صباحي الجميل

بما ان اليوم اجازه نمت نومه هنيه تكفي ميه ... يازين النوم ... المهم لما قعدت بديت صباحي الجميل طبعا كالعاده بقهوتي وزقارتي وجرايدي المهم بشراكم فيه

Chapter 1

جيكت على التلفون والا 3 مس كول الساعه 5 الفير ؟؟ يالله سترك شالسافه انشالله خير رقم غريب والساعه 5 الفير لا 3 مس كول اخاف احد فيه شي المهم دقيت والا اغنية راشد الماجد ؟؟؟ هاا منو هذا الي حاط اغنيه بتلفونه اشفيهم خاروها الشباب ؟؟

محد رد ؟ قلت اكيد غلطانين فعطيته طاف .... شوي والا داق ؟؟ ها منو هذا ؟؟ جان ارد بصوتي الحلو الي ما يخرع لما اقعد من النوم ... نعم ... الا جك بويهي ... يا ربي شهالسوالف القديمه دقيت .. والا مغلق ؟؟؟ شنو قاعدين نلعب لبيده؟

شوي والا دق دقه وسدوه ... رديت دقيت ... الو نعم منو ؟؟ والا وحده الو قوه .. انا هلا نعم منو بغيتي يبا ؟ ... اهي لا والله شكلي غلطانه اسفه ؟؟.... انا لا يبا عادي حياج .... سديته وانا واصل حدي ليش الازعاج انزين غلطانه ادقين هالكثر رقمي ما يتشيير ... وبعدين تغلطين دزي مسج من الاول وقولي غلطانه ليش هالعذاب ... بس الواحد شيقول الا جليلين الحيا وايد هالايام والله يرحمك يالنفيسي

Chapter 2

خلصنا من هالسالفه المليقه وبديت اقرى الجرايد والا بأول صفحه بجريدتي الحبيبه القبس 300 مليون دولار من الكويت للسلطه الفلسطينيه يالله صباح خير 300 مليووون وحق السلطه الفلسطينيه؟؟؟؟ اي سلطه فيهم ؟؟ لا وعشان وحده الشعب الفلسطيني ؟؟؟ اذا اهم بينهم حرب ضروس و نعطينهم فلوس بعد ومنو السلطه وشراح تسوي فيها ؟؟ كالعاده حقهم يفسفسون فيها ويشترون سلاح ويذبحون بعض

انا عاد قايل من زمان ماراح اتحجى عن فلسطين ... لاسباب منها اني لم ولن انسى ما فعلوه بديرتنا الغاليه وماراح انسى ابناء وطني الي اذبحوهم وفتنوا عليهم ولا راح انسى علم الكويت الي كل مره حارقينه .. فوطني قبل الجميع

فهل نسيت الحكومه ما فعلوه بنا ؟؟؟ 300 مليووون يا جماعه ترى وايد والله واهني الناس تبي الزيادات

المهم بشاره للكويتيين عين عذاري انتقلت من البحرين لي الكويت

Chapter 3

تجنيس 686 شخصا ... اوكي جنسوا المستحقين مو تجنسون لي مغني والا ممثل والا كومار ... نعم هناك من يستحق ولكن فلتكن الجنسيه لمن يستحقها فقط ... ولا تحطون ابناء الكويتيات بين الباجي ... الله يستر من الاسامي الي بتطلع

نحن مع المستحق وضد الغير مستحق والله ما وراء القصد

Chapter 4

غني لطفلك يصبح اكثر ذكاء .. موضوع بصفحه البانوراما

اتوقع لو يشوفه العضو المغوار صاحب العقل الجبار والغارق بالبحار وليد الطبطبائي بتصير فيه سكته قلبيه اشلون اغناء يخلي الطفل اذكى ... هذا غير الفتاوي الي بتطلع علينا

العلماء الي اكتشفوا هالشي لو يدرون ان عندنا بالكويت بعض المدارس تمنع السلام الوطني بالطابور .. وهناك توجهات لاغلاق شعب التربيه الموسيقيه .. وان الغناء والموسيقى حراااام ... راح يقولون ان كل اطفال الكويت راح يصيرون اغبياء

Chapter 5

جريدة الراي العام ... العمير : لو طبقنا شرع الله لالقينا بمجرمي حادثه العارضيه من اعلى برج التحرير ؟؟؟؟؟

استغفر الله ... شنو هالتلاعب شنو شرع الله تقطه من فوق اي شرع هذا ؟؟؟ نعم نحن مع الاعدام بس شرع الله يقول حذفوهم من فوق ؟؟؟؟ ممكن واحد يقولي هذا تعبير مجازي يحل محل الاعدام ... لكن يالحبيب مايصير تحط شرع الله وتقول جذي ترى ما يصيييير ؟؟؟ ويبون شريعه اسلاميه بعد ... عااااادي باجر يقولولك الي يدخن نشب راسه عشان لا يدخن بشرع الله ... انزين واذا كان اصلع .. توضع له باروكه ... استغفر الله هناك خطوط حمراء ايها المتأسلمون فلا تتعدونها جزاكم الله خير

Chapter 6

سريع يرد على المرزوق و المرزوق يرد على سريع والغانم يبي طلال الفهد والفهد معطيهم طااف .... لي متى يعني تكفون لي متى اتقطون الاتهامات على بعض هذا فداوي وهذا ولد بطنها وهذا معزبي وهذا ماادري شنو

ترى زهقناااااا والله زهقنااااا رفقا بنا يا ناااااااااااااس الكويت المركز 119 عالميا العموم سابقنا وانتوا لي الحين على هالسوالف ... يبا ردولنا هيبتنا ردوا الدوري مثل قبل ..... لحظه لحظه اكوووو دوله بالعاااااااالم تلعب فصاااال ؟؟؟؟ شنو دوري براحات ؟؟؟؟ كل يوم يتعادلون ويلعبون فصال اي لي متىىىى شنو هالسياسه الغبيه ؟؟؟؟؟ البلنتيات ليش اخترعوووهاااا ليييييييييش احد يفهمني ... وهذيل طايحيله مناظرات والله قهر والله عيييب صارت عقدتنا البحرييييين يا جماعه الهند فازوا علييينا وانتوا قاعدين تتهاوشون

المشكله ولا واحد فيهم لاعب كره لا واليوم خالد سريع صايرلي المذكوور قاعد يصحح الاحاديث حق المرزوق

مااقول الا الله يرحم الرياضيين الشرفاء

.

.

.

بس ماني مكمل طقت جبدي.. هذا ما اعانيه كل صباح هذا بصوب وجريدة عالم اليوم والوطن بصوب ... الحمدلله ان مافي جرايد بالعيد على الاقل الواحد لما يقوم الصبح مافي شي يعكر مزاجه ... وسوف يستمر صباحي الجميل بعد العيد .. بعد لازم المواطن يقوم من النوم ويضيق خلقه والا انت مو بالكويت

.

.

اللهم لا اعتراض

.

.

كل عام وانتوا بخير وعساكم من عواده انشالله

والي صايم انقوله تقبل الله و الي حاج منهم اخونا فريج سعود انقوله حج مبرور وذنب مغفور

واسف اني ظيقت خلقكم :))))