Tuesday, August 12, 2008

اذبحتنا ايران

تحديث
هالصوره من ابداعات الاخ العزيز انتر كويت




اسف على هذا الانقطاع اللاارادي لكن الظروف تحكم .. على العموم رجعنا من جديد .. قبل لا ابدى البوست احب اهدي باقة ورد الى اخواني الاعزاء العرزاله و انتر كويت على تفاعلهم القوي مع قضية الفضاله ويعطيهم الف عافيه وشكر خاص الى سمو ولي العهد الشيخ نواف الاحمد الصباح على اهتمامه بالموضوع .. وعسى الله يرده لنا بالسلامه




-1-










غبت جم يوم ولقيت ان المدونات مقلوبه فوق حدر بكذا موضوع ولكن المحور الاساسي اهو ايران وتدور حولها عدة محاور ولي رأي في هذا الموضوع ... اولا انا افتخر بان لدينا وزير خارجيه مثل الشيخ محمد صباح السالم فتصريحه الي قريته اعتقد انه تصريح فيه من الحنكه السياسيه والدوبلوماسيه التي نرفع لها القبعه .. فبالنسبه للمحور الاول الا وهو الحرب على ايران لا اعتقد ان هناك حرب على المدى القريب هذا برأيي ولا اعتقد ان ايران بهذه الغباوه لكي يدخلوا حرب لا يعرفون ماهي نتائجها وان كانت هناك حرب فالله يستر واذا مست الكويت فانا داش الجيش واذا ما دخلوني راح احارب تكرمون بنعال .. ويجب على الحكومه ان تأخذ الاحترازات سواء هناك حرب او لا.. طبعا عمك اصمخ


وبالنسبه لمضيق هرمز والتهديدات اعتقد ان رد وزير الخارجيه عليهم كافي ووافي وانا بصراحه اشك بتصريحاتهم اتذكرني بهياط صدام .. الآن دعونا نتفق ان ما يهمنا هنا مصلحة الكويت كمواطنين كويتيين .. واعتقد ان المصلحه العامه تحتم علينا ان نكون مترابطين كمجتمع لخدمة الوطن .. الاخوه الزملاء شنوا حمله على النائب حسين القلاف بسبب تصريحه بان الكويت دوله صغيره والى نهاية التصريح اعتقد باننا صحيح دولة صغيره ويجب ان نكون بعيدا عن المهاترات السياسيه الخارجيه لحماية الوطن والمواطنين ولكنني افهم ان حنق الزملاء كان على طريقة التصريح التي رأوا بانها تحط من قدر الكويت وتجعل من الكويت دوله هامشيه ضعيفه وايضا من اجل عمامة القلاف وشكهم بولائه الذي من الممكن ان يكون لايران بوجهة نظرهم او من تصريحات هذا النائب السابقه على حزب الله وكيف يدعمهم وهم اقليه يحاربون اسرائيل


بالنسبه للتصريح اعتقد .. وايد اعتقد اليوم .. اعتقد بان التصريح الذي يؤخذ على محمل الجد دوليا هو تصريح وزير الخارجيه الذي كان واضحا ولا يختلف عليه اثنان .. وبالنسبه للولاء لا انكر ان هناك من يكون ولاءه لغير الكويت كما كتبت بمواضيع سابقه سواء لايران او لغير ايران .. ولكن لا يجب علينا ان نجعل من هذه الفئات قاعده نتكيء عليها فهناك الكثير من ابناء الطائفه الشيعيه الذين ولاءهم للكويت ولا شيء غير الكويت وكنت اتمنى ان تكون هذه الجمله متواجده ببوستات الزملاء وان وجدت بالفعل حتى لا يتهم من يتهم بالطائفيه او غيرها من الكلمات التي لا اعتقد بانها متواجده بالكثير منهم


وتعقيبا على البوست الي كاتبه اخوي العزيز انتر كويت .. اعتقد انه اصاب كبد الحقيقه .. فهناك من يضع حول ايران هاله دينيه لا يجب المساس بها ولا ننكر هذا ولهؤلاء اقول .. انكم كويتييون اولا واخيرا وان كنتم تريدوننا ان نخضع فقط لاجل هذه الهاله استريحوا احسن لكم لاني اعتقد من كثر ما تكلمنا عن الوحده الوطنيه وما نفع وياكم ما ينفع معاكم الا هالكلمه واذا مو عاجبكم انكم كويتيين روحوا اهناك وعلى حسابي بعد واولهم من يجد لايران الاعذار الواهيه متناسيا بانه كويتي


نهاية لا ايران ولا غير ايران تشق صفنا انشالله نحن اكبر من هذه النعرات الي يتمناها البعض .. وان كان انتقاد زملائي المدونين لاذع جدا فانا لا الومهم لان قلبهم على الكويت ولا يريدون من كائن من كان ان يمس الكويت ولو بشعره ولو ان الوضع ما هدأ شوي وانا هديت معاه جان انا داش بالمعمعه معاهم لاني بروحي مااحب ايران ولا نظام الملالي ولكن ليكن الانتقاد على اشخاص معينين دون التجريح بمذهب كامل و الى من يصطاد بالماء العكر ماراح تقدر اتصيد يمك مضروب والى من يدافع عن ايران باستماته لا تخلينا نوقف من التفكير بحياديه والى من يتهم مذهب كامل بالولاء راجع نفسك ترى كلنا كويتيين و عسى الله يحفظ الكويت من اي مكروه




سؤال المليون جم اعتقد كاتبها بالفقره الي طافت ؟؟ مليون تومان طبعا مو دينار


-------------------------------------------------




-2-




صحيفه عراقيه تهاجم الشيخ محمد الصباح ... طبعا لا يوجد منطق ولا بطيخ الحبايب يبون يطيحون ديون العراق واهم شي ان في حقد دفين على الشعب العراقي .. على شنو نحقد بالله عليكم ؟؟ اللهم لا شماته .. والي كاتب هالتصريح حزب الله العراقي لا ويقولون ان الكويت كانت مع صدام .. لا عيل انصير مع ايران .. اشرايكم يعني اكيد بنيصيرون مع صدام انسان كنا نعتقد انه حامي البوابه الشرقيه وطلع جلب شنو ذنبنا انه طلع جلب ؟؟ وفلوسنا بتلهفونها على اي اساس وبعدين انا بسأل سؤال لهم ليش نسوا الفقره الي قال فيها ان الكويت لا ترضى على ان تكون ديونها عالة على الشعب العراقي والكويت لا ترضى بان تضر العراق .. يعني هالفقره نسيتوها وكتبتوا الي تبونه .. ماكو فايده فيكم




المهم اعلان اذا المهري باجر طلع واثنى على هالجريده راح اتكون بوستاتي كلها عنه فلا تقعد واتفقق علينا على قولت العرزاله حرم ان يطيحون ديون الكويت ويبينا انطيح ديون العراق ... غريب عجيب امرك واقظب ارضك لا والله العظيم اروح حق محمد هايف واترجاه يشوف شغله معاك ... ديون وماراح انطيح اشعندك يا ابو البلوره السحريه الي دريت ان العراق بدش الكويت .. تكفه قولي روما راح ياخذون الدوري هالسنه والا لأ .. قال ديون قاااال




-------------------------------------------------




-3-




اسبيرسو الكتاب ... اختراع جديد يطبع الكتاب ب 7 دقايق .. الحمدلله الحين نقدر انحصل الكتب بهالديره بدال ما انسافر بره طبعا لجنة القص واللزق الحين توهقوا .. خلكم على معرض الكتاب ومنعوا كتب الطبخ الي يخلطون فيها بالاكل ويبربسون فيها لان حرام الواحد يلعب بالنعمه عطيتكم شغل اشتبون بعد




------------------------------------------------




-4-




مواطن صالح نايم قرير العين بالاجازه .. شوي قط اللحاف من فوقه شوي وقط دشداشة النوم اشوي الريال من كثر ماهو عرق اتقولون داش سونا وقام شرب ماي جنه لاعب مباراة .. يه شالسالفه والا الكهربا طافيه .. المسكين تقلب ساعتين ولا اشتكى لين ردت الكهربا انزين لو مواطن مو صالح وين يشتكي




هيتر انفجر بالشعيبه .. مولدات خربانه .. ترشيد لي الحين شغال ... الكهربا لي الحين تنقطع .. المصفاة الرابعه ماادري شسالفتها .. ناس كانوا بيموتون بالمستشفى لما انقطعت الكهربا .. مافي خطه مستقبليه واضحه للكهربا والماي .. لجان يديده وكلهم من عائله وحده .. ناس قاعدين يستنفعون بالوزاره .. كيبلات المحولات اليديده الي شروها اطلعت قديمه وشارينها من الوزاره نفسها ... توه اليوم منزل مدير الى مراقب ومعطي المحكمه الي قالت رجع المدير طاف ... تبون بعد والا كافي ؟؟؟؟




س سؤال شمقعده لي الحين بالله ؟؟؟؟؟؟؟؟؟؟؟




-------------------------------------------




-5-




الحق الجذاب لي باب بيته .. بقولها حق واحد وايد صاير يدافع عن المواطن البسيط مع انه كان ضدهم كل شي يبين بس ترى مو ناسي عساهم على هالحال و اردى




-------------------------------------------






سنه حلوه يا جميييل حق مدونة فريج سعود






اللـــــــــــــــــــــــهم لا اعـــــــــــــــــــــــــــــــــــــراض

25 comments:

Kuwait said...

مو عاذرينك على الغيبه هذا أولا ..
ثانيا الحرب ما هي إلا حرب تصاريح أو بما يسمى بالتاريخ السياسي الحرب البارده :)
واذا انت بتدافع بنعال أنا أدافع بعد بشحاطه بو كعب وخشب بعد مره وحده بس اهم يطقون بصواريخ احنا النعل اشتنفعنا اهني ؟؟
نكفخ فيها الصاروخ عقب ما يطيح ؟؟
لووووووووووووووووول ..
نسيت باقي البوست من طوله ..
بس الزبده ولهنا على سوالفك عقب هالغيبه لا تعيدها :P

secret said...

الحمد لله على السلامة
:)

انا عكسك

اعتقد ان ايران على درجة اعلى من الغباء

الحبايب حافرين 300 ألف قبر يكونون بيخرعون الامريكان

هذا ذكاء بالله عليك

:)

Eng_Q8 said...

كويت

صدقيني معذور

صحيح صحيح

لووووووووووووووووووووووووول

عيل شنو انخليهم

ماعليه طويل عشاني طولت عليكم

توله عليكم العافيه

انشالله

-----------------------------------

سر

الله يسلمك

لوووووووووووووووووووووووووووووووول

والله ما يندرى

secret said...

مهندسنا تضحك؟
أنا من صجي!

و المشكلة الكبيرة ان اهما بعد من صجهم!!!

:)

Eng_Q8 said...

سر

ادري انه من صجك

بس طريقتك ضحكتني

الله يستر يا معود

kuwaitawy said...

ولكم باك اول شي




اي والله حال المدونات منقلب فوق حدر


ياخي

ناس شزينهم وشحلاتهم اشتطوا وحطوا ايدينهم بيد بعض

عشان المخطوف حسين الفضاله


ويطلع لك كذا واحد


اقلبوا السالفه فوق حدر


شي يقهر والله وانا اخووك


والمشكله يتكلمون بفلسفه انا ما افهمها يتكلمون من منطلق وطني

على بنا احنا وطنيين



ياعمييييي


خلهم يستريييحووون شوي


ولكم باك مرة ثانية

why me said...

انت وينك غاط كل هالفتره ؟؟!!


تصدق عاد انا ناسيه جان عندنا بلوقر اللي اهو انت



;ppppp



حدي كلكجيه

لول

marshmallows said...

عاد اليوم قاعده اسئل رفيجتي اذا صار حرب و طلعنا مقاومه شنطق فيه انا وياج =\

اول قولي الدينار جم تومان عشان اذا يسوى بعد

bo rashed said...

مهندسنا

قبل فتره لمتوني في بعض المدونيين

واليوم شوف الردح على عينك يا تاجر

يمهل ولا يهمل يا اخوي

تحياتي لك وحق رفيجة ام البورش
:P

فريج سعود said...

عسى ايامك الحلوة نفس بوستك
نعم الغلطان ينقاله غلطان وينحط الاصبع بعينه من غير خلط للاوراق

بس خرعتني بجملتك انك لو موجود كان دخلة هالمعمعة

لا يا خوي غلطان
الرجال يبينون بهالمواقف ما يهزهم ولا تاثر عليهم عواطفهم اصحاب المبدأ ما ينحرفون عنه

وان شاء الله انت منهم

Enter-Q8 said...

اولا شكر خاص لولي العهد
و هذا العشم يا بو فيصل

اما باقي ما ذكرت اخوي

فا ياريت لو نلاقي اذن صاغية
لهذه الكلمات

بدءا من ايران و مواليها
روحيا او انتمائاً للأسف

شيك على ايميلك

molok said...

الحمدلله عالسلامه .. وطولت الغيبه ..
إيران والعراق والشيعة ..كل اللي اقدر اقوله إلى متى .. :(

بصراحه اسبريسو الكتب حده عجبني .. وشكلي بخليهم يركبون لي واحد (او بأشتريه إذا ينباع )

مشكور وموفق ..

الزين said...

صباح الخير

من طول الغيبات

رحت وقلت عدوا لي

شلون الحين اطلب قهوتي؟؟؟

انا ماليش بالسياسه بس حبيت اسلم

peace

هذيان said...

والله يا مهندسنا الله يلعن ايران لا بو ايران وبعد لا بو ايران

Eng_Q8 said...

كويتاوي

ثانكس :)

سالفه حسين الفضاله ما دخلتها بالموضوع لان هذي سالفه ثانيه

عموما الي وقف ضد هالسالفه بالذات وقعد يبرر لها اعتقد يستريح شوي عليه

--------------------------------

واي مي

الله نسيتيني افا والله ورحتي وما ذكرتيني وانا ظنيت عمرج ما تخونيني جزاتي بعد كل الغلا انتي تبيعيني وتنسيني بدون اسباب تنسين اننا احباب

قولي منين مطلع هالاغنيه لوووووووووووول


كنت غاط بشوفج تنسيني والا لا :p
---------------------------------

مارشملو

عسى لقيتي الحل :)

اشدراني انا المهم شوي

--------------------------------

بو راشد

والله يا بو راشد شقولك لا تعليق يا بو راشد

استلم عليك :p

------------------------------

فريج سعود

وياك يا بعد قلبي

صحيح

انشالله يتم صاحب مبدأ ولكن يا بو سعده مرات الواحد يطلع من طوره يعني تنبط جبدك لما ينبح صوتك وتتكلم عن الوطنيه وتالي يوك ناس يوافقووونك ويقلبون عليك او انك ادافع عن احد تالي يكسر فيك بذمتك ما تطلع من طورك بالنهايه احنا بشر عشان جذي انا ببعض الامور تلقاني اتأنى قبل لا اقول رايي

انشالله على العهد باقون :p

--------------------------------

انتر كويت

بيضها والله

مايبون يسمعون تاليها بيصير شي ماراح يرضيهم

خوش صوره يعطيك العافيه

---------------------------------

ملوك

الله يسلمك
ظروف يا خوي شنسوي بعد

اي والله الى متى

شرايك انتحاطط انا وياك :)

العفو يسعدني مرورك اجمعين

---------------------------------

الزين

صباح الانوار

مممممممممممممممم راح انحل هالمشكله بالقريب العاجل انشالله كلش كلش احطلج بكل بوست اغنيه :)

الله يسلمج من الشر

بيس سيس

--------------------------------

هذيان

تحترق بكبرها ما همتني بس الكويت ما تكون طرف بهالسوالف

---------------------------------

العرزالــــــه said...

يابعد راسي

هذا الواجب والله

بس ترا الناس اللي تشتغل وهامتها قضية حسين الفضالة وايد

وايد من الشرفاء من المدونين والمعلقين بل وحتى المتابعين

ومابي اذكر احد وانسى احد

بس عشان مانظلم جهودهم وتنحصر القضية في شخص فئة منهم

تحياتي يالصديق

:))

Eng_Q8 said...

العرزاله

صحيح اهم وايد بس تدري اني مو قاعد احوس وايد بالمدونات هالايام

واعتقد انهم ما يبون كلمة شكر مني لان هذا واجبنا كلنا

بس لاني اتابع القضيه منك وانتركويت اهو صاحب الصور الجميله والافكار والا ما كان قصدي اهشم جهود احد من الزملاء وفليعذروني فانا مقصر بالتواجد هالايام

why me said...

لووووووووووووووووووووول



أووووووووووووووووووله شالحجي شالحجي

!!




من وين مطلع هالاغنيه ؟؟؟



طلعت كلكجي مثلي

لوووول

;pppp

As YoU LiKE said...

تصدق تحشرني ان ارد على 40000 الاف موضوع بموضوع واحد.

فخلني صـامت .. الصمت نعمة :)

Eng_Q8 said...

واي مي

اي ديري بالج مني :p

------------------------

ازيولايك

لووووووووووووول

علق على الي مو عابجك بالبوست :)

يسلم راسك ماراح انعيدها الا بحالات الطواريء

U-Turn said...

عاذرينك بس لا تعيدها :d


من زمان عن بوستاتك :]

اممم ما راح أعلق ..ما أحب أتكلم بالسياسه

"لا لا لا تفهم غلط والله قريت البوست كله ":d

حتى الجمله الأخيره
اللهم لا أعتراض:]


يعطييك العافيه أخوي
وعساك على القوة

JuVeNTiNa said...

الصراحه غبت غبت و رجعت اببوست قوي ..


اشكرك على كل كلمه قلتها بفقرة ( اعتقد )

و غير هذا راجع بقوة جنك " اليوفي " هاها :)


عموما لا تتعود على الغياب وايد !!
ولا عادي غيب اذا كل مرة بترجع بقوة


لا تروح فلم احمد حلمي اليديد لانه يلوع الجججججبد

حـمد said...

مرحبا بعودتك سالما :)

1 - حاملات الطائرات تحركت وصلت المنطقة وهذه الاشارة المتعارف عليها لاقتراب الحرب

اما بالنسبة للمحاربة بالنعال ( حشى السامع ) فلن تأتي بنتائج , ربما استخدام نباطة احمد القطان بتكون اكثر فاعليه :).

اما بالنسبة لمضيق هرمز

فالخطأ خطأ دول الخليج , كان من المفترض التفكير بالبديل الاحتياطي , فهم وضعوا البيض في سلة واحدة .

بالنسبة للقلاف , فالى الان مواقفه لا تختلف عن الاخرين , الى الان مواقفه قد اتخذها بعض السنة او العرب او ايا كانت التسمية , لم يختلف عنهم ولم يتطرف بحديثه عن ايران ولم يطالب بمساندة ايران وانما اكتفى بالطلب بالتزام الحياد في حرب لا ناقة لنا بها ولا جمل .

بالنسبة لولاء الشيعة , فهذا الامر لا يستحق الحديث عنه , هناك خونة وهناك وطنيين , سواء كانوا من السنة او الشيعة , من البدو او الحضر , ولذلك ليس هناك داع للحديث عن اللا شيئ .

بالنسبة لتقديس البعض للدولة الايرانية وتصويرها على انها الدولة الاسلامية فهذا الامر واقع وصحيح وليس بذكره شيئ جديد , بل ان موقف الكثير من السنة من السعودية موقف مشابه لان الدولة السعودية تتحرك بناءا على الفتوى وبالتالي هي دولة دينية ولها مواليها .

وانا اضم صوتي معاك واقول الله يستر على الكويت وانشالله بتكون الجبهة الداخلية متماسكة تحت اي ظرف وهذا الامر سأكون واثقا منه .

تحية لك اخي العزيز ..

why me said...

:))

Eng_Q8 said...

يو تيرن

انشالله :)

لووووووووووول لا قريتيه عدل

الله يعافيج

----------------------------------

اليوفي

مشكوره من ذوقج

لوووووووول اي والله دل بييرو امبددددع

مااحب احمد حلمي بس شكرا للمعلومه خل اوصي الشباب :)

---------------------------------

حمد

الله يسلمك

ممكن كل شي جايز بالنهايه لست خبيرا عسكريا انما تكهنات

والله يا حمد لو بايدي الكويت تستاهل

اعتقد انت تدري ليش ماعندنا مكان ثاني غير مضيق هرمز افهمني :)

وانا كتبت انني اوافقه ان الكويت دوله صغيره

وهذا ما ذكرته بالبوست

وايضا هذا ماذكرته بالبوست قلت ايران وغير ايران :) واللبيب بالاشاره يفهم

انشالله

شكرا للمرور

--------------------------------

واي مي

:))