Thursday, October 8, 2009

المتأسلمين الشيعه وفرعية جريدة الآن

-1-

رئيس لجنة الظواهر السلبيه الاخ بعيد الفاصل فيصل الدويسان يستنكر ماحدث بالمقاهي ويوافق على شروط المطاعم وارتداء ملابس محتشمه للسباحه !!!!!!!!!!!؟

انا رديت قريت الخبر مره ثانيه مو علشان شي بس علشان أتأكد ان هذا فيصل الدويسان مو محمد هايف .. طبعا الدويسان محد يكلمه واذا واحد تحجى عنه قال خاف مثل هالسياسي المحنك الموطائفي .. لا اعلم الى متى هذا السكوت عن بعض الاعضاء بس لانهم شيعه ؟؟ واذا شيعي يعني شنو مو عضو مو كويتي مو مسلم ليش محد يقول متأسلم عنه

المتأسلمون الشيعه بوجهة نظري لا يختلفون عن المتأسلمون السنه فكلهم بالهوا سوا وكبح الحريات والدخول في تفاصيل ماادري اشلون قايله هي شغلهم الشاغل ببساطه لانهم وصلوا الى سدة البرلمان بهذا الطرح والناس صوتت لهم لانهم ينتهجون هذا المنهج

فها هم الآن يبون يحجبون الديره كلها .. انتوا شكو وحده متحجبه والا مو متحجبه ؟؟ الي تبي تتحجب كيفها والي ما تبي هم كيفها والعفه والاخلاق عمرهم ما انقاسوا بالحجاب الا اذا كنتوا تفرضون علينا هالنظريه الفاشله جوهره مكنونه وجوهره مو مكنونه .. وبعدين راح اتصير سالفه الدويسان يبي حجاب بو حنج وهايف يبي ينقب والاخونجيه راضين بالشيله اي واحد اطبقون بالله ؟؟!؟ ورب الكعبه ما عندكم سالفه والاخ محمد هايف معصب على مفتي الازهر علشانه قال النقاب من العادات والريال ما جذب يعني الا انت صح والباجي غلط

وبعدين انا بفهم حريم بروحهم بالمسيله بروووحهم يلبسوون عبي ويتسبحون ؟؟؟ شهالحجي الفاضي .. المطاعم افهم اذا المطعم يسكر الساعه 3 والا 4 الفير اسكره الساعه 12 لييييش بالله واحد ماخذ اجازه وسهران وين ياكل ؟؟ والا غصب توكلونه خبز وجبن

المقاهي مع اني مااحب القهاوي ولا اروحلها بس في شباب يتيمعون هناك بدال ما يتيمعون بالدوانيه ويسهرون حالهم حال غيرهم اسكرها الساعه 12 ليش يااخي خلوها لي صلاة الفير يردون يصلون وينامون بعد اجازه وتبونه ينام امبجر

بعض الناس قالوا لا القهاوي علشان المراهقين ... انا الي اعرفه ممنوع يقدمون الشيشه حق واحد اقل من 21 سنه .. خلوا المخالفه توصل لي 10 الاف دينار مع تسكير المحل وسحب الرخصه وسووها بواحد وانا بشوف قهوه يوطوطون فيها المراهقين السالفه جدا سهله

واحد يقول القهاوي يتيمعون فيها وايد وافدين ويحطون افلام خليعه وفي ناس يحششون وفي ناس يشربون ؟؟ طبعا انا لي الحين مو مصدق هالكلام ولكن بما ان الي نقل لي هالسالفه مدمن شيشه فانا مضطر اصدقه .. ايضا الحل سهل بما ان القهاوي اماكنها معروفه يااخي الداخليه تنشر المباحث فيها بعد ليش عندنا مباحث واي مقهى تصير فيه هالسوالف خالفوه وصكوه بغرامه تبرد الجبد وهم سحبوا ترخيصه والي يحشش والا يشرب تلوه المخفر وحاكموه بكل بساطه

الي يبي يسوي شي غلط يسويه لو بعز القايله وما وقفت على قهاوي والا غيرها وبالنسبه لازعاج السكان فانا اعتقد بأن هناك قانون يمنع وجود المقاهي بالاماكن المأهوله بالسكان يعني هم في قانون .. بالنهاية اي شي يمشي صح بتفعيل القوانين اما عقب الساعه 12 لا تاكل ولا تدخن ولا تطلع بالشارع ما ينفعش وراح يضر اكثر من ما راح ينفع.. وبعدين احنا مو عايشين بسجن

فرض الآراء والوصايا مرفوض ويخالف الدستور .. واساسا احنا ما نبيه .. ترى مو بكيفكم تمشونا سني كنت او شيعي .. السعوديه افتحوا جامعه مختلطه وانتوا تمنعونها وشالوا مفتي قال ان الاختلاط حرام .. وانتوا يالي موجودين بدولة مدنيه ناسين مشاكل البلد وتلهونا بتوافه الامور اشتغلوا والا طلعوا وفكونا

============================

-2-




=============================

-3-

جريدة الآن وما ادراك ما جريدة الآن

شكله البوست بيطول اليوم .. لا انكر ان هالجريدة نجحت نجاح منقطع النظير .. ولا انكر انها اختصرت الوقت بوضعها الاخبار المهمه والمقالات وايضا التحديث المستمر للاخبار .. وفي بدايتها كانت ممتازه الا انها اتجهت اتجاه معين وهذا لا اعترض عليه لان لهم مطلق الحريه بهذا وكنت بيوم بنتقد بعض المقالات الي يحطونها ولكني هونت لانها جريدتهم وكيفهم يحطون الي يبون مع انه لي الحين باط جبدي واحد مو مصدق انه شارب شاي مع الوزير وكاتب مقاله عنها واهم ناشرين المقال ماادري ليش

عموما .. بطوف سالفة التعليقات والانتقائيه بوضعها وبتحجى عن اخبار الجريدة اليوم .. ولاحظوا ان بس اليوم .. بس صج زودوها ولاحظت ثلاث شغلات

اول شغله حاطين خبر وفاة المرحوم عبدالفتاح البدر .. لحد الحين الخبر عادي .. بس الي ماهو عادي انهم حاطين اسامي المتهمين بسرقة الناقلات .. وأهم اسم مو موجود ؟؟؟ لا اعتقد ان هالاسم يسقط سهوا ولا اعتقد ان هالاسم ينسي .. فاشلون يا جريدة يا محترمه نسيتوا هالاسم ؟؟ يعني هل اقدر اربطها بوقوفها مع الاخ زايد الزيد والون تو الي بينكم ؟؟ والا الاشاعات الي قاعدين اطلعونها على الصقر ؟؟ والا شالموضوع ؟؟ عموما اتركم لكم التفكير بهالسالفه

ثاني شغله .. حاطين جدول مقابلات وزير الداخليه .. ورغم موقفي من وزير الداخليه الا ان هذا الجدول سري اشلون وصلكم وثاني شي هل يرضون احط جدول مقابلات الدكتور سعد بن طفله ؟؟ يعني الموضوع لا فيه تجاوزات ماليه ولا فيه قفز فوق القانون ليش ناشرينه ؟؟ يقابل الي يقابله انتوا شكو ؟؟

ثالث شغله .. تحت زاوية كلام وسوالف حاطين ماشي يا وزير الاعلام .. والعنوان امبين عليه صفة التهديد .. وشكاتبين داخل ان الي اخطأ احمق !!! ولا تعيدها مره ثانيه !!!!!!!!!!!!!!!!!؟

اولا حادثة زايد الزيد لم يتبين سببها الى الآن لذا هو غير ملزم بالتصريح واذا في ناس كتبوا وانا منهم قلت اذا وركزا على اذا كان الاعتداء سياسي وليس لعيون زايد انما لحرية الرأي التي نؤمن بها ... وبما ان الوزير وزير فمايصير يصرح على شي لي الحين ما يدري شسالفته .. فانتوا على اي اساس تحاسبونه ؟؟ وشهالتجبر والتكبر جنكم خذيتوا راحتكم وايد وقمتوا تهددون !!!؟ .. ورغم ان الوزير عجبني بالاول الا انه كسر بالكل واستنكر وهم مو عاجبكم .. للاسف يا وزير الاعلام انك رديت بكلامك

شغل البلطجه الاعلاميه الي قاعدين يسوونه مو صج .. يا تصير معاي او انت ضدي !!! وين قاعدين احنا كفايه المقالات الموجهه الي تحطونها والنفس العنصري الي يشمه الواحد من بعد ميل والناس ساكته هم تهددون ليش ما صرح علشان سالفة زايد ؟؟؟ شهالحجي .. وبس كفايه عليكم

==========================

-4-

وزير الاعلام صرح وقال ماني مستنكر سالفة زايد الزيد لانها اتصير حق اي مواطن وعقب استنكر .. وهم صرح وقال ان خطة ال 4 ملايين برميل تأجلت لي سنة 2030 والحمدلله اني ما قريت هالخبر الا سمعته بالاخبار باذني تالي رد بكلامه وقال لا احنا بنسويه 2020 وبنحافظ عليه لي 2030

سؤال وجيه للوزير شالسالفه تصرح وترد ؟؟ اذا كان في ضغوطات اكشفها واستقيل اما انك اتصرح واتقط الحجي بعدين ترد فيه وانت وزير هذا كلام ما يدش العقل يا وزيرالنفط والاعلام .. ومن كل مقابلاتك الي شفتها عرفت انك صريح وهذا شي انت تقوله .. فماهو سر تضارب التصريحات ؟؟ الصراحه راحه يا شيخ

=========================

-5-

س سؤال ليش تدرسون مسائي بالسعوديه ؟؟؟ ترى واضحه السالفه لا تعورون روسنا .. وكفو يا دكتوره استمري


وبس خلاص ... هابي ويك اند للجميع


اللهـــــــــــــــــــــــم لا اعتــــــــــــــــــــــــــــــــــراض

37 comments:

جبريت(عنيف سابقاً) said...

شي جميل شي جميل

التهديدات زادت من جريدة الان

بس ليش ما حطو المتهم الخامس؟؟؟مادري

المهم شيوخنا كلهم يردون بكلامهم مو بس العبدالله والخالد كلهم يوم لك ويوم عليك والي ندفع له نصفق له هذول حكومتنا

اما شباب الجامعه لي اكبرو بيصسيرون نفس الطاحوس يقولون عندنا مجاميع لووول

ونسيت باجي النقاط يا مهندسنا

عبدالرحمن said...

في الفقره الاولى اايدك فانا استغرب المحاباة والخجل في انتقاد الشيعه مع كل الاحترام لهم ولكن هم شخصيات سياسيه ليست معصومه بل هي من اكثر الاعضاء خوارة في الفتره الحاليه

اغلب اعضاء الشيعه غريبين باستثناء حسن جوهر

ولكن الغريب ان الكتاب والمدونين نادرا مايتطرقون بالنقد لهل اعضاء وهذا شي غريب



وبالنسبه لهايف مع مفتي الازهر استغرب كلامك !!!

لان رأي مفتي الازهر ليس بجديد لان اكبر اامه المسلمين لهم رأي مشابه ولم نسمع ان هايف زعل منهم لان كلام هايف عن مفتي الازهر ليس موضوع النقاب واجب ولا فرض

كلام هايف عن المفتي جاء لان المفتي استهزء وفرض على الطالبه خلع النقاب ووصفها بواوصاف غير لائقه

وكان من الاولى انك تنتقد شيخ الازهر لانك تطالب بالحريات فكيف تقف بصفه وهو يجبر فتاة على فعل مالا تريد ؟!!!

ام انه فقط لان هايف في الموضوع فانت ضده بزينه وشينه !!!

هايف في هذي طلع اكثر منك احتراما للحريات :)

Eng_Q8 said...

جبريت

شي رائع :)

سؤال جوهري

ممم

لووووول يسويها البخت

مو مشكله الكبر شين مع انك شباب

Eng_Q8 said...

عبدالرحمن

الكل موقع للانتقاد بغض النظر عن اي انتماءات اخرى لانهم كويتيين

اتمنى انك تقرا التصريح وتشوف ليش انتقده لانه انتقد الفتوى وليس ما فعله بالطالبه

واعتقدان محمد هايف عضو بمجل الامه الكويتي وليس مجلس الشعب المصري .. بس اصبح الامر عادي اذا اهم يتدخلون بامور فرنسا الداخليه

محور حديثي ليس الشيخ الازهر ولا همني شنو سوا ببساطه هناك في مصر من ينتقده

اذا هايف وقف مع شيء اراه حق سأقف معه واقرب مثال استجواب وزير الداخليه لذا فكلامك مردود عليه اخي العزيز :)

اتمنى ان يكون اكثر مني باحترام الحريات من بؤك لي باب السما

تحياتي :)

حسافتج يا كويت said...

اتصدق


بسميها جريدة الزيد


شدعوة واشتسوى علية تحويل القضية إلى سياسية

يمكن احد بيطقه على سالفة ثانية




وبعدين وزير الإعلام اثبت ضعفه بعد ما لحس كلامة

ZooZ "3grbgr" said...

اللي يصير شخصيه عامه
يتحمل الانتقادات اللي توجه له لي أخطأ

شيعي كان أو سني
وخصوصاً بمجلس الأمه

الحين لي رحت مطعم ما تبي الخدمة تكون زينه؟؟

دافع فلوس انت

خلاص

لازم يفهم كل نائب ان احنا كشعب وصلناهم لايماننا فيهم

طبعاً مع تحفظي على ديمقراطيتنا اللي تعرج

ينتقدونه بكل قوة

لكن بكل احترام لشخصه ولعايلته ولطائفته

يعني لما اقول انا أنـــتاي هايف مو معناها ضد السنة أو ضد السلف أو ضد المطران ... بس هايف حالة فقدت القدرة على التغير إلا إلى ما يشبه الأفغان !!!

على طاري الأفغان خل أروح أسير على مبيوق عنده استفتاء لمعشر المدونين



على فكرة

خوش بوست

:")

well_serviceman said...

قواك ربي مهندسنا ، كفيت ووفيت وبردت جبدي بكل اللي قلته ،

1-
المتأسلم لا مذهب له ، المتأسلم هو من يحاول التخفي وراء غطاء الإسلام لنشر أفكاره الغريبه وفرضها عالمجتمع ، فلايهم شيعي كان او سني او بهري او حتى "صوفي" اللي يحبهم هايف، بالنهايه المتأسلم انسان فاشل يعيش في دائرة انحصار فكري لا حدود له.

2-
ديره مافيها قانون شتبي منهم؟ الكبير قاعد يغلط ويخالف القانون عيني عينك ، تبي الصغير يخاف؟ يالله خل اشوف الحكومه تمسكهم وتطلعهم براءه عقب "يومين" وتقول انه حجي فاضي.

3-
جريدة الآن لا تختلف عن أي "بلوق" من البلوقات المتواجده عالنت ، هي صحيفة الكترونيه ، تصورها بلوق كبير يحمل 20 شخص ، وكل شخص يكتب ما يراه مناسبا ، وإن تعرض للنقد او للنفر ، تلقاه يستخدم كل اسلحة "التهديد" والكلام الفاضي ضده ، وهكذا تستمر الحياة ، ويمكن الإسم اللي سقط سهوا منهم ناطرين يمشيلهم جم شغله قبل لا يعملون تحديث حق الخبر!!!

4-
اهو بس وزير الإعلام؟ الدكتوره موضي قبل جم يوم قالت لا رجعه في قرار ايقاف المسائي بالسعوديه ، وعقبها بيوم قالت فيه استثناء حق بعض الأشخاص راح يعادلون لهم الصف ال12 ، وهكذا الأمر طبيعي مع وزرائنه الأفاضل!

5-
من زمان المفروض م و توه ، المفروض الثانويات قبل الجامعات ، والمفروض تدري شنو بعد؟ المفروض الدكتوره تستفيق شوي وتوقف جامعات مصر نهائي ، بدون استثناء اللي مازالو مقيدين اهناك ، ولا عزاء لهم ولا لأهاليهم اللي ادفعوا "رشاوي" حق الدكاترته ، وسلملي عالتعليم!

هابي ويك اند يبا وريح بالك :)

أحمد الحيدر said...

مساء الورد :)

فيصل الدويسان بصراحة زين سوى فيه محمد هايف .. مجرد ما أخذ باقتراحه هزأه بذكاء وقال شوفوه رد بكلامه ومتناقض .. والجرايد نشرت الموضوعين بنفس العدد هه :)

بالنسبة للقهاوي أخوي يشكي ويسأل : إذا مباراة برشلونة وريال مدريد اللي تعوضني شوي عن خسايري وتفول فيها القهوة تبدا 12 .. بأي منطق تجبروني أصكر يا اذكيا ؟

أما اللباس البحري الشرعي فخلهم يقولون اللي يقولونه .. بس لا يصيرون نفس وزير الداخلية يحليله لما قال شواطيء الكويت مافيها بكيني :)
وللعلم أتكلم عن شواطيء حكومية ومافيها بو قطعة كله بو قطعتين .. صباح الخير يا سعادة الوزير :)

وطلبة المدارس السعودية المسائية لا تشين النية ;p

وشنو نسيت بعد ؟

مادري بس تحياتي :))

بو ذياب said...

عجبني موضوع الزيد وعلقت بموقع الجريدة نفسة ان الزيد مو روبن هود وشنو محد انطق غيره وعلى فكرة للحين مابين الدافع من وراء عملية الاعتداء ... وتلاحظ ياخوي ان موقع الان يحاول اثارة التعرات الطائفية والعنصرية لكسب اكبر قدر من القراء على حساب الوحدة الوطنية وطبعا الكثير من الناس تمشيهم كلمة كاتب وراي محلل ومأجرين عقولهم شقق مفروشة

المقوع الشرقي said...
This comment has been removed by the author.
Enter-Q8 said...

يا جماعة ما حطوا المتهم لانه


بــــــراعـــة


عفوا
بـــراءه

أبو الدســتور said...

كل فقرة كتبتها يبيلها بوست بروحه
القهوة وآخ من القهوة
وزير اعلامنا وآخ من وزير اعلامنا

المقوع الشرقي said...

عفوا
مسحت التعليق لاصلح
النقطة اللي قصدتها -2
مو -3
الاخ الشمري
رئيس لجنة شمر
تلاحقوا على هالصغار
بقانون يجرم
ولا القطو العود ما يتربى
مهما تخفى
للاسف

هالحـــــزة said...

دمت ودام تحلطمك ..

moodart.net said...

اقتبس :
"
فرض الآراء والوصايا مرفوض ويخالف الدستور .. واساسا احنا ما نبيه .."

اعلم ان الاسلام احد مصادر التشريع

"احنا ما نبيه"
هناك شريحة كبيره ترفض ان تنضم تحت صيغة الجمع هذه

لذا افضل ان تبين من انتم
او تختصر لتقول انا ما ابية

Anonymous said...

من طلب العلا سهر الليالي مع الشيشة

تجمع أبناؤك الطلبة الدارسين مسائي بالسعودية

: )

Anonymous said...

المتأسلمين متأسلمين بجميع الانواع ... الشيعة مسووين روحهم أقلية مظلومة و السنة مسويين روحهم بس هم الوطنيين و البدو سنة و شيعة مسويين روحهم فقارة مساجين و الحضر سنة و شيعة خايفيين على فلوسهم من الهيلق

نحن نعاني من أزمة قيم انسانية و ليس دينية أو خلافه !!!

Addictioneer said...

المطاعم والقهاوي يتصكرون نص الليل
هذا يذكرني باهلي لما ينوموني غصب ايام ما كنت ياهل
===================================
لووووول فرعية جامعية
اذا الكبار يسوون فرعية
لا تستغرب هالشي من اليهال.... مع احترامي للطالب الاكاديمي اللي صار شكله مثل زائرين المارينا مول
===================================
مسائي خير يالسعودية
ضحكوني اكثر
احلى درجات كاملة باعمال السنة وسلملي عالسعودية وقت الامتحانات النهائية

أهل شرق said...

1- طلقها واخذ اخنها ،، الله يلعن الثنتين

2- وراثه

3- كلِ يدني النار صوب قرصه

4- و احد مايقدر يشتري سراويله ،، مادري شلون يدير وزارة بحجم النفط

5- موضي الحمود شمعة المرحلة القادمة

someone_q8 said...

السلام عليكم :)

يبيله عصير ليمون بالنعناع بااااااارد , عشان اتروء بدل لوية الدخان اللي مالية المدونة :)
طول بالك ياخوي :)

Anonymous said...

http://www.youtube.com/watch?v=puLqMK_CfG8

"الجبهة الشعبية لمكافحة الجمبزة"

Eng_Q8 said...

حسافتج

يمكن

اثبت وبجداره بعد

Eng_Q8 said...

زووز

صحيح

يسلم بؤك

حياج

ميرسو :)

Eng_Q8 said...

ويلي

يقويك

1 عدل

2 تمسكهم على شنو يبا تشاوريه اشفيك

3 وجهة نظر

4 مو منها من الي سل سيفه

5 اللله يسلمك

Eng_Q8 said...

بو كوثر

بونجورنو :p

كله سيم سيم

اي والله اذا المباراة الساعه 12 اشلون

انا ما شفت بصراحه

حياك :)

Eng_Q8 said...

بو ذياب

للاسف كلامك فيه جزء كبير من الصحه

بس شنقول خلها على ربك

Eng_Q8 said...

انتر

لا يبا مو براءه اي دليل يطلع تنعاد المحاكمه

Eng_Q8 said...

الدستور

شسوي قلبه متروسه

Eng_Q8 said...

المقوع

اي والله

Eng_Q8 said...

هالحزه

شووكراان

Eng_Q8 said...

مودارت

وهناك شريحه اكبر تنضم تحت صفة الجمع

نحن اهل الكويت الغير مسيسين دينيا

انت تفضل وانا اكتب وانا اعرف ماذا اكتب

تحياتي

Eng_Q8 said...

انيموس

اي والله صاج والا راح البحرين

Eng_Q8 said...

انيموس

اي والله نعاني

Eng_Q8 said...

اديكشونير

بالزبط

---

اللهم لا اعتراض

---

الله يسلمك :)

Eng_Q8 said...

شرقاوي

لووووول

Eng_Q8 said...

انسان كويتي

وعليكم السلام والرحمه هلا باخيي

زين الدخان زين لا تتحلطم :p

Eng_Q8 said...

انيموس

ما اعجبتني :)