنيا ان ما يعيب الا المعيوب وهيلق وخذوا جناسي شتبين يطلع منهم

-----------------------------------

مهندس سالم

على ايدك يالسلم وينهم ؟؟

هذا الي الكل ينادي فيه وانا اولهم

===================================

صبا said...

يسلم بؤك يا هندسة وصح السانك واحنا وياك بكل كلمة قلتها
اللي اهيا ضد التفرقة والطائفية

SAJA.S said...

حلو ان الواحد يعرف اصله وفصله
بس لا يقعد نكبر على الناس ويقول الاصلاح عندي والباجي خراب

Q80 Blogger said...

شوف زين تسوي فيه هذا الي شايف روحه
لكن هم انت جذي صار فيك حس طائفي .. ادري مو نيتك .. لكن هذا الي يفرقنا

انا بصراحه اقول محد اييب طاري حضر وبدو واصيلين ونياده إلا الي فيهم نفص

يعني انا تربيت في بيئه مافيها هل سوالف .. بحكم اني ساكن في منطقة كل فئات الكويت موجودين فيها
ما حسيت باي فرق بين البدو والحضري ولا الشيعي والسني ولا العيمي والنيدي

لكن بعد ما تخرج
واختلط مع ناس واشكال والوان ثانيه .. قمت اشوف هل شي واضح

خصوصا من الي يسمونهم بالدماء الزرقاء .. شايفين عمرهم وايد .. لا ومحتكرين كل شي
حتى الوطنيه بس حقهم
لا وحتى الليبراليه حقهم بروحهم
يعني كل ليبراليات العالم تدعو للمساواة .. إلا الكويت .. الليبراليه باسمك .. وانت ولد منو

وهم لاحظ هل شي واضح عند البدو نفسهم
اول سؤال يسألك
انت شصلك
وانا صراحه من عرفت هل سؤال اعرف جوابه كويتي
وربعي والي حواليني كلنا جذي
لكن هذيل عقدونا .. خلونا غصب نفترق ونقول احنا من اهني واحنا من اهناك

موضوع جميل وطولت عليك

تحياتي

Eng_Q8 said...

صبا

الله يسلمج
وشكرا

-----------------------------------

Smile

كلام صحيح 100% وانا معاج


-----------------------------------

Q8i_Blogger


شكرا على المرور الاول

وصح انا صرت منهم لما رديت عليه بس بط بدي شسوي ووالله ماكان قصدي

وبالنسبه لليبراليين والدماء الزرقاء شوف بوستي الياي انشالله

وطول كثر ما تقدر لاني اتفيد من التعليقات :))

===================================

شكرا للجميع

S-Q8 said...

بالنسبه لي الواحد خل يفتخر بنفسه و شنو سوا قبل ما يفتخر باصله و يشوف حاله على غيره
و الوضع تبي الصج مادري شلون صاير! يعني ياما شفت ناس يقعدون يتكلمون و يخطبون طول الوقت عن مبدأ المساواة و ان ماكو فرق بين بدوي و حضري او سني و شيعي و وقت الصجية تلاقي العرج يحن و التفرقة مبدأهم.. و طبعا في ناس العكس بس للاسف مو وايد
والله مو رادنا لي ورا اللا هالسوالف البطالية اللي ماتييب اللا المشاكل و تهد المجتمع
يعطيك العافية على هالبوست..
بس ماقلت شنو طلبت من فرايديز؟

شقران said...

أخي العزيز مهندس كويتي

تحية طيبة لك ولجميع أصحاب الردود أعلاه

بداية استميحك عذرا على تأخري في الردود على مواضيعك الشيقة والحسّاسة لما تحتويه على جرأه في الطرح باسترسال ممتع والشكر موصول على طرح الموضوع

أنت تعلم ويعلم بعض الأخوة المدونين بإنني لسنت من هواة التقسيمات المجتمعية وهذا ما أردده دوما ولكن أرى نفسي أجر لها لتوضيح نقطة مبهمة أو اضافة جزئية معينة لعل تكون بها الاستفادة وانقشاع الغموض

وعليه

إن الاصول لاتعيب من يعرفها ولكن العيب أن نتفاخر تفاخر الجاهلية على الآخرين وننظر لهم نظرة دونيّـة وكأننا أتينا بما لم يأتي به الأوائلوا ، فكلنا سواسية أمام الله سبحانه وكلنا مواطنون لنا نفس الحقوق وعلينا نفس الواجبات

وأنك مشكورٌ والاخوة اصحاب الردود وضحّتم هذه النقطة فلا أزيد عليكم


لقد كنت بالامس ضيفا على مدونة العزيز العرزاله ولقد ذكرت نقطة سأوردها-واسمحلي على ذلك

المشكلة أن الطبقة السياسية(بجميع اطيافها) اصبحت متطرفة في مصالحها الى درجة انها تجاوزت مبادئها والشواهد كثيرة ولكن سأطرح لك مثال واحد.. صحيح أن هناك غض طرف من قبل النواب البدو على تجاوزات الوزراء البدو(حسبي الله عليك يالعرزالة لا احب هذه التقسيمات ولكنك تجبرنا على ذلك) ولكن هناك ايضا غض طرف حسب تداخل العلاقات العائلية مثل عملية تدوير الحميضي واللتي كانت محاولة للالتفات على اهم اداة رقابية (لاتقل لي هناك سابقة سعود الناصر..سأقول لك هناك فرق كبير بين الأمرين) فبعض النواب ممن يصفون انفسهم بحماة الدستور لم ينبسوا ببنت شفه حين حصل الامر الى أن تم الحديث عن استقالة الحميضي فبدؤا يتكلمون

"اذا فالعملية أكبر من استجواب بدوي الى بدوي كما قلت ولكنها أزمة طبقة سياسية(قبلية مذهبية عائلية) متعصبة الى حد تجاوز المبادئ..ثم نرجع ونتساءل كيف وصلت الامور الى هذا الحد..من الذي أوصل الطبقة السياسية الى هذا المستوى من التفكير السطحي..واعتقد انك تعلم الاجابة"

انتهى الاقتباس


أي أن البدوي لايستجوب الوزير البدوي ليس لأنه بدوي وإنما لأنه يخشى على مصلحته الانتخابية بفضل التداخل البدوي بين المناطق

كما أن الحضري لا يفزع للدستور لأن من عليه الشبهه هو ابن عائلة وحضري وتربطه المصالح الانتخابية والتجارية والنخبوية

إذاً إننا أمام جاهلية جديدة..جاهلية المصالح..جاهلية النخب..جاهلية الانتخابات..جاهلية الفرعيّات

عزيزي مهندس كويتي

أزمة التقسيمات الحاصلة حاليّا وبشكل فاجر كانت الدولة ترعاها وتدعمها على جميع الاصعدة وعلى سبيل المثال لا الحصر

أ-الانتخابات الفرعية

ب-الدوائر الخمس والعشرين

ج-عدم تكافؤ الفرص منذ الستينات

الخ

كما أن الطبقة السياسية أصبحت نخبوية ،وللأسف ليس نخبوية فكر وانما نخبوية في انتماءاتها ، فساعدة من حيث تدري أو لاتدري بدعم هذه التقسيمات الحاصلة وهذا بالضبط كان أحد العوامل الذي ساعد التنظيمات الدينية على التغلغل في المجتمعات القبلية ففي السابق كان ابن القبيلة بين نار نخبوية الانتماء وبين جماعات تتدعي الدين والدين منها براء، قد لايعجب كلامي بعض الاخوة المنتمين للتيّارات الدينية ولكنها حقيقة لايمكن تجاهلها ،نحن لانطعن في نيّات أحد ولكنها شواهد أمام الناظرين

فأصبح الدين على حسب هوى صاحبه ،وفتوى الطبطبائي باللجنة المالية لمجلس الأمة في موضوع القروض خير مثال على ذلك

أخي الفاضل اذا كنّا في السابق نعاني من هذه الأزمة فلا يجب أن ندع مجال للطبقة السياسيّة الحالية بأن تتمادى في تطرفها وفي مصالحها على حساب الكويت وعلى حسابنا

كما أود أن اورد جزئية ذكرتها الأخت العزيزة براقش
حينما ذكرت بأن فئة كبيرة منهم لديها أخطاء

أختي الفاضلة أنا اتفق معك جملة وتفصيلا فيما ذكرتي بأن فئة كبيرة أصبحت منقادة الى هذا المنوال ولكن يجب أن نحل المشكلة ولا ننتقدها النقد السلبي ، أي ننتقدها ونبحث في الاسباب وعواملها ومن رعاها ومن أهمل حلّها ومن ثم نضع الحلول المناسبة ونروّجها لتعم الفائدة ، بمعنى أن أوقد شمعه خير من أن العن الظلام

ففي النهاية هم كويتيين ويجب أن نصلح الأحوال ونجعلهم يعون أن الدولة هي الاساس وأن القانون وضع للجميع ويجب منع ممارسات من يستغل حاجات الناس


فلا يخفاكي يا اختي العزيزة أن استغلال الحاجات لعبة على وتره الحكومات المتلاحقة في بلدنا الحبيب وأنا هنا لا ابحث العذر لأحد وإنما اضع النقاط على الحروف حتى تتضح الصورة ونشخّص المرض بشكل صحيح حتى نعرف العلاج المناسب

ويبقى رأيك الذي احترمه كل الاحترام

وفي النهاية

اشكرك يا أخي العزيز مهندس كويتي على طرحك للموضوع وننتظر التكملة في القادم من الايام إن شاء الله

واعذرني على الاطالة



ولك مني خالص التحيّة القلبية

أخوك المحــــب/

شــقـــــران

Eng_Q8 said...

Ni3Na3aH

عدل وهذا الي راح اكتب عنه

نيويورك ستيك :))
واليكتريك
و3 فور اول حق الاباتايزر

Eng_Q8 said...

شقران

احييك على التعليق الاكثر من رائع ولن ازيد عليه

لانك كفيت ووفيت وعسى الله يكثر من امثالك وشكرا للمدح الجميل وهذي شهاده اعتز فيها

وانشالله البوست الجاي يعجبك

سكرا مره اخرى

فتى الجبل said...

وينك نبي موضوع يديد