هل يوجد اكثر من سالم ؟

سوري للانقطاع ولكنني كنت مشغول التفكير ... بموضوع اتمنى مشاركتي به

واتأسف على عدم تكملتي للموضوع السابق لكنني سوف اجزئه على فترات .. لكي لا تشعروا بالملل

سالم .. صديق لي منذ 7 سنوات او اكثر جمعتنا الصداقه في ايام الدراسه بالكليه .. كان سالم من محبي التيار الوطني ويؤمن بالحريه والديمقراطيه .. وقد فرقتنا السنين لانه ذهب للدراسه بالخارج لانه لم يكمل الدراسه هنا .. سالم .. عقليه متفتحه ..روح وطنيه .. نقابي من الدرجه الاولى .. وقد انجز سالم ما عجز عنه البعض بانتخابات الاتحاد هناك .. ومما يجب ذكره ان لقاءاتي معه كانت قليله ولكننا دائما حين نتقابل نتحدث عن موضوع واحد .. الا وهو الكويت

اتصل بي بعد ان دعوته لقراءت مدونتي وكان لي معه هذا اللقاء الذي شتت افكاري وجعلني اعيد ترتيب الافكار واليكم بعض مما دار بيننا

سالم: السلام عليكم

انا: هلا بالغالي عاش من شافك

سالم: عاشت ايامك يالغالي

انا: ها قولي شصاير قلت تبيني بموضوع

سالم: ابد ماكو شي بس خوش حجي بالبلوق

انا: السلم قولي في شي صار شي ترى من ذاك اليوم وانا افكر

سالم: لا والله ماكو شي

انا: وانا حسبالي في تجمع او في شي .. ونستني قلت صارت

سالم: لا ما صار شي .. انا هديت هالسوالف

انا: ليش يا معود اذا انت هديت هالسوالف منو عيل الي بيسويها

سالم: والله يا خوي انا اعتزلت زهقت خلاص انا الحين قاعد واقرى بهالكتب ومالي شغل بشي يااخي محد راضي يفهم شسوي

انا: ولييين شنو يعني صفيت بروحي ؟ عاد اخر واحد كنت اتوقعه يزهق انت

سالم: مو حسبي الله على ابليسك موضوع الهجره الي كتبته خلاني احن للديره .. صح كلامك مايصير نخليها لهم لا وهم قصيدة احمد مطر لا تهاجر تخليني اعيش بتانيب الضمير

انا: زيييين اثرت فيك يا معود ترى احنا نحتاج كل واحد هالايام لازم تصير وقفه لازم والحين دورنا بعد اذا ما وقفنا الوقفه الحين متى نوقفها

سالم: اي والله بس شتسوي .. يعني كل ماصار تجمع يتفركش .. صارت مره بين شباب وتفركشت وصارت بين مدونين وهم تفركشت محد صامل يا يبا وقت الصجيه محد يوقف .. وبعدين السالفه يبيلها تنظيم وتخطيط مو قص ولزق

انا: انا وياك بس منو الي بنجمعهم

سالم: والله في ناس وايد بس لازم الي يبدونها يكون هدفهم واحد ويدرون شنو بيواجهون ترى السالفه مو سهله لازم يعرفون انهم راح يحاربون من كل الجهات ويمكن ما تدري منو طقاقك .. انت حسبالك بيخلونك على راحتك ؟

انا: اخزه وانا قاعد ادخن

سالم: تدري يعني انك بتتحارب .. شوف الموضوع يبيله رجال ما يخافون ويكونون على قلب واحد وماتهم المظاهر والترزز الي يدورونه الشباب هالايام . لازم يكون الهدف اسمى من هالسوالف

انا: يالله شناطر سوها وانا اولهم وياك

سالم: لا تتوقع بهالسهوله بتصير لازم اتعرف منو الي معاك ومنو الي ضدك .. الشباب الي يبون هالوقفه هذي لازم يكونون شباب واعين ومتفتحين ويتقبلون الراي الاخر

وترى بقولك شي انها اذا صارت ترى بندش احنا بثوب ابيض محد ماسك علينا شي لا عندنا مناقصات ولا عندنا اراضي ولا شركات احنا بنكون شباب تهمهم مصلحة الوطن فقط لا غير

انا: اي والله صاج وهم لا تنسى الدعم هذا منين انييبه

سالم: السالفة الدعم هذي شيلها من مخك .. لان اولا الي يدعمك يبي يفرض رايه عليك مثل مكا صار للبعض تلقاه مثلا يكتب بمدونه واخر شي دش مكان وخلوه يكتب الي يبونه .. احنا ما نبي جذي مثل ما انت الحين قاعد تكتب رايك ومحد يحاسبك احنا نبي نكون جذي ما نبي احد يحركنا مثل الباجي

انا: اي عاد انا ديني ودين احد يحركني مااستحمل .. شتقول بعد الي المفروض يكونون وطنيين مجمعين ربعهم ولا عندهم شباب وهالاسلاميين مقزرينها على الشباب

سالم: عاد تصدق حزب الامه قالولي نبيك تمسك لجنة الشباب عندنا وانا رفضت .. حتى قالولي خل ربعك ينفعونك قاطينك ولا يدرون عنك ودازين عيالهم يدرسون بره ماجستير ودكتوراه عشان يقظبون من عقبهم وانت خلك جذيه.. والله تحز بالنفس هالسالفه بس الواحد شيقول هالديناصورات امسكوا واقعدوا وما يعطون مجال حق احد الا من ربعهم والمشكله ان الي يعطونهم مجال مو كفو .. هذا غير تغيير المواقف وقاموا يركضون ورا المصالح ... عن اذنك دقيقه

طبعا السلم كان معاي بالسياره وقالي ودني جريدة الوطن عشان بينزل اعلان

وانا واقف والا الحبيب مال الوطن ماني قايل اسمه الله يلوع جبده توه ياي وصافط السياره .. كان ودي انزل وادفنه او اتفل او ادعمه بس تعوذت من الشيطان ... وطول هالوقت انا قاعد افكر بالموضوع

سالم: سوري طولت عليك

انا: لا عادي .. توه الحبيب مر بغيت اسوي بلوه لما شفته

سالم: هاهاهاهاها ما يدري من واقف بره

انا: لو يدري جان صارت طق ههههههه وانا من صجي يايب حق هالجريده الفاشله

سالم: بعد الوالد الا الاعلان يكون بالوطن .. بس والله حراميه نص صفحه 950 دينار لا وداخليه بعد

انا: الله شهالحرمنه

سالم: هذا الشبل من ذاك الاسد

انا: بس انت قتلتني ياخي خليتني افكر بالموضوع واحس انه ماراح نتجمع

سالم: لا انشالله في شباب وايد مثلنا بس يبون من يبديها

انا: يالله خل نبديها

سالم :انطر شوي السالفه يبيلها طولت بال ودراسه

انا: تهقى في احد راح يوقف معانا

سالم: انشالله في شباب فيهم الخير بالديره

هالمناقشه هذي صارت بينا وكان في حجي وايد بس مااذكره كله واساسا انا كنت ساهي وعقلي بعيد

ولكن هنا نقف

هل ممكن يكون هناك تجمع شبابي من خيره شباب الكويت يجتمعون لهدف واحد الا وهو مصلحة الكويت؟

هل ممكن يأتي هذا اليوم الذي نرى فيه هؤلاء الشباب من جميع اطياف المجتمع ليقولوا لا للفساد؟

هل ممكن ان يتحد الشباب ويكونوا قوة ويصوتون لمن يستحق بالانتخابات بعيدا عن التعصب القبلي او الحزبي او الطائفي؟

هو حلم .. واتمنى ان يتحقق ..وكما قال سالم توني تذكرت شقال اذا لم نصبح شمعه تحترق للاخرين سوف تاتي الاجيال الي بعدنا وتؤنبنا على سكوتنا صح كلامه باجر عيالنا بيسئلونا شسويتوا ؟؟ شراح تبرر له سكوتك ؟؟؟ بتقوله ما سوينه شي؟؟ صعبه يا جماعه كلمه قويه .... ف لازم يجتمع الجميع شيعه سنه حضر بدو شباب بنات .. كل من يحب هذه الارض الطيبه ويخاف على مصلحتها ويبديها على مصلحة .. لكل من اراد العيشه الرغيده لابناءه .. لكل من يعيش بشرف وامانه ..

ممكن البعض يقوله علامه هذا ين ؟؟؟ اشفيه قلب كاسترو ؟؟

راح اقوله ما ينيت وكاسترو مو احسن منكم .. نحن من سوف نصنع المسقبل المشرق لهذه الارض نحن من سنقف بوجه الحرامي والمرتشي والمتلاعب بالدوله ونقول لا ... يا جماعه ترى الدوله بشعبها مو بحكومتها

الشعب اهو الي يقرر ولازم تكون هناك وقفه جاده للاصلاح

ادري طولت بالحجي وعدته يمكن كذا مره بس من حر مافيني والله

ابي الصراحه اهي بتصير والا لا ؟؟ واذا صارت راح يكون فيها رجال قد المسئوليه والا لا ؟؟

حلم اتمنى انه يتحقق .. بس هل فيه اكثر من سالم ؟؟؟؟؟

اللهم لا اعتراض