سمج لبن تمر هندي

انتهت الاجازه الجميله للمسافرين خارج الكويت والي ماادري شقول عنها حق الي قاعدين بالديره مهزله بالافينيوز ووحده لمت تامر حسني وصراخ واتهامات من هنا وهناك وزحمه بكل مكان ويمكن الي مو معور راسه الي اتجه للشاليه او قعد بالدواوين .. انتهى رمضان بكل احداثه الدراماتيكيه وبمسلسلاته الي انتهت ببوسة عبدالحسين عبدالرضا لحفيده وركضت نايف الراشد بره الدوانيه وانتهى العيد وعساكم من العايدين والفايزين انشالله .. وعدنا الى التدوين مره اخرى

لا احب ان اتحدث عن اجازاتي الخاصه بمدونتي ولكن بما ان الاخ العزيز اكزومبي بطها وقال عن مباراة الديربي وقال يبي جم صوره فكرت اني اربط بين الصور الي بحطها عشانه وبين بعض المواضيع الي طافتني بوقت اجازتي اشلون بربط ماادري اذا لقيتوا صوره مالها شغل بالسالفه عادي طوفوا .. ومعلومه حق اكزومبي انا مااشجع الانتر انا اشجع روما وبالمباراة كنت اشجع ميلان والحمدلله فازوا يعني ما قبست عليهم الي قبس اهو الي معاي لان اهو الي يشجع الانت مو انا واذا بتقول ليش شجعت ميلان بقولك لان ميلان الحب الاول ايام فان باستن وعقبه جورج وياه

الموضوع الي شفته بكذا مدونه تتحدث عن انتخابات نادي القادسيه الرياضي وبما اني قدساوي متعصب راح ابدي وجهة نظري بالموضوع .. هناك من وقف مع قائمة ابناء النادي ووصفها بانها سوف تنتشل الكره الكويتيه من الضياع وقد غاب عن ذهنه ان اندية التكتل راح تنقص فريق واحد فقط وسيظلون اكثريه هذا اولا ثانيا الاسماء المتواجده بالقائمه فانا لا اعلم وين الكره ووين جاسم بودي ؟؟؟ اتوقع ان ولد عمي الصغير يفهم بالكره اكثر منه والاسماء الاخرى اقولها وبصراحه اني لم اشاهد بها جهبذ من جهابذة الكره فيها فلا اعتقد ان الاسم كافي فهذي كرة قدم وليست انتخابات مجلس امه والسؤال لماذا لا نجد اسامي اللاعبين القدامى ومن المعروف ان نادي القادسيه به من الاسماء التي سطع نجمها من امثال جاسم يعقوب وفيصل الدخيل وراشد بديح ومؤيد الحداد وحمد الصالح وعبيد الشمري ومحمد بنيان واعتقد بان هؤلاء افهم بالكره من الجميع الا اذا كان هؤلاء النجوم يوالون القائمه الاخرى فالله اعلم

بالنسبه لقائمة الجميع التي يحاربها البعض لوجود طلال الفهد .. وبصراحه انا عندي طلال الفهد ابرك من جاسم بودي و انور الخرافي .. الريال فاضي حق الكره اما هالاثنين بالذات وينهم ووين الكره ؟؟ والا مرزوق مسك نادي الكويت لازم احنا نمسك القادسيه ؟؟ اشرايكم انخلي النوادي شركة مقفله ونعطيها لهم ؟؟ بلا انتخابات وبلا بطيخ .. يا جماعه لا تنكرون ما وصل له نادي القادسيه من انجازات بوجود هالقائمه بعد ان كنا نعاني الامرين وانا قدساوي وقاعد اشوف التغييرات الي صارت .. بوجهة نظري ان ان الطعن بهالانجازات لوجود طلال الفهد خاطئه جدا فانا اعتقد بان الترويج للقوائم يجب ان يكون على اساس تكملة المسيره لمصلحة النادي وليس الطعن وتصفية الحسابات

بالنهايه النتيجه محسومه وواضحه ولكن هل قائمة الجميع او ابناء النادي راح يسوون لنا ملعب مثل هذا ؟

هل هذا او ذاك راح اييبون مدربين مثل هذيل

هل هذا او ذاك راح اييبون جمهور مثل هالجمهور

هل هذا او ذاك راح يشيلون الوزرات وفنايل العلاق الي اتعلق بره الاستاد ؟

طبعا لأ فطلال الفهد منشغل ببناء العماير بالنادي وهاد الاستاد الي بانينه من الف وتسعميه وحطبه وارضيته اتفشل واحد راح ينط ويقولي هالعماير عشان يصرف على النادي وانا اقول اوكي مو مشكله لكن اذا كانت اتهمه مصلحة الكويت فالاولى انه يبني النادي ويسوي صرح رياضي على الاقل لو استاد بدال مااييب لنا كونسيساو بمليون دولار ولا لعب الا جم مباراة وطلع فاشل

خلونا انكون واقعيين الكره الكويتيه راح اتظل حالتها من اردى لي اردى مالم يطبق الاحتراااف ومالم تكن هناك نية جديه لاعادتها من جديد وايضا ان لا يكون المنصب الرياضي كرت دخول الى الحياة السياسيه فهذا اكبر غلط وشفنا منهم وايد واليدد اهم احمد الفهد ومرزوق الغانم الاول من طمباخيه لي وزير نفط والثاني نائب بمجلس الامه .. المراد لا طلال الفهد ولا قائمه ابناء النادي راح يردونها دام هذا تفكيرهم ودام هالقوانين ما تغيرت .. الفيفا يمكن يوقفونا وهذيل يتناجرون على رئاسة نادي .. ياخوفي ان حتى النوادي تتسكر وتسيس يا خوفي

نرجع لمحور حديثنا .. ماادري شنو المحور بس برجعله .. طبعا لازم زين بين كل شهر وشهر تطلعي بسالفه فبعد سالفة غانا هالمره اقطعوا تلفوني وانا دافع الفواتير ولما ادق عليهم يقولولي دزلنا كشف حساب اقولهم انا بايطاليا ومحتاج حق التلفون من وين اييب كشف حساب بالله يعطوني طاف لين دقيت على الوالد وحلي المشكله .. وطبعا الفواتير حدث ولا حرج بس شسوي مالي خلق اشتري خط ثاني من اهناك وكل الحجوزات حاط فيها رقمي فمااقدر اغيره وبيني وبينكم من له خلق كل شوي يعبي كرت

محمد العبدالجادر طلع بمقابلة صحفيه وتكلم عن فتح دواوين بالمناطق الخارجيه ويقول احنا ما نتكلم من بروج عاجيه انزين مقولة مناطق خارجيه وين اصرفها بالله ؟؟ ذكرت في بوست سابق ان الكويت من العبدلي لي نويصيب ومناطق خارجيه وداخليه انتهت الان .. وقد حدثت بيني وبين الاخ العزيز حمد الكثير من المناقشات بشأن المنبر الديمقراطي وتحدثت عن هذا الشأن بالذات مرات كثيره والى الان ماادري ليش سكروا دواوينهم بالجهرا والمنطقه العاشره وهل حسوا انهم اغلطوا الحين ؟؟ اتمنى انهم حسوا ننطر وانشوف

وانا طالع من مباراة الديربي بين انتر وميلان ورايح للاندر قراوند كانت الزحمه غير طبيعيه على التذاكر اشوي والا بكل سهوله ويسر فتح الامن بوابات الدخول وقال دشوا بدون تذاكر عشان يمشي السير طبعا لو احنا بالكويت جان وصل الامر الى مجلس الوزرا و 5 سنين على ما يحلون المشكله ومجلس الامه راح يستجوب وزير الشؤون شكو الشؤون ؟ وماراح انخلص .. ماادري متى راح نتعلم ان القرارات السريعه والبسيطه التي تصب لمصلحة العمل والمواطن اهم من الي يسوونه .. هذا الامن حل مشكلة الزحمه وريح الناس بدقايق

وصلني مسج من احد الاصدقاء وقالي اقرى جريدة الوطن وبما اني لما اسافر مااحب اقرى اي شي وخصوصا جريدة الوطن الي مااقراها وانا بالكويت الا اذا سمعت ان في خبر اخطبوطي قلت يمكن خبر مهم .. كابرت على نفسي وقلت خلني اشوف شالسالفه فلقيت تصريح وزير المواصلات عن المدونين .. بكل بساطه ضحكت وقلت خل يشرب من ماي البحر.. ياحبيبي انت مكنسل ادارة من اهم ادارات الوزاره ومحد كلمك فجج بروحك قبل لا يكبر الوضع وخلنا بعيدين عنك ولا تتوقع ان احنا ناسينيك

ادري ان البوست ملخبط وافتر راسكم مو المكتوب امبين من عنوانه بس هذا حال الديره بالضبط كل شي داش بشي ثاني على العموم شكرا لكل من تواصل معي بغيابي والى لقاء قريب ببوست مرتب مو مثل هالخبصه ... جاااو

اللــــــــــــــــهم لا اعتــــــــــــــــــــــــــــــــراض

اكلوا ترميسون احسن لكم