Saturday, August 2, 2008

توم وجيري وتشفير سبيس تون


لفت نظري موضوع بجريدة القبس عن طفل قط روحه من الدور الثالث يعني مقلد بات مان طبعا كونا الي ناقلين منها الخبر هدت الخبر وتكلمت عن الرسوم المتحركه وتأثيرها على النشأ .. مو اول مره اكتب عن هالشي بس هم برد اكتب مره ثانيه لان الموضوع معطينه حجم اكبر من حجمه

اولا الطفل الي حذف روحه ليش حذف روحه ؟؟ تأثر بباتمان اوكي صحيح لكن هل الغلط من الفلم ؟؟ قطعا لأ تدرون ليش ؟؟ توني دشيت على سايت السينما وقلت بجيك على الفلم هل حاطين عمر محدد .. طلعت الشركه مشكوره حاطه العمر الي لازم يدش الفلم يعني اقل من هالعمر ما يدش ... فالخطأ مو على الفلم ولا على الشركه ولا على باتمان الغلط على الاهل الي عطوا هالشغله طاف وودوا عيالهم .. في افلام شكثر مكتوب يمها جي يعني اي عمر يدش وهم بمراقبه الاهل الحبايب الا باتمان لاني اتوقع بتفكيرهم لي الحين عندهم باتمان شخصيه للاطفال مع اني لما دشيته وراي صفة يهال دوخوني ولا فاهمين شي من الفلم

بعد ان وضحنا هالشغله خطأ منو .. انرد حق الموضوع المكتوب بالجريده الي هيتوا موضوع الولد وراحوا يحللون الرسوم المتحركه .. يقولكم توم وجيري لا يرتكز على قاعده تربويه سليمه وكاتبين بلاوي على قطوه كشخه وماادري شنو وعن تيمون بومبا ليش ان خنزير حاطينه بشخصيه حلوه ويقولكم هالبابايات تفسد عقائد اطفال المسلمين ودينهم

بالله الي مسوي توم وجيري مسويه حق المسلمين عشان يخربهم والا والت ديزني بكبره فاضي يخرب عيالنا ؟؟ الحين طول عمرنا انشوف هالرسوم ولا صار فينا شي .. لا وجيل توم وجيري يمكن صكوا الاربعين الحين اشوف ماصاروا مسيح ؟؟ بعد ما بقى الا انقول الملحدين صاروا ملحدين من كاسبر والا كابتن ماجد

يا ناس يا فاهمين يا عاجلين ناس صاروا دكاتره ومحامين ومهندسين وعلماء دين وشافوا هالرسوم بطفولتهم يعني ليش الحيييين صارت مو زينه مع العلم ان كنا انشوف بلاوي قبل بعد مابقى الا يقولون جرندايزر حرام لانه يحارب بالفضاء والا جونقر الي يشوفه يدش النار لانه آله وفيها روح .. والله شي يظحك ترى عادي يسوونها اذا المسلسلات التركيه تحارب الله ورسوله .. ماقالوا شي عن المكسيكيه والفنزويليه لا التركيه

والله حجي وايد بس مالي خلق اكتب عنه اكثر من جذي .. لكن هالتفكير وصل لي هالمرحله يعني غصب غصب يسوون رسوم متحركه اسلاميه .. اخاف ما سووا .. تذكرون سنان السنجاب تخيلوا مره قاعد افتر بين القنوات وماادري باي قناة حاطين سنان بس بدبلجه ثانيه .. قعدت اسمع ورب الكعبه ما فهمت الا الحمدلله وانشالله ولا اله الا الله ؟؟؟؟ سنااااان يا ناااس سنااان يقول جذي شكو ؟؟؟ والا قالبينلك السندباد وسموه الرحاله المسلم ... حسبي الله عليكم حتى كونان قلبتوه اخونجي كوووونان اشلون قالبينه اسلامي يعني القصه يلعنون خير خيرها

لما تبي تنشيء جيل ومتوهق من الانفتاح يالحبيب لا تقعد تستخف بعقول الناس وتمنع الرسوم اوكي انا معاكم انها اتأثر بس مو لي هالدرجه الي مهولين فيها الموضوع .. درسوهم عدل وروهم الوجه المشرق من الاسلام مو اول حصة اسلاميه اتسكر الليتات واتقول تخيلوا روحكم بقبر ياهل باولى ابتدائي شعرفه ؟؟؟؟ خرعونا حسبي الله على ابليسهم لا والحين طالعين لنا طلعه ويقولون النشيد الوطني حرام بالله اشلووون بتزرع الولاء بالطفل

ممكن سؤال لي وين يبون يوصلونا ؟؟ رسوم حرام غناوي حرام حفلات ممنوع مسرحيات وفاشله نشيد وطني حرام فلسفه يبون يلغونها برامج التلفزيون برمضان ثلاث ارباعها برامج دينيه الله يرحم ايام المسابقات وايام مسلسلات الاطفال الي لي الحين نذكرها عدل ... اختلاط ومنعوه حتى بالروضه يبون يمنعونه روضه يا بشر رووووضه والمشكله عيالهم يدرسون بره بمدارس بعد مو جامعات مدارس مختلطه وبره يعني خذ وخل ... لا وبعد يا ليت وقف الحد عند هذا لازم الحين برنامج سني وبرنامج شيعي تعال اخذ عاد ... اسطوانه اسمعها من 26 سنه حفظنا كل شي والله العظيم بس ماراح اصير مطوع اشلون يعني ماراح اصير كيفي بعد اغصبونا تكفون اغصبونا

مسلسلات كارتون صارت من القضايا الاسلاميه شبقى بعد ؟؟ يا ليت في ناس تفهم ان المنع راح يزيد من المساويء اذا كانت موجوده يا ناس والله العظيم الكبت يولد الانفجاااار روحوا تمشوا على البحر تالي الليل وشوفوا شبابنا اشلون انفجروا .. وعندهم شي زين علبالهم يعني الحين وصلوا للي يبونه تكفون طقوا فره على الدول الي حوالينا وشوفوا من الكبت شنو يسوون .. ما قلنا وزع مشاريب على خلق الله يبا نبي الكويت مثل ما اهي الكويت اتيون واتغيرون ليش يعني ؟؟ ترى جيل البابايات اهو الي دافع عن الكويت بوقت الغزو اشلون بالله يخرب عيالنا .... المهم ترى راح يشفرون قناة ام بي سي 3 وقناة سبيس تون لانهم من الظواهر السلبيه


----------------------


فريج سعود .. ولا يضيق خلقك ترى كلنا مرينا بهالسوالف ولا تزعل ترى ماانحب انشوفك معصب ومتكدر وهالاغنيه حقك وعناد رسوم متحركه








اللهـــــــــــــــم لا اعتــــــــــــــــــــــــــــــــــــــــراض

26 comments:

Kuwait said...

مدونتك بعد بتصير ظاهره سلبيه على كثر ما تعصب وتنتقد ;p
مهندسنا انت شتقول ؟ اهني باتمان حتى اليهال الي بو سنه حتى كلامهم مو مفهوم شوف عيني يدشون السينما باتمان وغيره ..
دخلت جم فلم واليهال اكثر من الكبار وما قالوا والله قلده والا تعلم من الفلم شغلات مو زين وكلام لك عليه ..
والله الفلم تطلع لقطات و كلام الله ياكبره واليهال عادي طاف شنو يعني ما شفت اهلهم سووا خبه والا حكومتهم قومت الدنيا وما قعدتها وسوت لجنة ظواهر سلبيه ..
التخلف عندنا بالديره بعقول الناس ..
تقبل مروري :)

kuwaitawy said...

ماعندهم شغل صدقني

marshmallows said...

الحين الي حذف روحه وين اهله عنه و بعدين اشهالدريشه الي بطلها و حذف روحه و اهله موموجودين

و الببايات تذكر قبل الطبطبائي لما صرح بالجريده ان موكاموكا بالاغنيه يقول يصلح ماافسده الله و ردو عليه ان يصلح ماافسده البعض
مادري شكو هالسالفه بس غاثتني من زمان

و كا احنا اشزينا اشحلاتنا مافينا شي لاحذفنا روحنا ولا بلعنا مفتاح ولاشي


ناس فاضيه

Eng_Q8 said...

صارت واستوت :)

لا بس اهني عيالنا يختربون

عاد شنو يسوون يحوس بقوقل عشان يطلع دراسه انها اتأثر على امريكا بكبرها وان امريكا راح اطيح من الرسوم المتحركه ويحطلج اياها يعني حاجج الحبيب وتلقين الي مسوي الدراسه محد يدري عنه واصلا اهم دافعين له فلوس عشان يسويها

-----------------------------

كويتاوي

لا عندهم انهم يخلون الناس يعيشون على مزاجهم

--------------------------------

مارشميلو

اشدراني

كتبت عن هالسالفه ببوست سابق :))

اهم شي بلعنا مفتاح

لا مو فاضيين صدقيني

بو محمد said...

مهندسنا
بقول لك شي بس لا تزعل من اخيك
انت ليش جبريت؟
كله معصب و حارق عمرك
لا تخاف، الكلام وايد و القصد منه يقهرونك انت و أمثالك فقط لا غير، و لو تقول خق الواحد منهم ليش الرسوم المتحركة بعضها ذات اشكالات يقول لك هي قابلة لتخريف أخلاق الأطفال الل احنا نحاتيهم أكثر من وادينهم و علشان تصدق كلامهم، شوف المشهد هذا
http://www.youtube.com/watch?v=KNt2ewM1pSg
لا تعصب يا ابن الحلال، ماكو ألا العافية
:-)

Eng_Q8 said...

بو حمود

مو الي باط جبدي ان في ناس تسمعهم

بيني وبينك انا تعقدت تدري ليش لانهم ما وصلوا الا منا احنا لما كنا انقول طاف طاف خلهم وشوف وين وصلنا

قاعد اسمع الليله المحموديه اللهم لا اعتراض ... بس راح اقطعها عشان اشوف هالفيديو :*

Q80 Blogger said...

أولا الموضوع هذا مو بدعه ابتدعتها كونا ولا غيرها .. هذي قضيه عالميه يتم مناقشها دوما .. وهي مدى تأثر الطفل بما يشاهده من افلام كرتونيه وغيرها

في مره شفت في برنامج كوميدي في قناه امريكيه يضحك على من يعتقد بأن البوكيمون هي خطه صينيه لافساد عقول الاطفال الامريكان
نعم .. هناك من يؤمن بهذه المقوله في امريكا !!!!!

ثانيا .. في مره من المرات وانا حاضر لفلم في سينما في كندا .. دخل احد العاملين في تلك السينما وقام بطرد طفلين لأنهم دخلوا في فلم لا يسمح لمن في عمرهم ان يشاهده
هل هالشي موجود في الكويت؟

مع اختلافي مع قضيه ربط كل شيء بالحلال والحرام .. لكن هناك دراسات كثيره يجب الالتفات اليها تبين خطر بعض مايعرض في التلفاز على عقليه الاطفال

وشكرا

Blog 3amty said...

أنا سويتها أيام سوبر مان بس مو من الدور الثالث، كان عندي وعي، نقزت من الملحق :S


بعدين على الصبغة الدينة تره بتحوش كل شي مو بس الإعلام ولا الكتون ولا القوانين

هذول أغلبية .. ولازم نمشي على هواهم :s

حياتي هدف مو عبث said...

توم وجيري


للحين أشوفهم

Eng_Q8 said...

بلوقر

مثل ما قلت طول عمرنا انشوف

هناك من يؤمن

والله اذا كل واحد راح يطلع بطاقته المدنيه عيل لا يقطعون الافلام ومااعتقد احد راح يرضى وبعدين مسئوليه الاهل شنو ؟؟

ماعليه بس مو رسوم متحركه يا حبيبي افهم النقطه يعني انت ما شفت رسوم متحركه ؟؟؟ شصار فيك ؟؟ ولا شي كا اشزينك تدرس بره

عفوا

---------------------------------

بلوق عمتي

لا انا من فوق الحبت بس احط تحتي فرش عشان لا اتعور :)

لا يبا ما نمشي على هوا احد

------------------------------

حياتي هدف

حتى انا

wa6an-alnhar said...

ياليت بس الكرتون
حتى الألعاب
تذكرون اول باربي اشزينها !!
الحين لو تقلب السوق ما تلقا غير فله و ربعها الاخونجيه
:p

Eng_Q8 said...

وطن

اي والله حتى اللعبه

Mohammad Al-Yousifi said...

روعة الفيديو

Eng_Q8 said...

مطقوق

حاظرين :)

AseeL said...

قريت الخبر بالجريدة.. كنت اشوف باباي وتوم اند جيري وريمي اللي ريل امه سكّير و لولو الصغيرة اللي مطيحة مع نفيخة ودحروج.. ما صار فيني شي جنّي البخت!!

اذا بيتكلمون خل يتكلمون عن العنف اللي في بعض المسلسلات الكارتونية مو عن قيم وافكار

أمرهم عجيب

secret said...

ما توقعتك تبرئ باتمان من هالتهمة يا مهندسنا!!

باتمان؟ .. الفاجر الماجن الداعر
مو غلطان؟

والله عوار قلب .. تدري من فترة بلشت اجمع كل الرسوم المتحركة القديمة و انسخهم على DVDs
لان حاس ان بيي يوم ما القاهم

اللي قاعدين يسوونه مصيبة .. والله مصيبة .. هم عارفين بالضبط شللي قاعدين يسوونه

الزين said...

يبون يحجرون على عقول عيالنا ويحجمون تفكيرهم الإبداعي من الصغر

يبون لين وصل مرحلة المتوسطه الا طالق لحية وصاير نسخه مصغرة ممسوخة ومنسوخه منهم

حتى بهالأمور قاعدين يتدخلون

وين بيوصلونا
تهقا لو تبعانهم شلون بيصير شكل الأجيال اليايه

عقب 11 سنه

اوووووووف

قته ومغثه على الصبح

مره ثانية ماني مبلشة بمدونتك الصبح


حتى القهوة مالها طعم مع هالخبرية


:S

Eng_Q8 said...

اسيل

عجيب جدا

----------------------------------

سر

لووووووووووووووووول

حتى انا :) حق عيالي

لا يعرفون لا تخاف عليهم

-------------------------------

الزين

صحيح صحيح

خلاص يبا مره ثانيه احطلج اغنية حق فيروز زين جذي :)

الزين said...

:)

ايه ابي فيروز

وابي اغنية نحنا والقمر جيران

احبها

لها ذكرى خاصة عندي


ومشكور مقدما

شكلنا بنقلبها ما يطلبه المستمعون

:)))

kuwaitya_7saweya said...

امممم عيل جازورا حرام
وسالي تحرض على الفسق والفجور
وكابامارو((نينجا)) رسوم متحركه غير اخلاقي
اما بومبو فهو اساس الكفر ومن عبدة الشيطان

خل بباي سنان هههههه
مره سوو بباي كويتي صبي مع قطوه اسمها حلوم مار عليك هذا مو يخرب عقول اليهال هذا يخرب بلد

darkness said...

اشوه ما يابو طاري فلونا و لا هايدي و لا فوزيه

:p

Eng_Q8 said...

دام لها ذكرى خاصه بحطلج فرقة التلفزيون :p

اشرايج اقلبها قناة المرينا مو احسن على الاقل انطلع فلوس من الكومنتات وكل كومنت 100 فلس

------------------------------

حساويه

الله كبامارو .. هياااااات :p
واخر شي اهو هيات يلعبون بيس بول مو صاحين

هذا الي يحطونه بالعيد الصبح لوعوا جبدي اليهال فيه من صباح الله خير

------------------------------

داركنس

اهم شي فوزيه لووووووووووووول

الزين said...

فرقة التي في

:))))

صكيت على حلييييييماااااا

بس ترى عز الطلب

ترى احبهم من صجي

ايه خوش فكرة

وبالنصيفه

خمسين لك وخمسين لي

وراعي النصيفه مدري شنو

نسيت شيقولون


خوارة تالي الليل
ما عليه

طوف لي عاد انت


يالله تصبح على خير

someone_q8 said...

السلام عليكم
مو قلنالك هدي اعصابك ومحد ماكلها الا انت تحرق اعصابك وحالتك حاله وهالشيء مو زين للصحة :)))))

توم وجيري اشوفه مع عيالي واقعد وياهم واضحك اكثر منهم وكأن اول مره اشوفه
السالفة سالفة كيفية توعية النشأ وتوصيل المعلومة لهم :)

ايي على طاري الموضوع شكو الولاء بالنشيد الوطني ؟؟
محد ينكر اهمية النشيد الوطني للكل , لكن الولاء بالعمل مو بالكلام بشمهندس , اشفايدة النشيد للانسان اذا ما غيره للأفضل ؟ الولاء فعل اما النشأ , وبعدين ليش امضيق خلقك على النشيد الوطني ؟ مو النشيد الوطني عبارة عن نشيدة ؟ يعني مو اغنية اذا هي حلال حلال :)))))) بس لا اتعصب

Eng_Q8 said...

الزين

لوووووووووووووووووووووووووووووووول

لا يبا شنو 50 50 لا راعي النصيف سالم ولا عبدالرحمن

تبين دفعي بالاول :p

وانتي من اهل الخير

--------------------------------

انسان كويتي

شوف توني كاتب البوست اليديد وانت من الناس الي كانوا معاي ببداياتي وتدري فيني ياخوك مااقدر لازم احرق اعصابي :)

صحيح

شوف بالنسبه للنشيد الوطني

انا اعتقد بوجهة نظري ان النشيد الوطني من اهم الوسائل لزرع الولاء صحيح كلامك بالعمل لكن انا بعطيك مثال امريكا لما اتروح اي مكان وباي مناسبه حطولك النشيد الوطني ليش لانهم يدرون ان النشيد الوطني يزرع الولاء والانتماء للوطن وهذي كلها اشياء نفسيه مالي خبره فيها بس باعتقادي الشخصي هي شي مهم للغايه

انشالله :)

Q8-MaNaL said...

الصراحة ماعندهم سالفة و احنا جيلنا كان جيل الباباي و توم آند جيري والحمدلله نعرف ديننا و ما فينا الا العافية