Monday, September 28, 2009

مختصر بالوقت الضايع

في البدايه كل عام وانتوا بخير وتقبل الله طاعتكم مع انها متأخره
.
بعد اجازه حلوه وخفيفه من الحكومه الغراء الي مدلعتنا وتراعي مشاعرنا وبعد ماراح علي يوم على الفاضي لاني يعني صايد الحركه وماخذ اسبوع العيد اجازه بصراحه خفت تنجلني الحكومه واتوهق واتروح علي الاجازه .. يالله فدوة هاليوم لعيون رئيس حكومتنا الي فر العالم فر بس علشان ينفذ مشاريع جديده على الساحه الشرق اوسطيه نشكر سموه على هاالتعب
.
-1-
.
.
والواحد الله .. وزير المواصلات يبي يراقب المدونات .. راقب يبا راقب .. اذا مراقبتكم نفس مراقبة وزارتكم عز الله خوووش مراقبه .. من شاف سنترالاتكم ولونها الحلي وين الله بيوفقنا بدال ما تقول اجدد الخطوط الجويه الكويتيه الي جنكم ناطرين تطيح وحده علشان على طول تخصخصونها وتعطونها حق الشركه الخسرانه اياها ياي اتراقبنا احنا الفقاره المساكين والا نظام البريد .. اهو اساسا في بريد بالكويت ؟؟ الله يخلي دي اتش ال ويخلي الانترنت .. على طاري الانترنت وين مشروع الانترنت الي بتوصلونه مع التلفونات .. الحجي مع هالوزارة ضايع .. انا اقول خصخصوها اهي ووزيرها .. على طاري الوزير شخبار حدس ما تحجوا ؟؟
.
.
-2-
..
.
هالخبر صدمني .. يعني كويتي وين يروح بالله موزنبيق !!!
.
اشلون كويتي وابعاد ؟؟ هل كيف ؟؟ ومع هذا مااحب اتكلم عن القضاء لسبب .. لان عندي قناعه ان الدوله تنتهي بانتهاء نزاهة القضاء .. لذا لن يعرض اي تعليق يمس القضاء .. وارجوا واتمنى ان يكون الحكم خطأ !!؟
.
بس بصراحه حكم غريب وهذه ليس بسابقه للغرابه !!؟ كاسك يا وطن
,
.
-3-
.
.
مترو دبي و جامعه الملك عبدالله هو الشغل الشاغل للاحاديث الكويتيه .. محسسيني اذا حطوا مترو بالكويت الي الكل بيركبه .. اي هين .. منو يهد سيارته ويركب مترو خصوصا والبنزين رخيص
.
اما سالفة الجامعه الي ذبحتونا فيها هم عادي .. شوفوا منو اقر قانون منع الاختلاط سابقا مو الحين سابقا .. للاسف ان هناك من تنازل للتيارات الدينيه لسبب او لآخر .. وبعدين كل شي يتعدل عادي ضغطوا على النواب علشان ينشال هالقانون .. وبما ان جامعة الشداديه ما خلصت يعني يمدي نضبط الامور
.
.
-4-
.
.
يبون يطيحون القروض .. السؤال هنا ما هو ثمن شراء مدويونيات المواطنين ؟
.
.
-5-
.
.
ندوة المدونين الي سوت بلبله بين المدونين سالفتها سالفه
.
اولا احب اشكر ثقة الزملاء على انهم ذكروا مدونتي المتواضعه لكي اكون محاضر للندوه وقد اعتذرت منهم مع تمنياتي
لهم بالنجاح
.
ثانيا بالنسبه للندوه انا عن نفسي لم تعجبني فكرة الندوه لانني ارى ان المدونات تؤدي غرضها واكثر عبر شاشات الحواسيب
والبعض منا يريد ان تكون شخصيته سريه لعدة اعتبارات وانا عن نفسي ارى ان المشاركه بأي نشاط خارج اطار المدونات يجب ان تكون باسم الشخص نفسه وليس باسم مدونته ولهذا السبب اعتذرت منهم فالمدونه بالنهايه افكار شخصيه للمصلحه العامه هذا بالنسبه للمدونات السياسيه
.
ثالثا بالنسبه لحضور الندوه اعتقد الحضور لن يفضح شخصية المدونين لانه وبكل بساطه اشدراهم اني مدون والا قاريء للمدونات يعني هل مثلا مكتوب على جبهتي كاسك يا وطن ؟؟! وهل باعتقادكم ان السلطات ما تعرف اساميكم يعني الموضوع عادي جدا ونحن لسنا بدولة بوليسيه
.
رابعا الاخوان يرون انها فكره ممتازه وتثري المدونات ويجب ان نحترم آراءهم وان اختلفنا معهم وان يكون موضوع النقاش والنقد على قدر من الاحترام المتبادل وليس كما حدث
.
خامسا .. بالنسبه لمحمد الجاسم انا اتفق مع من وضع خط احمر تحت هذا الاسم لانني مثلهم لن انسى انه محامي ورئيس تحرير اصحاب جريدة الوطن بيوم من الايام .. ولكن ننتظر رد القائمين على الندوه وانا على يقين بان هناك تبرير لهذا الموضوع لايماني التام بأن الاخوان لم ينسوا مثلنا والشيء بالشيء يذكر فرنــــاس اختيار موفق جدا واتوقع انه سيثري الندوه كثيرا وهذا ليس انتقاصا بالباقين
.
سادسا ليس من الضروره ان تعجب الفكره الجميع فهم عملوا واجتهدوا والله يوفقهم وللكل الحق بفعل ما يريد
.
.
-6-
.
.
سيخسرني المجلس !!!! والله احنا الي بنخسر اذا مافاز بو محمد
.
.
-7-
.
.
انفلونزا الخنازير مو مختب عليها الا احنا العالم ماشي واحنا اهني كل واحد يصارخ .. واضحه يا جماعه .. مناقصة اوراق توريد الادويه والاجهزه الكوادر الطبيه الشاشات الابر الخ الخ الخ والله ما وراء القصد
.
.
اللهــــــــــــــــــــــــــم لا اعتــــــــــــــــــــــــــــــــــــــــراض

35 comments:

enter-q8 said...

عجبني اسم الموضوع
بس ياليتك كاتبه
ضايع بالوقت المختصر

اصدمك للحين الكويتية ترى ما يانا شي عن الخصخصه و لا عن الوزارات و لا عن العروض و احتمال القانون يسقط بعد من كثر التأجيل

well_serviceman said...

بوست غماتي مهندسنا ، ماخليت شيئ

انا تخربطت بس برد عاللي اذكرهم ، بالنسبه للجسار ، دفعة مردي

وبالنسبه للكويتيه ، للحين مالقيت طيران افشل منه ، طيران آسمان الإيراني "اللي مديلاتهم اقدم من موديلاتنه" احسن من الكويتيه بمليون مره من ناحية الصيانه والتشغيل

الندوه ، بالفعل الإخوان ماقصروا بالإعداد لها ، وإن كانت المشاركه فيها مفيده فستكون مفيدة لمن يريد تطوير كتابته أو طريقة استهدافه للموضوع بإعتقادي ، والحضور عام يعني محد بيعرف انت مدون أو ﻷ

بالأخير ، ماقول إلا ، كاسك يا وطن ، تشيرز

الدســتور said...

انا اول واحد بركت المترو
سويناها برى مانسويها بالكويت
على الاقل افتك من النرفزة بالشارع

هالحـــــزة said...

ربنا على المفتري وابن الحرام ..

SHOOSH said...

أوهايووووو


أوهايووووو

خالف تعرف said...

قواك الله

وانت الصاج المواصلات يخصخصونها اهي ووزيرها :>


اما القروض حبيب الشعب سمو الرئيس اكيد يطبخونها بنيويورك اهو معاه وزير االخارجية اللي يصرح عن الاستثمارات.. وزير خارجية او مالية؟؟

Eng_Q8 said...

انتر

هم حلو

كل شي من تحت الطاوله الله يسلمك

Eng_Q8 said...

ويلي

شهالاسم العجيب وهم احسن من طياراتنا

المضحك اننا مأجرين طيارات من الصين ومصر

تشيرز يبا تشيرز

Eng_Q8 said...

الدستور

عيل يبيله استفتاء علشان نحكم على الموضوع

Eng_Q8 said...

هالحزه

اشفيك قالب توفيق الدقن

Eng_Q8 said...

شوش

اوهايو يبا اوهايو

Eng_Q8 said...

خالف

الله يقويك

مو خوش فكره :p

والله ماادري

جبريت said...

والله لو يسوون مترو انفاق اركب لو قطار اتعلق فيه هم راضي بس افتك من الزحمه وعلل الزحمه وجود يمي وحده شقرا الشعر لي نص الظهر تروح وترد معاي بالقطار يومين يصير ما لا تحمد عقباه

عاجـل said...

سيخسرني عالم المدونات لو توقفت عن التدوين

Eng_Q8 said...

جبريت

ما منكم فايده صج كويتيين :p

انشالله تركب يمك وحده لابسه ساري سماوي منقط باخضر وريحتها واصله من الاحمدي لي الجهرا وكل يوم تغمرلك بعد

Eng_Q8 said...

عاجل

معلوم وانا اشهد وابصم بالعشر

عبدالرحمن said...

حليت السؤال الصعب

سبب تأخير انشاء جامعه الشداديه

وهو منع الاختلاط :)


ناقصين فلوس ولا ناقصين شركات تبني ولا ناقصين دكاترة حتى يكون السبب منع الاختلاط


بالنسبه لسؤالك عن ثمن اسقاط القروض

اتوقع مجلس الامه بكبره :)

Unknown said...

البوست هذا ضرب عشرطعش عصفور بحجر

على طاري المترو
راضي الصعايدة يصعدونه.. المهم تخف الزحمة
الله على دبي... مشاريعهم مو مثل مشاريعنا
احنا مشاريعنا كلها ما مشت مترو
:)

ترى فكرة الندوة حلوة
بس وناخوك الواحد ما يبي يكشف روحه

الـسـنـبـلـة said...

kel 3am o enta b5air

-6-
ana b3d lama grait kalam.ha bl.jareeda gelt : ya 3aini 3la e.the8a <<

p.c.: sorry ktbt b.hal.lu'3a , ajhezat el.kulya mafeha 3arbi yalla mn fa'9lk

someone_q8 said...

السلام عليكم
الحكومة دائما تنطر كارثة قوية عشان تقدر اتفكر عاد تعال فججها جم كارثه اتصير عشان تصحى

أهل شرق said...

محاضر الندوة الرئيسي الاخ المحامي

الجاسم يبيله محاضر

يعلمه كيف يحب الكويت ومايدافع عن

الحرامية

@alhaidar said...

المواصلات خوش وزارة شفيها ؟ يكفي ماسكها أخونجي ;p

والندوة جميل منك تحترم كافة وجهات النظر .. والرأيين من وجهة نظري يحتملون الصواب

اما سالفة المترو فمعاك حق .. بس الكويتيين من كثر ما محبطين ودهم يشوفون اي تقدم ببلدهم حتى لو بس الهنود يركبونه بدل الباصات :)

والقروض والله اعلم خلاص شكلهم بيشترون الفوايد .. واليوم اقول زين يسوون .. شقونا والله البنوك ;p


باجي المحاور نسيتهم اعذرني الكبر شين ;p

تحياتي ..

كويــتي لايــعه كبــده said...

1
خل يراقبون يمكن توصلهم الرسائل

2
اعتقد الخبر فيه غلط

3
السالفة مو اننا نبي مترو
السالفة ان بنفس الوقت اللي قرروا يبنون المترو قررنا نبني مستشفى جابر

4
تراكم الديون هو ناتج غض النظر عن البنوك وكسرها للقوانين بسبب نفوذ ملاكها والموضوع بحاجة ماسة الى العلاج والعلاج لا يعني اسقاط القروض

5
الندوة فكرة جيدة وهناك من يناسبة الحضور والمشاركة وهناك من لا يناسبه وللكل أسبابه لكنها بشكل عام تنفع التدوين والشفافية. شخصيا اعتذرت كما فعلت انت لكن هذا لا يقلل من قيمة مشاركة الآخرين

6
خسارة بعض الناس مكسب

كيف يمكننا نسيان "ان الفساد ظاهرة ايجابية"

فقدانها ظاهرة ايجابية

Eng_Q8 said...

بو عوف

شفتي اشلون حليته وبكل اريحيه :p

يمكن مجلس الامه ويمكن معاه شي ثاني :)

Eng_Q8 said...

اديكشونير

:)

خلاص روح اركب باص ويمكن واحد توه باني عماره وشارب حلبه بشوف اشلون ترضى

لا تكشف روح وطالع وشوف

Eng_Q8 said...

السنبله

وانتي بصحه وسلامه

اي مو اهي معلمه تشرشل الف باء السياسه

عادي يبا اخذي راحتج

Eng_Q8 said...

انسان كويتي

هلا بو حمود

بعد اكثر من هالكوارث ما بقى الا زلزال وفيضان

Eng_Q8 said...

شرقاوي

رأيك :)

Eng_Q8 said...

بو كوثر

طبعا

شكرا

ادري فيهم يعورون القلب

ننطر وانشوف

توك شباب

Eng_Q8 said...

برييه


وراح تنمسح كالعاده ما ياخذون الا حجي بلير

اتمنى

عادي عمو ابتسم انت بالكويت

صحيح

طبعا

صح لسانك

Unknown said...

Eng_Q8
انا ما قلت بركب المترو
قلت خل الصعايدة يركبونه.... طبعا هذا مع احترامي لجميع الصعايدة

وترى المترو مال دبي فيه قسمين
قسم اللي اسميه الهمجي
وقسم gold
يعني اذا تبي توخر عن بو حلبة روح الجولد

Eng_Q8 said...

اديكشونير

لوووووووووووووووووووول انزين اشفيك معصب

خلاص يبا ولا تزعل.. المترو زين :p

Unknown said...

Eng_Q8
لا اشدعوة
انا اذا معصب... معصب على التكاسي والباصات اللي مسوين لوية بالشارع
بالنسبة للمترو... انا ادري اذا سووه ماراح القى مكان الا بالضبط داخل اباط بوحلبة
:)

Eng_Q8 said...

اديكشونير


لوووول

حبيب

sliveen said...

والله بش مهندس على فكره احنا زمايل
عموما الموضايع جدا متشعبه ورائعه وبعضها مختصر مايحتاج لتعليق
بس موضوع المراقبه للمدونات اعتراف ضمني بتاثير المدونات على الرأي ليس غالبيته ولكنها لها تاثير سواء كان ايجابي او سلبي فالبنهايه هي حريه خليهم يراقبون فنحن نعرف خطوطنا الحمراء هي الله عز وجل وسمو الامير حفظه والرسل الكرام ..اما الباقي فليس معصوم من النقد ..

اما سالفة ابعاد الكويتي انا انصدمت من الخبر منك انت للامانه لان الخبر في مخالفه كبيره للدستور
ولا اعلم كيف فاتت على قضائنا.

عموما يعطيك العافيه