Friday, August 14, 2009

مافيش فلوس يا حبيبي مافيش فلوس

-1-

الصيف حامي هالسنه .. ومع هالاخبار صيفنا احلى .. عموما .. موضوع ال60 مليار الي طلع لنا الحين وايد مستانسين فيه والا يبون يحرونا والا شالموضوع بالضبط ؟؟؟ يعني مواطن على باب الله زي حلاتي يقوم من النوم ويجيك على تلفونه والا مسج شمكتوب فيه .. مكتوب السفير مراد خسائر الكويت من عدوان النظام العراقي بلغت 60 مليار دولار وانا لي الحين ماادري شنو السر بحبهم لرقم ال 60 مليار .. والله قاعد اكتب الرقم وايدي ترجف .. وايد ستين مليار والله وايد

السؤال الي ما يطرح نفسه الا يدش سلايد على نفسه .. هل الستين مليار الي قالوا عنها اليوم غير الستين مليار الي قالوا عنها من ايام مضت ؟؟؟؟ يعني الستين مليار الي قبل علشان اعادة اعمار العراق واعتقد ان اعادة الاعمار يعني المشاركه بالبنيه التحتيه وخلافه مما يخلي الكويت تستفيد تالي من الارباح هذا على حسب فهمي الي على قدي .. الحين يقول خساير ... الحين بعرف هل اهي نفس الستين والا ستين ثانيه ؟؟؟ يعني معقوله احنا قاطين 120 ملياااار ؟!؟!؟ والا الستين اهي الستين وبس علشان يعرف الشعب الكويتي الأبي ان الستين مليار ماراح ترد ؟!؟!؟

عموما هالموضوع خلانا انعرف وين ال 19 مليار طارت واللبيب بالاشارة يفهمووووو


============================

-2-

الكل شاهد ما حصل مع الدكتوره معصومه مبارك ... ومع ان الرساله انا مو شايف فيها تهديد بالقتل مثل ما وصلنا ؟!؟ شكله ياهل كاتبها والا ناس يبون يولعونها زياده والله اعلم ... الي بط جبدي مو هالسالفه الي بط جبدي هالخبر



انزين يا عواشه مثل ما يناديج نبيل الفضل .. هل تعتقدين انج وايد مهمه علشان يهددونج ؟؟؟ معصومه عضو بمجلس الامه انتي مو عضو .. انتي رئيسة جمعيه نحو اداء برلماني راقي .. هالجمعيه الي ماادري منو سواها ومتى وليش وشحقه واشلون صرتي رئيسه وعلى اي اساس تصيرين رئيسه ؟؟ يعني شيبون فيج بالله يهددونج ؟؟؟؟؟؟؟؟؟؟؟؟؟؟؟ على شنوووو

انا ماني عارف اشلون في احد حسباله اهو محور الحياة بالكويت وكل شي يدور حوالينه ... قبل اكتبوا على اعلاناتج ارنوبه ودبدوب قلتي تشويه وهددوني .. بعد ارنوبه ودبدوب وين التهديد بالموضوع ؟؟؟؟ والحين تقول مشعوذه تقول راح يغتالون شخصيه سياسيه نسائيه بالكويت ... وانا بسأل الفلكيه الدايخه على اي اساس ؟؟؟ ومنو يغتالهم من زين طرحهم والا من زين مواقفهم والا ليش ؟؟؟ الوحيده يمكن اسيل العوضي احسنهم .. اما الباجي اداة بيد الحكومه وكل شي واضح ... ما تقولي على شنو ... اخاف حسبالج سياسياتنا حفيدات غاندي

نرجع حق عايشه الرشيد .. الله يسلمكم وفي مقابله سابقه معاها بقناة الشعب اقصد قناة سكوب .. كل يوم لها اسم هالقناة .. المراد قالت ان الحكومه دعمت النائبات الحاليات .. وماعندها اي مشاكل ان الحكومه تدعم المرشحين .. عقليه جباره بصراحه ومنطق عجيب .. يعني عادي الحكومه تدعم المرشحين ... خلاص عيل عادي الواحد يشتري اصوات وعادي الواحد ينزل فرعيه وعادي الواحد يصير عضو معاملات .. وكل شي عادي وبعد انا اقول الحكومه اتعين الاعضاء هم احسن

بالله عليكم شخص مثل هالمنطق يغتالونه حق شحقه ؟؟؟؟؟؟؟؟؟؟؟؟؟ اقول اخت قياديه مثل ما تسمين روحج .. اتوقع الحفيتي اييب اكثر منج اصوات فلا تصدقين روحج .. والي بيغتالج ماعنده سااااااااااااااااالفه .. وبعدين تعالي يمكن الي لاحقج قصده شريف يبي يتزوج والا شي يمكن .. بس خلاص كفايه عليج لي اهني


============================

-3-

المسرحين والمسرحين وجلسه خاصه والحاله حاله .. ولي اليوم الي راحوا علشان البدل 165 مسرح .. وبعدين الحكومه قالت راح نحل الموضوع وفعلا حلوا الموضوع .. الا يعني معاش كامل والا ما يصير ؟؟؟؟؟ هم ما يشتغل وهم معاش كامل ؟؟؟

انزين انا بعطي مثال .. واحد مسجل بالشركه بس جذي علشان يسد نسبة الكويتيين بالشركه .. ومكتوب بالعقد يستلم ألف دينار .. بينما هو يتقاضى فقط دعم العماله المتمثل تقريبا ب 250 دينار .. ولا تقوليلي ماكو جذي لان اكثر الشركات جذي يسوون ... الحين هذا انقول تسرح .. راح يستلم معاش ألف دينار على الفااااضي ... لانه اساسا كان يستلم 250 والحين يستلم 1000 يعني 750 دينار زياده بالتمام والكمال ... ويجب ان تعلموا ان هناك وسااااايط للتفنييييش علشان يستفيدون

يا جماعه انا لست ضد المسرحين ولكن الشي بالعقل .. جم عدد المسرحين الفعليين ؟؟؟ والله سألت اكثر من شخص يعمل بالقطاع الخاص ومحد فيهم تسرح او سمع عن احد تسرح الا واحد فقط لا غير سمع ان في احد تسرح ... يعني الموضوع ماخذ اكبر من حجمه

وبعدين تعالوا مو الدستور يقول ان الناس سواسيه ؟!؟ ليش ما سويتوا جذي حق المقترضين ورضيتوا بحل الحكومه ؟؟ والحين مو راضيين بحل الحكومه ؟؟ سؤال جوهري والجواب راح يوضح الكثير

=========================

-4-

بالنظر للاسماء الي مداحره وزير الصحه .. فانا أظن ان الوزير موقف معاملاتهم وقاعد لهم قعده .. وبعدين صح كلامه شفهمهم بالطب ؟؟؟ اوكي انا افهم انهم ينقلون مشاكل الصحه من حيث رداءة الوضع الصحي بس يتدخلون باشياء طبيه بحته اعتقد قويه .. تبون تتحجون اقروا التأمين الصحي ووقفوا شراء المستشفيات الخاصه ... غير هالحجي سكوتكم ابرك

=========================

-5-

الارهابيين الي صادوهم .. اتمنى من كل قلبي انهم ما يطلعون مثل الشعره من العجين .. وانهم يطلعون منو الراس المدبر للموضوع ... لان هذيل شباب واعتقد ان في شباب غيرهم ولازم ينكشف الراس قبل ان يحدث مالا يحمد عقباه .. واللهم احرس الكويت من كل مكروه

=========================

معــــــــادله

60 مليار

ضرب
.
انقطاع بالكهربا
.
تقسيم

تردي القطاعات الحكوميه عامة

زائد

مشكلة القروض
.
ناقص الجذر التربيعي لـ
.
دعم الحكومه للمرشحين

=
.
ان الحكومه اتغني لنا هالاغنيه






اللهــــــــــــــــــــم لا اعتــــــــــــــــــــــــــــــــــــــــراض

16 comments:

well_serviceman said...

عايشه الرشيد ، مو صج!!!!

الظاهر اللي لاحقها بيعد جم شامه بويهها لا غير!!!

المهم، قضية المسرحين ، ماكو لا قضيه ولا بطيخ ، تكسب إنتخابي "سخيف" في محاولة من النواب لإستدراج الشباب صوبهم!!

بالعقل ، الشركات الخاصه تحمل نظام العقود ، متى ما انتها القد الشركه مو مجبوره تردك ، مو بكيف الحكومه ولا بكيف النواب يردونهم!

وبعدين هم صح ، ثلاث أرباع المسرحين على قولتهم كانوا يستلمون دعم العماله فقط بدون دوام ، فإذا عطوهم فلوس ، وقاعدين يعطونهم أصلا، راح تصير مهزله! ناهيك عن قول بعض النواب ونعيمه الحاي أيضا بان هناك من أرغم على الإستقاله ، حلووووو ، يعني بوق عينك عينك!!!

المهم ، سالفة المخططين للتفجير ، لازم يحطون صورهم وأسمائهم ، ملينه من الخش والدس ، خل يكونون عبره حق غيرهم ، هذول سفله مالهم مكان بينه ، لكن حدسي يقول بالحكم سنتين على كل واحد وعفى الله عن ماسلف!!!

مفيش فلوسسسسس!!!!

جبريت said...

ياخي انت ليش تحب التأزيم هذا تأزيم اي سؤال للحكومه تأزيم الحكومه تبوق لا تقولها شي تأزيمي

اما تنكر المجاري عفوا قصدي عايشه رشيد فعلا التحفه الحفيتي يايب اصوات اكثر منها

Anonymous said...

القضايا الباجية انا ما افهم فيها ولا احب اتدخل بشغله انا ما افهم فيها

بس ياريت ياباشمهندس تقرا بوستي عن وزير الصحة على مدونتي... وعيد قراءة بعض التصريحات من وزارة الصحة... واقنعني عقبها شلون وزارة الصحة تفهم بالطب وإن إحنا ما نفهم بالطب

ترا إحنا ما طلبنا منه نسوي عمليات جراحية! ولاطلبنا منه نعطي خلق الله وصفات ادوية! بس نبي نعارف الوزارة شلون قاعدة تشتغل

أهل شرق said...

الحل بالفصل ... افهم

Bloggerista said...

تهقة الشخص اللي كان يرتدي شماغا أحمر من دون عقال و دشداشة ذات ياغة كبيرة و لحية خفيفة ليش لاذ بالفرار يوم شافها؟


وااااااااي عايشة فيلم ;P


كان ودي بس أشوف ويه وزير الداخلية يوم شاف مسج الفلكية اللي واصل من
لبنان حق عايشة!!

ما خلصنا من سحر الدويسان يتلنا سوالف التنبؤات مالت عايشة

ما ودي أعرف جم زقارة استهلك هالبوست

Miss-Q8 said...

عايشة الرشيد
هالآدمية ما فيه شي ما سوته
احد يعطيها ويه يا جماعة !

enter-q8 said...

تعيش الحكومة
بس ترى انا اللدغ بحرف الشين

As YoU LiKE said...

الـ60 مليار رقعوها
وقطوها براس الصحافة

بالأضافة الى تسجيل اعجابي بالأغنية، اختيار موفق يصاحبه خيال واسع.

خالف تعرف said...

اللهم لا اعتراض

someone_q8 said...

السلام عليكم
اشلونك بشمهندسنا , بعد مو اتقولي مو طاق السجارة وانت تكتب البوست ؟؟؟؟
مافيش فلوس يا حبيبي مافيش فلوس

هذه قاعدة الحكومة


غصبن عليكم نبي ناكلكم غصبن عليكم
هذه قاعدة التجار

مالكم الا الكلام يا حبايبي مالكم الا الكلام

هذه قاعدة النواب
مالكم الا التحلطم يا حبايبي مالكم الا التحلطم
هذه قاعدة المواطنين


مدام الراس مريض شنو تتوقع من الجسم ؟؟
واقصد بالراس هو رئيس مجلس الوزراء والجسم الحكومة

ساره النومس said...

عايشة الرشيد


خرفت المرة والله خلاص ماعاد فيها عقل لوول

الدســتور said...

اشتغلت غيرة الحريم

Anonymous said...

تتوقع جمعية الصحافيين تصدر بيان تتضامن فيه مع عواشه؟؟

كويــتي لايــعه كبــده said...

1
60,000,000,000 دك
اذا كانت خساير فكم كان المبلغ أساسا؟

---

2
رسالة معصومة ضجة
والا
محاولات اغتيال النيباري والجوعان الفعلية ضجة

الرسالة فيها ريحة

---

3
موضوع "المسرحين" لعب سياسي بالوقت الضايع

---

4
مو لازم يفهمون بالطب مثل الأطباء لكن دورهم الضغط على الحكومة
وحكومتك بدون ما تمشي الا بالدز
وهذا هم يدزون

---

5
تاريخ الكويت حافل بخروج الارهابيين من العجين
شخبار تفجيرات الثمانينات
واللي صار عضو بعد تورطه في محاولة تفجير بمكة المكرمة

---

6
يا ما تكتب يا نص درزن!؟

@alhaidar said...

يعطيك العافية عزيزي :)

بالنسبة لرسالة معصومة انا شفتها شخصيا .. واضح إنه إنسان تافه وغبي ومعتقد إن خليفة زمانه !

لدرجة إن انتقد فرع من الأسرة الحاكمة ( الجملة اللي شطبتها كل الصحف ) ووصفهم بمحبين المجوس وهالخرابيط !!

فعلا ما لازم نعطيه أكثر من حجمه .. لكن للأسف اهو يمثل فكر متطرف موجود بالبلد ..

الشغلة الوحيدة اللي حيرتني وللأسف ما سألت د.معصومة عنها لما كنا عند المخفر اهو شمعنى معصومة ؟

بصراحة إذا بيختار نواب يمثلون الشيعة الروافض وغيره مثل ما قال كان من باب أولى أسماء ثانية أقدم وأقوى ولهم عداوات كبيرة مع السلفية عامة ..

أما عايشة الرشيد فالكلام عنها مع احترامي مضيعة للوقت :)

المسرحين موضوعهم يتلخص بكلمة وحدة : دلع


وأحد يلقى من يدلعه وما يتدلع الله يهداك ؟

وبالنسبة للإرهابيين للامانة على كثر عيوب وزارة الداخلية إلا أنها بموضوع المباحث مشهود لها .. وانشالله يرد كيدهم في نحرهم هالارهابيين وغيرهم يا رب ..

تحياتي ..

t.q8 said...

وانا اغني بعد
ماقيش فلوس ...مافيش فلوس
وترتتتاتي وترللل


وعايشه رشيد يبيله الطب النفسي