Tuesday, October 7, 2008

خبر وتعليق .. وبيت القرين

الخبر من برلماني : قويعان سنسعى لالغاء تجريم الفرعيات ونحث الكتل السياسيه و الحكومه لدعم الغاء هذا القانون الجائر

تعليقي : انتوا ركزوا على انه يحث الكتل السياسيه والقانون قال عنه جائر .. يعني الاخ النائب يبي يلغي شي مجرم لانه جائر والسؤال هنا هو جائر على منو ؟؟ على ابناء القبائل المشاركين بالفرعيات انزين شنو ذنب الي ما شاركوا ؟ عندما نصف قانون بانه جائر فيجب ان ان يمس اكثر من 70 % من الشعب الكويتي ويضر بهم وبمصالحهم وبعدين اخوي عفوا اي كتل الي تتكلم عنها ؟؟ اذا كانت الاسلاميه والي المفروض انت منهم فهذا ينسف الفكر المنتمين له لان الله سبحانه وتعالى قال بمحكم تنزيله واطيعوا الله ورسوله واولي الامر منكم ..وولي الامر امر بان يكون الشعب الكويتي كتله واحده متماسكه ولا فرق بين المواطنين والدستور نص على المساواة ايضا فانت هنا تنسف اوامر ولي الامر .. وطبعا اغسل ايدك الباجي يوافقون لانهم ضد هالشي اساسا فما بقالك الا من فاز بالفرعات اقول يا حلاتك وانت ساكت .. الديره معفوسه وهذا يقول فرعيات فرعيات ايييه يا باشا
.
.
خبر من برلماني : النائب السابق محمد الخليفه يقدم الى المحكمه الدستوريه تظلم يؤكد فيه احقيته في عضوية مجلس
الامه
.
تعليقي : كل من طق طبله قال انا قبله ابتلشنا فيكم شهالانتخابات الي الكل يطعن فيها لا والمشكله اثنين دشوا المجلس يعني السالفه فيها ان هذا غير الصندوق المحترق ... بصراحه صدقت احمد السعدون لما اعترض على هالفرز وتكلم عنه عشية الانتخابات واثبتت الطعون كلام بو عبدالعزيز .. وانا اقول ردوا على الفرز اليدوي ابرك لنا ولكم
.
.
كذا نائب : هناك ايادي خفيه تلعب بالبورصه
تعليقي : متى راح اتييكم الشجاعه واتسمون الايادي الخفيه بالاسم ؟؟؟ ترى ملينا من الحجي الفاضي قول الاسم اذا عندك اثبات واخلص
.
.
برلماني :النائب القلاف مجلس الامه خرطي ؟
تعليقي : شمقعدك فيه عيل ؟؟ قول ليش اخرطي وقول الاسامي دام انك مو راد على احد يالله قول
.
.
برلماني : خالد السلطان يدعوا النواب لاجتماع تنسيقي في مزرعته بالوفره يوم 17 الجاري
.
تعليقي : انت داش المجلس بس عشان اتعزم ؟؟ والمشكله كل اجتماعاتك ما طلعنا منها بشي
.
.
برلماني : النائب الدويله : رئيس الوزراء قطع اجازته وسيعود للكويت هذا المساء
.
تعليقي : الاخ سكرتير والا نائب بمجلس الامه ؟؟؟ شهالاعضاء
.
.
برلماني : النائب الهطلاني : اذا كان الفريق البدر شجاعا فليقدم استقالته لعدم قدرته على ازالة تجاوزات الشويخ
الصناعيه والشاليهات
.
تعليقي : منو النائب الهطلاني ؟؟ على العموم الشي المضحك والمبكي انهم يبون يحطون رسوم على الدواوين والحين
لجنة الازاله بتشيل المظلات والحدايق ؟؟ نلعب ؟؟ شيل وحط وشيل وحط ابتلشنا فيكم .. وبعدين تعال انت مو عضو حاسب الجهة المسئوله بكل بساطه شكو الريال يستقيل .. اشرايك تتنازل عن عضويه المجلس حق طالب ثانويه على الاقل يعرف ادواته الدستوريه


ملاحظه : برلماني هي خدمه هاتفيه تزود المشترك باخبار مجلس الامه واعضاءه والوزراء وبما انهم غثوني بالمسجات قلت بغثكم وياي

-------------------------------------------

تكملة سالفة القادسيه توني شايف برنامج الشوط الثالث مااطولها عليكم .. فواز بخيت و عبدالله الدوسري من اداريي نادي كاظمه الرياضي .. السؤال القادسيه مافيه غير جمال مبارك ؟؟ والمشكله ياينا من التضامن مااقول الا حسافه عليكم يا فيصل ويا بو حمود ... الى القائمه الثانيه حطوا معاكم نجوم نادي القادسيه السابقين وشوفوا الناس اشلون راح توقف معاكم مو بودي والخرافي

والشيء بالشيء يذكر .. الى جماهير النادي العربي الي اعتدوا على الحكم والله عيب الي سويتوه .. الرياضه اخلاق قبل كل شيء ... واتلوموني لي رحت مباريات الدوري الايطالي والاسباني ؟
------------------------------------------


بيت القرين كاتبه بموضوعها عن سعود بو حمد وسمته حامل تلفون بو فهد .. انا اقولج مسميه بيجر احمد الفهد لان بكل مكان وياه وبما ان اهو واخوه تاجر الاقامات ماابلعهم راح احط هالصوره الي مصورها بكامرتي باحدى خفلات التخرج بجامعة الكويت مااادري شيبي يااااااااي هناك اهو شكو ياااااي صج بيجر .. لا ويبي ينزل انتخابات نادي القادسيه قلنا نبي لاعبين قدامى بس مو سعود بو حمد ؟!؟ .. اضحك والا ابجي ؟؟؟ المهم هذي الصور .. اهداء بالوثائق لتأكيد كلامها وكلامي









اللهـــــــــــــــم لا اعتــــــــــــــــــــــــــــــراض

13 comments:

Blog 3amty said...

غثيتنا بهالأخبار مهندسنا :S

اللهم لا إعتراض

JiBLa CiTY said...

لي بغيت تروح مباريات اوروبية علمني بروح وياك
:))

Kuwait said...

لوووووووووووووووووووول ..
انصحك تلغي برلماني وترتاح ..
مجلسنا موجود للطماشه الظاهر :)
بالنسبه لسعود بو حمد دايما يذكرني بمجلة ماجد تحديدا بمسابقة (ابحث عن فضولي) بالمعنى الأصح وين ماتلاقي أحمد الفهد دور عليه تلاقيه مدعوس بمكان ما :P

Eng_Q8 said...

بلوق العمه

ميخالف اشرب شربت بيذان :p

-----------------------------

ولد جبله

انشالله :))
ترا سكاتي مااتحجى زين قلتلي

----------------------------------

كويت

لا زينه زينه عشان مااقرى جرايد

لوووووووووووووووووووووول اي والله فضولي يبتيها ييب

Purplecious said...

الحين برلماني يروح وياك ايطاليا و أنا انحكر هني! ليــــــــــش؟؟

صج انغثينا بهالاخبار بس تمــــون

:)

x-Met`3rBa said...

elet7ad !! + elwathn + s3od bo7amd elfalta ;p mako 8atha akthr !

ولد الديرة said...

ولا اخبار
KTV2

يعطيك العافية

بس ترى خوش خبر خبر الدويلة

abu eldestor said...

نسيت لاتحط الحجيلان مع هيئة الزراعة

بيت القرين said...

اثاريه بيجر؟؟
يعني ما يقدر يدق بس يشوف ارقام
:p

secret said...

قرقيعان بيلغي تجريم الفرعيات؟
و الله يبا زين
هذا و هو دكتور
ما ينشره عليه و على أمثاله

أيادي خفية تلعب بالبورصة:
اي لو يتطبق القانون عدل جان ما لعبوا فيها

القلاف: مجلس الأمة خرطي:
ما انت برضو خرطي يا سي قلاف ما اعترضنا

تعليقك على الدويلة فطسني من الضحك :)))

انا مثلك و الله حاس فيك بالمقثة مالت مسجات الأخبار

يا قدساوي :)

Salah said...

برلماني!
خوش خدمة هذي!

شلون اشترك فيها؟ وجم التكلفة؟

Enter-Q8 said...

اهم شي سعود بو حمد مطيري

Eng_Q8 said...

بنفسجيه

حكم القوي على الضعيف :p

---------------------------------

متغربه

اعتقد ماكو :))

------------------------------

ولد الديره

لووووووول والله انك وفي لي الحين اتابع القناة الثانيه

الله يعافيك

اي شفته صك على اخبار البورصه

--------------------------------

بو الدستور

فشله احطه :p

-------------------------------

بيت القرين

بالضبط :p

-------------------------------

سر

المشكله انه دكتووور فرق بينه وبين العرزاله

الحين منو الي لعب بالبورصه

اللهم لا اعتراض

المشكله اوقاتهم بايخه ما تيي الا وانت مقيل

اي نعم قدساوي ودمي اصفر :))

---------------------------------

بو صلوح

نص دينار بالشهر

دق على زين وقولهم شركوني فيها

---------------------------------

انت كويت

اي اشفيك واحمد باقر عتيبي :p

----------------------------------