Wednesday, July 16, 2008

ابراج الكويت




لكل بلد رمز او بالمعنى الصحيح صرح تعرف به ... مثلا برج العرب يدل على دبي والاهرامات تدل على مصر وبرج ايفل يدل على فرنسا وبرج بيزا يدل على الحب ايطاليا .. وعندما تذكر ابراج الكويت فانك ستقول تدل على الكويت طبعا لست اقارن الابراج ببرج ايفل او الاهرامات انما هي حقيقه تدل على الكويت وهذا ماكنت اقصده

شيدت ابراج الكويت لكي تدل على التطور الكويتي والنماء الاقتصادي وانتقال الدوله من مرحلة لاخرى ولكي تكون رمز للكويت الحديثه التي اتت بعد طفرة النفط .. وكم كنا فخورين بهذا الصرح وكم كنا نتباها وكم كنا نفرح حينما يزورنا الاقارب من الخليج والاصدقاء من الدول العربيه وهم يتمنون رؤية ابراج الكويت

الاسبوع الي طاف كنت طالع مع رفيجي وعقب ما خلصنا شغلنا قلتله وين بتتغدى وكل ما طرينا مطعم قلنا ملينا منه واحنا نتمشى بالسياره وصلنا صوب الابراج في مطعم مفتوح يم الابراج قلنا خل انشوف شسمه والا فيش ماركت وماادري شنو مطعم ياباني .. جان اقوله اشرايك اندش الابراج جان يقولي اتصدق شخباري الابراج لي الحين فيها مطعم قلتله اتصدق ماادري انا خبري فيه عقب الغزو اول ما تبطل ييت جم مره وعقب ما ييت قالي يبا توكل على الله خلنا انشوف شسالفة ابراجنا



ولما وصلنا المطعم والا الديكور اهو اهو من سنة الطفحه السقف الي على نجوم والطاولات اهي اهي وكل شي على ماهو عليه .. قلت حق الويتر ابي سموك ايريا يعني مكان للتدخين قالتلي كل الطاولات فيها تدخين ؟!؟ اي شي شخباااري كل الطاولات فيها تدخين قلتلها اوكي وقعدنا ... وياليتنا ما قعدنا

قمت اطالع حوالي والا مدرس درسني اسلاميه قبل عشر سنين قاعد مع واحد واذكر هالمدرس بالذات لانه كان وااايد متطرف كل شي عنده حرام تلفزيون حرام لعب جنجفه حرام خاااصه الحريم كان يقول لا تسلم على بنيه ولا تشوف بنات عمك ولا بنات خالك ولا تسلم عليهم وحرااام وعيب وما يجوز ومن هالحجي ... قلت بقوم اسلم عليه جود يذكري والا شوي والا داش واحد معاه ذيج المره الي قاصه بوي بس كبيره بالسن وتتمخطر والا يروحون عند طاولته .. يه شالسالفه جان يقوم ويسلم عليهم ويسلم عليها ايييد بايييد ؟؟؟؟ وين الحرام ووين العيب .. على فكره اهو بالطاوله الي وراي ولا تشوفونه اشلون يتغشمر ويسولف لا ويعني يسوي مثل المسلسلات يعني يقول يالله انقوم ناكل انا جوعان هاهاهاهاها والا اشرايكم انحلي هاهاهاها ... شكو تظحك ؟؟؟؟؟؟؟ يعني عايش الدور انه رجل اعمال وطبعا صوته بط اذني ذبحنا بكمل ماستر اقتصاد اسلامي بمصر وساقط ومستانس مدرس اسلاميه وينك ووين الاقتصاد

انا قلت بالطقاق ماني مسلم عليه قبل ذبحنا بالحرام الحين يسلم على هذي ويتميلح يعني بيصير تاجر عاد شكلهم نصابين الي وياه ... المراد طالعت الطاوله الي جدامي والا معيديه والله العظيم معيديه والدليل دق التلفون والا الحبيب يصرخ واهو يتكلم .. ولك حط السطحه وخلك باللوري ؟؟؟؟ يا سلاااام تاجر سطحه ولوري بالابراااج والي معاه امبطل الزرارات ماادري ليش لابس دشداشه والي يمه لابسلكم ذيج الغتره المعلجه ودشداشه مخصره ومقصمله يعني الحاله كسيفه
طبعا انا ميت من الضحك لما قال سطحه ولوري .. وقاعد اتحلطم على مدرس الاسلاميه الي وراي ذبحنا سعوديه وقطر والكراتين اهناك ارخص وماادري شنو ... تحجوا اشوي اشوي درينا تاجر والله درينا ودرينا عندك تبعيه سعوديه وجنسيه قطريه خلاص اسكت .. قمت وقلت باكل سلطه والا عائله من الاخوان البدون جنهم اول مره يروحون مطعم يتناقزون جدام بعض حسبالهم كول الله يلوع جبدهم .. طبعا السؤال اشلون عرفت انهم بدون اولا من الشكل ثانيا من اللبس ثالثا البدليات الي مالها اول ولا تالي
ورفيجي يطالعني ويضحك وانا واصل حدي قعدنا وقمت اتحلطم عليه اقوله احنا يايين الابراج والا وين بالضبط شنو هذا شهالناس .. شوي والا عائله كويتيه يايين اشزينهم .. طبعا الي كسر خاطري اماراتيين يايين بيشوفون الابراج بغيت اقولهم لو يايين بالثمانينات ميخالف الحين شيايبكم بويا سيروا لبرج العرب هاي مو مكانكم

ابراج الكويت قاموا ايوله سواقين السطحه واللوري .. والاكل الله يزيد النعمه ويقولون شتبون بالقطاع الخاص .. يعني بالله عليكم هذا شكل ابراج وصرح معماري للديره مطعم عادي جدا يذكرني ببوفيه الدوام والقعده هم عاديه جدا ليش ما يغيرون طبعا الحين بيقولي واحد انت ليش مستحقر الناس يعني ما يروحون ؟؟




انا مو مستحقر الناس ولكن هل اتشوف هذيل ببرج العرب ؟؟ مستحيل .. يا اخي اذا ما عندك غيره على صرح ديرتك انا عندي .. يعني بذمتكم لو انغير المطعم وانحط مطاعم عالميه وعلى مستوى وانغير الديكور وانخليه من اروع ما يكون وانحورف بالابراج من بره شوي وانزين ليتات والوان واتصير دشة الابراج بالملابس الرسميه يا غتره وعقال او بدله رسميه ماراح يكون هيبه اكثر ما تكون الابراج من الاماكن الي تفتخر اتعزم فيها رؤساء الدول الي يزورونا او مدراء الشركات العالميه او اخوانا الخليجيين والعرب الزائرين ؟
لما اتحطلك شوية اشياء ثمينه داخل ..حركات.. ذهب .. مطاعم عالميه فرش عالمي اشياء جميله وغريبه ماراح يسوون لنا برنامج عن الابراج مثل ماسووا حق برج العرب والناس تتمنى اتزورنا عشان اتشوف الابراج .. يا جماعه تبون الكويت اتصير مركز مالي وابراج الكويت جذي صايره اشلون ؟؟ على فكره توه حاطين الابراج شعار البلديه

لم يكن قصدي ان استحقر الناس او ماشابه والعياذ بالله ولكن غيرتي على صرح ديرتي خلاني اتحجى والي بيقول عنصري بقول اي عنصري كيفي كويتي ... انا اقول سنعوا هالابراج وعطوها حق قطاع خاص اذا ما تقدرون اتسنعون شي على الاقل خل يرقع الموقف يمكن يسوي شي حلو حقها

اخر شي طلع الحساب 22 دينار ماادري ليش وانا انصدمت اشلون بو لوري دفع طلع مو هين بس اذكيا مو شاربين لا ماي ولا بيبسي ...ومع كل هذا استمتعت بالقعده مو عشان المكان ولا عشان الاماكن الخلاابه الي بره نص الكويت براحات وبحر فاضي ومطاعم .. لكني استمتعت لاني تذكرت الذكريات الجميله والطفوله البريئه ومع هذا الكويت لازالت جميله



اللــــــــــــــــــــــــــــــهم لا اعتــــــــــــــــــــــــــــــــــــــــــراض


اجازه 3 ايام وراد انشالله .. ثلاثه على يال البحر تضوي من بعيد

31 comments:

كويــتي لايــعه كبــده said...

والله اقتراحك حلو

مع الاسف حالة الابراج انعكاس لحالة البلد

mantovani said...

مرة دعيت ضيف سعودي لمطعم الابراج

و حاشتنا نزلة معوية شديدة

===

طالما ان المشروعات السياحية
((نحن اصدقاؤك))

اهي اللي ماسكة السياحة بالبلد
لا بالله محنا ماشين خطوة

marshmallows said...

اللله ذكرتني بقبل الدور جنه الي تحت مادري الي فوق الي الارض تفتر بالطرف
لمانحط ريل على الي يفتر و ريل على الارض الثابته لمانطيح ;p

اشرايك نسوي مشروع تطوير الابراج

secret said...

قاعد تقلب المواجع يا خيي

بس said...

الله

أبراج الكويت تحجي حاضر بلادي :)



الشكوى لله

JuVeNTiNa said...

انا معاك باللي قلته .. بس توني راده من دبي و سكنت في برج العرب و اهوا فندق مو برج فيه مطعم لا اهوا فندق و 7 نجوم بعد المطاعم اللي فيه والله والله الله يزيد النعمه خبونا ما يصير جينزات و لازم رسمي و اخر شي مستوى والله انه اقل من المتوسط من اكل مو خدمه من كل شي والله .. حتى تعرفت على عايله ايطاليه يايين برج العرب و دافعين شكثر عشان يتعشون و يدخلون بس لانهم مو ساكنين وايد وايد متحسفين لان المعامله ماكانت اوكي و يقولون انه ما تسوى اللي دفعوه للزياره

فريج سعود said...

لو يأجرون الابراج شقق مفروشة وايد احسن

wa6an-alnhar said...

اللللله عالأبراج
أنا بعد خبري فيها من قبل الغزو
و قبل سنتين قررنا نروح

ولا شي متغير!!
حتى النوافير اللي برا ترسها غبار و وسخ
عيزانين حتى ينظفونها و يشغلونها !!

Dr. Academy said...

هذي الكويت صل على النبي ..

انت علبالك فاضين يطوروون ؟؟؟

لا يا باش مهندس مو هامهم

انا اقوول خلونا نجرم البلوتوث و نمنع الحريم من الشغل بالليل و نمنع المسلسلات برمضان

اش لكم بالابراج و السياحه و الاقتصاد

Anonymous said...

مهندس تصدق ان هذا راح يكون بعد حال برج التحرير ..
من فترة جم سنه سمعت ان عرضوا مناقصات عشان يكون فيه مطاعم ويفتحونه لكن البلاوي والمصايب لا تخفى على الجميع ووصلنا لسالفة والله هذي المناقصه ما راح استنفع من وراها + والله هالمطعم يبي احتكار + والله صاحب هالمطعم واصل + الاخ الي ماخذ وكالة سلسلة هالمطاعم هذا شسمه شسمونه وتعال عاد فجج عمرك لما وصلنا إلى نقطه لا تلتقي فيها كل الخطوط وإلغيت الفكره ..
مع إني أظن ان لو يفكرون شويه ويستبدلون المطاعم سواء الي بالابراج أو سواء في برج التحرير أو مشاريع الأبراج الجديده المطروحه للبناء بالكافيهات لان أغلب الناس حاليا تقعد بالكافيهات أكثر من قعدتها بالمطاعم + الناس الي رايحه المطعم بتقعد تآكل غدا أو عشى أو حتى ريوق بتآكل ومو فاضيه تطل من الدريشه وتتفرج والا تتأمل منظر الكويت من فوق + ان لما نحط مطاعم تشوف في فترات الوجبات الرئيسيه ضغط على المكان وطوابير ناس ( هذا طبعا في حال ان تسنع المكان مو على علته الي انت شفتها فيها ) المهم وباقي الوقت الي هو الضحى والعصاري تلاقي جم شخص محذوف اهني وهناك بينما لما يكون كافيهات راح يكون المكان 24 ساعه مفتوح والناس تتردد عليه على طول اليوم ومايكون فيه ضغط + الناس تروح له عشان تغير جو بالدرجه الأولى مو عشان تآكل وتمشي ..
وايد أفكار براسي خل يمسكوني المشروع ( الأبراج وبرج التحرير) ويشوفون شسوي ;p
مشكور والمره اليايه لما تروح اشدعوه يعني اعزمنا لوووووووول

well_serviceman said...

حيالله مندس.. ياخوك هذاك أول أبراج الكويت... الحين ماعندنه شيئ يذكر كصرح او كانتاج معماري نفتخر فيه... كافي المستشفى اللي عند دخلة شارع المطاعم اللي مسوينه كوبي بيست حق برج العرب.. اللهم لا شماته!!

الزين said...

وانت الله يهداك من يروح الأبراج الحين

المفروض تسكت ماتقول انك رايح هناك

تعال بس انا اعزمك على ماكي ابرك لك

:)

molok said...

قبل كان اكل الابراج وايد حلو وراقي ..
ألحين الله يزيد النعمه .. المشكله مو بس بالاكل .. المشكله ان الشكل من بره صار وايد وصخ :(

وهذي الكويت صل على النبي

والموت يعشق فجأه مثلي..والموت مثلي لايحب الإنتظار said...

الابراج!!!!!

صراحة انا زرت الابراج العام مع صديقة قلنا خل نكسر الروتين ونزور معلمنا من زمان خبرنا فية...عينك ماتشوف الا النور...وبالضبط الاشكال اللي هناك ...بس اللي لاحظتة اخي الكريم..اغلب اللي شفتهم كانو الظاهر والله اعلم مواعدين..بنت مادري شلون صايرة مترصرصة ومكياااااااج ومعاها واحد ااسمر مثل عيال كيفان الله يحفظهم:)
بس صراحة قتلها خل نقوم اشكالنا شبهة

Sn3a said...

عاد رفيجتي تمدح فيش ماركت
بس انا مو من جماعه السي فود

اهم شي مدرس الاسلاميه
يبا التطرف الدين
يخليه متطرف بالعكس لما يكبر
اهو السستم جذيه

انا الابراج مادخلتها الا عقب الغزو مره
بسسس
لاني ادري بيضيق خلقي ان دخلت مره ثانيه


يعني شنو سطحه؟

اي والله
على كلامك
وعلى كلام اللي راحوله
المطعهم ماينبغى
لو بس تمسكه شركه سنعه
واايد احسن على الاقل يكون رمزنا على مستوى
مو جذيه


احنا وايد نتمنى
بس شبنشوف؟
تدري بش مهندس
بمرينا اف ام كان سؤالهم شنو شعورك لما تقوم من النوم بعد عشر سنين
انا شخصيا
اتوقع الحال اذا مو مثله اردا
واستاد جابر ماخلص
وللحين مستانسين بدوار الجوازات
والشدادشيه مخلصين فيها كليه زياده
والاتحاد مستانس ب 38 سنه
والمستقله والوسط للحين نجره

وسعدون حماد يقول نطروني بالمجلس


يعطيك العافيه يبا

MO3ATH said...

يرقعون بالأبراج وباجي الديره ؟

ماكو فايده انت مع رجال الأعمال قاعدين وتطفي الكهربه وانزل كعّابي مادري جم طابق لوووول لا وتطلعون وجدام الابراج حفريات مكان شرمبي القديم

السالفه مو بس بالأبراج ولا انت شرايك ؟

Mok said...

أخر مره ذهبت الى الابراج تقريبا قي عام 1983 واذكرها عدل

كان عمري تقريبا 7-8 سنوات

هذيان said...

تحجي حاضر بلادي ؟؟؟
كانت من أهم المعالم التي تمت في عهد الأمير الراحل الشيخ جابر الأحمد
للأسف يا أخيتك أهملت

حياتي هدف مو عبث said...

تذكرت يوم طفت الكهربا
وخلو الناس تنزل بالسلم من الدور 82

Mamloo7a Q8ia said...

للاسف انهملوا مثل وايد اشياء
وحسافه عليهم
الاكل مأساااااة
ويسبب تسمم صراحه

Blog 3amty said...

الديرة كلها واقفة من 1980 يات على الأبراج وانا خوك

بـنـت بـطنـهـا said...

لول ما سوت عليك غدا بتغداه

هارد لك لول تعيش وتاخذ غيرها

انا رحت له قبل خمس سنين بس ريوق لان غداهم وعشاهم الله يزيد النعمه

وانا معاك على سالفة اللبس الرسمي

بس خابرة مطعم فتح عندنا اسمه وولف قانق بك
كان ما يصير تدش له إلا بلبس رسمي وتكرم ما يصير جوتي الرياضه .. وخسر وسكروه على هالسالفه على حد علمي لان الناس ما قامت تروح له والله اعلم

بس صاج حتى لو الناس ما تروح بس يبقى المكان نظيف ويديد هذي الابراج مو شي عادي

بس شنقول وشنخلي خل المشروعات نايمة بالعسل نوم

U-Turn said...

اول شي الله يهنييك بالإجازه وماكو أحلى من يال البحر :)


ثاني شي أنا وياك ومو وياك بهالموضوع
صح حلو إنك تغيير المطعم على الأقل حطوا بداله مطعم المرسى ونيس ويوسع الصدر وشعبي وتراثي بنفس الوقت وحلو إقراحك حق اللبس الشعبي

بس إذا حورفت بالأبراج من برا بس ما راح يصير صرح تراثي
أنا أقترح يسوون لنا ناطحت سحاب وتصير صرح معماري يدل على الدوله حضاريه متقدمه !!

بس تصدق مهما يكون لي ولاء لهل مكان وما ودي يغيرون فيه شي ;p

يعطييك لاعافيه وعساك على القوة

lawyer said...

مراااااا رفيجاتي سعوديات وديتهم الابراااااج

خلوووووو الابراج و جابلوووو قصر الشيييييييخ جابر الله يرحمه

متبهريييييييين في التواضضع

جان اتعنفق

قلت لهم ايييييييه احنا شيووووخنا عاديين

اشفيييييييييكم عادي تبوووون ادخلكم الجوهره

ههههههههههههههههههههههههه



اي والله تفشششششل الابرااااااج

someone_q8 said...

السلام عليكم
اخوي البشمهندس
اهيه واقفه على الابراج بس ؟
الديرة كلها ضايعة
انطر الفرج
بعد ضياع مالطا

قلب طفله said...

شي يفششششل

انزين من برااا رقعوا فيهم صبغوهم المساحات الخضرا اللي دار مدارهم يبي لهم عنايه مو الهنود و الزلمات مبسطين عليهم ويا عفيستهم :@

بس يظلون رمز وطني لين الله يفرجها

و يسنعونهم

kuwaitawy said...

والله يا مهندسنا يا طويل العمر


انا حاط صورتي ابراج الكويت

مو مستانس بالابراج

لأ

لأنها كانت صرح للدولة الحديثة ايام الثمانينات مثل ماقلت






الابراج ما رحت لها الا يوم كنت بالابتدائية مودينا رحلة والمره الثانية قبل فترة بسيطه كنت مع صديق بريطاني
اهوا طلب مني ان نروح الابراج

رحنا واستانس عالابراج بصراحه
وكان منصدم ان الابراج عمرها اكثر من 25 سنه تقريبا


يقول ودي اشوف الكويت على ايام عز الابراج


والله العظيم قالها

kuwaitawy said...

نسيت اقولك ان يشرفني ان تكون مدونتك

من المفضلة لدي

(( مدونات لا استغني عن متابعتها ))


تحياتي لك

بو محمد said...

ابراج الكويت لم تعد تحكي حاضر بلادي
و إجازة موفقة إن شاء الله

فتى الجبل said...

ترد بالسلامة

KuWaIt MaStEr said...

اهيه المشكله وقفت على الابراج اصلا الكويت بكبرها يبيلها من يده ويديد افتحوا الافينوز وقالوا كبير وكبير هالمجمع بالامارات وله شي عندهم وترى لو بتشوف باجي دول العالم وايد عندهم معالم سياحيه واشياء تاريخه والكويت اللهم يكافي على الابراج مسوينه شارع الشانيزليه مادري شمه الي بفرنسا وربي ضايق خلقي لانه برجع الكويت قاعد افكر وين اروح اذا رجعة الكويت انا الحين بأسيا كل يوم اروح من جبل لي جبل من نهر لي بحيره ومن اندر قراوند لي مجمعات تحت الارض اما الكويت وين اروح المرينا وله الافنيوز وله سوق شرق ؟ جنهم كلهم مثل بعض ومافيهم شي وحيااااااة كسيفه بالكويت ماكو اي تطورات ياريت ياخذون شي من الغرب من طريقة معيشتهم والناطحات السحاب و القطارات وانا بالصين اقوم من النوم افتح الدريشه اشوف مطر وله غيم اسود لكن بالكويت لمن اقوم من النوم وافتح الدريشه شنو اشوف ؟ اغبار ؟ وله رطوبه ؟ وله جو يضيق الخلق مايساعد حق بحر وله حق تمشي وصح انا دخلت برج العرب لازم بملابس رسميه لانه فندق راقي وعلى مستوى وبدبي وايد فنادق فخمه ماتعد ولا تحصى والكويت عندنا النخيل و فنبيك و هيلتون خابينه فيهم على وله شي خلاااص الكوييت ختربت مافيها انظمه سنعه وسوري اني طولت عليكم بس من زود الجمر الي فيني بطلعه بالبوست