يا كويت من وين ابتدي

هناك مواضيع كثيره جدا من الممكن الكتابه عنها بهذا الوقت بالذات ... ولكنني بدأت اشعر بالغثيان مما يطرح الان على الساحه فانا اتمنى ان تبدأ المشاريع التنمويه والكل ينادي بها ولكن اعضاء مجلس الامه معطينا اذن من طين واذن من عجين لهذا سأكتب هذا الموضوع على هيئة نقاط

.

-1-

.

الخمسين دينار ستقر .. وبما انها منقره منقره ابي افهم شغله ... اشمعنى الخمسين حق الي معاشاتهم اقل من الف ؟؟؟ راح ارد واحط مثال مثل الي حطيته من قبل الحين الي معاشه 990 وواحد معاشه 1000 ....الي معاشه 990 راح يصير معاشه 1040 دينار يعني راح يطق معاش بو الف ... مو ظلم ؟؟؟ يا تقرونها حق الكل يا لا تقرونها ... كلها خمسين دينار حسبي الله عليكم وماادري ليش مسوينها وايد مهمه والله لو اعزم العرزاله و فريج سعود على جاوشو يطلع علي فوق الخمسين يعني ما تكفي حق مطعم هالايام ماادري شراح اتسوي

.

بدال ما تقرون الخمسين من صوب وياخذونها التجار من صوب انا عندي لكم اقتراح .. فعلوا القوانين ... خلوا وزارة التجاره وحماية المستهلك يشتغلون شوي ... الحين الضرايب بالكويت من ارخص الضرايب بالعالم ويقولون غلاء عيل لو الضريبه مثل ضرايب اوروبا شتسوون ؟؟؟ ياجماعه ما يصير قوطي البيبسي بمكان ب100 فلس وبمكان ثاني ربع دينار وما يصير واحد يشتري بضاعه بدينار ويبيعها بعشره ومايصير التاجر يسعر البضاعه على كيفه وما يصير صاحب العقار يرفع الايجار بمزاجه وما يصير كل ما صارت زياده زاد كل شي .. لابد من وجود رقابه لابد من وضع قوانين تردع المتلاعبين بالاسعار ... اذا بكل زياده بتزيد الاسعار لا طبنا ولا غدا الشر وخلوا الخمسين لكم انا متنازل عنها مع بلوق عمتي

.

---------------------------------------

.

-2-

.

لحد الحين انا ماني فاهم اشلون بيسوون صندوق المعسرين وعلى اي اساس بيقولون هذا معسر ؟؟ يعني لو واحد عنده قرض بالبنك يعني راح يسحبون من معاشه دايركت يعني بيدفع غصبا عنه اشلون بيعرفون اذا معسر والا لا ؟؟؟ بصراحه انا عندي علامة استفهام كبيره على هالصندوق واللبيب بالاشارة يفهم

.

--------------------------------------

.

-3-

.

الهجمه الشنعاء الي صايره على احمد السعدون من بعض الكتاب ماادري ليش ؟؟ هل هم محترين لان الناس كلهم تحمدتله بالسلامه والا شالموضوع ؟؟ عفوا يا جماعه هذا احمد السعدون ورغم اختلافي معه ببعض القضايا بس تاريخه السياسي يحتم علينا اننا نتحمدله بالسلامه ويستاهل ابو عبدالعزيز وما تشوف شر

.

والشيء بالشيء يذكر مسلم البراك هم شابين عليه على سالفة ال100 مليون ... الريال اجتهد وتكلم عن الموضوع لين طلع تقرير ديوان المحاسبه اشفيكم عليه ... يعني لحظه اول مره تدرون ان مسلم يصارخ ؟!؟

.

------------------------------------

.

-4-

.

الى احمد المليفي ... بما انك تريد ان تستجوب رئيس مجلس الوزراء على خلفية المصروفات التي ذكرتها بالوثائق .. لماذا لم تنظر للمليارات المهدوره بسبب التوريق ... بصراحه يا بو انس انا ارى انك اتهدي الموضوع شوي واتأجله لي بعد العطله لا اريد ان تكون طرف بما يقولون عنه تأزيم مع ان الاستجواب حق من حقوقك ولكن لا تكن شماعه لما قد ياتي من تبعات

.

وايضا بالنسبه للتجنيس وانت العضو المهتم بهذه القضيه ... كيف سيدخل ملف ابناء الكويتيات مع ملفات الاعمال الجليله والبدون على حسب ما ذكرت الصحف قبل اسبوعين او ثلاث ؟؟

.

-----------------------------------

.

-5-

.

شرطيات بالكويت ... اريد ان اسال اليست الشرطيات من الظواهر السلبيه ؟؟ وبعدين مو ساعات عمل المرأه يجب ان لا تتعدى الثامنه مساء ؟؟؟ انزين هذي شرطيه اداوم بس الصبح ؟؟؟ وبعدين اذا الشرطيه سوت تفتيش ماراح يتحرش فيها واحد من المصبنجيه ؟؟؟ وبعدين لما يقعدون بالمخفر ماراح يكون في اختلاط ؟؟ وين لجنة الظواهر السلبيه ؟؟؟ طبعا ما يقدرون الا على الجامعه والشباب ... ناطر تصريحهم حق هالموضوع اكيد بيكون مبهم ومضحك هذا اذا صرحوا ... وسلملي على الظواهر السلبيه

.

-----------------------------------

.

-6-

.

الى حماة الدستور ... وين الديمقراطيه وانتوا تبون تسجنون خلق الله عشان بس قالوا رأيهم ؟؟

.

-----------------------------------

.

-7-

.

هناك من الكتاب من هاجم د.احمد الخطيب بدوون سبب مقنع ... اقول ماراح توصل مواصيله استريح بس الريال ساكت ما تكلم اشتبي تتكلم عنه ؟؟؟ والله حاله... احلق نص شنبك الي كل يوم قايل حق جم واحد اتعرفه يدافع عنك بالمقالات تالي تكلم عن الخطيب

.

-----------------------------------

.

-8-

.

الداعيه نبيل بن علي العوضي ... اي ال بن صحيحه حاطينها بكذا موقع من المواقع لزوم البرستيج الديني ...الي اعرفه انك داعيه ... ليش تدخل بالسياسه ؟؟ وليش توصف الي يخالفك باوصاف اخجل ان اكتبها ؟؟؟ وليش الي ما يبي يودي ولده عندكم تقوله موتوا بغيضكم فالمراقص والخمور راح يطيحون بجبدكم ؟؟؟ هل هذه سماحة الدين التي تعرفها ؟؟؟ يا اخي الكريم اهل الكويت الذين لايريدون الاختلاط معكم ليسوا من محبي المراقص والخمور على حسب ما ذكرت انما هم مسلمون وعارفين دينهم وعيب تتكلم عن الناس جذي ... وبعد هم صاير مروان المطوع اتحلل الحالات الاجتماعيه ومادري شتسوي ؟؟ اذا محمد العوضي تكلم انقول اوكي الريال مفكر وممكن نتحاور وياه ومحمد العوضي انسان مثقف وقاريء جيد ويوصل المعلومه بلا تجريح وان خارها بعض المرات لكن انت اشلون انتفاهم وياك ؟؟؟ انقولك يمين اتقول يسار وكل ساعه اهل الكويت واهل الكويت مو احنا اهل الكويت وانعرف شنو اهم اهل الكويت الا اذا اهل الكويت عندك غير اهل الكويت الي انعرفهم هذا حجي ثاني ... عسى الله يهديك يا نبيل بن علي عوضي

.

------------------------------------

..

طولت وايد ادري بس منبطه جبدي وودي اكمل بس ماابيكم تزهقون ... اخيرا ايطاليا طلعوا وهولندا اطلعوا ما بقى لنا الا روسيا ... يستاهل أرشفين

.

------------------------------------

.

.

اللـــــــــــــــــــهم لا اعتــــــــــــــــــــــــــــــــراض