كويتيين !!!

اول شي مبروك الجنسيه للمستحقين فعليا لها

ولكن على اي اساس خذوا الباجي الجنسيه ؟؟؟؟؟؟

يا جماعه امبين من الاسم ... واضحه وضوح الشمس في كبد السماااء .... اقروا الاسامي وراح اتعرفون ليش صعب

انهم يصيرون كويتيين ... خلوا هذا على صوب بس ابيكم تقرون الماده الي استند عليها القانون اوكي

الماده الخامسه

يجوز منح الجنسيه الكويتيه بمرسوم بناء على عرض وزير الداخليه لمن يأتي

أولا : من أدى للبلاد خدمات جليلة

.ثانيا : المولود من أم كويتية ، المحافظ على الإقامة فيها حتى بلوغه سن الرشد إذا كان أبوه الأجنبي قد طلق أمه طلاقا بائنا أو توفي عنها ، ويجوز بقرار من وزير الداخلية معاملة القصر ممن تتوافر فيهم هذه الشروط معاملة الكويتيين لحين بلوغهم سن الرشد .

ثالثا : العربي المنتمي إلى بلد عربي ، إذا كان قد أقام في الكويت قبل سنة 1945م وحافظ على الإقامة فيها حتى صدور المرسوم بمنحه الجنسية .

رابعا : غير العربي إذا كان قد أقام في الكويت قبل سنة 1930م وحافظ على الإقامة فيها حتى صدور المرسوم بمنحه الجنسية . وتعتبر إقامة الأصول مكملة لإقامة الفروع في حكم البندين (ثالثا ورابعا) من هذه المادة بشرط أن يكون الفرع مولودا في الكويت ومقيما بها ويكون إثبات الإقامة وفقا للإجراءات المنصوص عليها في المادة (21) من هذا القانون ، على أن يصدر قرار من مجلس الوزراء بتحديد العدد الذي يجوز منحه الجنسية كل سنة بالتطبيق لأحكام هذين البندين . ويشترط للحصول على الجنسية طبقا لأحكام هذه المادة أن تتوافر في طالب الجنسية الشروط المنصوص عليها في البندين (2و3) من المادة السابقة "

الحين القرار الي صار بالتجنيس كان وفق الماده الثالثه الي حصلوا عليها 556 شخص والماده الاولى الي حصل بموجبها هلى الجنسيه 17 شخص

والماده الثالثه شتقول؟؟ اتقول العربي من اصل عربي والمقيم قبل 1945

لا وقاعد بالكويت لين تقدم على الحصول على الجنسيه

أولا اذا كان بدون شنو يثبت انه عربي ومن اصل عربي

ثانيا في اسامي واااااااااااااااضح انهم مو عرب اشلون خذوها ؟؟؟

وهم اذا كان قاعد بالكويت من 45 ليش ماأخذ الجنسيه من زمان ؟؟؟؟

وللعلم اغلب المتجنسين هالمره من البدون

خلوا هذا على صوب اخر هالماده شمكتوب ؟؟؟ مكتوب لازم يكون مولود بالكويت ... اشدراهم انه مولود بالكويت واهو ماعنده شهادة ميلاد؟؟؟

وهم مكتوبان تتوافر لديه الشروط المنصوص عليها بالماده السابقه 2 و3 والي شيقولون

أن يكون له سبب مشروع للرزق ، وأن يكون حسن السيرة غير محكوم عليه لجريمة مخلة بالشرف أو الأمانة

أن يعرف اللغة العربية

يعني يكون له سبب للرزق يعني يكون موظف او عنده دكان ... هل كلهم جذي والا بطاليه؟؟ ...وهل كلهم مو محكومين لجريمه ؟؟ اصلا ماعندهم بصمه اشدراكم انه حرامي والا لأ ... وهل كلهم يعرفون عربي اقروا الاسامي وراح اتعرفون

يا ناس القانون واضح وصريح انا مااقول ان كلهم ما يستحقون الجنسيه لكن خل انكون واقعيين ونقرى الفقرات عدل عشان لا نظلم الديره ونظلم الناس الي تستحق الجنسيه

ماراح اتكلم عن الاعمال الجليله لاني مااعرف الي خذوها شسوو .... بس اتمنى انهم مو مثل داود حسين ونوال الي قدموا خوش اعمال جليله للكويت

ولكن شنو ذنب ابناء الكويتيات الي عاشوا وتربوا على هذي الارض؟؟؟؟؟؟؟؟؟؟؟؟؟؟ شنو ذنبهم واهم ولاءهم للكويت شنو ذنبهم واهم ما يعرفون اي شي عن ديرتهم الا جوازهم ؟؟ انا بسأل سؤال حق وزير الداخليه انت الحين طوفت الفقره الثانيه ليش ؟؟؟؟؟ من الاولى لي الثالثه ؟؟؟؟؟؟ الله واكبر .... ترى الظلم حرام والا لازم المسكين يحط واسطه مثل ماحطها كومار؟؟؟ ....يعني كومار وباقري احسن من ولد بنت الديره الي عاش فيها طول عمره ؟؟؟؟

ماادري اشصار في بنات الديره لما حطيتوا هالاسامي وطوفتوا عيالهم الله يعينهم ... ترى في ناس يستحقون شرف الجنسيه وناس ما تستحقها ... اهم شي الولاء لاجل الوطن ... هذا غير الاطباء والدكاتره البدون الي هاجروا بره الكويت واشتغلوا بره وقاعدين يبدعون اهناك ... مو احنا أولى فيهم ؟؟؟؟؟

لما قريت الاسامي قلت بشوف الماده شتنص عليه ... وهذا الي خلاني اكتب هالبوست ... يا ناس يا عالم احنا مو ناقصين علل على قلوبنا كفايه الي عندنا ... ليش الجنسيه صارت بالواااسطه عنوبوكم هذي جنسيه مو معامله بالبلديه عشان تصير فيها واسطات ....ترى الديره مو ناقصه والله مو ناقصه

اتمنى ان الجنسيه اخذوها ناس تستحقها ولا يصيرون عبيد حق الي توسطولهم .. ومبروك حق الي يستحقها ... والله يستر من الي ما يستحقها لانهم كثروا بالديره

لابد ان تكون هناك قراءه شامله لهذا الموضوع لانهم راح يكونون من المجتمع ولازم ما انجنس اي احد فقط لمجرد التجنيس

وعزائي للبدون الي اخوانهم كويتيين و للأم الكويتيه الي كانت ناطره هاليوم وحق الي ما عنده واسطه ويستاهله

واتوقع ان الصوره تعبر شوفوها عدل

الزبده يا تجنسووون عدل وبدون ظلم وواسطات وتعطون ناس ما تستاهل ... يا لا تجنسون ... والاحسن انكم ما تجنسون وسحبوا جناسي الي عطيتوها حقهم وفكونااا من عوار القلب.

اللهم لا اعتــــــــــــــــــــــــراض

وخطاك السو يا فهد العسكر ... وأجر وعافيه :))) يالله التجديد زين

http://fahadal3skr.blogspot.com/