Tuesday, October 6, 2009

جاسوس ايراني و بدون

.
تحــــــــــــديث
.
وهذا تحديث علشان حناحينو .. مقالة الجاسم واربطوها مع الموضوع الاول بغض النظر عن الاختلاف معه او عليه
.
-1-




ماادري اشلون اعلق على هالموضوع بصراحه يعجز كيبوردي عن التعبير


بس من الحين اقولكم أي واحد يصرح ويرد على هالخبر او يكذبه عليه علامة استفهام كبيره .. واللبيب بالاشارة يفهم


الله يكافينا شرهم ويحفظ الديره منهم ومن غيرهم


منو اولى يراقبون ذولي ويراقبون مصادرهم والا يراقبون المدونات ؟؟
ومنا الى من يراقبنا احلى تحيه وباقة ورد ونفيش


==========================


-2-


البدون والبدون كل يوم واحد مصرح عن البدون وكل يوم خبر والي معارض والي مأيد والي مخليها قضية الموسم جنه اذا جنسوا البدون بتنحل مشاكل الديره


قضية البدون قضية شائكه وهي قضية امنيه بالدرجه الاولى قبل ان تكون انسانيه او سياسيه .. ولنا بالموضوع السابق مثالا حيا .. فازدياد اعداد البدون بعد الغزو باعداد مذهله يجعلنا نتوقف ونضع خط احمر امام التجنيس العشوائي لهذا الموضوع


نعم هناك من يستحق ولكني اعتقد انهم قله قليله بالنظر الى اعداد البدون بالسابق وكنت قد قرأت عن هذه الاعداد سابقا ولكني لم احتفظ بالاحصائيه للاسف


تجنيس البدون او اعطائهم الحقوق المدنيه وغيرها من الامور يجب ان تتم بطريقة دقيقه بدون ان يكون للمجاملات منفذ او للواسطه .. بصراحه انا لا ارضى بأن يتجنس واحد اجلح شعره مصوفر وعيونه خضر على عسلي ويتكلم سوري على عراقي على كويتي وينحسب كويتي علي


لا يجب ان ننكر ان هناك الكثير منهم اتى بعد الغزو او قبله واخفى جنسيته وليست مشكلة الكويت انه اخفى جنسيته ويقول انا من الكويتيين البدون !!؟ ماادري منين ياب هالكلمه


عموما من لديه احصاء 65 مع انه ممكن يتزورممكن يتجنس ولكن بعد التأكد من صدق الاوراق وابناء الكويتيات من البدون او جناسي اخرى ايضا ولكن غير هالاثنين اعتقد بانها جريمه بحق الوطن .. لا اعمال جليله ولا غيره .. ترى محنا ناقصين


والشيء بالشيء يذكر .. رايح بشتري شغله والا واحد كااااااشخ غتره وعقال والسبعه تقول وكيل وزاره ويتحجى كويتي مره وحده وبدون سابق انذار يعني الريال يبي يدليني مكان قالي روح المكان الفلاني قلتله وين بالضبط قال بالمنطقه الفلانيه شنو ما تندلها !!!!؟؟ تندلها يالظالم تندلهااا .. وانا لا شعوريا ضحكت وقلتله لا والله ما اندلها .. تندلهاا !!؟ حسبالكم خلصت السالفه ؟؟ لا يبا رحت حق رفيجه الي دلاني عليه والا قاعد مع واحد من ربعه وشكلهم نفس طقة بو تندلها بس على بدله .. المهم وانا ناطر شغلتي علشان اييبونها اقعدوا يسولفون ويلعنون خير الكلمه يعني كويتيين تالي واحد قال حق الثاني تلفونك كريت لو فواتير .. كريييت ؟؟ الكرت صار كاريت
طبعا انا شرقت وغصيت بالزقاره من الضحك .. ما تعرف تحجي ولك لا تحجييي


بالله عليكم تندلها و كريت كويتيين ؟؟؟ والله لو مو مغتر لو لابس زري ووزار ما اقتنع فيه واقولهم ولكم تندلون دبش ؟؟ روحوا قبضوا منه


============================


-3-


الاعتداء على الكاتب زايد الزيد كتب عنه الكثيرين وكفوا ووفوا بالموضوع
اعتقد ان هذا الاعتداء هو تبيان مدى انحطاط مستوى التحاور والاختلاف بالرأي ومدى حساسية البعض من الانتقادات وانحدار المستوى الفكري للكثيرين اذا ما كان الاعتداء من اجل مقالات الزيد مع اني ارجح هذا الرأي بالرغم عدم معرفة الجاني .. وبالرغم من اختلافي مع طرح جريدة الآن ولكن ما هكذا يكون الاختلاف .. والا فاننا وصلنا الى مرحلة الهمجية والهلاقه السياسيه


وما تشوف شر يا بو طلال والحمدلله على سلامتك


==========================


-4-


النادي الايطالي الكبير والعريق والجميل رومــا راح يبنون استاد يديد
لحد الحين الموضوع عادي .. يقولكم هالاستاد يشيل تقريبا 60 الف متفرج وراح يحطون فيه فندق ومركز تسويق وحدايق ومترو وركزا على المترو كل هذا تكلفته تقريبا بدون تكلفة الارض 300 مليون يورو ويخلص بعد اربع سنين .. وهذا شكل الملعب


والحين واصلني مسج يقول ان استاد جابر راح يفتتحونه نص السنه اليايه .. السؤال جم تكلفة استاد جابر وجم سنه قاعدين يبنون فيه ؟!؟ .. احاسب مين يا ناااس




اللهـــــــــــــــم لا اعتــــــــــــــــــــــــــــــراض

50 comments:

SHOOSH said...

بلدي انزلم .. بلدي إنزلم

اللهم لا إعتـــــــراض

=======================

عندي سؤال .. البدون متى طلعوا بالضبط ؟؟؟

عقب الغزو ؟؟؟

كان في قبل الغزو بدون ؟؟؟

nanonano said...

الجزء الأول من موضوعك اليوم يؤكد مقالة بو عمر اللي بتاريخ 5/9
اللي على فكره في ناس ثانين أكدوها
====

موضوع البدون أنت يبت الزبده

تجنيس البدون او اعطائهم الحقوق المدنيه وغيرها من الامور يجب ان تتم بطريقة دقيقه بدون ان يكون للمجاملات منفذ او للواسطه

Dakhtar Blue said...

١
القلوب عند بعضها
توني قاعد اقرا نفس الخبر على موقع العربية
الموضوع فعلا يخوف
وبمثابة الرد على البعض اللي كل ما يبناله الطاري... قال النسيج الوطني والنسيج الوطني

المشكلة تهقى في منهم عندهم الجنسية؟
.....

٢
كلام جميل ولا اقدر اخالفك

بس أخينا مال "ما تندلها" اخاف زبيري يامعود :-P
أنا قبل فترة هم طحتلي على واحد، وشكيت فيه، بس على كلامه زبارة وامه عراقية

تهقى صج؟
.....

٣
ما نختلف إن إحنا كلنا ضد العنف، وضد سياسة تكميم الأفواه، لكني شخصياً ماني معلق عالموضوع إلى أن نتأكد إن الموضوع فعلاً سياسي وغير شخصي

.....

٤
أنا أعرف ديرة... ديرة كاملة، بأهلها، وسكانها، وملاعبها، وشوارعها.... تحت الماي

قوية؟

تصدق... مع إن أيطاليا حالهم من حالنا... كل ويك إند يا حكومة يديدة ولا إنتخابات مبكرة... بس ماشية معاهم حلاوة يعني

إحنا شفينا إحنا؟

Eng_Q8 said...

شوش

منذ مبطي مزلووم

==

موجودين من زمان منهم كويتيين بس رفض الجنسيه الثانيه ومنهم ماادري اشلون طلع بصراحه

هذا بالنسبه للبدون ما قبل الغزو

بدون عقب الغزو اقري السالفه وبتشوفين من وين يونا :)

Eng_Q8 said...

نانو

يس يس انا بهالموضوع معاه ون هاندرد بيرسينت

==

بس هل من مجيب ؟؟

Eng_Q8 said...

دخترنا

1 معلوووم عنده جنسيه وفلوس و نفوذ اعلامي

2 لالا مو زبيري الزبيري كلامه واضح وما يتصنع .. هذا غير تندلها قايل اقولااك بتغليض اللام .. عرفت قولاك مالت الخكره هذي بس ما كتبتها لاني مااعرف اشلون اشرحها

3 عموما انا علقت على السياسي لاني ارجح هالموضوع .. شخباري منو يبوق ويطق بعجره :p
واذا طلع مو سياسي احنا قلنا رأينا بالجانب السياسي اذا كان موجود واذا مو موجود ما يضير :)
وهم راح نتحمدله بالسلامه

4 اييي لا وتعتبر من الدول الفقيره باوروبا الغربيه وبرلسكوني لاعب فيها لعب

بس ناس تشتغل واذا يبي يبوق يبوق مليونين مو نص المناقصه

جبريت(عنيف سابقاً) said...

على الايراني

اللهم لا تؤاخذنا على من كفلهم وحطهم بالبقالات ومادري وين مننا وابتلشنا

الشغله الثانيه التجنيس العشوائي او الادعائي

مرفووووووض والبعض يتلاعب به لتكسب انتخابيا

استاد جابر الله يسلمك عيالي وعيالك راح يودون عيالهم وقت الافتتاح

well_serviceman said...

1
لا ليش يراقبونهم؟ وليش يراقبون الحدود؟ وليش يراقبون الإرهاب والإرهابيين؟ المدونين كويتيين ولازم يتراقبون ، أما المو-كويتي بلعنه خله يلعب بالديره "شوردلي" الظاهر

2
كريت و تندلها؟ عيل مامر عليك انت صاحب مطعم سابق "صيدليه حاليا" اب بنيد القار ، السكبه تقول من سكان الضاحيه ، يرن تلفونه يسولف باكستاني؟

3
أتفق مع فالتعرض لأشخاص بمجرد أنهم عبروا عن آرائهم أو تحدثوا بموضوع مرفوض جملة وتفصيلا

4
استاد جابر غير ، لا تنسى انه بمنطقة جميله جدا وتحاوطها شجرات الفراوله والكرز ومناطق حديثه وبنية تحتيه مصوقره ووو وووو ووو

اللهم لا اعتراض "مقتبسة مو منك" وتحياتي :)

جبريت(عنيف سابقاً) said...

نسيت اعلق عن زايد الزيد

الاعتداء اتمنى ما يحفض وعدم استدلال على الجاني وحجي وكلاوات مثل ما صار مع اليوعان وصار مع الساير وزير الصحه الحالي وفوقهم احمد الجارالله وتلاهم النيباري

هالحـــــزة said...

1
++

الله يحفظ الكويت

2
++

اؤكد دعمي لحل قضية البدون الانسانية , واعتقد تعرف وجهة رأيي زين ما زين يا كاسك .

3
++

ما يشوف شر .

4
++

وسع صدرك , هذا كله تحت رأس ولد اخو المعزب ( والبيب بالاشارة يفهم )

دمت ودامت بوستاتك

عاجــل said...

وهل كنا ننتظر الجاسوس حتى يعترف

يا عزيزي طالما اننا انشغلنا بالتوافه
هناك من استغل الوضع ودخل في عظامنا

Dakhtar Blue said...

١
الله يستر منه جان صج

٣
وانا بعد اتحمدالله بالسلامة... إعذرني نسيت هالجزئية
لكن لا تنسى قضية هداية السلطان... اللي طلعوها سياسية وربطوها بمقالة... واهي في الواقع بعيدة كل البعد عن السياسة والمقالة التي نشرتها المرحومة قبل شهور طويلة من حادثة اغتيالها

تسمحلي أقول لك شغلة للحين أذكرها من مقرر (الطب الجنائي)؟ سلمك الله اكو مثل ما تقول، نظرية أو تحليل، إن الجرايم اللي يكون فيها المعتدي والضحية قراب من بعض، فالدوافع في الغالب تكون شخصية، مثال لما واحد يطعن الثاني، ماهي نفس حالة قنّاص متربص و ناطر الضحية من فوق بناية أو عمارة
في الحالة الأولى، لإن الدافع شخصي، فهذا ممكن يدفع المعتدي إنه يستعمل سلاح يقرب من خلاله للضحية بصورة أكبر ويشوف النتايج بشكل اوضح، أما الدوافع السياسية فتصير من بره وبعيد وبالخش والدس
ولو تطبق النظرية على حادثة النيباري والجوعان... تشوف إن فيها شوية من الصحة

عالعموم هالحجي كله تفلسف فاضي... بس قلت اشاركلك لعل وعسى تفهم انا ليش نوعا ما اشكك في إن يكون في القضية دوافع سياسية

لكن هذا ما يعني إن نسكت عن اللي صار طبعا!

٤
واحد ايطالي اعرفه
يقول إحنا الإيطاليين شعب بواق وحرامي

فاللي يعرف يقص علينا ويبوقنا إحنا... يكسب إعجابنا
نفس برلسكوني

عيب ربعنا إنهم ما يعرفون يبوقون مثل البشر
بس الظاهر إنهم يطبقون مقولة: إن جيت تحب، حب قمر، وإن جيت تسرق، اسرق جمل

ترا كتبتها باللهجة المصرية... خفت تشك بجنسيتي ولا شي :-P

ما عليه سامحني... حلتلي سوالفك اليوم :-P

Eng_Q8 said...

جبريت

جان زين بس بالبقالات

صحيح

يعني ماراح انلحق عليه ؟؟ اهم شي الحق على ملعب روما .. وحتى لو لحقت على استاد جابر اخاف اروح وتطيح المدرجات واتحرول او اموت

Eng_Q8 said...

ويلي

اي والله ليش يراقبونهم

على الاقل يقول انا باكستاني مو يقول كويتي باكستاني

نعم نعم

اعجبتني شجرة الفراوله :p

انزين من رويشد عرفنا

Eng_Q8 said...

جبريت

بصراحه لا احب الربط بين ما حدث لليوعان والنيباري بهذا الحدث

لان الفرق بينهم واااضح جدا

Eng_Q8 said...

هالحزه

1 امين

2 ماني ذاكر وجهة نظرك ولكن يظل هذا رأيك ويحترم

4 والله ماادري

حياك بابا حياك

Eng_Q8 said...

عاجل

طبعا لا

ولكن انت تدري انهم يهونون الموضوع دائما وابدا وهذا دليل مادي علشان لا يقولون تتكلمون بدون دليل

التوافه مستحدثه من اشخاص يريدوننا ان ننشغل فيها :)

Eng_Q8 said...

دخترنا

الله يستر منه ومن غيره

ما نسيتهاش :)

نظريه منطقيه جدا .. ممكن ليش لأ
علشان جذي قلت اذا كانت سياسيه واذا مو سياسيه ما يضير :)

لالا خوش حجي عجبني

--

اها .. بس برلسكوني مطيح حظ ميلان الحين اتهقى يشيلونه

اي والله صاج

لووووووووووول لا يبا انا ما اشككش بحد
المكان مكانك .. وخوش سوالف :)

Purplecious said...

و أخيـــــــــــــرا عرفت سالفة تندلها


لووووووووووووووووول

EXzombie said...

في عملية تبديل راح تتم بارجاع واحد من عيال الشهيد للمنصب السابق علشان الي صار بموضوع كوهين الكويت

Dark angel said...

بصراحه انا لا ارضى بأن يتجنس واحد اجلح شعره مصوفر وعيونه خضر على عسلي ويتكلم سوري على عراقي على كويتي وينحسب كويتي علي


============================

عنصري!!!!

كاريكاتير said...

مشكلة البدون او فئة غير محددي الجنسية وغيرها من التسميات اللي الحكومة توهقت بوصفهم..

اخوي بونبيلة العزيز ما اشك ابدا بإنسانيتك ولا بوطنيتك

قضية البدون لو كانت حسب رأيك مسألة أمنية صرفة لكانت الحكومة أنهتها والمسؤولين حسموها من البداية، وفق حلول انا واثق انها غير مرحب بها من داخل وخارج الكويت.

قضية البدون تعقدت وقاعد تزيد تعقيد لأن ببساطة حل هذه القضية وانهاء ملفها الكبير يعني كشف حساب العديد ممن استفاد من هذه القضية وصعد على اكتاف دعاة الحق منهم بل وحصل كل ما يود الحصول عليه حتى لو لم يجنس واحد يستحق الجنسية.

النظر لهذه القضية لازم تكون من كافة الزوايا والاصل ان اللي عنده حق ياخذه

تقدر تقولي بونبيلة يعني الحكومة ما تعرف منو اللي دخل الكويت بوقت الغزو او قبل او حتى بعد وخش جنيسته تحت الكاشي ولا بملابسه الداخلية!!

تقدر تقولي بونبيلة ليش الحكومة تطنش بإبداع قانون تجنيس ال2000

تقدر تقولي ليش المجلس وبعض نوابه للي بس فالحين بتنقيط دمعتين بكل مهرجان او اعتصام او حتى ندوة عن البدون بس علشان يكسب له صوتين وصورة للجريدة!!

المجلس لو فعلا جاد جان شكل لجنة تحقيق كشف فيها عن الدور الحقيقي للجنة وزارة الداخلية المعنية بحل مشكلة البدون..

هناك من يستحق والحكومة تعرفهم لو ان شاء الله واحد بس يستحق خل يعطونه اليوم مو باجر او ينقعونه وينقزونه على مانشيتات الجرايد كل شهرين مرة الصبح ومرة بالليل!!

المشكلة انسانية وليست سياسية واذا تم تجاهل الجانب الانساني تأكد ان الوضع راح ينفجر

ترا اللي صار في خيطان مو بسبة صحن وانكسر ترا اللي صار ويبي يصير في جليب الشيوخ مو علشان معاش ما اندفع

تأكد ان ظلم العباد وانتهاك حقوق الانسان يدفع هذا الانسان لإرتكاب اي ردة فعل ممكن تهدد المجتمع..

اسمح لي كتبت وايد لكن فعلا قضية البدون اتابعها واعرف ان المتسبب الرئيسي المتنفذين اللي عارفين شلون تصير الحكومة بإيدهم مثل حطبة الدامة!!

عموما الاختلاف لا يفسد عند نبيلة قضية!

واذا مو عاجبك تعال براحة بوعيسى ومعاك عجرتك!!

اما عن الزميل زايد الزيد فما جرى له أمر خطير وللأسف ليست السابقة الاولى من نوعها، واتمنى من مدعين الحريات والديموقراطية ان نسمع منهم كلمة طيبة او "ينطم"!!

Anonymous said...

مع احترامي لك لكن انت ظلمت الكثير من البدون واذا عاللهجه يعني لو متكلم بكلمات سعوديه ولاايرانيه عادي؟يصير كويتي ؟

{~المباركية~} said...

ماكو احد يراقب غير الله جل جلاله

Anonymous said...

lol

Anonymous said...

بس من الحين اقولكم أي واحد يصرح ويرد على هالخبر او يكذبه عليه علامة استفهام كبيره .. واللبيب بالاشارة يفهم

مصدر الخبر جريد التياسة

خوش مصدر موثوق يا فهيم .

Enter-Q8 said...

تبي تضحك واحد مواعدني ببطاقة
VIP
لحضور حفل افتتاح اتاد جابر
شكلي بعطبها ولدي مع الورث طبعا الورث اقساط البيت و السيارة و انت رايح

أحمد الحيدر said...

يازلتي سالفة تندلها :))

قضية البدون اخوي العزيز شائكة وقديمة .. وكثيرا ما تم استغلالها ضد الكويت .. مع ان غير محددي الجنسية موجودين في أكثر من بلد ومنهم جيراننا الخليجيين .. وإن تعددت المسميات فالمقصود فئة واحدة ..

وأوافقك إن الأعداد زادت بعد الغزو .. لكن الشرهة على الحكومات الكويتية اللي ما حسمت القضية مبجر وخلت كرة الثلج تكبر ..

الحين صرنا بواقع جديد ولابد من حل ينقذ الكويت وسمعتها من الاحراجات الدولية .. مثل ما تفضلت في فئات تستحق التجنيس ولو عددها قليل .. لكن المشكلة باللي ما يستحق لازم توفرله الدولة مثل الوافدين حق التعليم والعلاج على اقل تقدير .. والمشكلة الأكبر " اهم لي متى بدون ؟ " .. لأن الدولة ما تبي عددهم يزيد ولا مو عيزانة عن التعليم والصحة وشهادات الميلاد ..

عموما نتمنى يكون مسؤولينا الأشاوس مراعين الجانب الأمني في القضية وعارفين إن مرحلة الانفجار بعيدة .. ولا ممكن أحداث خيطان تطلع ولا شي جدام احداث صليبية وتيماء .. لا سمح الله ..

تحياتي ..

أبو الدســتور said...

تحاسب مين
يبا الاستاد اشتغلوا فيه على الاوامر التغيرية

Anonymous said...

بو وليد

اتمنى ان تتمكن من الأطلاع على ما نشرته السياسه عن صدام حسين قبل غزوه للكويت
أحمد الجارالله معروف للجميع أنه مرتزق صحافة

المهم شخبار الكادر ؟؟؟؟؟

للعلم فقط. said...

1-
الله يحفظ الكويت من كل مكروه
2-
البدون قضيه انسانيه بالدرجه الاولى والانسانيه هي استثناء للقواعد
3-
موضوع زايد الزيد ..ردي عليه لو خصومه سياسيه راحنكون كلنا زايد الزيد وكاتب بمدونتي lel-3elm.blogspot.com
عنه

4-
بخصوص ايطاليا ما اقدر اقولك الا labela italia مدينه رائعه حتى بالدراما الي تصير فيها بالرياضيه من يوفي وانتر ومشاكل روما والخ..
الى سياستها التي لم تستقر من عشرات السنوات تناوبا مابين اليمين واليسار احزاب طبعا بس اعتقد الملعب الي تقده ملعب اليوفي عدل

someone_q8 said...

السلام عليكم

اللهم لا إعتراض
مافيش فيادة يا حبيبي الى بالاجيال الياية ( تذكر هالكلمة ؟ :) لا تتأمل الحين الا بعدين :)

www.peiwar.com said...

www.peiwar.com

Eng_Q8 said...

بنفسجيه

ذابحتج بلاغة الشف

Eng_Q8 said...

اكسزومبي

اشفيه محمد الجاسم :p

Eng_Q8 said...

دارك انجل

القصد بهذا الوصف فئة من الناس موجودين بدولة عربيه واذا ما عرفتيهم وفهمتي ان الموضوع عنصري كان من الاحرى انج تسالين

واي نعم لا ارضى

Eng_Q8 said...

كاريكاتير

والله يا بو نعيمه وايد من المسائل الامنيه الحكومه تعطيها طاف ومن زمان مو من الحين فقط تذكر ما حدث سابقا وراح تشوف الاثبات

ومن متى الحكومه تقدم حلول ؟

تعقدت لان هناك الكثير ممن من قط جنسيته وقال انا بدون

الله ينور عليك الي عنده خق بياخذه

اقولك لو كنت موجود بوزارة الداخليه !!

تجنيس الالفين ماله داعي نهائيا

النواب الي خبرك كل مكان يرزون ويوهم مو بس بالتجنيس

اهي مو مشكله ولا محتاجه لجنه

ما قلنا لأ المستحق خله ياخذ عليه بألف عافيه ونوقف وياه بعد

المشكله انسانيه نعم ولكنها امنيه بالدرجه الاولى ولا تهون من الموضوع

انشالله محد ينظلم بالكويت

اخذ راحتك

عندي نباطه ينفع ؟

لا تلوم اي احد لان الموضوع غامض الى الآن ولم يعرف ماهي مسببات الحادث

Eng_Q8 said...

انيموس

لا مو عادي

وبعدين عفوا اخوي انا لا اظلم احد وليس الامر بيدي لكي اظلم او لا اظلم وانا ذكرت من يستحق ياخذ ومن لا يستحق يتوكل على الله

وبعدين ترى مبين انه مو كويتي وياي عقب الغزو

Eng_Q8 said...

المباركيه

سبحانه

Eng_Q8 said...

انيموس

:)

Eng_Q8 said...

انيموس

هذي جريدة رسميه واذا مو عاجبتك هذي مشكلتك مو مشكلتي

وبعدين ليس كل ما يعرف يقال يالحبيب

تحياتي

Eng_Q8 said...

انتر

حنطها

Eng_Q8 said...

احمد الحيدر

:)

شي صار واستوى خلاص لازم نعيش الواقع

والله يا بو كوثر مو مشكلتي ولا مشكلة الكويت ان واحد قط جنسيته وقال انا بدون خله يتحمل

الله يستر

Eng_Q8 said...

الدستور

الارض نازله اي تغييريه بعد

Eng_Q8 said...

انيموس

انا مو بو وليد :)

ادري واختلف معاه

لكن الموضوع هذا لا يكذب نهائيا بالنسبه لي انا على الاقل

وليس كل ما يعرف يقال :)

كادر ؟؟؟ لي حجت البقر على قرونها :p

Eng_Q8 said...

للعلم فقط

1 امين

2 هذا رايك ويحترم

3 انشالله بمر واشوفه

4 وبالرغم من كل هذا ماشين :) لالا اقصد ملعب فرانكو سينسي ملعب روما اليديد .. ملعب اليوفي مافيه مترو لاني ماشفت مترو بتورينو :)

Eng_Q8 said...

انسان

هلا بالغالي

لا تحبطني :)

Eng_Q8 said...

بوير

اوكي

Adelutu said...

الأخ كاسك يا وطن

يبدو أن أصولك قادمه من المريخ أو أنك كنت في البلاد منذ أيام قريش حتى تقرر أنت من هو " ولد بطنها " ومن هو " بعد الغزو "

حبيبي .. إترك عنك عنصريتك الشنيعه وقول لي أنت وين رحت بالغزو ؟
هذا إلي تقول عنه " تندل " قعد بديرته حبآ فيها ولأنه ماعرف غيرها
بينما " ولد بطنها " ماشفنا إلا غبرته وراه

حبيبي الكويت فيها ناس من إيران وأصولهم معروفه ، وفيهم ناس من العراق وأصولهم معروفه ومن السعوديه ومن سوريا ومن ومن ... إلخ
فلا تقعد تسوي فيها " حكيم الزمان " وتصنف الديره على مزاجك
لأنها ببساطه تصنيفات عنصريه ما أتى الله بها من سلطان

نصيحه يا ولد بلادي ، إترك عنك ظلم الناس
وخاف من ظلم العزيز الجبار

الله يهداك

Eng_Q8 said...

عادل

دام ما تدري اكرمنا بسكوتك

حلوه وين كنت بالغزو كثرلي منها لو سمحت مع شوية دقوس

الكويتي هو من مات على ارض الوطن وانت يايني تقول غبرته ؟؟ الغبره الش شفتها بالغزو هو بقايا الجيش الشعبي الي قاعدين لي الحين عندنا وياكلون من خيرنا

مو انت تعلمني بتاريخ ديرتي للعلم فقط

البدون مو من الشعب وحط خطين تحت هالجمله البدون مو من الشعب واصنفهم مثل ما اصنفهم بكيفي

واذا كان طرحي عنصري فانا افتخر بعنصريتي ضد من يريد ان يأكل وطني

الله يهدي الجميع