Sunday, November 9, 2008

ارفع ولا تجبس

بالفتره السابقه الاسعار شبت وزادت بطريقه جنونيه .. ولما تسأل ليش قالولك والله النفط غالي .. آمنا بالله نزل سعر النفط لأقل من النص ولي الحين الاسعار على ما هي عليه .. سألت قالولي لا هذي الاسعار ما تغيرت لانهم يابوها وقت ارتفاع سعر النفط انطر شهر وبتنزل ؟!؟ .. نطرنا شهر ولي الحين الاسعار ما اتغيرت ولا بارتفاع دائم

الحين يوم ان النفط ارتفع مااشوفهم انطروا وقالوا خلونا انبيع الموجود لان شارينه قبل الارتفاع على طول زادوا الاسعار الحين لما نزل محد نزل الاسعار ؟!؟

الاسعار ما راح تنزل ولو وصل سعر البرميل 10 دولار .. والسبب واضح لا يوجد رقابه على الاسواق لا يوجد رقابه على الاسعار بس شاطرين يقولون السوق مفتوح .. طيب السوق مفتوح والمواطن يلعن خيره ليش ؟؟ انتوا لو تشوفون التجار الي توهم صايرين تجار ما تستغربون مشفح حسبي الله عليهم اصلا عيب اقول عنه تاجر لانه مو لايق والطريقه الي يشتغل فيها اتقول انه مشفوح مو تاجر

المحاباة التي تتخذها الحكومه للتجار تدق ناقوس الخطر .. فالملاحظ هو ضخ الاموال لمصلحة التاجر ولا يراعى به المواطن البسيط وايضا الاسعار بارتفاع والحكومه في خبر كان .. الى متى ونحن نخليهم يسرحون ويمرحون والى متى هذا التراخي والى متى مانسمع الا كلمة زياده ... ماكو تخفيض اسعار ؟!؟

======================

كلام بريء جدا :ز

فيصل الشايع التي اختارته الحكومه رفض من الحكومه ... بس حكومه عن حكومه تفرق عدل لو مو عدل

***
الله يرحمك يا براك المرزوق

***
انني اسمع صليل السيوف .. وبتولع مره ثانيه


=====================

رسالة صوت الكويت

دستور الكويت من أرقى وأهم انجازاتنا الشعبية .. وانتهاك روحه ونصوصه أوصلنا لما نحن فيه من ضياع وتخبط وفساد وتطرف. حريتك الشخصية وحرياتنا العامة وحرمة منازلنا وأموالنا العامة ومستقبلك ومستقبل أبناءك كلها أمور ما كان لها أن تضيع لو أننا احترمنا والتزمنا بدستورنا العظيم.
ندعوك أنت وأسرتك وكل من يحب الكويت للاحتفال بذكرى توقيع دستورنا .. لعلنا بتجمعنا هذا نسمع أصواتنا لمن يملكون قرار صيانته !



اللهـــــــــــــــــم لا اعتــــــــــــــــــــــــــــــــراض

36 comments:

nanonano said...

أنا شخصيا خلاص ما قمت أتريى و لا شي من هالحكومه

Eng_Q8 said...

نانو

يعني الحل بالحل ؟ :p

Mishari said...

لا يا كابتن

التضخم بدي ينزل ولازم من هالشهر الاسعار تنزل
لكن اللى قاعد تقوله صح
وباقر ما ادري شنو راح يسوي بالحلوين؟؟

اما موضوع فيصل الشايع
فالبركة في حكومة الدور الثاني

Eng_Q8 said...

مشاري

ما شفت شي نزل ؟؟ اذا شفت شي نزل فلس قولي

ليش ساقطه :p
اتوقع انها ناجحه وبامتياز

nanonano said...
This comment has been removed by the author.
الزين said...

والله مارخص بهالدنياالا البني آدم يالشيخ

يعين الله

وعطنا فيروز

:)

Kuwait said...

اي والله الأسعار نار وشرار ..
والحكومه مو ملقيتنا ويه ..
و أحمد باقر الله بالخير :)

nanonano said...

لأ باستقالة الحكومه
+++++++++++++

بس أنا عندي سؤال واحد: ليش قاضب علي حل المجلس؟
جني قاعد أنادي بالحل..و مالي سالفه الا الحل..شلون تكونت عندك هالفكره عني؟

اقصوصه said...

ان شالله الامور بتهدي اكيد مع الوقت :)

حـمد said...

على سالفة الغلاء ذكرتني اليوم بخبر باحدى الصحف بأن شركة لبيع السيارات ببريطانيا مسوية عرض اشتر سيارة وخذ اختها مجانا ولا انطروا حكومة تدعمهم وتحافظ بذلك على الغلاء !

kuwaitawy said...

اي والله كلامك عدل يا مهندسنا

حكومة عن حكومة تفرق


والله يحفظ الكويت بدستورنا

Eng_Q8 said...

الزين

صاجه يالشيخه

لا مو وقته :p

Eng_Q8 said...

كويت

مرات احسج واحد من الربع لما تتكلمين :p

الله بالنور

Eng_Q8 said...

نانو

وهذا كان قصدي :))

لووووووووووووووووول

والله لا فكره ولا شي يتهيألج ومافيش اي حاجه من الي قولتيه ياختي

هدي هدي اييبلج لموناضه :p

Eng_Q8 said...

نانو

اذا بيظل الوضع على ماهو عليه لا تهدي وازمها وولعها شعللها

Eng_Q8 said...

حمد

اييييييه يا بو ديمه متى انصير مثلهم

تدري شنو الي يفقع المراره .. قاضبين علينا اوباما واوباما والله ما نوصل واحد من ميه من امريكا لو بعد 1000 سنه

Eng_Q8 said...

كويتاوي

ترى يطلع مني :p

امين يا رب العالمين

JiBLa CiTY said...

أكيد الموساد الاسرائيلي وراها

:P

بوتشخيص said...

طبيعي لازم ترخض .. كل الدول و العالم جذي

بس عندنا مشكلتين رقابة حكومية ضعيييفة

و تجار جشعيييين

بس جني لا حظت الكي دي دي بدا يرخص أسعاره

Enter-Q8 said...

اسكت و لا تتكلم ترى يسحبون الخمسين و الميه و عشرين دينار
و بمقابلها راح ينزلون 25 فلس على كل سلعه

الزين said...

يعني مو احسن من اني اقول لك وعطنا ولعة

:P

حـمد said...

مهندسنا العزيز

اللي فاقع مرارتي وناسة المطاوعة من فوز اوباما وكتابهم اللي دوخونا بالامثلة على تغلب المصلحة الوطنية على العنصرية واهمة وجماعاتهم سادة بالعنصرية والتفرقة الطائفية

على قولتك وينا ووين اوباما

eng-mun said...

لو مافي شي اسمه حكومه جان الكويت بخير !

Eng_Q8 said...

جبله

كل شي على روسهم

Eng_Q8 said...

بوتشخيص

اقولك مافي قانون

صج ماادري من زمان مو شارب حليب كاكاو :p

Eng_Q8 said...

انتر كويت

مممممممممم

يبيله بوست ثاني على هالكومنت

Eng_Q8 said...

الزين


عندك واحد زغلول للمعلمه الزين وصلحووووا

Eng_Q8 said...

حمد

عاد والله كنت ناوي اسوي بوست عنهم شوفهم بجريدة الوطن افلاااام

ومو بس اهم حتى الي الباجي ما يرضى فلان يصير وزير لانه مو من نفس قبيلته او مذهبه او حزبه او او او او

Eng_Q8 said...

مهندسه

ومنو الي يحرك الديره ؟؟

سدرة العشـــاق said...

لعب في لعب

بس طقت جبدي منهم اقصد الحكومة طبعا

سليحط يسلحطهم كلهم

: )

molok said...

بالنسبة حق الاسعار .. فلاتتوقع انها تنزل ابدا ..

لان الكل يبي يربح بسرعة مثل ماقلت ..
وهذي تشوفها بوكالات السيارات ، كله يقولون لك اليورو صاعد ..

الله كريم .. :(

Barrak said...

مااقول الا

كاسك

Eng_Q8 said...

سدره

الله يسلحطهم :))

Eng_Q8 said...

ملوك

اصلا اليورو نازل يا معود لاقينا صيده حسبي الله عليهم

Eng_Q8 said...

براك

اشدعوه بس كاسك

ابي زهيريه على اسم بلوقي :p

Spur said...

احمد باقر:

يوووووووهوووووووووووو؟؟

هل تسمعني؟

*سبر تسمع صوت شخير احمد باقر*

اووف ياهو بط اذوني