Saturday, July 12, 2008

كويتي لايعه جبده طلع عميل يا رجاااله

يالله صباح خير .. كل يوم الصبح لازم تطلعلي سالفه يا بالجرايد والا بالدوام .. اليوم الله يسلمكم طلعتلي سالفة ماادري شقول عنها .. عقب ما قريت الجرايد وشربت قهوتي وزقايري .. قلت بجيك على الايميل واطقلي فره على المدونات قبل لا اطلع واستانس بهالجو البديع والا تن تاراا راااااااااان


دشيت مدونة اي كويت والا تحصل المفاجأه بس طقيت على مدونته والا تفتح ثلاث صفحات وكلهم مدونته ... يه شالسالفه قلت بطلع من الباجي وكلما اطق اكس تفتحلي صفحتين ؟؟؟؟؟ لين وصل الوضع على ماهو عليه






ووصلت الصفحات الى 21 صفحه وكلهم مدونة كويتي لايعه جبده






انا قمت افكر قلت لي هالدرجه لابتوبي يحب صفحته ... قلت لا مو معقوله السالفه فيها ان لابد من البحث والتحري

مااطولها عليكم واقعد اسكر صفحه وتطلعلي صفحه الله وكيلكم جني قاعد العب لعبه .. تالي شمرت وطقيت زقاره وقلت لازم احل المسأله ... اطق الت وكنترول ودليت ماادري شيطلعلي لان الوندوز الي عندي فيستا وتوني يديد على الفيستا واقعد اضغط على الاكسات لين ما انمحت كل الصفحات ... فجاه ومن غير سابق انذار ارجعت الصفحات تتبطل ؟؟؟؟ يبا خلاص هونت ماابي ادش عنده ... واتبطل الصفحات مره ثانيه وماادري ليش جهازي متنح على 21 صفحه

طبعا لما تتوهق مالك الا حركه وحده شيل بطاريه اللاب توب ... شلتها ورديت ووجدت ان الجهاز قد اصبح مخرف وانا ماصارلي شهر من شريته

لذا اثبتت التحريات ان المدون كويتي لايعه جبده عميل مزدوج حيث انه يستغل منصبه كمدون لايعه جبده ويعمل لمصلحة الطابور الخمستعش

وهو يريد الفتك باجهزة المدونين لكي لا يضعون البوستات المعاديه للطابور الثامن الموالي للطابور الخمستعش

وقد بدأ بهذه المؤامرة صبيحة هذا اليوم بعد ان وضع مجلة تدوينيه اثبت بانه يريد ان ينشأ مجلته الخاصه التي تهمش المدونين بالتعاون مع جريدة القبس

طبعا ومثل ما اتعرفون بان الصكه الاولى يت براسي لاني مقرود والقراده شي متأصل فيني

وايضا يريد التملص من مطالباتي له من سكرتيرات وسياره لمجلته ووضعي مدير تحرير صفحة الابراج التي تعتبر من اكثر الصفحات حساسيه بالمجله حيث استطيع التلاعب بمشاعر الناس وخاصة النساء لانهم يؤمنون بهذه الخزعبلات وعلم باني ضد الطابور العاشر الي اهو نفسه الطابور الخمستعش بس متنكر
اما سبب فتح 21 صفحه هو انه اخطأ لانه لا توجد جريمه كامله ... حيث ان كلمة السر بالطابور الخمستعش هي 21 كما اثبتت مصادر فؤاد الهاشم لما دق عليه رئيس المخابرات المركزيه الجزر قمريه كما افصح بمقال سابق .. ومن كثر ولع كويتي بهذا الطابور اختار 21 صفحه لكي تدمر اجهزتنا

لذا قررنا الاتي

اما انه يشتريلي لابتوب ثاني... لاني رشيت هالابتوب وقص علي الغانم طلع في شكل يديد حق اللابتوب وعطاني الدقيم ف زلقه بطيحه .. ويحصر جميع الخسائر الماديه والمعنويه ويحجزلي تذاكر مع سكن لاي دوله اوروبيه غربيه وليست شرقيه او جزر فيجي او المالديف او اليابان ... ومو الحين لان ماعندي رصيد اجازات... لكي يعوض عسارتي من صباح الله خير حيث اني دخنت مالا يقل عن 5 سيجارات وعليه فاني زدت مخاطر التدخين ويجب ان يعالجني ويمولنلي بكل اسبوع كرزين بوكس ابيض مع قوطي جبريت بو ثلاث نجوم

هذا لكي يبدي حسن النيه وانه ليس عميل لاي من الطوابير السابقه الذكر ولا طوابير الجمعيه والتموين والمقصف واذا لم يلتزم فعليه ان يتحمل المسئوليه كامله والقرارات التي من الممكن ان تزج به بمشاكل ليس لها اول ولا تالي ومحد راح يتوسطله لانه ما يحب الخرافي وما يشجع منتخب الكويت ولا القادسيه وعليه ستثبت التهمه عليه
هذا ونحن بانتظار بدفاع المتهم واحاله القضيه للمحكمة الدستوريه وديوان المحاسبه ومحكمة الوزراء والتمييز واشهار افلاس مدونته وحصر وراثه
و اللهـــــــــــــم لا اعتــــــــــــــــــــــــــــــــراض

36 comments:

Unknown said...

أنا اهم شى عندي أنك احسنت النية اخر شي مو وقته :))

الزين said...

الحين آنا ما فهمت

اللاب توب شغال

لو عطاك عمره؟؟؟؟

enter-q8 said...

يعني كويتي لايعة جبدة
طلع إمبريالي
و متعاون مع لوبي غرفة التجارة
اللي اقدر اساعدك فيه
اني اعطي البنغالية اللي يوقفون عند الاشاره كل يوم جمعة ربع دينار

و يدعون على الامبيريالية و غرفة التجارة
و احمد باقر
هذا اللي اقدر عليه يا الزميل

enter-q8 said...

على فكرة ترى الفيستا طلع اي شي
نزل اكس بي الحزمة الثالثة
وايد ابرك انا عندي اياه على الاب توب
نفس الحالة

kuwaitawy said...

نشكر الاخ العزيز
eng-q8

على كشفه للحقائق

واطالب المجلس الاعلى للمدونات الكويتية بان يمنحووه وسام الشرف للمدون الكويتي على اكتشافه حقيقه مره غير قابله للبلع الا وهي
العماله المزدوجه في تاريخ التدوين الكويتي

وتبين لنا من خلال هذا المدون الشريف ان المدون الكويتي كويتي لايعه جبده عميل مزدوج لدى جهه مضاده للتدوين الكويتي


وشكرا

why me said...

loooooooooooooooool


بانتظار المحاكمه


:))))

secret said...

كلام خطير يا مهندس

الحين ابي ادش اقرا موضوعه خايف تصدق

اذا الدرب امان قولي يا معود
:)

Mok said...

تبي لابوتوب

طب وتخير
:)

Blog 3amty said...

نعدنه رمياً بالابتوب !

Eng_Q8 said...

مشاري

اعجبك :)

--------------------------------

الزين

لي الحين يتنفس ماصارله شهر :(

--------------------------------

بو وليد

كفيت ووفيت :p

لا تفشلني مااعرف اخاف اتعبث وينفجر بويهي اللابتوب

----------------------------------

كويتاوي

نعم نعم اضم صوتي لصوتك

----------------------------------

واي مي

منحاش ... سجلت عليه قضية تغيب

---------------------------------

سر

دير بالك ترى كشفنا الحقيقه هذا انا قلتلك

-------------------------------

موك

ابيك سالم يا بعد قلبي

انا ابي اطلع منه شي اسكانة شاي ما يعطي :p

---------------------------------

بلوق عمتي

لووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووول

اعجبتني هذي ... هيا لنرجمه باللابتوبات الموت لعملاااء

Dr. Academy said...

هارد لك يا الرفيق :)

اياخوك توني داش مدونته ماكو الا العافيه ..

بس عاد الفرق ان انا استخدم ماك .. و انت لازم تسمع النصيحة و تقط الويندوز نهائيا ..

اما ان كويتي لايعه كبدة عميل .. فانا مع المحاكمه

و هارد لك مره ثانيه

Eng_Q8 said...

دكتور

عيل يبيني انا :p

عنصر وطني said...

انا اقول دعوة لجميع المدونين على العشاء
بدون حضور الصحافة

وايد احسن الكل مستفيد

وبدون محكمة

بس said...

لووووووووووووووووووووووول


:)

Mamloo7a Q8ia said...

قول غير هالحجي
@@
عاد امس عيني مديرة صفحة الطبخ والطبيخ والمطبخ السياسي

طلع من الخمستعش؟؟؟
ورقمه السري 21
الله يستر بستره

Anonymous said...

اذا عطاك لابتوب يديد عطني مالك أسوي منه قاعدة مراقبه ;p
بس الصج الصج 21 صفحه شويه ..
لان مرات تصيرلي هالحاله مع مدونتك والله وجم مره صارت بس مو نفس حالتك لا انا ابطل المدونه وتتبطل على صفحات شكثرهاااا وانا اتفرج صفحات مدونتك تطامر جدامي بس ولله الحمد انها توقف لما تتعب ولا تحصل مني أي ردة فعل وأعطيها طاف وأكمل سوالفي بالماسنجر وبعدها لما أشووف الوضع هدا أسوي ريستارت على الراحه :p
وعندي ما يثبت :D

kuwait

mo3ath said...

انزين دام من اول مره فتح مليون صفحه جان سكرته وشغلت الانتي فايرس وغدا الشر :)

وايد احسن لك iphone انا اقول اشبك ب
ماتحوشك فيروسات الوندز

عطني اياه ابيعه لك قطع غيار :p

فريج سعود said...

تستاهل بوسة على هالانذار المبكر

wa6an-alnhar said...

قلعتك
هذي اللقافه وماتسوي من صباح الله خير
:p


صديقي
خواك السو
:)

5roofa said...

لوووول

انزين مدام سوه فيك هالمقلب حاطه حقنا ليش عشان ياكل بجهازنا احنا بعد
:P

و خطاك السو على اللاب تووب لول بالحديد ولا فيك يا خووي

salamz dear....

كويــتي لايــعه كبــده said...

اخي المدعي مهندس كويتي...

تحية نص ونص وبعد،،،

أولا أود أن أشكر كل من لم يصدق الإتهام الكيدي بحقي. اما من ظن بي السوء فسجلت ألفابكم فأنا متابع بدون تعليق منذ صباح اليوم وأول الصباح الباكر عند مكتب جاسم الخرافي (حاولت أقول المعزب ما طلعت!) والديوان الأميري (علشان يقولون لي انت منو؟ ويا ويلي لو أقول المدون كويتي لايعه كبده).ء

ثانيا أدعوك أن تقدم أي دليل الى القضاء النزيه وأفضل لجنة محاكمة الوزراء التي اخلت سبيل علي "ابوق ابو الديره ومحد يحاكيني" الخليفه. والا سوف أرفع فيك قضية تشهير واطالب برد اعتباري فنحن لا تخضع لإسلوبك هذا.

أكل هذا يا رجل بسبب رغبتك الغير مشروعه لـ"سكرتيرات وسياره ووضعك مدير تحرير"!؟ الطعن بنزاهة الناس لتكسبك الشخصي؟ وينك ما حطوك وزير؟

اسمعها مني وبفم مليان... لا ذنب لي اذا لابتوبك سكة.

لن ترى مني التعوض. لن استسلم للاساليب الرخيصة. لن ارضخ للتهديد. وسوف تسمع من المحامي المو نصاب العبدالجليل بتاع الوطن.

تجيك التهايم وانت نايم

Fskra said...

maLik eLaa NORTON ! !! hatha ALert beL 56r :P der balik La et6shr methL ma ana t6shrt o ana fe eL ghrbaa O aL7een ma 3ndi keyboard
3rby 3gb Ma 36ak 3mra my old laptop
O hatha new amreki ma ymshee 3nda arabic keyboard :P

ama eL a5 Kuwaiti Lay3a chbda ana ba9m enaa 3meeL :P bs ardni :P

الديوانية said...

أول شي عظم الله أجرك على اللاب توب الجديد ... ثاني شي لا تغتم لأنه ما يرمى غير الشجرة المثمرة ... ثالث شي ما ضاع حق وراه مطالب بس انت انطر كلها 153سنة و3شهور و4 أيام ويصدر الحكم كعادتنا في الكويت :)

تحياتي طال عمرك :)

الخيلاء said...

لوول

ماسوت عليك هالايرور
ولا سوت على كويتي لايعه جبده
انك دخلت مدونته

اشدعوه هالتعويضات كلها
حرااام عليك

اذا صار جذي ثاني مره
سكر الجاز على طول و انطر شوي و بطله
واايد ايعلق الفيستا

و بيك ايام ما يشتغل الجهاز بعد
;p

Eng_Q8 said...

كش ملك

ليش لأ

---------------------------------

بس

عساها دوم هالضحكه يالقاطعه

--------------------------------

مملوحه

لا تغرج المظاهر :p

---------------------------------

كويت

مممممممممممم ما يثبت ها

--------------------------------

معاذ

اهو رضى يتسكر

مااحب هالتلفونات شريت ارماني قطيته عقب ساعتين مو مال تكنولوجيا انا

لووووووووووول

----------------------------------

فريج سعود

بوس يبا بوس .. منو يطوف بوسة الحلوين :p

----------------------------------

وطن

شسوي بعد :(

خطاج اللاش

---------------------------------

خروفه

عشان تعتبرون من الموقف

خطاج اللاش

--------------------------------

Eng_Q8 said...

العميل كويتي لايعه جبده

الكومنت هذا حقك بروحك

اول شي لا استطيع ان اخفي ما انا به الان

لوووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووول

قبل لا اقرى تعليقك قاعد اضحك

وانا اقول وينك غاط كل هالمده

عز الله ادانوك لانك ما بقت فلوس

ركز على السكرتيرات ... موجود بس محد يقدر :p

عفوا هذي تهمه يديده متهم لابتوبي بانه سكه سجل يا قاضي

لووووووووووووووووووووووووووول

عاد راح يقول شي ما شفتوه ولا قط سمعتوه فيه وتطلع ببرنامجه ومغطين ويهك لوووووووووووووووووووول

كل مجرم يقول هالحجي عطنا حجي يديد وبعدين انت مو نايم تدري بالسالفه ووصلني خبر من فؤاد الهاشم يقووول انك راح اتقطها براس انتر كويت بس الله ستر

Eng_Q8 said...

فسكره

موجود هالبرنامج كل شي موجود بس اهو عنده برامج تخترق برامج الحمايه تدرين عميل

لوووووووووووووووووووووووول

--------------------------------

الدوانيه

ننطر شورانا :p

---------------------------------

الخيلاء


اي والله مسكين اشفيني عليه كل بوست والثاني متحرش فيه :)))))

لاااا لا تقولين :(

elq87obi said...

لووووووووول

يبه خطاكم السو ان و لابتوبك ياخي سهالات اللابتوب بداله الف و في اللابتوب و لا فيك

سلامي لك :)

Selezya said...

افا عليك لابتوبي كله لك

بس ولي يعافيك اذا اشتغل معاك رده لي :p

هذيان said...

صباح الخير

كويــتي لايــعه كبــده said...

لا يكون ليلحين ناطر لابتوب!؟

تبي لابتوب جديد قول... بس الطراره عيب.

هذا وانت مهندس وعندك كادر بعد
:(

تبي نسوي لك قطية؟

لا تستحي ترى كلنا اخوان

well_serviceman said...

مهندس يبي لابتوب بس؟؟؟؟؟ حلوو انا ناطرها من زمان اي عذر او سبب يخليك تجينا اهني.. ياخوك انت قلت بتجي وبتسير علينه.. وانا امزهبلك الخضر واليابس اهني وكل شي.. بس ناطرك اتشرف اهني واتقص الخيط الاحمر على بركة الله....

اخوك: مساعد مهندس متقاعد

فتى الجبل said...

يشتري لك ويشتري لي
اااااااااي
شمعنى انت بس

why me said...

لووووووووووووووووووووووووووول



عجيب كويتي لايعه جبده


صــــــــــامد .. ما يهــــــــــزك ريـــــــــح


لوووول

Eng_Q8 said...

سلوزه

شهالمنه

Eng_Q8 said...

الكويت حبي

خطاك اللاش :)

الله يسلمك

---------------------------------

هذيان

صباح الانوار :)

---------------------------------

العميل


شريتلي واحد ولا منتك :p

وبعدين خبيتونا بالكادر وين الكادر اسمع عنه ومااشوفه الشرهه على جمعية المهندسين الي ساكته خلني ساكت لا احط حرتي فيهم

انت خليت فيها اخوان انا توقعت اقوم الصبح والاقي اللابتوب عند باب بيتنا :*

---------------------------------

ويل سيرفس

هلا بالحبيب

مو كانت الخطه اني اييكم بس اطلعتلي دوره ماادري من وين وغصب اخذها مو كل شي غصب هالديره يايكم انشالله بالكريسماس اذا كنت انت مو بالكويت :)

---------------------------------

فتى الجبل

من صجك هذا يندي حتى علج بو سهم ما تحصل من وراه

-------------------------------

واي مي

اي وقفي وياه يالعميله تبيني اكتب بوست عنج بعد :p