Sunday, June 29, 2008

عالماشي

كنت بكتب موضوع ثاني بس بخليه حق بعدين لان البوست راح يصير كتاب مو بوست ... وايد مواضيع ببالي بس في مستجدات لازم نتكلم عنها على العموم انا حاط استفتاء على اليمين ارجوا المشاركه .. ولاني انسان ديمقراطي راح امشي مع الاستفتاء وشكرا لكل من شارك والي ما شارك من الحين
.
-1-
.
دق علي واحد من الربع واول ما كلمني قالي والله طلعت صاج .. انزين بشنو ؟؟ .. والا يقولي ان قناة العداله حاطين برنامج يفضح خالد العبدالجليل والحلقه الي سواها بمصر .. والبرنامج انعرض يوم الجمعه .. وعادل اليحيى فند بعض من ما قاله او صوره خالد العبدالجليل بالبرنامج ... حيث ان القهوه الي اتقول قطها ريلها عندها قبل 30 سنه فتحها صاحبها قبل 11 سنه ؟!؟ هذا غير الاماكن الي صور فيها واهي اساسا مو نفس الاماكن الي سكنين فيها
.
انا طبعا ما انصدمت .. ولكني استغربت ما فعله عادل اليحيى .. وعلى فكره اليوم الثاني بالوطن حاطين ان التبرعات تصل غدا .... اشمعنى غدا؟؟؟ عقب ما انعرضت الحلقه ؟؟ وبعدين قناة الوطن طايحتله مسرحية سلاحف النينجا ليش عشان عادل اليحيى يمثل فيها ؟؟ اكيد في ناس بيقولون شكو ... بس يمكن مقصوده الله اعلم
.
عموما على حسب ما وصلني من صديقي ان الريال ما جذب انهم كويتيين انما كذب ما اتى به العبدالجليل من اعلام ومن استثارته لمشاعر الناس من حيث التصوير و الطريقه الدعائيه وايضا ذكر لي انه تم عرض مواطنه كانت مديونه وطلب منها البكاء وعدم ذكر المديونيه لان الناس سوف تتبرع باكثر منها .... وايضا على ذمة صديقي
.
لم اشاهد البرنامج .. ولكن اذا كان ما عرضه تلفزيون العداله صحيح .. فهذا يوضح لنا ان قناة الوطن تلعب بمشاعر المواطنين اما لبروزها اعلاميه او لمآرب اخرى ماراح احط بذمتي ... وانا بانتظار الحلقه القادمه لخالد العبدالجليل وبشوف شنو بيكون رده على عادل اليحيى .. واذا ما رد يعني اليحيى صاج ... نحن بالانتظار ..واذا طلع اليحيى صاج اقول حق الي يتابعون الوطن والي ميتين على خالد لي متى يعني ....؟
..
يمكن الموضوع مو مهم وايد بس انا ما احب احد يلعب بمشاعر الكويتيين
.
--------------------------------------------
.
-2-
.
احمد باقر قال حق الي ماخذين قروض برده على مسلم البراك عساهم على هالحال و أرده ؟؟؟ و باقر قال انه كان يقصد البراك انزين انت اشلون تقصد البراك وانت قلت عساهم ؟؟؟؟ هل هي بدليه ؟؟؟ وعلى اي اساس قلتها حقه ؟؟
.
بما انك وزير فانت بمنصب يحتم عليك ان تخدم الوطن والمواطنين ... والناس الي قلت عنهم هالكلمه ترى عيال الكويت الا اذا انت عندك حجي ثاني ... بصراحه انا مو من اسلوبي اني اتكلم كلام سوقي او اغلط على احد ولو ابي جان قلت بس احتراما لنفسي وللقراء ماراح اتكلم عن ماضيك وعن اي شي ثاني اعتقد ان هالشغله مفهومه
.
بس ترى عيب ... ياما وصلوك مجلس الامه .. وبعدين انت نائب اسلامي وسلفي اشلون اتحقر من الناس وتتمنى لهم اردى الحالات ؟؟ مو المسلم اخو المسلم ؟؟ مو الاسلام يحتم عليك الوقوف مع اخوانك المسلمين وقت الضيق ؟؟ والا اسلامكم غير ؟؟؟
.
-------------------------------------------
.
-3-
.
وصلني ايميل بصراحه ضحكت عليه .. يقول صاحب الايميل ان نبيل العوضى بايق فكرة بوست انا كاتبه ؟؟؟؟ اشلون انا اقولكم الاخ المرسل وضح ان مقال العوضي هذا يشبه بوستي هذا من حيث الفكره ...طبعا وايد تتشابه الافكار ولو بنعد ماراح انخلص .. واتوقع ان الشيخ نبيل بن علي العوضي ما كان يقصد والا فانها ظاهره سلبيه ... على العموم اذا كان قاصدها فانا مسامحه واذا مو قاصدها تقاربت افكارنا على شي اخييييرا
.
------------------------------------------------
.
-4-
.
هالموضوع ... لا تعليق ؟!؟
.
.
.
اللــــــــــــــــــــهم لا اعتــــــــــــــــــــــــــــــــــــــــــــراض

25 comments:

الزين said...

ماشية بأمان الله

شحلووووني قاعده اقرا سوالفك

وقاعده ايمع الحجي يعني بعلق عشتوا

وايي عند الرابط الأخير

وجنه احد لتني كف

طار الحجي وما اوتعيت بنفسي الا وانا قاعده اسب

فقدت حدود اللياقه بالكلام

يخرب بيتهم وبيت فتاويهم
@#$%^

يبيعون ويشترون في بناتهم
تخلف وجاهلية والمرة مجرد متاع ومتعه لهم

فيني سبه كبيره

خلني اطلع احسن لي

سلااااام

Eng_Q8 said...

الزين

لووووووووووووووووووووووووووووووووووووووووووووووووووووووووووووووووووووول

والله مت من الضحك حسبي الله على ابليسج فضحتيني بالدوام

ميخالف كل يوم يطلع لنا شي يديد وانا اخوج

Barrak said...

فكرة البوست جميله

استمتعت بالقراءه


اليوم نبيل وباجر
الرويشد

kila ma6goog said...

ماشاءالله عليك منت هين

لماح و زكي أوي

سالفة سلاحف النينجا واضحة وضوح الشمس

و أعتقد ان اليحيى صاج بسالفته , خالد عبدالجليل من ويهه مؤلف افلام هندية

حريّمي حجاي

secret said...

انا شفت البرنامج على العدالة .. اذا الكلام صج .. مشكلة كبيرة مو هينة الناس تتبرع و الاشخاص المعنيين ما يوصل لهم شي؟

والله خوفك خالد العبدالجليل يطلع نفس الناس بالبرنامج و يقولون ان عادل قاص عليهم بعد
هني تعرف ان هالمصاروة لاعبين بحسبة قناة الوطن و العدالة
لول

احمد باقر؟
هذا كلام بالله؟
و الله عيب

و أعتقد مأذون جدة يقصد التاسعة صباحا :)

ولا اكو واحد يدخل على وحدة توها ماخذة بالمدرسة جدول الضرب و منحنى مغلق و منحنى مفتوح .. اهاا استوعبت الحين
:)

Eng_Q8 said...

براك

شكرا :)

من ذوقك

لووووووووووووووووووول

لا انا بايق من رويشد اللهم لا اعتراض :p

----------------------------------

مطقوق

حاظرين :p

لوووووووووووووووووووووووووول

--------------------------------

سر

صحيح

كل شي بالبيزات يمشي

اي والله عيب

العب معاها حيله :p

Kuwait said...

في شغلات وايد بحلقات العبدالجليل ما تدش المخ صراحه ..
وانا والله من شفت قعدته بالقهوه يكون يعني سرحان ويطالع الي يبيع فول وانا قلت لا خوش ممثل صراحه :\
والحمدلله والشكر على القناة الي يمشيها حيالله واحد يقدم برنامج عندهم ..
وكل ما واحد حط دوبه دوب العبدالجليل ان شاء الله بيقعدون ينبشون عنه ويعرضونه ؟؟
صج ناس تافهه ..
بطووووووووا جبدددددي ..
شوف لان ما اقدر اشوف قناة الوطن وانا اهني فعفيه شوفها الخميس وانا بدش انطر بوست عشان اعرف شصار على الحلقه ..
زييييييييييييييين ؟؟ مو تنسى ;p
اما احمد باقر اسمع من اذن وطلع من الثانيه ولا راح تخلص ..
اخر شي يعجبني مقالك وياشين مقاله ..
اما الرابط الاخير عمى بعينهم شنو مسابق السالفه ؟؟
يعني ما عندهم صبر خو !!
بعدين لو البنت اكبرت وماتبيه ؟؟
تعتبر مطلقه ؟؟
ويح قلبييييييييي
حرام عليهم ورب الكعبه ..
هذا شنو يفتي بمزاجه وعلى مشتهاته ؟؟
بس خلاص عصبت :@
باي

Eng_Q8 said...

كويت

قولي حق الي مصدقينه

لوووووووووووووووووول

اوكي :)

مشكوره :>>

لووووووووووووووووووووول

باي :)

العرزالــــــه said...

مهندسنا

وانا بعد وصلتني سالفة الوطن

والله بيني وبينك انا من اول يوم وانا مو مصدقهم

هذيله ناس ماعندهم مصداقيه

Mamloo7a Q8ia said...

شوف يا خوي خالد العبدالجليل
حلقاته كلها مفبركه ومسرحيات
يمكن فيها جزء بسيط يكون حقيقي
بس الباجي تمثيل في تمثيل


مع الاسف وصلوا لهالمستوى وزرائنا ومسئوليننا
الله يرحمنا برحمته
وحسافه والله علينا

سامحه الله يسامحك يا رب

بعد انا ماني قادره اعلق
شقوووول بالله؟؟
خلني ساكته وايد احسن

darkness said...

@@

باقووووك


و ساكت؟؟

أبــو بنــــدر said...

صاحبك كل هالكلام وما يبي يحط بذمته أهو لو بحطها بذمته شبيقول

لوووووول
--------
بعد الى سواه بالحج وبلقاء بالراي اذا تذكر والحين كلمته هذي
رجاءَ مهندسنا لازم تقول باقر وانتوا بكرامه ولا كرامه له حاشاكم
--------
يجوز توارد خواطر
--------
دير بالك مهندسنا وجميع الأخوه من الخصومه مع الرسول ومالك شغل بهذا الشيخ المخرف يعني سنه شلون بترضى بالزواج وأهي ما تتكلم؟وكيف تقر بالقبول .
أكبر بلاء على الأنسان يوم القيامه أن يكون خصمه الرسول صلى الله عليه وسلم ، وأتباع سنته واجب على كل مسلم وهو الأسوه الحسنه لنا كمسلمين .اتمنى وضحت الفكره.

ودمتم سالمين

أبــو بنــــدر said...

نسيت شغله أن الرسول له خصوصيه ليست لغيره

:))

كويــتي لايــعه كبــده said...

استفتاءاتك سويناهم
اي خدمة غيرها؟
:)

1
لا غريب على قناة خراب الوطن
مستوى واطي وتعمد في اثارة المواضيع الهادفة للخراب
حراميه نصابين معروفين
السؤال: وين وزارة الداخلية عن هالعملية النصب والاحتيال!؟
وين وزارة الاعلام عن هالقناة الكويتية المسيئة للكويت بتعمد!؟
شنو صار على الحساب اللي سووه لتبرعات الكويتيين!؟ وصل المبلغ فيه 300,000دك خلال اول اسبوعين والحين طاف الشهر واكثر. ويـــــــن الفلـــــوس!؟

خلاص علي "حرامي الغزو" الخليفه صار فوق القانون رسمي!؟!؟

2
باقر قبل اسلامي
الحين وزير
عليك الباقي

3
مو بعيده
وكانه صاحبك صاج
:)

4
عاش التخلف
والناس ورا اي لوح حاط لحية ركيض
ذكرني بفتوى مفتي الازهر اذا ماني غلطان عن الزميلة بالدوام قبل كم شهر
لعبوا بالدين طراقات
:(

Mok said...

بلبل معطينه اكبر من حجمه

شـقـــــران said...

مهندسنا العزيز

كيف الحال يالغالي
:)


------


بالنسبة للسيد لخالد العبدالجليل فمريح بالي وما اتابعه كلش
:)

-------

أحمد باقر لن يكون عونا للشعب أبدا أبدا

ومنهج السلف الصالح يبعد كبعد المشرق عن المغرب عنه!؟




وتحياتي لك

marshmallows said...

ليش الكومينتات غير عن الي قريته انا دخت =\

Eng_Q8 said...

pالعرزاله

اي والله

---------------------------------

مملوحه

واضح

حسافتج يا كويت

مسامحه لوجه الله :)

اوكي :)

--------------------------------

داركنس

شسوي بعد :)

----------------------------------

بو بندر

انا الي قايل مابي احط بذمتي :)

لا يبا انا ما احب اغلط على احد

يجوز

والله ما عرفنا لهم

---------------------------------

كويتي

شكرا لحسن تعاونكم :)

اول ساعه واحد تبرع ب 30 الف دينار

ما يندرى باجر شنو

يمكن :)

من زماااااااااااان لاعبين فيه

----------------------------------

موك

@@

شكلك ما قريت البوست عدل :)

---------------------------------

شقران

هلا بو راكان

يجمل حالك يالغالي

زين تسوي

ممممممممممممممم ويمكن يكون قريب منه ما تدري :)

----------------------------------

مارشميلو

مو غير ؟!؟

Selezya said...

في فرق
اهو يعجبني ومايعجبني

وانت يعجبني ويحزنني

هذا دليل قاطع على انه مو ماخذها منك

==

ماتابع تي في :)
فمالي علاقة لا بالعدالة ولا بالوطن

==

خوش استفتاءات بس احس ان تصويتي مامشى صح؟
مادري :)

Eng_Q8 said...

سلوزه

اكيد ماراح يحط كوبي بيس

وبعدين الريال قال الفكره مو الحجي

-------

اوكي

--

ما فهمت بس اوكي

صبا said...

امبي ؟؟؟؟؟


آآآآآآآخر موضوع

صج لا تعليق

شنو هذااا

وين قاعدين يفتون علي كيف امهم
انصدمت !!
معقوله صج ؟؟؟

حسبي الله عليهم يفتون علي حساب شهواتهم
هذي الي يسمونها الجاهليه الاولي
بيع وشرا بخلق الله
!!!!

مُحَسّدْ said...

صاير خبه بجمعية احياء التطرف الاسلامي عشان تصريح باقر

MaCHBoS said...

اولا سالفة مقاله نبيل العوضي قلد مقالتك فهذا شرفك لك اخوي مهندس لانه انت مبدع و اهو حرامي
ثاني شي قناة الوثن او العفن كل شي صغير تكبره حتى لو اللي مبطوط تايره تسويله كارثه طبيعيه استوائيه (شكو)
ثالث شي احمد باقر اتوقع خرف !!
وزير يقول عساهم بهالحال و اردى انزين اللي ماخذين قروض غصبا عن ارادتهم يعني عساهم بهالحال و اردى اتوقع مخه مخ ياهل !!
رابع شي من صجه هذا الزواج من رضيعه !! شهالمرضى قام يكرهون الواحد بدينه من هالاشكال اللي كل يوم تطلع !!

فريج سعود said...

احمد باقر عدو نفسه بالاضافة الى انه عدو الشعب
شسويت بالزين ؟
تبي تسب وتطق بسبتك
:)

Eng_Q8 said...

صبا

ويقولون نبي نتطور

-----------------------------

محسد

احسن

---------------------------------

مجبوس

مشكور من ذوقك :)
يمكن توارد خواطر :)

اشدراني عنهم

-------------------------------

فريج سعود

ما ادري شكلي بقلب المدونه مدونه شعر عشان لا يصير فيها شي :p