Friday, December 28, 2007

لاجل الكويت

ابي ابدا اليوم بخالد العبدالجليل
تكلم الريال اليوم عن موضوع شدني بصراحه ... طبعا البرنامج شفته بالغلط وانا بالدوانيه وقاعد احوس بين هالقنوات ومع اني ما اتابع البرنامج بس قلت خل اشوفه وايد نسمع عن برنامجه او فقرته بقناتي الحبيبه الي اموت فيها وبصاحبها الوثن اقصد الوطن
تكلم عن شهداء الواجب بالكويت عسى الله يرحمهم جميعا ويسكنهم فسيح جناته ... يا جماعه صح كلامه الحين العباره الي اغرقت واهي رايحه مصر عطيوتوا اهل الغرقانين بلاوي وهذيل عيال ديرتكم عطيتوهم طااف ؟؟؟؟؟ والله حراااام والله عيب يا ناس هذيل عيال الديره وماتوا من اخطاء عسكريه وما تكرمون اهلهم حسسوهم انكم مهتمين بعيال الديره ... اي ليش لا .. ليش ما تعطونهم فلوس يستاهلون .. ليش ما تسمون اماكن بالديره باسمهم هم يستاهلون
بس عين عذاري اشلون صايره ؟؟؟؟؟؟
انا تعاطفت مع الريال قلت مسيكين حرام شابين عليه وايد احنا .... جان يخوره الحبيب وحطلي واحد يقول مرتي طقتني ؟؟؟؟ شنو هالاعلام الرديء كل هذا عشان تجذب الناس حق القناة... قلنا صج ما علينا اخر شي حاطلنا فيديو يقول واصلي ماادري الحبيب مدير المباحث شنو واصلي ؟؟؟ المهم والا ريال يكلم مرته ويدزها شوي جان تلحقه بالنعال واهو ينحاش
ترى اشكرررررررررررره جذب مو جذي اللعب على عقول المشاهدين ... وبعدين عيب تكشف قضايا الناس الي عندك وين شرف المهنه ؟؟؟؟ المهم طاح من عيني مره ثانيه واهو طايح من زماااان
========================================================
موضوعي اليوم يمكن ماراح يعجب الكل بس بكتبه
ليش تكتب بالبلوق ؟؟؟
سؤال ابي كل واحد يساله حق روحه.... انا ليش اكتب ؟؟ وشنو الي بوصله؟؟؟
هناك اشخاص يكتبون لمجرد الكتابه ... وهناك اشخاص يكتبون قصصهم وهناك اشخاص يكتبون ما يملى عليهم من اشخاص وهناك وهناك وهناك .. هم كثر وهناك العديد من الاسباب لهذه الكتابه .. ومن بعض الردود هنا ومن بعض المواضيع ارى ان الاغلبيه العظمى متالمون لوضع البلاد وتهمهم مصلحتها وهم يتحسرون على الاوضاع التي تجعل الكويت تنحدر بكافة المستويات
اخي العزيز اختي العزيزه ... اتمنى ان تخصصوا ولو موضوع واحد لاجل الكويت لست هنا لاني اريد الجميع ان يصبح سياسيا ولا اريد ان يفهمني البعض بطريقه خاطئه
اعلم ان الجميع يواجه مشكله او يرى اخطاء تحدث سواء بمكان عمله او يسمع عنها او يراها باي مكان
وبما اننا مطالبون لرد الدين لهذه الارض الطيبه .. فاني اتمنى من كل كويتي يعشق هذه الارض الطيبه بان يخصص يوما لكتابه مشكله حصلت او اخطاء رآها على ارض الواقع ... فنحن ايها الاخواه مطالبون بان نعارض الخطأ ونصفق للحق
يا جماعه الكل لازم يصلح الي حواليه حتى لو بادارته بالشغل او بالبيت او الديوانيه لازم الواحد يكون فعال بالمجتمع
ترى لو الكل سوه جذي راح تنحل مشاكل وايده بالديره فالاصلاح ليس مقتصر على الحكومه او الاعضاء او اي احد
حتى احنا لازم نصلح وانقول للغلط لا ... وبكاتاباتكم راح اتوعونا اكثر وراح انعرف الاشياء الي قاعده اتصير واحنا م
اندري عنها لابد من وقفه ولابد ان الكل يكتب ويقول .... في ناس قاعد استفيد منهم اشياء وايد ومو عيب ان الواحد يتعلم
ويعلم العيب ان الكل يسكت ويخلي القرعى ترعى... وفي اشياء ما ندري عنها لازم انعرفها
امنيه اتمناها تكون في كل بلوق ويعطيكم العافيه
ومن هنا اشكر كل الذين يكتبون لاجل هذه الارض ويعطيهم العافيه بدون ذكر اسامي عشان لحد يزعل :) والسلام ختام
.
اللهم لا اعتراض

38 comments:

5roofa said...

انا اول رد :P

اول شي يعطيك العافيه على الموضوع و يسلم ايدك

على البرنامج والله سمعت عن هذا الي مرته اطقه لوول استغفر الله شر البليه ما يضحك
بس ماصدقت يعني منصج اطقه؟
و على التلفزيون و وين حاطين الكامرات؟
مادري صعبه شوي
الله يستر عليهم بس

و سؤالك
تدري ما كنت اكتب و ماكنت ادري انه لي قدره اني اكتب الا لمه دشيت البلوق

و الصج في اشياء ماقدر اقولها للناس او يعني ويه بويه و احس منفذي الوحيد البلوق

تامر امر افا عليكم البوست الياي وعد مني لك عن مشكله من مشاكل المدرسه
ولا يصير خاطرك الا طيب

thansk 3ala el mawtho3

salamz dear friend...

Eng_Q8 said...

5aroofa

الله يعافيج والله يسلمج

والله اذا صج فهذي مصيبه والمشكله طالع يتكلم فيها واذا مو صج فالمصيبه اعظم لانهم يتلاعبون بمشاعر الناس

شي زين ان البلوق ينمي المواهب :)

بعد قلبي ما يامر عليج عدو مشكوره

العفو

سلامز :)

Selezya said...

ويعطيك العافيه وابشر ماطلبت شي :) جم كويت عندنا ؟ وحده بس والله يخليها لنا

:)

Eng_Q8 said...

سيليزيا

الله يعافيج

كفو هذا العشم

bass said...

مهندسنا

قناةالوطن شر الله في أرض الله يس ما عليك محد يتكلم عنها من المتاسلميين !؟
اما عن المحامي العبدالجليل ما احترمة و لا احبة بس لا تستغرب كل الاحتمالات موجودة دنيا والي يعيش يشوف :)

اكتب من حر ما في اليوف و انت ملاحظ كل
كل مواضيعي سياسية وتتكلم عن الوقع الي نعيشة هالايام

دمت بخير

الخيلاء said...

امم خالد عبدالجليل الصراحه فقره فكاهيه.. و اهو قاعد يستغل المهنه اسوء استغلال .. و نسى انه قسم و انه هذي اسرار ناس مايحق له ينشرها

اما عن الكتابه بالبلوق .. فا اهو مذكره نكتب فيها الي بخاطرنا .. و خلك متابع .. اكيد القادم بيكون في شي للكويت :)

marshmallows said...

خالد العبدالجليل يبيله من يقوله انت اول شي شوف اشسويتو انت و مرتك قبل و بعدين تعال تكلم يعني الي بيته من زجاج لا يرمي الناس بحجر

و بالنسبه للموضوع الثاني انشالله راح اكتب =)

بعثرة مشاعر said...

شي حلو ان الواحد يشجع على هالشي

و ديرتنا مالنا غناة عنها

و حبها يجري بدمنا

مشكور و ان شالله يكون لنا بوست عن الكويت و اللي يهمها

يعطيك العافيه

هذيان said...

تسلم إيديك على هذا الموضوع بالفعل نحتاج العمل لأجل الكويت ... فأن أستطاع كل شخص تنمية هذا الشعور بداخله قد نصل إلي ما نسبناه إلي أنفسنا الأصلاح ....؟؟
الله يبارك فيك

strawberry said...

awal shay mashkooor 3ala ur post
ana ga3da ashooooof elprogram now 3ala elwatan 3aoraw galby :(((
o0 mthel ma gelt ksar fena loool o0 7a6 wa7da tl7ag wa7ed...elmafrooo`9 a7ad shroo6 mhnta ena lazem ma yt7cha bhal2ashya2 esma mo7amy so malah 7ag yf`9a7 elnas bas elwa7ed shgool .....
---------------------
alshohda2...

1-5aled fhad el3ajmy 3omra 18 sena..
2-mshari msh3an el3azmy...
3-d3ej 93afg el-rkeby....

ena llah we ena elha raj3on
allah yr7amhom enshallah bra7mta

-------------------------------
ama 3an elp0st..
ana wa7da 3endy waid mowa`9e3 wedy a7ad ysharkny feha o0 y7elha m3ay sowa2" kant wa6anya or sha59ya yemken btafkerkoom tlagoon 7lool hatha elly 5alany ashark n plogger
--------
thanxe walla 3 n 1 :) 3 mowa`9e3 n 1 post ya36ek el3afya...
--------
anyway el-mama ga3da yamy o0 gart elly enta ktabtah ...
tgol lek etha ba`3et t7e6 laha elt8arer 3a6ha 5abr gablha 3ashan tzaheb joehatha loool ya3ny she wanna make a tea ;p~~~~

strawberry said...

7abet a`9ef sha`3la
ana lama rakzt 3ala 7al8at 3abd eljlel ohowa gal fy bdayat el7al8a ena mao`9oo3a 3an el8a`9aya o0 3an elmara elly la7ga raylha bn3al 7ashakoom so gal gabel la asolf 3an halshay ... 7ab agol shay ygarg3 bgalby o0 tkalm 3an elshohda2 then gal nerja3 7ag mao`9oo3na el2sasy elly ohowa 8e9at elrajel wel7tha2 elsa7er;p...

o0 shkrn ;pp

adry t7al6mt waid :/

صبا said...

المهم والا ريال يكلم مرته ويدزها شوي جان تلحقه بالنعال واهو ينحاش

من صجك !!!!
الله يهدي استاذ خالد

حده كوميدي
حسافه ؛ اتصدق عادامس قاعده اتابع
البرنامج ولسبب طارئ قمت !! حسااافه

حلقه اتفشل ذكرتني بحلقات رمضان

بالنسبه لموضوع امي الغاليه الكويت
تستاهل كل خير؛؛ابشر

العرزالــــــه said...

معك قلبا وقالبا بخصوص البوستات حق الكويت

هذا المطلوب

نفيد ونستفيد

الثائر said...

الحمدالله ادري ان العبد الجليل

نصااااااااااااااااااب

المهم ليش نكتب

ممممممممم انا عن نفسي اتحالطم على الي قاعد يصير


وايد شغلات غلط بالديره
وجذي

Eng_Q8 said...

bass

صحيح صحيح :)
اي والله يشوف

الكلام كان مو شاملج يا اختي العزيزه :))
شهادتي فيج مجروحه لكن انتي من افضل من يكتب باسلوب جميل وبتبسيط شديد للفكره
وسلامت يوفج من الحره

وياج :)

-----------------------------------

الخيلاء

للاسف شرف المهنه اصبح يشترى بالمال

اكيد بتابع يعطيج العافيه :)

-----------------------------------
marshmallows

باب النجار مخلع

هذا العشم :)

-----------------------------------

بعثرة مشاعر

العفو ويعطيج العافيه

-----------------------------------
هذيان

الله يسلمج من الشر

صحيح
مشكوره اختي

-----------------------------------

strawberry

العفو
عدل

الله يرحمهم جميها

هدف نبيل وجميل للكتابه :)

العفو

يحليلها عسى الله يطول بعمرها

لوووووووووووووووووول اتصدقين طافتني يعني موضوع الشهداء مو اساسي مالت على الباميه

يبا اخذي راحتج تحلطمي كثر ما تقدرين البلوق بلوقج
ودام خالتي معاج اخذي البلوق بالي فيه :))

-----------------------------------

صبا

بصراحه هذا مو كفو واحد يقول عنه استاذ
تستاهلين الطيب كفو والله

-----------------------------------

العرزاله

نورت المدونه

عدل كلامك نفيد ونستفيد

-----------------------------------
m6rb_7nboli

منو ما يدري عنه :))

تحلطم ترى التحلطم ينفع هالايام

شكرا لمرورك حبيبي

===================================

strawberry said...

thanxe wllah men 6e a9lek kelk thooooo8

strawberry said...

6e=6eb

strawberry said...

ahha ngarer yeah fahmt 5ala9 tgol lek meta ma 9edt yebah lha el6baaa5 3aleha ma3a el7asho o0 eltamer o0 ellben o0 ba3dha elchay ;pp ana ye3t loool

Eng_Q8 said...

strawberry

حياج :))

مفهومه :))

قوليلها موجودين بالثلاجه
شهتني والله ... شكلي بتغدا عندكم كل يوم :)

strawberry said...

looool
7ayak wallah elbet betk kel yom .. yom o tark..kel dgega..any time bas gablha gol shno btt`3ada ;)

Eng_Q8 said...

strawberry

شكرا :)) اخجلتي تواضعي

الله يطول بعمر الوالده وقوليلها غداج واصل

strawberry said...

;) u ask nthg

walaw

سدرة العشـــاق said...

اللي بيته من زجاج ما يرمي الناس بحذر

يعيبوا على الناس و العيب فيهم

هذي الأمثال تنطبق على المحامي الشريف الأمين خالد العبدالجليل
-------

تامر أمر شنو عندنا غير ديرتنا راس مالنا اهي
تذكرت أغنية رباب اللي عن الأم

Eng.S said...

صديقي

فكرة البوست الأسبوعي هو اقل ما نقدمه للكويت
الكل عارف مدى صدى المدونات و تأثيرها في المجتمع الأن
مانحتاجة هو التنسيق و التشجيع فيما بيننا لتطوير استخدامنا للمدونة من مجرد وسيلة للتنفيس الى اداة لتغيير ما حولنا
و الكويت اكيد تستاهل
____
شكري لك قد يكون ماصخ هنا .. لكني اجد نفسي مضطر لشكرك على هذة البادرة الجميلة ;)


*
يخرب بيته على جذي افكار! مراه لاحقة ريلها بزنوبة !!!
انا اطالب قناة فنون بضمه لفريق فلاشات فنون
الريال creative

Someday said...

For your first part!
That man was being followed by my kid bro for laughs!!! Ay shay!!! O hatha eslob wa7ed educated la o ba3ad lawyer!!??!?! El sharhah 3la ely y’7aloona ye6la3 on air

About the other part,
O ana wedy b3d sha’3lah!!! Wedy if any one came a cross a good person, some one honest and doing his full duties to acknowledge them and tell about them!!! so we’d know for a fact that there are others out there who are still made of gold!!

Eng_Q8 said...

strawberry

Thanx :)

-----------------------------------

سدرة العشاق

اي والله تنطبق عليه

ما يامر عليج عدو

-----------------------------------
Eng.S

صديقي

الله يكتب الي فيه الخير والكويت اكيد تستاهل
كل شي منك حلو ماكو شي ماصخ :)) العفو

اتصدقاحلى ثنائي مع مصطفى فنون
-----------------------------------

Someday

لووووووووووووووووووووووووووول
اي والله الشرهه عليهم

هم فكره حلوه انشالله ولي الحين في ناس معدنهم اصيل بالديره ويستاهلون رفع القبعه ولا يهمج :)

===================================

darkness said...

مساك الله بالخير اخوي المهندس

يحليلة المحامي خالد مبدع

وايد عنده خيال

لو يالف له جم مسلسل هيلق عشان ينافس الهلاقة الموجوده حاليا وايد ابرك له

و خل يترك القانون لاهله

بعرف اهو بس ليش يتكلم مثل العجيز؟؟

اما بالنسبه للموضوع فالفكره راقيه جدا

و الاحلى لو تكون كلنا بيوم واحد بالاسبوع

يعني نتفق ان مثلا كل يوم اثنين كلنا ننزل مواضيع عن الكويت

:)

حلو تصير

كل البلوقات

:)

وايد حبيت الفكره انا

يعطيك العافيه يا اخوي

darkness said...

مساك الله بالخير اخوي المهندس

يحليلة المحامي خالد مبدع

وايد عنده خيال

لو يالف له جم مسلسل هيلق عشان ينافس الهلاقة الموجوده حاليا وايد ابرك له

و خل يترك القانون لاهله

بعرف اهو بس ليش يتكلم مثل العجيز؟؟

اما بالنسبه للموضوع فالفكره راقيه جدا

و الاحلى لو تكون كلنا بيوم واحد بالاسبوع

يعني نتفق ان مثلا كل يوم اثنين كلنا ننزل مواضيع عن الكويت

:)

حلو تصير

كل البلوقات

:)

وايد حبيت الفكره انا

يعطيك العافيه يا اخوي

someone_q8 said...

السلام عليكم
الله يعطيك العافية على هالكلام الطيب
المشكلة ان العيب فينا احنا مو باللي حوالينا
لو كل واحد حط جدامه هدف وسعى لهذا الهدف وهو رفع اسم الكويت بالعمل وليس بالكلام احنا بخير
لك مني كل تحية واحترام

Q8Disaster said...

يعطييك العافيه

هذا لو عنده شرف مهنة المحامات جان ماطلع فضايح موكلينه

والله بالله عليك عمرك شفت واحد يرضى على نفسه يقول مرته طقته؟؟؟

اشوه ماعندياها القناة ولا ابي اشوفها

-------------
والله شوف بصراحه بالبلوق سويته لأني ابي مساحه اكتب الي بنفسي جربت اكتب بجريدة وكانت عن مواضيع طلابيه ولكن للأسف موضوعين نزلتهم على جريدة الوطن قبل اربع اسنين

الي اشوفه البلوق اريح تقدر تعدل وتضيف
يعني الغلط يتصلح اما بالجريده لا
--
ومااعتقد يامهندسنا الكريم ان في مدونه كويتيه ماتكلمت لو مره عن الكويت

وانشالله مانسكت الغلط بنقول هذا غلط وبنحاول نصلح الغلط
وشكراً

Eng_Q8 said...

darkness

مساج الله بالنور

اي والله ممكن يفوز بالمركز الاول عليهم باوسكار احمد الفهد :))
وصح انا لاحظته يتحجى جنه يدتي الله يرحمها

مشكوره بس يوم بالاسبوع يمكمن صعبه عليهم ما تقدرين تلزمين احد اهو بوست وباي يوم المهم يفيدنا ويستفيد بعد

يعطيج العافيه

-----------------------------------

someone_q8

هلا وغلا ولكم باك الحمدلله على السلامه اخوي كويتي
الله يعافيك
كلنا جدامنا الهدف هذا انشالله وترى معرفة الاخطاء والتجاوزات وغيره هم تنفعنا للعلم بالشيء
وشكرا

-----------------------------------

Q8Disaster

الله يعافيك

اي والله صاج واحسنلك لا تشوفها

دام بالوطن زين ما كملت :)))

للاسف في وايد وانا اهني ادعوهم ماادعو الي يكتبون من الاول

انشالله

يعطيك العافيه

===================================

bo rashed said...

ابي اعطيك نبذه صغيره عن خالد عبدالجليل يا عزيزي

اول اعماله كان بتلفزيون الكويت الامن والمواطن وكان ضابط بالداخلية وتسرح من الخدمه بقضية خمر وهيك قناة يلبألا هيك مقدم

تحياتي والسلام ختام

Eng_Q8 said...

بو راشد


ادري :))

وشكرا للمعلومه :))

فتى الجبل said...

العبدالجليل تخصص تجار مخدرات يا عزيزي
أما المواضيع فآنا أؤيد ان كل واحد يكتب الموضوع اللي يناسبه ويناسب قدراته
آنا مثلا مالي بالشعر فماعرف أكتب بالشعر
غيري يمكن مايحب السياسة فمن حقه انه ما يكتب بالسياسة

Eng_Q8 said...

فتى الجبل

اي والله صاج

مو سياسه ياخوي

مشكله صارت جدامه اي شي غلط هذي مو سياسه عسى الله يطولي بعمرك

Salah said...

كلامك عدل

والكويت تستاهل

واحنا ليش قاعد نتحلطم ليل نهار، موعلشان الكويت؟!

بالنسبة لقناة الوطن،،، الحمد لله ما تطلع عندنا

تحياتي

Eng_Q8 said...

Salah

صحيح كلنا نعمل لاجل الوطن

احسنلك

شكرا على المرور :)

bo rashed said...

كل عام وانت بخير وانشالله تكون سنة خير