Sunday, April 6, 2008

صارت غصب

تحديث
.
العموم انشغل بالفرعيات ونسوا شرايين الاصوات موضوع عجبني عندي زميلتي العزيزه الكويت .. وللاسف ان هالاعضاء يعتبرون من المدافعين عن المال العام واثنينهم ينزلون بدائره وحده طبعا في ناس تدري عن خياسهم وناس منغرين فيهم ... وبوست الزميله كويت يوضح اشلون انهم قاموا يلعبون على المكشوف ... والسؤال المطروح هالاثنين منو يكلمهم ؟؟؟؟ طبعا الاول ابو الجناط ما عليه شرهه بس انا مركز على هالاثنين
.
... راح نقرا بالجرايد نتايج الفرعيات لا وبالارقام ... سؤال طرى على بالي منو الي يودي نتايج الفرعيات حق الجرايد ؟؟؟ ووزير الداخليه يقول رحت وما شفت فرعيات ... انزين يا وزير الداخليه النتايج بالارقام توصل الجرايد صيدوا الي موديها وراح اتعرفون وين واشلون سووا الانتخابات
.
اهم شي انه تحديث لو مسوي بوست يديد احسن لي ... على العموم سمعت ان صاكه بين المرشحين الي نازلين بالفرعيه وعساها دوم صاكه بينهم حط حيلهم بينهم وخلوا الديره تتطور حسبي الله عليكم
.
رقم بهديه حق حبيبي وصديقي فريج سعود والى زميلتي الغاليه بس 1\1 لوووووووووووووووووووول




الناس خلصوا فرعياتهم ووزير الداخليه يصرح ويقول
الخالد لـ «الراي»: تجولت بسيارتي في «الخامسة» ولم ألحظ مظاهر «فرعيات


الناس متجمعه من صباح الله خير وماكو دوانيه مو مفتوحه سواء للتمويه او للانتخاب هذا الي قريناه بالجرايد ... يعني في دواوين تفتح الضحى ولنفرض في اغلب هالدواوين ما يتواجدون فيها الناس الا عقب صلاة العشا او المغرب اشلون ما شفت المظاهر ؟؟ يا شيخ النتايج بالارقام موجوده بالجرايد اشلون وصلت ؟


والحبايب وصل فيهم التسيب وكسر القوانين لدرجة ان واحد رافع كلاش بويه رائد بالداخليه ؟؟؟؟؟ لا واحب اقول حق وزير الداخليه اقرى اليوم منو مشارك بالفرعيات ضباط كبار ومستشارين اذا ما تدري اقرى الجرايد ترى فيها اخبار الفرعيات واشلون توصل الله اعلم


الى متى والقوانين تتكسر امامنا الى متى تأتي الشخصيات المتنفذه(ضباط مشاركين على حسب ما قرأناه) لتسمح بما هو ممنوع اساسا ... الم يحن الوقت لتطبيق القوانين الم يحن الوقت لفرض هيبة القانون ؟؟؟ بالنظر للفرعيات هناك اكثر من 16 الف صوتوا صوتوا بفرعية العجمان لا واليوم فرعيات ثانيه على حسب ما قرانا يعني راح يطقون فوق ال50 الف


لا حول الله ... 50 الف شخص لا تهمه القوانين ولا يهابه ... طبعا 50 الف ترى انا وايد منزل بالعدد واذا بنحسب راح نوصل لي فوق ال 200 الف ... لا وهذاك طالعلي بسلاح .... وهم صار اطلاق نار باجتماع قبيله من القبائل ... حشى عايشين بكفر الشيخ مو الكويت ... العموم ماسكله طبنجه حلوه طبنجه اعجبتني :) ويتمشى فيها


والله ماادري شقول الوضع بروحه يتكلم ... ويقولون الاصوات وصلت 1500 دينار والشرايه قاعدين بالقهاوي وواحد فتحله قناة ماادري ليش واهو يوزع جناط وواحد مغازلجي وواحد مطيرجي وواحد ربى اللحيه وتيارات اسلاميه اتشارك بالفرعيات بالله هذيل مرشحين .... مااقول الا شكلي شهر 5 بسافر عشان لا اعور قلبي سلامة قلبي


اللهم لا اعتــــــــــــــــــــــــــــراض

41 comments:

Unknown said...

مهندسنا


وتظل الكويت جميلة :)

والياي أفضل

Eng_Q8 said...

بس


الله يسمع منج

Eng_Q8 said...

نسيت ارد على اول واحد

Zololkis

مابي شكلك مدزوز من مرشح الغفله :p

وردة حب said...

صاااااااااااااااج

بس اهي حرية وكل واحد عقلة براسة ويعرف خلاصة

خلصنا من الطائفية يونا القبلية والله يستر من هالفتن

Eng_Q8 said...

ورده

لا مو حريه

Shaima'a Alkandari said...

يبه سافر وفك عمرك

لان صج الحين صار كل شي خربووطه

Hamad Alderbas said...

ويـــن بتـــروح

Anonymous said...

allaah yslmk :p

Eng_Q8 said...

شيما

اي والله

---------------------------------

حمد

اي مكااان بس خل نطلع

----------------------------------

Eng_Q8 said...

سلوزه

نعيما

Mohammad Al-Yousifi said...

سؤال

البلوج ما ينفع نسوي فيه فرعيات و نأجرها عليهم؟

Salah said...

يعني ما كو خالد العدوة المجلس القادم؟

Hamad Alderbas said...

يمدحون السياحه بأبها

مافيها منكر

:)

Kuwait said...

ياكثر ما يتكلم وزير الداخليه على الماميش ...
خل يتحرك يسوي شي ..
تجولت بسيارتي ..
يبا تجول بعيونك ...
كل شي واضح مثل الشمس ..
سلامت قلبك مهندسنا ..
واايد أشياء تعور القلب هاليومين ..
تقبل مروري..
kuwait

rai said...

سافر احسلك اهم شي صحتك بالدنيا :)

واذا تبي اخاويك ماعندي مانع :)

5roofa said...

:/
امبي عقب كل هاللوية و الطق و هم صار؟؟

salamz dear...

Anonymous said...

انا ادعو للتفاؤل

لكنني لا ألوم المتشائمين

ارشح لك الصومال .. يقولك خووش شواطئ
كلها قراصنة :)

حياتي هدف مو عبث said...

1500 ؟؟

أنا اللي أعرفه 1000


يمكن عشان الـ 120

Eng_Q8 said...

مطقوق

خوش فكره :)

----------------------------------

صلاح

الحمدلله ماكو ... بس يقولون ويا كثر من يقولون انه بينزل غصب والله اعلم

----------------------------------

حمد

جزاك الله خير :p

وفيها تلفريك بعد :)

انا اقول انروح سيشيل اشرايك

----------------------------------

كويت

الحين صاد جم واحد خل انشوف شيصير فيهم

الله يسلمج :)

----------------------------------

بو علوه

اخاويك ؟؟؟ شكلك داش بفرعيه :p

حياك بس مثل ما قال حمد انسافر مكان مافيه منكر جزاك الله خير .... طالع اقول حق منو لووووووووووووووول

----------------------------------

خروفه

شحسبالج عيل ... من امن العقوبه اساء الادب وانا اخوج

---------------------------------

محسد

اي والله لا تلومني :)

شكلك تبي الفكه مني :))

بس اذا صادوني بقولهم انك راح تدفع الفديه :))

----------------------------------

حياتي هدف

يمكن :)

الفين ها بياعه :p

----------------------------------

Anonymous said...

بربس

rai said...

ضحكتني يا التعبان :)
لاتخاف انت امش وياي ولن تكون النار مصيرك :)

عموما يقال
من تعلم لغة قوم امن مكرهم
اليوم اخاويك
وباجر عاوز اسافر معاك
ويمكن حتى
تبيني اروه معاج
خو الكويت صارت
آردو باد كرو :)

Eng_Q8 said...

حمود

حده بربس

----------------------------------

بو علوه

انشالله يا اخي بالله

لوووووووووووووووول

اي والله صاج

-----------------------------------

someone_q8 said...

السلام عليكم
اخوي البشمهندس , هذا اللي ظاهر وما خفي كان اعظم , يقولك الصوت في الدائرة الثانية وصل 4000 لا وهذا النائب معروووووووووووف
هم ارد واقول للمليون : العيب فينا احنا

Kuwait said...

مهندسنا ..
شهاده أعتز فيها ثناءك على الموضوع ومرورك مدونتي المتواضعه ..
والمدونه وما فيها تحت أمرك ;)
تقبل مروري ..
kuwait

darkness said...

الله كريم يا اخوي

بس 4000 للصوت ؟؟؟؟؟؟

منو؟

علموني

:(

wa6an-alnhar said...

مهندسنا

وينه عنك ؟ لازم ايي يبوس خشمك
:p

Eng_Q8 said...

انسان كويتي

ادري :(

صحيح

----------------------------------

كويت

تستاهلين

----------------------------------

جارة القمر

اكثر من جذي توضيح ؟

---------------------------------

وطن


عيل شوفي بوستي الياي :)

----------------------------------

Q8Sky said...

الحكومه خايف ولا موخايفه بتطبق ولا مو مطبقه .. احترنا

Eng_Q8 said...

كويت سكاي

سؤال صعب

Selezya said...

أنا اللي قلتلك عنه وصاني اييبله اصوات ويشتريهم

صراحه وافقت .. سعره حلو

عاد قلت اقولك .. ممكن صوتك حقه؟

good offer ;)

:pPp
مادري ليش احس بتكفخني

loco said...

ma95ara esawoon ente5abat 3endhom ebro7hom hathola!!!!!!

Eng_Q8 said...

سلوزه

جم :p

Eng_Q8 said...

loco

صح النوم :)

فريج سعود said...

تعال يبا شسالفة 1/1
احنا عطيناكم 2/0
وليفربول وارسنال تعادلوا والفائز راح يبارينا ان شاء الله
بس انتوا شكو بالسالفة
اعتقد باجر بتقرّض اضافرك باسنانك
نصيحتي لك البس دس
واخذ حبة بروزاك

شقران said...

مهندسنا العزيز

كيف الحال...وهم أقولك لاتعصب :)

بالنسبة لموضوع الأخت العزيزة كويت

فلقد قرأته بالأمس..وهالني كم الوقاحة والجرأة في شراء ذمم الناس!!؟؟

ويبدو لي من موضوعك اليوم إن الصورة اتضحت عن من هو وراء هذه الرشوة

ولكن

لابد من التأكد حتى لاترمى التهم..وأعرف أنك من الناس الذين لايرمون الكلام على عواهنه..لذلك سوف تتضح الصورة أكثر خلال الأيام القادمة


وبالنسبة للذي رفع السلاح بوجه ضابط المباحث...فهذه مهزلة ويجب أن يردع بالقانون ليكون عبرة لغيره

خصوصا وأن مرسوم تشديد العقوبة على المعتدين على رجال الداخلية صدر بالأمس..وقد حول الاعتداء على رجال الداخلية من جنحة الى جناية

ونتمنى أن يعطي هذا المرسوم الشباب في وزارة الداخلية دافعا في عملهم لخدمة البلد


أما الفرعيات...فصدقني ياعزيزي المهندس أن محاربتها لن تتم بالقانون وحدة!!؟

فهي (أي الفرعيات) أصبحت ثقافة متأصلة منذ أكثر من ربع قرن ولها أسبابها الكامنة والظاهرة

ولن تختفي بين ليلة وضحاها

وأزيدك من الشعر بيت
المنظمين للفرعيات لن يسري بحقهم أي عقوبة لسببين

الأول
وهو أن جميع الديوانيات التي جرت بها الفرعيات لم يكن بها لاصناديق اقتراع ولا أوراق انتخابية وإنما تمت العملية عبر الهواتف النقالة!!؟؟


والسبب الثاني
دستوري قانوني حسب مانشر في الصحف وماسمعته من احد أهل القانون

فمرسوم الدعوة للانتخاب لم ينشر بعد مما يعتبر أن القانون موقوف الى مابعد الدعوة

ويقال أن أحد أسباب تأخير الدعوة للانتخابات هو أن تتم الانتخابات الفرعية بين القبائل دون أن يطالها ضرر قانوني!!؟؟

شفت اللعب وأنا أخوك أشلون صاير!!؟؟


عموما وددت أن أأكد على نقطتين وهما
محاربة الفرعيات لاتتم عبر القانون وحده

والنقطة الثانية
هي صعوبة محاربتها مع تعدد وسائلها وتشعبها مما أدى الى صعوبة ايجاد الادلة الثابتة...مثل صندوق الاقتراع والاوراق الانتخابية

عزيزي اللعب على مستوى كبير


مع تأكيدي على أن دهم البيوت والديوانيات دون أدلة أمر صعب وكذلك غير مقبول قانونيا

بمعنى أن الأخذ بالظنه أمر مرفوض...فإما أن تكون الدلائل والعمل الجاد للمنع...وإما فلا

فالمداهمة لمجرد المداهمة أمر لا أقبله لأنه يتعارض مع مبادئي ومع القانون


مع وافر الاحترام والمودة

المحـــــــــــب/

شــقـــــران

شقران said...

العزيز صــلاح

حلوووووووووووووه منك :)

خالد العدوه باي باي



للأمانة من زمان كان ودي يسقط..والأسباب كثيرة يابوصلوح :)



ولك أجمل تحية


المحـــــــــــب/

شــقـــــران

فتى الجبل said...

الله يعين وزير الداخلية على نفسه
لا فلح بالجيش
ولا كسفير
وشكله ماهو ناجح كوزير

Anonymous said...

خلاص فلتت الديرة

سدرة العشـــاق said...

الداااااااااااااااااد لج يا كويت

فتى الجبل said...

ما تمر علينا
زعلان نراضيك

Eng_Q8 said...

فريج سعود

مبروك ... مالت على المدرب وفيرغسون قص عليه تستاهلون بس بشجع برشلونه وبشجع اي فريق يباريكم يا اخي اكره فريقكم كره بس احبك

---------------------------------

شقران

يجمل حالك

لابد من التاكد وعشان جذي ما ذكرت اسم اي احد فالمجال مفتوح ولكن اشلون تحصل دليل للاسف صعبه يا شقران

المفروض

ادري والله ادري وميت قهر

----------------------------------

فتى الجبل

الله يعينه

----------------------------------

حسافتج

انشالله ما تفلت

----------------------------------

سدره

الله يحميها من كل شر

----------------------------------

فتى الجبل

ما ينزعل منك يا نهاش :*

----------------------------------

الدائره الثانيه

انشالله خير
موفقين
----------------------------------