Thursday, June 12, 2008

الظواهر السلبيه ... زين وغانا ؟!؟

-1-
.
عدنا من جديد ... وشكرا لكن من سأل اثناء غيابي ... ومن الحين الله يسلمكم من الشر... كنت اتوقع ان ارجع وانا مفعم بالحيويه ... اعجبتني مفعم ... ولكن من قراءة الصحف والمسجات التي توصل اتغث واتخلي الواحد يموت قهر حتى و اهو بره الديره ... مواضيع كثيره ببداها بلجنة الظواهر السلبيه الي لي الحين ماني عارف شكو حاطينها ... عموما
.
عندما وضعت هذه اللجنه بالمجلس السابق كان عليها مليون علامة استفهام .. والان بعد ان كنت متفائل بان هذا المجلس سيبدأ بالمشاريع التنمويه وقمت اقص على روحي واقول جود يسوون شي ردوا على ظواهر سلبيه وخمسين دينار ودواوين وقروض ... يعني صبه حقنه لبن ... مافي فرق بينه وبين المجلس السابق
.
لما قالوا ظواهر سلبيه قلت يمكن يكون قصدهم الناس الي تبوق والواسطات والفرعيات والانتماء لاحزاب لا تنتمي الى الكويت و فلوس الجمعيات الي ما ندري وين تروح والتمرد الي انشوفه من الطلاب والتسيب من المدرسين الغلاء الفاحش الرشاوي تحويل الاموال الى الخارج والخوض بالمشاريع خارج ارض الوطن ... كنت اتوقع ان هذه هي الظواهر السلبيه ... ولكن ؟!؟
.
الجنوس ؟؟ اتوقع ان عليهم قانون ... بلي ستيشن !!! تكفه شنو بلي ستيشن ؟؟؟ على ما اعتقد ان الاعلام تتصدى لهذه الظواهر سواء الكوبي او الصور الفاضحه الي ما ادري شنو اهي ... تذكرت سالفه .. اذكر جراندايزر بالحلقه الي مادري جم كانت هيكارو لابسه بكيني وردي .. اشوف ما انحرفنا لا وقزرتها لابسه فوق الركبه وكبوس ... غير هذا الرسوم الي طلع عقب الغزو الي اسمه رنا كان معاها واحد اسمه دان دان كل شوي يفصخ سلط ملط ... غير البابايات الباجي الي تطلع فيها بلاوي وبوس ولم وكل شي ... وهم ما انحرفنا ولله الحمد
.
اذا كنت تخاف على اطفالنا وطبعا كلنا نخاف عليهم يجب ان تسنع التعليم والتربيه .. سالفة المدرسه اتروح اتحفظ وتطلع ما تنفع .. تعلموا من الهند والصين شوفوا اشلون يتطورون بسرعة البرق ليش لانهم غيروا نظام التعليم .. اشغلوا عيالنا باشياء تنفعهم اشياء تنمي التفكير اشياء تزرع فيهم الوطنيه .... ثاني شي ستار اكاديمي هذا البرنامج لا اتابعه ولا ادري عنه الي بيشترك فيه خل يشترك ... واذا ما شاركوا اهني بيروحون الامارات يقدمون يعني بيشترك الي بيشترك ولا احد يقدر يرده ... لو في تثقيف للاطفال الي يتابعونه على قولتهم جان ما تابعوا هالبرنامج الدايخ
.
تذكرت ... قبل جم سنه ظهر لنا النائب وليد الطبطبائي بالمجلس الموقر يقول لازم تلغون موكاموكا .. موكاموكا هم رسوم متحركه ... ليش ؟؟؟؟ يقول الاغنيه اتقول موكاموكا حبيب الكل يفعل ما يعجر عنه الرب ؟؟؟؟؟؟ ماادري من وين طلع هالكلمات وقلب الدنيا فوق حدر على موكا موكا .... يا سلام عليك يالطبطبائي
.
نعم انا ضد الظواهر السلبيه التي يتحدثون عنها سواء من جنوس الي استحقرهم او البويات او غيرها ولكن وضع خطط لاصلاحهم من ناس متخصصه من وزارة التربيه هي الحل واتوقع هذا مو شغل مجلس امه ... يا جماعه نحن نحتاج الى التنميه نحتاج الى اصلاح بجميع المرافق نحتاج الى تطور نحتاج الى بلاوي ... نعم نحن بخير ولله الحمد ولكن يجب ان نسعى الى الافضل قبل لا يطيح الفاس بالراس .... خلوا ظواهركم على صوب وصلحوا الديره ترى الكويت تستاهل ولا تضيعون وقتنا ووقت الديره على اشياء لها حلول بدون ما تعورون روسنا
.
واذا كانت نيتكم انكم اتسوون هيئة الامر بالمعروف والنهي عن المنكر بالكويت ... اقولكم ما تقدرون ولا تنسوون انكم سويتوها عقب الغزو وجم واحد انطق منهم .. وانا اقول لو واحد اييني وماسك خيزرانه ويقولي دش صل غصب راح اصلي فيه شرق والله ادفنه ... انعرف الدين وانعرف عاداتنا وتقاليدنا ما نبي من يكون وصي علينا .. واذا صارت بصلي بالبيت عنااااد ماني مصلي بالمسجد ... ونصحيه مني شوفوا البلاوي الي يسوونها الهيئه بالدول الاخرى ... بصراحه لن ارضاها للكويت ... ولن يرضاها اهل الكويت
.
-------------------------
.
-2-
.
شسالفة زين ؟؟؟؟ الحين انا كنت مسافر اوروبا والله اوروبا دازيلي مسج ولكم تو غانا ؟؟؟؟؟؟؟؟؟؟ شكو غانا ؟؟؟؟؟؟ بصيد فيله والا بتسابق مع نمر ؟؟؟؟ انزين غانا وبلعناها ... والله العظيم 3 ايام بس صكت فاتورتي 90 دينار ؟؟؟؟؟؟؟ وانا ما تكلمت ساعه ؟!؟!؟!؟ دقيت على الكويت وادفعوهم ... يومين الا بعد ماصار يومين 40 دينار ؟؟؟؟ عاد هالمره صج ما تكلمت قزرتها مسجات ؟!؟!؟!؟ تالي سكرت الخط وشريتلي خط من اهناك وقمت اقرق لييييين زهقت وماطلع علي 10 يورو
رفقا بنا يا زين ترى عندكم مليون شبكه حول العالم عسى الله يزيدكم لكن لا تنسون ان بدايتكم بالكويت على الاقل عاملونا مثل ما تعاملون الديار الثانيه ترى مهما يكون احنا اهل ديرتكم بس والله واااااااااااايد انتوا غير طبيعيين متى تفتح الثالثه ونفتك من هالفواتير الي ماادري من وين تطلع لنا
.
---------------------
رغم الخساره اقول فوووورزا ايطاليا
----------------------
.
اللهــــــــــــــــــــم لا اعتـــــــــــــــــــــــــــــــــــتراض والله يستر

43 comments:

كويــتي لايــعه كبــده said...

الحمد لله على السلامه
نورت

(اعلق بعدين على الموضوع)

Salah said...

الحمد لله على السلامة

---

يقولون اللجنة راح تسكر الانترنت أثناء الصلاة

واذا حاولت تنزل بوست جديد تطلع لك خيزرانة من الجهاز

-----------

وايطاليا ما لهم وأمل ولله الحمد

:)

someone_q8 said...

السلام عليكم
الحمدالله على السلامة بشمهندس
انا عازمك عندي بالمدونه وابيك بكلمة راس
الدعوه هذه للجميع بعد و مو خاصة
تحياتي

Kuwait said...

welcome back ..
مجلس الأمه بكبره ظاهره سلبيه نتمنى معالجتها عشان يقدر يأدي وظيفته الايجابيه في البدأ بخطوات الإصلاح الإقتصادي والتنميه ..
يمكن غيروا مكان غانا اشدراك انت ..
والا غيروا اسم الدوله الي انت رايح لها وصارت غانا .. ;p
يمكن يمكن فواتيرك كانت تنحسب على اساس انك بغانا لووووووول ..
اشلون غانا بس ؟؟؟
الحمدلله على السلامه .. :)

Sn3a said...

ضحكتني بالبابايات

يبا
هالمجلس
غطا
حق سواد الويه بالديره
مو حل
ولا علاج للمشاكل
ولا طريق للتنميه
مجرد
غطا


بس صراحه
حلوة سالفه غانا
وبعدين انا منك اطلع برنت
واقعد يم الموظف اقرا سطر سطر
ترا وايد صارت ببنات ماتكلمو الا دقايق ودفعو اميات
واخرشي
الفاتورة فاضيه


وشي ثاني
لو بتسافر فوق اليومين
لازم تشتريلك خط
لان شركاتنا نهيبه



وشي ثالث

حمدلله على السلامه
نورت

أبــو بنــــدر said...

حمدالله على السلامه

----

طيب أذا اللجنه مو مأثره عليك بشي ليش معترض عليها

----

منو يقول انك ما أنحرفت

يمكن أنحرفت وانت ما تدري

:)))))

----

عاد كلش ولا التعليم لا تنسى ان نوريه هانم هي الى بظبطه
؛)

----

فووووورزا بالهولندي هولندا

secret said...

اللجنة بكبرها شي دخيل علينا

و اخواننا المصريين يقولون الفاضي يعمل قاضي

و يسلم عليكم كنافارو

Eng_Q8 said...

كويتي

الله يسلمك من الشر

بوجودك

اوكي ناطرك
--------------------------------

بو صلوح

الله يسلمك من الشر

والله يسوونها

انشالله فايزين

---------------------------------

انسان كويتي

وعليكم السلام والرحمه

الله يسلمك

انشالله

---------------------------------

كويت

ثانكس

على قولتج

غانا عجبه :)

الله يسلمج

----------------------------------

سنعه

عسى دوم الضحكه

غطا حق شنو

بيييييييه مالي خلق

اي والله نهيبه

الله يسلمج

--------------------------------

بو بندر


الله يسلمك

مو مأثره علي بس مأثره على الديره اقرى البوست مره ثانيه :)

لا يبا ما انحرفت ليش قطار

نوريه خوش وزيره

العبره بالنهايه

اهلا بك بمرورك الاول

----------------------------------

سيكرت

اي والله

اااااااااه يا كنافارو ... الدفاع فيه ثغره من عقبه

سعدت بمرورك الاول

----------------------------------

الخيلاء said...

الحمدالله على السلامه

ترى الفاتوره على ناس و ناس ;p


ايطاليا موعارفين يلعبون
كله من كنافارو اثر عليهم

اشوه فازت البرتغال
:)

Eng_Q8 said...

الخيلاء

الله يسلمج

اشلون على ناس وناس ؟؟

لا تذكريني بكانافارو

الا المدرب مو كفو يدرب ايطاليا

مبروك :)

Anonymous said...

الحمدلله عالسلامة

المجلس اهو اللي يبيله لجنة الظواهر السلبية مو احنا .. مالت عليهم

Eng_Q8 said...

محسد

الله يسلمك

صاج

Mohammad Al-Yousifi said...

فورزا شنايدر

Eng_Q8 said...

مطقوق

اوهوووووو

يبا هولندا بره بره حتى اذا وصلت حدها نص النهائي وتطلع بلنتيات عيش الواقع يا بو سلمى

Selezya said...

Welcome back

ايطاليا خلها تستريح :p

عاشت هولندا :Pp

Eng_Q8 said...

سلوزه

ثانكس

اقول استريحي انتي بس وخلج على فصايل الدم

Noor said...

حمدالله علي السلامه

:)

ليش اتحرق اعصابك و تحتر و توك راد من سفره
شوف ابيك بس يوم واحد ماتفكر بشي يضايق و جرب هاليوم واكتب لنا بوست عنه

اما عن شركة لاتصالات انااشهد انها نهييبه ونص
بس الشكوه لله

بـنـت بـطنـهـا said...

أولا ألف الحمدلله على سلامتك يا المهندس

ثانيا والله يبتها عالجرح انا من زمان بخاطري اتكلم عن هالمواضيع ..

كتبت لك رد شطولة وشعرضه بعدين استوعبت اني مصختها اكثر من اللازم لول ردي بس يبيله مدونه بروحه .. راح اضيفه لك في " في خاطري كلمة "

من القلب ألف شكر لك

wa6an-alnhar said...

يووووووووووهيييييييلاااااا
=
يا هلا بالبحريني
;p

وينووووك انت وينوووووك و انا اختوووووك
تو ما نور البلوق

:)


اذبحونا بالظواهر السلبيه
اذا بيعالجون الظواهر السلبيه
خلهم يعالجون الظواهر السلبية الدخيله عالمجتمع الكويتي
اللحى عادة دخيلة
النقاب عادة دخيلة
العمايم عادة دخيلة
الحجاب عادة دخيلة
الطائفية عادة دخيلة

Blog 3amty said...

حمد الله على السلامة، واهلا بك في بلد الأحباط المتقع !


والله طهقنا من هالمجلس ومن النواب ومن هالديرة !



الله المسعان

Mok said...

الحمدالله على السلامة
:)
وان شاء الله الكاس طلياني
:)

قلب طفله said...

الحمدلله ع السلامه :)

موكا موكا و الطبطبائي

سالفتهم سالفه لووووول

ما ندري لو بعد هالخنابيج هذي يتم

اللي نبيه و التنميه تزدهر خلنبتسم

و ننظر شنو ورا البلي ستيشن:P

--------------------

فواتير زين نهيبه و على

عينك يا تاجر مع هذا ندفع

و احنا مبسوطين

الله يعين بس

Selezya said...

وطـن النهار

بعد اذنك باش مهندس

---
اذبحونا بالظواهر السلبيه
اذا بيعالجون الظواهر السلبيه
خلهم يعالجون الظواهر السلبية الدخيله عالمجتمع الكويتي
اللحى عادة دخيلة
النقاب عادة دخيلة
العمايم عادة دخيلة
الحجاب عادة دخيلة
الطائفية عادة دخيلة

الأمثله اللي كتبتيها لحى- نقاب- عمايم- حجاب - طائفيه

هل بالفعل تقدصين انها ظاهر سلبيه ولازم يعالجونها؟ ولا امثله تتطنزين فيها؟

لان أغلبها ماعتقد انها ظاهر سلبيه ابدا بالعكس لها احكام ثابته ومسنن بعضها يعني امور شخصيه " حريه "

شلون تبينهم يعالجونها يعني؟
يمنعون اللحى؟
يمنعون الحجاب؟
يمعنون النقاب؟
يمنعون العمايم؟

ولا شنو بالضبط تقصدين :))

اتمنى التوضيح :)

Anonymous said...

حمدلله على السلامة

زين انا ماني متكلمه عنها لاني بروحي متنرفزة من اشتراك النت عندهم ..

::

اما لجنة الظواهر السلبية شي عجيب .. الفكرة ممتازة .. هني نسال روحنا ليش ما نجحت ؟ لان احنا مو حاطين الشخص المناسب في المكان المناسب .. زين ليش الحكومة ما تقتح لها مدونه :) .. وتاخذ راي الناس .. والله بتطلع بأفكار مو طبيعية .. ويمكن تلاقي ناس تقدر تمسك هالمشروع احسن من اللي اهم حاطينهم ..

شكلي طولت بالسالفة .. :)

Eng_Q8 said...

نور

الله يسلمج من الشر

لوووووووووووووووووووووول

مو لي هالدرجه عاد بس لازم الصبح الواحد ينغث لما يقرا الجرايد :)

ونعم بالله

---------------------------------

بنت بطنها

الله يسلمج

المدونه مدونج وانا اخوج اخذي راحتج وانشالله راح امر عليج :)

العفو ما سوينا شي

----------------------------------

وطن النهار

لووووووووووووووووووووول

هلا وغلا

اشلوووونااج شخبووراج :p

موجود ... منور بوجودكم

لا مو لي هالدرجه :)

---------------------------------

بلوق عمتي

الله يسلمك

صدقني اني عايش الاحباط لحظه بلحظه وانا بره

شنسوي بعد هذي ديرتنا

----------------------------------

موك

الله يسلمك

عقب هالتعادل الله يستر

----------------------------------

قلب طفله

الله يسلمج من الشر

الي ورا البلي ستيشن حديقة الشعب
--

بعد لازم ندفع مو فاضين منع سفر

----------------------------------

انيموس

الله يسلمج

لووووووووووول عيل اهلا بك بالانترنت الي كل شوي يفصل

الا فكره دايخه بصراحه

طولي يبا اخذي راحتج

----------------------------------

Eng_Q8 said...

سلوزه


انا فاهم قصدها :)

ودام ماتبيني ارد اخلي الرد للاخت وطن :)


انا مليش دعوه بهوشات البنات

كويــتي لايــعه كبــده said...

1
كلامك كله عدل
لا حنا بحاجتها هاللجنه ولا نبي خيازرين على شان ما نلسبهم فيها
دينا نعرفه
وهم منو يعلمونا والا يرغمونا!؟
بالاضافه الى اشغال مجلس الامه بالتوافه واشغاله عن دوره الفعلي

---
2
توك تدري ام تي سي / زين حراميه؟
دايم خارج الكويت اخذ خط محلي
الفرق كبيـــــــــر

wa6an-alnhar said...

eng_q8

ههههههههههههه
هوشة بنات مره وحده عاد !!
:))
لا احنا نتحاور
:p


سلوزه


يعني نصه طنازه و نصه صج


اهما يبون يحاربون العادات الدخيله على المجتمع الكويتي على قولتهم

اوكي!!

يالله انا عندي ظواهر دخيله ابيهم يعالجونها
:p

اللحى و دين المظاهر عادة دخيله...اللي نعرفه ان اهلنا يعرفون ربهم بدون تزمت و بدون تمثيل عالناس

النقاب عادة دخيلة ما شفناه ولا عرفناه الا بعد الغزو من جراء الاحتكاك بالسعوديين
اللي نعرفه ان عندنا براقع + البوشيه
و يازين بوشيتهم عاد بوشية دلع
قوووومي ارقصيلي وارفعي البوشيه
:p


العمايم عادة ايرانية دخيلة و خصوصاااااا بمجلس الامة
بذمتكم في نائب يدخل مجلس أمه (كويتي) بهاللبس !!
اوكي تبي تلبسه كيفك البسه بدروسك الدينيه..بس المجلس مكان للتشريع مو للبهرجه

الحجاب عادة اخونجيه مصريه دخيلة
انا خبري عندنا الملفع و يلبسونه جذي مو الحجاب بمعنى الحجاب


الطائفية عادة دخيلة و اعتقد هالشي ما يختلف عليه اثنين

و يوم قلت يعالجونها (طنازه) لان التفكير الحررررر راح راح راح


و انا معاج اهما كيفهم حرية شخصيه يلبسون اللي يبونه و انا بعد حرية شخصية ابدي رايي فيهم


:) و سلامتج

Anonymous said...

ترا عـطيتوا موضوع اللجنه أكـبر من حجمها


ماعتقد بيدها شي كبير تـسويه

وإذا كان في شي طرحت اللجنه وكان في محل خلاف
فـ غالبية اعضاء المجلس بيرفوضنه


لاتـكبرون المــووضـــوع

شقران said...


مهندسنا العزيز


ألف الحمد لله على السلامة يالغالي..وتو مانورت الديرة والمدونات


----------

لجنة الظواهر السلبية هي غيض من فيض

فمشكلتنا اننا نعبث بالمهم وننسى الأهم!!؟


أما قضية النائب الطبطبائي فإن كانت كلمات الأغنية كما قال، فمعه حق بأن يطالب بمنع الأغنية

-------------


بالنسبة للاتصالات..فاسمحلي إنت المخطئ..فقد كان من المفروض أن تشتري خط أول ماتطأ قدماك قارة أوربا

وخل الخط الجوال لحالات الطوارئ لاسمح الله..وريح بالك يالغالي
:)


----------

اما الطليان..فصج صج الحظ معوكس معاهم اليوم في مباراة رومانيا..فلقد كان اللعب لهم من أول المباراة الى آخرها..عوضا عن الغاء هدف لوكا توني في الشوط الأول رغم أنه صحيح مئة بالمئة!!!!!؟


أخوي عليك بهولندا..مصعت العالم تمصع
:)))))



وتقبل مني خالص التحية القلبية



المحــــــــــب/


شــقــــــران

5roofa said...

حمدالله على السلاااامة تو ما نورت الكويت

لووول ضحكتني على غاناا

salamz dear...

Selezya said...

مهندس مالك شغل على طول تبي هوشه بنات
هذي وطن عزيزه وغاليه
لو ما امون عليها جان ما ناقشتها

الرد راح يكون طويل شوي
بس معلش


-----

حبيبتي وطن .. في امور وايد نقدر نتكلم وايد وكل واحد ياخذ رايه فيها وبالنهايه راح تختلف ارائنا يعني ممكن تشوفينها انتي صح وانا اشوفها غلط
واغلب هالامور اهي امور " دنيويه"
لكن لما الواحد ايي ويعطي رايه " بحكم وتشريع إلهي " مؤكد حتى مو مسننن هني لا انا ولا انتي نتكلم ونقول " لا" مو عاجبنا هالشي

وبعض اللي انتي طرحتيه
كان بالفعل امور شرعيه


-----
اللحى و دين المظاهر عادة دخيله...اللي نعرفه ان اهلنا يعرفون ربهم بدون تزمت و بدون تمثيل عالناس


الحين يعني بتقولين ان اللحى مفروض ماتكون موجوده؟

لحظه-- الحين الرسوال عليه الصلاه والسلام - ماكان ملحي ؟
انزين اللحى اهي مو سنه عن الرسول الكريم؟
طيب اكيد هالكلام ماعليه نقاش لان امبله كله صح

انتي مايصير تجمعين بين اللحى ودين المظاهر لان اصحاب الدين المظاهر ناس مريضه .. وانتي اذا شفتي ريال ملتحي ما تقدرين تحكمين عليه اذا هذا صج مسويها سنه عن الرسول ولا بس جذي كلام جدام الناس علبونه انا اعرف الدين
ماكو شي يخليج تعرفين ولا تقدرين تمنعين هالشي لان في نسبه كبيره قاصدين الدين فيها وبنيه خالصه - طيب لما تقولين ان الكويت قبل ريايلها ماكو ملتحين -- انتي تستانسين على هالشي؟
ولا تستانسين لما تشوفين ان هالشغله تغيرت عن قبل وصاورا في ناس يحاولون قد مايقدرون يوفوون ويكملون دينهم - لان هاللحيه سنه مؤكده عن الرسول واكيد راح يؤجر عليها اذا كانت بنيه خالصه طبعا

اللحى ايدا عمرها ماكانت ظاهر سلبيه واذا حاولوا معالجتها وهذا طبعا مستحيل يصير واحد يسويها فعرفي ان الحال بدال ما يتعدل قام يتردى
------

بالنسبه للنقاب

حبيبتي اغلب اللي يلبسون النقاب اهم البنات مو الحريم الكبار
صح البوشيه والبراقع اهم اللي تعودنا عليها ماقولج لا
بس بنفس الوقت النقاب مافيه عيب للي تستعمله بنيه ستر نفسها بشكل كامل
هذا شي يرجع للبنت تبي ولا ماتبي - في بنات يستعملونه وعيونهم كلها مكياج يعني ماحصلنا خير - بس في بنات بنفس الوقت لابسينه ومغطين نفسهمم تحسين نيتهم صج مايبون احد يشوفهم- هالشي راجع لها اهي شايفه ان الستر كامل احسن لها يعني حتى لو لابسه بوشيه ولا برقع بتكون مغطيه نفسها فماكو فرق ترا
نفس الشي
واكيد هالشغله حريه شخصيه مثل ما انتي تلبسين اللي انتي تبين اهي حره باختار لبسها يعني انتي ماتحبين ان انا اييلج واقولج شنوو هاللي لابسته هذا غلط وين قاعدين واقولج بالنهايه هذا رايي
انا ماقدر ادخل نفسي بخصوصياتج وطريقه حياتج

--------

بالنسبه للعمايم بالعكس !! اعتقد في تناقض بكلامج
هالانسان اللي دخل المجلس الشعب اهم اللي مدخلينه يعني يبونه مثل ما اهو معاهم بره يكون نفس الشي داخل المجلس
هذا عادات دينه وتقاليد اهو محترمها
انتي ماتقدرين تدخلين نفسج بهالشي
يعني تخيلي
يكون لابس العمامه جدام الناس اللي يمثلونه واهم شافوا ان هالانسان اهو الاصلح لهم في المجلس من دينه من افكاره من كل شي وانتخبوه وفاز ويدش المجلس بددون العمامه؟
تهقين هالشغله صح؟
معناته هالانسان جذاب واهو صاحب " دين المظاهر " بهالحاله
اللي يقدم افكاره للناس ومؤمن فيها ومؤمن بتعاليم مذهبه ويلتزم فيها ولا يهمه اهو بالمجلس ولا برا صدقيني هالانسان أخيرهم
لانه جدام الشعب كله جنه يقول " هذا انا ،هذي تعاليمي وهذي افكاري ، انتوا انتخبتوني خلاص لحد يقول شهاللبس

صح ولا لا؟
وبالنهايه احنا نبي اعمال وافعال هالانسان مانبي ملابسه وعمامته :)


الحجاب صراحه مافهمت شتقصدين
بس اللي ماعليه كلام ان الحجاب فرض علي وعليج
ماعليها كلام
سواء كان ملفع او حجاب
المهم الغايه مو الوسيله
لو بخيشه
فرض فرض

الطائفيه
اكيد :) هذي اهي الظاهره السلبيه الوحيده من بين اللي ذكرتيهم
:)

------------

وسلامتج انتي اتمنى ما ضايقتج بالكلام
انتي تمونين علي وانشالله امون عليج :)


:*

wa6an-alnhar said...

مهندس سامحنا احتلينا تعليقاتك
:)
-----------
أكيد سلوزه عزيزه وغاليه و نحن بصدد عقد المؤامرات ضد مهندسو لمن يسافر للاستيلاء على المدونة

;P

-----

أختلف معاج ان هالامور مؤكده ... انا مو شايفه ان في نص صريح يلزم الناس بكل هالمظاهر
و حتى لو كان في احاديث فسندها ضعيف
-------------------------------
بالنسبة للحي

99,9 %

اما لمظهر
او لمصلحة
او للتقرب و كسب ود الناس

و انا ماني شايفه من زيادتهم أي خير
بلعكس
كل ما زادو الفساد والنفاق يزيد
------
بالنسبة للنقاب و الحجاب

كيفها اللي تبي تلسبه حره
لكن رايي يقول ان الحجاب عادة دخيله و مو اسلاميه اصلا اذا كانو يستندون عالاسلام

من رايي ان الحجاب عادة من ايام الجاهلية

ماني شايفه ان في دلالات واضحة ان الحجاب تكليف ديني و حتى الايات اللي بهالخصوص اختلف العلماء على تفسيرها و يقولون بعض العلماء ان الحجاب خص نساء النبي
اما بالنسبة للاحاديث فمسندها ضعيف وايد

و اشوف بعد ان الحجاب تحول من فرض ديني للي يؤمون فيه الى مظهر اجتماعي و عادات وتقاليد او انه يكون رمز سياسي لجماعة معينة

و اشوف بعد انه تحول لرمز لفرض وصاية الريال عالمرا بمجتمعنا..بحجة الغيره
مع ان الحجاب بهذا الوقت بالذات ما عاد رادع لأي شي الرادع الوحيد السلوك و الاخلاق النابعه من الداخل مو من المظهر
(انما بعثت لاتمم مكارم الاخلاق)
مو الاشكال

و في شغله بعد ان مفهوم الحجاب تحول من مفهوم (ستر) الى مفهوم ان المرا (عوره و شي عيب) !!!!!

--------
و بالنسبة للعمايم
اشوف ان الناس اللي طلعوه بالاساس تفكيرهم غلط
فاللي ينبني على باطل فهو باطل
احنا نبي نصحح المسار
و نبي هالتفكير يتغير
لان ولا شي رجع هالديره قري غير هالنعرات اللي مالها داعي
نبي نائب يمثل الامه .. يشرع...و يخطط

------------
بالنسبة للطائفيه
اي اهي الظاهرة السلبية الاكبر

و سببها ؟؟

سببها كل هالاشياء اللي ذكرتها فوق

و سلامتج

:*

darkness said...

الحمد لله على السلامه

و زين و الوطنيه حراميه

و لا يشبعون

:)

Selezya said...

:)


تصدقين انا الحين عرفت شنو اهي الظاهر السلبيه اللي بالمجتمع واللي لازم يعالجونها

مشكوره على هالنقاش
كل وحده فيننا محتفظه برايها :)

:**

Hamad Alderbas said...

الحمد لله على السلامة

معاك قلبا وقالبا :)

wa6an-alnhar said...

Selezya

العفو سلوزه
:)

Eng_Q8 said...

كويتي

صحيح

وانا دايما اسوي جذي بس هالمره قلت ماله داعي ماني متكلم بالتلفون وايد

----------------------------------

انيموس

انا الي باط جبدي انهم هادين كل شي وماسكين هاللجنه والخمسين والقروض

----------------------------------

شقران

الله يسلمك من الشر ... منوره بوجودكم


الطبطبائي ما عنده سالفه اصلا الكلمه اهي البعض مو الرب بس اهو يسمعها على كيفه يعني في احد صاحي يقول الرب وبعدين موكاموكا شيسوي بالله ؟؟ تابع المسلسل وبتشوف ان ما عنده سالفه

صحيح

حظ حظ حظ والحكم ظلمهم الله يستر

----------------------------------

خروفه

الله يسلمج من الشر

:)

----------------------------------

داركنس

الله يسلمج

وليش ما يمسكونهم الشرطه ؟

----------------------------------

حمد

الله يسلمك

كفو :)

----------------------------------

Eng_Q8 said...

سلوزه وو وطونه


جزاكم الله خير :p

why me said...

ولكم باك

Eng_Q8 said...

واي مي

ثانكس

Anonymous said...

صباح الخير

لان حاميها حراميها

:p

Eng_Q8 said...

داركنس

لوووووووووووووووووووول

صباح النور