Friday, October 17, 2008

لي متى يا وزارة الداخليه

تحديـــــــــــــــث
نائب رئيس النقابه الهملان ل برلماني : بيان الداخليه عار عن الصحه وتم اقتياد اعضاء النقابه الى مبنى مباحث المنشآت بالاحمدي ؟؟!!!!!!!!!!؟ انصدق منووو ؟؟
--------------------------------------------------
.
قبل شوي وصلني مسج من برلماني فحواه ان النائب وليد الطبطبائي يستنكر التصرف البوليسي الذي استخدمه المباحث بالقبض على اعضاء نقابة البترول ؟؟
.
طبعا المباحث قبضت عليهم لانهم مسوين اضراب سلمي وركزوا على سلمي .. عفوا يعني اشفيها لي سووا اضراب ؟؟ مع اني ضد الاضرابات اذا كان مالها داعي ولكن شكو المباحث بالاضراب يعني شنو الغلط ؟؟ بجميع الدول الديمقراطيه تكون هناك الاضرابات وتكون هناك المظاهرات السلميه طبعا وبالعكس هذا شي صحي مو تقولون ديمقراطيه خلوا الكل يعبر عن رأيه
.
الى متى ووزارة الداخليه تسير بهذا الدرب ؟؟ والى متى هذا الترهيب على افعال لا تمس امن الدوله ولا تتعدى على القانون ان الدستور كفل حق الجميع والكل له رأي وللكل الحق بابدائه سواء بالاضراب او اي طريقه اخرى فكفوا عن ما تفعلونه فان هذا يضر بسمعه الكويت الخارجيه ويمس بالديمقراطيه الكويتيه
توني قبل لا احط الموضوع وصل مسج ان وزارة الداخليه تنفي الاعتقال يعني انصدق منو ؟؟ اجذب الطبطبائي والبراك والمسلم والبرغش والا اصدق وزارة الداخليه ؟؟؟ ولي متى بتنفي يعني ؟؟؟ اصدق منووووووووووووووو تعقدت
.
.
اللهـــــــــــــــــم لا اعتــــــــــــــــــــــــــــراض

21 comments:

Selezya said...

مو بس الداخليه
كلهم كلهم يبطون الجبد

Kuwait said...

انا اقولك يمكن إمسكوهم ولما شافوا الضجه خافوا وهدوهم ;\
خو بعد مالها حل غير جذي ;p
وزارة الداخليه بلاويها لما الرااااااس ..
أساسا يشيب راسك منها :)

wa6an-alnhar said...

انا اصدق طبطب
:p

esTeKaNa said...

أنا اقول سكر جهازك
وغمض عويناتك
وريح نفسك
ويك اند
:Pp~

enter-q8 said...

مو جذي باش مهندز
انت شفت القانون اللي سوته الدولة بخصوص الاضربات
اهني مربط الفرس
فالداخلية مجرد الة تنفيذ فقط لا غير
روحوا صيدوا هذا و خلوا هذا
الرك على القانون المقدم من قبل الحكومة
ان حتى بالدوام ينظرون وووو

تهقى كم اضراب راح يوصل بعد ما سعادة الباشا المستشار بديوان الخدمة المدنية اللي ماسك الكوادر يحن علينا و يتفرغ
علشان ما عنده وقت

kuwaitawy said...

والله اذا الكلام صج




ما اعتقد ان اتحاد نقابات البترول بيسكتون


والموضوع مو شويه


-----


انا اللي اعرفه ان اعضاء النقابة تم منعهم من دخول المصفاة

عاجـل said...

صدق كونا وريح بالك

JiBLa CiTY said...

انا اقول لاتصدق احد

وعقبال اعتقال المدونين

:P

فريج سعود said...

تعودنا على الجذب

Eng_Q8 said...

سيليزيا

كلهم كلهم :)))

---------------------------------

كويت

يمكن

شاب وخلص

--------------------------------

وطن النهار

الطبطبائي مااجذبه بهالمواقف بصراحه

----------------------------------

استكانه

مااقدر

الله والويك اند عاد ترى احنا بالكويت مو بأمريكا :)

---------------------------------

انتر كويت

القانون ده لازم يتلغي

ممممم

وايد

--------------------------------

كويتاوي

هذا الي وصلني من برلماني والعلم عند الله

وهذي معلومه يديده

--------------------------------

عاجل

يعني ؟
ماني اخبر منك بالاخبار

----------------------------------

ولد جبله

فال الله ولا فالك

--------------------------------

فريج سعود

انا لي الحين ما تعودت تنبط جبدي ياخي

nanonano said...

أنا بعد صارت عندي نفس التساؤلات منو نصدق؟؟!!؟

بس الظاهر نفس ما قال الأخ
كويت
امسكوهم و تحسفوا
لأن نقابة البترول تعتبر من أقوى النقابات العماليه في الكويت

Dr. Academy said...

هذي الكويت صل على النبي ..

من وين ايينا الامل بأن تعود جميله ؟؟

bo bader said...

لي متى هالعقلية تدير البلد ؟

هذي العقلية اللي تعتبر الشخص تابع
Subject
وليس مواطن
Citizen

هذي العقلية اللي كانت موجودة في الحكم الملكي البريطاني من زمان وكانوا يقولون :
British subject

وطبعا انتهى هذا الوضع ومستحيل أحد يقوله الآن في بريطانيا ، لكن يبدو أن العقلية هذي ما زالت موجودة عند البعض عندنا في الكويت مع شديد الأسف ...

تحياتي

Sn3a said...

معقوله يعني وزاره الداخليه تعتقل ناس من الطاقه بدون علم وزاره الطاقه
يعني اشيا ماتدش العقل
كل واحد عقله وراسه
وعرف ان الكويت صارت بوليسيه

اهم ابدو رايهم بسلميه
بس الظاهر لو كانو بنغال جان انسمع رايهم

Anonymous said...

ما قلت لكم حسافتج يا كويت

بوتشخيص said...

عزيزي ما اعتقلوا أحد ..

ولا مباحث ولا هم يحزنون ..

اللي امنعوهم أمن المنشآت ..

اللي صار الإخوان بدشون المصفاة بالليل و ما عندهم تصريح لأن الإذن مالهم بس للدوام و انت عارف المصفاة منشأة حساسة

تفاهموا مع إثنين داخل مكتب الأمن في المصفاة وتالي انفض التجمع

الشباب سووه تكميم أفواه و إن بيمنعونهم من الإضراب كل هالكلام مو صحيح

المسألة إن ناس بدشون المصفاة بالليل من دون تصريح و كل من راح لحال سبيله بس النواب مع الخيل ياشقرا وكل من بسوي عمره بطل جدام الإعلام

الدســتور said...

المشكلة حتى جرايدك تجذب
ماكو غير الربع اللي نصدقهم

ZooZ "3grbgr" said...

اي والله اصجق منو

الزين said...

صدقني انا والهملان

كلامه صحيح مليون بالمية

اقتيد اعضاء النقابه من المصفاة لما حاولوا يدخلون عشان يوزعون على العمال بيان الإضراب اللي راح يحصل باجر الأحد

واقبضوا عليهم حرس المنشآت

وتدخل وزير النفط لإطلاق سراحهم

وانا شكلي بتفنش

:(

شقران said...

مهندسنا العزيز


شخصيا مع أي عامل في حق الاضراب...وإن كانت الأخبار صحيحة حول اعتقال أعضاء النقابة فقط لأنهم أرادوا أن يضربوا...فوالله إن لهذه مهزلة...وسأكون مع النقابة قلبا وقالبا حتى لو كانوا ابالسة البشر


فالموضوع مبدئي ولن يرضيني انتهاك حريات أي عامل أراد أن يمارس الاحتجاج السلمي





متابع..وباشرنا بالاخبار أول بأول



مع وافر التحايا العطرة

صبا said...

اي شي

اضراب ومباحث
بالكويت؟؟؟
ليش وين قاعدين

اي صح تذكرة ...ديمقراطيه