العوضي ستار

1

كلمة حق تقال الى شيخ الكتاب محمد مساعد الصالح على اثارة موضوع مشاري الذي تحدثنا عنه مسبقا واقوله هذي مو غريبه عليك يا بو طلال

والشيء بالشيء يذكر ام الولد اطلعت بالجريده قبل جم يوم تناشد وزير الداخيه التدخل لحل الاعتداء الجائر عليهم

ولكن لا حيـــــاة لمـــن تنــــــادي

الله يكون بعونج و ما نستطيع فعله هو اثارة الموضوع لعل وعسى ان نلاقي اذانا صاغيه

---------------------------------------

2

ادري طولت عليكم ... وادري فقدتوني :q ولكن كنت امر بظروف قاهره بداية بالمقابر والعروس والغبار والمرض وقطعة الكيبل .... فكل شي ترتب على بعض وخلاني اغيب هالغيبه ... وانشالله ما تتكرر وعسى الله ما يحرمكم من بوستاتي القصيره والي ما تضيق الخلق

الشهر الي طاف كان شهر حافل بصراحه ... حيث اني صرت من رواد المقابر ... مايمر اسبوع الا ورايح المقبره مرتين ثلاث ... عسى الل يرحمهم برحمته ... ومن كثر ما كنت اروح تخيلوا البواب الي بمقبرة صليبيخات يقولي انزل اشرب شاي ؟؟؟؟؟ شاي بمقبره ..... ما بقى الا حارس مقبرة الرقه او صبحان حاليا انه يقولي خل انقز اليوم ؟؟؟؟

على قولة الوالده يما اشفيك اسم الله عليك انت تشتغل حفار قبور ؟؟؟ اي والله صاجه الوالده العصر حفار قبور وبالليل ملاج ...

المهم ما علينا من كل هالحجي ..

انا لاحظت شغله ... ملاحظها من زمان بس هالمره اثارت انتباهي مع انها لافته انتباهي من زمان ... ليش مقبرة صليبيخات اكشخ من مقبرة صبحان ؟؟؟؟؟

على هونكم لا تستعيلون ... ادري انهم مقابر بس لحظه .... اوكي مقبرة صليبيخات اكبر لان اغلب الكويتيين يندفنون اهناك وهم فيها مقبرة الشيوخ والشهداء ... كل هذا ماخذينه بالحسبه

لكن ليش في شاشات الكترونيه بمقبرة الصليبيخات .. وبمقبرة صبحان حاطين بوردات بيض جنهم مالت اولى ابتدائي ومو حاطين قلم ؟؟؟؟؟؟؟؟؟

يعني الواحد اشدراه وين يصف ؟؟؟؟؟ اشدراه وين يروح

انا صارت فيني تخيلوا اللوحات مو مكتوب فيها شي لان ماكو احد يكتب ولا في قلم ... والناس مايدرون وين يوقفون وقعدنا بالمقبره لي صلاة المغرب ... وترى مو مره وحده بس مرتين ... ليش ما يحطون لها لوحات مثل الصليبيخات ؟؟؟ دريينا انهم تبرعات ... انزين تبرعوا حق صبحان ؟؟؟؟؟؟ والا هالميتين احسن من هالميتين ؟؟؟؟ ميتين بعد اتفرقون بينهم لاحول ولا قوة الا بالله .... وصية اذا مت ادفنوني بصبحان عنااااد مابي صليبيخات ... اسم الله علي وبعد عمر طويل

-------------------------------

3

امس وانا قاعد احوس بين القنوات لاني فاقد التلفزيون من زمان ما شفته ... والا منو ؟؟؟؟؟ ما يبيله نبيل العوضي كل ما اطالع التلفزيون يطلعلي .... المهم الحبيب كالعاده يصرخ ويقول شنو هالكفر ماادري شنو ؟؟؟ انا قلت مفجرين مسيد والا الحبيب يتكلم عن ستار اكاديمي .... والله العظيم قاعد يقول اشياء بالتفصييييل ؟؟؟ اشدرااااااااااااااااااه سؤال يطرح نفسه

يا شيخ يا فاضل اشدراك بالتفاصيل ؟؟؟؟ من كثر ما تكلم خلا الفضول يشتغل عندي وخلاني اطالعه ... لا ويدري ان في وحده عمرها 16 سنه ؟؟؟؟ اذا انا ماادري انت شدراك ؟؟؟؟؟ خلاني اشوفه غصب .... لا ويتكلم عن سوالفهم اشدراك شسولفوا فيه ؟؟؟؟ واخر شي يقول ما عندهم اخلاق واهلهم مو مربينهم ومن هالسوالف ....

مع تحفظي على ستار اكاديمي لاني اعتقد ان هالبرنامج ماله داعي ويخالف العادات والتقاليد ... ولكن تعال قولي يا شيخ نبيل العوضي

هل من الاخلاق انت تشتغل عند حرامي ؟؟؟؟

هل من الاخلاق ان الواحد ياكل مال حرام ؟؟؟

هل من الاخلاق يا حضرة الشيخ الجليل انك تاخذ فلوس من واحد باق الديرة ؟؟؟

هل من الاخلاق انك تسكت عن الحق وتقعد تمدحه بالتلفزيون ؟؟؟؟

هل من الاخلاق انك ادافع عن فئه بالمجتمع لمجرد انك كنت منهم ؟؟؟

هل من الاخلاق انك تتهم الناس ولا تتهم المسئول عن الاخطاء ؟؟؟

هل من الاخلاق انك تطعن في شرف العوائل لمجرد ان ولدهم راح ستار اكاديمي ؟؟؟

هل من الاخلاق انك تساند الي باق الديره ؟؟؟؟؟؟؟؟؟؟؟؟؟

اساله تحتاج الى اجابه .... انا لا ألوم المغنين او الممثلين ... انا الومك ايها المتشدق بالدين يا من تدعوا الفضيله يامن تدعوا الى الاخلاق ... اجبني على هذه الاسئله ... كيف لك ان تفعل هذا وتطعن في اخلاق الاخرين ... وايم الله اني لافضل المشارك بستار اكاديمي عليك ... هل تعرف لماذا لانه لا ينافق ... لا يتحدث بشيء وهو لا يعمل به ... صدق من قال باب النجار مخلع ... نصيحه اوجهها اليك انظر الى نفسك وما تفعله .... ترى الفلوس الي تاخذها ينبطق عليها المثل اخذ من جيسه وعايده ... فاعد النظر بما تفعل .... انصحك لوجه الله ابتعد عنهم فان ما تفعله لا يرضى به لا الله ولا رسوله ... اتق الله في نفسك

ابي اقولك سالفه يا شيخ يا فاضل صارت حقي انا المواطن البسيط الفقير الى الله وهالسالفه بس حق نبيل لحد يقرا

شوف يا عزيزي قبل اسبوعين تقريبا كنت رايح جمعية الشاميه اشتري زقاير... والا عند الباب كان في واحد ومعاه مصور ... ياني جان يقولي ابي اسوي معاك مقابله ... قلتله انتوا اي قناة قالي الوطن ... قلتله اسف اخوي اسمحلي مااسوي مقابلة مع الوطن ... ومشيت جان يناديني قالي اخوي ليش اشفيك احنا ناخذ ونعطي ... قلتله اولا انت مو كويتي عشان تفهم انا ليش قلت جذي وماخلاني اكمل جان يقولي ليش لازم اكون كويتي عشان افهم ... قلتله حبيبي من الاخر انا مااطلع بقناة حراميه ... صكته البوهه وقالي ليش ومنو قال ... قلتله عفوا اخوي عشان جذي قلتلك انك مو كويتي ولا راح تفهم وانا لا يمكن اشارك بشي ادري انه غلط روح شوفلك احد غيري ... ولو مكملها معاي او علا صوته جان لسبته بالعقال

فما بالك وانت شيخ دين والناس تسمعلك وحالتك حاله وحافظ القرآن ... اخذ العبره يا نبيل العوضي فالله يعرف مافي القلوب وسيحاسبك على مشاركتك لهذه القناة ... وعلى الفلوس الحرام الي تاخذها منه

اللهم اني قد بلغت اللهم فاشهد

------------------------------

4

اليوم في برنامج الدوانيه الي يحطونه مرينا اف ام ... قالوا المناطق الخارجيه فيها تقحيص وناس يطوفون اشاره حمره

سؤال انتوا يا حلوين يالي طايحليله ظغاط بخلق الله وماشفتوا روحكم احنا ناقصينكم ؟؟؟؟ اشلون وانتوا في جهاز اعلامي اتقسمون الديره مناطق خارجيه وداخليه وعلى اي اساس ؟؟؟؟؟؟؟

يعني احنا عيال بطنها .... خلوني ساكت احسن .... اقول ترى عيب هالحجي مو انتوا الي اتقسمون الديره ولا غيركم

الكويت وحده وماكو داخليه وخارجيه .... استريحوا احسن ... وبدال هالسوالف قللوا من الملاقه وقولوا شي ينفع المجتمع ولا تثيرون التقسيمات البغضاء ... مو ناقصنا الا انتوا بعد .. سوو رجيم احسن

--------------------------

اللهم لا اعتراض