Thursday, June 19, 2008

الغبار علماني ؟!؟

-1-

اعتقد الكل شاف الجو البديع الي تمر الديره فيه هالايام ومافي واحد ما تحلطم على الجو ويبي ينحاش منه .. اليوم عندي لكم قصه ... كان يا ماكان في قديم الزمان في يوم من الايام الا وهو امس ! كنا راكبين السياره عندنا شغل ... المراد اخوكم الي اهو انا قلت ذبحنا الغبار ما صارت متى نفتك منه ... وهنا بدأت القصه
زميلي بالشغل : اشفيك تتحلطم انت من الصبح مو مضبوط

انا : ذبحنا الغبار استغفر الله ماصارت بس خلاص لي متى يعني

زميلي : هذا من ذنوب الناس

انا : شذنوبه ؟؟ انت شقاعد اتقول

زميلي: اي ذنوب الرياح والسحب جند من جنود الله

انا : ونعم بالله بس شكو ذنوب ؟؟ يا يبا الغبار يانا لان ما يانا مطر هالسنه

زميلي : اي ما يانا مطر من كثر الذنوب

انا : واشمعنى سويسرا جوها حلو اوروبا بكبرها جوها حلو مع ان المعاصي تارستها

زميلي : اهم لهم الدنيا واحنا لنا الاخره

انا : وليش لما تايلند ياها تسونامي قلتوا غضب من الله دام لهم الدنيا

زميلي : حكمت ربك قدر الله ما شاء فعل

انا : ونعم بالله .. انزين اشمعنى المسلم الي عايش اهناك طايحه ببطنه دنيا واخره

زميلي : احمد ربك انت عندك نفط وفلوس اهناك ما عندهم

انا : اي خير انشالله اهناك اغنى وجوهم حلو وعايشين حيااتهم

زميلي : حكمة ربك

انا : حلاته انييبلنا سحب صناعيه ونفتك من هالغبار

زميلي : استغفر ربك ما يصير تلعب بقدر الله المطر بس الله الي اييبه

انا : انت علامك يبا في سحب صناعيه وفي مطر صناعي شنو كفرت انا

زميلي : اي ما يصير شنو على كيفك بتغير الجو

انا : اي على كيفي العلم تطور انت وين عايش يالحبيب

زميلي : انت جذي اتغير قضاء الله وقدره

انا : شكو ؟؟؟ يبا .. اسعى يا عبدي وانا اسعى معك ... يعني ربنا يبينا نسعى .. وبعدين ان الله يخشى من عباده العلماء يعني الله يبينا انطور

زميلي : العلماء المقصودين علماء الدين

انا : لا والله .. الحين احنا من اولى ابتدائي لين الثانويه ويعطونا بالدين الله خلق الانسان لكي يعبده ويعمر الارض يعني شنو كانوا يقصون علينا .. هذا غير اطلبوا العلم ولو بالصين

زميلي : انت اشفيك قمت تخوره

انا : لا خرتها ولا شي هذا الصج علماء المسلمين يابولنا الف مذهب هذا غير العالم الي يسمى عالم للاسف واهو يدعوا للارهاب والتفجير بخلق الله بدال ما يقول يبا اهتموا بالعلم انفعوا ديرتكم سووا شي ينفع المجتمع .. صل صوم ادي زكاتك روح الحج بس هم سوو شي ينفع المجتمع

زميلي : هذا حجي علمانيين وليبراليين

انا : شكو العلمانيه والليبراليه بالسالفه ؟!؟

زميلي : اهم يقولون هالحجي ويكرهون المطاوعه والدين

انا : حبيبي العلمانيه واليبراليه نظام سياسي شدخله بالموضوع بكبره

زميلي : قام يتكلم عن الصراط المستقيم وعن يوم القيامه والكويت راح اتصير خضره وعن علامات يوم القيامه تالي تناجرنا على الاستنساخ ... المهم الي يسعى للافضل يعني علماني او ليبرالي ؟!؟

هالقصه الجميله طبعا اهي طويله بس انا مختصرها خلتني افكر بشي .. الحين يعني ليش كل شي يصير انقطه على الذنوب والمعاصي ؟!؟ وليش كل ما قلنا نبي نتطور يطلعولنا الحبايب باشياء مالها داعي ويشغلون الشعب فيها مثل الظواهر السلبيه ؟؟ ليش اصبحت كلمة علماني وليبرالي جنها مسبه او جنك كافر ... والي يطالب بالتطور والتغيير قالوله علماني والا ليبرالي ؟؟؟
.
لماذا اصبحوا يهتمون بالاخره ولا يهتمون بالدنيا ؟؟؟ الم يقرؤوا التاريخ ؟؟ الم يقرؤوا باننا وصلنا مغارب الارض ومشارقها وكنا الاوائل بالعلم ؟؟ العلم والاخلاق والفكر هم السبيل الوحيد لبناء دوله قويه وليس الاختلاف على ان المتعه حلال ام حرام او السني صح او الشيعي صح والا منع اختلاط او اختلاط
.
اود ان اضيف ان العالم ابن النفيس مكتشف الدوره الدمويه الصغرى كان محاربا وهناك من كفره لانه اراد ان يشرح الجثه واتهموه بانه يمثل بالجثه ؟!؟ والان يتشدقون باسم هذا العالم
.
الاهتمام بالامور الهامشيه هي من وضعنا بالمؤخره للاسف .. انا لا اقول ان نهمل الدين او نمحيه من الوجود ولكن الاسلام يحثنا على عمارة الكون فكيف لنا ان نصل ونحن نرجع الى الخلف ونتمنى ان يرجع الزمن بنا لنكون اسياد العالم
.
الدنيا تغيرت والزمن تغير ويجب ان نهتم بالعلم ونهتم بالتنميه البشريه والاقتصاديه ولا نضع الحدود لان الاصل بالشيء هو الاباحه ولكن مع الاسف الشديد اصبح الان الاصل بالشيء التحريم وننتظر الفتوى لاباحته
.
كلنا مسلمون ولله الحمد ... واذا كانت دعوتنا لتطوير دولتنا وبذل السبل لرفعتها عاليا سواء سياسيا او اقتصاديا او اجتماعيا او رياضيا .. الخ يجعلنا علمانيون وليبراليون و فاسقون كما يكتب البعض من الكتاب الان .. فانا فداء لوطني واذا اصبحت العلمانيه او الليبراليه هي ما تدعوا الى تطور الكويت ورفعتها فانا علماني وانا ليبرالي بنظرهم مع ان العلمانيه مالها شغل بس اهم مصممين عليها ... واقول لا تنسوا قول الرسول الكريم ... اطلبوا العلم من المهد الى اللحد
.
وهذي صور واصلتني بالايميل عن التقنيه الي استخدمتها دبي الان عشان اتنظف الجو وانتوا خلكم واذا صج استخدموها فانا متحسر على ديرتنا واذا الايميل مو حقيقي اقولكم ان في تقنيه لسقوط الامطار









---------------------------------------

-2-

استغرب ما يكتبه كتاب التيار الاسلامي ... فهم ينتقدون فرنسا لانها منعت الحجاب ويلعنون خيرها بالصاعده والنازله وكل شوي معطينا مثال عن تركيا ... ويقولون ما نبي احد يتدخل بشأننا الداخلي ؟!؟!؟ انزين انتوا تدخلتوا بشأن فرنسا الداخلي وما كلموكم ليش لما احد يكلمكم اتقولون لحد يكلمنا والي يجادلنا اهو زنديق وفاسد وماادري شنو ؟؟؟؟ ولما امريكا تكلمت عن احياء التراث صراخكم وصل واشنطن

والله انكم غريبين حلال عليهم وحرام على غيرهم ؟؟ اقول سووا شي بهالمجلس جزاكم الله خير مو بس تمنعون هيفاء وهبي وستار اكاديمي ... سوو شي ينفع المجتمع ... والله كاسره خاطري الكويت


-------------------------------------


اللـــــــــــــــــهم لا اعتــــــــــــــــــــــــــراض



43 comments:

secret said...

اخوي :)

(انما يخشى الله من عباده العلماء)

و الرسول الكريم (ص) قال:
فضل العالم على العابد كفضلي على ادناكم

العبادة تنفع الانسان وحده و لذلك تكون بينه و بين ربه
و العلم ينفع البشرية كلها اوافقك الراي جدا :)

و من الابتدائي و احنا ندرس ان الله خلق الانسان لعمارة الكون

و الحبايب مو قاعدين الا يفسدون فيها باسم الدين

و لان ما عندهم الجرأة و القدرة الكافية و حتى النية انهم ينافسون الدول المتطورة فيبون الزمن يرجع و يحكمون بما انجزه من قبلهم من البشر

واللي صج يبط جبدي ان دايما يحطونك جدام الله اذا خالفتهم
و هم بفعايلهم مخالفين الله

و متفككين الى احزاب و نسوا ان الاسلام وحدة

و نقاشك مع زميلك قاعدين نمر فيه مع ناس وايد بالمجتمع مع الاسف

يا امة ضحكت من جهلها الامم

Eng_Q8 said...

على طاري الاحزاب انطرني عقب جم بوست :)

Mohammad Al-Yousifi said...

بيني و بينك انا هم مقتنع ان الغبار علماني

Eng_Q8 said...

مطقوق

انت بعد

اشلون علماني عاد

Hamad Alderbas said...

اسعى يا عبد وانا اسعى معاك مو آية

وبعدين ترة العلماء في منهم من افتى برضاعة الزميل :)

تذرت اولمبياد سيئول لمن كانوا يطلقون صواريخ تفتفت الغيم لايقاف المطر بالملعب حتى لا يخترب حفل الافتتاح .

Eng_Q8 said...

حمد

شكرا للتصحيح

قولهم

وهم بروسيا سووها :)

الزين said...

البوست هذا بدعة

وكل بدعة ضلالة

وكلا ضلالة بالنار

ياويلك

الله بيقطك بالنار

تبي تجمع المطر من ذنوب الناس

حرام عليك

خلهم يتعذبون بذنوبهم

جوووود الله ورحمته يتوبون توبه نصوح

شكلي انا بدش النار معاك

سلام

Eng_Q8 said...

الزين

لووووووووووووووووووووول

Kuwait said...

مهندس ..
اعجبتني سالفة لهم الدنيا ولنا الآخره ..
من صجه !!!!
ترى بهاجر اذا أوروبا ماعندهم فلوس عيل من الي عنده ؟
زميلك هذه حده عقله على قده :)
والحمدلله الديره مو واقفه عليه جان للحين احنا عايشين حالنا حال فلينستون :P

enter-q8 said...

زميلي المهندس
شوف يعني المطر و الرياح و الاعاصير اهي جند الله نعم و توارد هالامر باحاديث و ايات قرانية
بس اللي يقولك هذا من المعاصي
رد عليه وقوله
هذا تخفيف ذنوب

بس الله يبي يخليك كافر و عاصي قوله تخفيف ذنوب
المشكله اللي يتكلمون بالدين
فاضي على بطال
ولا يعرفون كوعهم من بوعهم
الله يرحمه بو قتيبة الدكتور احمد الربعي مره قاعد يناجره واحد ملتحي و مبيين عليه انه مشحون و قعد يكيل له الاتهامات
قاله المرحوم
ما عليه ياخوي ممكن تسمعني اللحين

انا شنو تخصصي دكتوراه فسكت
فقاله انا تخصصي فلسفة اسلامية

هذول يخلون اللي قلبه ضعيف
يكفر استغفر الله

انا نفسي انسان مو ملتزم و لكني الحمدلله مسلم
هالكائنات اللي نفس زميلك
تخليك ملحد و مشرك
لكن الاصح انها اكبرهاكلمة عاصي
الدين
مو كله غضب
الدين رحمة
الدين في جمال
بس لما الكل يلبس هالعبايه استلم عاد

طولت عليك

wa6an-alnhar said...

الدين افيون الشعوب

و اي واحد تبي تخدره و تخليه مكاااانك راوح قوله لا لا يجوز شرعا

شوف الناس وين اوصلو شللوووووو
و احنا على طمام المرحوم

حسافه عليج ياكويت

someone_q8 said...

السلام عليكم
كتبت رد طويل بس للأسف النت عندي قام يخورها
اخوي البشمهندس , مو كل من تكلم بالدين وعنده لحية يعني عالم , و لان البعض للأسف من يحضر عند جم شيخ صار مفتي زمانه
اخوي في ناس واعية سواء عندها لحية او ما عندها لان العلم في العقل وليس بالشكل
ولان هالناس هذه تاخذ العلم من جهه وحده او من شيخ واحد وتتشدد في الرأي فا تلقا ان عقولها فارغة
لا تهتم في هالنماين لان الله يعنيها على نفسها

مو قلنالك لا اتعصب موقوته ضغط وسكري على شيء مايسوى :)))

esTeKaNa said...

مساء الخير يا باشمهندس
كيف امسيت؟
عساك بخير مع الغبار اللي خف شوي؟
:)
اعتقد ان زميلك يحتاج اعاده فورمات لينظم افكاره في بعض الامور
ونحتاج لبعض المرونه في فهم الآخر
!!
(1)
لما تحطلمت على الغبار قلت استغفر الله
عفويا قلتها
بس ليش قلتها؟
لانك مقتنع في داخلك ان هذا شي بيد الرحمن ونحن لا نعترض على قدر الرحمن اللي ما رزقنا مطر بهالسنة
انته الامور عندك واضحة
ولكن..ربما ما استطعت توصيل افكارك بشكل صحيح له
!!
بالمقابل:
هو عنده رد للامور التي يعرفها
ففعلا الرياح والغبار جند من جنود الرحمن
ولكن توظيف هذه الحقيقه هنا توظيف غير سليم
!!
اما النقاش حول العلم فهو فعندي كم ملاحظة:
اولا:
انما يخشى الله من عباده العلماء تفسيرها اكبر من كلمة تطوير فقط
هي شامله امور كثيرة
واستشهادك فيها استشهاد مهم جدا
!!
ثانيا:
مشكلة الخلط بين المعتقدات الدينه والنظم السياسيه والامر مختلط عند زميلك
ثالثا:
اطلبو العلم ولو بالصين
حديث ضعيف على فكرة
!!





(2)
~~~~~
عندما نغلق الكنيسة في الكويت
اعتقد سيكون هناك تدخل من بره لاننا حرمنا الناس من حرية معتقد داخل مكان مخصص للعباده وهذا مخالف للدستور ويمس المسيحين بالخارج وسيكون هناك اعتراض
!!
عندما يمنع الحجاب في فرنسا
نحن امام مشكلتين:
مشكله قانونية:
فهم خالفو الحريات الاساسية في الدستور الفرنسي القائله بحرية الاعتقاد والشعائر
ومشكله دينيه:
نحن امام انكار منكر
ونصرة لدين
فاين المشكله بالموضوع؟
نحن لم نتدخل في سياسيات داخليه لفرنسا
وانما وقفنا على قانون كان ضار بشريحة كبيرة يهمنا امرها
والموضوع كان استنكار
ولم نصل لمرحلة قطع العلاقات
!!
الامر مختلف تماما في موضوع اتهام جمعية احياء التراث الاسلامي
الموضوع كان تجميد لارصده دون دليل
ونحن بالنهايه كنا مع جمعية احياء التراث او ضدها نحتاج لدليل
فاين الدليل؟
المتهم برئ حتى تثبت ادانته
ونحن بحاجة لدليل واضح على الادانه
!!
فمن حق المتهم هنا الدفاع على نفسه
ويصل صوته ليس فقط لواشنطن
انما لامريكا كلها

انا اتكلم بتجرد وحياديه
فهذا العدل ايا كان المتهم
!!

نقطة اخيره:
لكل تيار بالكويت اخطائة
وسلبياته
وبالاخير ايجابياته
اين السلبيه في منع هيفاء وهبي وستار اكاديمي من الكويت؟
هناك امور اهم
نعم اوافقك الراي
ولكن هذا لا يمنع ان منعهم امر جيد
!!
لا اعتقد ان الكويت حاليا بحاجة لاشباه رجال يتراقصون في ستار اكاديمي
ولا بنات يستعرضون في ستار اكاديمي اربع وعشرين ساعه امام الكاميرا
:)



اتمنى لك عطلة نهاية اسبوع سعيده

Selezya said...

ممممم

the.thinker said...

تسلم ايدك اخوي :) ويحليه صاحبك يونس لوول .. على فكره هذيل فاهمين الدين غلط من كثر ما عاشو بأوهام ،، ما يدرون انه ماكو شي أحسن من الدين .. لأن الدين صلاح للدنيا والآخره

" ربنا آتنا في الدنيا حسنه وفي الآخرة حسنه وقنا عذاب النار "

ومشكوووور على الموضوع ،، يجيب الله مطر على قوله أهل البر ^_^

Eng_Q8 said...

كويت

المشكله ان وايد ناس نفس تفكيره

اوروبا ؟؟ ودي اهاجر بس لي الحين في امل واذا راح الامل اشوفج اهناك :p

--------------------------------

انتر كويت

انا ما قلت اهم مو جند الله بس اهو متنح
وصحيح طافتني هالنقطه اهي تخفيف للذنوب

وليش زايدين الملحدين هالايام من هذيل يا بو وليد

الله يرحمك يا بو قتيبه

صحيح كلامك عدل

طول كثر ما تقدر فنحن نستفيد منك يا بو وليد المدونه مدونتك وان اخوك

----------------------------------

وطن النهار

حسافه :)

----------------------------------

انسان كويتي

وعليكم السلام والرحمه

قولهم يا خوي محد راضي يفهم هالنقطه

صحيح

مو يا اخوي اهم وايد وهذا شي من لا شيء

لوووووووووووووووول

معصب عشانه والله يعورني قلبي على الناس الي جذي

لحد الحين قولون الله يستر من الايام اليايه :)

مره ثانيه لما تكتب كومنت طويل سوله كوبي عشان لا يروح :)

--------------------------------

Anonymous said...

ليما تضررت اندونيسيا من تسونامي قالوا بعض الجهلاء المتأسملين (هذا من كثر حالات السحاق والشذوذ في اندونيسيا) !!!!!!!!
اللي يسمعهم يقول رايحين هناك و مجربين؟؟؟

و الاخوان اللي تكلموا عمرهم ما راحوا اندونيسيا ولا اشهدوا على شي (للأسف بعضهم من اللي يصيرولي) والكل يعرف ان اندونيسيا دوله مسلمه و المسلمين فيها وايد و بعضهم من كثر ما تشددوا بالدين صاروا يدعمون الارهاب ! و هذا فوق الخدم الاندونيسيات اللي اييون بحجاباتهم

هذيلا ببساطه ماخلوا احد ما اتهموه في عرضه و شرفه علشان يقدرون يبرمجون مخوخ الناس علبوا ان (احنا الافضل) !! يعني على كيف ابوهم اللي يابهم يتهمون حتى المسلمين بس علشان يخوفون الناس و يقولولهم ترى اذا ما مشيتوا ورانا الله بيعاقبكم

Eng_Q8 said...

استكانه

مساء الانوار

بخير عساج بخير

تعودنا عليه :)

لو بنفرمت حولي ماراح اتلحق على من هم نفس تفكيره :p

1 قلت استغفر الله لان حرام انسب الجو وهي ان كانت عفويه لاننا نعرف حدودنا الله يسلمج :)

انا على توصيل الفكره اهو مو راضي يفهم نهائيا وانا سكت لاني ماابي اعصب

وانا اعرف هالمعلومه وادري انهم من جند الله لكن الاخ مو راضي يقتنع ان ممكن انزل المطر ولما قلتله ان الله يعرف ما في الارحام والحين نقدر بالسونار انعرف الذكر من الانثى قال لا الله يعرف اذا كان مريض قلتله الحين يقدرون يعالجون الطفل واهو برحم امه قالي لا واذا كان مغولي مع ان تفسير الايه واضح وصريح

اعلم هذا ولهذا ذكرتها له


2 للاسف هي مختلطه للكثييييييير من الناس والسبب هم من لا يردون بأن يحل احد محلهم بالسياسه ويكونون مسيطرين على الساحه

3 ولو كان ضعيف ولكنه كبير بالمعنى وهناك احاديث كثيره تدعم ما جاء بهذا الحديث يا اختي العزيزه


(2)

اولا ستزال الكنيسه بالقريب العاجل لانها تقف امام مشروع الدائري الاول الممتد لجسر الصبيه

ثانيا الكويت اوقفت معبد للسيخ ولا احد تكلم من بره و رفضت وضع مسجد للبهره وهم محد قام يسب ويلعن وينتقد بطريقه جارحه

وبالنسبه للكنيسه اعتقد لوجود كويتيين مسيحيين بالكويت ما يقدرون يزيلونها ولو كانت للجاليات اعتقد جان طالبوا بازالتها فورا

اما موضوع فرنسا فهم لم يمنعوا الحجاب فقط انما اي شيء يدل على انه ينتمي لدين كالصليب والقلنسوه فهم طبقوها على جميع الاديان وليس على المسلمين فقط يا اختي العزيزه

ولم تقف الفاتيكان او اللوبي الصهيوني واستنكروا الوضع لانه شأن داخلي لفرنسا وليس لهم الحق بان يتدخلوا فيها واعتقد ان فرنسا هي اعلم بالحريات لانها ام الحريات وقد فعلت ما فعلت لانها تريد ان ينصهر المجتمع مع بعضهم البعض وتكون فرنسا هي الرابط وليس الدين وعلى فكره ترى امنعوها بس بالمدارس لانهم يريدون زرع حب الوطن بالشباب وهذا حق لهم

وانكار منكر في دوله ليست مسلمه فهي ليست من شأننا لانها دوله علمانيه وليست اسلاميه ولا يمثل فيها المسلمين الاغلبيه اذا فانكار المنكر لا ينطبق عليها فلو اردنا ان ننكر المنكر ماراح انخلص لانها غارقه بالمنكرات الاسلاميه

وبالنسبه لنصرة الدين كما ذكرتي اولا هناك اشكاليه على فرضية الحجاب بين المفتين والتاريخ الاسلامي ثانيا هم لم يغلقوا المساجد وقتلوا المسلمين او انهم رفضوا ان يقيم المسلمين شعائرهم وفليكن هذا بالاذهان

وبالنسبه لاحياء التراث لست اقول انهم مدانون او ما شابه ولكني كنت اريد ان اضع مثالا وهذا اقرب مثال فهو قريب بالزمن الان

وايضا لا يجوز ان ندافع عنها ونحن لا نعلم ان كانت مدانه ام لا لهذا لم احكم عليهم اذا كانوا مدانين او لا وقد ذكرت المثال فقط كمثال فقط لا غير

هذا طبيعي ليس هناك تيار كامل واعتقد ان كنت تتابعين المدونه قد تجدين نقدي يتجه الى كل التيارات هذا غير دعوتي لتيار جديد يجمع اطياف المجتمع :)

انا موضوع المنع فهنا اختلف معك لا اعتقد ان هيفا ستجعل الناس يتغيبون عن الوعي او انهم ينسون دينهم ولا تنسي ان ليس كل الناس يحبون ان يذهبوا الى الحفلات وانا منهم فانا لا احب الحفلات

ولكن كيف لنا ان نصبح دوله سياحيه ونحن نمنع هذا وذاك ؟؟ فالذي يريد ان يحضر فليحضر والذي لا يريد ليس مجبور ان يذهب للحفله يا اختي العزيزه

وبالنسبه لستار اكاديمي اولا انا لا احب هذا البرنامج الهابط بوجهة نظري ولكن البنات المتراقصات لا يرقصون بالكويت انما بلبنان وايضا الذي يريد ان يشترك فسيشترك سواء عمل المقابله بالكويت او الامارات والطلاب السعوديين خير مثال فهم منعوا شيء ممكن ان يفعلوه بمكان اخر وايضا كانت المقابلات خاصه وليست عامه اي انهم موجودين بالفندق والذي يريد ان يذهب فليذهب ومن لا يرد يعطيهم طاف

مثلما نطالب الدول الاخرى بالحريه ايضا ان نقتنع نحن بالحريه فهذه الاشياء التي كانت موجوده بالاساس لا اعتقد انها ستفسد الجيل والديل اجيال السبعينات والستينات فهم لم ينحرفوا مثل ما انحرف هذا الجيل

فالخطأ ليس من هذه البرامج او الحفلات انما طريقة التربيه ونقص التوعيه بوجهة نظري

ولك ايضا :)

Eng_Q8 said...

سلوزه

اييييي :)

Eng_Q8 said...

ذا ثينكر

الله يسلمك

اهو خوش ريال بس الله يهداه مخه مقفل مو راضي يسمع

العفو ... انشالله :)

---------------------------------

انيموس

للاسف هناك من هم مثل ما ذكرت

شكرا للمرور :)

=================================

Anonymous said...

القضاء والقدر اصبح شماعة للعاجزين

الميكيافيلية السلفية الاسلامية

Mamloo7a Q8ia said...

يا حافظ ليش من ذنوبناااا؟؟؟
الحمدلله احنا مسلمين واغلبيتنا ملتزمين
ونقوم بعباداتنا على اكمل وجه
ليش مو تخفيف ذنوب؟؟
ليش مو خيره؟؟
مو يقولون انه زين حق النخل
سبحانه ربي رحيم بعباده

ليش دايما الجانب السلبي؟؟
ليش يا ربي ما يفكرون بايجابيه؟؟
كل شي الله مقدره على ابن آدم
فيه له خير
حتى لو يشوفه هو شر

الحمدلله والشكر على كل شي

|:| DUBAI |:| said...

مرحبا

الايميل صحيح

يربوا يسون مطر صناعي عندنا

: )

!!

Salah said...

اللـــــــــــــــــهم لا اعتــــــــــــــــــــــــــراض

Kuwaitiya said...

والله مادري شقول
هههههههههههههه كل ماقلنا شي لاحرام ولا هذا قدر الله؟؟
ناس رجعيه اسمحلي وماعندهم سالفه

مطقوق كافي يقحصون بالارض مايبون يقحصون بالسما هههههههه

تحياتي

http://3tawyatelfreej.blogspot.com/

Sn3a said...

بش مهندس
زميلك ماراح تقدر تغيره او تقنعه
المشكله ان الدين بسيط مايحتاج كل هذا
الدين مايطلب مه نصدر الاحكام
ونوزع صكوك الغفران


اما بالنسبه للمطر الصناعي
فهالشي ضروري يفكرون فيه هني
الوضع لايطاق
الحمدلله على كل حال
لكن مو غلط استخدام اي تكنولوجي


انا ودي احد يفهملنا يمسك مناصب بالديره
ملينا من الديناصورات

فريج سعود said...

صاحبك اكيد ما كان رابط حزام الامان لانه يمنع القضاء والفدر صح ؟

بو محمد said...

مهندسنا
شنو وضع الرطوبه؟

حياتي هدف مو عبث said...

تصدق أعرف مجموعة كبيرة من الناس
لما أسووي شي جدامهم من أجل راحتي وسعادتي بالدنيا

يقولون لي سعادتي بالأخرة

طبعا كلامهم صحيح

لكن تدري شنو الغلط

إنهم يفرقون السعادة

يعني عندهم السعادة بس بالأخرة

وهذا غلط

لأن السعادة لازم تكون بالدنيا والأخرة


وبعدين ما أحب نوعية اللي يبون سيرة المووت كل ساعة

يعني ليش الموت دايما على بالهم

اهوا لازم يكون على البال

بس مو لازم أعمل أكثر حتى أحصل على راحة البال في الدنيا والأخرة

وراحة المووت

بس قبل الموت في حياة

يعني لازم أعيش حياتي عدل
وأعبد ربي وأعدل نفسي وأتعلم
عشان أكون فعلاً حققت الهدف من وجودي


..


أهم شي إني هديت البوست كله وخذيت جزئية صغييرة

:))


يزاك الله خير

;p

راعي تنكر said...

والمشكله يسبون اوربا وتلاقيهم بالصيف معششين هناك

MaCHBoS said...

انا بعرف يدعون للاسلام بالدول المسيحيه و البوذيه الخ ,,,
و اذا اي ديانه تبي تدعي لديانتها بدوله اسلاميه لا ليييش؟؟
أكبر دليل انه الاسلاميين حلال لهم و حرام على غيرهم

أبــو بنــــدر said...

http://www.islamlight.net/index.php?option=content&task=view&id=10006

مهندسنا شوف الرابط
----
wa6an-alnhar
الدين افيون الشعوب ؟؟؟؟


كلامك غير صحيح

الصوفيه هي أفيون الشعوب

وأذا تبي تعرف كييف أزدهر اوربا في عصر النهضه شوف هذا البرنامج من البي بي سي !

برنامج التاريخ الإسلامي في أوروبا:

ج1

http://www.youtube.com/watch?v=mh0wEDZFxps
ج2

http://www.youtube.com/watch?v=QyqGG5TAEA4

ج3

http://www.youtube.com/watch?v=9irqhCZ_tzc

ج4

http://www.youtube.com/watch?v=XhtBcDoXc84

ج5

http://www.youtube.com/watch?v=769iMizJP2k

ج6

http://www.youtube.com/watch?v=M7HzsfO1f3g

ج7

http://www.youtube.com/watch?v=NgaqYq3PToA

ج8

http://www.youtube.com/watch?v=losq6Sri-_Y

ج9

http://www.youtube.com/watch?v=mgLJZX8x6aw


أكره شي عندي لما الغرب ينصف المسلمين وأبناء جلدتنا يجحدون

Blog 3amty said...

فجأة حسيت أنك تدوام بتلفزيون الوطن (حشاك)
وزيملك هذا بوقتادة

:q

_________

يا يبة التيار المتأسلم وصل لمرحة من التضخم وقام يبطش، والمشكلة أن مو عارف حجمة الصغير بالمجتمع !

:))))

يبيلة بوست عن هالموضوع !

marshmallows said...

لو انا منك جان بطلت الباب و شت الي يمك و قلتله اوبس سوري قضاء و قدر =\

ناس عينهم تبططت من الغبار ترى دبي سوت سالفت المطر الصناعي امس خالي قالي السالفه بس للاسف اعلا من مستواي سو مافهمت بس عرفت ان هالشي صار بالامارات

يالله استانست الحين يت رطوبه =\

بـنـت بـطنـهـا said...

استغفر الله العظيم

اولا انا ما ادري ليش دايما يربطون الليبرالية بالعلمانية ثانيا اهما ما يدرون انهم قاعد يشوهون صورة الدين الدين مو جذيه يا جماعة الدين عصارة السماحة والأخلاق والعلم والود بين البشر .. مهندسنا زميلك يبيله احد يصحيه شوي من اللي اهو فيه .. بس بيني وبينك على الرغم اني اختلف معاهم بفرض اشياء ومنع اشياء لكن ستار اكاديمي واللي مثله تفاهه بصراحة لكن المبدأ اهو احترام الراي والراي الآخر بالنسبة لي حتى لو توجهاتي ما اتفقت مع الطرف الثاني .
لكن طريقتهم هذي قاعده ترجعنا ثلاثين سنه لي ورى :(
واللي يحر ان اغلبهم أهدافهم سياسية بحته
عسى الله يصلح الحال
مو جني استنيت ؟؟ لول انا ما ادري ليش في بلوقك وبلوق كويت استن شوفولي حل

كويــتي لايــعه كبــده said...

كلامك لا يعلـــــــى عليــــــــه!!1

ولا تقارن الكويت بدبي... تتعب ويعورك قلبك!1

بوست ممتاز والله موفقه
:)

Eng_Q8 said...

محسد

صحيح 100% عدل كلامك

--------------------------------

مملوحه

عاد اتصدقين قلتله عن النخل وهم مو مقتنع يقوله ماله شغل


الحمدلله والشكر على نعمة العقل

---------------------------------

دبي

يا سلام عليكم

تستاهلون كل خير يا اهل الامارات

----------------------------------

صلاح

كمشوه مع عايده رياض :p

---------------------------------

جوتجيه

اي والله رجعيه

----------------------------------

سنعه

صحيح

لا مو هالديره ماشيه على نظام عتيج الصوف ولا يديد البريسم و هذا ولدنا

---------------------------------

فريج سعود

صح جنك تدري

----------------------------------

بو حمود

الرطوبه يقال انها شيوعيه والله اعلم

----------------------------------

حياتي هدف

صحيح صحيح وهالناس الي تتكلمين عنهم وايد

عادي المهم توصل المعلومه :)

----------------------------------

راعي تنكر

الي يكلمني معشعش بتايلند وانت الصاج

----------------------------------

مجبوس

مو الله يسلمك الاسلام هو الدين الصحيح حسبالهم كل الناس يعرفون هالشي مالت على الباميه انا اقول

----------------------------------

بو بندر

انشالله

---

ابناء الغرب ينصفون الاسلام الحقيقي المنفتح اما اهني يبون كل شي مصكر وانا اخوك

----------------------------------

بلوق عمتي

لوووووووووووووووول

يبيله :)

----------------------------------

مارشملو


لا حرام خوش ريا ل

على الاقل الرطوبه لي قعدتي بالسياره اتشوفين الدنيا حلوه

انا فيني حساسيه ف بكلا الحالتين انا متأذي

----------------------------------

بنت بطنها

على طاري الاهداف السياسيه نطري علي شوي :)

استني يبا البلوق بلوقج وانتي الي داشه واحنا الي طالعين

والحل انج تاخذين راحتج لانج بين اهلج وناسج :)

----------------------------------

كويتي لايعه جبده

ميرسي :p

اي والله عوار قلب

مشكور من ذوقك


اهم شي موفقه متعود على البنات يالشيطان :p

لا تشوف ويهي والله تسحب حرف الهاء وتتحسف انك قلته لوووووووووووووول

---------------------------------

wa6an-alnhar said...

مهندس
بعد اذنك
:)

ابو بندر

مابي انفخ بجربة مفضوضه اكثر من اللازم علشان ما اتعب نفسي
:)
بس اذا فعلا كلامي مو صحيح ابيك بس تطالع بعض الامثلة اللي على ارض الواقع

ايران والسعودية
من اكث الانظمة تمسكا بنظام التخدير بالدين و تطبقه بالقوه
شنو نتاج هذا التصرف على اقل تقدير ؟؟
قمع للحرية
انحراف
شذوذ
ضياع الشباب
و ما خفى اعظم

و ابشركم ان هذا التوجه بدا زحفه للكويت و ابشرو بالنتائج اللي قمنا نشوف ثمارها من الحين :p

مابي اذكرك اشلون كان حالنا و حال تنميتنا يوم كنا (احرار) و اشلون صرنا من سيء الى اسوء من بدا اسلوب التخدير بالدين
لانك اكيد عارف الفرق المؤلم

Hamad Alderbas said...

اليوم يقولك ان تركيا وصلت لنصف النهائي لأن حكومتها اسلامية :)

شقران said...

مهندسنا العزيز


هل المعلومة عن السيطرة على الغبار في دبي حقيقية؟


وبالنسبة لايطاليا أقولك

Hard luck

اشرايك بالعنقريزي
:)



وتحياتي لك

Eng_Q8 said...

وطن

اخذي راحتج

----------------------------------

حمد

عشان جذي صاروا المركز الثالث بكاس العالم

تعال بكاس العالم كان الي فايز هناك الحزب العلماني :)

---------------------------------

شقران

مو السيطره على الغبار انما الامطار الصناعيه نعم صحيحه

جيك على كومنت دبي :)

فريق مالعب ... وبعدين احسن خل يرد ليبي
--------------------------------

Hamad Alderbas said...

مهندسنا العزيز

بس ذيج الايام ما حاشهم غبار شالسالفة :)

Eng_Q8 said...

حمد

السالفه ان الله بيعطيهم الدنيا واحنا الاخره