Sunday, August 3, 2008

100


بتاريخ 20\11\2007 بديت فيها التدوين واليوم وصل عدد البوستات الى 100 بوست .. عدد الزوار للاسف مااعرفه لان كل شوي احطلي كاونتر انشالله هالكاونتر ما يخوره بعد .. على العموم .. فكرت شنو اكتب ومرت علي الف فكره وفكره .. هل اقلد العرزاله واحط كل المدونات ورايي فيها هل احط بس رقم هل وهل وهل .. قلت يبا مالي الا اني احط نيو بوست والكلام بروحه يطلع

كانت علاقتي بالانترنت مثل علاقتي بالموضه يعني مااعرف الا الشيء اليسير .. والمدونات اقرى عنها بالجرايد او اسمع عنها من الربع .. اتذكر باني كنت اتابع المدونات من وقت لي وقت وحتى اذا بغيت ادش مدونه اكتب بجوجل ويطلعولي .. بيوم من الايام شفت ربعي وتأثرت وقلت بكتب كالعاده على ورقه وقلم قبلها كنت داش على بلوق من البلوقات ولقيت فوق كرييت بلوق قلت خل اشوف يمكن السالفه سهله وطقيت عليه والله وصارت المدونه .. كتبت الموضوع وبيني وبينكم خرابيط وبس جذي وقلت خلاص طاف شوي والا في كومنت وماانسى اول كومنت من براقش .. قلت يالله نكتب موضوع ثاني .. شوي والا السالفه اتيوزلي

بعدها بديت احب التدوين وصارت المدونات جزء من حياتي اكتب فيها ما يخطر على بالي وبدال ما كانت كتاباتي جامده وباللغه العربيه واكتبها باوراق واخشها صارت كتابه باي لهجه ابي واخذ اراء الناس فيها ونتعلم من الاخطاء واتزيد المعرفه من الكومنتس

طبعا كنت مااعرف احط اسم حق المدونه وكان اسمها مثل اسم اللنك كويت61 .. بعدين عرفت اشلون اغير الاسم واخترت اسم كاسك يا وطن .. اخترت هالاسم لاني متأثر بمسرحية كاسك يا وطن وخصوصا المقطع الاخير وتم الاختيار .. وفجأه هم براقش حطتلي لنك واتفاجأ ان هم في مدونه كويتيه ثانيه اسمها كاسك يا وطن .. ييت بغير الاسم لكن صاحب المدونه هذيج بطل قبل لا ابتدي التدوين لاني ما شفت بوست بشهر 11 فقلت خلاص يت من نصيبي وظليت على الاسم ... وطبعا هاللوك ماكان موجود من قبل واشكر من سوالي هاللوك من كل قلبي ومن اعطاني هذه الصور الجميله الي مزين فيها البلوق قبلاتي وشكري وعرفاني لانهم غيروا شقة العزاب الى بيت بالضاحيه

اللهم لا اعتراض .. اكتبها دايما من مرحلة الثانويه .. وايضا قمت اكتبها بنهاية اي شي اكتبه بالمرحله الجامعيه .. كلمة تذكرني بشيء لا يمكن انساه كلمه لها الكثير من المعاني غير المعنى الي تدل عليه .. اخذتها من اغنية الليله المحمديه لعبدالله رويشد .. لذا هالكلمه لها وقع خاص بقلبي وتدل على الكثير الكثير من المعاني بس كفايه عرفتوا منين ماخذها

انج كويت .. امانة هالنك اخترته اختيار عشوائي لاني مثل ما قلتلكم مو حاط ببالي اني اتم كل هالمده بعالم التدوين هم بغيت اغيره بس الكل قام يقول مهندسنا واعرفوني بالنك فقلت راح اخليه مع انه مو عاجبني بصراحه نهائيا لكني احب كلمة مهندسنا منكم لذا قررت اخليه

تعلمت من التدوين كيفيه صياغة الفكره وتوصيل النقطه المراد توصيلها للقاريء .. اي نعم وقعت باخطاء كثيره ولازلت اخطيء وهذا ما يجعل الشخص يرتقي من مبتديء الى مجتهد فانا توني وصلت لبداية مرحلة الاجتهاد .. ايضا تعلمت من التدوين كيفيه النقاش لاني بصراحه مااحب المنتديات ومااحب اشارك فيها واحس ان التدوين افضل بكثير من المنتديات هذا بوجهة نظري .. فانا بدايتي اتت من الدوانيات مو من المنتديات :) .. تعلمت من التدوين النقد من غير شتم او لعن او جرح شعور الاخرين وهذا الى الان اتعلمه .. تعلمت من التدوين افكار الكثير من ابناء بلدي التي تساهم باتساع مداركي

اكتسبت من التدوين صداقات كثيره وان كان اكثرها من خلف الشاشه وبعضها الاخر تحول الى الحياة الواقعيه .. رجال و نساء اصحاب فكر ممتاز اصحاب حب كبير للكويت نتشارك بالهدف ونختلف بالاراء انما الهدف واحد .. يثلج صدري كثيرا حينما ارى ابناء جلدتي بهذا التفكير ويكنون الحب للوطن غير هذا ألتقي مع الكثير منهم بنفس الافكار .. ولا انكر بان هناك من تتطابق وجهات نظرنا وتفكيرنا واصبحوا جزء مني بعالم التدوين .. اكتسبت اخوه واخوات واقسم بانها ليست مجامله ولكن صج انكم اخوان وتنحطون على العين والراس وماراح اقول اسامي لانكم اتعرفون روحكم ولانكم بصراحه وايد وشهادتي فيكم مجروحه ولا تحتاجون فيها لشاهدتي فانتم اكبر من الكلمات

حينما قرأت اليوم ما كتبت بالسابق اجد نفسي اضحك تارة واحزن تارة .. اضحك على بعض ما كتبت واحزن على بعض كتاباتي بمواضيع لم تتغير الى الان واحزن على اناس كانوا متواجدين واختفوا او كانوا متواجدين هنا ولم يعودوا هنا

مدونتي اصبحت هي كراس ذكرياتي .. احببتها واصبحت بيتي الثاني مع عائلتي الثانيه المتمثله بكم .. جزء من حياتي لا اتخيل نفسي من دونها ومن دونكم .. اردت ان اكتب هذه الكلمات بمناسبة البوست ال100 عسى ان تكون كلماتي هي نفسها حينما اصل الى ماكتبه الله لنا

كلمات لا اعرف ان وفقت بها لكني عاجز عن التعبير وعاجز عن ايصال شعوري .. وبالختام لا يسعني الا اشكر كل من ساندني ببداياتي وكل من سيساندني بالايام القادمه فان استمراري مرتبط بكم ومن غيركم اعتقد باني لم اكن قد وصلت للبوست الخامس.. شكرا من القلب ... واعتذر من كل شخص زعلته بكلمه غير مقصوده واعتذر عن اي تقصير مني اتجاهكم وبني ادم معرض للخطأ .. وتقبلوا مني خالص الشكر والتحايا


اللـــــــــــــــــــهم لا اعتــــــــــــــــــــــــــــــــتراض


60 comments:

فريج سعود said...

اولا سامحني ما علقت على البوست الي فات والي ماكنت ناسيني فيه
اشكرك واشكر تعنييك لي ومواساتي
وحبيت اقول لك عقبال البوست الالف
انا اعتقد باجر عيد ميلاد بلوقي الاول وانت الهمتني شاكتب بهالمناسبة
كل ما قلته بهالبوست ينطبق علي وعلى الاغلب
وخصوصا اننا تعلمنا النقد من غير تجريح ومراعاة كافة الاذواق
افتخر فيك كصديق وزميل واتمنى لك كل التوفيق

قلب طفله said...

ما شاء الله

و عقبال المليون بوست ان شاء الله

:)

فريج سعود said...

نسيت اقول لك
مدونتك مو قاعد تتحدث عندي مر اي كهربجي خل يشوف لك شالسالفة

اللهم لا اعتراض
من اسمعها ينغمت قلبي
تدري ليش لان المصاروة ذلونا فيها طنازة ايام الغزو

Kuwait said...

كل عام وانت وكاسك يا وطن بخير :)
بالنسبه لي شخصيا عرفت كاسك يا وطن صدفه كانت أول مدونه أدشها ومنها شفت وايد مدونات وعرفت هالعالم ..
أما مهندسنا كان أول شخص رد علي بأول بوست وما قصر علمني وايد أشياء بمدونتي العبيطه الي كانت مزاجيه ناس تطلع كومنتاتها وناس لا لوووووووول
..
الله لايحرمنا المدونه وصاحبها ..

JuVeNTiNa said...

كل 100 بوست و انت بخير و صحه و سلامه

بو حامد said...

مدونتك من المدونات الجميله حقيقة واستمرارك وتواصلك معنا يعني الكثير ، واقعيتك في الطرح وبساطه لغتك وسهولتها تضيف الكثير لهذه المدونه الجميله

اتمنى لك اتسمرار في الكتابه وان لا تتوقف لتلتفت خلفك ابدا

كن بخير ،،

wa6an-alnhar said...

كل عام و انت بخير
و مدونتنا بخير
:)

و عساها عامرة بوجودك مهندسنا

حياتي هدف مو عبث said...

بالرغم من إختلافي الشديد معك بالأفكار وطريقة التفكير

إلا إني أحب جداً أقرأ لك إنت
وواحد ثاني بس ماني قايله اسمه
:p

نظرتك للامور تخليني ارى امور كنت اجهل بوجودها


وان شاء الله تكون متواصل معانا دايماً بالمدونة


(:

dearkuwait said...

كل عام و بوستاتك بخير واتمنى لها الدوام والاستمرار في ظل مهندسنا الكريم
:p

Enter-Q8 said...

تصدق لاحظت شغله اغلب المدونات بدايتها بهالاشهر
يعني كويت شيلي جيرل و فريج سعود و انت
قلت خلني اشوف انامتى بديت
طبعا انصدمت ان كان بشهر ثمانية بعد
2004
لكن كنت اعلق فقط و امر مني و مناك وكانت المدونات قليله
بشهر 6 2005 نزلت اول بوست

الخلاصة ياسيدي
عدد مواضيعك في شي مميز انه مو حشو لسد الفراغ
و هذا شي رايع و ماهي مجامله
و ما شاء الله عيني عليك بارده حطيت لك اسم

و نبيها
15.487.168.484.548
بوست
لا تقولي كم رقم

الزين said...

كل عام وانت ومدونتك بخير

طلعت يديد بقراطيسك

وانا اللي على بالي اقدم مني

100 بوست

نفس طويل

كلام وايد

تحس انك انجزت؟

سويت شي؟؟؟

قدمت شي؟؟؟

استفدت وفدت؟؟

يالله جاوب

عشان تعرف بلوقك له معني ولا بلوق سوالف

آنا عن نفسي

احس ان لي مكان هنيه
ينتظرني
تعليقي عندك اول شي اسويه الصبح
مع القهوة

اعتقد انك لاحظت

وبما انك مدلعني شوية

وين فيروز

هذا وقتها

حط اغنية إدش كان في ناس عالمفرأ تنطر ناس

:)

واصل وكمل

اطرح فكرة وانتقد

يعني سو اللي انت قاعد تسوية

بتترك بصمة على كل واحد يدخل هنيه ويقرا

وانا وحده منهم

:)

molok said...

كل عام وانت ومونتك بخير .. وعقبال البوست ال10000

كلامك واضح ان طالع من القلب وماكنت مسوي له اي تحضير او اعداد ..

عشان جذي كان تاثيره قوي وواضح ..

موفق

5ayrhaa said...

يعطيك الف عافيه و منها للاعلى انشالله
انا الصراحه توني بادي و كلامك يعطي الواحد دفعه للامام

يعطيك العافيه و ما قصرت

nanonano said...

كل عام و مدوّنتك بخير..و هم أنت بخير...لما قريت التعليقات قلت خل أشوف أنا متى بديت...طلع هم شهر 8 سنة 2004...السنين تركض...بس أنا وقّفت ..و أنتو ما شاء الله عليكم قادرين تكملون المسيره
أنحني أحتراما لكل اللي كمّلوا
and didn't give up

Eng_Q8 said...

فريج سعود

عادي يبا عادي المهم اتشوفه ما يهم التعليق يا بو سعده

ولو اخو عزيز وغالي

حبيب وعقبالك انت كمان :)

كل عام واهي بخير مقدما

افا عليك طول عمري ملهم :p

ويزيدني فخر بانك صديقي مع انك اتشجع مانشستر

--

لووووووووووووول

ماادري اشفيها والله ما اعرف اذا اتعرفلك خوش كهربجي قولي عشان اخليه يصلحها

طالع منو يتطنز خل يستريحون بس واللهم لا اعتراض وكمشوه مع عايده رياض :p

----------------------------------

قلب طفله

ثانكس

----------------------------------

كويت

وانتي بخير وعقبالج

يشرفني يالغاليه اني اكون اول مدونه

لووووووووووووووول بس عدلناها الحمدلله :) وزين خيره انهم ماكانو يشتغلون :)

الله يسلمج ولا يحرمني منكم كلكم

--------------------------------

اليوفي

ثانكس :)

--------------------------------

بو حامد

هلا بالحبيب

شهادة اعتز فيها يا بو حامد من واحد بثقلك مشكور على الكلام الرائع

----------------------------------

وطن

بوجودكم ابوي بدونكم ماوصلت ال100 جان حدي 3 ويخبون علي

-------------------------------

حياتي هدف

ليش شديد عاد :)

بس عرفته منو :p

انشالله

---------------------------------

دير كويت

هلا بالغاليه اخت الغاليه

ميرسي ميرسي

ماادري ليش احس جنج قاعده تكتبين بمذكره ليكون تطنزين علي :p

---------------------------------

انتر كويت

انا بشهر 11 :>

شايب يا بو وليد بوقتها انا قاعد اناجر الي بالكليه :p

شهاده اعتز فيها واذا كان لي اسم فانتوا من وضعه مو انا يا بو وليد

لوووووووووووول اكثر من مليار يمكن خمستعش ترليون واربعميه وسبعه وثمانين مليار وميه وثمانيه وستين مليون واربعميه واربعه وثمانين الف وخمسميه وثمانيه واربعين لو مو حاط النقط جان ما عرفته :)

--------------------------------

الزين

مشكوره

شفتي اشلون توه ما طاحت مكينتي :)

العمر يحكم وبعدين بما ان التحلطم زايد اهني فيتهيألج اني اقدم منج ماعليه

بصراحه اي بس لي الحين مو يبيلي بعد

لاحظت :) وشي جميل ان حالي حال فيروز

انشالله فيروز وام فيروز انحطلج يا يبا

شكرا اخجلتي تواضعي :)

----------------------------------

ملوك

مشكور بعد قلبي

اجمعين

--------------------------------

خايرها

الله يعافيك .. مشكور ويزاك الله خير

موفق انشالله وانشالله انباركلك بالبوست ال100

الله يعافيك شكرا للمرور

----------------------------------

نانو

وانتي بخير ثانكس

وانا انحني احتراما لهذا التعليق الرائع والله يقدرنا وانكمل انشالله

--------------------------------

Blog 3amty said...

فالك المليون ..

Eng_Q8 said...

بلوق عمتي

فال عمتنا البيرق الي بتاخذه من الجامعه

أنا كويتي said...

أهم شيئ أن يجمعنا حب الكويت بإخلاص.

مبروك ال100.

وإن شاء الله نحتفل بكادر المهندسين
:)

تحياتي

العرزالــــــه said...

مهندسنا

ترا اسم مهندسنا مالي لاتقعد شسمه

حقوق الطبع محفوظه

انزين

انت تدري شكثر احبك

وتدري ان بدايتي مع بدايتك

وتدري ان ماحاسبنا هاجن داز

يعني اخلص من الاخير

شتبيني اقولك؟

ياحلو قلبك ونظافتك وطيب تربيتك

وفوق هذا

ماني قايل انت تعرف شبقول

كل عام وانت بخير ياعديل الروح

ورجاءا لحد يعلق على تعليقي خلوني سرحان وياي من الدوام مسطل

:)))

kila ma6goog said...

welcome to the club:)

secret said...

كل عام و انت و مدونتك بالف خير و عسى ربي يكتب لكم العمر المديد و لا ننحرم منك و من مدونتك

اما سالفة اللهم لا اعتراض بصراحة صارت لزمة تعودت عليها منك :)

بس سؤال شمعنا الناس تحتفل بهالارقام مثلا 100 ... ليش مو 96 يعني ؟
:)

Mamloo7a Q8ia said...

كل عام وانت ومدونتك بخير
وعقبال ما نحتفل وياك
بالبوست المليون

someone_q8 said...

السلام عليكم
منها للأعلى اخوي البشمهندس وبالتوفيق

نختلف احيانا ونتفق احيانا هذه احوال البشر , لكن اللي يجمعنا حب هالديرة الطيبة
كلنا نجتمع على حبها وكل من يره حبه لها بنظرته ونختلف لان نبيها للأفضل واذا مافيه اختلاف ما راح انكون افكار جديدة ولا رؤى متنوعه

حبيب يابشمهندس بس نصيحة اخوية من جد هالمرة :

لا تحرق نفسك واتعصب تره الدنيا ما تسوى , واذا بتستمر جذية على طول تره الامراض زاهبه واولها الضغط ! عسى الله يبعدك من كل شر
هدي الامور تره المشوار طويييل وانت عارف هالشيء
لك مني كل تحية واحترام

why me said...

مدونتك عجيبه

ومن المدونات اللي لازم اقراها

قبال

100000000000000000000000000000

بوست


كفايه ولا ازيد بعد ؟؟


لوول

Q8-MaNaL said...

كل عام و انته و مدونتك بألف خير


انا قريب اكتشفت مدونتك و ماشالله
اكتشفت انها مدونة راقية

عئبال البوست رقم مليون

حياتي هدف مو عبث said...

منو

:p


خل الشديد على صووب

MO3ATH said...

كل 100 بوست انت بخير وعقبال الرقم الي تبي توصل له :)

كلامك وايد حلو ويوصل مشاعرك بطريقه عفويه وصافيه

خلك على مهندسنا عرفناك فيها وعرفنا ردودك ومواضيعك فيها

انا ممكن اكون يديد على عالم التدوين بس مدونتك مو يديده علي وانا اقرالك من مده :)

كل 100 بوست وانت بخير مهندسنا

darkness said...

مدونتك اهي امل نابض بكويت الغد الواعد

بس ابي اشكرك انك تعطينا الامل

و ربي يزيد من امثالك

:)

eng-girl said...

اول شي يعطيك العافيه :)و عقبال المليون بوست

بصراحه انا طحت على بلوقك بالصدفه تقريبا من شهرين و من يومها وانا كل يوم لااازم امر اشوف البوست اليديد

و موفق :)

Sn3a said...

لوول اهم شي شقه العزاب لي بيت الضاحيه

من احلى البلوقات
وان شالله نقرالك ال 1000 و المليون

ButterFlier said...

عقبال المليون

:)

the.thinker said...

تبارك الرحمن :) عقبال الألف والألفين .. واذا الله عطانا عمر نشوف مليونك :)

يعطيك الصحه والعافيه ، تسلم ايدك

mowa6en said...

مبروك ..
ونترقب إصدارات ملموسة على المستوى المكتبي

حـمد said...

كل عام وانت ومدونتك الرائعة بالف خير

نصيحتي لك بهذه المناسبة ان تحتفظ بما تكتب عندك بالجهاز فقد مررت بتجارب صعبة , بدأت التدوين منذ ايام ازمة الحكم والى الان ضاعت مني اكثر من مدونة بما فيها :)

تحية لك

someone_q8 said...

السلام عليكم
اخوي البشمهندس ولا عليك امر اتجيك على الايميل
تحياتي يا حلو

عثماني said...

وعقبال البوست المليون ان شاء الله

:)

الزين said...

@@


ليش مختفي

قهوتي بردت ترى

سدرة العشـــاق said...

عسى الله يوفقك و يخليك من عيال الكويت البارين فيها اللي كل مالهم و ينقصون

والفال للبوست المليون إن شاء الله

: )

بو محمد said...

الفال إن شاء الله للبوست المليون
و كاسك يا وطن لها محل في القلب كما لصاحبها ركنه الخاص، و كلي سعدة أن أرى البهجة في البوست و بدون حرق أعصاب
:-)
جميل أن اطلع على بدايتك و خطواتك، انت من الناس القلة الذين نصل إلى عمق مشاعرهم و أفكلرهم من خلال كتباتهم، فلا تحرمنا من متعة مقالاتك النارية
:-)
دمت و الأحبة بأحسن الأحوال

بو محمد said...
This comment has been removed by the author.
بو محمد said...

الفال إن شاء الله للبوست المليون
و كاسك يا وطن لها محل في القلب كما لصاحبها ركنه الخاص، و كلي سعدة أن أرى البهجة في البوست و بدون حرق أعصاب
:-)
جميل أن اطلع على بدايتك و خطواتك، انت من الناس القلة الذين نصل إلى عمق مشاعرهم و أفكلرهم من خلال كتباتهم، فلا تحرمنا من متعة مقالاتك النارية
:-)
دمت و الأحبة بأحسن الأحوال

well_serviceman said...

هلاا بمهندسناااا...

كل عام والبلوق وراعي البلوق بألف خير .. وعقبال المليون بلوق والمليون سنه...

متابعين بلوقك اول بأول.. اتحفنا بجديدك بن عمي...

charisma said...

صباح الخير

ما من قصور وكل عام انت ومدونتك بالف خير
احلى شى مثل ما قلت

مدونتي اصبحت هي كراس ذكرياتي ..

ما تتخيل المتعه لما تمر السنين وتقعد تسترجع ذكرياتك وتقراها
:)

الله يوفقك

مطعم باكه said...

عالبركة يا مهندس ..

نتمنى لك دوام العافية ..

marshmallows said...

اللله ونااااسه

يالله انشالله جم يوم و نشوفك حاط 1000

قويه صح ;p

Shaima'a Alkandari said...

مبروك الف مبروك

طبعا هالمكان هو فكرك بس اهو كل شي يعبر عنك ومذكره جميله تحتفظ فيها بس من نوع ثاني
المعروف ان المذكره تنخش مثل ماقلت لكن الحلو بالتدوين ان الكل يشاركك وتستفيد مثل ماقلت من غيرك


مبروك البيت اليديد على قولتك اللى صار بالضاحيه:)

ومادري شقول صج بس عن نفسي فخوره بوجود اخ نفسك ويانا وقلمه حلووو ونابض

esTeKaNa said...

الف مبروك هذا البوست
الف مبروك لنا بوجودك بينا
قد ما اعلق كثير
لكن ثق وامن اني من متابعين مدونتك بشكل كبير
!
والطريقه والاسلوب اللي تكتب فيهم تحسسنا كلنا بالقرب منا
مرات اقول اكيد هذا ولد خالي
ولد عمي
وبالنهايه اضحك على نفسي
واقول اهو بالنهايه اخو وعزيز
الله يحفظك يارب
وعقبال البوست المليون يارب
وسامحناي على التأخير

`~MnO YeNSa! ~` said...

احسك من زمــــــــــــــــــان

مشالله
مشالله

يمكن مو وايد اعلق
بس اجزم اني من متابعينك

مبروك ال 100
و عقبال ال 1000000000
:)

RoOra said...

للأمانه من أول الأشخاص اللي زاروا مدونتي و شجعوني أنتــه ,
من وقتها و أنا متابعه لمدونتك من بعيد,
أقدر أعتبرها قناة أخباريه لكل اللي يدور بالديره :)
اللهمَ لا إعتراض ,, توني أستوعب وين سامعتها قبل ;pPp~
cOngtaulatiOn

بـنـت بـطنـهـا said...

كل عام وكاسك يا وطن بخير

وعقبال ما نبارك لك بالميتين بوست ان شاء الله

Bavaud said...

كوني عن نفسي يديد في عالم المدونات كانت هذه أول مره أدخل فيها هذه المدونة و للحين ما قريت إلا هالبوست

لكن حبيت أقول كل عام و إنت بخير بمناسية البوست ال 100، و عقبال البوست المليون

و ترا خوش صور ماشالله

kuwaitawy said...

عقبال الالف بوست انشاءلله



اتمنى لك التوفيق

كويــتي لايــعه كبــده said...

مهندسنا...
مهندسنا
مهندسنا

مدام انها تسعدك بدقها دق
:)

كل عام وانت بألف خير
او كل مية وانت بألف عام
عاد انت وكيفك
:)

لنا الفخر ان اعتبرتنا اسرتك الثانية
وافتخر شخصيا بصداقتي معك ولو انها من خلف الكمبيوتر

كلامك يأتي من قلب صافي ما شاء الله
وقصدك فهمناه من القلب الى القلب

تحية يا صديق
ولك طول العمر
وعقبال البوست المئة ألف

Enter-Q8 said...

4-12=8

حدك عشر ايام

وين غاط

حـمد said...

ويـــنك

بس said...

عقبال المليون بوست :)

Eng_Q8 said...

انا كويتي

مشكور

الله يسمع منك :)

-----------------------------------

العرزاله

اي صح عدل انت قايلها اقووول انا ليش احبها :)

احرجتني :p

يا بعد قلبي يالعرزاله اتصدق عاد من اهم المميزات اني عرفتك وياليتني عرفتك من زمان

هاجن داز دفعنالهم وخلصنا لا تقعد اتشوه سمعتنا جدام الناس :p

--------------------------------

مطقوق

ثانكس برو

ابي كرت العضويه الله لا يهينك

----------------------------------

سر

شكرا شكرا :)

انا اقولك لانه رقم كشخه

----------------------------------

مملوحه

مشكوره

---------------------------------

انسان كويتي

من الناس الي اختلف معاهم بالتوجه لكني انجرف معهم واحترم رايهم ويعجبني اهو انت يا انسان كويتي لو كل اصحاب التوجه الاسلامي مثلك جان احنا بخير

انشالله :)))

--------------------------------

واي مي

لا كفايه زين نطقتي :p

---------------------------------

منال

مشكوره من ذوقج

---------------------------------

حياتي هدف

حبيبي واخوي فتى الجبل
اوكي :)

---------------------------------

معاذ

مشكور بعد قلبي يزيدني شرف انك اتكون من فرائي وزميل تدويني

------------------------------

داركنس

ماادري شقول خوش كلمه والله مااعتقد اني استحقها لاني كل متحلطم :)

مشكوره على هالكلمه الطيبه
--------------------------------

مهندسه

مشكوره وحياج يالزميله

--------------------------------

سنعه

ليش مو مبين :p

مشكوره

----------------------------------

بتر فلاي

مشكور بعد قلبي وشكرا للمرور الاول :)

-----------------------------------

ذا ثينكر

الله يسلمك مشكور والله يعافيك ويخليك

--------------------------------

مواطن

مشكور

اشلون مكتبي يعني ؟

--------------------------------

بو ديومه

شكرا

شكرا للنصيحه :)

-------------------------------

انسان كويتي

انشالله

--------------------------------

عثماني

ثانكس :)

--------------------------------

الزين

كاني رديت :)

--------------------------------

سدره

مشكوره

--------------------------------

بو حمود

مشكور على الكلام الطيب يا بو حمود

--------------------------------

ويل

شكرا شكرا بو جاسم

---------------------------------

كريزما

صباح النور

شكرا اجمعين

----------------------------------

مطعم باجه

شكرا :)

------------------------------

مارشملو

على الاقل اتصدق اكثر من المليون :)

--------------------------------

شيما الكندري

وانا فخور فيج وبكتاباتج مشكوره

---------------------------------

استكانه

الله يبارك فيج

كلنا بالنهايه اخوان وانا اخوج :)

مشكوره على الكلام الحلو

------------------------------

منو ينسى

شفتي اشلون لا اتغرج المظاهر :)

وانا اجزم اني سعيد بمتابعتج

----------------------------------

رورا

يسعدني مرورج ومتابعتج :)

----------------------------------

بنت بطنها

ثانكس والفال لج

---------------------------------

بافود

موفق بعالم التدوين ومشكور حبيبي

هالصور اجمل ما اهدوني اياه بهالمدونه

------------------------

كويتاوي

ميرسي

--------------------------------

كويتي لايعه جبده

اسكت انا زعلان عليك البوست صارله جم يوم وتوك اتعلق اييييييييييييه خلاص نسيتنا :p

وياك يالغالي :))

--------------------------------

انتر كويت و حمد

كاني كاني لي الحين ما تلوني :p

--------------------------------

بس

ختامها مسك

ثانكس :)

-----------------------------------

كويــتي لايــعه كبــده said...

ما عاش اللي ينساك

سامحني على القصور
انا مقصر مع الكثير من المدونات بعد لاسباب شخصية

السموحة يا الربع

Eng_Q8 said...

كويتي

مامن قصور يا بعد قلبي

يقولك المثل اذا بغيت صاحبك دوم حاسبه كل يوم :)

دوار الجوازات said...

كلام جميل،، و بالتوفيق انشاءالله،،

ونتعلم منك انشاءالله :)