Monday, June 23, 2008

يا كويت من وين ابتدي

هناك مواضيع كثيره جدا من الممكن الكتابه عنها بهذا الوقت بالذات ... ولكنني بدأت اشعر بالغثيان مما يطرح الان على الساحه فانا اتمنى ان تبدأ المشاريع التنمويه والكل ينادي بها ولكن اعضاء مجلس الامه معطينا اذن من طين واذن من عجين لهذا سأكتب هذا الموضوع على هيئة نقاط
.
-1-
.
الخمسين دينار ستقر .. وبما انها منقره منقره ابي افهم شغله ... اشمعنى الخمسين حق الي معاشاتهم اقل من الف ؟؟؟ راح ارد واحط مثال مثل الي حطيته من قبل الحين الي معاشه 990 وواحد معاشه 1000 ....الي معاشه 990 راح يصير معاشه 1040 دينار يعني راح يطق معاش بو الف ... مو ظلم ؟؟؟ يا تقرونها حق الكل يا لا تقرونها ... كلها خمسين دينار حسبي الله عليكم وماادري ليش مسوينها وايد مهمه والله لو اعزم العرزاله و فريج سعود على جاوشو يطلع علي فوق الخمسين يعني ما تكفي حق مطعم هالايام ماادري شراح اتسوي
.
بدال ما تقرون الخمسين من صوب وياخذونها التجار من صوب انا عندي لكم اقتراح .. فعلوا القوانين ... خلوا وزارة التجاره وحماية المستهلك يشتغلون شوي ... الحين الضرايب بالكويت من ارخص الضرايب بالعالم ويقولون غلاء عيل لو الضريبه مثل ضرايب اوروبا شتسوون ؟؟؟ ياجماعه ما يصير قوطي البيبسي بمكان ب100 فلس وبمكان ثاني ربع دينار وما يصير واحد يشتري بضاعه بدينار ويبيعها بعشره ومايصير التاجر يسعر البضاعه على كيفه وما يصير صاحب العقار يرفع الايجار بمزاجه وما يصير كل ما صارت زياده زاد كل شي .. لابد من وجود رقابه لابد من وضع قوانين تردع المتلاعبين بالاسعار ... اذا بكل زياده بتزيد الاسعار لا طبنا ولا غدا الشر وخلوا الخمسين لكم انا متنازل عنها مع بلوق عمتي
.
---------------------------------------
.
-2-
.
لحد الحين انا ماني فاهم اشلون بيسوون صندوق المعسرين وعلى اي اساس بيقولون هذا معسر ؟؟ يعني لو واحد عنده قرض بالبنك يعني راح يسحبون من معاشه دايركت يعني بيدفع غصبا عنه اشلون بيعرفون اذا معسر والا لا ؟؟؟ بصراحه انا عندي علامة استفهام كبيره على هالصندوق واللبيب بالاشارة يفهم
.
--------------------------------------
.
-3-
.
الهجمه الشنعاء الي صايره على احمد السعدون من بعض الكتاب ماادري ليش ؟؟ هل هم محترين لان الناس كلهم تحمدتله بالسلامه والا شالموضوع ؟؟ عفوا يا جماعه هذا احمد السعدون ورغم اختلافي معه ببعض القضايا بس تاريخه السياسي يحتم علينا اننا نتحمدله بالسلامه ويستاهل ابو عبدالعزيز وما تشوف شر
.
والشيء بالشيء يذكر مسلم البراك هم شابين عليه على سالفة ال100 مليون ... الريال اجتهد وتكلم عن الموضوع لين طلع تقرير ديوان المحاسبه اشفيكم عليه ... يعني لحظه اول مره تدرون ان مسلم يصارخ ؟!؟
.
------------------------------------
.
-4-
.
الى احمد المليفي ... بما انك تريد ان تستجوب رئيس مجلس الوزراء على خلفية المصروفات التي ذكرتها بالوثائق .. لماذا لم تنظر للمليارات المهدوره بسبب التوريق ... بصراحه يا بو انس انا ارى انك اتهدي الموضوع شوي واتأجله لي بعد العطله لا اريد ان تكون طرف بما يقولون عنه تأزيم مع ان الاستجواب حق من حقوقك ولكن لا تكن شماعه لما قد ياتي من تبعات
.
وايضا بالنسبه للتجنيس وانت العضو المهتم بهذه القضيه ... كيف سيدخل ملف ابناء الكويتيات مع ملفات الاعمال الجليله والبدون على حسب ما ذكرت الصحف قبل اسبوعين او ثلاث ؟؟
.
-----------------------------------
.
-5-
.
شرطيات بالكويت ... اريد ان اسال اليست الشرطيات من الظواهر السلبيه ؟؟ وبعدين مو ساعات عمل المرأه يجب ان لا تتعدى الثامنه مساء ؟؟؟ انزين هذي شرطيه اداوم بس الصبح ؟؟؟ وبعدين اذا الشرطيه سوت تفتيش ماراح يتحرش فيها واحد من المصبنجيه ؟؟؟ وبعدين لما يقعدون بالمخفر ماراح يكون في اختلاط ؟؟ وين لجنة الظواهر السلبيه ؟؟؟ طبعا ما يقدرون الا على الجامعه والشباب ... ناطر تصريحهم حق هالموضوع اكيد بيكون مبهم ومضحك هذا اذا صرحوا ... وسلملي على الظواهر السلبيه
.
-----------------------------------
.
-6-
.
الى حماة الدستور ... وين الديمقراطيه وانتوا تبون تسجنون خلق الله عشان بس قالوا رأيهم ؟؟
.
-----------------------------------
.
-7-
.
هناك من الكتاب من هاجم د.احمد الخطيب بدوون سبب مقنع ... اقول ماراح توصل مواصيله استريح بس الريال ساكت ما تكلم اشتبي تتكلم عنه ؟؟؟ والله حاله... احلق نص شنبك الي كل يوم قايل حق جم واحد اتعرفه يدافع عنك بالمقالات تالي تكلم عن الخطيب
.
-----------------------------------
.
-8-
.
الداعيه نبيل بن علي العوضي ... اي ال بن صحيحه حاطينها بكذا موقع من المواقع لزوم البرستيج الديني ...الي اعرفه انك داعيه ... ليش تدخل بالسياسه ؟؟ وليش توصف الي يخالفك باوصاف اخجل ان اكتبها ؟؟؟ وليش الي ما يبي يودي ولده عندكم تقوله موتوا بغيضكم فالمراقص والخمور راح يطيحون بجبدكم ؟؟؟ هل هذه سماحة الدين التي تعرفها ؟؟؟ يا اخي الكريم اهل الكويت الذين لايريدون الاختلاط معكم ليسوا من محبي المراقص والخمور على حسب ما ذكرت انما هم مسلمون وعارفين دينهم وعيب تتكلم عن الناس جذي ... وبعد هم صاير مروان المطوع اتحلل الحالات الاجتماعيه ومادري شتسوي ؟؟ اذا محمد العوضي تكلم انقول اوكي الريال مفكر وممكن نتحاور وياه ومحمد العوضي انسان مثقف وقاريء جيد ويوصل المعلومه بلا تجريح وان خارها بعض المرات لكن انت اشلون انتفاهم وياك ؟؟؟ انقولك يمين اتقول يسار وكل ساعه اهل الكويت واهل الكويت مو احنا اهل الكويت وانعرف شنو اهم اهل الكويت الا اذا اهل الكويت عندك غير اهل الكويت الي انعرفهم هذا حجي ثاني ... عسى الله يهديك يا نبيل بن علي عوضي
.
------------------------------------
..
طولت وايد ادري بس منبطه جبدي وودي اكمل بس ماابيكم تزهقون ... اخيرا ايطاليا طلعوا وهولندا اطلعوا ما بقى لنا الا روسيا ... يستاهل أرشفين
.
------------------------------------
.
.
اللـــــــــــــــــــهم لا اعتــــــــــــــــــــــــــــــــراض

20 comments:

Hamad Alderbas said...

فشلونا الطليان امس

والمدرب قاهرني وحارني وباط جبدي

الزين said...

إففففف

حررر

وبوستك زاد الحروره

وين ما نطقها ضيقة خلق

عطونا شي يفرفش رحم الله والديكم

:$

Eng_Q8 said...

حمد

خلني ساكت ترى من امس مو نايم الا ساعه من القهر

---------------------------------

الزين

ممنوع

بعدين انصير من الظواهر السلبيه

---------------------------------

الزين said...

ok

sooo whats with that

على الأقل نسوي لهم سالفة
ويصير عندهم شغل

يحاولون يصلحونا

ما يشوفون شر اقول

Eng_Q8 said...

الزين

لوووووووووووووووووووول

لا يبا انا مالي شغل غصب مستحمل اشوفهم بالجرايد هالدور يتكلمون عني راح يصير شي مو زين :p

Mok said...

عندما يكون الراي الاخرر يحكم على الاخرين بالكفر

يعني الطرف الكافر سيكون طعم لذيذ للعشاق الدماء

ولهذا الرمي بالكفر بمجتمعنا لا تعني حرية الراي بل تعني اباحة الدم

فعلاجه درس بالقانون

ختى لا يتمادون غدا بامور اكبر اعني المتطرفين دينيا

Eng_Q8 said...

موك

واذا القانون يحميهم ؟

Mok said...

ما اعتقد القانون يحمي من يكفر الاخرين

لانه بمثابة السب

عموما محد بيرفع قضية عليهم

كان مجرد تساؤلات

Eng_Q8 said...

موك

واشلون ترفع عليه قضيه واهو ما ياب طاري اسم اهني المشكله يا موك

بس لي متى اهم يكفرون الي يبونه ويرضون عن الي يبونه متى الناس تعطيهم طااف

Mok said...

هم قالوا الرافضون للجنة الظواهر الدخيلة

ومن يملك الصفة القانونية هم النواب الرافضين لهذه اللجنة لانهم هم المعنينين بصفة رسمية وهم لهم الحق برفع الدعاوى


وبعض المقالات اشارت للاسماء النواب بوسط التكفير

اكرر محد بيرفع دعوى لكن تاكد هذي ليس حرية الراي

تكفير العن من السب خاصه عندما يخرج التكفير من حماة الاخلاق زعموا فيصدقهم بعض المغيبين عن الواقع

وناسف على الازعاج عزيزي

فتى الجبل said...

زيادة ال 50 دك يقصدون فيها لا تخلي عيالك يكملون جامعة
لأن اللي حاط ريل على ريل وما يشتغل بتييله الزيادة واللي يكرف ما راح تييله
اما المعسرين فقصدهم فيها اخذ قرض ولا تسدده والحكومة تسدد عنك
اما اللي محترم نفسه فخله يطق راسه بالطوفة
وهذي اهيا عدالة المتاسلمين

Anonymous said...

نبيل العوضي !!! شرايك بواحد يكتب بجريدة حرامي .. شتقول عنه

Sn3a said...

قلبك متروسه خيو

بس صدقت

خل يشيل شنبه ويفكنا
ياييبلنا واحد عراقي وواحد مادري شنو اصله عيب عليك لو انا منه ما ارد اكتب عقب هالكسره القويه

بس نبيل بن علي
حلوة منه



يعطيك العاافيه

darkness said...

حسبي على الايام

و الحظ الردي


:(

secret said...

التحمد بالسلامة من زمان موجود .. مو شي دخيل علينا :)

و بو نص شارب تتوقع اي نص يحلق اليمين ولا اليسار؟

و على طاري نبيل بن علي ترى الحين هبة عند الدينين كل شوي يتكلمون عن المراقص و الخمور و يلعبون بالعواطف علشان من ترد عليه يقولك هاااااااا ما تدري ان وراك حساب و كتاب .. يا بابا لحظة بس يعني يا مراقص و خمور يا مخيمات و احزمة ناسفة

و بعدين اذا وراي حساب و كتاب انت شكو؟ وصي علي؟

و بعدين وين فيه هالمراقص و الخمور؟؟

فريج سعود said...

يا خبر اليوم بفلوس بكرة هم بفلوس


اقول شخبار ايطاليا ؟

Kuwait said...

توني واصله فرجينيا وصج صج ما مداني أقرى بس ان شاء الله راده باجر اكتب كومنت سنع بس اليوم ييت اثبت وجودي :)

Anonymous said...

سؤال يا مهندسنا اللي معاشه 1000 و فوق ما فكرت فيها ليش معاشه جذي ؟

مو درس و اجتهد و لاعت جبده من الدراسة و بالتالي يكافئون اللي ما درس و اللي معاشه اقل من 1000؟

شنو هالعدل هذا !!! يكافئون اللي مو دارس و اللي دارس يخلونه يولي

قهر والله قهر
بس شاقول غير خذ من جيسه و عايده

يعطيك العافيو ابوي

Eng_Q8 said...

موك

ومنو النواب الرافضين مافي اي شي رسمي لي الحين الا صالح الملا هذا الي انا اشوفه

بالنسبه للنواب وتكفيرهم ارجو الاشاره لهذه المقالات للاهميه

صحيح انا معاك

بالعكس استمتعت بالحوار معك

---------------------------------

فتى الجبل

اللهم لا اعتراااااااااض

----------------------------------

محسد

اقول عنه منافق لانه يكتب عند حرامي ويدافع عن الشرف والامانه

----------------------------------

سنعه

اي والله متروسه

اي والله

اهو كاتبها جذي :)

الله يعافيج

----------------------------------

داركنس

الحظ الردي لاحقني لاحقني وانا اخيج

---------------------------------

سر

قولهم

مادري والله اتصدق

ماادري وينهم انا لي الحين ما شفتهم بصراحه

---------------------------------

فريج سعود

والي بالجدر يطلعه الملاس

والله يقولون رطوبه :p

----------------------------------

كويت

الحمدلله على السلامه

اوكي ناطرج ولا تنسين الروب :p

---------------------------------

انيموس

جبتها عالجرح جنك ما دريت

كتبت عن هالسالفه من قبل وما بغيت اعيدها لانك لي تحجيت قالوا شايف نفسه فوق الناس يعني مهندس

خلها على الله يا يبا والله شكلها الكويت بتساوى معاشاتهم

---------------------------------

أبــو بنــــدر said...

جاءالناس إلى عمر رضي الله تعالى عنه وقالوا: (غلا اللحم فسعره لنا، فقال: أرخصوه أنتم!) نحن نشتكي غلا السعر، واللحم عند الجزارين، ونحن أصحاب الحاجة، فتقول: أرخصوه أنتم! وهل نملكه حتى نرخصه؟! وكيف نرخصه وليس في أيدينا؟ قال : اتركوه لهم.