Friday, December 14, 2007

الكويت اليوم + ندوة الديين

اسف لهذا الانقطاع اللاارادي
هناك مواضيع كثيره جدا جدا منها ما حدث بالصحف ومنها ما حدث لي شخصيا مع الاصدقاء ولكن بصراحه شدني http://kuwait-blog.blogspot.com/2007/12/blog-post_13.htmlموضوع الاخت براقش
ويحمل نفس العنوان الذي يحمل موضوعي الآن امون عليها المنصوره :)) وقد ذكرت اختي العزيزه بعض النقاط بنهاية موضوعها وهذا ما جعلني اكتب هذا الموضوع
هذيل يهمهم التغيير ؟؟؟ هذيل يقرون ؟؟؟ هذيل جيل الغد وين سالم ؟؟ نربي صغار والا كبار والا نلاحق شعب وحكومه
كلمات عورت قلبي بصراحه وانا اقراها وانا كنت اقولها وانا قاعد اطالع بوستها واخر شي اكتبتها
هل صحيح ان الشعب اصبح تافه لهذه الدرجه ؟؟ هل صحيح ان الشباب ما يهمهم الا وناستهم هل صحيح ان الشعب يركض وراء مصالحه هل صحيح ان الحكومه لا تنوي الاصلاح ؟؟؟
يا اختي العزيزه براقش بقولج ان لو خليت خربت
نعم هناك مشاكل نعم هناك تخلف نعم هناك بلاوي مسيحه ولكن الى متى ؟؟
لابد ان يأتي اليوم الذي تتغير فيه هذه المهازل
وبزيدج من الشعر بيت في شباب ما يدرون وين الله قاطهم لو تسولفين معاهم عن غلاء الاسعار بيتوهقون وجنج تتكلمين صيني ؟؟؟؟
في اعضاء ما يدرون انهم اعضاء مع الخيل يا شقرا وقاعدين يمشون مصالحهم
في وزرا مايعرفون الف باء الوزاره وممكن يكون رئيس قسم هذي انجازاته بالحياة وصار وزير .. يمين يمين يسار يسار
في ناس يعتبرون شعب الكويت ولا يدينون بالولاء لهذه الارض الطيبه
في شباب غرتهم الدنيا وصاروا ....... تحت المتنفذين
في وطنيين ماادري اشلون وطنيين واهم قاعدين يبجون على الماضي الأليم
ولكن هل نستسلم ونخلي القرعى ترعى ؟؟
دام في شباب يخافون على مصلحة الديره اكيد في امل انتي وسالم وكل المدونات الي تخاف على مصلحة الديره هؤلاء من سيصنع التغيير ... اضعف الايمان انهم ينصحون ويوعون الي حولهم
كل شي بدا صغير وكبر وانشالله حلمنا بيكبر
المهم ان لحد يفقد الأمل
------------------------------------------------------------------------------------------------
رحت قبل جم يوم الندوة الي سواها المنبر بديوان عبدالله النيباري وكان يحاضر فيها الاستاذ احمد الديين
طبعا رحت مع اني مقاطع الندوات السياسيه بصراحه بس انا وسالم قلنا بنشوف التيار الوطني الي يسمى وطني شقاعد يفكر فيه
للاسف ما وصلت امبجر وصلت لما عبدالله النيباري كان يعقب على الديين
المهم النيباري ذكر ان يبي الاعلام والصحفيين والاعضاء يوقفون معاهم ؟؟؟؟ انزين وين الشباب مو تارسين عينك؟؟؟
طبعا نسيت اقول ان الندوه كان فيها تقريبا 20 ما عديتهم بس يعني فاضيه والشباب ينعدون على الاصابع ومعروفين منو اهم حملة الرايه من بعدهم :))) الناس مخلصه الموضوع
الي شدني وخلا كشرتي من هني لي اهني اهو مداخلة ليلى العثمان .. لما قالت لهم ليش ما تهتمون بالشباب وشهالندوره الي يمكن اي واحد يسوي ندوه يترسها وانا اقولها مو ندوه انا لو اسوي دورة كوت اييب عشر اضعافهم المهم طبعا الردود كانت معروفه كلن يبجي على ليلاه بدون ذكر اسامي واحد قال احنا محاربين وصكروا نادي الاستقلال يالحبيب نادي الاستقلال صكروا من سنة الطفحه ولي الحين تتكلم عنه ؟؟ وبعدين محاربين من منو ؟؟؟ انتوا شنو صرتوا اساسا عشان تتحاربون وهم واحد ثاني نفس الطريقه يعني الجماعه عايشين بجراح الماضي
تبون الصراحه تحسفت اني رحت يعني لي متى هالحجي الفاضي الي ما يوكل خبز والله بغيت اتكلم بس لو متكلم جان قلبتهم فوق حدر بس ليلى العثمان ما قصرت فيهم
الاستفاده الوحيده الي جنيتها لما كلمت ليلى العثمان وكلمت بو فهد الاستاذ احمد الديين وماني قايل شقلت لهم ولاني قايل شقالولي هذا بخليه حق بعدين
بس ياجماعه هذيل وطنيينكم زين وصلت متأخر انا بس عقب رحت ويا سالم ستاربكس وانتحلطم على اللي صاير
اللهم لا اعترااااااض

19 comments:

على نفسها جنت براقش said...

شوف لا تخلينى انفجر عليهم
القناطر الخيريه

هذيل النيبارى و ربعه يبون مصلحتهم و بس قد تكون بداياتهم بالماضى السحيق كانت صح و لكن الحين يلعلعون لمصالحهم
اعرف شباب كانوا معاهم مفاتيح لهم و تركوهم
لا تقول لى اللى يحب الديرة يتنازل حق من هم احسن منه
النيبارى و ابو الفحم و غيرهم حضارات سادت و الحين بادت
الكويت تبى جيل واعى يحب يقرأ يفكر بالاساسيات اللى تضمن له عيشه كريمه مو ماخذ قرض علشان يجهز بيت و صالات ما راح يستخدمها
و ناس تشترى لمجرد الشراء
كبتات تنفجر
و يا ريت اكو مكتبه سنعه
كتب طبخ و سخافات
النيبارى الله يعافى المجلس صار عنده بيتين بالضاحيه
لو يبى الاصلاح صج كان بدأ بنفسهو على الاقل سوا له مكان او نادى للتعليم و التثقيف و غيره وايد
ما انسى صدمة الهارون و النيبارى بدائرتهم لما فاز الغانم و المطير
العبوها صح بس محد راح ينتخبهم مرة ثانيه وجودهم مثل عدمه للشعب بس يركضون وراء مصالحهم

--------------------
نبي شباب تهمهم الكويت و شعبها
يفهمون يعرفون يواكبون التطور و يفكونا من شعب فرعون
و عقلياتهم
بريد صادر و وارد
كتب رسميه الى مالا نهايه و احنا بعصر النت

بس ابى مكان امن حق عيالى و عيالك مثل ما احنا ربينا
عمرنا ما قفلنا باب البيت و المفاتيح على السيارات
الحين تخاف تنام بروحك بالبيت
حتى شباب اول عندهم غاريه و احترام
الحين يدرى انى اخت رفيجه و يتحرش
بس
خلاص
الى متى
اكره اطلع و اشوف هالهيلق اللى تارسين الديره
اشوفهم و انا اللى استحى جنى مسويه الغلط

عيب علينا لما عقولهم تكون فاضيه جمله ارتجاليه وحدة على بعض ما يعرفون يقولونها

بس تعبت و نرفزت
اسفه انى طولت عليك
سينا
:)

Eng_Q8 said...

ما عليه ما عليه ماكو شي يبقى على ما هو عليه

لا تتنرفزين كل شي بيتصلح بس قولي انشالله

دام الامل موجود لابد يوم تعود ايام التفاريج

المنصوره :))

5roofa said...

تبي الصج

ما اقص عليك بس انا ما كنت اعرف شي بالسياسه
والله كانو اهلي لمه يسولفون اتافف و انحاش من المكان
و حتى لمه بلشت بالبلوق ما كنت افكر اني اتناقش بشي سياسي
بس ما اقص عليك لمه انت نزلت بوست الي عن سالم مادري شنو صار فيني

حسيت نفسي تافه
انه ماعندي سالفه الشي له علاقه بديرتي

يعني اتحجه و اقول اني احب الكويت وانا ابسط شي اني ادافع عنها و احاول مو قاعده اسوي

والله يومها رحت طلعت شريط لنا و احنا صغار عقب التحرير

شلون كل واحد فينا ماسك علم الكويت و نغنيي و نحي الامريكان

معنه فترت الغزو كنه بره الديره و ردينه على التحرير بس امبي شعور للحين احسه

انشالله الديره بتعدل
بس يبلينا شوي ايمان

و الدنيه بخير مثل ما تغيرت نظرتي 180 درجه و حسيت اني مقصره بي يوم في ناس بتحس و بتكلم و بتوقف معاك و مع سالم انشالله

sorry 3ala el 6wala


salamz friend...

Eng_Q8 said...

5roofa

شهاده اعتز فيها يا اختي الابله :))


وبصراحه ونستيني صج حسيت ان الي اكتبه اييب نتيجه بارك الله فيج

وشكرا على المؤازره

اخذي راحتج المدونه مدونتج مدونه كل محب للوطن

DiLLi O MiLLi said...

أشقلت لأحمد الديين وليلى العثمان ؟
وشقالولك ؟
:)

لو خليت خربت
ما هي خُربت يا عزيزي .. تبي أكثر من جذيه !!؟؟

شوف أخي العزيز
أنا ماني من المتشائمين
بس الجماعة ما خلوا شي نتفائل فيه
متنا .. كل يوم الوضع يسوء بالبلد
نواب لالا هامتهم الديرة ولا الشعب
يبون كرسي الأمه لمصالحهم الشخصية
خلوا الشعب مُدمن مِنح .. علاوة .. مكافأه .. زيادة معاش .. وأسقاط قروض
حوولوووهم لشعب مادي ما تهمه ألا الفلوس
والديرة قاعدة تغرق بالفساد من رشاوي وأختلاسات وكسر القوانين .. لا حسيب ولا رقيب !!!؟

حســـافة عليــــج يـــا كويـــت



ويـا قلبـــي لا تحـــزن

على نفسها جنت براقش said...

صباح الخير
:)

المقطم
سورى امس كنت جداً منرفزه من الاوضاع
اليوم طخيت شوى بفكر بموضوعيه
لازم ننقذ ما يمكن انقاذه

Eng_Q8 said...

DiLLi O MiLLi

ماراح اقولج :))

كل الي قلتيه صح وانشالله كل شي يتعدل

شوفي اختي ترى الشر يعم والخير يخص ترى اهل الكويت فيهم خير والي قاعدين انشوفه من بلاوي الي يسونها العفن ولازم انشيل العفن من هالديره
ترى الناس شايفه وساكته لكن السكوت لن يطول صدقيني

-----------------------------------

براقش

صباح النور

عادي عادي
وحلوه موضوعيه ... كل شي بيصير بس الصبر الصبر يا يبا

الصعيد

===================================

Salah said...

الله يعين

بس الشباب هم ينلامون بعد

شوف شنو تفكيرهم في انتخابات الجامعة؟

لو يبون يقدرون يغيرون

بس ماعندهم وقت لان القز ماخذ كل وقتهم

تحياتي

Eng_Q8 said...

Salah

الجامعه غير وارض الواقع غير وانشالله راح تكون هناك وقفه يا بوصلوح


وشكرا للمرور الاول وانشالله مايكون الاخير

سدرة العشـــاق said...

يعطيك العافية و الكويت مازالت بخير دام فيها مثلك و شرواك بس الله يزيدنا

الكويت تستاهل من يحرق قلبه و روحه عشانها

Eng_Q8 said...

سدره العشاق

الله يعافيج وشرواج الطيب

اي والله الكويت تستاهل

حمد said...

عزيزي Eng_q8

تحية لك ..

كتبت تعليقا مطولا حول انطباعك الذي تفضلت به عن الندوة بمدونتي من اجل توضيح بعض الامور الهامة ربما لاثراء النقاش .

بالنسبة لما تفضلت به الزميلة على نفسها جنت براقش فأبين بأن ديوان النيباري ليس ملكا له وانما هو مؤجر , والنيباري ليس له سوى بيتا واحدا .

تحياتي لك اخي العزيز .

Eng_Q8 said...

حمد

Ok bro

Selezya said...

موجوده .. توني منزله بوست .. اسمحلي هاليومين النت وياي لك عليه شوي

Eng_Q8 said...

سيليزيا

لا عادي :)

فتى الجبل said...

آنا معاك باللي قلته عن الناس اللي تتحلطم على الماضي بدون ما تستفيد منه

Eng_Q8 said...

فتى الجبل


شي مو غريب انك معاي :))

Selezya said...

We have 2 change

Eng_Q8 said...

Selezya

we have 2 enshalla