بتحلطم

شنو عندنا غير التحلطم بهالديره واذا بنسوي شي اطلعتلك الف شغله وشغله وماني قايل شنو الشغلات خلوني ساكت احسن

.

ترى ما عرفنالكم اذا ما نزلوا التحالف مره قلتوا ليش ما ينزلون واذا نزلوا قلتوا ليش منزلين اكيد وراهم شي غير الي يتطنز عليهم ... مع اختلافي مع التحالف ببعض ما يطرحونه ولكن الناس سووا شي المفروض يسوونه ليش كل هالحجي ؟؟ وانا من اهني اقول برافو تحالف مع انهم يمكن يخسرون لكن عجبني المبدأ

.

صالح الملا وصالح الملا واشفيهم التحالف عليه وماادري شنو ؟؟ معرفتي بصالح الملا ان اهو عضو بالنادي العربي وبما اني قدساوي متعصب مااعرف عنه شي ... بس سؤال ليش هالخبه ؟؟ اذا الريال زين راح يفوز وينفع الديره واذا التحالف يبون مرشحين يمشونهم على ما اهم يبون فهذي مشكله عويصه

.

صار الي كنت ناطره ... احرقوا تراكتور الازاله ويا مالنا وبنشوف بلاوي ... الحبيب الي حرقها حسباله حرر فلسطين وصار بطل قومي مايدري انه يخالف القانون ... شهالناس الي يخالف القانون يصير مارتن لوثر كينج ؟؟؟

.

روما اخسروا :( يبا لازم يبيعون النادي لان المدرب اثول هذا حده المركز الثاني ويخب عليه ونبي هجووووم متى يبيعونه حق الامريكي واييب لنا مورينيو ودروغبا و كاكا وابراهيموفيش و كريستيان رونالدو و كنانافارو و بوفون وحمد الصالح ؟؟؟ ودي انفوز بشي زهقت وفريج سعود طايحله تشمت فيني الله يرضى ... لا بد من وقفه وانا اطالب المرشجين يطرحون بيعة النادي بندواتهم ما يصير مانشستر مقزرينها علينا

.

مسكوا 100 وهدوا 200 صادوا ماادري منو وطلعوا فلان بكفاله .. يبا ماراح يصير شي الفرعيات راح تمشي ناس يصوتون بالتلفونات وبالعروس وماادري وين كل يوم نقرا شي اشلون بتصيدونهم .. لا قانون تجمعات ولا غيره راح يحد من السالفه الحل يأتي من داخل القبيله ... والله انا اقول هالعبقريه بالالتفاف على القانون لو نستغلها صح جان عايشين كلنا بالمريخ الحين

.

اشفيها اذا كان احمد الديين مستشار رئيس الديوان ؟؟؟ يعني الريال ما ينزل وكل مستشار مو زين شهالمنطق الاغبر ؟

.

ليش المصري اذا بيكشخ يقولك اشتغل بالخرافي والهندي يقول اشتغل بالملا ؟؟؟؟؟

.

ليش اي واحد ما زار الكويت ولا مره بحياته يقول رحت السالميه ؟؟؟ اشمعى السالميه ؟؟؟

.

ليش ما يبونا نتكلم بالتلفون بالسياره يعني الهاند فري ماراح يشتت الانتباه والا اذا صار حادث يزنطنا وانموت ويفتكون منا ؟؟؟

.

ليش البرامج صايره على افا من يشيل ؟؟؟ وقنوات ماادري من وين طالعه شالي صاير ؟؟ كل هذا عشان منعوا تعليق الصور بالشوارع ؟ اذا كانوا مرشحينا جياكر ليش غصب يبونا انشوفهم .. عشان جذي انا مااطالع الا الجزيره الرياضيه واي ار تي سبورت وام بي سي 3 و العربيه وقناة فتافيت

.

الحين بريزن بريك بينزل والا بننطر لي شهر 9 ؟؟؟ وشسالفة لوست مره يتذكرون الماضي ومره يتذكرون المستقبل اشلون يتذكرون المستقبل ماادري ... لا واخر شي طلع هذاك الي ذبحنا بولده يشتغل فراش بالسفينه الي ماادري مالت منو ... اتصدقون لما اطالع لوست احس بنفس الاحساس لما افكر بالديره

.

ليش الاخونجيه وايد مستانسين بروحهم ؟؟؟

.

ثابت على قيمي هالحمله باطه جبدي ... ليش الصبي عنده لحيه والبنيه ماطـــقت ال6 سنوات لابسه ملفع ؟؟ من متى وهذي قيمنا يعني ؟؟ لا ويسوون محاضرات بالسوق ما حضرت ولا محاضره عشان اقول شنو رايي بس انا ثابت على قيمي وحاط سكسوكه وفيهم خير يقولون لا

.

لما نتبرع حق دوله ب 700 مليون عشان يسوون محطه تقطير مياه انسوي حمـــــلة 447 تكفون شتبونا انقول ترى عندي حل مشكلة الماي والكهربا بس مالي خلق اكتب عنها ذكروني تالي اكتب عنها ... اهم شي ان الحل عندي حلوه الثقه بالنفس

.

ليش الخرافي ما يسوي ندوات ؟؟؟

.

ليش العرزاله صاير وايد يسأل ؟؟؟ يعني انا مقصر الحين

.

ليش انا كاتب هالبوست الي ماله داعي ؟؟؟

.

ليش في ناس مستانسين لان بعض الشيوخ بيسافرون بره الكويت بهالانتخابات ؟؟؟ يعني ماكو احد يشتغل عندهم ؟؟ ماادري اشلون هالناس اتفكر

.

افضل كلمه سمعتها بعد كل هالخبه من عبدالله النيباري لما قال الخمس دوائر فشلت قبل ان تبدأ فشراء الاصوات والفرعيات لازالت موجوده وبقوه صح لسانك وجان زين تنزل راح افقدك انت والربعي الله يرحمه

.

ليش يزعلون ويتهاوشون معاك اذا كان في مرشح يصيرلك نازل الانتخابات وانت تدري ان هالمرشح مو شي بس قاعدته قويه وفرصة فوزه كبيره واساسا انت ما تصوت بدائرته بس اذا وقفت معاه راح تربح المصالح الشخصيه و الكويت راح اتخسر بوجود عضو مثله .. واذا ما وقفت معاه راح اتخسر العلاقات الشخصيه بس الكويت اتفوز ... بس المشكله اذا ما وقفت وياه ونجح بهالحاله انت بتخسر والكويت بتخسر ... شراح اتسوي ؟؟؟ عن نفسي افضل اكون خسران واتوقع الكويت بعد راح اتخسر

.

انا اقول خل اسكت قبل لا اخورها ... قمت اقط خيط وخيط ... لا تلوموني الوضع يخلي الصاحي مينون ... لا صج يبيلي سفره وعلى طاري السفره حمد .. مبروك ما ياك وتتربى بعزك انشالله يا بو ديومه

.

بو راشد اشفيك مقاطعني عسى ما شر

.

اللهم لا اعتـــــــــــــــــــــــــراض

ترى زر عقلي