Tuesday, July 15, 2008

حتى امريكا تشتكي

وصلني ايميل من احد الاصدقاء المتواجدين ببلاد العم سام .. وكان يشتكي من التخبط بالملحق الثقافي وتأخير نزول المكافئات الاجتماعيه وغيرها وسأضع الايميل بنهاية هذا البوست بدون تعديل
.
ما يحز بالنفس هو ماقاله لي من مواقف حدثت لبعض من ابناءنا هناك بعد ان تحدثت معه ... بصراحه هو شيء يبط الجبد ومحزن في بعض الحالات ... هناك من ياتي للدراسه ولكنه بعد سنه يسحب اوراقه ويعرفون بعدها بانه اتي للسياحه فقط ... وهناك من يغير الجامعات على راحته ولا احد يحاسبه .. وهناك من يتبهذل بالاف بي اي او غيره فقط لاشتباه ولا يقف معه الا السفاره السعوديه ؟!!؟ ماادري وين سفارتنا ... ومكافئات التفوق تنزل لمن لا يستحقها ؟!؟ .. والادهى من هذا ان الطلبه المبتعثين على حساباتهم الخاصه بضعون شيك بالتعليم العالي لكي ينزل المعاش حقهم .. ولكن اذا سجل الطالب اقل من 12 وحده ما ينزله معاش ؟؟ يعني حتى على فلوسه متجيعصين .. هذا غير الطلبه المبتعثين على حساب الحكومه ومعدلاتهم اقل من المعدل المطلوب للابتعاث ؟!؟!
.
هذا باختصار ما اوجزه لي الصديق بعد الحديث معه .. وهنا يأتي السؤال من هو المسؤول عن هذا التخبط ومن هو المسؤول عن هذه التعديات .. وماهو ذنب الطالب المستحق للبعثه واخذها غيره وذنب من يدرس بكد ولا يحصل على تشجيع وما ذنب الكويت لكي نبعث من لا يكون اهلا للدراسه
.
الموضوع متشابك جدا وله ما له من تبعات ولكن الا يستحق النظر له ؟ ..اليسوا ابناء البلد اليسوا شباب المستقبل ؟ انهم في بلاد الغربه وهذا ما يحدث لهم .. وعندما سألت عن اتحاد الطلبه وما يفعلون لهم بحل المواضيع يأتيني الرد قالي انه يعتمد على المندوب اذا كان المندوب شقردي والا لا في مناديب ممتازين ومناديب تسمع عنهم وما تشوفهم هذا غير اذا كنت بتكلم احد جنك بتكلم وزير وارد واقول مو كلهم ... من ينصف ابناءنا هناك ومن يساعدهم اذا وقعوا بمشكله لا قدر الله ومن يستمع الى مشاكلهم .. لقد هالني ما سمعت منه .. يمكن ولايته والي يدرسون فيها من غير الرضي عليهم او من عيال فلان وفلنتان ممكن .. على الاقل لا تتخبطون بالقرارات واتضيعون وقتهم على الفاضي ترى عندهم دراسه واغلبهم صغار لا تمرمطونهم ... اذا موقع الملحق الثقافي صارله اسبوعين خربان والطلبه المبعوثين على حساباتهم ما يقدرون يجيكون على رصيدهم اشلون بالله يدرون ؟؟؟؟؟ ترى شغلوه توه وانا قاعد اكتب البوست .... على الاقل على الاقل يا بشر لما ايي اعصار عندهم سالوا عنهم دقوا عليهم شوفوا اشفيهم ..اهم بخير والا لا
.
اليكم الايميل بدون تغيير بعد ان شلت السلام والختام وهالايميل طبعا قبل لا اكلمه واسمع منه السوالف الي فوق
.
الموضوع يالزميل عن وزارة التعليم العالي والملحق الثقافي الكويتي بواشنطن.. ماكو ولا طالب كويتي شريف ينكر المساوء والمآسي اللي يعانون منها طلبتنا في امريكا بسبب هذه الوزاره وهذا الملحق الثقافي... فالكل يدري ويشوف التحبط والفوضى الشديده في وزارة التعليم العالي.. وخصوصا في اماكن تقديم الطلبات والمراجعين.. بحيث ان القاعه لا تكفي حتى ل 25 شخص في وقت واحد.. ومع هذا يفتحون باب القبول والتسجيل في هذه القاعات.. والفوضى تعم المكان لمن يجيلهم اكثر من 50 مراجع في نفس الوقت بإعتقاد كل واحد منهم بأنه اذا راح امبجر راح يكون المكان فاضي ويخلص شغله.. وهكذا الفوضى كل يوم.. الشي الثاني اللي ماينسكت عنه ياخوك.. هو الملحق الثقافي والتخبط اللي موجود فيه... مع انه الملحق الثقافي هو اكثر مكان المفروض يكون فيه التزام و انضباط خصوصا بأنه الطلبه في الغربه يعتمدون اعتماد كلي على الله ومن ثم الملحق الثقافي.. ولكن الحاصل واما عيون كل طالب كويتي وتجربته مع الملحق الثقافي تفشل للأسف..فمثلا يقع طالب في مشكله في احدى الولايات في امريكا.. ويقعد من الصبح لين المغرب يتصل على الملحق الثقافي ولكن لا حياة لمن تنادي.. واخيرا لمن يردون عليه... ويقدم الطالب أسئلته ويقولهم شنو تبوني أسوي بحيث اني اقدر اتفادى هالشي.. يأتي الجواب اللي محد كان يتوقعه... الموظف او الموظفه تقوله بالضبط.. آسف أو آسفه اخوي.. انا ماعندي علم بهذا الموضوع.. ياريت تقدر تشوف احد يعرف بهالموضوع.... يايبين فراشين اموظفينهم في أكثر قسم أهميه في الملحقيه الكويتيه؟؟؟؟؟؟ ومايعرفون راسهم من ريولهم؟؟؟؟ والمفاجآت اكثر واكثر... فمثلا سالفة ال100 دينار الاعانه حق الطلبه الدارسين على حسابهم الخاص... اتصلنه في المرشدين في الملحق الثقافي الكويتي في واشنطن.. وسألناهم.. قالولنه ماعندنه أي معلومه عن هالقرار ومتى ينزل وكيف... قلنه مو مشكله رحنه التعليم العالي في الكويت.. واطبلوا اوراق رسميه وغير هذا من أولياء الأمور.. ولمن قدموا أولياء الأمور كل الاوراق المطلوبه.. قالولهم الاعانه راح تنزل بأثر رجعي ابتداءا من آخر شهر سته.. يعني بعد انتهاء المهله المقرره لتقديم الطلبات.. ولي يومك ماشفنا شي.. ولمن سألنا مره ثانيه الملحق الثقافي.. اطلبوا منه نفس الاوراق اللي طالبينها منه التعليم العالي.. مع العلم انه احنه في أمريكا.. يعني من وين أجيبلهم اوراق رسميه وانا في امريكا.. وثاني شي اطلبوا منه انجيبلهم اثبات بأنه احنه ندرس!!!!! وهذي هي الصدمه الكبرى!! يعني انا طالب صارلي كم شهر اهني.. والملحقيه اتشكك في اني طالب أو اني ياي العب؟؟؟آمنا بالله ورحنه جبنالهم الاوراق ودزيناها.. عقب كم يوم.. نجيك البريد ولا الملحق الثقافي دازلنه الاوراق اللي دزيناها لهم.. ندق عليهم نقولهم ليش دازينها له مره ثانيه؟؟؟ يقولولنه عشان احنه صدقاناا لكم وانتوا الحين لازم تدزونها حق اهاليكم يودونها التعليم العالي؟؟؟؟؟؟؟؟؟ وانتوا شفايدتكم يا الملحق الثقافي؟؟ ومو المفروض الملحقيه تكون على اتصال حتى ولو كان بالانترنت مع التعليم العالي؟؟؟؟ أم ان كل جهه تشتغل بروحها ومالها اي دخل بالجهه الثانيه؟؟؟راح الوالد وسأل التعليم العالي وقاله الملحق الثقافي قالنه لازم اندز اوراق ومادري شنو... جان يقولون للوالد لا ما يحتاي احنه اولريدي ماخذين معلومتاهم واوراقهم ليش طالبين منهم اوراق؟؟؟ أكثر من جذي تخبط وفوضى ماشفنه؟؟ وللأسف انه هالادارات الفاشله هي اللي تمسك وتتحكم في مستقبل الطلاب اللي مبعوثين للخارج؟؟؟؟؟؟ وحتى اليوم وانا اكتبلك هالايميل... واحنه موعارفين وين الله قاطنه.. نتصل اهني يقولون شي.. انجيك مع التعليم العالي نسمع شي ثاني نهائيا.. اللللللهممممم لا اعتراضضضضضض
.
.
.
ومني اليكم والى من يعرف من يهمه الامر
.
.
اللهــــــــــــــــــم لا اعتــــــــــــــــــــــــــــــــــراض

30 comments:

well_serviceman said...

لاحول ولاقوة الا بالله... اللهم لا اعتراض!!!

Eng_Q8 said...

well

اللهم لا اعتراض :)

Enter-Q8 said...

وين شسمه هذا

كاني خالد السلطان


اتحاد الطلبة يا حظي ليش ما يباشرون شغلهم

وين ربعه اللي وياه بالكلية
لو ما عندهم احد يجمعهم مثل اتحاد او شعبة من الاتحاد يقدون اهم يخطون رساله و بتواقيعهم و يرسلونها الى الصحف بعد طبعا تهديد الملحق الثقافي بهالشي
لأن ربعنا يخافون ما يختشوش

Eng_Q8 said...

انتر

والله ماادري يالزميل على قولته مايبون مشاكل

Enter-Q8 said...

يعني اللحين اللي اهم فيه مو مشكله

تدري اشلون خله يكلم بو عيده على قناة سكوب
ويرد عليه الاخ بو عيده و يقوله
صوتك وصل

Eng_Q8 said...

انتر

بعد شتقول الله يعينهم

لووووووووووووووووووووووووول

لا بالله كدوا خير

فتى الجبل said...

هذي اهيا بلاد العرب اوطاني
الحقوق فيها كلش مو ضايعة

Eng_Q8 said...

فتى الجبل

لا من قال ؟

حياتي هدف مو عبث said...

بالكويت مو مترقعيين

تبي بره

!!

فريج سعود said...

نورية يا نورية

Eng_Q8 said...

حياتي هدف

على الاقل بالكويت بين اهلنا بره منو عندهم ؟

Eng_Q8 said...

فريج سعود

يا معود اي نوريه زين ما يردون من الاجازات ويقلبون الدنيا ويستجوبونها عشان ما اجلت الدراسه لبعد رمضان

kila ma6goog said...

العن خيرهم

ليلحين جذي

يبه قول حق صاحبنه الزم ما عليك راحتك

خل ابوك يدزلك الفلوس دايركت و ادفع انت التويشن حق الجامعة

وايد افضل من الاعتماد عالملحق

Eng_Q8 said...

مطقوق

مافي الا جذي

marshmallows said...

تعتقد في احد يهمه الامر بالكويت ؟؟

Salah said...

يقولون اتحاد امريكا احسن من بريطانيا

ويقولون الملحق الثقافي بعد وايد نشيط

بس شنو سبب هالمشاكل؟ مادري

wa6an-alnhar said...

هذول بأمريكا و هذي حالتهم !! عيل انا اشبيصير فيني هناك
:S

Dr. Academy said...

مشاكل مشاكل و ما من حلووووول

تدري يا باش مهندس ان الدكاتره المبتعثين في كندا معرضين للطرد لان معاشاتهم اقل من الـ minimum wadge !!

هذا كلام بالله ؟؟

تدري انهم مقترضين و يخلون الوزاره تدفعلهم عشان ما ينطردوون ... هذول دكاتره رايحين اييبون تخصصات ..

و هم على قولتك الوزاره او المكتب الثقافي مجعص عليهم بفلوسهم ..

يا اخي الوضع سيء سيء جدا

Q8i Blogger said...

مالومه دام اتحاد الطلبه الي عندهم ماسكينه وثنيين .. السموحه .. اقصد تيار ليبرالي



بس لو يشوف الوضع عند ربعنا في كندا .. اخس مليون مره .. حتى ملحق ثقافي ماكو

هذي الكويت صل على النبي

why me said...

حاله كسيفه

كويــتي لايــعه كبــده said...

الملحق من زمان مولي

هذا فساد لا أقل ولا أكثر

محسوبيات وتعيينات مصلحه وأضبطك وتضبطني وسرقات ووو

أخذ هذه...

في أحد الوزارات بعد ما تعين فيها الشيخ الفلاني وزير
فجأة تتعين فيها الشيخه بنت أختة وفجأه يتعين فيها زوجها... صدفة طبعا. كانو توووهم متزوجين. وبنفس الأسبوع اللي تعينو فيه حصلوا أثنينهم بقدرة قادر على بعثة دراسية من الوزارة الى نفس المكان في أمريكا والمكان اللي هم نقوه. هي داومت بالوزارة تقريبا اسبوع وهو ولا يوم وانا خابر أحد الشروط ان يمر عليك اربع سنوات دوام على شان تحصل على الإجازة الدراسية وفقط اعلى المتفوقين الثلاث يحصلون على "بعثة دراسية". طبعا غير اللجنة وغيرة من شروط على الناس "العامة".

الزبدة: كانت مجرد هدية لزواجهم وشهر عسل ما ادري سنين عسل وعلى حساب الدولة!

ما عندي خبر اذا درسوا والا لأ وماني حاط بذمتي بالرغم ان الحصول على المعلومه سهل.

الناس يمولصون بفلوس الديره وحنا قاعدين ونطالب وباصلاح وشفافية وتنمية ووو
والله حنا مساكين

Eng_Q8 said...

مارشميلو

يمكن :)

--------------------------------

بو صلوح

انتوا ادرى :)

-------------------------------

وطن النهار


ماراح يصير فيج الا العافيه انشالله انتي بين اهلج هناك واذا صار شي لا سمح الله بالسياره 4 ساعات وبالطياره نص ساعه واهلج عندج

--------------------------------

دكتورنا

قويه والله لي هالدرجه ؟؟؟

----------------------------------

بلوقر

بكل اتحاد او رابطه في الزين وفي الشين وهذا شي عايشناه على ارض الواقع

ملحق ثقافي ماكو ؟؟؟

قامت تطلع السوالف وينا من زمان عن هالمشكله البايخه

اللهم صلي وسلم عليه
----------------------------------

واي مي

جدا

----------------------------------

كويتي

خوش هديه
بلا اربع سنين بلا بطيخ

اي والللللللللله حكمه

صج صج صججججججججج احنا مساكين

Dr. Academy said...

اي نعم لي هالدرجه

elq87obi said...

لاحول ولاقوة الا بالله

هذي امريكا و جذي

عيل احنا شنقول و شبيكون حالنا ؟

وليييييييه

secret said...

مآسي .. و الأمل مركب تحطم في موانيها

الزين said...

صار لي يومين مالي قلب حق التحلطم

لاااااااايعه جبدي

الجو مكأبني

ياربي صيف وحر وهم غبار

أبي اطلع البحر
ابي اشم زفرة الييم

ابي ريحتي تصير ميد وخثاثيق

ابي احذف جموووم بالبحر واسبهم

ميخالف راضية

بس خل يطيح الغبار
قتلني

:$

شفت شلون ان التحلطم يعدي
انا ساكته

ومن ادش عندك ابلش اتحلطم

الله يسامحك

lawyer said...

وين سكرتير الخرافي الي بس شاطر يحوس في البلوقات و عافس الدنيا و 20 بلووق لصالح الخرافي

نادووووه

يقراا

Anonymous said...

ياكرهكم مع الخيل ياشقرا وانتو ماتدرون وين الله قالكم فيه.

انا هناك وماسوي شي الا عقب ما استشير الادفايزر بالسفارة وماشفت منهم إلا كل معامله زينة وبروفشنل. لكن نسبة كبيرة من الطلبة مو محترمين ويلعبون لعب سعيده بسطوح ......فشلون تبينهم يعاملون عدل؟؟؟؟؟؟؟

الشيء بالشي يذكر! كل الملحقيييين دكاتره الا زينب الربعي الى عينها اخوها بالمنصب عادي بلاوي الربعي الله يرحمه ينسكت عنها لان الخيل معاه مو ضده.

الظريف الخفيف الى يقول الدكاتره بكندا يقبضون اقل من المنمم ويج: صح كلامك!!!! لكن راتبهم الى يتعدى 700 دينار وينزل بحسابهم هني بالكويت مانحسب. بالمفتشي يقبضون راتبين واحد هناك وواحد هني.

Eng_Q8 said...

دكتونا

لا حول ولا قوة الا بالله

-----------------------------

الكويت حبي

الله يعين :)

-------------------------------

سر

ويا مراكب من قهر يا مجاديف العمر يا بحر صوته عبوس .. فيك عذبني عذبني عذبني القهر

وكل ما نرسى في مينا نقول يمكن مينا ثاني .. واثرها غصبن علينا لعبه يلعبها زماني

وما على الدنيا عتب كل ما فيها اماني
قالها عبادي الجوهر :)

----------------------------------

الزين

لووووووووووووووووووووووووووووول

ترى التحلطم زين حق الكليه والجبد والبنكرياس :p

-------------------------------

لوير

انتي مباحث ؟؟

اتعرفين كل الناس هذا منو بعد شنو نكه ؟!؟

----------------------------------

انيموس

اولا اخوي العزيز انا نقلت ما وصلني من صديقي

ثانيا اذا كنت انت مرتاح فهذا شي زين يمكن انت رايح على حساب الحكومه مو على حسابك

ثالثا الاخ الي دازلي الاميل معدله 3.5 يعني مو من الي انت قلت عنهم وان وجودوا

وبعدين اخوي يمكن بولايتك كل شي ممتاز وبولايته لأ

وبالنسبه للملاحق انا مااعرف ولا واحد فيهم ولا اعرف هل اهم دكاتره والا لا وماادري ان اخت الربعي ملحق اصلا ماادري ان عنده اخت

عليهم بالعافيه خل يقبضون :)

اخوي هناك حالات مثل ما ذكرت بالبوي وهي حالات يمكن اتكون فرديه ويمكن اتكون عامه الله اعلم وهذا البوست نقل من صديق عزيز وثقه واذا كنت مهتم بالموضوع ارجوا ان تبحث عن هذه الاخطاء وصدقني راح تلقاها

وموفق بدراستك يا يبا

well_serviceman said...

حيالله مهندس.... بالنسبه حق اخوي انينموس.. اخوي لا تظن ظن سوء بالطلبه اللي مستائين من الملحقيه.. وحتى لو فرضنا كلامك صحيح.. عشان الطالب مو ماشي بدراسته يعاملونه معاملة سوء؟؟؟ انت شكو بشخص الطالب انت المفروض تكون عندك أمانه بالعمل مالك شغل بشخص الطالب.. وثانيا وأخيرا..انا عضو سابق بالاتحاد وانا طالب سابق بأمريكا وعشنا وشفنا شغلات ما تنذكر بالملحقيه.. ومالي اي مصلحه اني اكتب هالرد اذا انا كنت بألف وبشرق وبغرب... وتحياتي