تحديث

اخ عزيز ارسل لي هذا اللنك الذي يدعوا فيه اتحاد الطلبه بارجاع الدورات المشتركه بين كلية العلوم والهندسه وعلى حسب علمي انها مختلطه وايضا اكد لي الاخ انها مختلطه فشلون تناقضون نفسكم يا ناس ؟؟؟ وهذا اللنك

لن انسى دعواتك لي بالتوفيق وانا طالب وحينما كنت وزيرا للتربيه وقد ربت على كتفي بالامتحان وقلت لي ماذا تريد ان تصبح فقلت مهندسا وقلت لي انشالله سوف تصبح مهندسا .. ولن انسى بانني كنت اسابق الريح لكي احضر اي ندوة تتكلم فيها .. واجلس مبتسما وانا استمع اليك .. وحينما سألتني لماذا تبتسم وانت تجلس بالندوات وحين قلت لك احب ان اسمع حديثك ... رحمك الله يا ابا قتيبه فاذا اختلفت معك يوما بالرأي فهذا لن يغير بك شيئا ... الله يرحمك ويغمد روحك الجنه

-1-

بداية اشكر الانيموس الي عطاني سايت الحلقه

بصراحه عقب البوست الاخير عن نبيل العوضي قلت ماني كاتب عنه مره ثانيه ولا بشوف برنامجه الي دايما اشوفه صدفه بالمره الاولى والثانيه لانه يشتغل بالوطن والي يشتغل بهالقناة ماعليه شرهه ... لكن عقب الخبه الي صارت على حلقته الاخيره والكلام الي سمعته عنه قلت بشوف الحلقه ولي عليها عدت نقاط

اولا احب ان اوضح اني معارض لمن طرح هذه القضيه بهذا الوقت بالذات وكان لي تعليق لهم بموضوع سابق

ولكن يا اخ نبيل العوضي لما اتقول انك اتعلمنا شنو ناكل وشنو نشرب اقولك لا انت ولا أي واحد يعلمنا دينا لان دينا

انعرفه قبل لا انعرفكم وتاريخ عوائل بعضنا يمتد الى الصحابه وهذا يعني اننا مسلمين ابا عن جد ولن ننتظر احد لكي ينظم

لنا ديننا ويعلمنا شناكل وشنشرب ... وعندما تقول كشخوا الموضوع وسموه تعليم مشترك واهو اختلاط ... فأنا اقولك

انت دشيت كلية الهندسه والبترول على ايامي بجم ندوه وشفت الطلاب والطالبات قاعدين بندوتك واعتقد شفت اشلون كانوا منتبهين لطرحك ولا اقعدوا وغازلوا بعض هذا هو التعليم المشترك يا اخي الفاضل ... فعندما تقول اختلاط فهذه الكلمه

يجب ان لا تقال الى طلبه ذهبوا الى الجامعه وبرضى اهاليهم لكي يدرسون و يأتون بالشهاده

راح اكلمك يا اخ نبيل عن كليتي ولما كنت انا فيها فانا لم اشهد حمل سفاح ولم اشهد مغازل ولم اشهد من هم يداومون عشان البنات او الشباب نعم هناك فئه ماخذين السالفه جذي لكن اعلم ان مصيرهم هو الطرد من الكليه ... تدري ليش لان مو رايح الجامعه عشان يتعلم ... وانا ومع كل السنين الي قضيتها بالجامعه ما كلمت بنيه الا مرات ينعدون على الاصابع لا وكان سؤال ورد غطاه ... واشتغلت مع بنات بمشروع التخرج وما شفتهم الا 3 مرات لا والمره الثالثه كانت بالمعرض ... كل الشغل يا عند الدكتور او بالايميل فقط لا غير وهذا ما كان يعمله زملائي ايضا هذا ما يسمى بالتعليم المشترك ... واحب اقولك ان لي اصدقاء اتوا من مناطق يمكن ما يشوفون فيها بنات نهائيا لكنه لم يتكلم ولا مره مع بنيه وابشرك اهو متفوق ... لا تحكم على جم اتصال ياك ويقولك لبس البنات وماادري شنو شوف اهو باي كليه من الكليات الدايخه وشوف اهو شنو تفكيره

يا اخ نبيل ترى عيب كل شي تربطونه بالجنس لي متى هالتفكير هذا الي انتوا اتفكرون فيه ... انتم من زرع هذا التفكير في عقول شبابنا وبناتنا من ايام الدراسه وبمناهجكم الركيكه ... انتم من جعلتم النظره الى البنت تكون شهوانيه ولا شيء غير ذلك .. الكويتيين قبل وركز على الكويتيين لبسوا بناتهم الميني جوب يعني تنوره قصيره ولا شهدوا وقتها حالات اغتصاب مع انهم تطوروا بزمن قياسي من غوص وسفر وبر الى دوله مدنيه من بوشيه وعباة لي لبس عادي ولم اقرأ او

اسمع عن هذا الحديث الي تتكلم عنه ... لقد كانوا جيل من افضل الاجيال والكل يحسد من كان من جيلهم ... يجب ان تعلم ان الاختلاط او غيره ليست المشكله فالمشكله بعقول الناس يا اخ نبيل

وحينما تتحدث عن الشريعه وعن الاحكام الاسلاميه واتقول اوجب الحجاب وتذكر الايه الكريمه التي يقول بها الله تعالى( يدنين عليهن من جلابيبهن ) واتقول هذا حجاب فهذا شي غريب وماابي اخوض فيه لاني ماراح اخلص بس افهم يا فهيييييم الحمدلله كلنا انعرف عربي

ولما اتقول يجب على البنات ان لا يخضعن بالقول اقولك ترى احنا بجامعه مو بمكان ماني قايل وين عشان البنيه تتمييع بالحجي ومااعتقد ان تشبيهك اهني صحيح

ولما اتقول حريه ويجب ان الحريه ما تكون مفتوحه .. انا وياك زميلتي مااطلع معاها ولا العب وياها ولا اوديها بسيارتي انا معاك الف بالاميه ... وانا هم اقولك ان الحريه لها حدود تحكمها العادات والتقاليد والتعاليم الاسلاميه الي انعرفها بس تعال قولي اهي قاعده بالكلاس معاي ونطلع من المحاضره ولا ادري عنها ولا تدري عني شالغلط الي طحنا فيه ؟؟؟؟

وهناك ايضا كلمة قلتها ان الغالبيه لبسهم غير محتشم ؟؟؟؟؟؟ عفوا انت شنو شايف بناتنا شنو الغالبيه ؟؟؟ منو الي قالك غالبيه وشنو الاحتشام الي اتكلم عنه ؟؟؟؟ اذا كان على الحجاب فانت قلتها بعظمة لسانك في بنات مو متحجبات مصلين وصايمين ويخافون ربهم واحسن من وايد محجبات ؟؟؟ انزين هذيل يعني مو زينين ؟؟ واذا كان الاحتشام مو بالحجاب فانت ناقضت نفسك لما قلت الاحتشام بالحجاب
عقدتني بصراحه ... على العموم مع اني ماادري شنو الاحتشام بوجهة نظرك لانك مدحت الي مو متحجبات ومو بكيفك ما تمدحهم لان هذا الواقع وانا احييك انك قلت الحق بهالشغله ولكن ... يااخ نبيل ليست الفضيله والحشمه بالحجاب وليست الاخلاق باللبس يا اخ نبيل ان الاحتشام شيء موجود بالمرأه وهي التي تفرضه ... نعم فكلام المرأه ومشيتها واخلاقها هي الاحتشام ... فرض احترامها بالمكان هي الاحتشام .. سمعتها الطيبه هي الاحتشام ... فلا تنغر بالمظاهر ولن اقولك عن منو اقصد فالله امر بالستر

شغله عجيبه يا اخ نبيل ماادري اشلون اتقارن الغرب فينا ؟؟؟ يا اخي مجتمعاتهم تختلف اختلاف تام عن مجتمعاتنا تقاليدهم غير تقاليدنا عاداتهم غير عاداتنا ... ماادري احنا شكو بروسيا وانت قلتها بعد ان المشكلات الي صايره اهناك مو من اختلاط الجامعه من الاختلاط باشياء اخرى ؟؟؟ يعني شتهقى من ناس ويك اندهم بديسكو وسكارى ؟؟؟؟؟؟؟ اسف اخ نبيل مقارنه غير منطقيه نهائيا

انا ماادري بوش متى قال هالحجي ومااذكر اني قريت هالموضوع ولكن لنفرض انه قاله وانتوا هم اتقولون انه يبي يفصل الاختلاط بالمدارس مداااارس مو جاااامعات ... وبالكويت الي يبي يدرس عياله بمدرسه مختلطه بكيفه والي يبي يدرسهم بمدارس منفصله هم بكيفه ... لكن جامعه يا اخ نبيل ناس كبيره وفاهمه ومتربيه لا تقارنهم بمراهقين لو سمحت

ولما اتقولي شوفوا مخرجات التعليم بالسعوديه ويكون بعلمك انت ضربت مثل واحد الا وهو كلية الطب احب اقولك شوف المعدات والدكاتره الي يدرسون اهناك وشوف اهني هذا ما يحدث الفرق مو الاختلاط او غيره يا اخ نبيل ... واذا بتقارن شوف مستوى الكبت الموجود اهناك وشوف البلاوي الي اتصير وشوفهم شنو يسوون بره وشوف الهيئه اشلون لاعنه خيرهم وشوف الشعب اشلون بينفجر اذا بتقارن جذي قارن يا اخ نبيل وللاسف ان الكويت بدت تنحدر الى هذا المستوى منكم واهم يعالجون مواضيعهم الحين

كلية الشريعه ليش مافيها مشكلة الشعب المغلقه مع انها مو مختلطه ؟؟؟ افحمتني بصراحه .... عفوا انت تقارن الشريعه بالطب ؟؟؟؟؟ كلية الشريعه الي اساسا كانت تابعه لكلية الحقوق لكن افصلوهم للاسف ما تحتاج الى ما تحتاجه من كلية الطب ... فكلية الطب تحتاج الى كوادر من مدرسين ودكاتره وتحتاج الى معدات لا تحتاجها كلية الشريعه ... وقارن ايضا بين عدد طلاب الشريعه وعدد طلاب الهندسه ماكو مقارنه نهائيا .... والي يرحملي والديك كلية الشريعه جم وحده عندهم ؟؟؟ وترى اغلب موادهم 1 و2 و3 يعني نفس الماده ومنقسمه الى ثلاث اجزاء ومااعتقد تحتاج الى اكثر من دكتورين عشان يشرحون ... تعال عندي بالكليه واوريك شنو نحتاج يا اخ نبيل ايضا مقارنه مالها داعي نهائيا

الفصل بالعمل ؟؟؟ لحظه بس وين هالمكان الي فيه موظف وموظفه وسادين على روحهم الباب ؟؟؟؟؟ وبعدين من قال ان

اغلب الكويتيين على قولتك يبون يوظفون بناتهم بالتربيه ؟؟ منو سوى هالاحصائيه ؟؟؟ لا حول الله شغل يا اخ نبيل شغل مو

لعب يهال ؟؟؟ شقولك يعني ؟؟؟

بعدين شنو كل كلمة والثانيه اتقول اهالي الكويت لا واتحلف واتقول لو انسوي مظاهره بساحة الارادة انغطي الشارع والسيايير ما تمر انا اقول والله لو الكويتيين واهل الكويت يسوون مظاهره على اللعب الي صاير وعليكم انتوا بالذات والله

ماكو سياره اتمر من الدوحه لين السالميه اشرايك ؟؟؟ ترى الاغلبيه الصامته ما يتكلمون ولو بيتكلمون وراح يتكلمون
انشالله راح يقلبون الدنيا عاليها واطيها بس الصبر زين

ولما اتقولي عميد الشريعه والا الفقهاء احب اقولك هذيل ناس ومعرضين للصواب والخطأ فلا انحط هالة على احد ونعصمه من الخطأ يا اخ نبيل

ولما تكلمت عن الاخت الي قالت كلمة تقدميه وقلتها باستهزاء انها عايشه ايام الستينات ... انا اقولك هذا دليل ان جيل الستينات اهم من كانوا ينادون الى التقدميه ... وللاسف انك تظحك على هالكلمه ليش ما تبي تتقدم ؟؟؟

ادري انا خبصت السالفه بس ما عليه ... لما واحد دق وانت قلت عن الشعب وقلت في دكاتره كويتيين مو موظفينهم ... لحظه يعني أي دكتور اتوظفه بجامعة الكويت ؟؟؟؟ يا سلاااام ... خلاص بروح اشتري شهادة دكتوراه وادرس شباب المستقبل ... يا اخ نبيل مو كل دكتور دكتور وجامعة الكويت لها ظوابط بهذا الشأن اتمنى انك تطلع عليها

وصلنا حق مداخلة علي ماني متكلم عن الدستور وقوانين الدستور لاني ادري انك ما تعترف فيه ... بس اذا الاخ ما عرف يرد او فكره ماادري اشلون صاير انا بقولك .... شكو الاختلاط بالعلاقات الجنسيه والخمر ؟؟؟؟ وقلت كلمه انا مااقدر اقولها اهني بصراحه ابي اسالك بالله يا شيخ نبيل ... منو قال ان الحريه هي ان تتفشى العلاقات الجنسيه المحرمه ومنو قال ان الحريه اتخليك تشرب الخمر ؟؟؟ عندنا قانون وقانونا يمنع هذه الاشياء .... ليش دائما تربطون الاشياء بالجنس والخمر شي غريب عجيب ... بس اتعرفون تضربون على اوتار الناس الحساسه برافو

الاخت ام محمد دقت وضربت مثال عن الغزو ؟؟؟ انا بس بقولها شغله انتي شفتي الي غازينا ؟؟؟ بالله هذيل اتعدينهم بشر ؟؟

افضل مداخله واعتقد ان الاخ نبيل توهق وراح اقولكم ليش توهق ... الاخت سما ضربت افضل مثال بالحلقه كلها الا وهو التعليم التطبيقي والي يصير فيه ... انا مااتكلم عن كل بناتنا الي موجودين اهناك وعلى عن كل شبابنا ولكن خل انكون واقعيين ان الحالات الي يشهدها التطبيقي اكثر من الجامعه مع انهم فاصلين الاختلاط .. ليش يا اخ نبيل ؟؟؟ راح اترك الجواب لكم لان الجواب واضح .. ولما توهق نبيل العوضي وقالها لو حطينا جامعتين وبنفس الكفاءه ومفصولين شنو راح تختارين قالتله راح اختار الي فيهم شباب اولا مستحييييل انك اتوفر هالشي يا اخ نبيل ... مافي دكتور نفس دكتور ولا الحكومه راح تقدر تدفع كل هالمصاريف تدري جم الدكتور ياخذ ؟؟؟ وهم شوف التطبيقي اشلون متوهقين بالشعب فما بالك بجااامعه .... وبعدين ترى مكاتب الدكاتره موجوده يا عند الشباب يا عند البنات يعني ماراح يشوفون بعض ؟؟؟؟؟؟؟؟؟؟

وبعدين تعال قولي انت اشلون تفصل الطلاب واتخلي الدكاتره يدرسون ؟؟؟؟ ماراح اتكلم بس اسال زميلك محمد العوضي وقوله شنو كنت اتقول عن بعض دكاترة الجامعه ..... حلال على الدكاتره وحرام على الطلبه ؟؟؟؟ والا بتييبون كادر نسائي كامل ؟؟؟؟؟
يا تفصل عدل يا لا تفصل يا اخ نبيل ... والله وبالله ان في دكاتره اذا اتحرشوا في بنات تدري منو يوقف بويوهم ؟؟؟ ترى

الشباب الي تبي توخرهم عن البنات .... تدري ان في بعض ضعاف النفوس من الدكاتره ما يقدر يفتح حلجه اذا في شباب

بالكلاس ؟؟؟ تدري ان جم حاله صارت بين دكتور بنيه وما وقف مع البنيه الا الشباب ؟؟؟ تدري ليش لان هالشباب يحسون

ان هذيل خواتهم ويكون بعلمك اهل الكويت الي كل ساعه يايب طاريهم رجال والرجل يدري ان البنيه الي معاه مثل اخته ولا يمكن يأذيها ... هذيل اهل الكويت يا نبيل العوضي .... وشوف عدد الدكاتره الي متحولين حق التحقيق بالجامعه

وعددهم بالتطبيقي يا اخ نبيل وهذا دليل على كلامي ... واسال دكاتره التطبيقي شنو يسوون له البنات

اخر شي ذكر اسم صحفيه امريكيه اسمها اشطوله تطالب بمنع الاختلاط ... ترى هذي امريكا وغير هالصحفيه بتلقى عشر ينادون بالاختلاط ... مشكله اذا بس شوف الموضوع بوجهة نظرنا والاشياء الباجيه انطوفها


بالنهاية لم اكتب هالبوست لاني مع او ضد الاختلاط انما لابين ماهية الطرح الذي يطرحونه ... واتمنى للمعارض على الكلام الي قلته انه يقرا الموضوع الي تحت بالاول

----------------------------------

-2-

انت ليبرالي ... انت علماني ... انت ماادري شنو ؟؟ كلمة اشوفها وايد تنذكر وحتى لو ماقالها يقولها بطريقه اخرى ... وهم في واحد حاطلي لنك عشان اشوفه ولما شفت الردود قمت اضحك .. تدرون ليش اضحك لان كل من يعارض الاخوان المسلمين اهو ليبرالي علماني ؟؟؟ يا سلام على المنطق ... ولا يقولون انتوا من تغيرتوا من القوميه وروسكم الكبار اتحركم وماادري شنو

بس ابي اوضح شغله عن نفسي وعن بعض الاخوه المدونين الي اعرف طرحهم وفكرهم ... اولا انا مو قومي واكره القوميه لاني متعقد من الغزو الله لا يعوده ... ولا مداني اصير قومجي لان توني صغير

ثانيا انا وبعض الزملاء ما عندنا راس عود ولا احد يحركنا ... كل من يرى الناس بعين طبعه ... نحن مواطنين كويتيين

يؤلمنا ما يحصل بدولتنا الحبيبه وبدأنا بكتابة افكارنا كل على حده بعيدا عن الانتماء لاحد غير الكويت
فنحن لا ننتمي الى تيار ولا تجمع ولا حزب ولا بطيخ انما ننتمي الى الكويت وحزبنا هو الكويت واذا شابه طرحنا طرح

بعض التيارات فهذا لا يعني اننا منهم .... فانا اقف مع الاخوان اذا كانوا قد قدموا اقتراح ينفع الوطن واقف مع السلف

واقف مع الليبراليين واقف مع الحكومه ... فمصلحة الكويت عندي فوق كل المصالح وفوقهم جميعا بلا استثناء وانا افخر

بانني لا انتمي الى احد انما انتمي الى الكويت ... واني حينما انتقد أي احد كان فاني انتقده لاجل الكويت ولاجل تقدم هذا

الوطن ... فلا راس كبير ولا اكبر راس راح حركني بيوم من الايام فلا هذا ولا ذاك هامني انما الي هامني اهي الكويت

ولا شيء غير الكويت

فلو سمحتوا لحد يقولي ليبرالي ولا يقولي علماني انما انا وطني وافتخر اني وطني ... والا جان ماخذ ربعي واهلي

ورحت صفقت وطبلت حق أي احد .. ولكننا لسنا بمطبلين ولسنا بمصفقين ولسنا من يستغل معارفه للوصول الى شيء انما لدينا الفكر ولدينا حب الوطن ونريد ان نساهم في بناءه

--------------------------------------

-3-

اشكر الاخ العزيز حمد على اعطائي هذا السايت واشكر كل من تفاعل مع البوست السابق... واتمنى من كل متضرر من قرض البنوك والفوائد المتراكمه زياره

هذا السايت الذي وضعه شخص كويتي كسب القضيه واخذ حقه من البنك وهو كفيل باعطاء كل متضرر طريقة الدعوى

وهي لا تحتاج الى محامي فشكرا من القلب اليك يا ابن الزامل على ما تفعله لابناء ديرتك ولم تبخل عليهم بما تعلم وهذا

ما تعودناه منكم يا اهل الكويت

---------------------------------

الفيديو اليوم اهداء حقي لاني دخنت وايد هاليومين من القهر :)