باقر و التنديل

الكثير هذه الايام انتقد احمد باقر لاصداره قرار بمنع عرض الملابس الداخليه للنساء على واجهة المحلات والقليل هم من انتقد التوجه الذي توجهه الوزير للحد من غلاء الاسعار والتلاعب بالاسعار من ضعاف النفوس من التجار ولا اعلم ايهما اهم الملابس النسائيه ام المواطنين ذوو الطبقات المحدوده والمتوسطه ؟؟ شي غريب

الوزير من على الناس ووزع عليهم هدية رمضانيه مكونه من يريش وطحين و هريس و شكر وماادري شنو بعد.. جنه احد قايله الناس يبون يفتحون محلات اتنافس الخباز ..الكل يعلم ان الاخ الوزير ضد مصلحة المواطن منذ كان عضوا فكيف يتغير وهو وزير ولن ننسى الكلمه التي قالها لمسلم البراك ومن ثم رقعها

احمد باقر يحاول ان يمن على المواطنين ويريد ان يكون صاحب فضل لكن حامض على بوزه .. الكويتي عزيز نفس وهنا اريد ان اقارن الكويتي بالتنديل الذي لا يطلب العون من احد وصاحب نفس عزيزه حتى ولو مات من الجوع فهو لن يترجى فلان وعلان هؤلاء هم الكويتيون

الخطير بالامر هو استعداد الحكومه لاقرار ضريبة المبيعات كبديل عن الضرائب الجمركيه الرمزيه ؟؟؟؟ السؤال هنا شسويتوا يعني ؟؟؟ الحين بتلغون الضرائب الجمركيه الرمزيه وبتحطون ضرائب على المبيعات اكيد التاجر يبي يربح وراح تندبل الاسعار شي طبيعي وبديهي وواضح وضوح الشمس في كبد السماء .. لي وين تبون توصلون ؟؟ لا سيايير يقدرون يشترون لان لازم 15 ضعف الراتب انزين ريال معاشه 1000 دينار وعنده 6 عيال اشلون يشتري سيايير حقهم يركبهم باصات يعني ؟؟ الي بيقول اي بقوله وليش يركبون باصات ونحن دوله نفطيه عددنا مليون قطو عيل لو احنا 5 ملايين واحد شراح يصير فينا هذا وسعر البرميل ماشالله لا اله الا الله ماادري وين تروح فلوسنا

هذا غير صندوق المعسرين وبلاويه .. الان ماهو موقف نواب الامه وماذا سيفعلون لو اقر هذا القانون الضريبي الفاشل .. طبعا مو فاضين حقكم فاضين حق المصفاة الرابعه وانتخابات الكره والظواهر السلبيه ومنع الاختلاط والدواوين وزيادة الخمسين وزيادة عدد السكرتاريه .. شوف انت معطي صوتك حق منو ولي وين وصلنا شوف نفسك اذا انت بايع صوتك بالف والا الفين دينار وهالعضو شكثر حصل من وراك .. لا حول ولا قوة الا بالله

لن يستجوبوا باقر لان الكتله الاسلاميه او السلفيه بالمعنى الصحيح هي الاقوى وان استجوب لن تطرح به الثقه وسيلعب بكم وزير التجاره والصناعه صاحب شهادة الصيدله ؟؟ وسيمشي على مشتهاة الي يبون ياكلون الناس من هالشق لي هالشق .. ومسمينه باقر العيش بالجرايد ماادري على شنو ؟؟ شنو شايفين الكويتيين عايشين بمجاعه عشان يمن عليهم بخيشة عيش ويريش وهريس ؟؟

اهي مو راده على هالسالفه لان الشق عود .. ومثل ما سكت النواب بمنع عرض الملابس الداخليه .. راح يمرر الي يبي والاسلاميين راح يصفقوله لانهم راح يكونون مشتركين بأكل الكيكه وراح يرقعونها لان باقر راح يسوي شي محد يقدر يسويه الا وهو تغيير صورة الفنانه هيفاء وهبي على غلاف البومها الجديد لكي يباع بالاسواق ولا يثير الفتن وهذه هي الصورة ماادري اهو وزير تجاره والا وزير هيئة الامر بالمعروف

--------------------------------

بما ان محد علق ماني كاتب تحديث ... توه وصلني مسج من زين .. حاطين مبارك عليكم الشهر وحاطين ويف ولما سمعت الويف ماادري اهو دعاء والا نشيده والا شالسالفه ياهل جنه يدعي ويقول اهلا بزين وجه نور الليالي ماادري شنو عقب يقول رمضاااان ... يعني حاطين هالدعاء ماادري النشيده ماادري عشان فيها زين واخر شي يقول لا ترد دعائيا ... شسالفتهم على الاناشيد قطوره وقطره بالتلفزيون واهني حاطين هالياهل ؟؟؟؟؟ يمكن خايفين من الثالثه وقالوا خل نقلب اسلاميين والا من كثر ما لهفوا الناس حسوا بتأنيب الضمير والا مثل ربعنا يحطولك شي ديني عشان يبوقونك وانت اتقول جزاهم الله خير .... تخلف

اللهـــــــــــم لا اعتـــــــــــــــــــــــــــــراض