Monday, June 30, 2008

شهادات تسقط دوله !؟

انت شنو شهادتك ؟ .. يا بيه انا عندي دبلوم تجاره ... انزين دبلوم تجاره شكو تشتغل حارس امن ليش ؟ .. اكل العيش .. وليش ما توظفت بشهادتك ؟ .. هي كل الشهاده شهاده والا كل جامعه جامعه ؟؟ ... حديث حقيقي تذكرته مع احد حراس الامن بالكليه من الاخوه المصريين لا اعلم لماذا تذكرته
.
من المعروف ان الدوله تقاس بتطورها بجميع المجالات والطاقات البشريه من اهل عوامل تطور الدوله وكيف اذا كانوا مواطنوا هذه الدوله اغلبهم من حملة الشهادات الجامعيه سواء طب او هندسه او محاسبه وغيرها ؟ ... طبعا سوف تقول ان هؤلاء الجامعيين هم من سيرفع هذه الدوله الى الاعلى لما يحملوه من فكر وايضا شهاده تؤهلهم على خوض غمار التطور من اوسع ابوابه ... ولكن هذا ليس بالكويت
.
بالكويت ماشاء الله الكل يريد ان يكمل دراسته ولكن هناك من يكمل دراسته بجامعات لا اعرف ماذا اسميها .. التشيك الفلبين سولوفاكيا الهند مصر الاردن اسكتلندا وغيرها من الدول التي لم اذكرها ... ليست كل الدول التي ذكرت سينطبق عليها ما اقوله ولكن اغلبها او اغلب جامعاتها
.
عندما تجد محاسب لا يعرف جدول الضرب وعندما ترى مهندسا ميكانيكيا لا يعرف الفرق بين التورباين والكومبريسور وعندما تجد طبيب لا يعطي سوى البندول ... ماذا تقول ؟؟ انها كارثه وجرم بحق الوطن فكيف لمن يذهب ليمتحن فقط وبعضهم يتقدم للامتحان وهو سكران يكون مثل من درس وتعلم واخذ شهادته بضمير ... وهنا لا استثني جامعة الكويت او التطبيقي او غيرهم وكلنا يعلم السلطه الي تصير بالتعليم ببعض الكليات والمعاهد عندنا
.
هذه المشكله التي نعاني منها الان لن تظهر سلبياتها الان وان ظهرت في معظم الاحيان ولكنها ستؤثر على الكويت بالمستقبل القريب فهناك من قام بشراء الشهاده وبروزها امامه ومسك المنصب وهو لا يفقه شيء بما تعلم .. كيف سيعمل كيف سيرتقي بمستوى العمل ؟؟ كيف سيفهم العمل الذي يقوم به
.
التعليم العالي الي وقف الاعتراف بجامعه مصريه واعترف بثانيه لان في شخص متنفذ فيها شريك بهالجامعه الخاصه .. ماشالله ما يعرف الا يوقف جامعات البحرين وترك الجامعات الباجي .. وشنو بيسوون يبون يحددون اعداد الكويتيين الي ينقبلون بالجامعات ؟!؟ بدال ما توقف هالجامعات الي مو ماخذين منها الا المتخلفين اتروح واتحدد ليش عشان الي عنده واسطه يروح والا ما عنده ينثبر ؟؟
.
بعد ما وقفتوا شهادات الثانويه من بعض الدول يجب ان توقفوا الشهادات الجامعيه والدكتوراه ... يا جماعه في واحد ماخذ دكتوراه عن سنام الناقه و واحد وجه الشبه بين الشعب الكويتي ومصر ؟؟؟ الاخطاء السبعه مو دكتوراه ... ما يصير هذا التسيب الي يصير كلمن راح ويابله شهاده لي متى يعني ؟؟ طبعا انا مو ناطر شي من الاعضاء لان وايد منهم اخذ شهادته بهالطريقه انا اكلم التعليم العالي الي اهو المسئول الاول بوجهة نظري على هالمهزله الي اتصير لابد يوقفونهم من اجل مستقبل الكويت
.
كتبت هذا البوست عقب ما شفت مهندسين ماخذينها من الفلبين والتشيك واهم ما يدرون وين الله قاطهم ولقيت واحد متخرج من المحاسبه واهو ما يعرف 3*5 جم والله ما يعرف اشلون محاسب ؟؟؟ ترى الوضع يخرع والي مخوفني اكثر اهو مستقبل الكويت اشلون راح يصير وهذي مخرجاتنا .... الله يستر
.
.
.
اللـــــــــــهم لا اعتــــــــــــــــــــــــــراض

25 comments:

rai said...

واحد من الشباب ماخذ دكتوراه من بروناي !!

دون ذكر اسماء حاليا
رؤساء اقسام ومدراء ازواجهم يمكون مكاتب للطلبة ويتم تحديد اعتماد الجامعات عن طريقهن , اكبر راس بالتعليم العالي منع كذا جامعة بسبب غلاء قيمة الرشوى , جامعة المعادي ايضا منعت من ذلك السبب
جامعهة هولندية رفضت دفع رشوى وعطت وزارتنا ب...وص قوي لانه معترف فيها من الامم المتحدة واليونسكو فمومحتاجة لنا , الشباب الحلوين الي يتخرجون من دول السيد برشامه او اكتب اسمك على ورقة الامتحان المحلولة هذيل ماينشره عليهم ينشره على الوزارة الي تسمح لهم او على المكان الي يقبلهم فالمفروض امتحان قدرات يبين فيه اذا فاهم ولا لاء اذا جذي عيل حتى خريج امريكا راح يساوي خريج كومستكا
يعني انت مهندسنا كرفت 5سنين كراف اليهد وتروح تشتغل فرحان بشهادتك الجامعية الي طلعت دهنك بعد سنة ايي موظف جديد يسمى مجازا مهنجس مثلك
تساله الاخ من وين متخرج
يضحك ضحكة يحسسك انك صيده وعبيط
يقولك اصلا انا ماخذ شهادتي عن طريق الانترنت ومادرست شي ويكمل ضحكته ويقولك بس لاتعلم احد !!
مهزله مابعدها مهزله
والمشكلة راح يبين بعدين على الدولة
بتصير السالفة ان العموم بكلريوس وتصير الدكتوراه مثل الدبلوم من كثرها بروحنا مومترقعين من خواره وزارات الدولة هدور بعد يمسكونها ناس لك عليهم :)
دقيقة خل اخذ دوا الضغط
واسحبلي نفس
اهدي روحي واحاول اتحلم انه الدنيا ليلحين بخير

فتى الجبل said...

بالكويت يا مهندسنا ناس تشتري الشهادات عشان تعلقها على الطوفة
لأن الحياة بالكويت مظهر مو مخبر

Eng_Q8 said...

هدي هدي :)


تدري شالمشكله انه ما يقولي شاريها يسوي نفسه يفهم واهو اساسا مو فاهم شي اهني القهر والمشكله تلقاه فوقك اهني اتموت قههههههههر

وكل الي ذكرته يا بوعلوه صحيح 100%

Eng_Q8 said...

فتى الجبل

صحيح

ليش مسكر الكومنت عندك ؟؟؟

Salah said...

The problem is with the way we treat these certificates!

They're only pieces of paper.

If you want to employ someone you should ask for more than a piece of paper. There should be tests, interviews, requests for references... etc. So those people will know their certificates will mean nothing if they don't get real education.

Thank you for raising this issue.

Eng_Q8 said...

بو صلوح


المشكله يا بو صلوح ان حتى لو كان في الف امتحان والف مقابله الواسطه راح تفرض نفسها وانا اخوك ... ييب شهادتك وانت متوظف متوظف .. يعني الورقه اهي الي اتحدد وين تبي تتوظف ما تحدد وظيفتك

why me said...

ويييييييييييييييييه مو شي كلش

اي عادي .. هالايام كل شي بالفلوس يمشي

بس حرام

لما يتوظف بالشهاده هذي كله راتبه حراااااااااام


والله حاله كسيفه

Barrak said...

مره يابولي موظف بقطاع الاستثمار

سألته شنو شهادتك
قالي دبلوم علوم بحريه

من الكويت

طيب شلون بتتعين بمكان فيه محاسبه وفيه قيود محاسبيه

قالي لاتحاتيني حات نفسك


بعد ماقلتله اطلع بره

عرفت ان مستقبلنا جميل جدا جدا


لاتنسى هالايام هابين بالهند

وتركوا روسيا

Kuwait said...

اشرايك بشخص كل المواد بشهادته مقبول بالجامعه ومن مصر انا مادري اشلون تخرج والمعدل الله لا يوريك طاق فوق وسبحان الله يكمل الماجستير والدكتوراه بره بعد ويرد بسنتين شنو هالانسان العبقري ..
والمصيبه الأعضم ان القريد ماله خيالي :|
شوف عيني محد قالي ..

صبا said...

مهزله

قهررررررر

ديرتك تبي جذي والوضع طبيعي

الله يعينا

كويــتي لايــعه كبــده said...

اي مستقبل!؟

اصحاب القرار اللي ممكن يسوون شيء هم اول الناس اللي يدرون انه فات الفوت على المستقبل وامنين نفسهم وعيالهم طبعا! ء

الفساد له انواع كثيره واللي تحدثت عنه واحد منهم. الفساد بالكويت اصبح النظام وتشربة الشعب ويعمل من خلاله. منو اللي مسكت الجامعة و"ثم" جددت مباني الجامعة ومشروع كامل اللي هو جامعة الشويخ. معروف عند الكثير من الاكاديميين (مجال التدريس) الشخص المصري صاحب رسالة الدكتوراه الفعلي التي تقدمت بها فايزه الخرافي. بعد ما اصبحت مديرة الجامعة عينته دكتور بعد. هو نفسه كمل مشواره وعمل عنها الابحاث اللازمه للترقيات الاكاديمية حتى وصلت استاذه دكتوره!!!

عدد كبير من دكاترة اليوم يهدفون للشهادة من الباب الاجتماعي بحته وعدد منهم يتلذذ بمكالمات الواسطه وينتظرهم!

والسلطة تختار من الدكاتره للملاحق الثقافية مثلا وليس بالشرط من هو المتسلق والـ"متقلقس" ولا اعتبار للثقافة الفعلية. فاقد الشيء لا يعطيه.

وانت تناشد منو؟... رشا الصباح!؟ لا كديت خير.

آخر مثال المطيري الدكتور اللي مو دكتور بتاع باريس فرنسا وصور بالجرايد عيني عينك يحضر اجتماعات رسمية للتعليم العالي مع جامعته الفرنسيه ووو
(الموضوع كامل عند عاجل والحلم الجميل)

الفساد بالكويت اكبر واشمل واعمق من ما تتوقعون
ولم يأتي بين يوم وليله
ولم يأتي بالصدفة

السؤال: هل لدينا المتسع من الوقت او القدره او النية السياسية على كسر الفساد بكل انواعه وثم الاصلاح بنفس المقدار!؟

nope

حسافتج يا كويت said...

انا اقول مثل ما قال سعد الفرج في حامي الديار

نرد داخل السور ونبتدي من يد ويديد

kila ma6goog said...

الربع مستغربين مني لمن يقولولي ليش ما تكمل ؟

اقولهم ما عندي وقت للدراسة

يضحكون يقولون أي دراسة يا ثور!؟!

Mamloo7a Q8ia said...

يا حسرتنا على مستقبلنا الاظلم
زادوا هالنوعيات في البلد
وللاسف هم الاكثريه

الله يحفظنا من هالنماين
عساها تنقرض ونفتك منهم

JuVeNTiNa said...

الله يستر !!

الخيلاء said...

ويح قلبي من التعليم العالي

مايدرون عن الدنيا

Enter-Q8 said...

مهندسنا
انا كنت اطمح اني اكمل
بس تبي الصراحة وقفت
حسبتها
بس علشان شهادة و الا شي ثاني
راتبي و درجتي تعادل مدير ادارة باي وزارة حكومية لأن اساسينا قوي جدا
عكس بقية الوزراة و الهيئات الحكومية

قالوا العلم يفيد قلت اوكي
ابي تخصصي
قالولي استريح ماميش لهالتخصص دراسات عن طريق التعليم العالي


هل اروح و اقط فلوس على الفاضي
و اسمها شهادة و السلام

ما ادري
بيني و بينك انا افكر فيها
اذا خصونا
عفوا خصخصونا
و حولونا لوزارات الدولة
ماندري شنو بنشتغل هناك
قلت اقزرها تفرغ دراسي
خو باقي على التقاعد 12 سنة

انت شرايك

اكمل

والا يطلعونا تقاعد مبكر و اشتري بيت بره الكويت
واصير
عبداللطيف الدعيج

مُحَسّدْ said...

شهادات ما تسوى الحبر اللي انكتب فيها

Eng_Q8 said...

واي مي

الحرام يحللونه هالايام وانا اخوج

-------------------------

براك

اهم شي حات نفسك وبكل ثقه يقولها

ادري الهند جامعة اقرى :)

------------------------------

كويت

قلتيها عبقري :p

-------------------------------

صبا

اذا هذا اهو الوضع الطبيغي الله يستر على الديره

---------------------------------

كويتي

انشالله ما يفوت فال الله ولا فالك

انا عندي نيه بس هل المسئولين عندهم نيه

اللهم لا اعترااااااااااض

----------------------------------

حسافتج

ما يكفي الا اذا صارت الكويت طبقات :p

---------------------------------

مطقوق

محشوم

قالولي اياها :))

لا وماجستير ودكتوراه وايوني لي عندي بس حرام والفلوس الي بناكلها من هالشهاده هم حرام ومال الحرام ما يدوم

بس هل اهم يعرفون الحلال من الحرام؟

----------------------------------

مملوحه

امين

---------------------------------

اليوفي

الله يستر

--------------------------------

الخيلاء

لا يدرون عدل خاصة الي فوق ... واذا قصدج على الموظفين صاجه

-------------------------------

بو وليد

وظفني عندكم عيل :p

اذا معترف فيها قط فلوسك وخشها للزمن

مو شينه لو صرت عبداللطيف الدعيج :)

بس هل قلبك يطاوعك ؟؟ اهني السؤال

---------------------------------

محسد

اي والله صاج

---------------------------------

secret said...

قالك اياها نهاش

الناس تبي المظهر
شهادة و اعلقها .. و وظيفة و المنطق اشكره 2/0

لان يدرون محد راح يحاسبهم

حبيبي .. عضو مجلس أمة .. محسوب على التيار الديني .. ضد التعليم المشترك .. يسمي بن لادن شيخ .. قال بيوم من الأيام انه وكيل طالبان بالكويت .. يقارن بين مسايد الشيعة بالكويت و مسايد السنة بايران .. شافوه بشاطىء للعراة بالمكسيك .. ضد حقوق المرأة السياسية .. و يسوي ندوات للمرأة بحضورها .. و آخر شي يقول السعر العادل للنفط 200 دولار

اذا شخص نفس هذا ينجح بالدائرة الثالثة بعد شتبينا نسوي؟؟

Eng_Q8 said...

سر

ندعي ان الله يهدي الي صوتوله

إبراهيم said...

الله عليك :)

اسمع هالحوار الطازه اللي دار بين نسيبي الكويتي ودكتور جامعي في احد جامعات مصر اللي اي كلام ..

اللي يروحون لها الطلاب اسبوعين في السنه ويعطونهم اوراق الاختبار .. وكلها كويتين .. لأن الكويت هي الدوله الوحيده من دول الخليج اللي معترفه فيها ...

المهم الطلاب دخلو الاختبار .. وكل واحد معاه براشيمه

جا الدكتور وطالع في نسيبي وقاله

انا عاوز اعرف شئ انتو كلكم يالكوايته كدا؟

بنديكو الأوراء قبل الاختبار وكمان بتبرشمو ؟

والله مانتو فالحين .. بس انا عاوز اعرف انتو حتتقرجو .. وبعد كده هتعملو ايه؟ من اللي حيشغل البلد؟

قاله نسيبي ... بنجيب مصاريه يشغلون الديره ... شنو علي انا من الديره انا ابي آخذ الشهاده وأخلص .. واصير ظابط وبس


قاله المصري .. والللللللله مانتو فالحين

Eng_Q8 said...

ابراهيم


اي والله مو فالحين يا بو خليل

بـنـت بـطنـهـا said...

عيل بالذمه ناس ما شفتهم طول الكورس إلا مرتين وشفتهم وقت المدتيرم والفاينل بس وياخذون نفس درجتي مو حرام؟ الله سبحانه يقول ان اللي يعمل ما يستوي باللي ما يعمل شلون هذيل عاكسين الآية ما ادري. انا مو متضايقة عليهم انا متضايقه عشان نفسي اني تعبت حيل عشان اخذ هالدرجات وغيري ياخذها بارده مبرده.
عسى الله يصلح الحال

Mishari said...

خل اقولك شغلة انا درست البكالريوس بالكويت والماجستير في البحرين من جامعة محترمة ( بشهادة وزارة التعليم العالي ورشا الصباح نفسها ) بس مشكلة الحلوين اللى عندنا ماكو تقييم حق الجامعات ومستواها فيصير الموضوع خلط بيض الزين بالشين ولم يطلع القرار يعمون على الديرة بكبرها
يعني مصر كجامعة القاهرة ممتازة اهيا وعين شمس
بس لما تسمع بجامعات ثانية المتطورة وغيرها تشوف الضحك والرشاوي

يا سيدي كل من همه في قلبه