Thursday, August 14, 2008

معاق عقليا !؟

طارق القلاف بطل من ابطال الكويت من ذوي الاحتياجات الخاصه انظروا ماذا كتب بهذه الصوره




البارحه وانا اقلب بالتلفزيون قبل لا انام حطيت قناة سكوب والا مقابلين شخصين من ذويي الاحتياجات الخاصه .. شفت شوي وغيرت لاني مااقدر اشوف احد من ذوي الاحتياجات الخاصه بصراحه .. قلبي يعورني عليهم لا وهذا يشتكي بعد شفت شوي وسكرت التلفزيون .. المراد اليوم سولفت عنه بالدوام لانه في بالي من امس وتحسفت اني ماشفت شنو الموضوع بالضبط .. سبحان الله توني بطلت التلفزيون والا تطلعلي الاعاده وهم ما شفتها كلها بس فهمت الموضوع وماقدرت اني مااكتب بوست عنه لان فهد يستاهل وكل اخوانا ذوي الاحتياجات الخاصه يستاهلون
الاعاقه الجسديه التي تحدث للانسان ليس له دخل بها فهي من حكمة الخالق عز وجل فاما يولد بها او تحدث له من جراء حادث .. وهي تختلف اختلاف كلي عن الاعاقه العقليه او التخلف العقلي فالعقل قد يكون باعلى مستوياته ولكن القدر قد اعاق جسد هذا الانسان فيجب ان نفصل بين هاتين الاعاقتين واعتقد بان الجميع يعرف هذا الا دكتور بالطب النفسي ؟!؟
فهد ناصر المطيري مواطن كويتي حاله حال اي واحد فينا ولكنه من ذوي الاحتياجات الخاصه يجد صعوبه بالنطق والحركه ولكنه كما سمعت بانه جيد دراسيا ونسبة ذكائه 77 بالمائه اي انه افضل من بعض الاصحاء .. اراد فهد ان يستخرج اجازه لقياده السياره وكل شيء كان جيد الى ان قالوا له ان يراجع الطب النفسي وهناك كانت الطامه الكبرى حيث ان الدكتور هناك قرر بان فهد يعاني من التخلف العقلي ؟!؟!؟ مما اثر على نفسيه فهد واثر على دراسته وحطم مستقبل هذا الشاب الطموح بجميع المستويات ... هذه هي القصه باختصار
اوراق ثبوتيه وضعها فهد بالقناة .. وبصراحه فهد له من الاخلق ما ليس موجود بالكثير من الاصحاء فعدما سأله المذيع ماذا تقول عن الذي قال عنك متخلف عقليا قال .. الله يسامحه .. اقسم باني بعد ان سمعت هذه الكلمه من فهد فان الدم اصبح يغلي برأسي على هذا الدكتور الذي لا يستحق ان يكون دكتور .. يا جماعه الريال يعرف يتكلم ويعرف يرد بردود الرجال وبكلماتنا الجميله ويعرف كيف يوجب الذي امامه .. ورب الكعبه لو اييب واحد مافيه شي من هذيل الي يتمشون بالمرينا وصابغين شعورهم ما راح يعرفون علوم الرجال مثله ... اشلون هالدكتوووور يقول متخلف ؟؟؟
الطامه الاخرى هي بانه ذهب لالمانيا على حسااابه ليعالج مشاكل النطق لديه وقد تكلل العلاج بالنجاح ولكنه يحتاج الى المتابعه وعندما اتى للكويت اعطوه موعد بعد سنه ونصف ؟؟ مما ادى الى رجوعه كسابق عهده وفقد اثار العلاج جزئيا هذا المواطن الشاب الواعد يتناساه الجميع لانه من ذوي الاحتياجات الخاصه
الآن ماذا يريد فهد ؟؟؟ يا جماعه والله صدمني .. يقول ابي حقوقي فقط ماابي فلوس ولا ابي احد يعطف علي انا اعطف على الناس لان مافيني شي بس انا ابي حقوقي كمواطن .. والله العظيم انك احسن من محامي يبوق فلوس الناس ويسوي روحه شريف روما وانك احسن من هالحراميه الي تارسين الديره ومن بعض اعضاء مجلس الامه ورب الكعبه اهم المعاقين .... الانسانيه تتواجد بهذا المواطن ولا تتواجد بالاصحاء شصاير بالدنيا
دورت عن اسامي اعضاء مجلس الامه الي تخلفوا عن جلسة المعاقين بس حسافه ما لقيت الاسماء .. على العموم الاعضاء الي اركبوا الكرسي المتحرك واقعدوا يحوسون بالسوقه يعني احنا وياكم ترى اهم ما يبونكم اتسوون جذي يبونكم تعطونهم حقوقهم ترى اهم مواطنين حالهم من حالنا وغصبا عليكم تعطونهم حقوقهم والا عشانهم فئه قليله وما عندهم اصوات والا مساكين ما يتكلمون ويقولون الله يسامحكم ساحبين عليهم
المعاقين افضل من الاصحاء بكثر من المجالات ... المعاق رفع اسم الكويت بالمحافل الرياضيه ومنتخبنا ينطق من الهند .. المعاق اخذ الميداليه الذهبيه والقليل من الاصحاء سووها .. المعاق انسانيته واخلاقه تعدت حدود انسانية الاصحاء .. المعاق تعالى على اعاقته واصبح من المتفوقين جامعيا والاصحاء يطلعون من الثانويه ويشتغلون اي شغله .. المعاق يتقيد بالارشادات المروريه والاصحاء يسفطون بمسافطهم .. المعاق يشتغل ويدرس والاصحاء مايداومون ويبرشمون .. المعاق يعمل بالاعمال الحرفيه والاصحاء يقولون انا اشتغل بايدي .. الله ما يرضى بالي يصير
تذكرت واحد الله يذكره بالخير معاق عقليا اسمه مسلم اتذكر لما كنا ندرس كان يدش علينا بالدوانيه ويدعي لنا بالتوفيق ولما انشوفه بالجمعيه واحنا انصور اوراق يطلبلنا عصير عوار قلب ولما يشوف زقايرنا يخلص يروح يشتريلنا زقاير ولما نتكلم عن السياسه اقسم بالله العظيم انه احسن من مليون صاااحي عقليا مو جسديا بعد .. ورغم انه معاق عقليا كانوا يخلونه يشتغل بايده بالمعهد ويعطونه معاش ويقول مايصير اخذ فلوس بدون مااشتغل حرااام ولما نعطيه فلوس يقول مابي انا مو فقير عطوا حق الفقاره
معاقينا اخواننا فلا تتركوهم .. يا اعضاء مجلس الامه يا حكومه ترى هذيل بارقابكم وبرقبة كل مسئول عنهم حسبوهم حسبة اخوانكم عيالكم ابائكم .. وان تناسيتوا فالله ماراح يسامحكم اذا ما وقفتوا معاهم اعينوهم اعانكم الله فبالنهايه هم كويتيين ... ارفع القبعه تحية لقناة سكوب لتسليطها الضوء على هذا الموضوع وخاصة على فهد
تعلموا الانسانيه تعلموا الاخلاق ترى ما نقصت من هيبته شي انما هاللقطه زادته خلقا ووقارا وهيبه .. شفتها بالكثير من البلوقات واعتقد انها تستحق كل هذا الانتشار
اللـــــــــــــــهم لا اعتــــــــــــــــــــــــــــــــــــــــراض

26 comments:

why me said...

يابعد عمري

يعورون القلب.. بس ترا أذكيا وايد وايد


انا وياك في البوست قلبا واقلبا

:)

Eng_Q8 said...

واي مي

كل واحد عنده ذرة انسانيه يحس فيهم

بس انحاجي منو يا يبا

الله يعينهم انشالله

Miss-Q8 said...

تسلم إيدك و يسلم راسك
على هالمقال الروعة

ماقول إلا عليج العوّض يا كويت
إذا حتى المعاق مو قادر يحصل على حقوقه كـ إنسان طبيعي مو معاق حتى ..!!!

تسليط الضوء على هالمواضيع جدا ً طفيف للأسف .. و الشكر لكل من يهتم بأمر هالشريحة إلي شرّفت الكويت بـ مجالات عدة ..

يعطيك العافية ,

~~~

Eng_Q8 said...

مس كويت

الله يسلمج ويخليج

اي والله

صحيح كلمة شكر لهم

الله يعافيج

Mamloo7a Q8ia said...

صاج يا وخيي
انهم احسن من الصاحين التافهين
اللي ما عندهم الا الفراره
والمغازل في المجمعات
ولي ييت تناقشه في اي شي
تلاقيه ميييييح ماكو شي

وهالمساكين الفاهمين اللي الله ابتلاهم باعاقاتهم قاعدين يحاولون المستحيل
انهم يرفعون اسم الكويت
وحاطييين بلدهم جدام عيونهم
مع الاسف منسييييييين

eng-girl said...
This comment has been removed by the author.
eng-girl said...

اي والله يعورون القلب

و اهمه مو ناطرين منا نظره العطف

مساكين بس يبون احد يسمعهم و يعطيهم حقوقهم

بس نكلم منو !!

الله يعين

Alromi said...

الله وياك والصراحه اهما رافعين راسي ابكل الالعاب يابولنا مداليات وكؤوس اكثر من الصاحين وانا اعرف واحد ماشاءالله عليه ذكي بس ترى مهضوم حقهم اعلاميا وفي ناس مايحترمونهم ولا يقدرونهم

kuwaitawy said...

تسلم ايدينك والله


اهتزت مشاعري من المواطن فهد



والله انهم احسن من الف واحد صاحي جسديا وعقليا


والله ستاهلون كل خير


بس

وين اللي يسمع؟؟

U-Turn said...

والله شي يحز بالنفس ويكدر الخاطر

ولا هالدكتور كفوو يصير دكتور ؟؟!!
واااااي غثني بصراحه

الله يعينهم يا رب
ويسهل أمورهم

خووش بوست والله
بس ويين إلي يسمع !!


يعطييك العافيه
وعساك على القوة أخوي

marshmallows said...

تبي اقولك شي يعور القلب

عندنا وحده تشبه الي بالصوره اخر شي
و بالعلوم الاجتماعيه اغلب البنات لان كعبهم 100سانتي مايقدرون يركبون الدري فيروحون بالاصنصير و الي بالويل جير يتأخرون لان بس اصنصير واحد وزحممممممه
البنت كانت اتأخر يمكن دقايق بس
تخيل جان الدكتور يقولها طلعي بره احنا كلنا انصدمنا البنت مسكينه تفهم وشاطره مشالله بس لسانها ثقيل و ماتقدر اتصرف عدل
جان بكل حقاره ووقاحه يقولها انتي قاعده تشتتين افكاري وانا اشرح و تزعجين زميلاتج قلتله انا وبنات بعد لا مافي ازعاج وقلتله المحاضرات اليايه كلنا بننطرها بره لما تدش بعدين ندش عشان مانشتت افكارك
جان الخدامه الي تدز البنت ترد تقوله ان زحمه الاصنصير قلها مالي شغل يالله بره
البنت مسكينه بجت جان نص الكلاس يبجي معاها دزتها الهنديه طلعتها و الكلاس كله طلع معاها

Q8-MaNaL said...

حرام يعورون القلب ليش جذي يسوون فيهم
:(
ليش اللعانة شنوا هالدكتور اللي مافي قلبه رحمة
شكو مسمين الدكاترة ملائكة الرحمة عيل
حسبي الله ونعم الوكيل على كل ظالم

و يعطيك الف عافية اخوي على البوست الإنساني الرائع و تسلم إيدك

كويــتي لايــعه كبــده said...

المعاق من لديه كامل نعمة الله من أمكانيات جسدية وذهنية ويكون عالة على المجتمع

ومن كان منتج ويواجه التحديات براس مرفوع بالرغم من امكانيات منقوصة بأي شكل من الأشكال فهو بطل

جزاك الله خير على هالبوست

(الصورة تعبر الكثيــــــــــر)
ء

enter-q8 said...

تعليقي بالمناسبة
اقوله للاخت
Why me
تذكرتها لما قالتها

يعورون القلب و يكسرون الخاطر

اذكر واحد من الاحتياجات الخاصة
رد على واحد و قاله انتم اللي تعورون القلب و تكسرون الخاطر
انا معاق و قاعد اشتغل و اسوي و اروح و احاول
نسبة العجز عندي اكثر من خمسين في المية
اما انت الله يتمم عليك
احسن مني
تقدر تقولي المفروض كم نسبة نجاحك على مجهودي اللي ابي اسويه

هالكلمة صج اهي اللي اثرت فيني و انااسمع هالحوار

المشكله اني اتابع
ما يدور بهذا الشأن
من المجلس الاعلى لرعاية المعاقين
بس تدري شنو المشكله

ان في ناس اصحاء بينهم
نعم للأسف ناس اصحاء
شوف عيني
و بكل بجاحه يطلع الكرت مال المجلس و يطالب بشغلات مو له

المجلس الاعلى يبيله نفضه و مو اي نفضه

wa6an-alnhar said...

للأسف يا مهندس
أن اللي يشتغلون مع المعاقين و يظهرون مساندتهم لهذي الفئة شغلهم الشاغل الظهور الاعلامي بمظهر الملاك و الاستنفاع من ورا هالفئة

انا من خلال عملي بالتربية الخاصة على مدار 3 سنوات ما شفت احد قلبه على هالفئة و يشتغل بذمه و ضمير إلااااا ما ندر
الغالبيه اما لحب الظهور بمظهر التقي والحنون و الملاك
او طمعان بالزيادة اللي تيي فوق الراتب كونه يتعامل مع فئه خاصه
او لان فترة الدوام قصيرة

اه يا مهندس شقول وشخلي
والله اني كنت اشوفهم ينطقون
و يتعاملون معاملة بعيده كل البعد عن الانسانية و اذا تكلمنا و عارضنا نطلع ما نفهم!!

لكن خل يزورنا شخص بمنصب او شيخ
يصيرون مثل الحمل الوديع

التربية الخاصه و نادي المعاقين كانو بأيادي امينه لمن كانو اللي ماسكينها اصحاب اختصاص و قلبهم على هالناس
لكن الحين كل شي اختلف
و الضحية المعاقين

lawyer said...

ما نسمع فيهم الا في برامج الانتخابيه بسووووووون لهم و بيعطووووون هم

و اذا فازو محد سوا شي



عووووووورني قلبي عليه


قمت افكر صج احنا مجتمع ظالم

EXzombie said...

مع هذا فحالهم افضل بمليون مرة من ما رأيناه في الدول المجاورة

صورنا فلم وثائقي عن الشباب و دورهم في المجتمع، و كان يتعين علينا التصوير في مناطق نائية و بعيدة، لما ندخل منطقة نسبة الاعاقات الجسدية و الذهنية توصل لي 60% وسط تجاهل شعبي و حكومي لهم يحز بالخاطر، لما ندخل بيت و ينصدم المختار معانا انه صديقه له بنت عمرها 22 سنة، و لم يسجل وجودها في الحياة او اعطاها اسما الا قبل 4 سنين، و حابسها بالدار فقط لأنها مصابة بشلل الاطفال

نحن شعب نفتخر بمعاقينا و انجازاتهم، العتب على البعض لعدم دعمهم و الاهتمام باحتياجاتهم، و ان كانت حالهم من حالة نجوم كرة اليد الي محتكرين كل البطولات و بجميع المراحل السنية الا انهم لا يحصلون على عشر ما يحصل عليه لاعبي كرة القدم الي مفشلينا بالطالعة و النازلة

Selezya said...

لا حول ولا قوة الا بالله
ناس ماعندها قلب

أمس ..
طالعه لأحد الاماكن
وكان في برنامج مسابقات والعاب
وأحد الاعضاء اللي معاهم كان معاق عقليا
ماكنا ندري عن هالشي بالبدايه ..
شخصيا كنت متابعته من اول ماشفته مستانس ويركض ورا اليهال يلعبهم ويشيلهم ويدور فيهم ويردهم لاهلهم اليهال ماتوا عليه .. ماكنت أدري انه معاق .. لكن للامانه جذبني اسلوبه وتعامله وضحكه .. بعد فتره مذيع هالبرنامج قال عندنا فقره وياب هالشخص وقال انه بيغني .. استغربت .. ويوم ياه ومسك المايك غنى .. طاير من الفرحه .. ومن غنائه عرفت انه معاق .. اخر شي قام يضحك يقول صفقولي زين .. ( ايدي ذبحتني من كثر ماصفقت بس عشانه (
الصدفه وانا يايه بطلع ناداني المذيع وقال بسالج .. سال وجاوبت غلط :) يوم ييت بمشي ولا من نفسه ايني المعاق وقال .. عاادي مافيها شي حلو الواحد يجرب .. رديت عليه قلتله اكيد عادي كافي مشاركتي معاك
لا تشوف ابتسامته عورت قلبي ومشيت

فعلا .. قلوبهم طيبه ومايبون مننا شي كثر ما اننا نعاملهم مثل مانعامل الاصحاء ونعطيهم حقوقهم
مايبون فلوس مايبون مساعدات
يبون حقهم بالتعامل

يعطيك العافيه واسفه على اطالتي ..
:))

Bavaud said...

مشكور عالبوست الإنساني
عاد انا ياي بكتب يوست عنهم هالويك إند بس إنت سبقتني

سؤال سريع، الصورة الأخيره، صورة منو هذه؟

بس said...

الله يرحم حالهم


أغلب الأعضاء تخلفوا و الحكومة كانت حاضرة ؟؟

وعمار يا مجلس !!؟


حمدان بن زايد

يجندس على أيد هالفقيره و يبوسها لتفوقها ، من تواضع لله رفعة ؟

وربعنا !!؟

Kuwait said...

عورت قلبي

Eng_Q8 said...

مملوحه


اي والله

للاسف

--------------------------------

مهندسه

اكلم الي المفروض يسوون شي

-------------------------------
الرومي

اي والله مع انهم يستاهلون

---------------------------------

كويتاوي

الله يسلمك

اي والله

يسمعون بس يتصيمخون

------------------------------

يوتيرن

لا والله مو كفو

الله يعافيج

-------------------------------

مارشميلو

هذا الدكتور مال ينحذف من فوق السطح

-----------------------------

منال

الله يعافيج

-----------------------------

كويتي

الله يسلمك

--------------------------------

انتر

اي والله صاج هالمعاق

اصحاء شيسوون اهناك ؟!!؟

كل شي يبيله نفضه بهالديره

--------------------------

وطن النهار

لا تعليق

--------------------------------

لوير

الله يعينهم ويعينا

---------------------------------

اكزومبي

الحمدلله على كل حال ولكن اعتقد ان احنا نختلف عن الديار الباجيه صح موفرين لهم ولكن هذا لا يمنع بان نطالب بجميع حقوقهم ونساهم برفعة العطاء لديهم ولا نرضى بظلمهم من اي كان

منتخبنا اهم المعاقين

---------------------------------

Eng_Q8 said...

سلوزه

اي والله بس يبون حقوقهم

وين رايحه انتي لي الحين في جذي بالكويت ؟ والله زين

الله يعافيج

Eng_Q8 said...

بافاود

يستاهلو اكثر من بوست

حمدان بن زايد آل نهيان

-----------------------------------

بس

الله يعين

عندنا لا تعليق

----------------------------------

كويت

سلامة قلبج

بـنـت بـطنـهـا said...

بارك الله فيك

بارك الله فيك

بارك الله فيك مهندسنا

والله لو اي واحد فيكم يمر النادي الرياضي للمعاقين بس يشوف

الكل يبتسم بويهك الكل يسلم عليك

لا تشوف لما درو اني طالبة واسوي عنهم شغله شلون تعاونو كلهم عشان يساعدوني وكانو وايد فرحانين ان في احد يبي يتكلم عنهم

عوار قلب والله يا انجنير
تسامح مو طبيعي
ودودين بشكل خيالي

عسى الله يحفظهم يا ربي

وايد وايد اثلجت صدري بهالموضوع بارك الله فيك

وبكل واحد يلتفت حق هالفئة

3bady said...

كفيت و وفيت و ما اقدر ازيد على كلامك

بس فيه ناس تسمعك من صوب و اطلع من الصوب الثاني

ما اقول الا الله كريم