أأسف يا سيد

تحديث

تم اخلاء السفاره الكويتيه بلبنان لتلقيها تهديدات ؟؟؟؟؟

الحمدلله ان الوقائع تثبت كلامي ... في اخر هالبوست قلت القضيه هي اتباع حزب كان يحارب الكويت بيوم من الايام ومازال يحاربها... وراح اسويله هاي لايت باللون الاحمر هذا دليل على ان هالحزب الي ميتين عليه لي الحين يحارب الكويت فهل لي الحين تطلقون الاعذار لهذا الحزب؟؟؟؟ ؟؟

ومبروك الزياده :p

------------------------

لي زميل اعرفه منذ ايام الكليه واهو الان يعمل معي ايضا ... بصراحه لم اجد شخص باخلاقه .. فهو لا يسمع الاغاني بتاتا مع اني اطفره واشغل المسجل عناد بعدين اسكرها وايضا لم اره بحياتي يغش ولم ينقل الواجبات يعني ولا مره كوب الهوم ووركات لدرجة انه حينما نقول له لدينا الامتحان يضع يده على اذنيه لكي لا يسمع الاسئله ... احترمه كثيرا رغم الاختلاف الشديد بيننا بالكثير من الاشياء ... وايضا اتوقع انه لم يسب احد في حياته .. ودائما ما اقول له انك اشرف من الف مطوع و الف سيد ... فوالله لم ارى شخص متدين يحترم تدينه كهذا الشخص ... ومما يجب ذكره انه بعيد جدا عن السياسه لدرجة ان الصحف اليوميه لا يقرأها الا حينما نجلبها معنا للعمل واذا اراد ان يعرف شيئا يتصل بي او باحد الاصدقاء ليسأله ومن هنا احييك يا سيد على اخلاقك وعلى مبادئك التي لا تتنازل عنها وعلى تفهمك ولغة الحوار الجميله التي تتمتع بها

ان هذه المقدمه البسيطه عن هذا الشخص يجب ان تقال قبل ان ادخل بالموضوع مع انها لا توفي حق هذا الانسان رغم اني 24 ساعه مطفره :)

بالامس وجدت احد الاصدقاء وبالحقيقه هو ليس صديق انما اخ لم تلده امي فلن انسى مواقفه معي ايام الكليه وعلى فكره هو شيعي بالعمل وبعد السلام دار بيننا هذا الحديث

الصديق : شفت شصاير بالديره ؟؟

انا : اي والله يا بو علي شفت اشلون عشان تدري اني كنت صاج لما كنت اسولف عنهم

بو علي: اي والله ابن .... ما يستحي على ويهه اشلون يسوي جذي ما يستحي

انا : قلنالكم من زمان هذيل ولاءهم مو للديره بس محد يسمع

بوعلي : اتقولي انا قول حق الخمه الي ما يستحون

انا : الله يستر على الديره

بوعلي : تدري منو رايح عزا مغنيه ؟

انا : منو ؟؟؟

بو علي : كل دوانية فلان حاطين صورهم يبجون ... وهم فلان واحد ثاني رايح

انا : بققت عيوني .... شنو من صجك انت ادري انهم عنصريين بس مو لي هالدرجه

بو علي : من صجك انت ولا ازيدك من الشعر بيت لما قلت حق فلان الثاني هذا خطف الطياره وفجر موكب الامير تدري €شقالي ؟

انا : ماكو دليل ؟

بو علي : عليك نور

انا : وينه هذا خل اعلمه ان الله حق موجود اهني ؟

بو علي : لا مو موجود ... يا معود تركه خل يولي اشتبي فيه

انا : تدري يا بوعلي ان قالي شهيد والله لحط الجوتي بحلجه ... الا اشوفه هذا... مابقى الا هالاشكال بعد

بو علي : يا معود هدي اشفيك انت هذا خبل ما عليه شرهه

انا : خبل انعقله .. واذا ما عقل يا يذلف من الديره والا انقطه مستشفى الميانين

بو علي : يضحك ... خل يولي بس عنك ها اشلون المباراة اليوم

انا : قلتله امش بره بدخن بط جبدي

عقب ما رديت والا سيد موجود وجم واحد .. جان يقولولي اشفيك ... فقلتلهم السالفه

سيد : صج شنو هذا ؟

انا : بعد هذا الي صار

سيد : بس اكيد ان السالفه جذي

انا : يعني اقص عليك روح شوف الجرايد

سيد : بس يمكن مغنيه مو مفجر وحاطينها عليه

انا : سيد انت ما تدري شالطبخه وياي اتكلمني ترى مالي خلقك .. يعني اجذب مساعد الطيار والركاب واصدق عبدالصمد؟؟؟ على اي اساااااااس

سيد : لا تعصب انا بس بعرف شالسالفه بالضبط

قلتله سالفة مغنيه

سيد : لا حول الله هذا جلب اشلون شهيد .... لاول مره بالحياة اسمعه يسب هم عقبها قال استغفر الله

انا : بعد شسوي روح اسال الي سوو العزا

جان ينط واحد وانت اشدراك ان اهو الي مفجر ؟؟؟؟؟؟؟؟؟؟؟

ادري سؤال غبي

انا : اسكت لا اطلع حرتي فيك ما تعرف اتسولف سد حلجك ..... على فكره هم هذا مايدري وين الله قاطه

سيد : الحين عشان شيعي راح يخلونه بيزه ما يسوه

انا : شكووووو ؟؟؟؟؟ سيد ترى السالفه مو شيعي وسني

سيد : امبلا الحين شوف شيقولون عنا

انا : وانتوا شكو بالموضوع الحجي عن فئه معينه مو عن كل الشيعه

سيد : الحين يقلبونها علينا

انا : شوف بقولك شي انت لا تشوف الي يكتبون بالجريده والا الي يطلعون بالتلفزيون اغلبهم مسيسين وخالصين .. انت شوف الناس شوف اهل الكويت شوف ربعك شيقولون اما الباجي مالك شغل فيهم

سيد : بس هذيل الي يتكلمون

انا : مالك شغل فيهم يا يبا .. طول عمرنا عايشين مع بعض وطول عمرنا نعتبر اهل ومانفرق بين احد الا لما اطلعولنا الخمه الي منا ومنكم وسببوا التفرقه العنصريه الله لا يوفقهم

جان ينقز الحبيب الي كنت مكلمه بالبوست القديم جان تذكرونه

اهو : لا يبا احنا مضطهدين اهني

انا : والله محد مدلع كثركم ... مسوينكم يا دهينه لا تنكتين عشان لا تحسون ان في تفرقه

اهو : لا يبا غلطان كلكم متعنصرين علينا

انا : اولا انت تدري اني مو عنصري نهائيا وهالسالفه كلش مو في بالي ...طول عمري اشوف الكويتيين نفس الشي الا ما رحم ربي .. وثانيا لا تقولي متعنصرين .. اذا كان في ناس متعنصرين لا تقول كل السنه جذي .. وصدقني لو نبي انتعنصر جان ولا واحد فيكم قاعد اهني معانا

اهو : الكل ضدنا .... ولي صار شي الكل طلع واحنا هم بنطلع وانروح يا ايران يا جنوب لبنان

انا : روح محد قاضبك واذا انت تطلع اذا صار شي .. انا بصراحه مااقدر اعيش بمكان غير الكويت اموت ولا اطلع

ماادري شصار وصكينا السالفه وكل واحد شاف شغله عقب ما قرقت عليهم على الوطنيه والولاء

تذكرت سالفه قبل لا اكمل ... اهم شي اني اتذكر واكتب كلش مو مرتب ... اذكر السنه الي طافت تقريبا شهر سته جذي تكلمت مع واحد عن سالفة ايران وتفجير موكب الامير والجابريه ... موضوع طويل ماابي اتكلم عنه تدرون شقالي ؟؟

قالي لا تسمع حجي الدواوين واتصدق ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ الله اكبر عليك حجي دواوين .. طبعا ما خليته وماهدينا بعض الا لين بغت اتصير بينا .... بس بساله سؤال لي الحين اتقول حجي دواوين ؟؟؟؟؟؟

وبعد هذه النقاشات التي استعرضتها لي كلمة الى صديقي سيد ... أأسف يا بو علي ان هناك من يضرب الاخوان الشيعه جميعا فقط لان هناك من أبنوا من استباح دماء الكويتيين ... وأأسف يا بو علي على من يطلق الالفاظ النابيه على كل الشيعه فوالله اني لم اجد من هو في اخلاقك وفي التزامك ووطنيتك .. الى كل الاخوه الشيعه لا تنظروا لمن يتفوه بالكلمات عليكم فان لي اصدقاء اعزاء لا ارضى عليهم لاني اعرف موقفهم .. واعرف انكم لستم مع ما فعله البعض منكم ... واتمنى ان تقفوا مع الكويت بهذه القضيه التي مستنا جميعا فلا طائفه ستفرقنا ولا مذهب ... فاهل الكويت مذهبهم وطنيتهم وطائفتهم حبهم للوطن في وقت الشدائد هذا ما تعودنا عليه ... ولنضع الكويت بقلوبنا ... ونقف صفا واحدا امام من خان الكويت ببكاءه على من هدد امنها فهؤلاء لا يستحقون ان نطلق عليهم كويتيين ودعوا خلافاتكم جانبا وحاسبوهم من اكبرهم لي اصغرهم فليس المقبور الله لا يرحمه هو القضيه انما من يتبع حزب حارب الكويت يوم من الايام ومازال يحاربها ربي احفظ الكويت من كل مكروه قولوا آمين

الشيء بالشيء يذكر زورا مدونة براقش واشتركوا باستنكار ما فعله طيور الظلام

----------------------------------------

كلمة حق

برافو ... كلمة حق تقال للتحالف الوطني فاليوم في جريدة القبس الصفحه السادسه في تغطية ندوة التحالف امس الاول

اعلن عبدالرحمن العنجري عن اقامة ندوات وفعاليات في جميع مناطق الكويت من الجهراء وحتى ام الهيمان وعلى من يرغب في المشاركه ارسال اسمه ومنطقته على الرقم التالي : 4444911

رغم اني ما فهمت يعني شنو من يرغب بالمشاركه ولكن ... هذا ما كنت ارمي اليه بالفقره 2 من موضوع المراقب مع اختلاف المناطق فانا قلت من العبدلي لي الوفره :) ولكنها خطوه تحسب لهم

ومثلما ننتقد ايضا نصفق لاي عمل لاجل الكويت ويذيب الطائفيه والعنصريه برافو يالتحالف

---------------------------------

Forza Roma

Forza Capitano

La Roma La Roma La Roma

بكل فن ولعب وانتكه فاز فريقي العزيز روما على ريال مدريد ومثل ما توقعت فازوا 2\1 وانا كاتبها بالكومنت عندي وعند بس من قبل :)

وانشالله انكمل المشوار وما انخسر 4 بالاياب مثل ما توقعت بالسابق

وهاردلك يا بس :)

سؤال حق الانتروايه ... شهالفريق الدايخ بايطاليا مقزرها فوز وبره ولا ابيزه ؟؟؟؟ انتر و انتر وحالتكم حاله طاقينكم 2 والله فشلتونا ويقولون الحكام ما يغشون ودي اصدق بس قويه :)))

.

اللــــــــــــــــــهم لا اعـــــــــــــــــــــتراض